த⁴ம்மஸோண்ட³கவக்³கோ³

1. த⁴ம்மஸோண்ட³கஸ்ஸ வத்து²ம்ஹி அயமானுபுப்³பீ³கதா²

தத்த² தேஸம் வத்தூ²ன முப்பத்தியோ த்³விதா⁴ ப⁴வந்தி ஜம்பு³தீ³பே ஸீஹளதீ³பேசாதி, தத்த² ஜம்பு³தீ³பே தாளீஸ, ஸீஹளதீ³பே தேஸட்டி², தேஸு தாவ ஜம்பு³தீ³புப்பத்திவத்தூ²னி ஆவி ப⁴விஸ்ஸந்தி, ததோபி த⁴ம்மஸோண்ட³கஸ்ஸ வத்து² ஆதி³, கத²ம், அம்ஹாகம் கிர ப⁴க³வதோ புப்³பே³ இமஸ்மிம்யேவ ப⁴த்³த³கப்பே கஸ்ஸபோனாம ஸத்தா² லோகே உத³பாதி³, தஸ்ஸ கோ² பன ப⁴க³வதோ ஸாஸனந்தரதா⁴னதோ ந சிரேனேவ காலேன அம்ஹாகம் போ³தி⁴ஸத்தோ பா³ராணஸீரஞ்ஞோ அக்³க³மஹேஸியா குச்சி²ஸ்மிம் நிப்³ப³த்தி, தஸ்ஸு ப்பத்தி காலஸமனந்தரமேவ ஸப்³ப³ஸத்தானம் மனஸி த⁴ம்மஸஞ்ஞா உத³பாதி³, தஸ்மாஸ்ஸ த⁴ம்மஸோண்டோ³தினாம மகம்ஸு, ஸோ பனேஸோ குமாரோ மஹந்தேன பரிவாரேன வட்³டே⁴ந்தோ ஸப்³ப³ஸிப்பேஸு நிப்ப²த்திம் பத்வா பிதரா உபரஜ்ஜேன பூஜிதோ ஹுத்வா தா³னாத³யோ த³ஸகுஸலகம்மபதே² பூரேந்தோ பிதுஅச்சயேனாமச்சேஹி ரஜ்ஜேனாபி⁴ஸிஞ்சிதோ அஹோஸி, ஸோ பனேஸ த⁴ம்மஸோண்ட³கமஹாராஜா தே³வனக³ரஸதி³ஸே பா³ராணஸீனக³ரே சக்கவத்திஸதி³ஸம் பா³ராணஸீரஜ்ஜம் காரேந்தோ மாஸத்³த⁴மாஸச்சயேன ஸிரிஸயனக³தோ ஏவம் சிந்தேஸி, மமேவம் ரஜ்ஜஸிரிமனுப⁴வனம் ந ஸோப⁴தி த⁴ம்மவியோகே³ன, தி³வாகர விரஹிதோ நபோ⁴ வியாதிஆதி³னா நானாகாரணம் சிந்தேஸி, தேனேத்த².

1. புஞ்ஞேன ஸீலாதி³மயேன புப்³பே³,

கதேன பத்தோஸ்மி அதந்தி³தேன,

மஸக்கஸாரே விய தே³வராஜா;

ராஜத்தமித்³தே⁴ புரமுத்தமம்ஹி.

2. ரூபேன ஹாரீனயனுஸ்ஸவேன,

ஸத்³தே³ன ஸம்மா ஸவணாமதேன,

க³ந்தே⁴ன கா⁴னுஸ்ஸவஸோப⁴னேன,

ரஸஞ்ஞபுஞ்ஞேன ரஸேனசாபி.

3. ப²ஸ்ஸேன க³த்தஸ்ஸ ஸுப²ஸ்ஸதே³ன,

ஸமித்³தி⁴பத்தோஸ்மி மஹித்³தி⁴கோஹம்,

நேவேத்தகேனேவ பமாத³பா⁴வ,

மா பஜ்ஜிதும் யுத்தரூபந்தி ஞத்வா.

4. த³ஸ்ஸாமி அங்க³அபி ஜீவிதஞ்ச,

த⁴ஞ்ஞம் த⁴னம் சாபி பஸன்னசித்தோ,

ஸோஸ்ஸாமி த⁴ம்மம் ஸிவமாத³தா⁴னம்,

ஜினேரிதம் ஜாதிஜராபஹாணம்.

5. ந ஸோப⁴தி யதா²காஸம், ஜலம் தா⁴மபதிம்வினா,

ரஜ்ஜகரணம் ததா² மய்ஹம், வினா த⁴ம்மா ந ஸோப⁴தி.

6. ந ஸோப⁴தி ஹதா² ரத்தி, நிஸானாத²ம் வினா ஸதா³,

ரஜ்ஜகரணம் ததா² மய்ஹம், வினா த⁴ம்மா ந ஸோப⁴தி.

7. அலங்கதோபி சே ஹத்தீ², வினா தா³டா² ந ஸோப⁴தி,

ரஜ்ஜகரணம் ததா² மய்ஹம், வினா த⁴ம்மா ந ஸோப⁴தி.

8. யதா² கல்லோலமாலீயம்,

வினா வேலா ந ஸோப⁴தி,

ரஜ்ஜகரணம் ததா² மய்ஹம்,

வினா த⁴ம்மா ந ஸோப⁴தி.

9. யதா² ஸுமண்டி³தோ ராஜா,

குபடோ நேவ ஸோப⁴தி,

ரஜ்ஜகரணம் ததா² மய்ஹம்,

வினா த⁴ம்மா ந ஸோப⁴தி.

10. த⁴ம்மமேவ ஸுணிஸ்ஸாமி, த⁴ம்மே மே ரமதீ மனோ,

ந ஹி த⁴ம்மா பரம் அத்தி², த⁴ம்மமூலம் திஸம்பத³ந்தி.

ஏவம் சிந்தேத்வா பாதோவ ஸிரிக³ப்³பா⁴ நிக்க²ம்ம ஸுஸஜ்ஜிதே ஸமுஸ்ஸிதஸேதச்ச²த்தே ராஜபல்லேங்கே அமச்சக³ண பரிவுதோ நிஸீதி³ தே³வராஜாவிய விரோசமானோ, நிஸின்னோ பன ராஜா அமச்சே ஏவமாஹ, யோ பனேத்த² போ⁴ந்தோ பு³த்³த⁴பா⁴ஸிதேஸு த⁴ம்மேஸு கிஞ்சித⁴ம்மம் ஜானாதி, ஸோ பா⁴ஸது, ஸோதுமிச்சா²மித⁴ம்மந்தி, தே ஸப்³பே³பி மயம் தே³வ ந ஜானாமாதி ஆஹம்ஸு, தம் ஸுத்வா அ ந த்த ம நோ ராஜா ஏவம் சிந்தேஸி, யன்னூனாஹம் ஹத்தி²க்க²ந்தே⁴ ஸஹஸ்ஸம் ட²பேத்வா நக³ரே பே⁴ரிம்சராபேய்யம், யம் அப்பேவனாம கோசி த⁴னலோபே⁴ன சாதுப்பதி³காயபி கா³தா²ய த⁴ம்மம் தே³ஸேய்ய. தம் மே தீ³க⁴ரத்தம் ஹிதாய ஸுகா²ய ப⁴விஸ்ஸதீதி, ததோ ஸோ ததா² கத்வாபி த⁴ம்மதே³ஸகம் அலப⁴ந்தோ புன த்³விஸஹஸ்ஸம் திசதுபஞ்சஸஹஸ்ஸந்தியாவகோடிப்பகோடிம்த³ம்மீதி, ததோ கா³ம நிக³ம ஜனபதே³, ததோ ஸேட்டி²ட்டா²னம் ஸேனாபதி உபராஜட்டா²னா த³யோபி, புன ஸேதச்ச²த்தம் த³ம்மி, ராஜவேஸம் பஹாய அத்தானம் தா³ஸம் ஸாவேத்வா த⁴ம்மதே³ஸேந்தஸ்ஸ த³ம்மிதி வத்வா பே⁴ரி சராபேத்வாபி த⁴ம்ம தே³ஸகமலபி⁴த்வா ஸம்விக்³கோ³ கிம்மே த⁴ம்மவியோகே³ன ரஜ்ஜேனாதி அமச்சானம் ரஜ்ஜம் நீய்யாதேத்வா ஸத்³த⁴ம்மக³வேஸகோ த⁴ம்மஸோண்ட³கமஹாராஜா மஹாவனம் பாவிஸி கா³ம நிக³ம ராஜதா⁴னி பரம்பராய, தேனேத்த².

11. புரே பே⁴ரிம் சராபேத்வா,

த⁴ம்மஸோண்டோ³ நராதி⁴போ;

ஸத்³த⁴ம்மஜ்ஜே²ஸகம் ஸத்து²,

அலத்³தா⁴ த⁴னகோடிஹி.

12. தா³ஸோ ஹோமி பஹாயாஹம்,

ராஜத்தம் தே³ஸகஸ்ஸ மே;

இச்சாஹ ஸோ மஹீபாலோ,

அஹோ த⁴ம்மேஸு லோலதா.

13. ரஜ்ஜம் நீய்யாதயித்வான, அமச்சானம் மனோரமம்,

வனம் பாவிஸி ஸோ ராஜா, க³வேஸம் த⁴ம்மமுத்தமந்தி.

மஹாவனம் பவிட்ட²க்க²ணே பன மஹாஸத்தஸ்ஸ புஞ்ஞதேஜேன ஸக்கஸ்ஸாஸனம் உண்ஹாகாரம் த³ஸ்ஸேஸி, அத² தே³வராஜா சிந்தேஸி அகாமம் மே பண்டு³கம்ப³ல ஸிலாஸனம் உண்ஹமஹோஸி, கின்னுகோ² காரணந்தி லோகம் ஓலோகேந்தோ ஸக்கோ தே³வராஜா த⁴ம்மஸோண்ட³க மஹாராஜானம் ஸகலஜம்பு³தீ³பம் விசினித்வா ஸத்³த⁴ம்மஜ்ஜே²ஸகம் அலபி⁴த்வா வனம் பவிட்ட²பா⁴வம் அத்³த³ஸ, த⁴ம்மஸோண்ட³கமஹாராஜா ஸத்³த⁴ம்மத்தா²ய ரஜ்ஜ த⁴ன ப³ந்து⁴ ஜீவிதம்பி பஹாய அரஞ்ஞம் பவிட்டோ², ந ஸோ வதாயம் யோவா ஸோவா ஸத்தோ, இமஸ்மிம்யேவ கப்பே பு³த்³தோ⁴ ப⁴விஸ்ஸதி, பு³த்³த⁴போ³தி⁴ஸத்தோ சாயம் அஜ்ஜேவ மஹாரஞ்ஞம் பவிட்டோ² ஸத்³த⁴ம்மம் அலத்³தா⁴ மஹாது³க்க²ம் பாபுணேய்ய, ந சேதம் யுத்தம், அஜ்ஜ மயா தத்த² க³ந்த²ப்³ப³ம் த⁴ம்மாமதரஸேன தமபி⁴ஸிஞ்சித்வா ரஜ்ஜே பஹிட்டா²பேதுந்தி சிந்தேத்வா அத்தபா⁴வம் விஜஹித்வா ப⁴யானகம் மஹந்தம் ரக்க²ஸவேஸம் நிம்மிணித்வா மஹாஸத்தாபி⁴முகோ² அவிதூ³ரே அத்தானம் த³ஸ்ஸேஸி, தேனேத்த².

14. ப்³யக்³க⁴ச்ச²ஸீஹமஹிஸோ ரக³ஹத்தி²தீ³பி,

மிகா³குலம் கண்டகஸேலருக்க²ம்;

நரானமிந்தோ³ பவிஸித்வகானனம்,

இதோசிதோ விப்³ப⁴மி த⁴ம்மகாமோ.

15. தஸ்ஸானுபா⁴வேன புரிந்த³த³ஸ்ஸ,

ஸிலாஸனம் உண்ஹமஹோஸி காமம்;

தேனேவ ஸோ லோகமுதி³க்க²மானோ,

அத்³த³க்கி² தீ⁴ரம் விபினே சரந்தம்.

16. மயஜ்ஜ தம் த⁴ம்மரஸேன ஸம்மா,

ஸந்தப்பயித்வா க³மனம் வரந்தி;

மந்த்வா ஸுபீ⁴மஞ்ஜனகூடவண்ணம்,

மஹாமுக²ம் நிக்³க³த பீ⁴மதா³ட²ம்.

17. தி³த்தக்³கி³ஸங்காஸ விஸாலனேத்தம்,

மஜ்ஜே²ன ப⁴க்³க³ம் சிபிடக்³க³னாஸம்;

க²ரதம்ப³தா³டி²ம் க⁴னமஸ்ஸுவந்தம்,

நீலோத³ரம் க³ஜ்ஜிதபீ⁴மகோ⁴ஸம்.

18. கரோருஹம் திக்க²ஸலோஹிதாயதம்,

விஸாலதோ⁴தாயதக²க்³க³ஹத்த²ம்;

க³தா³யுதே⁴னங்கிதமஞ்ஞபா³ஹும்,

த³ட்டோ²ட்ட²பீ⁴மம் ஸவலீலலாடம்.

19. மனுஸ்ஸமம்ஸாத³னரத்தபானம்,

ப⁴யானகம் கக்க²லயக்க²வண்ணம்;

ஸுமாபயித்வான வனந்தரஸ்மிம்,

த³ஸ்ஸேஸி அத்தம் ஸ நராதி⁴பஸ்ஸாதி.

அத² மஹாஸத்தோ அத்தனோ அவிதூ³ரே டி²தம் ரக்க²ஸம் அத்³த³க்கி², தம் தி³ஸ்வானாஸ்ஸ ப⁴யம்வா ச²ம்பி⁴தத்தம்வா சித்து²த்ராஸமத்தம்வா நாஹோஸி, கிமத்ர சிந்தேஸி, அபினாம ஏவரூபோ பிரக்க²ஸோ த⁴ம்மம் ஜானேய்ய, யன்னூனாஹம் தஸ்ஸ ஸந்திகே த⁴ம்மம் ஸுணிஸ்ஸாமி, தம்மே தீ³க⁴ரத்தம் ஹிதாய ஸுகா²ய ப⁴விஸ்ஸதீதி சிந்தேஸி. சிந்தேத்வா சபன அஜ்ஜ மயா தமுபஸங்கம்ம புச்சி²தம் வட்டதீதி க³ந்த்வா ரக்க²ஸேன ஸத்³தி⁴ம் ஸல்லபந்தோ ஆஹ.

20. அஸ்மிம் வனஸ்மிம் தருஸண்ட³ மண்டி³தே;

ஸுபு²ல்லிதானேகலதாகுலாகுலே;

அதி⁴க்³க³ஹீதோ ஸி மஹானுபா⁴வ,

புச்சா²மி தம் தே³வ வதே³ஹி கங்க²ம்.

21. த⁴ம்மம் க³வேஸம் வனமாக³தோம்ஹி,

பஹாய ரஜ்ஜம் அபி ஞாதிஸங்க⁴ம்;

ஜானாஸி சே ஸம்ம வதே³ஹி மய்ஹம்,

ஏகம்பி கா³த²ம் ஸுக³தேன தே³ஸிதம்.

ததோ யக்கோ² ஆஹ.

22. த⁴ம்மம் பஜானாமஹமேகதே³ஸம்,

ஜினேரிதம் ஸாது⁴தரம் ரஸானம்,

தே³ஸேமி சேஹம் தவ த⁴ம்ம மக்³க³ம்,

துவஞ்ஹி கிம் காஹஸி தே³ஸகஸ்ஸாதி.

அத² மஹாஸத்தோ ஆஹ.

23. ரஜ்ஜே டி²தோ அஸ்ஸமஹம் ஸசே போ⁴,

அனப்பரூபம் பகரோமி பூஜம்;

இதா³னி ஏகோ வனமஜ்ஜ²பத்தோ,

கரோமி கிம் தே³ஹமிமம் ட²பேத்வா.

24. யதி³ச்ச²ஸி த்வம் மம மம்ஸலோஹிதம்,

கரோமஹம் ஸங்க³ஹமஜ்ஜ தேன,

ந சத்தி² அஞ்ஞம் தவ அச்சனீயம்,

தே³ஸேஹி த⁴ம்மம் ஸுக³த ப்பஸத்த²ந்தி.

ததோ யக்கோ² ஆஹ.

25. பு⁴த்வான மம்ஸம் ஸுஹிதோவ ஸந்தோ,

ஹந்த்வா பிபாஸம் ருதி⁴ரம் பிவித்வா;

த⁴ம்மம் கதே²தும் பப⁴வாமி துய்ஹம்,

வத்தும் ந ஸக்கோமி கு²தா³பரேதோதி.

அத² மஹாஸத்தோ ஆஹ.

26. பு⁴த்வா துவம் மம் பத²மஞ்ஹி யக்க²,

பச்சா² து தே³ஸேஸ்ஸஸி கஸ்ஸ த⁴ம்மம்;

த⁴ம்மஸ்ஸ மய்ஹம் தவ மம்ஸலாப⁴ம்,

த்வமேவ ஜானாஹி யதா² ப⁴வேய்யாதி.

ஏவம் வுத்தே ஸக்கோ தே³வானமிந்தோ³ ஸாது⁴ மஹாராஜ அஹமேவ யுத்தம் ஜானாமீதி வத்வா தஸ்ஸாவிதூ³ரே திகா³வுதுப்³பே³த⁴ம் அஞ்ஜனவண்ணம் மஹந்தம் பப்³ப³தம் மாபேத்வா மஹாராஜ இமமாருய்ஹ பப்³ப³தமுத்³த⁴னிட்டி²தோ மம முகே² பதது, அஹம் பதந்த²ஸ்ஸ தே த⁴ம்மம் தே³ஸேஸ்ஸாமி, ஏவம் ஸந்தே துய்ஹம் த⁴ம்மபடிலாபோ⁴, மய்ஹம்ச மம்ஸபடிலாபோ⁴ ப⁴விஸ்ஸதீதி. தம் ஸுத்வா மஹாஸத்தோ அனமதக்³கே³ ஸம்ஸாரே ஸம்ஸரதோ மே ஸீஹப்³யக்³க⁴ச்ச²மச்ச²கச்ச²பவிஹங்கா³தீ³னம் ப⁴க்க²பூ⁴தஸ்ஸ ஜாதீஸு பமாணம் நத்தி, அஜ்ஜ மயா ஸம்பு³த்³த⁴ஸ்ஸ த⁴ம்மத்தா²ய ஜீவிதம் பரிச்சஜிதும் வட்டதீதி சிந்தேத்வா ஏவமாஹ.

27. ஸம்ஸாரவட்டேஸு விவட்டமானா,

பப்போந்தி து³க்க²ம் ஜனதா அனேகா;

ஏதஞ்ஹி போ⁴ அத்தனோ வா பரஸ்ஸ,

அத்தா²ய நாஹோஸி அஹோஸி துச்ச²ம்.

28. த்வமதி³ன்னஹாரீ திச பாரதா³ரிகோ,

பாணாதிபாதீஸி முஸா அபா⁴ஸி;

த்வ மஜ்ஜபாயீதி அகாஸி தோ³ஸம்,

பக்³க³ய்ஹ து³க்க²ம் ப³ஹுஸோ த³த³ந்தி.

29. ஏதஞ்ஹி போ⁴ அத்தனோ வா பரஸ்ஸ,

அத்தா²ய நாஹோஸி அஹோஸி துச்ச²ம்;

ருக்கா² பபாதா பபதித்வகேசி,

து³ப்³ப³ந்தி⁴யா து³க்³க³விஸாத³னேன.

30. ப்³யாதீ⁴ஹி நானாக²ரவேத³னாஹி,

மரந்தி ஸத்தா உதுவேத³னாஹி;

ஏதஞ்ஹி போ⁴ அத்தனோ வா பரஸ்ஸ,

அத்தா²ய நாஹோஸி அஹோஸி துச்ச²ம்.

31. ப்³யக்³க⁴ச்ச²மச்சோ² ரக³குச்சி²யஞ்ஹி,

மதஸ்ஸ மே நத்தி² பமாணஸங்கா²;

ஏதஞ்ஹி போ⁴ அத்தனோ வா பரஸ்ஸ,

அத்தா²ய நாஹோஸி அஹோஸி துச்ச²ம்.

32. ஏதஜ்ஜ மே து³ச்ச ஜ மத்ததா³னம்,

ந ஹோதி தே³விஸ்ஸரியாதி³காய;

ஸப்³ப³ஞ்ஞுபா⁴வம் பன பாபுணித்வா,

ஸம்ஸாரதோ நித்தரணாய ஸத்தே.

33. த்வம் ஸம்ம மய்ஹம் ப³ஹுஸோ பகாரீ,

தஸ்மா தவேதம் வசனம் கரோமி;

அஸம்கிதோ தே³ஸய மய்ஹத⁴ம்மம்,

ஸமிஜ்ஜ²தே தா³னி மனோரதோ² தேதி.

ஏவஞ்ச பன வத்வா மஹாஸத்தோ பப்³ப³தமாருய்ஹ டி²தோ ஆஹ, அஹமஜ்ஜ ரஜ்ஜேன ஸத்³தி⁴ம் ஜீவிதஞ்ச ஸரீரமம்ஸஞ்ச ஸத்³த⁴ம்மத்தா²ய த³ம்மீதி ஸோமனஸ்ஸப்பத்தோ ஹுத்வா ஸம்ம த⁴ம்மம் தே³ஸேஹீதி வத்வா தஸ்மிம் மஹாதா³ட²ம் மஹாமுக²ம் விவரித்வா டி²தே தஸ்ஸாபி⁴முகோ² உபபதி. அத² ஸக்கோ தே³வானமிந்தோ³ ஸோமனஸ்ஸோ அச்ச²ரியப்பத்தோ அத்தபா⁴வம் விஜஹித்வா அலங்கததி³ப்³ப³த்தபா⁴வம் மாபேத்வா ஆகாஸே தருணஸுரியோ விய ஓபா⁴ஸமானோ ஆகாஸதோ பதந்தம் மஹாஸத்தம் உபோ⁴ஹி ஹத்தே²ஹி த³ள்ஹம் பதிக³ண்ஹித்வா தே³வலோகம் நேத்வா பண்டு³கம்ப³ல ஸிலாஸனே நிஸீதா³பேத்வா தி³ப்³ப³மயேஹி க³ந்த⁴மாலாதீ³ஹி பூஜேத்வா ஸயம் த⁴ம்மம் ஸுத்வா பஸன்னோ பஸன்னாகாரம் கத்வா கஸ்ஸபத³ஸப³லேன தே³ஸிதாய அனிச்சாதி³பரிதீ³பிகாய.

34. அனிச்சாவ த ஸங்கா²ரா, உப்பாத³வயத⁴ம்மினோ;

உப்பஜ்ஜித்வா நிருஜ்ஜ²ந்தி, தேஸம் வூபஸமோ ஸுகோ²தி.

கா³தா²ய த⁴ம்மதே³ஸனேன தஸ்ஸ மனோரத²ம் மத்த²கம் பாபேத்வா தே³வலோகே மஹந்தம் ஸிரிவிப⁴வம் த³ஸ்ஸேத்வா ஆனேத்வா ஸகரஜ்ஜேயேவ பதிட்டா²பேத்வா அப்பமத்தோ ஹோதி மஹாராஜாதி ஓவதி³த்வா தே³வலோகமேவ அக³மாஸீதி.

35. இதி அமிதஸிரிம் வா ஜீவிதம் வாபி ஸந்தோ,

ந ஸுமரிய பஸத்த²ம் த⁴ம்மமேவா சரந்தி;

தனுதர விப⁴வானம் அப்பமாயூனமம்போ⁴,

இஹ குஸலபமாதோ³ கோ நு தும்ஹாதி³ஸானந்தி.

த⁴ம்மஸோண்ட³கவத்து²ம் பட²மம்.

2. மிக³லுத்³த³கஸ்ஸ வத்து²ம்ஹி அயமானுபுப்³பி³கதா²

இதோ கிர ஏக திம்ஸதிமே கப்பே ஸிகீ²னாம ஸம்மாஸம்பு³த்³தோ⁴ ஸமதிம்ஸ பாரமியோ பூரேத்வா பரமாதிஸம்போ³தி⁴ம் பத்வா ஸதே³வகம் லோகம் ஸம்ஸாரகந்தாரா உத்தாரேந்தோ த⁴ம்மரதனவஸ்ஸம் வஸ்ஸாபேந்தோ த⁴ம்மபே⁴ரிம்பஹரந்தோ த⁴ம்மகேதும் உஸ்ஸாபேந்தோ ஏகஸ்மிம் ஸமயே விவேக மனுப்³ரூஹந்தோ அரஞ்ஞாயதனம் பாவிஸி, பவிஸித்வா சபன ஸுபுப்பி²தனாக³புன்னாகா³தி³னானாதருஸண்ட³மண்டி³தே ஸுபு²ல்லஸுமனமாலதிப்பபு⁴தினானாலதாகுலே அனேகவித⁴தி³பத³சதுப்பத³ஸங்க⁴னிஸேவிதே ரமணீயே ஸீதலஸிலாதலே சதுக்³கு³ணம் ஸங்கா⁴டிம்பஞ்ஞபேத்வா நிஸீதி³ ச²ப்³ப³ண்ணரம்ஸீஹி தி³ஸம் பூரயந்தோ, ததா³ தத்த² தே³வப்³ரஹ்மனாக³ஸுபண்ணாத³யோ ஸன்னிபதித்வா தி³ப்³ப³மயேஹி க³ந்த⁴மாலாதீ³ஹி ப⁴க³வந்தம் பூஜயமானா தோ²மயமானா நமஸ்ஸமானா அட்ட²ம்ஸு, தஸ்மிம் பனஸமாக³மே ப⁴க³வா மது⁴ரஸ்ஸரம் நிச்சா²ரேந்தோ ப்³ரஹ்மகோ⁴ஸேன சதுஸச்சபடிஸம்யுத்தம் த⁴ம்மம் தே³ஸேதி அமதவஸ்ஸம் வஸ்ஸாபேந்தோவிய. ததா³ ஏகோ மிக³லுத்³த³கோ வனம் பவிட்டோ² மிக³ஸூகரே ஹந்த்வா மம்ஸம் கா²த³ந்தோ தம் டா²னம் பத்வா அத்³த³ஸ ப⁴க³வந்தம் த⁴ம்மம் தே³ஸேந்தம். தி³ஸ்வா ஏகமந்தம் டி²தோ த⁴ம்மம் ஸுத்வா சித்தம் பஸாதே³த்வா ததோ சுதோ தே³வலோகே நிப்³ப³த்தித்வா ச²ஸு காமஸக்³கே³ஸு மனுஸ்ஸேஸுச அபராபரம் இஸ்ஸரியம் அனுப⁴வந்தோ இமஸ்மிம் பு³த்³து⁴ப்பாதே³ ஸாவத்தி²யம் குலகே³ஹே நிப்³ப³த்தித்வா விஞ்ஞுதம் பத்தோ ப⁴க³வதோ ஸாஸனே பப்³ப³ஜித்வா ஏகதி³வஸம் த⁴ம்மம் தே³ஸேந்தஸ்ஸ ப⁴க³வதோ சதுஸச்சபதி ஸம்யுத்தம் த⁴ம்மகத²ம் ஸுத்வா சதுபடிஸம்பி⁴தா³ஹி அரஹத்தம் பத்வா ஏகதி³வஸம் பி⁴க்கு²ஸங்க⁴மஜ்ஜ²க³தோ அத்தனோ கதகம்மப்பகாஸனேன பீதிவாசமுதா³ஹரி.

1. ஏ க திம் ஸே இதோ கப்பே,

லோகே உப்பஜ்ஜி நாயகோ;

பத்திம்ஸ லக்க²ணாதிண்ணோ,

ஸம்பு³த்³தோ⁴ ஸ ஸிகீ²வ்ஹயோ.

2. ஜலந்தோ தீ³பருக்கோ²வ, ஸூரியோவ நப⁴ முக்³க³தோ;

மேருராஜாவ ஸம்பு³த்³தோ⁴, ஜனேஸக்³கோ³ பதாபவா.