8. வத்தக்க²ந்த⁴க

புச்சா² – ஆக³ந்துகானம் ஆவுஸோ பி⁴க்கூ²னம் வத்தம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே ஆக³ந்துகே பி⁴க்கூ² ஆரப்³ப⁴ பஞ்ஞத்தம், ஆக³ந்துகா ப⁴ந்தே பி⁴க்கூ² ஸஉபாஹனாபி ஆராமம் பவிஸிம்ஸு, ச²த்தபக்³க³ஹிதாபி ஆராமம் பவிஸிம்ஸு, ஓகு³ண்டி²தாபி ஆராமம் பவிஸிம்ஸு, ஸீஸேபி சீவரம் கரித்வா ஆராமம் பவிஸிம்ஸு, பானீயேனபி பாதே³ தோ³விம்ஸு, வுட்³ட⁴தரேபி ஆவாஸிகே பி⁴க்கூ² நாபி⁴வாதே³ஸும், நபி ஸேனாஸனம் புச்சி²ம்ஸு, தஸ்மிம் ப⁴ந்தே வத்து²ஸ்மிம் ‘‘தேன ஹி பி⁴க்க²வே ஆக³ந்துகானம் பி⁴க்கூ²னம் வத்தம் பஞ்ஞபேஸ்ஸாமி, யதா² ஆக³ந்துகேஹி பி⁴க்கூ²ஹி ஸம்மா வத்திதப்³ப³ம், ஆக³ந்துகேன பி⁴க்க²வே பி⁴க்கு²னா இதா³னி ஆராமம் பவிஸிஸ்ஸாமீதி உபாஹனா ஓமுஞ்சித்வா நீசம் கத்வா பப்போ²டேத்வா க³ஹேத்வா ச²த்தம் அபனாமேத்வா ஸீஸம் விவரித்வா ஸீஸே சீவரம் க²ந்தே⁴ கத்வா ஸாது⁴கம் அதரமானேன ஆராமோ பவிஸிதப்³போ³’’ ஏவமாதி³னா ப⁴ந்தே ஆக³ந்துகானம் பி⁴க்கூ²னம் வத்தம் பஞ்ஞத்தம்.

புச்சா² – ஆவாஸிகானம் ஆவுஸோ பி⁴க்கூ²னம் வத்தம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம், கத²ஞ்ச பன பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே ஆவாஸிகே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே ஆவாஸிகா பி⁴க்கூ² ஆக³ந்துகே பி⁴க்கூ² தி³ஸ்வா நேவ ஆஸனம் பஞ்ஞபேஸும், ந பாதோ³த³கம் பாத³பீட²ம் பாத³கத²லிகம் உபனிக்கி²பிம்ஸு, ந பச்சுக்³க³ந்த்வா பத்தசீவரம் படிக்³க³ஹேஸும், ந ஸேனாஸனம் பஞ்ஞபேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம், தஸ்மிம் ப⁴ந்தே வத்து²ஸ்மிம் –

‘‘ஆவாஸிகேன பி⁴க்க²வே பி⁴க்கு²னா ஆக³ந்துகம் பி⁴க்கு²ம் வுட்³ட⁴தரம் தி³ஸ்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், பச்சுக்³க³ந்த்வா பத்தசீவரம் படிக்³க³ஹேதப்³ப³ம் பானீயேன புச்சி²தப்³போ³’’ ஏவமாதி³னா ப⁴ந்தே ஆவாஸிகானம் பி⁴க்கூ²னம் வத்தம் ப⁴க³வதா பஞ்ஞத்தம்.

புச்சா² – க³மிகானம் ஆவுஸோ பி⁴க்கூ²னம் வத்தம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம், கத²ஞ்சபன பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே க³மிகே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே க³மிகா பி⁴க்கூ² தா³ருப⁴ண்ட³ம் மத்திகாப⁴ண்ட³ம் அப்படிஸாமேத்வா த்³வாரவாதபானம் விவரித்வா ஸேனாஸனம் அனாபுச்சா² பக்கமிம்ஸு, தஸ்மிம் ப⁴ந்தே வத்து²ஸ்மிம் ‘‘க³மிகேன பி⁴க்க²வே பி⁴க்கு²னா தா³ருப⁴ண்ட³ம் படிஸாமேத்வா த்³வாரவாதபானம் த²கேத்வா ஸேனாஸனம் ஆபுச்சா² பக்கமிதப்³ப³ம்’’ ஏவமாதி³னா ப⁴ந்தே ஆகாரேன ப⁴க³வதா க³மிகானம் பி⁴க்கூ²னம் வத்தம் பஞ்ஞத்தம்.

புச்சா² – ப⁴த்தக்³கே³ ஆவுஸோ அனுமோதி³தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² ப⁴த்தக்³கே³ நானுமோதி³ம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – பி⁴க்கூ²னம் ஆவுஸோ ப⁴த்தக்³க³வத்தம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ம் க³ச்சி²ம்ஸு, தஸ்மிம் ப⁴ந்தே வத்து²ஸ்மிம் ‘‘ஸசே ஆராமே காலோ ஆரோசிதோ ஹோதி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா ஸாது⁴கம் அதரமானேன கா³மோ பவிஸிதப்³போ³’’தி ஏவமாதி³னா ப⁴ந்தே ப⁴த்தக்³க³வத்தம் பஞ்ஞத்தம்.

புச்சா² – பி⁴க்கூ²னம் ஆவுஸோ ஸேனாஸனவத்தம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம், கத²ஞ்ச தம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² பி⁴க்கூ²ஸு அஜ்ஜோ²காஸே சீவரம் கரோந்தேஸு படிவாதே அங்க³ணே ஸேனாஸனம் பப்போ²டேஸும், தஸ்மிம் ப⁴ந்தே வத்து²ஸ்மிம் ‘‘யஸ்மிம் விஹாரே விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி ஸோதே⁴தப்³போ³’’தி ஏவமாதி³னா ப⁴ந்தே பி⁴க்கூ²னம் ஸேனாஸனவத்தம் ப⁴க³வதா பஞ்ஞத்தம்.

புச்சா² – ஸமாசாரம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – ஸமாசாரம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.