சூளவக்³க³பாளி

1. கம்ப³க்க²ந்த⁴க

புச்சா² – ப⁴ண்ட³னாதி³காரகஸ்ஸ ஆவுஸோ பி⁴க்கு²னோ தஜ்ஜனீயகம்மம் காதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே பண்டு³கலோஹிதகே பி⁴க்கூ² ஆரப்³ப⁴ அனுஞ்ஞாதம், பண்டு³கலோஹிதகா ப⁴ந்தே பி⁴க்கூ² அத்தனா ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தே உபஸங்கமித்வா ஏவமாஹம்ஸு ‘‘மா கோ² தும்ஹே ஆயஸ்மந்தோ ஏஸோ அஜேஸி, ப³லவாப³லவம் படிமந்தேத², தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச, மா சஸ்ஸ பா⁴யித்த², மயம்பி தும்ஹாகம் பக்கா² ப⁴விஸ்ஸாமா’’தி, தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸம்வத்தந்தி. தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – தஜ்ஜனீயகம்மகதஸ்ஸ ஆவுஸோ பி⁴க்கு²னோ கதிஸு வத்தேஸு ஸம்மா வத்தந்தஸ்ஸ தம் கம்மம் படிப்பஸ்ஸம்பே⁴தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – அட்டா²ரஸஸு ப⁴ந்தே வத்தேஸு ஸம்மா வத்தந்தஸ்ஸ தஜ்ஜனீயகம்மகதஸ்ஸ பி⁴க்கு²னோ தம் கம்மம் படிப்பஸ்ஸம்பே⁴தும் ப⁴க³வதா ஸாவத்தி²யம் அனுஞ்ஞாதம், தேயேவ பண்டு³கலோஹிதகா பி⁴க்கூ² ஸங்கே⁴ன தஜ்ஜனீயகம்மகதா ஸம்மா வத்தித்வா ஸங்க⁴ம் உபஸங்கமித்வா யாசிம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – பா³லஸ்ஸ ஆவுஸோ அப்³யத்தஸ்ஸ ஆபத்திப³ஹுலஸ்ஸ அனபதா³னஸ்ஸ கி³ஹிஸம்ஸட்ட²ஸ்ஸ அனனுலோமிகேஹி கி³ஹிஸம்ஸக்³கே³ஹி நியஸ்ஸகம்மம் காதும் கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் ஸேய்யஸகம் ஆரப்³ப⁴ பஞ்ஞத்தம், ஆயஸ்மா ப⁴ந்தே ஸேய்யஸகோ பா³லோ அஹோஸி அப்³யத்தோ ஆபத்திப³ஹுலோ அனபதா³னோ கி³ஹிஸம்ஸட்டோ² விஹாஸி அனனுலோமிகேஹி கி³ஹிஸம்ஸக்³கே³ஹி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – நியஸ்ஸகம்மகதஸ்ஸ ஆவுஸோ பி⁴க்கு²னோ கதிஸு வத்தேஸு ஸம்மா வத்தந்தஸ்ஸ தம் கம்மம் படிப்பஸ்ஸம்பே⁴தும் ப⁴க³வதா அனுஞ்ஞாதம்.

விஸ்ஸஜ்ஜனா – அட்டா²ரஸஸு ப⁴ந்தே வத்தேஸு ஸம்மா வத்தந்தஸ்ஸ நியஸ்ஸ கம்மகதஸ்ஸ பி⁴க்கு²னோ தம் கம்மம் படிப்பஸ்ஸம்பே⁴தும் ப⁴க³வதா அனுஞ்ஞாதம், ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேனபி பி⁴க்கு²னியோ ந ஓவதி³தப்³பா³, ஏவமாதீ³ஸு ப⁴ந்தே அட்டா²ரஸஸு வத்தேஸு ஸம்மா வத்தந்தஸ்ஸ நியஸ்ஸகம்மகதஸ்ஸ பி⁴க்கு²னோ தம் கம்மம் படிப்பஸ்ஸம்பே⁴தும் ப⁴க³வதா அனுஞ்ஞாதம்.

புச்சா² – குலதூ³ஸகஸ்ஸ ஆவுஸோ பாபஸமாசாரஸ்ஸ பி⁴க்கு²னோ பப்³பா³ஜனீயகம்மம் காதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே அஸ்ஸஜிபுனப்³ப³ஸுகே பி⁴க்கூ² ஆரப்³ப⁴ அனுஞ்ஞாதம், அஸ்ஸஜிபுனப்³ப³ஸுகா ப⁴ந்தே பி⁴க்கூ² கீடாகி³ரிஸ்மிம் குலதூ³ஸகா அஹேஸும் பாபஸமாசாரா, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – படிஸாரணீயகம்மம் ஆவுஸோ புச்சா²மி, ஸத்³த⁴ம் ஆவுஸோ பஸன்னம் க³ஹபதிம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேந்தஸ்ஸ பி⁴க்கு²னோ படிஸாரணீயகம்மம் காதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் ஸுத⁴ம்மம் ஆரப்³ப⁴ அனுஞ்ஞாதம், ப⁴க³வதி ப⁴ந்தே ஸாவத்தி²யம் விஹரதி ஆயஸ்மா ஸுத⁴ம்மோ மச்சி²காஸண்டே³ சித்தம் க³ஹபதிம் ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேஸி ஹீனேன வம்பே⁴ஸி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

தேனஹி பி⁴க்க²வே ஸங்கோ⁴ ஸுத⁴ம்மஸ்ஸ பி⁴க்கு²னோ படிஸாரணீயகம்மம் கரோது ‘‘சித்தோ தே க³ஹபதி க²மாபேதப்³போ³’’தி –

புச்சா² – படிஸாரணீயகம்மகதஸ்ஸ ஆவுஸோ பி⁴க்கு²னோ அனுதூ³தம் தா³துஞ்ச தேன அனுதூ³தேன ஸத்³தி⁴ம் க³ந்த்வா யதா²கு²ம்ஸிதம் க³ஹபதிம் க²மாபேதும் ச ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம்யேவ ஸுத⁴ம்மம் ஆரப்³ப⁴ அனுஞ்ஞாதம், ஆயஸ்மா ப⁴ந்தே ஸுத⁴ம்மோ மச்சி²காஸண்ட³ம் க³ந்த்வா மங்குபூ⁴தோ நாஸக்கி² சித்தம் க³ஹபதிம் க²மாபேதும், தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – படிஸாரணீயகம்மகதஸ்ஸ ஆவுஸோ பி⁴க்கு²னோ கதிஸு வத்தேஸு ஸம்மா வத்தந்தஸ்ஸ தம் கம்மம் படிப்பஸ்ஸம்பே⁴தும் ப⁴க³வதா அனுஞ்ஞாதம்.

விஸ்ஸஜ்ஜனா – அட்டா²ரஸஸு ப⁴ந்தே வத்தேஸு ஸம்மா வத்தந்தஸ்ஸ படிஸாரணீய கம்மகதஸ்ஸ பி⁴க்கு²னோ தம் கம்மம் படிப்பஸ்ஸம்பே⁴தும் ப⁴க³வதா அனுஞ்ஞாதம்.

புச்சா² – ஆபத்திம் ஆவுஸோ ஆபஜ்ஜித்வா தம் ஆபத்திம் பஸ்ஸிதும் வா படிகாதும் வா ந இச்ச²ந்தஸ்ஸ பி⁴க்கு²னோ ஆபத்தியா அத³ஸ்ஸனே வா அப்படிகம்மே வா உக்கே²பனீயகம்மம் காதும் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – கோஸம்பி³யம் ப⁴ந்தே ஆயஸ்மந்தம் ச²ன்னத்தே²ரம் ஆரப்³ப⁴ பஞ்ஞத்தம், ஆயஸ்மா ப⁴ந்தே ச²ன்னோ ஆபத்திம் ஆபஜ்ஜித்வா ந இச்சி² தம் ஆபத்திம் பஸ்ஸிதும் வா படிகாதும் வா, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஆபத்தியா ஆவுஸோ அத³ஸ்ஸனேன வா அப்படிகம்மே வா உக்கே²பனீய கம்மகதேன பி⁴க்கு²னா கதிஸு வத்தேஸு ஸம்மா வத்திதப்³ப³ம்.

விஸ்ஸஜ்ஜனா – தேசத்தாலீஸாய ப⁴ந்தே வத்தேஸு ஸம்மா வத்திதப்³ப³ம்.

புச்சா² – உக்கே²பனீயகம்மகதஸ்ஸ ஆவுஸோ பி⁴க்கு²னோ ஸம்மா வத்தந்தஸ்ஸ தம் கம்மம் படிப்பஸ்ஸம்பே⁴தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – கோஸம்பி³யம் ப⁴ந்தே ஆயஸ்மந்தம்யேவ ச²ன்னம் ஆரப்³ப⁴ அனுஞ்ஞாதம், ஆயஸ்மா ப⁴ந்தே ச²ன்னோ ஸங்கே⁴ன ஆபத்தியா அத³ஸ்ஸனே வா அப்படிகம்மே வா உக்கே²பனீயகம்மகதோ ஸம்மா வத்தேஸி லோமம்பாதேஸி நேத்தா²ரம் வத்தேஸி ஸங்க⁴ம் உபஸங்கமித்வா தஸ்ஸ கம்மஸ்ஸ படிப்பஸ்ஸத்³தி⁴யா யாசி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – பாபிகம் ஆவுஸோ தி³ட்டி²ம் க³ஹேத்வா தம் தி³ட்டி²ம் ந படினிஸ்ஸஜ்ஜந்தஸ்ஸ பாபிகாய தி³ட்டி²யா அப்படினிஸ்ஸக்³கே³ உக்கே²பனீயகம்மம் காதும் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே அரிட்ட²ம் பி⁴க்கு²ம் க³த்³த⁴பா³தி⁴புப்³ப³ம் ஆரப்³ப⁴ பஞ்ஞத்தம், ப⁴க³வதி ப⁴ந்தே ஸாவத்தி²யம் விஹரதி அரிட்ட²ஸ்ஸ நாம பி⁴க்கு²னோ க³த்³த⁴பா³தி⁴புப்³ப³ஸ்ஸ ஏவரூபம் பாபகம் தி³ட்டி²க³தம் உப்பன்னம் அஹோஸி ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமி, யதா²யேமே அந்தராயிகா த⁴ம்மா வுத்தா ப⁴க³வதா, தே படிஸேவதோ நாலம் அந்தராயாயா’’தி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பாபிகாய ஆவுஸோ தி³ட்டி²யா அப்படினிஸ்ஸக்³கே³ உக்கே²பனீயகம்மகதேன பி⁴க்கு²னா கதிஸு வத்தேஸு ஸம்மா வத்திதப்³ப³ம்.

விஸ்ஸஜ்ஜனா – தேசத்தாலீஸாய ப⁴ந்தே வத்தேஸு ஸம்மா வத்திதப்³ப³ம்.

புச்சா² – கம்மக்க²ந்த⁴கம் புச்சி²ஸ்ஸம், ஸனிதா³னி ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – கம்மக்க²ந்த⁴கம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.

2. பாரிவாஸிகக்க²ந்த⁴க

புச்சா² – பாரிவாஸிகஸ்ஸ ஆவுஸோ பகதத்தானம் பி⁴க்கூ²னம் அபி⁴வாத³னாதீ³னி ஸாதி³யந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே பாரிவாஸிகே பி⁴க்கூ² ஆரப்³ப⁴ பஞ்ஞத்தம், பாரிவாஸிகா ப⁴ந்தே பி⁴க்கூ² ஸாதி³யிம்ஸு பகதத்தானம் பி⁴க்கூ²னம் அபி⁴வாத³னாதீ³னி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பாரிவாஸிகேன ஆவுஸோ பி⁴க்கு²னா கதிஸு வத்தேஸு ஸம்மா வத்திதப்³ப³ம்.

விஸ்ஸஜ்ஜனா – பாரிவாஸிகேன ப⁴ந்தே பி⁴க்கு²னா சதுனவுதியா வத்தேஸு ஸம்மா வத்திதப்³ப³ம்.

புச்சா² – பாரிவாஸிகம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – பாரிவாஸிகம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.

3. ஸமுச்சயக்க²ந்த⁴க

புச்சா² – ஸமுச்சயம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – ஸமுச்சயம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.

4. ஸமத²க்க²ந்த⁴க

புச்சா² – அஸம்முகீ²பூ⁴தானம் ஆவுஸோ பி⁴க்கூ²னம் தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா கம்மம் கரோந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² அஸம்முகீ²பூ⁴தானம் பி⁴க்கூ²னம் கம்மம் அகம்ஸு தஜ்ஜனீயம்பி நியஸ்ஸம்பி பப்³பா³ஜனீயம்பி படிஸாரணீயம்பி உக்கே²பனீயம்பி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஸதிவேபுல்லபத்தஸ்ஸ ஆவுஸோ பி⁴க்கு²னோ ஸதிவினயம் தா³னம் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே மேத்தியபூ⁴மஜகே பி⁴க்கூ² ஆரப்³ப⁴ அனுஞ்ஞாதம் மேத்தியபூ⁴மஜகா ப⁴ந்தே பி⁴க்கூ² ஆயஸ்மந்தம் த³ப்³ப³ம் மல்லபுத்தம் அமூலிகாய ஸீலவிபத்தியா அனுத்³த⁴ம்ஸேஸும், தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – கதிபனாவுஸோ ஏத்த² த⁴ம்மிகானி ஸதிவினயதா³னானி.

விஸ்ஸஜ்ஜனா – பஞ்சிமானி ப⁴ந்தே த⁴ம்மிகானி ஸதிவினயஸ்ஸ தா³னானி, ஸுத்³தோ⁴ ஹோதி பி⁴க்கு² அனாபத்திகோ, அனுவத³ந்தி ச நம், யாசதி ச, தஸ்ஸ ஸங்கோ⁴ ஸதிவினயம் தே³தி த⁴ம்மேன ஸமக்³கே³ன, இமானி கோ² ப⁴ந்தே பஞ்ச த⁴ம்மிகானி ஸதி வினயஸ்ஸ தா³னானி.

புச்சா² – அமூள்ஹஸ்ஸ ஆவுஸோ பி⁴க்கு²னோ அமூள்ஹவினயம் தா³தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² க³க்³க³ம் பி⁴க்கு²ம் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ஸும் ‘‘ஸரதா யஸ்மா ஏவரூபிம் ஆபத்திம் ஆபஜ்ஜிதா’’தி, ஸோ ஏவம் வதே³தி ‘‘அஹம் கோ² ஆவுஸோ உம்மத்தகோ அஹோஸி சித்தவிபரியாஸகதோ, தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம், நாஹம் தம் ஸராமி, மூள்ஹேன மே ஏதம் கத’’ந்தி. ஏவம்பி நம் வுச்சமானா சோதே³ந்தேவ ‘‘ஸரதா யஸ்மா ஏவரூபிம் ஆபத்திம் ஆபஜ்ஜிதா’’தி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – கதி ஆவுஸோ அத⁴ம்மிகானி அமூள்ஹவினயஸ்ஸ தா³னானி, விப⁴ஜித்வா கதே²ஹி.

விஸ்ஸஜ்ஜனா – தீணி ப⁴ந்தே அத⁴ம்மிகானி அமூள்ஹவினயஸ்ஸ தா³னானி, இத⁴ ப⁴ந்தே பி⁴க்கு² ஆபத்திம் ஆபன்னோ ஹோதி, தமேனம் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’’தி, ஸோ ஸரமானோவ ஏவம் வதே³தி ‘‘ந கோ² அஹம் ஆவுஸோ ஸராமி ஏவரூபிம் ஆபத்திம் ஆபஜ்ஜிதா’’தி. அஞ்ஞோ ஸரமானோவ ஏவம் வதே³தி ‘‘ஸராமி கோ² அஹம் ஆவுஸோ யதா² ஸுபினந்தேனா’’தி. அஞ்ஞோ அனும்மத்தகோவ உம்மத்தகாலயம் கரோதி ‘‘அஹம்பி கோ² ஏவம் கரோமி, தும்ஹேபி ஏவம் கரோத², மய்ஹம்பி ஏதம் கப்பதி, தும்ஹாகம்பேதம் கப்பதீ’’தி. ஏஸம் ஸங்கோ⁴ அமூள்ஹவினயம் தே³தி, அத⁴ம்மிகம் ப⁴ந்தே அமூள்ஹவினயஸ்ஸ தா³னம். இமானி கோ² ப⁴ந்தே தீணி அத⁴ம்மிகானி அமூள்ஹவினயஸ்ஸ தா³னானி.

புச்சா² – கதி ஆவுஸோ த⁴ம்மிகானி அமூள்ஹவினயஸ்ஸ தா³னானி, விப⁴ஜித்வா கதே²ஹி.

விஸ்ஸஜ்ஜனா – தீணி ப⁴ந்தே த⁴ம்மிகானி அமூள்ஹவினயஸ்ஸ தா³னானி, இத⁴ ப⁴ந்தே பி⁴க்கு² உம்மத்தகோ ஹோதி சித்தவிபரியாஸகதோ தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் ஹோதி பா⁴ஸிதபரிக்கந்தம், தமேனம் சோதே³தி ஸங்கோ⁴ வா ஸம்ப³ஹுலா வா ஏகபுக்³க³லோ வா ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’’தி, ஸோ அஸ்ஸரமானோவ ஏவம் வதே³தி ‘‘ந கோ² அஹம் ஆவுஸோ ஸராமி ஏவரூபிம் ஆபத்திம் ஆபஜ்ஜிதா’’தி. அஞ்ஞோபி அஸ்ஸரமானோவ ஏவம் வதே³தி ‘‘ஸராமி கோ² அஹம் ஆவுஸோ யதா² ஸுபினந்தேனா’’தி. அஞ்ஞோபி உம்மத்தகோவ உம்மத்தகாலயம் கரோதி ‘‘அஹம்பி ஏவம் கரோமி, தும்ஹேபி ஏவம் கரோத², மய்ஹம்பி ஏதம் கப்பதி, தும்ஹாகம்பேதம் கப்பதீ’’தி. ஏஸம் ப⁴ந்தே திண்ணம் பி⁴க்கூ²னம் ஸங்கோ⁴ அமூள்ஹவினயம் தே³தி, த⁴ம்மிகம் ப⁴ந்தே அமூள்ஹவினயஸ்ஸ தா³னம். இமானி கோ² ப⁴ந்தே தீணி த⁴ம்மிகானி அமூள்ஹவினயஸ்ஸ தா³னானி.

புச்சா² – அப்படிஞ்ஞாய ஆவுஸோ பி⁴க்கூ²னம் தஜ்ஜனீயாதீ³னி கம்மானி கரோந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² அப்படிஞ்ஞாய பி⁴க்கூ²னம் கம்மானி அகம்ஸு தஜ்ஜனீயாதீ³னி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கத²ம் ஆவுஸோ அத⁴ம்மிகம் ஹோதி படிஞ்ஞாதகரணம்.

விஸ்ஸஜ்ஜனா – அஞ்ஞதா² ப⁴ந்தே ஆபத்திம் ஆபஜ்ஜந்தஸ்ஸ அஞ்ஞதா² படிஜானந்தஸ்ஸ யதா² ஸோ படிஜானாதி, ததா² ஸங்கோ⁴ காரேதி, ஏவம் கோ² ப⁴ந்தே அத⁴ம்மிகம் ஹோதி படிஞ்ஞாதகரணம்.

புச்சா² – கத²ம் ஆவுஸோ த⁴ம்மிகம் ஹோதி படிஞ்ஞாதகரணம்.

விஸ்ஸஜ்ஜனா – யம் ப⁴ந்தே ஆபத்திம் ஆபஜ்ஜந்தஸ்ஸ தமேவ படிஜானந்தஸ்ஸ தேனேவ ஸங்கோ⁴ காரேதி, ஏவம் கோ² ப⁴ந்தே த⁴ம்மிகம் படிஞ்ஞாதகரணம்.

புச்சா² – யேபு⁴ய்யஸிகாய ஆவுஸோ அதி⁴கரணம் வூபஸமேதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞம் முக²ஸத்தீஹி விதுத³ந்தா விஹரிம்ஸு, ந ஸக்கோந்தி தம் அதி⁴கரணம் வூபஸமேதும், தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – கத²ம் ஆவுஸோ அதி⁴கரணம் யேபு⁴ய்யஸிகாய வூபஸமேதப்³ப³ம்.

விஸ்ஸஜ்ஜனா – பஞ்சஹி ப⁴ந்தே அங்கே³ஹி ஸமன்னாக³தோ பி⁴க்கு² ஸலாகக்³கா³ஹாபகோ ஸம்மன்னிதப்³போ³, தேன ப⁴ந்தே ஸலாகக்³கா³ஹாபகேன ஸலாகா கா³ஹாதப்³பா³ யதா² ப³ஹுதரா பி⁴க்கூ² த⁴ம்மவாதி³னோ வத³ந்தி ததா² தம் அதி⁴கரணம் வூபஸமேதப்³ப³ம், ஏவம் கோ² ப⁴ந்தே யேபு⁴ய்யஸிகாய அதி⁴கரணம் வூபஸமேதப்³ப³ம்.

புச்சா² – கதி ஆவுஸோ அத⁴ம்மிகா ஸலாகக்³கா³ஹா.

விஸ்ஸஜ்ஜனா – த³ஸ ப⁴ந்தே அத⁴ம்மிகா ஸலாகக்³கா³ஹா, ஓரமத்தகஞ்ச அதி⁴கரணம் ஹோதி, ந ச க³திக³தம் ஹோதி, ந ச ஸரிதஸாரிதம் ஹோதி, ஜானாதி ‘அத⁴ம்மவாதீ³ ப³ஹுதரா’தி, அப்பேவ நாம அத⁴ம்மவாதீ³ ப³ஹுதரா அஸ்ஸூதி, ஜானாதி ‘ஸங்கோ⁴ பி⁴ஜ்ஜிஸ்ஸதீ’தி, அப்பேவ நாம ஸங்கோ⁴ பி⁴ஜ்ஜேய்யாதி, அத⁴ம்மேன க³ண்ஹந்தி, வக்³கா³ க³ண்ஹந்தி, ந ச யதா²தி³ட்டி²யா க³ண்ஹந்தி, இமே கோ² ப⁴ந்தே த³ஸ அத⁴ம்மிகா கலாகக்³கா³ஹா.

புச்சா² – கதி ஆவுஸோ த⁴ம்மிகா ஸலாகக்³கா³ஹா.

விஸ்ஸஜ்ஜனா – த³ஸ ப⁴ந்தே த⁴ம்மிகா ஸலாகக்³கா³ஹா வுத்தவிபரியாயேன.

புச்சா² – பாபுஸ்ஸன்னஸ்ஸ ஆவுஸோ பி⁴க்கு²ஸ்ஸ தஸ்ஸ பாபியஸிகா கம்மம் காதும் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே உபவாளம் பி⁴க்கு²ம் ஆரப்³ப⁴ பஞ்ஞத்தம், உபவாளோ ப⁴ந்தே பி⁴க்கு² ஸங்க⁴மஜ்ஜே² ஆபத்தியா அனுயுஞ்ஜியமானோ அவஜானித்வா படிஜானாதி, படிஜானித்வா அவஜானாதி, அஞ்ஞேனஞ்ஞம் படிசரதி, ஸம்பஜானமுஸா பா⁴ஸதி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கதி ஆவுஸோ த⁴ம்மிகானி தஸ்ஸபாபியஸிகா கம்மஸ்ஸ கரணானி.

விஸ்ஸஜ்ஜனா – பஞ்சிமானி ப⁴ந்தே த⁴ம்மிகானி தஸ்ஸபாபியஸிகா கம்மஸ்ஸ கரணானி. அஸுசி ச ஹோதி, அலஜ்ஜீ ச, ஸானுவாதோ³ ச, தஸ்ஸ ஸங்கோ⁴ தஸ்ஸபாபியஸிகா கம்மம் கரோதி த⁴ம்மேன ஸமக்³கே³ன, இமானி கோ² ப⁴ந்தே பஞ்ச த⁴ம்மிகானி தஸ்ஸ பாபியஸிகா கம்மஸ்ஸ கரணானி.

புச்சா² – தஸ்ஸ பாபியஸிகாகம்மகதேன ஆவுஸோ பி⁴க்கு²னா கதிஸு வத்தேஸு ஸம்மா வத்திதப்³ப³ம்.

விஸ்ஸஜ்ஜனா – தஸ்ஸ பாபியஸிகாகம்மகதேன ப⁴ந்தே பி⁴க்கு²னா அட்டா²ரஸஸு வத்தேஸு ஸம்மா வத்திதப்³ப³ம். ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ஏவமாதீ³ஸு ப⁴ந்தே அட்டா²ரஸஸு வத்தேஸு ஸம்மா வத்திதப்³ப³ம்.

புச்சா² – கதி ஆவுஸோ அதி⁴கரணானி ஸமதே²ஹி வூபஸமேதப்³பா³னி.

விஸ்ஸஜ்ஜனா – சத்தாரிமானி ப⁴ந்தே அதி⁴கரணானி ஸமதே²ஹி வூபஸமேதப்³பா³னி, விவாதா³தி⁴கரணம் அனுவாதா³தி⁴கரணம் ஆபத்தாதி⁴கரணம் கிச்சாதி⁴கரணம், இமானி ப⁴ந்தே சத்தாரி அதி⁴கரணானி ஸமதே²ஹி வூபஸமேதப்³பா³னி.

புச்சா² – கிம் ஆவுஸோ விவாதா³தி⁴கரணஸ்ஸ மூலம்.

விஸ்ஸஜ்ஜனா – ச² ப⁴ந்தே விவாத³மூலானி விவாதா³தி⁴கரணஸ்ஸ மூலம், தீணிபி அகுஸலமூலானி விவாதா³தி⁴கரணஸ்ஸ மூலம், தீணிபி குஸலமூலானி விவாதா³தி⁴கரணஸ்ஸ மூலம், இத³ம் ப⁴ந்தே விவாதா³தி⁴கரணஸ்ஸ மூலம்.

புச்சா² – கிம் பனாவுஸோ அனுவாதா³தி⁴கரணஸ்ஸ மூலம்.

விஸ்ஸஜ்ஜனா – ச² ப⁴ந்தே அனுவாத³மூலானி அனுவாதா³தி⁴கரணஸ்ஸ மூலம், தீணிபி அகுஸலமூலானி அனுவாதா³தி⁴கரணஸ்ஸ மூலம், தீணிபி குஸலமூலானி அனுவாதா³தி⁴கரணஸ்ஸ மூலம், காயோபி அனுவாதா³தி⁴கரணஸ்ஸ மூலம், வாசாபி அனுவாதா³தி⁴கரணஸ்ஸ மூலம், இத³ம் கோ² ப⁴ந்தே அனுவாதா³தி⁴கரணஸ்ஸ மூலம்.

புச்சா² – கிம் பனாவுஸோ ஆபத்தாதி⁴கரணஸ்ஸ மூலம்.

விஸ்ஸஜ்ஜனா – ச² ப⁴ந்தே ஆபத்திஸமுட்டா²னா ஆபத்தாதி⁴கரணஸ்ஸ மூலம், அத்தி ப⁴ந்தே ஆபத்தி காயதோ ஸமுட்டா²தி ந வாசதோ ந சித்ததோ, அத்தி² ப⁴ந்தே ஆபத்தி வாசதோ ஸமுட்டா²தி ந காயதோ ந சித்ததோ, அத்தி² ப⁴ந்தே ஆபத்தி காயதோ ச வாசதோ ச ஸமுட்டா²தி ந சித்ததோ, அத்தி² ப⁴ந்தே ஆபத்தி காயதோ ச சித்ததோ ச ஸமுட்டா²தி ந வாசதோ, அத்தி² ப⁴ந்தே ஆபத்தி வாசதோ ச சித்ததோ ச ஸமுட்டா²தி ந காயதோ, அத்தி² ப⁴ந்தே ஆபத்தி காயதோ ச வாசதோ ச சித்ததோ ச ஸமுட்டா²தி, இமானி ப⁴ந்தே ச² ஆபத்தி ஸமுட்டா²னானி ஆபத்தாதி⁴கரணஸ்ஸ மூலம்.

புச்சா² – கிம் பனாவுஸோ கிச்சாதி⁴கரணஸ்ஸ மூலம்.

விஸ்ஸஜ்ஜனா – கிச்சாதி⁴கரணஸ்ஸ ப⁴ந்தே ஏகம் மூலம் ஸங்கோ⁴.

புச்சா² – ஸமத²ம் ஆவுஸோ புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – ஸமத²ம் ப⁴ந்தே விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே த்³வே ஆபத்தியோ.

5. கு²த்³த³கவத்து²க்க²ந்த⁴க

புச்சா² – நஹாயந்தேன ஆவுஸோ பி⁴க்கு²னா ருக்கே² வா த²ம்பே⁴ வா குட்டே வா காயம் உக்³க⁴ம்ஸேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² நஹாயமானா ருக்கே²பி த²ம்பே⁴பி குட்டேபி காயம் உக்³க⁴ம்ஸேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – க³ந்த⁴ப்³ப³ஹத்த²கேன வா ஆவுஸோ குருவிந்த³கஸுத்தியா வா மல்லகேன வா நஹாயந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யேவ பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² க³ந்த⁴ப்³ப³ஹத்த²கேனபி குருவிந்த³கஸுத்தியாபி மல்லகேனபி நஹாயிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பாணினா ஆவுஸோ பரிகம்மம் காதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² பிட்டி²பரிகம்மம் காதும் குக்குச்சாயிம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – வல்லிகம் வா ஆவுஸோ பாமங்க³ம் வா கண்ட²ஸுத்தகம் வா கடிஸுத்தகம் வா ஓவட்டிகம் வா காயுரம் வா ஹத்தா²ப⁴ரணம் வா அங்கு³லிமுத்³தி³கம் வா தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² வல்லிகாதீ³னி தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – தீ³கே⁴ ஆவுஸோ கேஸே தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² தீ³கே⁴ கேஸே தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கோச்சே²னவா ஆவுஸோ ப²ணகேனவா ஹத்த²ப²ணகேனவா கேஸே ஓஸண்டே²ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யேவ பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² கோச்சா²தீ³ஹி கேஸே ஓஸண்டே²ஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஆதா³ஸே வா ஆவுஸோ உத³கபத்தே வா முக²னிமித்தம் ஓலோகேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யேவ பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ஆதா³ஸேபி உத³கபத்தேபி முக²னிமித்தம் ஓலோகேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஆபா³த⁴பச்சயா பனாவுஸோ ஆதா³ஸே வா உத³கபத்தே வா முக²னிமித்தம் ஓலோகேதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே அஞ்ஞதரம் பி⁴க்கு²ம் ஆரப்³ப⁴ அனுஞ்ஞாதம், ப⁴க³வதி ப⁴ந்தே ராஜக³ஹே விஹரதி அஞ்ஞதரஸ்ஸ பி⁴க்கு²னோ முகே² வணோ அஹோஸி, ஸோ பி⁴க்கூ² ஏதத³வோச ‘‘கீதி³ஸோ மே ஆவுஸோ வணோ’’தி, பி⁴க்கூ² ஏவமாஹம்ஸு ‘‘ஏதி³ஸோ தே ஆவுஸோ வணோ’’தி, ஸோ ந ஸத்³த³ஹதி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – முகா²லேபனாதீ³னி ஆவுஸோ கரோந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² முகா²லேபனாதீ³னி அகம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – நச்சம் வா ஆவுஸோ கீ³தம் வா வாதி³தம் வா த³ஸ்ஸனாய க³ச்ச²ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே நச்சம்பி கீ³தம்பி வாதி³தம்பி த³ஸ்ஸனாய க³ச்சி²ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கத²ம் ஆவுஸோ நச்சாதீ³னி பஸ்ஸந்தஸ்ஸ ஆபத்தி ஹோதி, கத²ம் பன அனாபத்தி.

விஸ்ஸஜ்ஜனா – நச்சம் வா ப⁴ந்தே கீ³தம் வா வாதி³தம் வா த³ஸ்ஸனாய க³ச்ச²தி ஆபத்தி து³க்கடஸ்ஸ, யத்த² டி²தோ பஸ்ஸதி வா ஸுணாதி வா ஆபத்தி து³க்கடஸ்ஸ, த³ஸ்ஸனூபசாரம் விஜஹித்வா புனப்புனம் பஸ்ஸதி ஆபத்தி து³க்கடஸ்ஸ, ஆராமே டி²தஸ்ஸ பஸ்ஸதோ அனாபத்தி, விஹாரதோ பன விஹாரம் பஸ்ஸிஸ்ஸாமீதி க³ச்ச²தோ ஆபத்தியேவ, யத்த² டி²தோ பஸ்ஸதி வா ஸுணாதி வா ஆபத்தி து³க்கடஸ்ஸ, ஆஸனஸாலாய நிஸின்னோ பஸ்ஸதி அனாபத்தி, பஸ்ஸிஸ்ஸாமீதி வுட்ட²ஹித்வா க³ச்ச²தி ஆபத்தி து³க்கடஸ்ஸ, யத்த² டி²தோ பஸ்ஸதி வா ஸுணாதி வா ஆபத்தி து³க்கடஸ்ஸ, பதிபத²ம் க³ச்ச²ந்தோ பஸ்ஸதி அனாபத்தி, கீ³வம் பரிவத்தேத்வா பஸ்ஸதோ பன ஆபத்தி ப⁴ந்தே.

புச்சா² – ஆயதகேன ஆவுஸோ கீ³தஸ்ஸரேன த⁴ம்மம் கா³யந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ஆயதகேன கீ³தஸ்ஸரேன த⁴ம்மம் கா³யிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – தா³ருபத்தம் ஆவுஸோ தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ஆயஸ்மந்தம் பிண்டோ³லபா⁴ரத்³வாஜம் ஆரப்³ப⁴ பஞ்ஞத்தம், ஆயஸ்மா ப⁴ந்தே பிண்டோ³லபா⁴ரத்³வாஜோ ச²வஸ்ஸ தா³ருபத்தஸ்ஸ காரணா கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேதி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

ந ச பி⁴க்க²வே தா³ருபத்தோ தா⁴ரேதப்³போ³, யோ தா⁴ரேய்ய ஆபத்தி து³க்கடஸ்ஸ –

புச்சா² – ப⁴க³வதா ஆவுஸோ உச்சாவசே பத்தே படிக்கி²பித்வா அயோ பத்தோ பூ⁴மிபத்தோதி இமேயேவ த்³வே பத்தா கத்த² அனுஞ்ஞாதா, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதா.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ அனுஞ்ஞாதா, ச²ப்³ப³க்³கி³யா ப⁴ந்தே பி⁴க்கூ² உச்சாவசே பத்தே தா⁴ரேஸும் ஸோவண்ணமயா ரூபியமயா, தஸ்மிம் ப⁴ந்தே வத்து²ஸ்மிம் அனுஞ்ஞாதா.

புச்சா² – ஸோத³கம் ஆவுஸோ பத்தம் படிஸாமேந்தஸ்ஸ ச ஓதாபேந்தஸ்ஸச உண்ஹே பத்தம் நித³ஹந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² ஸோத³கம் பத்தம் படிஸாமேஸும், ஓதாபேஸும், உண்ஹே பத்தம் நித³ஹிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ச²வஸீஸபத்தம் ஆவுஸோ தா⁴ரேந்தஸ்ஸ ச ஸப்³ப³பம்ஸுகூலிகஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே அஞ்ஞதரம் பி⁴க்கு²ம் ஆரப்³ப⁴ பஞ்ஞத்தம், அஞ்ஞதரோ ப⁴ந்தே பி⁴க்கு² ஸப்³ப³பம்ஸுகூலிகோ அஹோஸி, ஸோ ச²வஸீஸஸ்ஸ பத்தம் தா⁴ரேஸி, அஞ்ஞதரா இத்தீ² பஸ்ஸித்வா பீ⁴தா விஸ்ஸரமகாஸி ‘‘அபு⁴ம் மே பிஸாசோ வதாய’’ந்தி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – சலகானி வா ஆவுஸோ அட்டி²கானி வா உச்சி²ட்டோ²த³கம் வா பத்தேன நீஹரந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² சலகானிபி அட்டி²கானிபி உச்சி²ட்டோ² த³கம்பி பத்தேன நீஹரிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – உபாஹனத்த²விகா ஆவுஸோ ப⁴க³வதா கத்த² அனுஞ்ஞாதா, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதா.

விஸ்ஸஜ்ஜனா – அந்தரா ச ப⁴ந்தே ராஜக³ஹம் அந்தரா ச வேஸாலிம் அஞ்ஞதரம் பி⁴க்கு²ம் ஆரப்³ப⁴ அனுஞ்ஞாதா, அஞ்ஞதரோ ப⁴ந்தே பி⁴க்கு² உபாஹனாயோ காயப³ந்த⁴னேன ப³ந்தி⁴த்வா கா³மம் பிண்டா³ய பாவிஸி, அஞ்ஞதரோ உபாஸகோ தம் பி⁴க்கு²ம் அபி⁴வாதே³ந்தோ உபாஹனாயோ ஸீஸேன க⁴ட்டேதி, ஸோ பி⁴க்கு² மங்கு அஹோஸி, தஸ்மிம் ப⁴ந்தே வத்து²ஸ்மிம் அனுஞ்ஞாதா.

புச்சா² – அத்³தா⁴னமக்³க³ப்படிபன்னேன ஆவுஸோ பரிஸ்ஸாவனம் யாசியமானேன ந த³த³ந்தஸ்ஸ ச அப்படிஸ்ஸாவனகேன அத்³தா⁴னம் படிபஜ்ஜந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – அந்தரா ச ப⁴ந்தே ராஜக³ஹம் அந்தரா ச வேஸாலிம் அஞ்ஞதரம் பி⁴க்கு²ம் ஆரப்³ப⁴ பஞ்ஞத்தம், அஞ்ஞதரோ ப⁴ந்தே பி⁴க்கு² பரிஸ்ஸாவனம் யாசியமானோ ந அதா³ஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – புப்பா²பி⁴கிண்ணே ஆவுஸோ ஸயனே ஸயந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – வேஸாலியம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² புப்பா²பி⁴கிண்ணேஸு ஸயனேஸு ஸயிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஏகபா⁴ஜனே வா ஆவுஸோ பு⁴ஞ்ஜந்தானம் ஏகதா²லகே வா பிவந்தானம் ஏகத்த²ரணபாவுரணானம் வா துவட்டானம் து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – வேஸாலியம் ப⁴ந்தே ச²ப்³ப³க்³கி³யேவ பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ஏகபா⁴ஜனேபி பு⁴ஞ்ஜிம்ஸு, ஏகதா²லகேபி பிவிம்ஸு, ஏகமஞ்சகேபி துவட்டேஸும், ஏகத்த²ரணாபி துவட்டேஸும், ஏகபாவுரணாபி துவட்டேஸும், ஏகத்த²ரணபாவுரணாபி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – சாமரிபீ³ஜனிம் ஆவுஸோ படிக்கி²பித்வா திஸ்ஸோ பீ³ஜனியோ ப⁴க³வதா கத்த² அனுஞ்ஞாதா, கிஸ்மிஞ்ச வத்து²ஸ்மிம் அனுஞ்ஞாதா.

விஸ்ஸஜ்ஜனா – ஸாவத்தி²யம் ப⁴ந்தே அனுஞ்ஞாதா, ஸாவத்தி²யம் ப⁴ந்தே ப⁴க³வதி விஹரதி ஸங்க⁴ஸ்ஸ சாமரிபீ³ஜனீ உப்பன்னா அஹோஸி, ப⁴க³வதோ ஏதமத்த²ம் ஆரோசேஸும், தஸ்மிம் ப⁴ந்தே வத்து²ஸ்மிம் அனுஞ்ஞாதா.

ந பி⁴க்க²வே சாமரிபீ³ஜனீ தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸ. அனுஜானாமி பி⁴க்க²வே திஸ்ஸோ பீ³ஜனியோ வாகமயம் உஸீரமயம் மோரபிஞ்சா² மயம்.

புச்சா² – தீ³கே⁴ ஆவுஸோ நகே² தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே அஞ்ஞதரம் பி⁴க்கு²ம் ஆரப்³ப⁴ பஞ்ஞத்தம், அஞ்ஞதரோ ப⁴ந்தே பி⁴க்கு² தீ³கே⁴ நகே² தா⁴ரேஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கத்தரிகாய ஆவுஸோ கேஸே சே²தா³பேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² கத்தரிகாய கேஸே சி²ந்தி³ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – தீ³கே⁴ ஆவுஸோ நாஸிகாலோமே தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² தீ³கா⁴னி நாஸிகாலோமானி தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – உச்சாவசா ஆவுஸோ கண்ணமலஹரணியோ படிக்கி²பித்வா த³ஸ கண்ணமலஹரணியோ ப⁴க³வதா கத்த² அனுஞ்ஞாதா, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதா.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ அனுஞ்ஞாதா, ச²ப்³ப³க்³கி³யா ப⁴ந்தே பி⁴க்கூ² உச்சாவசா கண்ணமலஹரணியோ தா⁴ரேஸும் ஸோவண்ணமயம் ரூபியமயம், தஸ்மிம் ப⁴ந்தே வத்து²ஸ்மிம் அனுஞ்ஞாதா.

புச்சா² – ஸங்கா⁴டிபல்லத்தி²காய நிஸீத³ந்தஸ்ஸ ஆவுஸோ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ஸங்கா⁴டிபல்லத்தி²காய நிஸீதி³ம்ஸு, ஸங்கா⁴டியா பத்தா லுஜ்ஜிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – அகாயப³ந்த⁴னேன ஆவுஸோ கா³மம் பவிஸந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே அஞ்ஞதரம் பி⁴க்கு²ம் ஆரப்³ப⁴ பஞ்ஞத்தம், அஞ்ஞதரோ ப⁴ந்தே பி⁴க்கு² அகாயப³ந்த⁴னோ கா³மம் பிண்டா³ய பாவிஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கி³ஹினிவத்த²ம் ஆவுஸோ நிவாஸேந்தஸ்ஸ ச, கி³ஹிபாருதம் பாருபந்தஸ்ஸ ச, ஸம்வேல்லியம் நிவாஸேந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² கி³ஹினிவத்த²ம் நிவாஸிம்ஸு, கி³ஹிபாருதம்பி பாருபிம்ஸு, ஸம்வேல்லியம்பி நிவாஸிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – உப⁴தோ காஜம் ஆவுஸோ தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² உப⁴தோ காஜம் தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – லோகாயதம் ஆவுஸோ பரியாபுணந்தஸ்ஸ ச வாசேந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.