6. ஸேனாஸனக்க²ந்த⁴க

புச்சா² – பஞ்ச ஆவுஸோ லேணானி ப⁴க³வதா கத்த² அனுஞ்ஞாதானி, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதானி.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதானி, ஸம்ப³ஹுலா ப⁴ந்தே பி⁴க்கூ² ப⁴க³வந்தம் உபஸங்கமித்வா ஏதத³வோசும் ‘‘ராஜக³ஹகோ ப⁴ந்தே ஸேட்டீ² விஹாரே காராபேதுகாமோ, கத²ம் நு கோ² ப⁴ந்தே படிபஜ்ஜிதப்³ப³’’ந்தி, தஸ்மிம் ப⁴ந்தே வத்து²ஸ்மிம் அனுஞ்ஞாதானி.

புச்சா² – கத²ம் ஆவுஸோ விஹாரா பட²மம் உப்பன்னா, கத²ஞ்ச தே பதிட்டா²பி தா.

விஸ்ஸஜ்ஜனா – ஏகாஹேனேவ ப⁴ந்தே ராஜக³ஹகேன ஸேட்டி²னா ச²ட்டி²விஹாரா பதிட்டா²பிதா, தே இத⁴ ப⁴ந்தே ஸட்டி²விஹாரா பு³த்³த⁴ப்பமுக²ஸ்ஸ ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ பதிட்டா²பிதா.

புச்சா² – விஹாரே ஆவுஸோ படிபா⁴னகம்மம் படிக்கி²பித்வா மாலாகம்மாதீ³னி ப⁴க³வதா கத்த² அனுஞ்ஞாதானி, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதானி.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ அனுஞ்ஞாதானி. ச²ப்³ப³க்³கி³யா ப⁴ந்தே பி⁴க்கூ² விஹாரே படிபா⁴னசித்தம் காராபேஸும் இத்தி²ரூபகம் புரிஸரூபகம், தஸ்மிம் ப⁴ந்தே வத்து²ஸ்மிம் அனுஞ்ஞாதானி.

புச்சா² – யதா²வுட்³ட⁴ம் ஆவுஸோ அபி⁴வாத³னாதீ³னி ச அக்³கா³ஸனாதீ³னி ச அனுஜானித்வா ஸங்கி⁴கம் யதா²வுட்³ட⁴ம் படிபா³ஹந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – அந்தரா ச ப⁴ந்தே வேஸாலிம் அந்தரா ச ஸாவத்தி²ம் ச²ப்³ப³க்³கி³யானம் பி⁴க்கூ²னம் அந்தேவாஸிகே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யானம் ப⁴ந்தே பி⁴க்கூ²னம் அந்தேவாஸிகா பி⁴க்கூ² பு³த்³த⁴ப்பமுக²ஸ்ஸ ஸங்க⁴ஸ்ஸ புரதோ புரதோ க³ந்த்வா விஹாரே படிக்³க³ஹேஸும், ஸேய்யாயோ படிக்³க³ஹேஸும் ‘‘இத³ம் அம்ஹாகம் உபஜ்ஜா²யானம் ப⁴விஸ்ஸதி, இத³ம் அம்ஹாகம் ஆசரியானம் ப⁴விஸ்ஸதி, இத³ம் அம்ஹாகம் ப⁴விஸ்ஸதீ’’தி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஏகேன ஆவுஸோ த்³வே படிபா³ஹந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் உபனந்த³ம் ஸக்யபுத்தம் ஆரப்³ப⁴ பஞ்ஞத்தம், ஆயஸ்மா ப⁴ந்தே உபனந்தோ³ ஸக்யபுத்தோ ஏகோ த்³வே படிபா³ஹி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – நவகேன ஆவுஸோ உத்³தி³ஸந்தேன ஸமகே வா ஆஸனே நிஸீதி³தும் உச்சதரே வா த⁴ம்மகா³ரவேன, தே²ரேன பன பி⁴க்கு²னா உத்³தி³ஸாபேந்தேன ஸமகே வா ஆஸனே நிஸீதி³தும் நீசதரே வா த⁴ம்மகா³ரவேன ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² ஆயஸ்மதோ உபாலிஸ்ஸ ஸந்திகே வினயம் பரியாபுணிம்ஸு, ஆயஸ்மா ப⁴ந்தே உபாலி டி²தகோவ உத்³தி³ஸதி தே²ரானம் பி⁴க்கூ²னம் கா³ரவேன, தத்த² ப⁴ந்தே தே²ரா சேவ பி⁴க்கூ² கிலமிம்ஸு ஆயஸ்மா ச உபாலி கிலமி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – திவஸ்ஸந்தரேன ஆவுஸோ ஸஹ நிஸீதி³தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலானம் ப⁴ந்தே பி⁴க்கூ²னம் ஏதத³ஹோஸி ‘‘கித்தாவதானு கோ² ஸமானாஸனிகோ ஹோதீ’’தி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – மஞ்சே ச ஆவுஸோ பீடே² ச த்³வின்னம்யேவ நிஸீதி³தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே ஸமானாஸனிகே ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² ஸமானாஸனிகா மஞ்சே நிஸீதி³த்வா மஞ்சம் பி⁴ந்தி³ம்ஸு, பீடே² நிஸீதி³த்வா பீட²ம் பி⁴ந்தி³ம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – தீ³கா⁴ஸனே பனாவுஸோ அஸமானாஸனிகேஹிபி நிஸீதி³தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² தீ³கா⁴ஸனே அஸமானாஸனிகேஹி ஸஹ நிஸீதி³தும் குக்குச்சாயிம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – பஞ்ச ஆவுஸோ அவிஸ்ஸஜ்ஜியானி ப⁴க³வதா கத்த² பஞ்ஞத்தானி, கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தானி.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தானி, ஸம்ப³ஹுலா ப⁴ந்தே பி⁴க்கூ² ஸங்கி⁴கம் ஸேனாஸனம் விஸ்ஸஜ்ஜேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பஞ்ச ஆவுஸோ அவேப⁴ங்கி³யானி ப⁴க³வதா கத்த² பஞ்ஞத்தானி, கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தானி.

விஸ்ஸஜ்ஜனா – கீடாகி³ரிஸ்மிம் ப⁴ந்தே அஸ்ஸஜிபுனப்³ப³ஸுகே பி⁴க்கூ² ஆரப்³ப⁴ பஞ்ஞத்தானி, அஸ்ஸஜிபுனப்³ப³ஸுகா ப⁴ந்தே பி⁴க்கூ² ஸங்கி⁴கம் ஸேனாஸனம் விப⁴ஜிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தானி.

புச்சா² – அஞ்ஞத்ர பரிபோ⁴க³ம் ஆவுஸோ அஞ்ஞத்ர பரிபு⁴ஞ்ஜந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஆளவியம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² அஞ்ஞதரஸ்ஸ உபாஸகஸ்ஸ விஹாரபரிபோ⁴க³ம் ஸேனாஸனம் அஞ்ஞத்ர பரிபு⁴ஞ்ஜிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – அதோ⁴தேஹி ச ஆவுஸோ அல்லேஹி ச பாதே³ஹி ஸேனாஸனம் அக்கமந்தஸ்ஸ ச ஸஉபாஹனேன ஸேனாஸனம் அக்கமந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஆளவியம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² அதோ⁴தேஹி பாதே³ஹி ஸேனாஸனம் அக்கமிம்ஸு, அல்லேஹி ச பாதே³ஹி ஸேனாஸனம் அக்கமிம்ஸு, ஸஉபாஹனாபி ஸேனாஸனம் அக்கமிம்ஸு, ஸேனாஸனம் து³ஸ்ஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பரிகம்மகதாய ஆவுஸோ பூ⁴மியா நிட்டு²ப⁴ந்தஸ்ஸ ச பரிகம்மகதம் பி⁴த்திம் அபஸ்ஸயந்தஸ்ஸ ச து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஆளவியம் ப⁴ந்தே ஸம்ப³ஹுலேவ பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² பரிகம்மகதாய பூ⁴மியா நிட்டு²பி⁴ம்ஸு, பரிகம்மகதம் பி⁴த்திம் அபஸ்ஸயிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஸேனாஸனக்க²ந்த⁴கம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – ஸேனாஸனக்க²ந்த⁴கம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே திஸ்ஸோ ஆபத்தியோ.