3. வஸ்ஸுபனாயிகக்க²ந்த⁴க

புச்சா² – வஸ்ஸூபனாயிகம் ஆவுஸோ ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ஸம்ப³ஹுலா பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² ஹேமந்தம்பி கி³ம்ஹம்பி வஸ்ஸம்பி சாரிகம் சரிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கதிபனாவுஸோ வஸ்ஸூபனாயிகா ப⁴க³வதா அனுஞ்ஞாதா.

விஸ்ஸஜ்ஜனா – த்³வேமா ப⁴ந்தே வஸ்ஸூபனாயிகா ப⁴க³வதா அனுஞ்ஞாதா புரிமிகா பச்சி²மிகா, அபரஜ்ஜுக³தாய ப⁴ந்தே ஆஸள்ஹியா புரிமிகா உபக³ந்தப்³பா³, மாஸக³தாய ப⁴ந்தே ஆஸள்ஹியா பச்சி²மிகா உபக³ந்தப்³பா³, இமா கோ² ப⁴ந்தே த்³வே வஸ்ஸூபனாயிகா ப⁴க³வதா அனுஞ்ஞாதா.

புச்சா² – வஸ்ஸம் ஆவுஸோ உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகம் பக்கமந்தஸ்ஸ து³க்கடம் கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² வஸ்ஸம் உபக³ந்த்வா அந்தரா வஸ்ஸம் சாரிகம் பக்கமிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ஸத்தாஹ கரணீயேன ஆவுஸோ பஹிதே க³ந்தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² உதே³னேன உபாஸகேன பஹிதே ந க³ச்சி²ம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – ஸத்தாஹகரணீயேன ஆவுஸோ ஸத்தன்னம் அபஹிதேபி க³ந்தும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே அஞ்ஞதரஸ்ஸ பி⁴க்கு²னோ மாதுகி³லான வத்து²ஸ்மிம் அனுஞ்ஞாதம்.

அனுஜானாமி பி⁴க்க²வே ஸத்தன்னம் ஸத்தாஹகரணீயேன அபஹிதேபி க³ந்தும், பகே³வ பஹிதே.

புச்சா² – கிஸ்மிம்சி ஆவுஸோ அந்தராயே ஸதி அந்தோவஸ்ஸம் பக்கமிதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² கோஸலேஸு ஜனபதே³ஸு வஸ்ஸம் உபக³ச்சி²ம்ஸு, தே வஸ்ஸூபக³தா வாளேஹி உப்³பா³ள்ஹா அஹேஸும், தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – ருக்க² ஸுஸிரே வா ஆவுஸோ ருக்க²விடபி⁴யா வா அஜ்ஜோ²காஸே வா வஸ்ஸம் உபக³ச்ச²ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² ருக்க²ஸுஸிரேபி ருக்க²விடபி⁴யாபி அஜ்ஜோ²காஸேபி வஸ்ஸம் உபக³ச்சி²ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – அஸேனாஸனிகேன ஆவுஸோ வஸ்ஸம் உபக³ச்ச²ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – தஸ்மிம்யேவ ப⁴ந்தே ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² அஸேனாஸனிகா வஸ்ஸம் உபக³ச்சி²ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – ச²வகுடிகாய வா ஆவுஸோ ச²த்தே வா சாடியா வா வஸ்ஸம் உபக³ச்ச²ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம்யேவ ப⁴ந்தே ஸம்ப³ஹுலே பி⁴க்கூ² ஆரப்³ப⁴ பஞ்ஞத்தம், ஸம்ப³ஹுலா ப⁴ந்தே பி⁴க்கூ² ச²வகுடிகாயபி ச²த்தேபி சாடியாபி வஸ்ஸம் உபக³ச்சி²ம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – படிஸ்ஸவம் ஆவுஸோ விஸம் வாதே³ந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் உபனந்த³ம் ஸக்யபுத்தம் ஆரப்³ப⁴ பஞ்ஞத்தம், ஆயஸ்மா ப⁴ந்தே உபனந்தோ³ ஸக்யபுத்தோ ரஞ்ஞோ பஸேனதி³ஸ்ஸ கோஸலஸ்ஸ வஸ்ஸம் வாஸம் படிஸ்ஸுணித்வா விஸம்வாதே³ஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – வஸ்ஸூபனாயிகம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – வஸ்ஸூபனாயிகம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.