4. பவாரணாக்க²ந்த⁴க

புச்சா² – வஸ்ஸம் வுட்டா²னம் ஆவுஸோ பி⁴க்கூ²னம் தீஹி டா²னேஹி பவாரிதும் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ அனுஞ்ஞாதம், ஸம்ப³ஹுலா ப⁴ந்தே பி⁴க்கூ² ஸந்தி³ட்டா² ஸம்ப⁴த்தா அந்தோவஸ்ஸம் நேவ ஆலபிம்ஸு ந ஸல்லபிம்ஸு, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

அனுஜானாமி பி⁴க்க²வே வஸ்ஸம் வுட்டா²னம் பி⁴க்கூ²னம் தீஹி டா²னேஹி பவாரேதும், தி³ட்டே²வ வா ஸுதேன வா பரிஸங்காய வா.

புச்சா² – கதி ஆவுஸோ பவாரணா தி³வஸவஸேன ச புக்³க³லவஸேன ச காதப்³பா³காரவஸேன ச.

விஸ்ஸஜ்ஜனா – தி³வஸவஸேன ப⁴ந்தே திஸ்ஸோ பவாரணா, ததா² புக்³க³லவஸேன காதப்³பா³காரவஸேனச.

புச்சா² – கதீனம் ஆவுஸோ ஸங்கே⁴ பவாரேதும் ப⁴க³வதா அனுஞ்ஞாதம், கதீனம் பனாவுஸோ அஞ்ஞமஞ்ஞம் பவாரேதும் ப⁴க³வதா அனுஞ்ஞாதம்.

விஸ்ஸஜ்ஜனா – பஞ்சன்னம் ப⁴ந்தே பி⁴க்கூ²னம் ஸங்கே⁴ பவாரேதும் ப⁴க³வதா அனுஞ்ஞாதம், சதுன்னம் வா ப⁴ந்தே திண்ணம் வா த்³வின்னம் வா அஞ்ஞமஞ்ஞம் பவாரேதும் அனுஞ்ஞாதம்.

புச்சா² – ஏகேன பனாவுஸோ வஸ்ஸம்வுட்டே²ன பி⁴க்கு²னா கத²ம் படிபஜ்ஜிதப்³ப³ந்தி ப⁴க³வதா அனுஞ்ஞாதம்.

விஸ்ஸஜ்ஜனா – ஏகேன பன ப⁴ந்தே பி⁴க்கு²னா ‘‘அஜ்ஜ மே பவாரணா’’தி அதி⁴ட்டா²தப்³ப³ந்தி ப⁴க³வதா அனுஞ்ஞாதம்.

புச்சா² – பவாரணம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – பவாரணம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே திஸ்ஸோ ஆபத்தியோ.