5. சம்மக்க²ந்த⁴க

ஸோணமதே²ர வத்து²

புச்சா² – உபாஹனம் ஆவுஸோ ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ராஜக³ஹே ப⁴ந்தே ஆயஸ்மந்தம் ஸோணம் ஆரப்³ப⁴ அனுஞ்ஞாதம், ஆயஸ்மதோ ப⁴ந்தே ஸோணஸ்ஸ அச்சாரத்³த⁴வீரியஸ்ஸ சங்கமதோ பாதா³ பி⁴ஜ்ஜிம்ஸு, சங்கமோ லோஹிதேன பு²டோ அஹோஸி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – ஸப்³ப³னீலிகா வா ஆவுஸோ ஸப்³ப³பீதிகா வா ஸப்³ப³லோஹிதிகா வா ஸப்³ப³மஞ்ஜிட்டி²கா வா ஸப்³ப³கண்ஹா வா ஸப்³ப³மஹாரங்க³ரத்தா வா ஸப்³ப³மஹானாமரத்தா வா உபாஹனாயோ தா⁴ரேந்தஸ்ஸ து³க்கடம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ஸப்³ப³னீலிகாயோ உபாஹனாயோ தா⁴ரேஸும், ஸப்³ப³பீதிகாயோ ஸப்³ப³லோஹிதிகாயோ ஸப்³ப³மஞ்ஜிட்டி²காயோ ஸப்³ப³கண்ஹாயோ ஸப்³ப³மஹாரங்க³ரத்தா ஸப்³ப³மஹானாமரத்தாயோபி உபாஹனாயோ தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – க²ல்லகப³ந்தா⁴ வா ஆவுஸோ புடப³ந்தா⁴ வா பாலிகு³ண்டி²மா வா தூலபுண்ணிகா வா தித்திரபத்திகா வா மேண்ட³விஸாணவத்³தி⁴கா வா அஜவிஸாணவத்³தி⁴கா வா விச்சி²காளிகா வா மோரபிஞ்ச² பரிஸிப்³பி³கா வா சித்ரா வா உபாஹனாயோ தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² க²ல்லகப³ந்தா⁴ உபாஹனாயோபி தா⁴ரேஸும், புடப³ந்தா⁴ உபாஹனாயோபி தா⁴ரேஸும், பாலிகு³ண்டி²மா உபாஹனாயோபி தா⁴ரேஸும், தூலபுண்ணிகா உபாஹனாயோபி தா⁴ரேஸும், தித்திரபத்திகா உபாஹனாயோபி தா⁴ரேஸும், மேண்ட³விஸாணவத்³தி⁴கா உபாஹனாயோபி தா⁴ரேஸும், அஜவிஸாணவத்³தி⁴கா உபாஹனாயோபி தா⁴ரேஸும், விச்சி²காளிகா உபாஹனாயோபி தா⁴ரேஸும், மோரபிஞ்ச² பரிஸிப்³பி³தா உபாஹனாயோ தா⁴ரேஸும், சித்ரா உபாஹனாயோபி தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கட்ட²பாது³காயோ ஆவுஸோ தா⁴ரேந்தஸ்ஸ து³க்கடம் ப⁴க³வதா கத்த² கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ராஜக³ஹே ப⁴ந்தே ச²ப்³ப³க்³கீ³யேவ பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² ரத்தியா பச்சூஸஸமயம் பச்சுட்டா²ய கட்ட²பாது³காயோ அபி⁴ருஹித்வா அஜ்ஜோ²காஸே சங்கமந்தி உச்சாஸத்³தா³ மஹாஸத்³தா³ க²டக²டஸத்³தா³ அனேகவிஹிதம் திரச்சா²னகத²ம் கதே²ந்தா, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – யானேன ஆவுஸோ யாயந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² யானேன யாயிம்ஸு, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கி³லானஸ்ஸ ஆவுஸோ யானம் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே அஞ்ஞதரம் கி³லானம் பி⁴க்கு²ம் ஆரப்³ப⁴ அனுஞ்ஞாதம், அஞ்ஞதரோ ப⁴ந்தே பி⁴க்கு² கோஸலேஸு ஜனபதே³ ஸாவத்தி²ம் க³ச்ச²ந்தோ ப⁴க³வந்தம் த³ஸ்ஸனாய அந்தராமக்³கே³ கி³லானோ குக்குச்சாயந்தோ யானம் நாபி⁴ருஹி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – உச்சாஸயனமஹாஸயனானி ஆவுஸோ தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே ச²ப்³ப³க்³கி³யே பி⁴க்கூ² ஆரப்³ப⁴ பஞ்ஞத்தம், ச²ப்³ப³க்³கி³யா ப⁴ந்தே பி⁴க்கூ² உச்சாஸயனமஹாஸயனானி தா⁴ரேஸும், தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – கோ³சம்மானி ஆவுஸோ தா⁴ரேந்தஸ்ஸ து³க்கடம் ப⁴க³வதா கத்த² பஞ்ஞத்தம், கம் ஆரப்³ப⁴ கிஸ்மிம் வத்து²ஸ்மிம் பஞ்ஞத்தம்.

விஸ்ஸஜ்ஜனா – ஸாவத்தி²யம் ப⁴ந்தே அஞ்ஞதரம் பாபபி⁴க்கு²ம் ஆரப்³ப⁴ பஞ்ஞத்தம், அஞ்ஞதரோ ப⁴ந்தே பி⁴க்கு² பாணாதிபாதே ஸமாத³பேஸி, தஸ்மிம் ப⁴ந்தே வத்து²ஸ்மிம் பஞ்ஞத்தம்.

புச்சா² – பச்சந்திமேஸு ஆவுஸோ ஜனபதே³ஸு வினயத⁴ரபஞ்சமேன க³ணேன உபஸம்பதா³ ச கு³ணங்கு³ணூபஹனஞ்ச து⁴வனஹானஞ்ச சம்மானி அத்த²ரணானி ச நிஸ்ஸீமக³தானம் சீவரதா³னஞ்சாதி இமானி பஞ்ச ப⁴க³வதா கத்த² அனுஞ்ஞாதானி, கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதானி.

விஸ்ஸஜ்ஜனா – ஸாவத்தி²யம் ப⁴ந்தே ஆயஸ்மந்தம் ஸோணம் குடிகண்ணம் ஆரப்³ப⁴ அனுஞ்ஞாதா, ஆயஸ்மா ப⁴ந்தே ஸோணோ குடிகண்ணோ ஏதானி பஞ்சவத்தூ²னி ஆயஸ்மதோ மஹாகச்சானஸ்ஸ வசனேன ப⁴க³வந்தம் யாசி, தஸ்மிம் ப⁴ந்தே வத்து²ஸ்மிம் அனுஞ்ஞாதா.

புச்சா² – சம்மஸஞ்ஞுத்தம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – சம்மஸஞ்ஞுத்தம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே திஸ்ஸோ ஆபத்தியோ.