10. கோஸம்ப³கக்க²ந்த⁴க

புச்சா² – பே⁴த³க³ருகேஹி பி⁴க்க²வே பி⁴க்கூ²ஹி ந ஸோ பி⁴க்கு² ஆபத்தியா அத³ஸ்ஸனே உக்கி²பிதப்³போ³தி ச, பே⁴த³க³ருகேன பி⁴க்க²வே பி⁴க்கு²னா பரேஸம்பி ஸத்³தா⁴ய ஆபத்திதே³ஸேதப்³பா³தி ச ஆவுஸோ அயம் ஸாமக்³கி³ரஸஓவாதோ³ ப⁴க³வதா கத்த² தி³ன்னோ, கம் ஆரப்³ப⁴ கிஸ்மிம் வத்து²ஸ்மிம் தி³ன்னோ.

விஸ்ஸஜ்ஜனா – கோஸம்பி³யம் ப⁴ந்தே ஸம்ப³ஹுலே பி⁴க்கூ² ஆரப்³ப⁴ தி³ன்னோ, ப⁴க³வதி ப⁴ந்தே கோஸம்பி³யம் விஹரதி அஞ்ஞதரோ பி⁴க்கு² ஆபத்திம் ஆபன்னோ அஹோஸி, ஸோ தஸ்ஸா ஆபத்தியா ஆபத்தி தி³ட்டி² அஹோஸி, அஞ்ஞே பி⁴க்கூ² தஸ்ஸா ஆபத்தியா அனாபத்தி தி³ட்டி²னோ அஹேஸும். ஸோ அபரேன ஸமயேன தஸ்ஸா ஆபத்தியா அனாபத்திதி³ட்டி² அஹோஸி, அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ அஹேஸும். அத² கோ² தே ப⁴ந்தே பி⁴க்கூ² ஸாமக்³கி³ம் லபி⁴த்வா தம் பி⁴க்கு²ம் ஆபத்தியா அத³ஸ்ஸனே உக்கி²பிம்ஸு, தஸ்மிம் ப⁴ந்தே வத்து²ஸ்மிம் தி³ன்னோ.

புச்சா² – ஸங்க⁴பே⁴த³ஸ்ஸ ஆவுஸோ மூலபூ⁴தே பி⁴க்கு²ம்ஹி உக்கி²த்தகே ஓஸாரிதே தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ஞ்ச காதும் ஸாமக்³கீ³ உபோஸத²ஞ்ச காதும் ப⁴க³வதா கத்த² அனுஞ்ஞாதம், கம் ஆரப்³ப⁴ கிஸ்மிம் வத்து²ஸ்மிம் அனுஞ்ஞாதம்.

விஸ்ஸஜ்ஜனா – ஸாவத்தி²யம் ப⁴ந்தே தேயேவ உக்கி²த்தகானுவத்தகே பி⁴க்கூ² ஆரப்³ப⁴ அனுஞ்ஞாதம், தே ப⁴ந்தே உக்கி²த்தகானுவத்தகா பி⁴க்கூ² தம் உக்கி²த்தகம் பி⁴க்கு²ம் ஓஸாரேத்வா யேன உக்கே²பகா பி⁴க்கூ² தேனுபஸங்கமிம்ஸு உபஸங்கமித்வா தே உக்கே²பகே பி⁴க்கூ² ஏகத³வோசும் ‘‘யஸ்மிம் ஆவுஸோ வத்து²ஸ்மிம் அஹோஸி ஸங்க⁴ஸ்ஸ ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ஸங்க⁴ராஜி ஸங்க⁴வவத்தா²னம் ஸங்க⁴னானாகரணம், ஸோ ஏஸோ பி⁴க்கு²ம் ஆபன்னோ ச உக்கி²த்தோ ச பஸ்ஸி ச ஓஸாரிதோ ச, ஹந்த³ மயம் ஆவுஸோ தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ம் கரோமா’’தி, தஸ்மிம் ப⁴ந்தே வத்து²ஸ்மிம் அனுஞ்ஞாதம்.

புச்சா² – கோஸம்ப³கம் புச்சி²ஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ஆவுஸோ கதி ஆபத்தியோ.

விஸ்ஸஜ்ஜனா – கோஸம்ப³கம் விஸ்ஸஜ்ஜிஸ்ஸம், ஸனிதா³னம் ஸனித்³தே³ஸம். ஸமுக்கட்ட²பதா³னம் ப⁴ந்தே ஏகா ஆபத்தி.