74. க³ருபுப்³பா³ ரஸ்ஸா ரே+ந்தேந்தீனம்

க³ருபுப்³ப³ஸ்மா ரஸ்ஸா ந்தே+ந்தீனம் ரே வா ஹோதி.

அக்க²ரனியமோ ச²ந்த³ம்,

க³ருலஹுனியமோ ப⁴வே வுத்தி;

தீ³கோ⁴ ஸம்யோகா³தி³புப்³போ³,

ரஸ்ஸோ க³ரு லஹு து ரஸ்ஸோ.

க³ச்ச²ரே க³ச்ச²ந்தி. த்வம் க³ச்ச²ஸி, தும்ஹே க³ச்ச²த². அஹம் க³ச்சா²மி, மயம் க³ச்சா²ம. ச்சா²தே³ஸாபா⁴வபக்கே² ‘‘ஊ லஸ்ஸே’’தி ஏகாரே க³மேதி. பரலோபே க³மேந்தி. க³மேஸி, க³மேத². க³மேமி, க³மேம. பரச்ச²க்கேபி ஸோ க³ச்ச²தே, க³ச்ச²ரே க³ச்ச²ந்தே. க³ச்ச²ஸே, க³ச்ச²வ்ஹே. க³ச்சே², க³ச்சா²ம்ஹே.

புரே அத⁴ம்மோ தி³ப்³ப³தி, புரா மராமீதி ச தம்ஸமீபே தப்³போ³ஹாரூபசாரேன வத்தமானவசனம். வுத்தஞ்ஹி –

ஆரத்³தா⁴+நிட்டி²தம் கிச்சம், வத்தமானந்தி வுச்சதி;

வத்தமானஸமீபஞ்ச, வத்தமானந்தி வுச்சதி.

கிமிவ தே –

க³ங்கா³ச தம்ஸமீபஞ்ச, யதோ க³ங்கா³தி ஞாயதே;

க³ங்கா³யம் பாது+மாக³ச்ச², கோ⁴ஸோ க³ங்கா³ய+மித்யபி.

முக்²யா+முக்²யத்த²பே⁴தே³ன, வத்தமானம் ததோ த்³விதா⁴;

முக்²யஞ்ஹி ருள்ஹி+மாபன்னம், த+தா³ரோபா அமுக்²யதாதி.

புரே+புராஸத்³தே³ஹி வா அனாக³ததா க³ம்யதே, ததா³ தஸ்ஸ வத்தமானத்தா. காலப்³யத்தயோ வா ஏஸோ, ப⁴வந்த்யேவ ஹி காலந்தரேபி த்யாத³யோ பா³ஹுலகா ‘‘ஸந்தேஸு பரிகூ³ஹாமி’’ ‘‘காயஸ்ஸ பே⁴தா³ அபி⁴ஸம்பராயம், ஸஹப்³யதம் க³ச்ச²தி வாஸவஸ்ஸ’’ ‘‘அதிவேலம் நமஸ்ஸிஸ்ஸம்’’தி. ‘‘குதோ நு த்வம் ஆக³ச்ச²ஸி, ராஜக³ஹதோ ஆக³ச்சா²மீ’’திஆதீ³ஸு பன பச்சுப்பன்னஸமீபே வத்தமானவசனம்.