3,98. சத்தாலீஸாதோ³ வா

அஸதாதோ³ நாஞ்ஞத்தே² சத்தாலீஸாதோ³ திஸ்ஸே ஹோதி வா. தேசத்தாலீஸா தேசத்தாலீஸ தேசத்தாலீஸம். போ⁴ தேசத்தாலீஸே இச்சாதி³ ஹோதி. ஏவம் திசத்தாலீஸா தேசத்தாரீஸா திசத்தாரீஸா இச்சாதி³, தேசத்தாலீஸதி திசத்தாலீஸதி இச்சாதி³ புப்³பே³வ.

ஏவம் சதுசத்தாலீஸா பஞ்சசத்தாலீஸா சதுசத்தாலீஸதி பஞ்சசத்தாலீஸதி இச்சாதி³ யாவ ஏகூனபஞ்ஞாஸா.

பஞ்ஞாஸா பஞ்ஞாஸ பஞ்ஞாஸம் இச்சாதி³ ஹோதி. ஏவம் த்³வேபஞ்ஞாஸா த்³வாபஞ்ஞாஸா த்³விபஞ்ஞாஸா த்³வேபண்ணாஸா த்³வாபண்ணாஸா த்³விபண்ணாஸா. தேபஞ்ஞாஸா திபஞ்ஞாஸா திபஞ்ஞாஸம் தேபண்ணாஸா திபண்ணாஸா. சதுபண்ணாஸா பஞ்சபண்ணாஸா இச்சாதி³ யாவ ஏகூனஸட்டி².

ஏவம் ஸட்டி², ஏகஸட்டி², த்³வேஸட்டி² த்³வாஸட்டி² த்³விஸட்டி², தேஸட்டி² திஸட்டி², சதுஸட்டி² பஞ்சஸட்டி² இச்சாதி³ யாவ ஏகூனஸத்ததி.

ஸத்ததி, ஏகஸத்ததி, த்³வேஸத்ததி த்³வாஸத்ததி த்³விஸத்ததி, தேஸத்ததி திஸத்ததி. த்³வேஸத்தரி த்³வாஸத்தரி த்³விஸத்தரி, சதுஸத்ததி, பஞ்சஸத்ததி, சதுஸத்தரி, பஞ்சஸத்தரீதி யாவ ஏகூனாஸீதி.

அஸீதி, ஏகாஸீதி, த்³வாஸீதி, யாக³மே த்³வியாஸீதி, தேஅஸீதி தியாஸீதி, சதுராஸீதி, பஞ்சாஸீதி இச்சாதி³ யாவ ஏகூனனவுதி.

நவுதி, ஏகனவுதி, த்³வேனவுதி த்³வானவுதி த்³வினவுதி, தேனவுதி தினவுதி, சதுனவுதி, பஞ்சனவுதி இச்சாதி³ யாவ ஏகூனஸதம், ஏதம் நபும்ஸகலிங்க³+மேகவசனந்தம்.

ஸதம், போ⁴ ஸத ஸதா, ஸதம், ஸதம். ஸதேன, கரணே ஸதேன. ஸதஸ்ஸ, ஸதா ஸதம்ஹா ஸதஸ்மா, ஸதஸ்ஸ, ஸதே ஸதம்ஹி ஸதஸ்மிம். ஏவம் ஏகஸததோ பபு⁴தி யாவ ஸஹஸ்ஸம்.

கோடி பகோடி கோடிப்பகோடி அக்கோ²பி⁴ணியோ இத்தி²லிங்கே³+கவசனந்தா. வக்³க³பே⁴தே³ து ஸப்³பா³ஸம்பி ஸம்க்²யானம் ப³ஹுவசனோபி ஹோதேவ ‘‘த்³வேவீஸதியோ ஜினத³ந்தா’’ ‘‘திஸ்ஸோ வீஸதியோ தி³னக⁴டிகா’’ இச்சாதி³.

த³ஸத³ஸகம் ஸதம் நாம, த³ஸஸதம் ஸஹஸ்ஸம் நாம, த³ஸஸஹஸ்ஸம் நஹுதம், த³ஸனஹுதம் லக்க²ம், ஸதஸஹஸ்ஸந்திபி வுச்சதி.

லக்க²ஸதம் கோடி, கோடிலக்க²ஸதம் பகோடி, பகோடிலக்க²ஸதம் கோடிப்பகோடி, ஏவம் நஹுதம், நின்னஹுதம், அக்கோ²பி⁴ணீ, பி³ந்து³, அப்³பு³த³ம், நிரப்³பு³த³ம், அஹஹம், அப³ப³ம், அடடம், ஸோக³ண்டி³கம், உப்பலம், குமுத³ம், புண்ட³ரீகம், பது³மம், கதா²னம், மஹாகதா²னம், அஸங்க்²யேய்யந்தி யதா²க்கமம் ஸதலக்க²கு³ணம் வேதி³தப்³ப³ம்.

இச்சேவம் டா²னதோ டா²னம், ஸதலக்க²கு³ணம் மதம்;

கோடிப்பபு⁴தீனம் வீஸ-ஸங்க்²யானஞ்ச யதா²க்கமந்தி.

அதா²+ஸம்க்²யா வுச்சதே, அப்³யயந்தி ச வுச்சதே. தம் பாதி³ சாதி³, உபஸக்³க³னிபாதாதி ச து³வித⁴ம்.

ப பரா அப ஸம் அனு அவ ஓ நி து³ வி அதி⁴ அபி அதி ஸு உ அபி⁴ பதி பரி உப ஆ இமே வீஸதி பாத³யோ. பாத³யோ ஹி ஜோதகா, ந வாசகா.

தத்த² ப-ஸத்³தோ³ பகாரா+தி³கம்ம, பதா⁴ன+ந்தோபா⁴வ, வியோக³, தப்பர, பு⁴ஸத்த², ஸம்ப⁴வ, தித்தி, அனாவில, பத்த²னாதீ³ஸு. யதா² பகாரே-பஞ்ஞா. ஆதி³கம்மே-விப்பகதம், பதா⁴னே-பணீதம், அந்தோபா⁴வே-பக்கி²த்தம், கி²த்தந்தி பேரணம், பக்கி²த்தந்தி அந்தோகரணம், தா⁴த்வத்த²ஸ்ஸ பா³தி⁴தத்தா. வுத்த²ஞ்ஹி –

தா⁴த்வத்த²ம் பா³த⁴தே கோசி, கோசி தம் அனுவத்ததே;

தமேவ+ஞ்ஞோ விஸேஸேதி, உபஸக்³க³க³தீ திதா⁴தி.

ஏத்த² ச ‘‘அனுருத்³த⁴கா மே ஸங்கா³மயுத்³தே⁴’’தி ச இமே உபஸக்³கா³ தா⁴த்வத்த²ம் விஸேஸேந்தி நாம. வியோகே³-பவாஸீ, தப்பரே-பாசரியோ, பு⁴ஸத்தே²-பவுத்³த⁴காயோ, ஸம்ப⁴வே-ஹிமவந்தா க³ங்கா³ பப⁴வதி, தித்தியம்-பஹூத+மன்னம், அனாவிலே-பஸன்ன+முத³கம், பத்த²னே-பணிஹிதம்.

பராஇதி பரிஹானி, பராஜய, க³தி, விக்கமா+மஸனாதீ³ஸு. யதா² பரிஹானியம்-பராப⁴வோ. பராஜயே-பராஜிதோ, க³தியம்-பராயனம், விக்கமே-பரக்கமதி, ஆமஸனே-அங்க³ஸ்ஸ பராமஸனம்.

அபஇதி அபக³த, க³ரஹ, வஜ்ஜன, பூஜா, பது³ஸ்ஸனாதீ³ஸு. யதா² அபக³தே-அபமானோ அபேதோ, க³ரஹே-அபக³ப்³போ⁴, வஜ்ஜனே-அபஸாலாய ஆயந்தி வாணிஜா, பூஜாயம்-வுத்³தா⁴பசாயீ, பது³ஸ்ஸனே-அபரஜ்ஜ²ந்தி.

ஸம்இதி ஸமோதா⁴ன, ஸம்மாஸம, ஸமந்தபா⁴வ, ஸம்க³த, ஸம்கே²ப, பு⁴ஸத்த², ஸஹ+ப்பத்த², பப⁴வா+பி⁴முக²பா⁴வ, விதா⁴ன, புனப்புன, கரண, ஸமித்³தா⁴தீ³ஸு. யதா² ஸமோதா⁴னே-ஸந்தி⁴, ஸம்மாஸமே-ஸமாதி⁴, ஸம்பயுத்தோ, ஸமந்தபா⁴வே-ஸம்கிண்ணம், ஸமுல்லபனா, ஸம்க³தே-ஸங்க³மோ, ஸம்கே²பே-ஸமாஸோ, பு⁴ஸத்தே²-ஸாரத்தோ², ஸஹத்தே²-ஸம்வாஸோ, அப்பத்தே²-ஸமக்³கோ⁴, பப⁴வே-ஸம்ப⁴வோ, அபி⁴முக²பா⁴வே-ஸம்முக²ம். ஸம்க³தே-ஸம்க³ண்ஹாதி, விதா⁴னே-ஸம்வுதம், புனப்புனகரணே-ஸந்தா⁴வதி, ஸமித்³தி⁴யம்-ஸம்பன்னோ.

அனுஇதி அனுக³தா+நுபச்சி²ன்ன, பச்சா²த்த², பு⁴ஸத்த², ஸாதி³ஸ்ஸ, ஹீன, ததியத்த², லக்க²ணி+த்த²ம்பூ⁴தக்கா²ன, பா⁴க³, விச்சா²தீ³ஸு. அனுக³தே-அன்வேதி, அனுபச்சி²ன்னே-அனுஸயோ, பச்சா²த்தே²-அனுரத²ம், பு⁴ஸத்தே²-அனுரத்தோ, ஸாதி³ஸ்ஸே-அனுரூபம், ஹீனே-அனுஸாரிபுத்தம் பஞ்ஞவந்தோ, ததியத்தே²-நதி³+மன்வவஸிதா ஸேனா, லக்க²ணேருக்க²+மனுவிஜ்ஜோததே விஜ்ஜு, இத்த²ம்பூ⁴தக்²யானே-ஸாது⁴ தே³வத³த்தோ மாதர+மனு, பா⁴கே³-ய+தே³த்த² மம் அனு ஸியா, தம் தீ³யது, விச்சா²யம்-ருக்க²ம் ருக்க²ம் அனு விஜ்ஜோததே சந்தோ³.

அவஇதி அதோ⁴பா⁴க³, வியோக³, பரிப⁴வ, ஜானன, [ஸுத்³தி⁴] நிச்ச²ய, தே³ஸ, தே²ய்யாதீ³ஸு. அதோ⁴பா⁴கே³-அவக்கி²த்தசக்கு², வியோகே³-அவகோகிலம் வனம், பரிப⁴வே-அவஜானனம், அவமஞ்ஞதி, ஜானனே-அவக³ச்ச²தி. [ஸுத்³தி⁴யம்–வோதா³னம் (ரூபஸித்³தி⁴)], நிச்ச²யே-அவதா⁴ரணம், தே³ஸே-அவகாஸோ, தே²ய்யே-அவஹாரோ.

ஓஇதி ஓரோஹரண, நீஹரண, ஸுத்³தி⁴ஆதீ³ஸு தி³ஸ்ஸதி. ஓரோஹணே-பாஸாதா³ ஓரோஹதி, நீஹரணே-ஓமுக்குபாஹனோ, ஸுத்³தி⁴யம்-ஓதா³தம்.

நிஇதி, நிஸ்ஸேஸ, நிக்³க³த, நீஹரண,+ந்தோபவேஸனா+பா⁴வ, நிஸேத⁴ன, நிக்க²ந்த, பாதுபா⁴வா+வதா⁴ரண, விப⁴ஜன, உபமு+பதா⁴ரணா+வஸான, சே²க, நீஹரணா+வரணாதீ³ஸு. நிஸ்ஸேஸே-நிருத்தி, நிக்³க³தே-நிக்கிலேஸோ, நிய்யாதி, நீஹரணே-நித்³தா⁴ரணம், அந்தோபவேஸனே-நிகா²தோ, அபா⁴வே-நிம்மக்கி²கம், நிஸேதே⁴-நிவாரேதி, நிக்க²ந்தே-நிப்³பா³னம், பாதுபா⁴வே-நிம்மிதம், அவதா⁴ரணே-நிச்ச²யோ, விப⁴ஜனே-நித்³தே³ஸோ. உபமாயம்-நித³ஸ்ஸனம், உபதா⁴ரணே-நிஸாமனம், அவஸானே-நிட்டி²தம், சே²கே-நிபுணோ, நீஹரணே-நீஹரதி, இஸ்ஸ தீ³கோ⁴. ஆவரணே-நீவரணம்.

து³இதி அஸோப⁴ணா+பா⁴வ, குச்சி²தா+ஸமித்³தி⁴, கிச்ச², விரூபதாதீ³ஸு. அஸோப⁴ணே-து³க்³க³ந்தோ⁴, அபா⁴வே-து³ப்³பி⁴க்க²ம், குச்சி²தே – து³க்கடம். அஸமித்³தி⁴யம்-து³ஸ்ஸஸ்ஸம், கிச்சே²-து³க்கரம், விரூபதாயம்-து³ப்³ப³ண்ணோ து³ம்முகோ².

விஇதி விஸேஸ, விவித⁴, விருத்³த⁴, விக³த, வியோக³, விரூபதாதீ³ஸு. விஸேஸே-விமுத்தி, விஸிட்டோ², விவிதே⁴-விமதி, விருத்³தே⁴-விவாதோ³, விக³தே-விமலம், வியோகே³-விப்பயுத்தோ, விரூபதாயம்-விரூபோ.

அதி⁴இதி அதி⁴கி+ஸ்ஸரூ+பரிபா⁴வா+தி⁴ப⁴வன+ஜ்ஜா²யா+தி⁴ட்டா²ன, நிச்ச²ய, பாபுணனாதீ³ஸு. அதி⁴கே-அதி⁴ஸீலம், இஸ்ஸரே-அதி⁴பதி, அதி⁴ ப்³ரஹ்மத³த்தே பஞ்சாலா, உபரிபா⁴வே-அதி⁴ரோஹதி, பத²விம் அதி⁴ஸேஸ்ஸதி, அதி⁴ப⁴வனே-அதி⁴ப⁴வதி, அஜ்ஜா²யனே-ப்³யாகரண+மதீ⁴தே, அதி⁴ட்டா²னே-பூ⁴மிகம்பாதி³ம் அதி⁴ட்டா²தி, நிச்ச²யே-அதி⁴மோக்கோ², பாபுணனே-போ⁴க³க்க²ந்த⁴ம் அதி⁴க³ச்ச²தி.

அபிஇதி ஸம்பா⁴வனா+பேக்கா², ஸமுச்சய, க³ரஹ, பஞ்ஹாதீ³ஸு. ஸம்பா⁴வனாயம்-அபி தி³ப்³பே³ஸு காமேஸு, மேரும்பி வினிவிஜ்ஜி²த்வா க³ச்சே²ய்ய, அபேக்கா²யம்-அயம்பி த⁴ம்மோ அனியதோ, ஸமுச்சயே-இதிபி அரஹம், அந்தம்பி அந்தகு³ணம்பி ஆதா³ய, க³ரஹே-அபி அம்ஹாகம் பண்டி³தக, பஞ்ஹே-அபி ப⁴ந்தே பி⁴க்க²ம் லபி⁴த்த².

அதிஇதி அதிக்கமனா+திக்கந்தா+திஸய, பு⁴ஸத்தா²தீ³ஸு. அதிக்கமே-அதிரோசதி அம்ஹேஹி, அதீதோ, அதிக்கந்தே-அச்சந்தம், அதிஸயே-அதிகுஸலோ, பு⁴ஸத்தே²-அதிகோதோ⁴, அதிவுத்³தி⁴.

ஸுஇதி ஸோப⁴ண, ஸுட்டு², ஸம்மா, ஸமித்³தி⁴, ஸுக²த்தா²தீ³ஸு. ஸோப⁴ணே-ஸுக³ந்தோ⁴, ஸுட்டு²+ஸம்மாத³த்தே²ஸு-ஸுட்டு² க³தோ ஸுக³தோ, ஸம்மா க³தோதிபி ஸுக³தோ, ஸமித்³தி⁴யம்-ஸுபி⁴க்க²ம், ஸுக²த்தே²-ஸுகரோ.

உஇதி உக்³க³து+த்³த⁴கம்ம, பதா⁴ன, வியோக³, ஸம்ப⁴வ, அத்தலாப⁴, ஸத்தி, ஸரூபகத²னாதீ³ஸு. உக்³க³தே-உக்³க³ச்ச²தி, உத்³த⁴கம்மே-ஆஸனா உட்டி²தோ, உக்கே²போ, பதா⁴னே-உத்தமோ, லோகுத்தரோ, வியோகே³-உப்³பா⁴ஸிதோ, ஸம்ப⁴வே-உப்³பு⁴தோ, அத்தலாபே⁴-உப்பன்னம் ஞாணம், ஸத்தியம்-உஸ்ஸஹதி க³ந்தும், ஸரூபகத²னே-உத்³தி³ஸதி ஸுத்தம்.

அபி⁴இதி அபி⁴முக²பா⁴வ, விஸிட்டா²+தி⁴கு+த்³த⁴கம்ம, குல, ஸாருப்ப, வந்த³ன, லக்க²ணி+த்த²ம்பூ⁴தக்கா²ன, விச்சா²தீ³ஸு. அபி⁴முக²பா⁴வே-அபி⁴முகோ², அபி⁴க்கமதி, விஸிட்டே²-அபி⁴த⁴ம்மோ, அதி⁴கே-அபி⁴வஸதி, உத்³த⁴கம்மே-அபி⁴ருஹதி. குலே-அபி⁴ஜாதோ, ஸாருப்பே-அபி⁴ரூபோ, வந்த³னே-அபி⁴வாதே³தி, லக்க²ணாதீ³ஸு புரிமஸமம்.

பதிஇதி படிக³த, படிலோம, படினிதி⁴, படிதா³ன, நிஸேத⁴, நிவத்தன, ஸாதி³ஸ்ஸ, படிகரணா+தா³ன, படிபோ³த⁴, படிச்ச, லக்க²ணித்த²ம்பூ⁴தக்கா²ன, பா⁴க³, விச்சா²தீ³ஸு. படிக³தே-பச்சக்க²ம், படிலோமே-படிஸோதம், படினிதி⁴ம்ஹி-ஆசரியதோ பதி ஸிஸ்ஸோ, படிதா³னே-தேலத்தி²கஸ்ஸ க⁴தம் படித³தா³தி, நிஸேதே⁴-படிஸேதே⁴தி, நிவத்தனே-படிக்கமதி, ஸாதி³ஸ்ஸே-படிரூபகம், படிகரணே-படிகாரோ, ஆதா³னே-படிக்³க³ண்ஹாதி, படிபோ³தே⁴-படிவேதோ⁴, படிச்சே-பச்சயோ, லக்க²ணாதீ³ஸு புரிமஸமம்.

பரிஇதி ஸமந்ததோபா⁴வ, பரிச்சே²த³, வஜ்ஜனா+லிங்க³ன, நிவஸன, பூஜா, போ⁴ஜனா+வஜானன, தோ³ஸக்கா²ன, லக்க²ணாதீ³ஸு. ஸமந்த²- தோபா⁴வே-பரிவுதோ, பரிச்சே²தே³-பரிஞ்ஞேய்யம், வஜ்ஜனே-பரிஹரதி, ஆலிங்க³னே-பரிஸ்ஸஜதி, நிவஸனே-யோ வத்த²ம் பரித³ஹேஸ்ஸதி, பூஜாயம்-பரிசரியா, போ⁴ஜனே-பி⁴க்கு²ம் பரிவிஸதி, அவஜானனே-பரிப⁴வதி. தோ³ஸக்கா²னே-பரிபா⁴ஸதி, லக்க²ணாதீ³ஸு-ருக்க²ம் பரி விஜ்ஜோததே விஜ்ஜு இச்சாதி³.

உபஇதி உபக³மன, ஸமீபூ+பபத்தி, ஸாதி³ஸ்ஸா+தி⁴கு+பரிபா⁴வா+நஸன, தோ³ஸக்கா²ன, ஸஞ்ஞா, புப்³ப³கம்ம, பூஜா, க³ய்ஹாகார, பு⁴ஸத்தா²தீ³ஸு. உபக³மனே-நிஸின்னம் வா உபனிஸீதே³ய்ய, ஸமீபே-உபனக³ரம், உபபத்தியம்-ஸக்³க³ம் லோகம் உபபஜ்ஜதி, அத² வா உபபத்தி=யுத்தி, யதா² உபபத்திதோ இக்க²தீதி உபேக்கா², ஸாதி³ஸ்ஸே-உபமானம், உபமா, அதி⁴கே-உபகா²ரியம் தோ³ணோ, உபரிபா⁴வே-உபஸம்பன்னோ, அனஸனே-உபவாஸோ, தோ³ஸக்கா²னே-பரம் உபவத³தி, ஸஞ்ஞாயம்-உபதா⁴, உபஸக்³கோ³, புப்³ப³கம்மே-உபக்கமோ, உபகாரோ, பூஜாயம்-பு³த்³து⁴பட்டா²கோ, மாதுபட்டா²னம், க³ய்ஹாகாரே-ஸோசேய்யபச்சுபட்டா²னம், பு⁴ஸத்தே²-உபாதா³னம், உபாயாஸோ, உபனிஸ்ஸயோதி.

ஆஇதி அபி⁴முக²பா⁴வு+த்³த⁴கம்ம+மரியாதா³+பி⁴விதி⁴, பத்தி+ச்சா², பரிஸ்ஸஜன, ஆதி³கம்ம, க³ஹண, நிவாஸன, ஸமீப, ஆவ்ஹானாதீ³ஸு. அபி⁴முக²பா⁴வே-ஆக³ச்ச²ந்தி, உத்³த⁴கம்மே-ஆரோஹதி, மரியாதா³யம்-ஆபப்³ப³தா கே²த்தம், அபி⁴விதி⁴ம்ஹி-ஆகுமாரம் யஸோ கச்சாயனஸ்ஸ, பத்தியம்-ஆபத்திம் ஆபன்னோ, இச்சா²யம்-ஆகங்கா², பரிஸ்ஸஜனே-ஆலிங்க³னம், ஆதி³கம்மே-ஆரம்போ⁴, க³ஹணே-ஆதீ³யதி, ஆலிங்க³தி, (ஆலிம்பதி, ரூ), நிவாஸே-ஆவஸதோ², ஆவாஸோ, ஸமீபே-ஆஸன்னம், ஆவ்ஹானே-ஆமந்தேதி.

ப பரா+ப ஸ+மன்வ+வ, ஓ நி து³ ரபி⁴ ப்³யா+தி⁴ஸு;

அதி நி ப்பதி பரி அபயோ, உப ஆ இதி வீஸதி;

ஏஸ ஹி போ⁴ உபஸக்³க³-விதி⁴+க்கமதோ கதி²தோ.

ஏத்த² ச –

உபஸக்³க³+நிபாதா ச, பச்சயா ச இமே தயோ;

நேகே+நேகத்த²வாசகா, இதி நேருத்திகா+ப்³ரவும்.