34. ஸரம்ஹா த்³வே

ஸரம்ஹா பரஸ்ஸ ப்³யஞ்ஜனஸ்ஸ க்வசி த்³வே ரூபானி ஹோந்தி. ஏத்த² ச ஆவுத்தித்³விவசனம் டா²னேத்³விவசனந்தி த்³வீஸு டா²னேத்³விவசனம் வேதி³தப்³ப³ம்.

தானி ச ப+பதி+படி+கம+குஸ+குத⁴+கீ+க³ஹ+ஜுத+ஞா+ஸி+ ஸு+ஸூ+ஸம்பூ⁴+ஸர+ஸஸாதீ³னமாதி³ப்³யஞ்ஜனானஞ்ச ஹோதி. இத⁴ பமாதோ³=இத⁴ப்பமாதோ³, ஏவம் அப்பமாதோ³, விப்பயுத்தோ, ஸுப்பஸன்னோ, ஸம்மா பதா⁴னம்=ஸம்மப்பதா⁴னம் ரஸ்ஸத்தம். அப்பதிவத்தியோ, அதி⁴ப்பதிபச்சயோ, ஸுப்பதிட்டி²தோ,. அப்படிபுக்³க³லோ, விப்படிஸாரோ, ஸுப்படிபத்தி. பக்கமோ, படிக்கமோ, ஹேதுக்கமோ, ஆகமதி=அக்கமதி, ஏவம் பக்கமதி, யதா²க்கமம். அக்கோஸதி, படிக்கோஸதி, அனுக்கோஸதி, ஆகோஸதி=அக்கோஸதி. அக்குத்³தோ⁴, அபி⁴க்குத்³தோ⁴. த⁴னக்கீதோ, விக்கயோ, அனுக்கயோ. பக்³க³ஹோ, விக்³க³ஹோ, அனுக்³க³ஹோ, சந்த³க்³கா³ஹோ, தி³ட்டி²க்³கா³ஹோ. பஜ்ஜோதோ, விஜ்ஜோதோ, உஜ்ஜோதோ. கதஞ்ஞூ, விஞ்ஞூ, பஞ்ஞாணம், விஞ்ஞாணம், அனஞ்ஞாணம். அவஸ்ஸயோ, நிஸ்ஸயோ, ஸமுஸ்ஸயோ. அப்பஸ்ஸுதோ, விஸ்ஸுதோ, ப³ஹுஸ்ஸுதோ. ஆஸவா=அஸ்ஸவா. பஸ்ஸம்பே⁴ந்தோ, விஸ்ஸம்பே⁴ந்தோ. அட்டஸ்ஸரோ, விஸ்ஸரதி, அனுஸ்ஸரதி, அனுஸ்ஸதி. பஸ்ஸஸந்தோ, விஸ்ஸஸந்தோ, முஹுஸ்ஸஸந்தோ, ஆஸாஸோ=அஸ்ஸாஸோ. ஆதி³ஸத்³தே³ன அவிஸ்ஸஜேந்தோ, விஸ்ஸஜேந்தோ, அபி⁴க்கந்ததரோ, பரிச்சஜேந்தோ, உபத்³த³வோ, உபக்கிலேஸோ, மித்தத்³து³னோ, ஆயப்³யயோ, அப்³ப³ஹி இச்சாதி³.

திக+தய+திம்ஸ+வதாதீ³ன+மாதி³ப்³யஞ்ஜனஸ்ஸ ச. குஸலத்திகம், பீதித்திகம், ஹேதுத்திகம். லோகத்தயம், போ³தி⁴த்தயம், வத்து²த்தயம். ஏகத்திம்ஸ, த்³வத்திம்ஸ, தேத்திம்ஸ, சதுத்திம்ஸ. ஸீலப்³ப³தம், ஸுப்³ப³தோ. ஸப்பீதிகோ, ஸமன்னாக³தோ, புனப்புனம் இச்சாதி³.

வது+வட+தி³ஸான+மந்தே, யதா² வத்ததி, வட்டதி, த³ஸ்ஸனம், ப²ஸ்ஸோ இச்சாதி³.

உ+து³+நிஉபஸக்³க³+த+சது+ச²+ஸந்தஸத்³தா³தே³ஸாதீ³ஹி பரேஸஞ்ச. உகம்ஸோ=உக்கம்ஸோ, ஏவம் து³க்கரம், நிக்கங்கோ², உக்³க³தம், து³ச்சரிதம், நிஜ்ஜடம், உஜ்ஜஹம், உச்சங்க³ம், உன்னமதி, து³க்கரோ, நித்³த³ரோ, உன்னதோ, து³ப்பஞ்ஞோ, நிம்மலோ, உய்யுத்தோ, து³ல்லபோ⁴, நிப்³ப³த்தோ, உஸ்ஸாஹோ, நிஸ்ஸாரோ. தக்கரோ, தஜ்ஜோ, தன்னின்னோ, தப்பப⁴வோ, தம்மயோ, சதுக்கம், சதுத்³தி³ஸம், சதுப்பதோ³, சதுப்³பி³த⁴ம், சதுஸ்ஸாலம், ச²க்கம், ச²ன்னவுதி, ச²ப்பதி³கோ, ச²ப்³ப³ஸ்ஸானி. ஸக்காரோ, ஸக்³கு³ணோ, ஸந்தி³ட்டி², ஸப்புரிஸோ, மஹப்³ப³லோ.

அபத³ந்தஆகாரவஜ்ஜிததீ³க⁴தோ யகாரஸ்ஸ ச, நிய்யாதி, ஸுய்யதி, அபி⁴பு⁴ய்ய, விசேய்ய, வினேய்ய, தே⁴ய்யம், நேய்யம், ஸேய்யோ, ஜேய்யோ, வேய்யாகரணோ. ஆகாரவஜ்ஜிதந்தி கிம், மாலாய, தோ³லாய, ஸமாதா³ய.

ச²ந்தா³னுரக்க²ணே-நப்பஜஹே வண்ணப³லம் புராணம், உஜ்ஜுக³தேஸு ஸேய்யோ, க³ச்ச²ந்தி ஸுக்³க³திம். ஸரம்ஹாதி கிம், ஞாயோ, தம்க²ணம். க்வசித்வேவ, நிகாயோ, நிதா³னம், நிவாஸோ, ததோ, ச²ஸட்டி², உபனீயதி, ஸூயதி.