19. ஸம்பயுத்தபச்சயோ

ஸம்பயுத்தபச்சயோ விப்பயுத்தபச்சயோதி ஏகம் து³க்கம். அத்தி² பச்சயோ நத்தி² பச்சயோதி ஏகம் து³க்கம். விக³தபச்சயோ அவிக³த பச்சயோதி ஏகம் து³க்கம். இமானி தீணி பச்சயது³க்கானி விஸும் பச்சய விஸேஸானி ந ஹோந்தி. புப்³பே³ ஆக³தேஸு பச்சயேஸு கேசி பச்சயா அத்தனோ பச்சயுப்பன்னேஹி ஸம்பயுத்தா ஹுத்வா பச்சயத்தம் க³ச்ச²ந்தி, கேசி விப்பயுத்தா ஹுத்வா, கேசி விஜ்ஜமானா ஹுத்வா, கேசி அவிஜ்ஜமானா ஹுத்வா, கேசி விக³தா ஹுத்வா, கேசி அவிக³தா ஹுத்வா பச்சயத்தம் க³ச்ச²ந்தீதி த³ஸ்ஸனத்த²ம் இமானி தீணி பச்சயது³க்கானி வுத்தானி.

ஏத்த² ச அத்தீ²தி கோ² கச்சான அயமேகோ அந்தோ, நத்தீ²தி கோ² து³தியோ அந்தோதி ஏவரூபேஸு டா²னேஸு அத்தி²னத்தி²ஸத்³தா³ ஸஸ்ஸதுச்சே²தே³ஸுபவத்தந்தி, தஸ்மா ஏவரூபானம் அத்தா²னம் நிவத்தனத்த²ம் புன விக³தது³க்கம் வுத்தம்.

ஸப்³பே³பி ஸஹஜாதா சித்தசேதஸிகா த⁴ம்மா அஞ்ஞமஞ்ஞஸ்ஸ பச்சயா சேவ ஹோந்தி பச்சயுப்பன்னா ச.

கேனட்டே²ன ஸம்பயுத்தோ. ஏகுப்பாத³தா ஏகனிரோத⁴தா ஏகவத்து²கதா ஏகாரம்மணதாதி இமேஹி சதூஹி ஸம்பயோக³ங்கே³ஹி ஸமன்னாக³தோ ஹுத்வா ஸம்யுத்தோ ஏகீபா⁴வம் க³தோதி ஸம்பயுத்தோ.

தத்த² ஏகீபா⁴வம் க³தோதி சக்கு²விஞ்ஞாணம் ப²ஸ்ஸாதீ³ஹி ஸத்தஹி சேதஸிகேஹி ஸஹ ஏகீபா⁴வம் க³தம் ஹோதி, த³ஸ்ஸனந்தி ஏகம் வோஹாரம் க³ச்ச²தி. அட்ட² த⁴ம்மா விஸும் விஸும் வோஹாரம் ந க³ச்ச²ந்தி, வினிப்³பு⁴ஜ்ஜித்வா விஞ்ஞாதும் ந ஸக்கோதி. ஏஸ நயோ ஸேஸேஸு ஸப்³ப³சித்துப்பாதே³ஸூதி. ஸம்பயுத்தபச்சயதீ³பனா நிட்டி²தா.