நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

பட்டா²னுத்³தே³ஸ தீ³பனீபாட²

1. ஹேதுபச்சயோ

கதமோ ஹேதுபச்சயோ. லோபோ⁴ ஹேதுபச்சயோ. தோ³ஸோ, மோஹோ, அலோபோ⁴, அதோ³ஸோ, அமோஹோ ஹேது பச்சயோ.

கதமே த⁴ம்மா ஹேதுபச்சயஸ்ஸ பச்சயுப்பன்னா. லோப⁴ ஸஹஜாதா சித்தசேதஸிகா த⁴ம்மா ச ரூபகலாபாத⁴ம்மா ச தோ³ஸஸஹ ஜாதா மோஹஸஹஜாதா அலோப⁴ஸஹஜாதா அதோ³ஸஸஹ ஜாதா அமோஹஸஹஜாதா சித்தசேதஸிகா த⁴ம்மா ச ரூபகலாபா த⁴ம்மா ச ஹேதுபச்சயதோ உப்பன்னா ஹேதுபச்சயுப்பன்னா த⁴ம்மா.

ஸஹஜாதரூபகலாபா நாம ஸஹேதுகபடிஸந்தி⁴க்க²ணே கம்மஜரூபானி ச பவத்திகாலே ஸஹேதுகசித்தஜரூபானி ச. தத்த² படிஸந்தி⁴க்க²ணோ நாம படிஸந்தி⁴சித்தஸ்ஸ உப்பாத³க்க²ணோ. பவத்திகாலோ நாம படிஸந்தி⁴சித்தஸ்ஸ டி²திக்க²ணதோ பட்டா²ய யாவ சுதிகாலம் வுச்சதி.

கேனட்டே²ன ஹேது, கேனட்டே²ன பச்சயோதி. மூலட்டே²ன ஹேது, உபகாரகட்டே²ன பச்சயோதி. தத்த² மூலயமகே வுத்தானம் லோபா⁴தீ³னம் மூலத⁴ம்மானம் மூலபா⁴வோ மூலட்டோ² நாம. ஸோ மூலட்டோ² மூலயமகதீ³பனியம் அம்ஹேஹி ருக்கோ²பமாய தீ³பிதோயேவ.

அபி ச ஏகோ புரிஸோ ஏகிஸ்ஸம் இத்தி²யம் படிப³த்³த⁴ சித்தோ ஹோதி. ஸோ யாவ தம் சித்தம் ந ஜஹதி, தாவ தம் இத்தி²ம் ஆரப்³ப⁴ தஸ்ஸ புரிஸஸ்ஸ லோப⁴ஸஹஜாதானி காயவசீமனோகம்மானி ச லோப⁴ஸமுட்டி²தானி சித்தஜரூபானி ச சிரகாலம்பி பவத்தந்தி. ஸப்³பா³னி ச தானி சித்தசேதஸிகரூபானி தஸ்ஸம் இத்தி²யம் ரஜ்ஜனலோப⁴மூலகானி ஹோந்தி. ஸோ லோபோ⁴ தேஸம் மூலட்டே²ன ஹேது ச, உபகாரகட்டே²ன பச்சயோ ச. தஸ்மா ஹேதுபச்சயோ. ஏஸ நயோ ஸேஸானி ரஜ்ஜனீயவத்தூ²னி ஆரப்³ப⁴ரஜ்ஜனவஸேன உப்பன்னேஸு லோபே⁴ஸு, து³ஸ்ஸனீயவத்தூ²னி ஆரப்³ப⁴ து³ஸ்ஸனவஸேன உப்பன்னேஸு தோ³ஸேஸு, முய்ஹனீயவத்தூ²னி ஆரப்³ப⁴ முய்ஹனவஸேன உப்பன்னேஸு மோஹேஸு ச.

தத்த² யதா² ருக்க²ஸ்ஸ மூலானி ஸயம் அந்தோபத²வியம் ஸுட்டு² பதிட்ட²ஹித்வா பத²விரஸஞ்ச ஆபோரஸஞ்ச க³ஹேத்வா தம் ருக்க²ம் யாவ அக்³கா³ அபி⁴ஹரந்தி, தேன ருக்கோ² சிரகாலம் வட்³ட⁴மானோ திட்ட²தி. ததா² லோபோ⁴ ச தஸ்மிம் தஸ்மிம் வத்து²ம்ஹி ரஜ்ஜனவஸேன ஸுட்டு² பதிட்ட²ஹித்வா தஸ்ஸ தஸ்ஸ வத்து²ஸ்ஸ பியரூபரஸஞ்ச ஸாதரூபரஸஞ்ச க³ஹேத்வா ஸம்பயுத்தத⁴ம்மே யாவ காயவசீவீதிக்கமா அபி⁴ஹரதி, காய வீதிக்கமம் வா வசீவீதிக்கமம் வா பாபேதி. ததா² தோ³ஸோ ச து³ஸ்ஸன வஸேன அப்பியரூபரஸஞ்ச அஸாதரூபரஸஞ்ச க³ஹேத்வா, மோஹோ ச முய்ஹனவஸேன நானாரம்மணேஸு நிரத்த²கசித்தாசாரரஸம் வட்³டே⁴த்வாதி வத்தப்³ப³ம். ஏவம் அபி⁴ஹரந்தா தயோ த⁴ம்மா ரஜ்ஜனீயாதீ³ஸு வத்தூ²ஸு ஸம்பயுத்தத⁴ம்மே மோத³மானே பமோத³மானே கரோந்தோ விய சிர காலம் பவத்தேந்தி. ஸம்பயுத்தத⁴ம்மா ச ததா² பவத்தந்தி. ஸம்பயுத்த த⁴ம்மேஸு ச ததா² பவத்தமானேஸு ஸஹஜாதரூபகலாபாபி ததா² பவத்தந்தியேவ. தத்த² ஸம்பயுத்தத⁴ம்மே அபி⁴ஹரதீதி த்³வே பியரூப ஸாதரூபரஸே ஸம்பயுத்தத⁴ம்மானம் ஸந்திகம் பாபேதீதி அத்தோ².

ஸுக்கபக்கே² ஸோ புரிஸோ யதா³காமேஸு ஆதீ³னவம் பஸ்ஸதி, ததா³ ஸோ தம் சித்தம்ஜஹதி, தம் இத்தி²ம் ஆரப்³ப⁴ அலோபோ⁴ ஸஞ்ஜா யதி. புப்³பே³ யஸ்மிம் காலே தம் இத்தி²ம் ஆரப்³ப⁴ லோப⁴மூலகானி அஸுத்³தா⁴னி காயவசீமனோகம்மானி வத்தந்தி. இதா³னி தஸ்மிம் காலேபி அலோப⁴மூலகானி ஸுத்³தா⁴னி காயவசீமனோகம்மானி வத்தந்தி. பப்³ப³ஜித ஸீலஸம்வரானி வா ஜா²னபரிகம்மானி வா அப்பனாஜா²னானி வா வத்தந்தி. ஸோ அலோபோ⁴ தேஸம் மூலட்டே²ன ஹேது ச ஹோதி, உபகாரகட்டே²ன பச்சயோச. தஸ்மா ஹேதுபச்சயோ. ஏஸ நயோ ஸேஸேஸு லோப⁴ படிபக்கே²ஸு அலோபே⁴ஸு, தோ³ஸபடிபக்கே²ஸு அதோ³ஸேஸு, மோஹ படிபக்கே²ஸு அமோஹேஸு ச.

தத்த² ருக்க²மூலானி விய அலோபோ⁴ லோப⁴னேய்யவத்தூ²ஸு லோப⁴ம் பஹாய லோப⁴விவேகஸுக²ரஸம் வட்³டே⁴த்வா தேன ஸுகே²ன ஸம்பயுத்தத⁴ம்மே மோத³மானே பமோத³மானே கரோந்தோ விய யாவ ஜா²னஸமாபத்திஸுகா² வா யாவ மக்³க³ப²லஸுகா² வா வட்³டா⁴பேதி. ததா² அதோ³ஸோ ச தோ³ஸனேய்யவத்தூ²ஸு தோ³ஸவிவேகஸுக²ரஸம் வட்³டே⁴த்வா, அமோஹோ ச மோஹனேய்யவத்தூ²ஸு மோஹவிவேகஸுக²ரஸம் வட்³டே⁴த்வாதி வத்தப்³ப³ம். ஏவம் வட்³டா⁴பேந்தா தயோ த⁴ம்மா குஸலேஸு த⁴ம்மேஸு ஸம்பயுத்தத⁴ம்மே மோத³மானே பமோத³மானே கரோந்தோ விய சிர காலம்பி பவத்தேந்தி. ஸம்பயுத்தத⁴ம்மா ச ததா² பவத்தந்தி. ஸம்பயுத்த த⁴ம்மேஸு ச ததா² பவத்தமானேஸு ஸஹஜாதரூபகலாபாபி ததா² பவத்தந்தியேவ.

தத்த² லோப⁴விவேகஸுக²ரஸந்தி விவிச்சனம் விக³மனம் விவேகோ. லோப⁴ஸ்ஸ விவேகோ லோப⁴விவேகோ. லோப⁴விவேகே ஸுக²ம் லோப⁴விவேகஸுக²ம். லோப⁴விவேகம் படிச்ச உப்பன்னஸுக²ந்தி வுத்தம் ஹோதி. ததே³வ ரஸோ லோப⁴விவேகஸுக²ரஸோதி ஸமாஸோ. அயம் அபி⁴த⁴ம்மே பட்டா²னனயோ.

ஹத்தந்தனயோ பன அவிஜ்ஜாஸங்கா²தோ மோஹோ ச தண்ஹாஸங்கா²தோ லோபோ⁴ சாதி த்³வே த⁴ம்மா ஸப்³பே³ஸம்பி வட்டது³க்க²த⁴ம்மானம் மூலானி ஹோந்தி. தோ³ஸோ பன லோப⁴ஸ்ஸ நிஸ்ஸந்த³பூ⁴தம் பாபமூலம் ஹோதி. விஜ்ஜாஸங்கா²தோ அமோஹோ ச நிக்க²மதா⁴துஸங்கா²தோ அலோபோ⁴ சாதி த்³வே த⁴ம்மா விவட்டத⁴ம்மானம் மூலானி ஹோந்தி. அதோ³ஸோ பன அலோப⁴ஸ்ஸ நிஸ்ஸந்த³பூ⁴தம் கல்யாணமூலம் ஹோதி. ஏவம் ச²ப்³பி³தா⁴னி மூலானி ஸஹஜாதானம்பி அஸஹஜாதானம்பி நாமரூபத⁴ம்மானம் பச்சயா ஹோந்தீதி. அயம் ஸுத்தந்தேஸு நயோ. ஹேதுபச்சயதீ³பனா நிட்டி²தா.

2. ஆரம்மணபச்சயோ

கதமோ ஆரம்மணபச்சயோ. ஸப்³பே³பி சித்தசேதஸிகா த⁴ம்மா ஸப்³பே³பி ரூபத⁴ம்மா ஸப்³ப³ம்பி நிப்³பா³னம் ஸப்³பா³பி பஞ்ஞத்தியோ ஆரம்மண பச்சயோ. ந ஹி ஸோ நாம ஏகோபி த⁴ம்மோ அத்தி², யோ சித்த சேதஸிகானம் ஆரம்மணம் ந ஹோதி. ஸங்கே²பதோ பன ஆரம்மணம் ச²ப்³பி³த⁴ம் ஹோதி ரூபாரம்மணம் ஸத்³தா³ரம்மணம் க³ந்தா⁴ரம்மணம் ரஸாரம்மணம் போ²ட்ட²ப்³பா³ரம்மணம் த⁴ம்மாரம்மணந்தி.

கதமே த⁴ம்மா ஆரம்மணபச்சயஸ்ஸ பச்சயுப்பன்னா. ஸப்³பே³பி சித்த சேதஸிகாத⁴ம்மா ஆரம்மணபச்சயஸ்ஸ பச்சயுப்பன்னா. ந ஹி கிஞ்சி சித்தம் நாம அத்தி², யம் சித்தம் பூ⁴தேன வா அபூ⁴தேன வா ஆரம்மணேன வினா பவத்ததி.

தத்த² பச்சுப்பன்னம் ரூபாரம்மணம் து³வித⁴ஸ்ஸ சக்கு²விஞ்ஞாணசித்தஸ்ஸ ஆரம்மணபச்சயோ. பச்சுப்பன்னம் ஸத்³தா³ரம்மணம் து³வித⁴ஸ்ஸ ஸோதவிஞ்ஞாண சித்தஸ்ஸ. பச்சுப்பன்னம் க³ந்தா⁴ரம்மணம் து³வித⁴ஸ்ஸ கா⁴னவிஞ்ஞாணசித்தஸ்ஸ. பச்சுப்பன்னம் ரஸாரம்மணம் து³வித⁴ஸ்ஸ ஜிவ்ஹாவிஞ்ஞாணசித்தஸ்ஸ. பச்சுப்பன்னம் திவித⁴ம் போ²ட்ட²ப்³பா³ரம்மணம் து³வித⁴ஸ்ஸ காயவிஞ்ஞாணசித்தஸ்ஸ. பச்சுப்பன்னானி தானி பஞ்சாரம்மணானி திவித⁴ஸ்ஸ மனோதா⁴துசித்தஸ்ஸ ஆரம்மணபச்சயோ. ஸப்³பா³னி தானி அதீதானாக³தபச்சுப்பன்னானி பஞ்சாரம்மணானி வா ஸப்³பா³னி தேகாலிகானி காலவிமுத்தானி த⁴ம்மாரம்மணானி வா ச² ஸத்ததிவிதா⁴னம் மனோவிஞ்ஞாணசித்தானம் யதா²ரஹம் ஆரம்மணபச்சயோ.

கேனட்டே²ன ஆரம்மணம், கேனட்டே²ன பச்சயோதி. சித்த சேதஸிகேஹி ஆலம்பி³தப்³ப³ட்டே²ன ஆரம்மணம், உபகாரகட்டே²ன பச்சயோதி.

ஆலம்பி³தப்³ப³ட்டே²னாதி சேத்த² ஆலம்ப³ணகிரியா நாம சித்த சேதஸிகானம் ஆரம்மணக்³க³ஹணகிரியா, ஆரம்மணுபாதா³ன கிரியா.

யதா² ஹி லோகே அயோதா⁴தும் காமேதி இச்ச²தீதி அத்தே²ன அயோகந்தகோ நாம லோஹதா⁴துவிஸேஸோ அத்தி². ஸோ அயோக²ந்த⁴ஸமீபம் ஸம்பத்தோ தம் அயோக²ந்த⁴ம் காமேந்தோ விய இச்ச²ந்தோ விய அயோக²ந்தா⁴பி⁴முகோ² சஞ்சலதி. ஸயம் வா தம் அயோக²ந்த⁴ம் உபக³ச்ச²தி. அயோக²ந்த⁴ம் வா அத்தாபி⁴முக²ம் ஆகட்³ட⁴தி, அயோக²ந்தோ⁴ தத³பி⁴முகோ² சஞ்சலதி, தம் வா உபக³ச்ச²தி. அயம் அயோகந்தகஸ்ஸ ஆலம்ப³ணகிரியா நாம. ஏவமேவ சித்தசேதஸிகானம் ஆரம்மணேஸு ஆலம்ப³ணகிரியா த³ட்ட²ப்³பா³. ந கேவலம் ஆரம்மணேஸு ஆலம்ப³ண மத்தம் ஹோதி. அத² கோ² சித்தசேதஸிகா த⁴ம்மா ஸத்தஸந்தானே உப்பஜ்ஜமானா ச²ஸு த்³வாரேஸு ஆரம்மணானம் ஆபாதாக³மனே ஏவ க²ணே க²ணே உப்பஜ்ஜந்தி. உப்பஜ்ஜித்வா ச க²ணே க²ணே நிருஜ்ஜ²ந்தி.

யதா² தம் பே⁴ரிதலே பே⁴ரிஸத்³தா³ உப்பஜ்ஜமானா தத்த² தத்த² ஹத்தே²ன பஹரணகாலே ஏவ க²ணே க²ணே உப்பஜ்ஜந்தி, உப்பஜ்ஜித்வா ச க²ணே க²ணே நிருஜ்ஜ²ந்தி. வீணாஸத்³தா³ உப்பஜ்ஜமானா வீணாதந்தீஸு தத்த² தத்த² வீணாத³ந்தகேன பஹரணகாலே ஏவ க²ணே க²ணே உப்பஜ்ஜந்தி, உப்பஜ்ஜித்வா ச க²ணே க²ணே நிருஜ்ஜ²ந்தீதி. நித்³தா³யந்தஸ்ஸ ப⁴வங்க³சித்தப்பவத்தி காலேபி புப்³ப³ப⁴வே மரணாஸன்னகாலே ச²ஸு த்³வாரேஸு ஆபாத மாக³தானி கம்ம கம்மனிமித்த க³தினிமித்தானி ஏவ ப⁴வங்க³சித்தானம் ஆரம்மணபச்சயோதி. ஆரம்மணபச்சயதீ³பனா நிட்டி²தா.

3. அதி⁴பதிபச்சயோ

து³விதோ⁴ அதி⁴பதிபச்சயோ ஆரம்மணாதி⁴பதிபச்சயோ ஸஹ ஜாதாதி⁴பதிபச்சயோ ச. தத்த² கதமோ ஆரம்மணாதி⁴பதிபச்சயோ. ஆரம்மணபச்சயே வுத்தேஸு ஆரம்மணேஸு யானி ஆரம்மணானி அதிஇட்டா²னி ஹோந்தி அதிகந்தானி அதிமனாபானி க³ருகதானி. தானி ஆரம்மணானி ஆரம்மணாதி⁴பதிபச்சயோ. தத்த² அதிஇட்டா²னீதி ஸபா⁴வதோ இட்டா²னி வா ஹோந்து அனிட்டா²னி வா, தேன தேன புக்³க³லேன அதிஇச்சி²தானி ஆரம்மணானி இத⁴ அதிஇட்டா²னி நாம.

தானி பன த⁴ம்மதோ த்³வே தோ³ஸமூலசித்துப்பாதே³ ச த்³வே மோமூஹ சித்துப்பாதே³ ச து³க்க²ஸஹக³தகாயவிஞ்ஞாணசித்துப்பாதே³ ச ட²பேத்வா அவஸேஸானி ஸப்³பா³னி காமாவசரசித்தசேதஸிகானி ச ரூபாரூப லோகுத்தரசித்தசேதஸிகானி ச ஸப்³பா³னி அதிஇட்ட²ரூபானி ச ஹோந்தி.

தேஸுபி காமாரம்மணானி க³ரும் கரோந்தஸ்ஸேவ ஆரம்மணா தி⁴பதிபச்சயோ. க³ரும் அகரோந்தஸ்ஸ ஆரம்மணாதி⁴பதிபச்சயோ ந ஹோதி. ஜா²னலாபி⁴னோ பன அத்தனா படிலத்³தா⁴னி மஹக்³க³தஜா²னானி அரியஸாவகா ச அத்தனா படிலத்³தே⁴ லோகுத்தரத⁴ம்மே க³ரும் அகரோந்தா நாம நத்தி².

கதமே த⁴ம்மா தஸ்ஸ பச்சயஸ்ஸ பச்சயுப்பன்னா. அட்ட² லோப⁴ மூலசித்தானி அட்ட² காமாவசரகுஸலசித்தானி சத்தாரி காமாவசர ஞாணஸம்பயுத்தகிரியசித்தானி அட்ட² லோகுத்தரசித்தானி தஸ்ஸ பச்சயஸ்ஸ பச்சயுப்பன்னா.

தத்த² லோகியானி ச²ளாரம்மணானி லோப⁴மூலசித்தானம் பச்சயோ. ஸத்தரஸ லோகியகுஸலானி சதுன்னம் ஞாணவிப்பயுத்த குஸலானம். தானி குஸலானிசேவ ஹேட்டி²மமக்³க³ப²லானி ச நிப்³பா³னஞ்ச சதுன்னம் ஞாணஸம்பயுத்தகுஸலானம். அரஹத்தமக்³க³ப²லானி ச நிப்³பா³னஞ்ச சதுன்னம் ஞாணஸம்பயுத்தகிரியானம். நிப்³பா³னம் அட்ட²ன்னம் லோகுத்தர சித்தானந்தி.

கேனட்டே²ன ஆரம்மணம், கேனட்டே²ன அதி⁴பதி. ஆலம்பி³ தப்³ப³ட்டே²ன ஆரம்மணம், ஆதி⁴பச்சட்டே²ன அதி⁴பதி. கோ ஆதி⁴பச்சட்டோ². அத்தானம் க³ரும் கத்வா பவத்தேஸு சித்தசேதஸிகேஸு இஸ்ஸரபா⁴வோ ஆதி⁴பச்சட்டோ². லோகே ஸாமிகா விய ஆரம்மணாதி⁴பதிபச்சய த⁴ம்மா த³ட்ட²ப்³பா³, தா³ஸா விய பச்சயுப்பன்னத⁴ம்மா த³ட்ட²ப்³பா³.

ஸுதஸோமஜாதகே ராஜா போரிஸாதோ³ மனுஸ்ஸமம்ஸம் க³ரும் கரோந்தோ மனுஸ்ஸமம்ஸஹேது ரஜ்ஜம் பஹாய அரஞ்ஞே விசரதி. தத்த² மனுஸ்ஸமம்ஸே க³ந்த⁴ரஸ த⁴ம்மா ஆரம்மணாதி⁴பதிபச்சயோ. ரஞ்ஞோ போரிஸாத³ஸ்ஸ லோப⁴மூலசித்தம் பச்சயுப்பன்னத⁴ம்மோ. ராஜா ஸுத ஸோமோ ஸச்சத⁴ம்மம் க³ரும் கத்வா ஸச்சத⁴ம்மஹேது ரஜ்ஜஸம்பத்திஞ்ச ஞாதி ஸங்க⁴ஞ்ச அத்தனோ ஜீவிதஞ்ச ச²ட்டேத்வா புன ரஞ்ஞோ போரிஸாத³ஸ்ஸ ஹத்த²ம் உபக³தோ. தத்த² ஸச்சத⁴ம்மோ ஆரம்மணாதி⁴பதிபச்சயோ. ரஞ்ஞோ ஸுதஸோமஸ்ஸ குஸலசித்தம் பச்சயுப்பன்னத⁴ம்மோ. ஏஸனயோ ஸப்³பே³ஸு க³ருகதேஸு ஆரம்மணேஸு.

கதமோ ஸஹஜாதாதி⁴பதிபச்சயோ. அதி⁴பதிபா⁴வம் பத்தா சத்தாரோ த⁴ம்மா அதி⁴பதிபச்சயோ, ச²ந்தோ³ சித்தம் வீரியம் வீமம்ஸா.

கதமே த⁴ம்மா தஸ்ஸ பச்சயஸ்ஸ பச்சயுப்பன்னா. அதி⁴பதி ஸம்பயுத்தா சித்தசேதஸிகா ச அதி⁴பதிஸமுட்டி²தா சித்தஜரூபத⁴ம்மா ச தஸ்ஸ பச்சயஸ்ஸ பச்சயுப்பன்னா.

கேனட்டே²ன ஸஹஜாதோ, கேனட்டே²ன அதி⁴பதி.

ஸஹுப்பாத³னட்டே²ன ஸஹஜாதோ, ஸஹஜாதானம் த⁴ம்மானம் அபி⁴ப⁴வனட்டே²ன அதி⁴பதி. தத்த² ஸஹுப்பாத³னட்டே²னாதி யோ த⁴ம்மோ ஸயம் உப்பஜ்ஜமானோ அத்தனா ஸஹஜாதத⁴ம்மே ச அத்தனா ஸஹேவ உப்பாதே³தி, தஸ்ஸ அத்தனா ஸஹஜாதத⁴ம்மானம் ஸஹுப்பாத³னட்டே²ன.

அபி⁴ப⁴வனட்டே²னாதி அஜ்ஜோ²த்த²ரணட்டே²ன. யதா² ராஜா சக்கவத்தி அத்தனோ புஞ்ஞித்³தி⁴யா ஸகலதீ³பவாஸினோ அபி⁴ப⁴வந்தோ அஜ்ஜோ²த்த²ரந்தோ அத்தனோ வஸே வத்தாபேதி, ஸகலதீ³பவாஸினோ ச தஸ்ஸ வஸே வத்தந்தி. ததா² அதி⁴பதிட்டா²னபத்தா இமே சத்தாரோ த⁴ம்மா அத்தனோ அத்தனோ விஸயே ஸஹஜாதத⁴ம்மே அபி⁴ப⁴வந்தா அஜ்ஜோ²த்த²ரந்தா அத்தனோ வஸே வத்தாபேந்தி, ஸஹஜாதத⁴ம்மா ச தேஸம் வஸே வத்தந்தி. யதா² வா ஸிலாத²ம்பே⁴ பத²விதா⁴து உத³கக்க²ந்தே⁴ ஆபோதா⁴து அக்³கி³க்க²ந்தே⁴ தேஜோதா⁴து வாதக்க²ந்தே⁴ வாயோதா⁴து அத்தனா ஸஹஜாதா திஸ்ஸோ தா⁴துயோ அபி⁴ப⁴வந்தா அஜ்ஜோ²த்த²ரந்தா அத்தனோ க³திம் க³மாபேந்தி, ஸஹஜாததா⁴துயோ ச தாஸம் க³திம் க³ச்ச²ந்தி, ஏவமேவ அதி⁴பதிட்டா²னபத்தா இமே சத்தாரோ த⁴ம்மா அத்தனோ ப³லேன ஸஹஜாதத⁴ம்மே அத்தனோ க³திம் க³மாபேந்தி, ஸஹஜாதத⁴ம்மா ச தேஸம் க³திம் க³ச்ச²ந்தி, ஏவம் ஸஹஜாதத⁴ம்மானம் அபி⁴ப⁴வனட்டே²ன.

ஏத்த² வதே³ய்யும், யதி³ ஸஹஜாதத⁴ம்மானம் அபி⁴ப⁴வனட்டே²ன அதி⁴பதினாம ஸியா. ஏவம் ஸதி திட்ட²து ச²ந்தோ³, லோபோ⁴ ஏவ அதி⁴பதினாம ஸியா, ஸோ ஹி ச²ந்த³தோபி ப³லவதரோ ஹுத்வா ஸஹ ஜாதத⁴ம்மே அபி⁴ப⁴வந்தோ பவத்ததீதி. வுச்சதே, பா³லபுது²ஜ்ஜனேஸு ஏவ லோபோ⁴ ச²ந்த³தோ ப³லவதரோ ஹோதி, பண்டி³தேஸு பன ச²ந்தோ³ ஏவ லோப⁴தோ ப³லவதரோ ஹுத்வா ஸஹஜாதத⁴ம்மே அபி⁴ ப⁴வந்தோ பவத்ததி. ஸசே ஹி லோபோ⁴ ஏவ ச²ந்த³தோ ப³லவதரோ ஸியா, கத²ம் இமே ஸத்தா லோப⁴ஸ்ஸ ஹத்த²க³தா ப⁴வஸம்பத்தி போ⁴க³ஸம்மத்தியோ ச²ட்டேத்வா நேக்க²ம்மத⁴ம்மே பூரேத்வா வட்டது³க்க²தோ நிஸ்ஸரேய்யும். யஸ்மா பன ச²ந்தோ³ ஏவ லோப⁴தோ ப³லவதரோ ஹோதி, தஸ்மா இமே ஸத்தா லோப⁴ஸ்ஸ ஹத்த²க³தா ப⁴வஸம்பத்தி போ⁴க³ஸம்பத்தியோ ச²ட்டேத்வா நேக்க²ம்மத⁴ம்மே பூரேத்வா வட்டது³க்க²தோ நிஸ்ஸரந்தி. தஸ்மா ச²ந்தோ³ ஏவ லோப⁴தோ ப³லவதரோ ஹோதி, ச²ந்தோ³ ஏவ அதி⁴பதி, ந லோபோ⁴தி. ஏஸ நயோ தோ³ஸாதீ³ஸுபீதி.

தத்த² லோகே மஹந்தேஸு ஸுது³க்கரேஸு புரிஸகம்மேஸு பச்சுபட்டி²தேஸு இமே சத்தாரோ த⁴ம்மா கம்மஸித்³தி⁴யா ஸம்வத்தந்தி. கத²ம்.

ஹீனச்ச²ந்தா³ ப³ஹுஜ்ஜனா மஹந்தானி ஸுது³க்கரானி புரிஸகம்மானி தி³ஸ்வா நிவத்தச்ச²ந்தா³ ஹோந்தி. காதும் ந இச்ச²ந்தி, அம்ஹாகம் அவிஸயோதி நிரபேக்கா² ட²பேந்தி. ச²ந்தா³தி⁴கோ பன தாதி³ஸானி புரிஸகம்மானி தி³ஸ்வா உக்³க³தச்ச²ந்தோ³ ஹோதி, அதிவிய காதும் இச்ச²தி, மம விஸயோ ஏஸோதி அதி⁴ட்டா²னம் க³ச்ச²தி. ஸோ ச²ந்தே³ன அபி⁴கட்³டி⁴தோ யாவ தம் கம்மம் ந ஸிஜ்ஜ²தி, தாவ அந்தரா தம் கம்மம் ச²ட்டேதும் ந ஸக்கோதி. ஏவஞ்ச ஸதி அதிமஹந்தம்பி தம் கம்மம் ஏகஸ்மிம் காலே ஸித்³த⁴ம் ப⁴விஸ்ஸதி.

ஹீனவீரியா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்த வீரியா ஹோந்தி, இத³ம் மே கம்மம் கரோந்தஸ்ஸ ப³ஹும் காயது³க்க²ம் வா சேதோது³க்க²ம் வா ப⁴விஸ்ஸதீதி நிவத்தந்தி. வீரியாதி⁴கோ பன தாதி³ஸானி புரிஸகம்மானி தி³ஸ்வா உக்³க³தவீரியோ ஹோதி, இதா³னேவ உட்ட²ஹித்வா காதும் இச்ச²தி. ஸோ சிரகாலம்பி தம் கம்மம் கரோந்தோ ப³ஹும் காயது³க்க²ம் வா சேதோது³க்க²ம் வா அனுப⁴வந்தோபி தஸ்மிம் வீரிய கம்மே நனிப்³பி³ந்த³தி, மஹந்தேன கம்மவீரியேன வினா ப⁴விதும் ந ஸக்கோதி, தாதி³ஸேன வீரியேன ரத்திதி³வம் கே²பேந்தோ சித்தஸுக²ம் விந்த³தி. ஏவஞ்ச ஸதி அதிமஹந்தம்பி தம் கம்மம் ஏகஸ்மிம் காலே ஸித்³த⁴ம் ப⁴விஸ்ஸதி.

ஹீனசித்தா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்தசித்தா ஹோந்தி. புன ஆரம்மணம்பி ந கரோந்தி. சித்தாதி⁴கோ பன தாதி³ஸானி கம்மானி தி³ஸ்வா உக்³க³தசித்தோ ஹோதி, சித்தம் வினோதே³தும்பி ந ஸக்கோதி, நிச்சகாலம் தத்த² நிப³ந்த⁴சித்தோ ஹோதி. ஸோ சித்தவஸிகோ ஹுத்வா சிரகாலம்பி தம் கம்மம் கரோந்தோ ப³ஹும் காயது³க்க²ம்வாபீதிஆதி³னா ச²ந்தா³தி⁴பதினயேன வத்தப்³ப³ம்.

மந்த³பஞ்ஞா ச ப³ஹுஜ்ஜனா தாதி³ஸானி கம்மானி தி³ஸ்வா நிவத்தபஞ்ஞா ஹோந்தி, கம்மானம் ஆதி³ம்பி ந பஸ்ஸந்தி, அந்தபி ந பஸ்ஸந்தி, அந்த⁴காரே பவிஸந்தா விய ஹோந்தி, தானி கம்மானி காதும் சித்தம்பி ந நமதி. பஞ்ஞாதி⁴கோ பன தாதி³ஸானி கம்மானி தி³ஸ்வா உக்³க³தபஞ்ஞோ ஹோதி, கம்மானம் ஆதி³ம்பி பஸ்ஸதி, அந்தம்பி பஸ்ஸதி, ப²லம்பி பஸ்ஸதி, ஆனிஸம்ஸம்பி பஸ்ஸதி. ஸுகே²ன கம்மஸித்³தி⁴யா நானாஉபாயம்பி பஸ்ஸதி. ஸோ சிரகாலம்பி தம் கம்மம் கரோந்தோதிஆதி³னா வீரியாதி⁴பதினயேன வத்தப்³ப³ம். இத⁴ பன மஹதியா கம்மவீமம்ஸாயாதி ச தாதி³ஸியா கம்ம வீமம்ஸாயாதி ச வத்தப்³ப³ம்.

ஏவம் லோகே மஹந்தேஸு ஸுது³க்கரேஸு புரிஸகம்மேஸு பச்சுபட்டி²தேஸு இமே சத்தாரோ த⁴ம்மா கம்மஸித்³தி⁴யா ஸம்வத்தந்தி. இமேஸஞ்ச சதுன்னம் அதி⁴பதீனம் விஜ்ஜமானத்தா லோகே புரிஸவிஸேஸா நாம தி³ஸ்ஸந்தி, ஸப்³ப³ஞ்ஞுபு³த்³தா⁴ நாம தி³ஸ்ஸந்தி, ஸப்³ப³ஞ்ஞுபோ³தி⁴ஸத்தா நாம தி³ஸ்ஸந்தி, பச்சேகபு³த்³தா⁴ நாம தி³ஸ்ஸந்தி, பச்சேகபோ³தி⁴ஸத்தானாம தி³ஸ்ஸந்தி, அக்³க³ஸாவகானாம மஹாஸாவகா நாம ஸாவகபோ³தி⁴ஸத்தா நாம தி³ஸ்ஸந்தி. லோகேபி ஏவரூபானம் புரிஸவிஸேஸானம் வஸேன ஸத்த லோகஸ்ஸ அத்தா²ய ஹிதாய ஸுகா²ய பஞ்ஞாஸிப்பவிஸேஸா ச பரிபோ⁴க³வத்து²விஸேஸா ச தி³ஸ்ஸந்தீதி. அதி⁴பதிபச்சயதீ³பனா நிட்டி²தா.

4. அனந்தரபச்சயோ

கதமோ அனந்தரபச்சயோ. அனந்தரே க²ணே நிருத்³தோ⁴ சித்த சேதஸிகத⁴ம்மஸமூஹோ அனந்தரபச்சயோ.

கதமோ த⁴ம்மோ அனந்தரபச்சயஸ்ஸ பச்சயுப்பன்னோ. பச்சி²மே அனந்தரே ஏவ க²ணே உப்பன்னோ சித்தசேதஸிகத⁴ம்மஸமூஹோ தஸ்ஸ பச்சயஸ்ஸ பச்சயுப்பன்னோ.

ஏகஸ்மிம் ப⁴வே படிஸந்தி⁴சித்தம் பட²மப⁴வங்க³சித்தஸ்ஸ அனந்தர பச்சயோ, பட²ம ப⁴வங்க³சித்தம் து³தியப⁴வங்க³சித்தஸ்ஸ அனந்தரபச்சயோதிஆதி³னா வத்தப்³போ³.

யதா³ பன த⁴ம்மயமகே ஸுத்³தா⁴வாஸானம் து³தியே அகுஸலே சித்தே வத்தமானேதி வுத்தனயேன தஸ்ஸ ஸத்தஸ்ஸ அத்தனோ அபி⁴னவம் அத்தபா⁴வம் ஆரப்³ப⁴ ஏதம் மம ஏஸோஹமஸ்மி ஏஸோ மே அத்தாதி பவத்தம் ப⁴வனிகந்திக தண்ஹாஸஹக³தசித்தம் உப்பஜ்ஜதி. ததா³ பட²மம் த்³விக்க²த்தும் ப⁴வங்க³ம் சலதி. ததோ மனோத்³வாராவஜ்ஜனசித்தம் உப்பஜ்ஜதி. ததோ ஸத்த ப⁴வனிகந்திகஜவனானி உப்பஜ்ஜந்தி. ததோ பரம் ப⁴வங்க³வாரோ.

அபி ச ஸோ ஸத்தோ ததா³ பச்சுப்பன்னப⁴வே கிஞ்சி ந ஜானாதி, புப்³ப³ப⁴வே அத்தனா அனுபூ⁴தம் ஆரம்மணம் அனுஸ்ஸரமானோ அச்ச²தி. வத்து²ஸ்ஸ பன அதிது³ப்³ப³லத்தா தஞ்ச ஆரம்மணம் அபரிப்³யத்தமேவ ஹோதி. தம் ஆரப்³ப⁴ உத்³த⁴ச்சஸஹக³தசித்தமேவ ப³ஹுலம் பவத்ததி.

யதா³ க³ப்³போ⁴ தோ²கம் வட்³ட⁴மானோ ஹோதி அதிரேகத்³வேமாஸம் க³தோ, ததா³ சக்கா²தீ³னி இந்த்³ரியானி பரிபுண்ணானி ஹோந்தி. ஏவம் ஸந்தேபி மாதுக³ப்³பே⁴ ஆலோகாதீ³னம் பச்சயானம் அபா⁴வதோ சக்கு²விஞ்ஞாணாதீ³னி சத்தாரி விஞ்ஞாணானி நுப்பஜ்ஜந்தி, காயவிஞ்ஞாணமனோவிஞ்ஞாணானி ஏவ உப்பஜ்ஜந்தி. ஸோ ஸத்தோ மாதுயா இரியாபத²பரிவத்தனாதீ³ஸு ப³ஹூனி து³க்க²தோ³மனஸ்ஸானி பச்சனுபோ⁴தி. விஜாயனகாலே பன பு⁴ஸம் து³க்க²ம் நிக³ச்ச²தியேவ. விஜாயித்வாபி யாவ வத்து²ரூபானி முதூ³னி ஹோந்தி, பரிபாகம் ந க³ச்ச²ந்தி, தாவ ஸோ அதிமந்த³ரூபோ உத்தானஸேய்யகோ ஹுத்வா அச்ச²தி. ந கிஞ்சி பச்சுப்பன்னம் ஆரம்மணம் ஸல்லக்கே²தி. யேபு⁴ய்யேன புரிம ப⁴வானுஸாரீ ஏவ தஸ்ஸ விஞ்ஞாணம் ஹோதி. ஸசே ஸோ நிரய ப⁴வதோ ஆக³தோ ஹோதி, ஸோ விரூபமுக²ப³ஹுலோ ஹோதி. புரிமானி நிரயாரம்மணானி ஆரப்³ப⁴ க²ணே க²ணே விரூபமுக²மஸ்ஸ பஞ்ஞாயதி. அத² தே³வலோகதோ ஆக³தோ ஹோதி, தி³ப்³பா³னி ஆரம்மணானி ஆரப்³ப⁴ விப்பஸன்னமுக²ப³ஹுலோ ஹோதி, க²ணே க²ணே மிஹிதமுக²மஸ்ஸ பஞ்ஞாயதி.

யதா³ பன வத்து²ரூபானி திக்கா²னி ஹோந்தி, பரிபாகம் க³ச்ச²ந்தி. விஞ்ஞாணானி சஸ்ஸ ஸுவிஸதா³னி பவத்தந்தி. ததா³ அமந்த³ரூபோ ஹுத்வா கீளந்தோ லீளந்தோ மோத³ந்தோ பமோத³ந்தோ அச்ச²தி. பச்சுப்பன்னே ஆரம்மணானி ஸல்லக்கே²தி. மாதுபா⁴ஸம் ஸல்லக்கே²தி. இத⁴ லோகானுஸாரீ விஞ்ஞாணமஸ்ஸ ப³ஹுலம் பவத்ததி. புரிமஜாதிம் பமுஸ்ஸதி.

கிம் பன ஸப்³போ³பி ஸத்தோ இமஸ்மிம் டா²னே ஏவ புரிமம் ஜாதிம் பமுஸ்ஸதீதி சே. ந ஸப்³போ³பி ஸத்தோ இமஸ்மிம் டா²னே ஏவ பமுஸ்ஸதி. கோசி அதிரேகதரம் க³ம்ப⁴வாஸது³க்கே²ன பரிபீளிதோ க³ப்³பே⁴ ஏவ பமுஸ்ஸதி. கோசி விஜாயனகாலே, கோசி இமஸ்மிம் டா²னே பமுஸ்ஸதி. கோசி இதோபரம்பி த³ஹரகாலே ந பமுஸ்ஸதி. வுட்³ட⁴காலே ஏவ பமுஸ்ஸதி. கோசி யாவஜீவம்பி ந பமுஸ்ஸதி. த்³வே தயோ ப⁴வே அனுஸ்ஸரந்தோபி அத்தி²யேவ. இமே ஜாதிஸ்ஸரஸத்தா நாம ஹோந்தி.

தத்த² விஜாயனகாலதோ பட்டா²ய ச²த்³வாரிகவீதி²சித்தானி பவத்தந்தி. பச்சுப்பன்னாரம்மணம் ஸல்லக்க²ணதோ பட்டா²ய ச²த்³வாரிகவீதி² சித்தானி பரிபுண்ணானி பவத்தந்தி. ஸப்³ப³த்த²பி புரிமம் புரிமம் அனந்தரே நிருத்³த⁴ம் சித்தம் பச்சி²மஸ்ஸ பச்சி²மஸ்ஸ அனந்தரே உப்பன்னஸ்ஸ சித்தஸ்ஸ அனந்தர பச்சயோ ஹோதி. அயஞ்ச அனந்தரபச்சயோ நாம அனமதக்³கே³ ஸம்ஸாரே ஏகஸ்ஸ ஸத்தஸ்ஸ ஏகப்பப³ந்தோ⁴ ஏவ ஹோதி. யதா³ ஸத்தோ அரஹத்த மக்³க³ம் லபி⁴த்வா க²ந்த⁴பரினிப்³பா³னம் பாபுணாதி, ததா³ ஏவ ஸோ பப³ந்தோ⁴ சி²ஜ்ஜதி.

கேனட்டே²ன அனந்தரோ, கேனட்டே²ன பச்சயோதி. அத்தனோ அனந்தரே அத்தஸதி³ஸஸ்ஸ த⁴ம்மந்தரஸ்ஸ உப்பாத³னட்டே²ன அனந்தரோ, உபகாரகட்டே²ன பச்சயோ. தத்த² அத்தஸதி³ஸஸ்ஸாதி ஸாரம்மண பா⁴வேன அத்தனா ஸதி³ஸஸ்ஸ. ஸாரம்மணபா⁴வேனாதி ச யோ த⁴ம்மோ ஆரம்மணேன வினா ந பவத்ததி, ஸோ ஸாரம்மணோ நாம, ஏவம் ஸாரம்மணபா⁴வேன. த⁴ம்மந்தரஸ்ஸ உப்பாத³னட்டே²னாதி புரிமஸ்மிம் சித்தே நிருத்³தே⁴பி தஸ்ஸ சிந்தனகிரியாவேகோ³ ந வூபஸம்மதி, பச்சி²மம் சித்தம் உப்பாதே³த்வா ஏவ வூபஸம்மதி, ஏவம் பச்சி²மஸ்ஸ த⁴ம்மந்தரஸ்ஸ உப்பாத³னட்டே²ன.

தத்த² புரிமா புரிமா மாதுபரம்பரா விய அனந்தரபச்சயபரம்பரா த³ட்ட²ப்³பா³. பச்சி²மா பச்சி²மா தீ⁴துபரம்பரா விய தஸ்ஸ பச்சயுப்பன்னபரம்பரா த³ட்ட²ப்³பா³. ஏவம் ஸந்தே அரஹந்தானம் ஸப்³ப³பச்சி²மம் பரினிப்³பா³னசித்தம்பி புன படிஸந்தி⁴சித்தஸங்கா²தம் த⁴ம்மந்தரம் உப்பாதே³ய்யாதி. ந உப்பாதே³ய்ய. கஸ்மா, ததா³ கம்மகிலேஸவேகா³னம் ஸப்³ப³ஸோ படிப்பஸ்ஸத்³தி⁴பா⁴வேன அச்சந்தஸந்ததரத்தா தஸ்ஸ சித்தஸ்ஸாதி. அனந்தரபச்சய தீ³பனா நிட்டி²தா.

5. ஸமனந்தரபச்சயோ

பச்சயத⁴ம்மவிபா⁴கோ³ ச பச்சயுப்பன்னத⁴ம்மவிபா⁴கோ³ ச அனந்தபச்சய ஸதி³ஸோ.

கேனட்டே²ன ஸமனந்தரோதி. ஸுட்டு² அனந்தரட்டே²ன ஸமனந்தரோ. யதா² ஸிலாத²ம்பா⁴தீ³ஸு ரூபகலாபா ஏகாப³த்³தா⁴ ஸமானாபி ரூப த⁴ம்மபா⁴வேன ஸண்டா²ன ஜாதிகத்தா மஜ்ஜே² பரிச்சே²த³ரூபஸஹிதா ஏவ ஹோந்தி. த்³வின்னம் ரூபகலாபானம் மஜ்ஜே² அந்தரம் நாம விவரம் நாம அத்தி²யேவ. ந ததா² புரிமபச்சி²மானம் த்³வின்னம் சித்தசேதஸிக கலாபானம் மஜ்ஜே². தே பன அரூபத⁴ம்மபா⁴வேன அஸண்டா²ன ஜாதிகத்தா மஜ்ஜே² பரிச்சே²த³த⁴ம்மஸ்ஸ நாம கஸ்ஸசி ஆகாஸவிவரஸ்ஸ அபா⁴வதோ ஸப்³ப³ஸோ அந்தர ரஹிதா ஏவ ஹோந்தி. லோகஸ்ஸபி த்³வின்னம் கலாபானம் அந்தரம் நாம ந தி³ஸ்ஸதி. ததோ இமே ஸத்தா சித்தம் நாம நிச்சம் து⁴வம் தா²வரம் அவிபரிணாமத⁴ம்மந்தி ஏவம் சித்தே நிச்சஸஞ்ஞினோ ஹோந்தி. ஏவம் ஸுட்டு² அனந்தரட்டே²ன ஸமனந்தரோ. அனந்தரட்டே²னாதி ச அத்தனோ அனந்தரே அத்தஸதி³ஸஸ்ஸ த⁴ம்மந்தரஸ்ஸ உப்பாத³னட்டே²னாதி புப்³பே³ வுத்தமேவ.

ஏவம் ஸந்தே நிரோத⁴ஸமாபத்திகாலே புரிமசித்தம் நாம நேவ ஸஞ்ஞானாஸஞ்ஞாயதனசித்தம், பச்சி²மசித்தம் நாம அரியப²லசித்தம், த்³வின்னம் சித்தானம் அந்தரே ஏகரத்திதி³வம்பி த்³வேரத்திதி³வானிபி.ல. ஸத்தரத்திதி³வானிபி அசித்தகோ ஹோதி. அஸஞ்ஞஸத்தபூ⁴மியம்பி புரிமே காமப⁴வே சுதிசித்தம் புரிமசித்தம் நாம. பச்சி²மே காமப⁴வே படிஸந்தி⁴சித்தம் பச்சி²மசித்தம் நாம, த்³வின்னம் சித்தானம் அந்தரே அஸஞ்ஞஸத்தப⁴வே பஞ்சகப்பஸதானி புக்³க³லோ அசித்தகோ திட்ட²தி. தத்த² த்³வே புரிமசித்தானி அத்தனோ அனந்தரே அத்தஸதி³ஸஸ்ஸ த⁴ம்மந்தரஸ்ஸ உப்பாத³னபச்சயஸத்திரஹிதானி ஹோந்தீதி. ந ஹோந்தி. மஹந்தேஹி பன பா⁴வனாபணிதி⁴ப³லேஹி படிபா³ஹிதத்தா புரிமசித்தானி ச நிருஜ்ஜ²மானானி அனந்தரே த⁴ம்மந்தரஸ்ஸ உப்பாத³ன ஸத்திஸஹிதானி ஏவ நிருஜ்ஜ²ந்தி. பச்சி²மசித்தானி ச உப்பஜ்ஜமானானி தஸ்மிம் க²ணே ஏகாப³த்³த⁴பா⁴வேன அனுப்பஜ்ஜித்வா சிரகாலே ஏவ உப்பஜ்ஜந்தி. ந ச ஏத்தகமத்தேன புரிமசித்தானம் அனந்தரே த⁴ம்மந்தரஸ்ஸ உப்பாத³ன ஸத்தினாம நத்தீ²தி ச, தே அனந்தரபச்சயத⁴ம்மா நாம ந ஹோந்தீதி ச ஸக்கா வத்தும். யதா² தம் ரஞ்ஞோ யோதா⁴ நாம அத்தி², கதா³சி ராஜா காலம் ஞத்வா தும்ஹே இதா³னி மாயுஜ்ஜ²த², யுத்³த⁴காலோ ந ஹோதி, அஸுகஸ்மிம் காலே ஏவ யுஜ்ஜ²தா²தி வதே³ய்ய. தே ச ததா³ அயுஜ்ஜ²மானா விசரேய்யும். ஏவம் ஸந்தேபி தேஸம் யுஜ்ஜ²னஸத்தி நாம நத்தீ²தி ச, தே யோதா⁴ நாம ந ஹோந்தீதி ச ந ஸக்கா வத்துந்தி.

ஏத்த² வதே³ய்யும், இமஸ்மிம் பச்சயே தே பன அரூபத⁴ம்மபா⁴வேன அஸண்டா²ன ஜாதிகத்தா மஜ்ஜே²பரிச்சே²த³த⁴ம்மஸ்ஸ நாம கஸ்ஸசி அபா⁴வதோ ஸப்³ப³ஸோ அந்தரரஹிதா ஏவ ஹோந்தீதி வுத்தம். ஏவம் ஸந்தே புப்³பே³ ஆரம்மண பச்சயே பே⁴ரிஸத்³த³வீணாஸத்³தோ³பமாஹி யோ சித்தானம் க²ணே க²ணே உப்பாதோ³ ச நிரோதோ⁴ ச வுத்தோ, ஸோ அம்ஹேஹி கத²ம் பச்சேதப்³போ³தி. அஞ்ஞமஞ்ஞவிருத்³தா⁴னம் நானாசித்தானம் க²ணமத்தேபி புப்³பா³பர பரிவத்தனஸ்ஸ லோகே பஞ்ஞாயனதோ. அயமத்தோ² புப்³பே³ சித்த யமகதீ³பனியம் வித்தா²ரதோ வுத்தோயேவாதி. ஸமனந்தரபச்சய தீ³பனா நிட்டி²தா.

6. ஸஹஜாதபச்சயோ

பச்சயத⁴ம்மவிபா⁴கோ³ ச பச்சயுப்பன்னத⁴ம்மவிபா⁴கோ³ச வுச்சதி. ஏகதோ உப்பன்னா ஸப்³பே³பி சித்தசேதஸிகா த⁴ம்மா அஞ்ஞமஞ்ஞம் ஸஹஜாத பச்சயா ச ஹோந்தி ஸஹஜாதபச்சயுப்பன்னா ச. படிஸந்தி⁴னாமக்க²ந்தா⁴ ச படிஸந்தி⁴ஸஹஜாதம் ஹத³யவத்து² ச அஞ்ஞமஞ்ஞம் ஸஹஜாதபச்சயா ச ஹோந்தி ஸஹஜாதபச்சயுப்பன்னா ச. ஸப்³பா³னி மஹாபூ⁴தானிபி அஞ்ஞமஞ்ஞம் ஸஹஜாதபச்சயா ச ஹோந்தி பச்சயுப்பன்னத⁴ம்மா ச. படிஸந்தி⁴சித்தஸ்ஸ உப்பாத³க்க²ணே ஸப்³பா³னி கம்மஜரூபானி ச பவத்திகாலே தஸ்ஸ தஸ்ஸ சித்தஸ்ஸ உப்பாத³க்க²ணே தேன தேன சித்தேன ஜாதானி ஸப்³பா³னி சித்தஜரூபானி ச ஸஹஜாதசித்தஸ்ஸ பச்சயுப்பன்னானி நாம. ஸப்³பா³னி உபாதா³ரூபானி ஸஹஜாதமஹாபூ⁴தானம் பச்சயுப்பன்னானி நாம.

கேனட்டே²ன ஸஹஜாதோ, கேனட்டே²ன பச்சயோ. ஸஹ ஜானனட்டே²ன ஸஹஜாதோ, உபகாரகட்டே²ன பச்சயோ. தத்த² ஸஹஜானனட்டே²னாதி யோ த⁴ம்மோ ஜாயமானோ அத்தனோ பச்சயுப்பன்னேஹி த⁴ம்மேஹி ஸஹேவ ஸயஞ்ச ஜாயதி உப்பஜ்ஜதி, அத்தனோ பச்சயுப்பன்னே ச த⁴ம்மே அத்தனா ஸஹேவ ஜனேதி உப்பாதே³தி, தஸ்ஸ ஸோ அத்தோ² ஸஹஜானனட்டோ² நாம.

யதா² ஸூரியோ நாம உத³யந்தோ ஸூரியாதபே ச ஸூரியா லோகே ச அத்தனா ஸஹேவ ஜனயந்தோ உதே³தி. யதா² ச பதீ³போ நாம ஜலந்தோ பதீ³பாதபே ச பதீ³பாலோகே ச அத்தனா ஸஹேவ ஜனயந்தோ ஜலதி. ஏவமேவம் அயம் பச்சயத⁴ம்மோ உப்பஜ்ஜமானோ அத்தனோ பச்சயுப்பன்னத⁴ம்மே அத்தனா ஸஹேவ உப்பாதே³தி. தத்த² ஸூரியோ விய ஏகமேகோ நாம த⁴ம்மோ, ஸூரியாதபா விய தம்ஸம்பயுத்தத⁴ம்மா, ஸூரியாலோகா விய ஸஹஜாதரூபத⁴ம்மா. ததா² ஸூரியோ விய ஏகமேகோ மஹாபூ⁴தரூபத⁴ம்மோ, ஸூரியாதபா விய ஸஹஜாதமஹாபூ⁴தத⁴ம்மா, ஸூரியாலோகா விய ஸஹஜாதஉபாதா³ரூபத⁴ம்மா, ஏஸ நயோ பதீ³புபமாயபீதி. ஸஹஜாதபச்சயதீ³பனா நிட்டி²தா.

7. அஞ்ஞமஞ்ஞபச்சயோ

ஸஹஜாதபச்சயே விப⁴த்தேஸு த⁴ம்மேஸு யோ யோ பச்சய த⁴ம்மோதி வுத்தோ, ஸோ ஸோ ஏவ இத⁴ பச்சயத⁴ம்மோ சேவ பச்சயுப்பன்ன த⁴ம்மோ ச ஹோதி. ஸப்³பே³பி சித்தசேதஸிகா த⁴ம்மா அஞ்ஞமஞ்ஞஸ்ஸ பச்சயத⁴ம்மா ச ஹோந்தி அஞ்ஞமஞ்ஞஸ்ஸ பச்சயுப்பன்னத⁴ம்மா. ஸஹஜாதா சத்தாரோ மஹாபூ⁴தா அஞ்ஞமஞ்ஞஸ்ஸ பச்சயத⁴ம்மா ச ஹோந்தி அஞ்ஞமஞ்ஞஸ்ஸ பச்சயுப்பன்னத⁴ம்மா ச. படிஸந்தி⁴னாமக்க²ந்தா⁴ ச படிஸந்தி⁴ ஸஹஜாதம் ஹத³யவத்து²ரூபஞ்ச அஞ்ஞமஞ்ஞஸ்ஸ பச்சயத⁴ம்மா ச ஹோந்தி அஞ்ஞமஞ்ஞஸ்ஸ பச்சயுப்பன்னத⁴ம்மா ச. அத்தோ² ஸுவிஞ்ஞேய்யோயேவ.

யதா² அஞ்ஞமஞ்ஞம் நிஸ்ஸாய உஸ்ஸாபிதா தயோ த³ண்டா³ அஞ்ஞமஞ்ஞஸ்ஸ நிஸ்ஸயா ச ஹோந்தி, அஞ்ஞமஞ்ஞம் நிஸ்ஸிதா ச. தேஸு ஏகமேகஸ்மிம் உஸ்ஸிதே ஸப்³பே³ உஸ்ஸிதா ஹோந்தி, ஏகமேகஸ்மிம் பதந்தே ஸப்³பே³ பதந்தி. ஏவம் அஞ்ஞமஞ்ஞத⁴ம்மா ச த³ட்ட²ப்³பா³.

ஏத்த² வதே³ய்யும், ஸப்³பே³ சேதஸிகா த⁴ம்மா சித்தபச்சயம் அலப⁴ மானா உப்பஜ்ஜிதும் ந ஸக்கோந்தீதி யுத்தம். கஸ்மா. பு²ஸனாதீ³னம் சேதஸிக கிச்சானம் விஜானனகிச்சபுப்³ப³ங்க³மத்தா, மனோபுப்³ப³ங்க³மாதி ஹி வுத்தம். சித்தம் பன சேதஸிகபச்சயம் அலப⁴மானம் உப்பஜ்ஜிதும் ந ஸக்கோதீதி ந யுஜ்ஜேய்யாதி. வுச்சதே, சேதஸிகத⁴ம்மா நாம சித்தஸ்ஸ ஸஹாயங்கா³னி ஹோந்தி. தஸ்மா தேஹி வினா சித்தம்பி உப்பஜ்ஜிதும் ந ஸக்கோதியேவ. ஏஸேவ நயோ சதூஸு மஹாபூ⁴தேஸுபீதி. உபாதா³ரூபானி பன மஹாபூ⁴தானம் நிஸ்ஸந்த³மத்தத்தா ஸஹாயங்கா³னி ந ஹோந்தீதி. நனு ஆஹாரரூபஞ்ச ஜீவிதரூபஞ்ச பச்சயவிஸேஸத்தா ஸஹாயங்க³ம் ஹோதீதி. வுச்சதே, டி²தியா ஏவ ஸஹாயங்க³ம் ஹோதி. ந உப்பாதே³. இத⁴ பன உப்பாதே³ ஸஹாயங்க³ம் அதி⁴ப்பேதந்தி. அஞ்ஞமஞ்ஞபச்சயதீ³பனா நிட்டி²தா.

8. நிஸ்ஸயபச்சயோ

திவிதோ⁴ நிஸ்ஸயபச்சயோ, ஸஹஜாதனிஸ்ஸயோ வத்து² புரேஜாதனிஸ்ஸயோ வத்தா²ரம்மணபுரேஜாதனிஸ்ஸயோ.

தத்த² கதமோ ஸஹஜாதனிஸ்ஸயோ. ஸப்³போ³ ஸஹஜாத பச்சயோ ஸஹஜாதனிஸ்ஸயோ. தஸ்மா தத்த² பச்சயவிபா⁴கோ³ ச பச்சயுப்பன்னவிபா⁴கோ³ ச ஸஹஜாதபச்சயே வுத்தனயேன வேதி³தப்³போ³.

கதமோ பன வத்து²புரேஜாதனிஸ்ஸயோ. ச² வத்தூ²னி சக்கு² வத்து² ஸோதவத்து² கா⁴னவத்து² ஜிவ்ஹாவத்து² காயவத்து² ஹத³யவத்து². இமானி ச²வத்தூ²னி பவத்திகாலே ஸத்தானம் விஞ்ஞாணதா⁴தூனம் வத்து²புரே ஜாதனிஸ்ஸயோ.

வத்து²ரூபமேவ புரேஜாதம் ஹுத்வா நிஸ்ஸயோ வத்து²புரேஜாத நிஸ்ஸயோ. தத்த² சித்தசேதஸிகானம் நிஸ்ஸயட்டா²னட்டே²ன வத்து² நாம. புரேஜாதந்தி அத்தனோ அத்தனோ பச்சயுப்பன்னஸ்ஸ த⁴ம்மஸ்ஸ உப்பத்திக்க²ணதோ புரிமே க²ணே ஜாதம்.

தத்த² படிஸந்தி⁴சித்தம் ததா³ புரேஜாதஸ்ஸ வத்து²ரூபஸ்ஸ அபா⁴வதோ அத்தனா ஸஹுப்பன்னமேவ ஹத³யவத்து²ரூபம் நிஸ்ஸாய உப்பஜ்ஜதி. பட²ம ப⁴வங்க³சித்தம் பன படிஸந்தி⁴சித்தேன ஸஹுப்பன்னஹத³ய வத்து²ரூபம் நிஸ்ஸாய உப்பஜ்ஜதி. து³தியப⁴வங்க³சித்தம் பட²மப⁴வங்க³சித்தேன ஸஹுப்பன்னம் நிஸ்ஸாய உப்பஜ்ஜதி. ஏவம் ததியப⁴வங்க³சித்தம் து³திய ப⁴வங்க³சித்தேன ஸஹுப்பன்னந்திஆதி³னா யாவமரணாஸன்னகாலா த்³வின்னம் மனோதா⁴துமனோவிஞ்ஞாணதா⁴தூனம் வத்து²புரேஜாதனிஸ்ஸயோ வேதி³தப்³போ³.

யதா² வீணாஸத்³தா³ நாம வீணாதந்தீஸு வீணாத³ண்ட³கேஹி பஹரணவேகே³ன ஏவ ஜாயந்தி, நோ அஞ்ஞதா². ததா² பஞ்சவிஞ்ஞாணானி நாம பஞ்சவத்து²ஸங்கா²தேஸு பஞ்சத்³வாரேஸு பஞ்சன்னம் ஆரம்மணானம் ஆபாதா க³மனவேகே³ன ஏவ ஜாயந்தி, நோ அஞ்ஞதா².

ஆபாதாக³மனஞ்ச தேஸம் த்³வாராரம்மணானம் டி²திபத்தகாலே ஏவ ஹோதி. ஆபாதாக³மனபச்சயா ச த்³விக்க²த்தும் ப⁴வங்க³ம் சலதி. ப⁴வங்க³சலன பச்சயா ச ஆவஜ்ஜனம் உப்பஜ்ஜதி. ஆவஜ்ஜனபச்சயா ச தானி பஞ்சவிஞ்ஞாணானி உப்பஜ்ஜந்தி. தஸ்மா சக்கா²தீ³னி பஞ்சவத்தூ²னி புரே அதீதப⁴வங்க³சித்தஸ்ஸ உப்பாத³க்க²ணே உப்பன்னானி ஏவ பஞ்சவிஞ்ஞாணதா⁴தூனம் வத்து²புரேஜாதபச்சயா ஹோந்தி.

மரணாஸன்னகாலே பன ஸப்³பா³னி ச² வத்தூ²னி சுதிசித்ததோ புரே ஸத்தரஸமஸ்ஸ ப⁴வங்க³சித்தஸ்ஸ உப்பாத³க்க²ணே ஏவ உப்பஜ்ஜந்தி, ததோ பரம் ந உப்பஜ்ஜந்தி. தஸ்மா மரணாஸன்னகாலே ப⁴வங்க³சித்தானி ச ஸப்³பா³னி ச²த்³வாரிகவீதி²சித்தானி ச சுதிசித்தஞ்ச புரேதரம் உப்பன்னானி தானியேவ அத்தனோ அத்தனோ வத்தூ²னி நிஸ்ஸாய உப்பஜ்ஜந்தி. அயம் வத்து²புரேஜாத நிஸ்ஸயோ.

கதமோ பன வத்தா²ரம்மணபுரேஜாதனிஸ்ஸயோ. யதா³ அத்தனோ அஜ்ஜ²த்தம் வத்து²ரூபம் ஆரப்³ப⁴ யம் ரூபம் நிஸ்ஸாய மம மனோவிஞ்ஞாணம் வத்ததி, ஏதம் மம ஏஸோ ஹமஸ்மி ஏஸோ மே அத்தாதி ஏவம் தண்ஹாமான தி³ட்டீ²ஹி க³ஹணவஸேன வா ஏதம் அனிச்சம் ஏதம் து³க்க²ம் ஏதம் அனத்தாதி ஏவம் ஸம்மஸனவஸேன வா ஆவஜ்ஜனாதீ³னி மனோத்³வாரிகவீதி² சித்தானி பவத்தந்தி. ததா³ தம் தம் வத்து²ரூபம் பச்சேகம் தேஸம் நிஸ்ஸயவத்து² ச ஹோதி தேஸம் ஆரம்மணஞ்ச. தஸ்மா தம் தம் ஹத³யரூபம் தஸ்ஸ தஸ்ஸ சித்துப்பாத³ஸ்ஸ வத்தா²ரம்மணபுரேஜாதபச்சயோ ஹோதி. அயம் வத்தா²ரம்மண புரேஜாதனிஸ்ஸயோ. ஏவம் நிஸ்ஸயபச்சயோ திவிதோ⁴ ஹோதி.

இத⁴ ஸுத்தந்தனிஸ்ஸயோபி வத்தப்³போ³. இமே மனுஸ்ஸா வா திரச்சா²னக³தா வா ருக்கா²த³யோ வா மஹாபத²வியம் பதிட்டி²தா, மஹா பத²வீ ச ஹேட்டா² மஹாஉத³கக்க²ந்தே⁴, மஹாஉத³கக்க²ந்தோ⁴ ச ஹேட்டா² மஹாவாதக்க²ந்தே⁴, மஹாவாதக்க²ந்தோ⁴ ச ஹேட்டா² அஜடாகாஸே, மனுஸ்ஸா கே³ஹேஸு, பி⁴க்கூ² விஹாரேஸு, தே³வா தி³ப்³ப³விமானேஸூதிஆதி³னா ஸப்³ப³ம் லோகப்பவத்திம் ஞத்வா நிஸ்ஸயபச்சயோ வேதி³தப்³போ³. நிஸ்ஸயபச்சயதீ³பனா நிட்டி²தா.

9. உபனிஸ்ஸயபச்சயோ

திவிதோ⁴ உபனிஸ்ஸயபச்சயோ, ஆரம்மணூபனிஸ்ஸயோ அனந்தரூபனிஸ்ஸயோ பகதூபனிஸ்ஸயோ. தத்த² ஆரம்மணூப நிஸ்ஸயோ ஆரம்மணாதி⁴பதிபச்சயஸதி³ஸோ, அனந்தரூபனிஸ்ஸயோ அனந்தரபச்சயஸதி³ஸோ.

கதமோ பகதூபனிஸ்ஸயோ. ஸப்³பே³பி அதீதானாக³த பச்சுப்பன்னா அஜ்ஜ²த்தப³ஹித்³தா⁴பூ⁴தா சித்தசேதஸிகரூபத⁴ம்மா ச நிப்³பா³னஞ்ச பஞ்ஞத்தி ச ஸப்³பே³ஸம் பச்சுப்பன்னானம் சித்தசேதஸிகானம் த⁴ம்மானம் யதா²ரஹம் பகதூபனிஸ்ஸயோ.

தத்த² அதீதோ பரினிப்³பு³தோ அம்ஹாகம் பு³த்³தோ⁴ ச த⁴ம்மோ ச அரியஸாவகஸங்கோ⁴ ச ஸம்முதிஸங்க⁴பரம்பரா ச அம்ஹாகம் பச்சி²ம ஜனானம் குஸலுப்பத்தியா பகதூபனிஸ்ஸயபச்சயோ. ததா² லோகே அதீதா காலங்கதா மாதாபிதரோ ச ஆசரியா ச பண்டி³தஸமணப்³ராஹ்மணா ச பாகடா நானாதித்தா²சரியா ச மஹித்³தி⁴கா மஹானுபா⁴வா போராணகராஜானோ ச பச்சி²மகானம் ஜனானம் குஸலுப்பத்தியா வா அகுஸலுப்பத்தியா வா ஸுக²து³க்கு²ப்பத்தியா வா பகதூபனிஸ்ஸயோ. ததா² ஹி தே பச்சி²மகானம் ஜனானம் அத்தா²ய நானாஸத்³த⁴ம்மபஞ்ஞத்தியோ வா நானாஅஸத்³த⁴ம்மபஞ்ஞத்தியோ வா நானாலோகூபகரணானி வா புரே பட்ட²பேஸும். பச்சி²மஜனா ச தேஹி பட்ட²பிதேஸு தா³னஸீலாதி³த⁴ம்மேஸு வா லோகசாரித்த குலகோ³த்தசாரித்த த⁴ம்மேஸு வா நானாதி³ட்டி²வாதே³ஸு வா நானாகம்மாயதனஸிப்பாயதன விஜ்ஜாடா²னேஸு வா யதா²பட்ட²பிதேஸு கா³மனிக³மனக³ரகே²த்தவத்து² தளாகபோக்க²ரணிஆவாடாதீ³ஸு வா கே³ஹரத²ஸகடனாவா ஸம்போதஸம்ப³ந்தா⁴தீ³ஸு வா ஜாதரூபரஜதமணிமுத்தாதீ³ஸு வா தா³யஜ்ஜம் படிபஜ்ஜந்தா லோகே வட்³ட⁴ந்தி.

அனாக³தோபி மேத்தேய்யோ நாம பு³த்³தோ⁴ ச தஸ்ஸ த⁴ம்மோ ச தஸ்ஸ ஸங்கோ⁴ ச ஏதரஹி ப³ஹுஜ்ஜனானம் பாரமிபுஞ்ஞப்பவத்தியா பகதூபனிஸ்ஸயபச்சயோ. ததா² இமஸ்மிம் ப⁴வே ச பச்சி²மே காலே படிலபி⁴ஸ்ஸமானா இஸ்ஸரியட்டா²னத⁴னத⁴ஞ்ஞஸம்பத்தியோ புரிமே காலே டி²தானம் மஹாஜனானம் நானாபி⁴ஸங்கா²ருப்பத்தியா பகதூபனிஸ்ஸய பச்சயோ. அனாக³தப⁴வே ச அனுப⁴விஸ்ஸமானா ப⁴வஸம்பத்தி போ⁴க³ ஸம்பத்தியோ மக்³க³ப²லனிப்³பா³னஸம்பத்தியோ ச ஏதரஹி பச்சுப்பன்னப⁴வே டி²தானம் தா³னஸீலாதி³புஞ்ஞகிரியுப்பத்தியா பகதூபனிஸ்ஸயபச்சயோ. யதா² ஹி லோகே ஹேமந்தே காலே த⁴ஞ்ஞப்ப²லானி லபி⁴ஸ்ஸாமாதி வஸ்ஸிகே காலே கஸ்ஸனவப்பனகம்மானி ஆரப⁴ந்தி, கம்மே ஸித்³தே⁴ தம் தம் த⁴னம் லபி⁴ஸ்ஸாமாதி புப்³ப³பா⁴கே³ தம் தம் வீரியகம்மம் வா தம் தம் பஞ்ஞாகம்மம் வா ஆரப⁴ந்தி. தத்த² த⁴ஞ்ஞப்ப²லப்படிலாபோ⁴ ச தம் தம் த⁴னப்படி லாபோ⁴ச தம் தம் கம்மாரம்ப⁴ஸ்ஸ அனாக³தபகதூபனிஸ்ஸயபச்சயோ தம் தம் கம்மாரம்போ⁴ ச த⁴ஞ்ஞப்ப²லப்படிலாப⁴ஸ்ஸ ச தம் தம் த⁴னப்படி லாப⁴ஸ்ஸ ச அதீதபகதூபனிஸ்ஸயபச்சயோ. ஏவமேவ பச்சி²மே அனாக³தே காலே நானாகம்மப்ப²லானி ஸம்பஸ்ஸந்தா பத்த²யந்தா மஹாஜனா புரிமே பச்சுப்பன்னே காலே நானாபுஞ்ஞகம்மானி ஆரப⁴ந்தி. தத்த² புஞ்ஞப்ப²லானி புஞ்ஞகம்மானம் அனாக³தபகதூபனிஸ்ஸயபச்சயோ. புஞ்ஞகம்மானி புஞ்ஞப்ப²லானம் அதீதபகதூபனிஸ்ஸயபச்சயோ. தஸ்மா அனாக³தபகதூபனிஸ்ஸயோபி அதீதபகதூபனிஸ்ஸயோ விய அதிமஹந்தோ பச்சயோ ஹோதி.

பச்சுப்பன்னா பு³த்³தா⁴யோ பச்சயா பச்சுப்பன்னானம் மனுஸ்ஸதே³வப்³ரஹ்மானம் பச்சுப்பன்னா மாதாபிதரோ பச்சுப்பன்னானம் புத்ததீ⁴தாதீ³னம் பச்சுப்பன்னபகதூப நிஸ்ஸயோ நாம. ஸோ ஸுபாகடோயேவ.

அஜ்ஜ²த்தபூ⁴தா பகதூபனிஸ்ஸயத⁴ம்மா நாம பு³த்³தா⁴தீ³ஸு ஸவிஞ்ஞாணகஸந்தானேஸு உப்பன்னா பச்சயத⁴ம்மா. ப³ஹித்³தா⁴பூ⁴தா பகதூபனிஸ்ஸயத⁴ம்மா நாம ஸத்தானம் பதிட்டா²னபூ⁴தா பத²விபப்³ப³தனதீ³ ஸமுத்³தா³த³யோ தேஸம் தேஸம் ஸத்தானம் ப³ஹூபகாரா அரஞ்ஞவனருக்க² திணபுப்³ப³ண்ணாபரண்ணாத³யோ சந்த³ஸூரியக³ஹனக்க²த்தாத³யோ வஸ்ஸோத³கஅக்³கி³வாதஸீதஉண்ஹாத³யோ ச ஸப்³பே³பி தே ஸத்தானம் குஸலுப்பத்தியா வா அகுஸலுப்பத்தியா வா ஸுகு²ப்பத்தியா வா து³க்கு²ப்பத்தியா வா ப³லவபச்சயா ஹோந்தி.

இமே ஜனா தி³ட்டே²வ த⁴ம்மே பரினிப்³பா³யிஸ்ஸாமாதி போ³தி⁴பக்கி²ய த⁴ம்மே வா பா⁴வேந்தி, அனாக³தே பு³த்³த⁴காலே பரினிப்³பா³யிஸ்ஸாமாதி பாரமீத⁴ம்மே வா பரிபூரேந்தி. தத்த² நிப்³பா³னம் தேஸம் த⁴ம்மானம் உப்பத்தியா ப³லவபச்சயோ ஹோதி.

லோகே நானாவோஹாரபூ⁴தா நாமபஞ்ஞத்தியோ ச பு³த்³த⁴ ஸாஸனே திபிடகபரியத்தித⁴ம்மபூ⁴தா நாமபஞ்ஞத்தியோ ச தேஸம் தேஸம் அத்தா²னம் ஜானனத்தா²ய ப³லவபச்சயோ.

தத்த² ஸங்க²தத⁴ம்மா நாம பச்சயே ஸதி உப்பஜ்ஜந்தி, அஸதி நுப்பஜ்ஜந்தி. உப்பஜ்ஜித்வாபி பச்சயே ஸதி திட்ட²ந்தி, அஸதி ந திட்ட²ந்தி. தஸ்மா தேஸம் உப்பத்தியா வா டி²தியா வா பச்சயோ நாம இச்சி²தப்³போ³. நிப்³பா³னம் பன பஞ்ஞத்தி ச அஸங்க²தத⁴ம்மா ஹோந்தி அஜாதித⁴ம்மா அனுப்பாத³த⁴ம்மா நிச்ச த⁴ம்மா து⁴வத⁴ம்மா. தஸ்மா தேஸம் உப்பாதா³ய வா டி²தியா வா பச்சயோ நாம நத்தீ²தி.

குஸலோ குஸலஸ்ஸ உபனிஸ்ஸயோ. ஸத்³த⁴ம் உபனிஸ்ஸாய தா³னம் தே³தி, ஸீலம் ஸமாதி³யதீதிஆதி³னா ஸுபாகடோ. ததா² ராக³ம் உபனிஸ்ஸாய பாணம் ஹனதி, அதி³ன்னம் ஆதி³யதீதிஆதி³னா ஸப்பாயம் உதும் ஸப்பாயம் போ⁴ஜனம் உபனிஸ்ஸாய காயிகம் ஸுக²ம் பச்சனுபோ⁴தீதிஆதி³னா ச அகுஸலோ அகுஸலஸ்ஸ, அப்³யாகதோ அப்³யாகதஸ்ஸ உபனிஸ்ஸயோபி ஸுபாகடோ.

குஸலோ பன அகுஸலஸ்ஸபி ப³லவூபனிஸ்ஸயோ. தா³னம் த³த்வா தேன தா³னேன அத்தானம் உக்கம்ஸேதி, பரம் வம்பே⁴தி. ததா² ஸீல ஸம்பன்னோ ஹுத்வா ஸமாதி⁴ஸம்பன்னோ ஹுத்வா பஞ்ஞாஸம்பன்னோ ஹுத்வா அத்தானம் உக்கம்ஸேதி, பரம் வம்பே⁴தி.

குஸலோ அப்³யாகதஸ்ஸபி ப³லவூபனிஸ்ஸயோ. ஸப்³பா³னி சதுபூ⁴மிககுஸலகம்மானி வா கம்மபரிவாரானி குஸலானி வா காலந்தரே சதுபூ⁴மிகானம் விபாகாப்³யாகதானம் ப³லவூபனிஸ்ஸயோ. தா³னபாரமிம் பூரேந்தா பூரணகாலே ப³ஹும் காயிகது³க்க²ம் பச்சனுப⁴வந்தி. ததா² ஸீலபாரமிம் நிக்க²மபாரமிம் பஞ்ஞாபாரமிம் வீரியபாரமிம் க²ந்திபாரமிம் ஸச்சபாரமிம் அதி⁴ட்டா²னபாரமிம் மேத்தாபாரமிம் உபேக்கா² பாரமிம். ஏஸேவ நயோ ஜா²னபா⁴வனா மக்³க³பா⁴வனாஸுபி.

அகுஸலோ குஸலஸ்ஸபி ப³லவூபனிஸ்ஸயோ. இதே⁴கச்சோ பாபம் கத்வா பச்சா² விப்படிஸாரீ ஹுத்வா தஸ்ஸ பாபஸ்ஸ பஹானாய தா³னஸீலஜா²னமக்³க³குஸலானி ஸம்பாதே³தி. தம் பாபம் தேஸம் குஸலானம் ப³லவூபனிஸ்ஸயோ.

அகுஸலோ அப்³யாகதஸ்ஸபி ப³லவூபனிஸ்ஸயோ. இத⁴ ப³ஹூ ஜனா து³ச்சரிதானி கத்வா சதூஸு அபாயேஸு பதித்வா அபாயது³க்க²ம் பச்சனுப⁴வந்தி. தி³ட்ட²த⁴ம்மேபி கேசி அத்தனோ வா பரஸ்ஸ வா து³ச்சரிதகம்ம பச்சயா ப³ஹும் து³க்க²ம் பச்சனுப⁴வந்தி. கேசி து³ச்சரிதகம்மேன த⁴னம் லபி⁴த்வா ஸுக²ம் பச்சனுப⁴வந்தி. ப³ஹுஜ்ஜனா ராக³மூலகம் ப³ஹும் து³க்க²ம் பச்சனுப⁴வந்தி, தோ³ஸமூலகம் தி³ட்டி²மூலகம் மானமூலகந்தி.

அப்³யாகதோ குஸலஸ்ஸபி ப³லவூபனிஸ்ஸயோ. த⁴ன ஸம்பத்தியா தா³னம் தே³தி, ஸீலம் பூரேதி, பஞ்ஞம் பூரேதி, பா⁴வனாஸப்பாயம் ஆவாஸம் வா லேணம் வா கு³ஹம்வா ருக்க²ம் வா அரஞ்ஞம் வா பப்³ப³தம் வா கோ³சரகா³மம் வா உதுஸப்பாயம் வா ஆஹாரஸப்பாயம் வா லபி⁴த்வா தம் தம் பா⁴வனம் பா⁴வேதி.

அப்³யாகதோ அகுஸலஸ்ஸபி ப³லவூபனிஸ்ஸயோ. லோகே சக்கு²ஸம்பத³ம் நிஸ்ஸாய ப³ஹூனி த³ஸ்ஸனமூலானி அகுஸலானி உப்பஜ்ஜந்தி. ஏஸ நயோ ஸோதஸம்பதா³தீ³ஸு. ததா² ஹத்த²ஸம்பத³ம் பாத³ஸம்பத³ம் ஸத்த²ஸம்பத³ம் ஆவுத⁴ஸம்பத³ந்திஆதி³னாபி வத்தப்³போ³. ஏவம் உபனிஸ்ஸயோ திவிதோ⁴ ஹோதி.

இத⁴ ஸுத்தந்தூபனிஸ்ஸயோபி வத்தப்³போ³. கல்யாணமித்தம் உப நிஸ்ஸாய பாபமித்தம் உபனிஸ்ஸாய கா³மம் உபனிஸ்ஸாய அரஞ்ஞம் உபனிஸ்ஸாயாதிஆதி³னா ப³ஹூஸு டா²னேஸு ஆக³தோ. அபி ச பஞ்சனியாமத⁴ம்மா ஸத்தலோக ஸங்கா²ரலோக ஓகாஸலோக ஸங்கா²தானம் திண்ணம் லோகானம் அவிச்சி²ன்னப்பவத்தியா ப³லவபச்சயா ஹோந்தி. அயஞ்ச அத்தோ² நியாமதீ³பனியம் அம்ஹேஹி வித்தா²ரதோ தீ³பிதோதி.

கேனட்டே²ன ஆரம்மணூபனிஸ்ஸயோதி. அதி⁴பதிபூ⁴தம் ஆரம்மணமேவ ஆரம்மணிகத⁴ம்மானம் ப³லவனிஸ்ஸயட்டே²ன ஆரம்மணூப நிஸ்ஸயோ.

கேனட்டே²ன அனந்தரூபனிஸ்ஸயோதி. புரிமம் அனந்தரசித்தமேவ பச்சி²மஸ்ஸ அனந்தரசித்தஸ்ஸ உப்பஜ்ஜனத்தா²ய ப³லவனிஸ்ஸயட்டே²ன அனந்தரூபனிஸ்ஸயோ. மாதா விய புரிமசித்தம், புத்தோ விய பச்சி²மசித்தம். யதா² மாதா அத்தனோ அனந்தரே புத்தஸ்ஸ உப்பஜ்ஜனத்தா²ய ப³லவூப நிஸ்ஸயோ ஹோதி, ததா² புரிமசித்தம் பச்சி²மசித்தஸ்ஸ உப்பஜ்ஜனத்தா²யாதி.

கேனட்டே²ன பகதூபனிஸ்ஸயோதி. பகதியாவ லோகே பண்டி³தானம் பாகடோ உபனிஸ்ஸயோ பகதூபனிஸ்ஸயோ.

ஏத்த² ச அனந்தரூபனிஸ்ஸயானுபா⁴வோ அனந்தரசித்தே ஏவ ப²ரதி. பகதூபனிஸ்ஸயானுபா⁴வோ பன தூ³ரேபி ப²ரதியேவ. ததா² ஹி இமஸ்மிம் ப⁴வே புரிமேஸு தி³வஸேஸு வா மாஸேஸு வா ஸம்வச்ச²ரேஸு வா தி³ட்ட²ஸுதகா⁴யிதஸாயிதபு²ஸிதவிஞ்ஞாதானி ஆரம்மணானி பச்சா²ததா²ரூபே பச்சயே ஸதி வஸ்ஸஸதேபி மனோத்³வாரே ஆபாதம் ஆக³ச்ச²ந்தி. இத³ம் நாம புப்³பே³ மயா தி³ட்ட²ம் ஸுதந்திஆதி³னா ஸத்தா அனுஸ்ஸரந்தி. ஓபபாதிகஸத்தா பன புரிமப⁴வம்பி அனுஸ்ஸரந்தி. ததா² மனுஸ்ஸேஸுபி அப்பேகச்சே ஜாதிஸ்ஸரஸஞ்ஞாலாபி⁴னோ. ததா² புப்³பே³ அனேகஸதஸஹஸ்ஸேஸு தி³ட்டா²தீ³ஸு வத்தூ²ஸு பச்சா² ஏகஸ்மிம் க²ணே ஏகம் வத்து²ம் தி³ஸ்வா வா ஸுத்வா வா தஸ்மிம் ஏவ க²ணே ப³ஹூஸுபி தேஸு மனோவிஞ்ஞாணஸந்தானம் ப²ரமானம் பவத்ததீதி. உபனிஸ்ஸயபச்சய தீ³பனா நிட்டி²தா.

10. புரேஜாதபச்சயோ

திவிதோ⁴ புரேஜாதபச்சயோ. வத்து²புரேஜாதபச்சயோ ச ஆரம்மணபுரேஜாதபச்சயோ ச வத்தா²ரம்மணபுரேஜாதபச்சயோ ச.

தத்த² வத்து²புரேஜாதோ ச வத்தா²ரம்மணபுரேஜாதோ ச புப்³பே³ நிஸ்ஸயபச்சயே நிஸ்ஸயனாமேன வுத்தா ஏவ.

ஆரம்மணபுரேஜாதோ நாம பச்சுப்பன்னானி அட்டா²ரஸனிப்ப²ன்னரூபானி ஏவ. தேஸுபி பச்சுப்பன்னானி ரூபஸத்³தா³தீ³னி பஞ்சாரம்மணானி பஞ்சன்னம் பஞ்சவிஞ்ஞாண வீதி²சித்தானம் நியமதோ ஆரம்மணபுரேஜாதபச்சயா ஹோந்தி. யதா² ஹி வீணாஸத்³தா³ நாம வீணாதந்தீஸு வீணாத³ண்ட³கேன பஹரண பச்சயா ஏவ உப்பஜ்ஜந்தி. ஏவஞ்ச ஸதி தே ஸத்³தா³ புரேஜாதாஹி வீணாதந்தி வீணாத³ண்ட³கேஹி வினா உப்பஜ்ஜிதும் ந ஸக்கோந்தி. ஏவமேவம் பஞ்ச விஞ்ஞாண வீதி²சித்தானிபி பஞ்சஸு வத்து²த்³வாரேஸு பஞ்சன்னம் ஆரம்மணானம் ஆபாதாக³மன பச்சயா ஏவ உப்பஜ்ஜந்தி. ஆபாதாக³மனஞ்ச தேஸம் த்³வின்னம் டி²திபத்தகாலே ஏவ ஹோதி. ந கேவலஞ்ச தஸ்மிம் காலே தானி பஞ்சாரம்மணானி தேஸு பஞ்சவத்தூ²ஸு ஏவ ஆபாதமாக³ச்ச²ந்தி. அத² கோ² ப⁴வங்க³மனோத்³வாரேபி ஆபாதம் ஆக³ச்ச²ந்தியேவ. தஸ்மிம் ஆபாதக³மனத்தா ஏவ தம் ப⁴வங்க³ம்பி த்³விக்க²த்தும் சலித்வா உபச்சி²ஜ்ஜதி, ப⁴வங்கு³பச்சே²தே³ ஏவ தானி வீதி²சித்தானி உப்பஜ்ஜந்தி. ஏவஞ்ச ஸதி தானி வீதி²சித்தானி புரேஜாதேஹி வத்து² த்³வாராரம்மணேஹி வினா உப்பஜ்ஜிதும் ந ஸக்கோந்தீதி. தானி பன ஸப்³பா³னிபி அட்டா²ரஸனிப்ப²ன்னரூபானி நிருத்³தா⁴னி ஹுத்வா அதீதானிபி ஹோந்தி, அனுப்பன்னானி ஹுத்வா அனாக³தானிபி ஹோந்தி. உப்பன்னானி ஹுத்வா பச்சுப்பன்னானிபி ஹோந்தி. ஸப்³பா³னிபி மனோவிஞ்ஞாணவீதி²சித்தானம் ஆரம்மணானி ஹோந்தி. தேஸு பச்சுப்பன்னானி ஏவ தேஸம் ஆரம்மணபுரேஜாதபச்சயா ஹோந்தி. யதா³ தூ³ரே வா படிச்ச²ன்னே வா டி²தம் தம் தம் ஆரம்மணவத்து²ம் மனஸா ஏவ ஆரம்மணம் கரோதி, ததா³ தம் தம் வத்து² ஸசே தத்த² தத்த² விஜ்ஜமானம் ஹோதி, பச்சுப்பன்னம் நாம ஹோதி. புரேஜாதபச்சயதீ³பனா நிட்டி²தா.

11. பச்சா²ஜாதபச்சயோ

பச்சி²மம் பச்சி²மம் பச்சுப்பன்னம் சித்தம் புரேஜாதஸ்ஸ பச்சுப்பன்னஸ்ஸ சது ஸமுட்டா²னிகஸ்ஸ ரூபகாயஸ்ஸ வுட்³டி⁴விருள்ஹியா பச்சா²ஜாதபச்சயோ. யதா² தம் பச்சி²மவஸ்ஸேஸு அனுவஸ்ஸம் வஸ்ஸமானானி வஸ்ஸோத³கானி புரிமவஸ்ஸேஸு ஜாதானம் ருக்க²போதகானம் வுட்³டி⁴விருள்ஹியா பச்சா²ஜாத பச்சயா ஹோந்தீதி.

தத்த² பச்சி²மம் பச்சி²மம் சித்தந்தி பட²மப⁴வங்க³தோ பட்டா²ய யாவ சுதி சித்தா ஸப்³ப³ம் சித்தம் வுச்சதி. புரேஜாதஸ்ஸாதி படிஸந்தி⁴சித்தேன ஸஹுப்பன்னம் கம்மஜரூபகாயம் ஆதி³ம் கத்வா அஜ்ஜ²த்தஸந்தானபரியாபன்னோ ஸப்³போ³ சதுஸமுட்டா²னிகரூபகாயோ வுச்சதி.

படிஸந்தி⁴சித்தேன ஸஹுப்பன்னஸ்ஸ கம்மஜரூபகாயஸ்ஸ பட²ம ப⁴வங்கா³தீ³னி பன்னரஸப⁴வங்க³சித்தானி பச்சா²ஜாதபச்சயா ஹோந்தி. படிஸந்தி⁴ சித்தம் பன தேன காயேன ஸஹுப்பன்னத்தா பச்ச²ஜாதம் ந ஹோதி. ஸோளஸமப⁴வங்க³சித்தஞ்ச தஸ்ஸ காயஸ்ஸ பி⁴ஜ்ஜனக்கே²த்தே உப்பன்னத்தா பச்சயோ ந ஹோதி. தஸ்மா பன்னரஸப⁴வங்க³சித்தானீதி வுத்தம்.

படிஸந்தி⁴சித்தஸ்ஸ டி²திக்க²ணே பன த்³வே ரூபகாயா உப்பஜ்ஜந்தி கம்மஜரூபகாயோ ச உதுஜரூபகாயோச. ததா² ப⁴ங்க³க்க²ணேபி. பட²மப⁴வங்க³ஸ்ஸ உப்பாத³க்க²ணே பன தயோ ரூபகாயா உப்பஜ்ஜந்தி கம்மஜரூபகாயோ ச உதுஜரூபகாயோ ச சித்தஜரூபகாயோ ச. யதா³ ப³ஹித்³தா⁴ஹாரப்ப²ரணம் லபி⁴த்வா அஜ்ஜ²த்தாஹாரோ ஆஹாரஜரூபகாயம் ஜனேதி, ததோ பட்டா²ய சதுஸமுட்டா²னிகா சத்தாரோ ரூபகாயா தீ³ப ஜாலா விய பவத்தந்தி. தே உப்பாத³க்க²ணம் அதிக்கம்ம யாவ டி²திபா⁴வேன த⁴ரந்தி, தாவ பன்னரஸசித்தானி தேஸம் காயானம் பச்சா²ஜாதபச்சயா ஹோந்தியேவ.

வுட்³டி⁴விருள்ஹியாதி சதுஸமுட்டா²னிகரூபஸந்ததியா உபரூபரி வுட்³டி⁴யா ச விருள்ஹியா ச. ததா²ஹி புரிமா புரிமா சத்தாரோ ரூபகாயா ஸசே பச்சா²ஜாத பச்சயம் புனப்புனம் லப⁴ந்தி, ஏவம் ஸதி தே நிருஜ்ஜ²ந்தாபி பச்சா²ரூபஸந்ததிபரம்பரானம் வுட்³டி⁴யா ச விருள்ஹியா ச வேபுல்லாய ச ப³லவ பச்சயா ஹுத்வா நிருஜ்ஜ²ந்தீதி. பச்சா²ஜாதபச்சயதீ³பனா நிட்டி²தா.

12. ஆஸேவனபச்சயோ

த்³வாத³ஸ அகுஸலசித்தானி ஸத்தரஸ லோகியகுஸல சித்தானி ஆவஜ்ஜனத்³வயவஜ்ஜிதானி அட்டா²ரஸகிரியசித்தானீதி ஸத்த சத்தாலீஸம் லோகியஜவனசித்தானி ஆஸேவனபச்சயோ. தேஸு நிரந்தரப்பவத்தம் ஜவனஸந்ததிம் பத்வா புரிமம் புரிமம் ஜவனசித்தம் ஆஸேவன பச்சயோ. சதூஹி மக்³க³சித்தேஹி பச்சி²மம் பச்சி²மம் சித்தம் ஆஸேவனபச்சயுப்பன்னம்.

கேனட்டே²ன ஆஸேவனந்தி. உபரூபரிபகு³ணபா⁴வவட்³ட⁴னத்த²ம்தா²ம ப³லவட்³ட⁴னத்த²ஞ்ச பரிவாஸக்³கா³ஹாபனட்டே²ன.

தத்த² பகு³ணபா⁴வோதி புனப்புனம் ஸஜ்ஜா²யிதஸ்ஸ பாளிபாட²ஸ்ஸ ஸுகே²ன பவத்தனம் விய ஜவனட்டா²னஜவனகிச்சஸங்கா²தே டா²னகிச்சவிஸேஸே பச்சி²ம பச்சி²மசித்தஸ்ஸ ஸுகே²ன பவத்தனம். பரிவாஸோ நாம கோஸேய்யவத்த²ம் புனப்புனம் ஸுக³ந்தே⁴ன பரிவாஸனம் விய சித்தஸந்தானே புனப்புன்னம் ரஜ்ஜனது³ஸ்ஸனாதி³னா வா அரஜ்ஜன அது³ஸ்ஸனாதி³னா வா பரிவாஸனம். புரிமஸ்மிம் ஜவனசித்தே நிருத்³தே⁴பி தஸ்ஸ ஜவனவேகோ³ ந நிருஜ்ஜ²தி, பச்சி²மம் சித்தஸந்தானம் ப²ரமானோ பவத்ததியேவ. தஸ்மா பச்சி²மம் பச்சி²மம் ஜவனசித்தம் உப்பஜ்ஜமானம் தேன வேகே³ன பக்³க³ஹிதம் ப³லவதரம் ஹுத்வா உப்பஜ்ஜதி. ஏவம் புரிமசித்தம் அத்தனோ பரிவாஸம் பச்சி²மசித்தம் க³ண்ஹாபேதி. பச்சி²மஞ்ச சித்தம் புரிமஸ்ஸ சித்தஸ்ஸ பரிவாஸம் க³ஹேத்வா பவத்ததி. ஏவம் ஸந்தேபி ஸோ ஆஸேவனவேகோ³ பகதியா ஸத்தஹி சித்தவாரேஹி பரிக்க²யம் க³ச்ச²தி, ததோ பரம் ததா³ரம்மணவிபாக சித்தம் வா உப்பஜ்ஜதி, ப⁴வங்க³ சித்தவாரோ வா பவத்ததி.

இத⁴ ஸுத்தந்தாஸேவனபச்சயோபி வத்தப்³போ³. ஸதிபட்டா²னம் பா⁴வேதி, ஸம்மப்பதா⁴னம் பா⁴வேதி, ஸதிஸம்போ³ஜ்ஜ²ங்க³ம் பா⁴வேதி, த⁴ம்ம விசயஸம்போ³ஜ்ஜ²ங்க³ம் பா⁴வேதி, ஸம்மாதி³ட்டி²ம் பா⁴வேதி, ஸம்மாஸங்கப்பம் பா⁴வேதீதிஆதி³னா ப³ஹூஸு டா²னேஸு வுத்தோ. தத்த² பா⁴வேதீதி ஏகம்பி தி³வஸம் பா⁴வேதி, ஸத்தபி தி³வஸானி பா⁴வேதி, ஏகம்பி மாஸம் பா⁴வேதி, ஸத்தபி மாஸானி பா⁴வேதி, ஏகம்பி ஸம்வச்ச²ரம் பா⁴வேதி, ஸத்தபி ஸம்வச்ச²ரானி பா⁴வேதீதி அத்தோ².

புரிமபுரிமேஸு ப⁴வேஸு ஆஸேவிதானி பா⁴விதானி ப³ஹுலீ கதானி குஸலானி வா அகுஸலானி வா பச்சி²மபச்சி²மேஸு ப⁴வேஸு ப³லவதரானம் குஸலானம் வா அகுஸலானம் வா உப்பத்தியா ஆஸேவன பச்சயோ.

காலந்தரே வா ப⁴வந்தரே வா தாதி³ஸானம் குஸலாகுஸலானம் உப்பத்தியா பச்சயோ உபனிஸ்ஸயபச்சயோ நாம. தேஸம்யேவ ப³லவதரத்தா²ய பச்சயோ ஆஸேவனபச்சயோ நாம.

லோகேபி மஹந்தேஸு சித்தபா⁴வனாகம்மேஸு வாசா பா⁴வனாகம்மேஸு காயபா⁴வனாகம்மேஸு அங்க³பச்சங்க³பா⁴வனாகம்மேஸு கம்மாயதனஸிப்பாயதனவிஜ்ஜாடா²னேஸு ச ஆஸேவனா பா⁴வனா ப³ஹுலீகம்மானம் நிஸ்ஸந்த³கு³ணா நாம ஸந்தி³ஸ்ஸந்தியேவ.

ஸப்³பே³ஸம் க²ணிகத⁴ம்மானம் மஜ்ஜே² ஏவரூபஸ்ஸ ஆஸேவன பச்சயஸ்ஸ விஜ்ஜமானத்தா புரிஸப³லபுரிஸதா²மானம் உபரூபரி வட்³ட⁴ன வஸேன சிரகாலம் பவத்திதானி புரிஸகம்மானி நிப்ப²த்திம் பாபுணந்தி, ஸப்³ப³ஞ்ஞுபு³த்³த⁴பா⁴வம்பி க³ச்ச²ந்தி. ஆஸேவனபச்சயதீ³பனா நிட்டி²தா.

13. கம்மபச்சயோ

து³விதோ⁴ கம்மபச்சயோ ஸஹஜாதகம்மபச்சயோ நானாக்க²ணிக கம்மபச்சயோ.

தத்த² க²ணத்தயஸமங்கி³ பூ⁴தா ஸப்³பா³பி குஸலாகுஸலா ப்³யாகதசேதனா ஸஹஜாதகம்ம பச்சயோ. சேதனாஸம்பயுத்தா ஸப்³பே³பி சித்தசேதஸிகா த⁴ம்மாச படிஸந்தி⁴சித்தேன ஸஹுப்பன்னா கம்மஜரூபத⁴ம்மா ச பவத்திகாலே ஸப்³பே³பி சித்தஜரூபத⁴ம்மா ச தஸ்ஸ பச்சயஸ்ஸ பச்சயுப்பன்னா.

அதீதா குஸலாகுஸலசேதனா நானாக்க²ணிககம்ம பச்சயோ. பா³த்திம்ஸவிதா⁴ லோகியவிபாக சித்தசேதஸிகா த⁴ம்மா ச ஸப்³பே³ கம்மஜரூபத⁴ம்மா ச தஸ்ஸ பச்சயஸ்ஸ பச்சயுப்பன்னா.

கேனட்டே²ன கம்மந்தி. கிரியாவிஸேஸட்டே²ன கம்மம். சேதனா ஹி கிரியா விஸேஸோ ஹோதி ஸப்³ப³கம்மேஸு ஜேட்ட²கத்தா. தா ஹி ஸப்³பே³ஸு காயவசீமனோகம்மேஸு பச்சுபட்டி²தேஸு தஸ்ஸ தஸ்ஸ கம்மஸ்ஸ நிப்ப²த்தத்தா²ய ஸம்பயுத்தத⁴ம்மே சேதேதி கப்பேதி ஸம்வித³ஹதி, ஏகதோ உட்டா²பேதி, தஸ்மா ஸப்³ப³கம்மேஸு ஜேட்ட²கா ஹோதி. இதி கிரியாவிஸேஸட்டே²ன கம்மம் நாம. கரோந்தி ஏதேனாதி வா கம்மம். கிம் கரோந்தி. காயிககிரியம்பி கரோந்தி, வாசஸிககிரியம்பி கரோந்தி, மானஸிககிரியம்பி கரோந்தி. தத்த² காயிககிரியா நாம க³மனடா²ன நிஸஜ்ஜாத³யோ அபி⁴க்கமனபடிக்கமனாத³யோ அந்தமஸோ அக்கி²த³லானம் உக்கி²பனனிக்கி²பனானிபி. வாசஸிககிரியா நாம வாசாபவத்தனகிரியா. மானஸிககிரியா நாம ஸுசிந்தித து³சிந்திதகிரியா, அந்தமஸோ பஞ்ச விஞ்ஞாணானம் த³ஸ்ஸனகிச்சஸவனகிச்சாதீ³னிபி. ஸப்³பா³பி இமா கிரியாயோ ஏதாய சேதனாய ஸத்தா கரோந்தி, ஸம்வித³ஹந்தி, தஸ்மா ஸா சேதனா கம்மம் நாம.

அத்தனோ பச்சயுப்பன்னேன ஸஹ ஜாயதீதி ஸஹஜாதம். ஸஹஜாதஞ்ச தம் கம்மஞ்சாதி ஸஹஜாதகம்மம். ஸஹஜாதகம்மம் ஹுத்வா பச்சயோ ஸஹஜாதகம்ம பச்சயோ. ஸஹஜாதகம்மபா⁴வேன பச்சயோதி வுத்தம் ஹோதி.

அஞ்ஞோ கம்மஸ்ஸ உப்பத்திக்க²ணோ அஞ்ஞோ விபாகஸ்ஸ உப்பத்திக்க²ணோதி ஏவம் விஸும் விஸும் உப்பத்திக்க²ணோ ஏதஸ்ஸாதி நானாக்க²ணிகம். நானாக்க²ணிகஞ்ச தம் கம்மஞ்சாதி நானாக்க²ணிககம்மம். நானாக்க²ணிககம்மம் ஹுத்வா பச்சயோ நானாக்க²ணிககம்மபச்சயோ. நானாக்க²ணிககம்மபச்சயபா⁴வேன பச்சயோதி வுத்தம் ஹோதி. அரியமக்³க³ஸம்பயுத்தா சேதனா அத்தனோ நிருத்³தா⁴னந்தரே ஏவ அரியப²லவிபாகம் ஜனேதி, ஸாபி நானாக்க²ணிகா ஏவ ஹோதி.

ஏத்த² ச ஏகா தா³னகுஸலசேதனா அத்தனா ஸஹஜாதானம் சித்தசேதஸிகானஞ்ச காயிகவாசஸிககிரியாபூ⁴தானம் சித்தஜரூபானஞ்ச ஸஹஜாதகம்மபச்சயோ. தாய சேதனாய ஆயதிம் காலந்தரே உப்பஜ்ஜமானஸ்ஸ விபாகக்க²ந்த⁴ஸ்ஸ ச கம்மஜரூபக்க²ந்த⁴ஸ்ஸ ச நானாக்க²ணிக கம்மபச்சயோ. ஏவம் ஏகா கம்மபத²பத்தா ஸுசரிதது³ச்சரிதசேதனா த்³வீஸு காலேஸுத்³வின்னம் பச்சயுப்பன்னானம் த்³வீஹி பச்சயஸத்தீஹி பச்சயோ ஹோதீதி.

ஏத்த² ச நானாக்க²ணிககம்மபச்சயே கம்மந்தி கிரியாவிஸேஸோ. ஸோ பன சேதனாய நிருத்³தா⁴யபி அனிருஜ்ஜி²த்வா தம் சித்தஸந்தானம் அனுக³ச்ச²தியேவ. யதா³ விபச்சிதும் ஓகாஸம் லப⁴தி, ததா³ ஸோ கிரியா விஸேஸோ சுதினந்தரே ஏகோ அத்தபா⁴வோ ஹுத்வா விபச்சதி பாதுப⁴வதி. ஓகாஸம் பன அலப⁴மானா ப⁴வஸதம்பி ப⁴வஸஹஸ்ஸம்பி ப⁴வஸதஸஹஸ்ஸம்பி தம் ஸந்தானம் அனுக³ச்ச²தியேவ. மஹக்³க³தகம்மம் பன லத்³தோ⁴காஸே ஸதி து³தியப⁴வே ப்³ரஹ்மலோகே ஏகோ ப்³ரஹ்மத்தபா⁴வோ ஹுத்வா விபச்சதி பாதுப⁴வதி. ஸுபரிபக்ககம்மத்தா பன து³தியப⁴வேயேவ கீ²யதி, ததோ பரம் நானுக³ச்ச²தீதி. கம்மபச்சயதீ³பனா நிட்டி²தா.

14. விபாகபச்சயோ

ச²த்திம்ஸவிதா⁴ விபாகபூ⁴தா ஸஹஜாதசித்தசேதஸிகா த⁴ம்மா விபாக பச்சயோ. தேயேவ அஞ்ஞமஞ்ஞஞ்ச படிஸந்தி⁴க்க²ணே கம்மஜரூபானி ச பவத்திக்க²ணே விபாக சித்தஜாதானி சித்தஜரூபானி ச விபாகபச்சயுப்பன்னா.

கேனட்டே²ன விபாகோதி. விபச்சனட்டே²ன விபாகோ. விபச்சனம் நாம முது³தருணபா⁴வம் அதிக்கம்ம விபக்கபா⁴வம் ஆபஜ்ஜனம். கஸ்ஸ பன த⁴ம்மஸ்ஸ முது³தருணபா⁴வோ, கஸ்ஸ விபக்கபா⁴வோதி. நானாக்க²ணிககம்மபச்சய ஸங்கா²தஸ்ஸ அதீதகம்மஸ்ஸ முது³தருணபா⁴வோ, தஸ்ஸேவ கம்மஸ்ஸ விபக்கபா⁴வோ.

தத்த² ஏகஸ்ஸ கம்மஸ்ஸ சதஸ்ஸோ அவத்தா²யோ ஹோந்தி சேதனா வத்தா² கம்மாவத்தா² நிமித்தாவத்தா² விபாகாவத்தா²தி.

தத்த² தாய சேதனாய நிருத்³தா⁴யபி தஸ்ஸா கிரியா விஸேஸோ ந நிருஜ்ஜ²தி, தம் சித்தஸந்தானம் அனுக³ச்ச²தியேவ. அயம் கம்மாவத்தா² நாம.

நிமித்தாவத்தா²தி தம் கம்மம் யதா³ விபச்சிதும் ஓகாஸம் லப⁴தி, ததா³ மரணாஸன்னகாலே தஸ்ஸ புக்³க³லஸ்ஸ தமேவ கம்மம் வா பச்சுபட்டா²தி, ஸோ புக்³க³லோ ததா³ தா³னம் தே³ந்தோ விய ஸீலம் ரக்க²ந்தோ விய பாணகா⁴தம் வா கரோந்தோ விய ஹோதி. கம்மனிமித்தம் வா பச்சுபட்டா²தி, தா³ன வத்து²ஆதி³கம் வா ஸத்தா²தி³கம் வா அஞ்ஞம் வாபி புப்³பே³ தஸ்ஸ கம்மஸ்ஸ உபகரணபூ⁴தம் ஆரம்மணம் ததா³ தஸ்ஸ புக்³க³லஸ்ஸ ஹத்த²க³தம் விய ஹோதி. க³தினிமித்தம் வா பச்சுபட்டா²தி, தி³ப்³ப³விமானாதி³கம் வா நிரயக்³கி³ஜாலாதி³கம் வா உப்பஜ்ஜமானப⁴வே உபலபி⁴தப்³ப³ம் வா அனுப⁴விதப்³ப³ம் வா ஆரம்மணம் ததா³ தி³ஸ்ஸமானம் ஹோதி. அயம் நிமித்தா வத்தா² நாம.

விபாகாவத்தா²தி ஸசே ஸோ புக்³க³லோ ததா² பச்சுபட்டி²தம் தம் கம்மம் வா கம்மனிமித்தம் வா க³தினிமித்தம் வா ஏகம் ஆரம்மணம் அமுஞ்சமானோ மரதி, ததா³ தம் கம்மம் தஸ்மிம்ப⁴வே விபச்சதி, தம் கம்மம் தஸ்மிம்ப⁴வே ஏகோ அத்தபா⁴வோ ஹுத்வா பாதுப⁴வதி. தத்த² புரிமாஸு தீஸு அவத்தா²ஸு தம் கம்மம் முது³தருணபூ⁴தம் ஹோதி, பச்சி²மம் பன விபாகாவத்த²ம் பத்வா விபக்கபூ⁴தம் ஹோதி. தேன வுத்தம் விபச்சனம் நாம முது³தருணபா⁴வம் அதிக்கம்ம விபக்கபா⁴வம் ஆபஜ்ஜனந்தி. ஏவம் விபக்கபா⁴வம் ஆபன்னோ சித்த சேதஸிகத⁴ம்மஸமூஹோ விபாகோ நாம.

தத்த² யதா² அம்ப³ப்ப²லானி நாம யதா³ விபக்கபா⁴வம் ஆபஜ்ஜந்தி, ததா³ ஸப்³ப³ஸோ ஸினித்³த⁴ரூபானி ஹோந்தி. ஏவமேவம் விபாகத⁴ம்மா நாம நிருஸ்ஸாஹா நிப்³யாபாரா ஹுத்வா ஸப்³ப³ஸோ ஸந்தரூபா ஹோந்தி. தேஸம் ஸந்தரூபத்தாயேவ ப⁴வங்க³சித்தானம் ஆரம்மணம் அவிபூ⁴தம் ஹோதி, ப⁴வங்க³தோ வுட்டா²னகாலே தம் ஆரம்மணம் ந ஜானாதி. ததா²ஹி ரத்தியம் நித்³தா³யந்தஸ்ஸ புரிமப⁴வே மரணாஸன்னகாலே யதா²க³ஹிதம் கம்மாதி³கம் ஆரம்மணம் ஆரப்³ப⁴ ப⁴வங்க³ஸோதம் பவத்தமானம்பி தஸ்ஸ ப⁴வங்க³ஸோதஸ்ஸ தம் ஆரம்மணம் ஆரப்³ப⁴ இத³ம் நாம மே புரிமப⁴வே ஆரம்மணம் தி³ட்ட²ந்தி கஸ்ஸசி ஜானனவீதி²சித்தஸ்ஸ உப்பத்தியா பச்சயோ ந ஹோதி. ஸோ புக்³க³லோ நித்³தா³யனகாலேபி உட்டா²னகாலேபி புரிமப⁴வஸித்³த⁴ம் தம் நிமித்தம் ந ஜானாதி. ஏவம் நிருஸ்ஸாஹனிப்³யாபாரஸந்தரூப பா⁴வேன உபகாரகதா விபாகபச்சயதா நாமாதி. விபாக பச்சயதீ³பனா நிட்டி²தா.

15. ஆஹாரபச்சயோ

து³விதோ⁴ ஆஹாரபச்சயோ ரூபாஹாரபச்சயோ அரூபாஹார பச்சயோ.

தத்த² ரூபாஹாரபச்சயோ நாம கப³ளீகாராஹாரஸங்கா²தம் ஓஜ ரூபம் வுச்சதி. ஸோ ச அஜ்ஜ²த்தாஹாரோ ப³ஹித்³தா⁴ஹாரோதி து³விதோ⁴. கப³ளீகாராஹாரப⁴க்கா²னம் ஸத்தானம் ஸப்³பே³பி சதுஸமுட்டா²னிகரூபத⁴ம்மா தஸ்ஸ து³வித⁴ஸ்ஸ ரூபாஹாரஸ்ஸ பச்சயுப்பன்னா.

அரூபாஹாரோ பன திவிதோ⁴ ப²ஸ்ஸாஹாரோ மனோஸஞ்சேதனா ஹாரோ விஞ்ஞாணாஹாரோ ச. தயோபேதே த⁴ம்மா ஸஹஜாதானம் நாமரூபத⁴ம்மானம் ஆஹாரபச்சயோ ஹோந்தி. ஸஹஜாதா ச நாமரூப த⁴ம்மா தேஸம் பச்சயுப்பன்னா.

கேனட்டே²ன ஆஹாரோதி. பு⁴ஸம் ஹரணட்டே²ன ஆஹாரோ. பு⁴ஸம் ஹரணட்டே²னாதிச த³ள்ஹம் பவத்தாபனட்டே²ன, சிரகாலம் டி²தியா வுட்³டி⁴யா விருள்ஹியா வேபுல்லாய உபத்த²ம்ப⁴னட்டே²னாதி வுத்தம் ஹோதி. ஜனனகிச்சயுத்தோபி ஆஹாரோ உபத்த²ம்ப⁴னகிச்சப்பதா⁴னோ ஹோதீதி.

தத்த² து³விதோ⁴ ரூபாஹாரோ அஜ்ஜ²த்தஸந்தானே சதுஸமுட்டா²னிகம் ரூபகாயம் உபப்³ரூஹயந்தோ பு⁴ஸம் ஹரதி, த³ள்ஹம் பவத்தேதி, சிரம் அத்³தா⁴னம் க³மேதி, தம் தம் ஆயுகப்பபரியோஸானம் பாபேதீதி ஆஹாரோ.

ப²ஸ்ஸாஹாரோ ஆரம்மணேஸு இட்டா²னிட்ட²ரஸம் நீஹரந்தோ ஸம்பயுத்தத⁴ம்மே பு⁴ஸம் ஹரதி. மனோஸஞ்சேதனாஹாரோ காயவசீ மனோகம்மேஸு உஸ்ஸாஹம் ஜனேந்தோ ஸம்பயுத்தத⁴ம்மே பு⁴ஸம் ஹரதி. விஞ்ஞாணாஹாரோ ஆரம்மணவிஜானனட்டே²ன புப்³ப³ங்க³மகிச்சம் வஹந்தோ ஸம்பயுத்தத⁴ம்மே பு⁴ஸம் ஹரதி, த³ள்ஹம் பவத்தேதி, சிரம் அத்³தா⁴னம் க³மேதீதி ஆஹாரோ. ஸம்பயுத்தத⁴ம்மே பு⁴ஸம் ஹரந்தோ ஸஹஜாதரூபத⁴ம்மேபி பு⁴ஸம் ஹரதியேவ.

இத⁴ ஸுத்தந்தனயோபி வத்தப்³போ³. யதா² ஸகுணா நாம சக்கூ²ஹி தி³ஸாவிதி³ஸம் விபா⁴வேத்வா பத்தேஹி ருக்க²தோ ருக்க²ம் வனதோ வனம் ஆகாஸேன பக்க²ந்தி³த்வா துண்ட³கேஹி ப²லாப²லானி துதி³த்வா யாவஜீவம் அத்தானம் யாபேந்தி. ததா² இமே ஸத்தா ச²ஹி விஞ்ஞாணேஹி ஆரம்மணானி விபா⁴வேத்வா ச²ஹி மனோஸஞ்சேதனாஹாரேஹி ஆரம்மணவத்து²ப்படிலாப⁴த்தா²ய உஸ்ஸுக்கனம் கத்வா ச²ஹி ப²ஸ்ஸாஹாரேஹி ஆரம்மணேஸு ரஸம் பாதுப⁴வந்தம் கத்வா ஸுக²து³க்க²ம் அனுப⁴வந்தி. விஞ்ஞாணேஹி வா ஆரம்மணானி விபா⁴வேத்வா நாமரூப ஸம்பத்திம் ஸாதே⁴ந்தி. ப²ஸ்ஸேஹி ஆரம்மணேஸு ரஸம் பாதுப⁴வந்தம் கத்வா ஆரம்மணரஸானுப⁴வனம் வேத³னம் ஸம்பாதே³த்வா தண்ஹாவேபுல்லம் ஆபஜ்ஜந்தி. சேதனாஹி தண்ஹாமூலகானி நானாகம்மானி பஸவேத்வா ப⁴வதோ ப⁴வம் ஸம்ஸரந்தி. ஏவம் ஆஹாரத⁴ம்மானம் மஹந்தம் ஆஹாரகிச்சம் வேதி³தப்³ப³ந்தி. ஆஹாரபச்சயதீ³பனா நிட்டி²தா.

16. இந்த்³ரியபச்சயோ

திவிதோ⁴ இந்த்³ரியபச்சயோ ஸஹஜாதிந்த்³ரியபச்சயோ புரே ஜாதிந்த்³ரியபச்சயோ ரூபஜீவிதிந்த்³ரியபச்சயோ.

தத்த² பன்னரஸிந்த்³ரியத⁴ம்மா ஸஹஜாதிந்த்³ரியபச்சயோ நாம, ஜீவிதிந்த்³ரியம் மனிந்த்³ரியம் ஸுகி²ந்த்³ரியம் து³க்கி²ந்த்³ரியம் ஸோமனஸ்ஸிந்த்³ரியம் தோ³மனஸ்ஸிந்த்³ரியம் உபேக்கி²ந்த்³ரியம் ஸத்³தி⁴ந்த்³ரியம் வீரியிந்த்³ரியம் ஸதிந்த்³ரியம் ஸமாதி⁴ந்த்³ரியம் பஞ்ஞிந்த்³ரியம் அனஞ்ஞாதஞ்ஞஸ்ஸாமீதிந்த்³ரியம் அஞ்ஞிந்த்³ரியம் அஞ்ஞாதாவிந்த்³ரியந்தி. தேஹி ஸஹஜாதா சித்தசேதஸிகத⁴ம்மா ச ரூபத⁴ம்மா ச தஸ்ஸ பச்சயுப்பன்னா.

பஞ்சிந்த்³ரியரூபானி புரேஜாதிந்த்³ரியபச்சயோ, சக்கு²ந்த்³ரியம் ஸோதிந்த்³ரியம் கா⁴னிந்த்³ரியம் ஜிவ்ஹிந்த்³ரியம் காயிந்த்³ரியம். பஞ்சவிஞ்ஞாணசித்த சேதஸிக த⁴ம்மா தஸ்ஸ பச்சயுப்பன்னா.

ஏகம் ரூபஜீவிதிந்த்³ரியம் ரூபஜீவிதிந்த்³ரியபச்சயோ. ஸப்³பா³னி கம்மஜ ரூபானி ஜீவிதரூபவஜ்ஜிதானி தஸ்ஸ பச்சயுப்பன்னானி.

கேனட்டே²ன இந்த்³ரியந்தி. இஸ்ஸரியட்டே²ன இந்த்³ரியம். தத்த² கத்த² இஸ்ஸரியந்தி. அத்தனோ அத்தனோ பச்சயுப்பன்னேஸு த⁴ம்மேஸு இஸ்ஸரியம். கஸ்மிம் கஸ்மிம் கிச்சே இஸ்ஸரியந்தி. அத்தனோ அத்தனோ கிச்சே இஸ்ஸரியம். நாமஜீவிதம் ஸம்பயுத்தத⁴ம்மானம் ஜீவனகிச்சே இஸ்ஸரியம். ஜீவனகிச்சேதி ஆயுவட்³ட⁴னகிச்சே, ஸந்ததிடி²தியா சிரகாலடி²திகிச்சேதி அத்தோ². மனிந்த்³ரியம் ஆரம்மணக்³க³ஹணகிச்சே ஸம்பயுத்தத⁴ம்மானம் இஸ்ஸரியம். அவஸேஸோ இந்த்³ரியட்டோ² புப்³பே³ இந்த்³ரியயமகதீ³பனியம் வுத்தோயேவ.

ஏத்த² வதே³ய்ய, த்³வே இத்தி²ந்த்³ரியபுரிஸிந்த்³ரியத⁴ம்மா இந்த்³ரியபூ⁴தா ஸமானாபி கஸ்மா இந்த்³ரியபச்சயே விஸும் ந க³ஹிதாதி. பச்சயகிச்சஸ்ஸ அபா⁴வதோ. திவித⁴ஞ்ஹி பச்சயகிச்சம் ஜனனகிச்சஞ்ச உபத்த²ம்ப⁴னகிச்சஞ்ச அனுபாலனகிச்சஞ்ச. தத்த² யோ பச்சயோ பச்சயுப்பன்னத⁴ம்மஸ்ஸ உப்பாதா³ய பச்சயோ ஹோதி, யஸ்மிம் அஸதி பச்சயுப்பன்னோ த⁴ம்மோ ந உப்பஜ்ஜதி, தஸ்ஸ பச்சயகிச்சம் ஜனனகிச்சம் நாம. யதா² அனந்தரபச்சயோ. யோ பச்சயோ பச்சயுப்பன்னத⁴ம்மஸ்ஸ டி²தியா ச வுட்³டி⁴யா ச விருள்ஹியா ச பச்சயோ ஹோதி, யஸ்மிம் அஸதி பச்சயுப்பன்னோ த⁴ம்மோ ந திட்ட²தி ந வட்³ட⁴தி ந விரூஹதி, தஸ்ஸ பச்சயகிச்சம் உபத்த²ம்ப⁴னகிச்சம் நாம. யதா² பச்சா²ஜாதபச்சயோ. யோ பச்சயோ பச்சயுப்பன்னஸ்ஸ த⁴ம்மஸ்ஸ பவத்தியா பச்சயோ ஹோதி, யேன வினா பச்சயுப்பன்னோ த⁴ம்மோ சிரகாலம் ந பவத்ததி, ஸந்ததி க³மனம் சி²ஜ்ஜதி, தஸ்ஸ பச்சய கிச்சம் அனுபாலனகிச்சம் நாம. யதா² ரூப ஜீவிதிந்த்³ரியபச்சயோ. ஏதே பன த்³வே இந்த்³ரியத⁴ம்மா தேஸு தீஸு பச்சய கிச்சேஸு ஏககிச்சம்பி நஸாதே⁴ந்தி, தஸ்மா ஏதே த்³வே த⁴ம்மா இந்த்³ரிய பச்சயே விஸும் ந க³ஹிதாதி.