17. ஜா²னபச்சயோ

ஸத்த ஜா²னங்கா³னி ஜா²னபச்சயோ, விதக்கோ விசாரோ பீதி ஸோமனஸ்ஸம் தோ³மனஸ்ஸம் உபேக்கா² ஏகக்³க³தா. தேஹி ஸஹஜாதா பஞ்சவிஞ்ஞாணவஜ்ஜிதா சித்தசேதஸிகத⁴ம்மா ச ரூபத⁴ம்மா ச தஸ்ஸ பச்சயுப்பன்னா.

கேனட்டே²ன ஜா²னந்தி. உபனிஜ்ஜா²யனட்டே²ன ஜா²னம். உபனிஜ்ஜா²ய நட்டே²னாதி ச மனஸா ஆரம்மணம் உபக³ந்த்வா நிஜ்ஜா²யனட்டே²ன பேக்க²னட்டே²ன. யதா² ஹி இஸ்ஸாஸோ தூ³ரே ட²த்வா கு²த்³த³கே லக்க²மண்ட³லே ஸரம் பவேஸேந்தோ ஹத்தே²ஹி ஸரம் உஜுகஞ்ச நிச்சலஞ்ச கத்வா மண்ட³லஞ்ச விபூ⁴தம் கத்வா சக்கு²னா நிஜ்ஜா²யந்தோ பவேஸேதி. ஏவமேவ இமேஹி அங்கே³ஹி சித்தம் உஜுகஞ்ச நிச்சலஞ்ச கத்வா ஆரம்மணஞ்ச விபூ⁴தம் கத்வா நிஜ்ஜா²யந்தோ புக்³க³லோ உபனிஜ்ஜா²யதீதி வுச்சதி. ஏவம் உபனிஜ்ஜா²யித்வா யம்கிஞ்சி காயகம்மம் வா வசீகம்மம் வா மனோகம்மம் வா கரோந்தோ அவிரஜ்ஜ²மானோ கரோதி.

தத்த² காயகம்மம் நாம அபி⁴க்கமப்படிக்கமாதி³கம் வுச்சதி. வசீகம்மம் நாம அக்க²ரவண்ணபரிபுண்ணம் வசீபே⁴த³கரணம் வுச்சதி. மனோகம்மம் நாம யம்கிஞ்சி மனஸா ஆரம்மணவிபா⁴வனம் வுச்சதி. தா³னகம்மம் வா பாணாதிபாத கம்மம் வா அனுரூபேஹி ஜா²னங்கே³ஹி வினா து³ப்³ப³லேன சித்தேன காதும் ந ஸக்கா ஹோதி. ஏஸ நயோ ஸேஸேஸு குஸலாகுஸல கம்மேஸூதி.

அயஞ்ச அத்தோ² விதக்காதீ³னம் ஜா²னங்க³த⁴ம்மானம் விஸும் விஸும் ஸபா⁴வ லக்க²ணேஹி தீ³பேதப்³போ³. ஸம்பயுத்தத⁴ம்மே ஆரம்மணாபி⁴னிரோபன லக்க²ணோ விதக்கோ, ஸோ சித்தம் ஆரம்மணே த³ள்ஹம் நியோஜேதி. ஆரம்மணானுமஜ்ஜனலக்க²ணோ விசாரோ, ஸோ சித்தம் ஆரம்மணே த³ள்ஹம் ஸம்யோஜேதி. ஆரம்மணஸம்பியாயனலக்க²ணாபீதி, ஸா சித்தம் ஆரம்மணே பரிதுட்ட²ம் கரோதி. திஸ்ஸோபி வேத³னா ஆரம்மணரஸானு ப⁴வனலக்க²ணா, தாபி சித்தம் ஆரம்மணே இட்டா²னிட்ட²மஜ்ஜ²த்தரஸானுப⁴வன கிச்சேன த³ள்ஹப்படிப³த்³த⁴ம் கரோந்தி. ஸமாதா⁴னலக்க²ணா ஏகக்³க³தா, ஸாபி சித்தம் ஆரம்மணே நிச்சலம் கத்வா ட²பேதீதி. ஜா²னபச்சயதீ³பனா நிட்டி²தா.