9. கம்மட்டா²னஸங்க³ஹஅனுதீ³பனா

170. கம்மட்டா²னஸங்க³ஹே. விதி³தோ விஞ்ஞாதோ நாமரூப விபா⁴கோ³ யேனாதி விக்³க³ஹோ. யோகீ³ புக்³க³லோ. ‘‘கிலேஸே ஸமேதீ’’தி காமச்ச²ந்தா³தி³கே நீவரணகிலேஸே உபஸமேதி. ‘‘ததா² பவத்தோ’’தி பா⁴வனாவஸேன பவத்தோ. வூபஸமனவஸேன வா பவத்தோ. ‘‘தாயா’’தி தாயபா⁴வனா பஞ்ஞாய, பஸ்ஸந்தீதி ஸம்ப³ந்தோ⁴. ‘‘பஸ்ஸிதம்’’தி ஸமனுபஸ்ஸிதம். கத²ம் கஸிணபா⁴வனாதி³கம் யோக³கம்மம் அத்தாவ அத்தனோ டா²னம் ஹோதீதி வுத்தம் ‘‘ஆதி³மஜ்ஜ²பரியோஸானானம்ஹீ’’திஆதி³. விபா⁴வனிபாடே². ‘‘பத³ட்டா²னதாயா’’தி ஏதேன திட்ட²தி அனிவத்தமானம் பவத்ததி ஏதேனாதி டா²னந்தி அத்தே²ன பத³ட்டா²னமேவ டா²னந்தி வுச்சதீதி தீ³பேதி. ‘‘ஸுக²விஸேஸானம்’’தி ஜா²னஸுக² மக்³க³ஸுக² ப²லஸுகா²னம். ‘‘த³ஸகஸிணானீ’’திஆதீ³ஸு முக்²யதோ வா உபசாரதோ வா த்³விதா⁴பி அத்த²ம் த³ஸ்ஸேதும் ‘‘த³ஸகஸிணானீ’’திஆதி³ வுத்தம். ‘‘ஸேஸானிபீ’’தி அப்பமஞ்ஞாதீ³னி ஸேஸகம்மட்டா²னானிபி. யம் யம் அனுரூபம் யதா²னுரூபம். ‘‘ஸமுதா³சரணம்’’தி புனப்புனம் பு⁴ஸம் பவத்தனம். ‘‘ஸம்ஸக்³க³ பே⁴தோ³’’தி ஏகமேகஸ்ஸ புக்³க³லஸ்ஸ கஸ்ஸசி த்³வேசரியா, கஸ்ஸசி திஸ்ஸோதிஆதி³னா ஸம்மிஸ்ஸ விபா⁴கோ³. அட்ட²கதா²யம்’’தி விஸுத்³தி⁴மக்³க³ அட்ட²கதா²யம். ‘‘ஸப்³பா³யபி அப்பனாயா’’தி ஜா²னப்பனாய ச மக்³க³ப்பனாய ச ப²லப்பனாய ச. ‘‘யா ஆஸன்னே பவத்தா தூ³ரே பவத்தாதி அதி⁴காரோ. ‘‘இதரா பனா’’தி தூ³ரே பவத்தாபன. ‘‘தாஸம் பனா’’தி திஸ்ஸன்னம் பா⁴வனானம் பன. ‘‘தேஸம் பீ’’தி த்³வின்னம் நிமித்தானம்பி. ‘‘வித³த்தி²சதுரங்கு³லம்’’ நாம வித்தா²ரதோ சதுரங்கு³லாதி⁴கம் வித³த்தி²ப்பமாணம். வித³த்தி²ப்பமாணம் வா சதுரங்கு³லப்பமாணம் வாதிபி யுஜ்ஜதி. ததா²ஹி விஸுத்³தி⁴மக்³கே³ வாயோகஸிண விதா⁴னே சதுரங்கு³லப்பமாணம் ஸீஸம் வாதேன பஹரியமானம் தி³ஸ்வாதி வுத்தம். க²லமண்ட³லம் நாம கஸ்ஸகானம் கஸ்ஸமத்³த³னபூ⁴மிபா⁴க³மண்ட³லம். ‘‘கதம் வா’’தி நீலாதி³வண்ணவிஸேஸரஹிதம் அருணவண்ணம் மத்திகக்க²ண்ட³ம் உத³கேன மத்³தி³த்வா சக்கமண்ட³லம் விய பரிமண்ட³லம் ஸுமட்ட²தலம் பத²விமண்ட³லம் கரோந்தி. ஏவம் கதம் வா. ‘‘அகதம் வா’’தி கத்த²சி பூ⁴மிபா⁴கே³ கேனசி அகதம் ஸயம் ஜாதம் வா. ‘‘கஸிணேன ஜம்பு³தீ³பஸ்ஸா’’தி ஏத்த².

பு³த்³தோ⁴தி கித்தயந்தஸ்ஸ, காயே ப⁴வதி யா பீதி;

வரமேவ ஹி ஸாபீதி, கஸிணேனபி ஜம்பு³தீ³பஸ்ஸாதி.

கா³தா²ஸேஸோ. தத்த² ஜம்பு³தீ³பஸ்ஸ கஸிணதோ ஸாபீதிவரா ஏவாதி யோஜனா. ‘‘கஸிணதோ’’தி ச ஸகலமண்ட³லதோ. ஸகலஸ்ஸ ஜம்பு³தீ³பமண்ட³லஸ்ஸ இஸ்ஸரியாதி⁴பதிதோ பீதி வுத்தம் ஹோதி. ‘‘ஸன்னிவிட்டா²’’தி ஸமம் ஸண்டி²தா. ‘‘ஸண்டா²ன பஞ்ஞத்தீ’’தி மண்ட³லஸண்டா²னேன உபட்டி²தா நிமித்தபஞ்ஞத்தி ஏவ வுச்சதி. ‘‘பு²ட்ட²ட்டா²னே’’தி காயேவா ருக்க²க்³கா³தீ³ஸுவா வாதேன பஹதட்டா²னே. ‘‘வாயு வட்டீ’’தி வாதபரிமண்ட³லம். சந்த³ஸூரியானம் அக்³கி³ஸ்ஸ ச ஓபா⁴ஸேன விஸிட்டா²தி ஸமாஸோ. ‘‘விஸிட்டா²’’தி விஸேஸிதா.

‘‘தூ⁴மாதம்’’தி தூ⁴மாயிதம். தூ⁴மபூரிதபடம் வியாதி வுத்தம் ஹோதி. தேனாஹ ‘‘ஸூனபா⁴வம் க³தம்’’தி. அந்தே ககாரோ நிந்த³த்த²ஜோதகோதி வுத்தம் ‘‘குச்சி²தத்தா’’தி. ஜேகு³ச்சி² தப்³ப³த்தாதி அத்தோ². ‘‘ச²வஸரீரஸ்ஸா’’தி லாமகஸரீரஸ்ஸ. ‘‘ததே³வா’’தி ச²வஸரீரமேவ. விபுப்³ப³கம் விச்சி²ன்னகம் நாமாதி ஸம்ப³ந்தோ⁴. தத்த² விஸேஸேன நீலந்திவினீலம். தமேவ குச்சி²தத்தா வினீலகம். ‘‘ததே³வ புன பச்சித்வா’’தி வினீலகஸரீரமேவ புன காலாதிக்கமே பச்சித்வா. பூதிலோஹிதானம் பரிபக்கபா⁴வம் பத்வாதி அத்தோ². ததோ ததோ த்³வாரச்சி²த்³த³தோ. யுத்தம் ததே³வ ஸரீரந்தி ஸம்ப³ந்தோ⁴. விச்சி²ன்னகம் நாம, விச்சி²த்³த³கந்திபி பட²ந்தி. ‘‘அபகட்³டி⁴த்வா’’தி க²ண்டா³னி ஸரீரதோ மோசேத்வா தம் தம் பதே³ஸம் கட்³டி⁴த்வா. ‘‘பக்³க⁴ரிதலோஹித ஸரீரம்’’தி சி²ன்னவித்³த⁴ட்டா²னேஸு வணமுகே²ஹி பக்³க⁴ரிதலோஹிதஸரீரம்.

‘‘பு³த்³தா⁴னுஸ்ஸதீ’’தி ஏத்த² பு³த்³த⁴ஸத்³தோ³ கு³ண்யூபசார வசனம் ஹோதி. கு³ணினோ த³ப்³ப³ஸ்ஸ நாமேன கு³ணானம் க³ஹேதப்³ப³த்தாதி வுத்தம் ‘‘பு³த்³த⁴கு³ணஸ்ஸ அனுஸ்ஸதி பு³த்³தா⁴னுஸ்ஸதீ’’தி. ஏஸனயோ த⁴ம்மானுஸ்ஸதாதீ³ஸு. ‘‘அரஹதாதீ³’’தி அரஹதாதி³கு³ணோ. விக³தானி து³ஸ்ஸில்யாதி³ மலானி ச மச்சே²ரஞ்ச யஸ்ஸ தம் விக³தமலமச்சே²ரம். தஸ்ஸ பா⁴வோதி விக்³க³ஹோ. ‘‘அத்தனா அதி⁴க³தனிப்³பா³னஞ்சா’’தி ஏதேன அரியபுக்³க³லானம் கிலேஸானம் அச்சந்தவூபஸமோ வுத்தோ. ‘‘யம் ஆரப்³பா⁴’’தி யம் புக்³க³லம் ஆரப்³ப⁴. ஹிதூபஸம்ஹாரோ நாம அயம் புக்³க³லோ அவேரோ ஹோது, அப்³யாபஜ்ஜோ ஹோதூதிஆதி³னா அவேரதாதீ³னி ஹிதஸுகா²னி தஸ்மிம் புக்³க³லே சித்தேன உபஸம்ஹரணம். கருணா, முதி³தா, ஹேட்டா² சேதஸிகஸங்க³ஹே வுத்தத்தா² ஏவ. ஹிதூபஸம்ஹாரோ ச ஹிதமோத³னா ச அஹிதாபனயனஞ்சாதி த்³வந்தோ³. தத்த² ஹிதூபஸம்ஹாரோ மேத்தாய கிச்சம். ஹிதமோத³னா முதி³தாய. அஹிதாபனயனம் கருணாய கிச்சம். தத்த² பரம் ஹிதஸுக²ஸம்பன்னம் தி³ஸ்வா தேன பரஹிதேன அத்தனி பீதிபாமோஜ்ஜவட்³ட⁴னம் ஹிதமோத³னா நாம. பரம் து³க்கி²தம் தி³ஸ்வா அயம் இமம்ஹாது³க்கா² முச்சது, மாகிலமதூதி ஏவம் சித்தேன பரஸ்மிம் அஹிதஸ்ஸ து³க்க²ஸ்ஸ அபனயனம் அஹிதாபனயனம் நாம. ‘‘தேஸம்’’தி பரஸத்தானம். ஸஸ்ஸ அத்தனோ இத³ந்தி ஸகம். ‘‘இத³ம்’’ ஸுக²து³க்க²காரணம். அத்தனா கதகம்மம் ஏவ ஸகம் யேஸம் தே கம்மஸ்ஸகா. பரஸத்தா ஏவ. தேஸம் பா⁴வோ. தஸ்ஸ அனுப்³ரூஹனந்தி விக்³க³ஹோ. ‘‘ஸீமஸம்பே⁴தோ³’’தி அத்தா ச பியபுக்³க³லோ ச மஜ்ஜ²த்தபுக்³க³லோ ச வேரிபுக்³க³லோ சாதி சதஸ்ஸோ ஸீமா. ஸம்பி⁴ந்த³னம் ஸம்பே⁴தோ³. ஸம்மிஸ்ஸனம் அனானத்தகரணந்தி அத்தோ². ஸீமானம் ஸம்பே⁴தோ³ ஸீமஸம்பே⁴தோ³. ஸப்³பா³ இத்தி²யோ, ஸப்³பே³புரிஸாதிஆதி³னா ஓதி⁴ஸோ பரிச்சே²த³தோ ப²ரணம் ஓதி⁴ஸோப²ரணம் நாம. ஸப்³பே³ஸத்தா, ஸப்³பே³பாணா, ஸப்³பே³பூ⁴தாதிஆதி³னா அனோதி⁴ஸோ அபரிச்சே²த³தோ ப²ரணம் அனோதி⁴ஸோப²ரணம் நாம. புரத்தி²மாயதி³ஸாய ஸப்³பே³ஸத்தா அவேராஹோந்தூதிஆதி³னா தி³ஸாவிபா⁴க³வஸேன ப²ரணம் தி³ஸாப²ரணம் நாம. ‘‘தம் ஸமங்கீ³னோ சா’’தி தாஹி அப்பமஞ்ஞாஹி ஸமங்கீ³னோ புக்³க³லா. ‘‘நிச்சம் ஸோம்மஹத³யபா⁴வேனா’’தி ஸப்³ப³காலம் ஸந்தஸீதல ஹத³யபா⁴வேன. ப்³ரஹ்மஸத்³தோ³ வா ஸேட்ட²பரியாயோ ‘ப்³ரஹ்மம் புஞ்ஞம் பஸவதீ’திஆதீ³ஸு விய. அஸிதப்³ப³ம் பு⁴ஞ்ஜிதப்³ப³ந்தி அஸிதம். பஞ்சபோ⁴ஜனம். பாதப்³ப³ந்தி பீதம். அட்ட²வித⁴ம் பானம். த³ந்தேன கா²யிதப்³ப³ம் கா²தி³தப்³ப³ந்தி கா²யிதம். பூவக்க²ஜ்ஜப²லக்க²ஜ்ஜாதி³கம் நானாகா²த³னீயம். அங்கு³லீஹிபி க³ஹேத்வா ஸாயிதப்³ப³ம் லேஹிதப்³ப³ந்தி ஸாயிதம். மது⁴ப்பா²ணிதாதி³கம் ஸாயனீயம். ஸரஸப்படிகூலதா நாம அத்தனோ ஸபா⁴வதோ படிகூலதா. சதுப்³பி³தோ⁴பி ஹி ஆஹாரோ பா⁴ஜனேஸு வா ஹத்த²முகா²தீ³ஸு வா யத்த² யத்த² ஸம்மக்கே²தி, லக்³க³தி, லிம்பதி. தம் உத³கேன தோ⁴விதப்³ப³ம் ஹோதி. அதோ⁴தம் பன தம்பி ஜேகு³ச்ச²னீயம் ஹோதி. ஆஸயதோ படிகூலதா நாம தஸ்ஸ அஜ்ஜோ²ஹரீயமானஸ்ஸ கண்டா²தீ³ஸு டி²தேஹி பித்தஸேம்ஹாதீ³ஹி ஆஸயேஹி ஸம்மிஸ்ஸனவஸேன படிகூலதா. நிதா⁴னதோ படிகூலதா நாம நிதா⁴னதோ படிகூலதா. ‘‘நிதா⁴னம்’’தி ச ஆமாஸயோ வுச்சதி. பக்கதோ படிகூலதா நாம தஸ்ஸ நிதா⁴னக³தஸ்ஸ பரிபக்ககாலே கூ³த²முத்தாதி³பா⁴வபத்திதோ படிகூலதா. அபக்கதோ படிகூலதா நாம தஸ்மிம் அபரிபக்கே அஜிண்ணே ஸதி ஸரீரே நானாரோகு³ப்பத்திவஸேன படிகூலதா. ப²லதோ படிகூலதா நாம தஸ்ஸ பரிபக்ககாலதோ பட்டா²ய ஸரீரே கேஸலோமாதீ³னம் படிகூலராஸீனம் வட்³ட⁴னவஸேன படிகூலதா. நிஸ்ஸந்த³தோ படிகூலதா நாம தஸ்ஸ ந வஹித்³வாரேஹி வா லோமகூபேஹிவா அஞ்ஞேஹி நானாவணமுகே²ஹி வா உக்³க⁴ரண பக்³க⁴ரணாதி³வஸேன படிகூலதா. ‘‘தத்தா²’’தி தஸ்மிம் சதுப்³பி³தே⁴ ஆஹாரே. ‘‘நிகந்திப்பஹானஸஞ்ஞா’’தி கந்தாரமக்³கே³ மாதாபிதூனம் கந்தாரனித்தரணத்தா²ய புத்த மம்ஸகா²த³னே விய அதி மனுஞ்ஞேபி ஆஹாரே ரஸதண்ஹா பஹானவஸேன பவத்தா ஸஞ்ஞா. ‘‘ஸலக்க²ணாதி³வஸேனா’’தி ஸலக்க²ணஸஸம்பா⁴ராதி³வஸேன. ‘‘ராகே³ன சரதீ’’தி ஏத்த² ‘‘ராகே³னா’’தி கரணத்தே², இத்த²ம்பூ⁴தலக்க²ணேவா கரண வசனம். தத்த² கரணத்தே²தாவ ‘‘ராகே³ன சரதீ’’தி சதூஸு இரியாபதே²ஸு யேபூ⁴ய்யேன ராக³சித்தேன சரதி. ராக³சித்தேன நிய்யமானோ விசரதீதி வுத்தம் ஹோதி. இத்த²ம்பூ⁴த லக்க²ணே பன ‘‘ராகே³ன சரதீ’’தி தேஸு ராக³கேது ராக³த⁴ஜோ ஹுத்வா விசரதீதி வுத்தம் ஹோதி. ‘‘அஸ்ஸா’’தி தஸ்ஸபுக்³க³லஸ்ஸ. ‘‘உஸ்ஸன்னோ’’தி உக்³க³தோ பாகடதரோ. ப³ஹுதரோதிபி வத³ந்தி. ‘‘பஹானாயா’’தி ஏத்த² இதிஸத்³தோ³ ஆதி³ அத்தோ². தேன கருணா பா⁴வேதப்³பா³ விஹிம்ஸாய பஹானாய. முதி³தா பா⁴வேதப்³பா³ அரதியா பஹானாயாதி இமம் பாளிஸேஸம் ஸங்க³ண்ஹாதி. ‘‘நிஸ்ஸரணதாவசனதோ’’தி நிஸ்ஸரணஞ்ஹேதம் ப்³யாபாத³ஸ்ஸ யதி³த³ம் மேத்தாசேதோ விமுத்தி. நிஸ்ஸரணஞ்ஹேதம் விஹேஸாயயதி³த³ம் கருணா சேதோவிமுத்தி. நிஸ்ஸரணஞ்ஹேதம் அரதியா யதி³த³ம் முதி³தா சேதோ விமுத்தீதி ஏவம் நிஸ்ஸரண பா⁴வவசனதோ ச. சதஸ்ஸோ அப்பமஞ்ஞாயோ. ல. தோ³ஸ சரிதஸ்ஸாதி வுத்தம். ‘‘தோ³ஸ வத்து²த்தாபா⁴வதோ சா’’தி தோ³ஸுப்பத்தியா வத்து² பா⁴வஸ்ஸகரண பா⁴வஸ்ஸ அபா⁴வதோ ச. நீலாதீ³னி சத்தாரி கஸிணானி தோ³ஸ சரிதஸ்ஸாதி வுத்தம். கஸ்மாபனேத்த² தோ³ஸ சரிதஸ்ஸ உபேக்கா² ஸப்பாயகாரணம் விஸும் ந வுத்தந்தி. அஞ்ஞகாரணத்தா ந வுத்தந்தி த³ஸ்ஸேந்தோ ‘‘ஏத்த² சா’’திஆதி³மாஹ. ‘‘திஸ்ஸோ’’தி திஸ்ஸோ அப்பமஞ்ஞாயோ. ‘‘மனாபியரூபானீ’’தி மனாபியவண்ணானி. விக்கி²த்தசித்தோ ச ஹோதீதி அதி⁴காரோ. ‘‘தஸ்ஸா’’தி பமாத³ ப³ஹுலஸ்ஸ விக்கி²த்தசித்தஸ்ஸ ச புக்³க³லஸ்ஸ. வுத்தம் ஸியா. விஸுத்³தி⁴ மக்³கே³ பன ஏவம் வுத்தம் நத்தீ²தி அதி⁴ப்பாயோ. விபா⁴வனிபாடே². ‘‘பு³த்³தி⁴விஸய பா⁴வேனா’’தி வுத்தம். யதி³ பு³த்³தி⁴விஸயத்தா மோஹசரிதஸ்ஸ ஸப்பாயம். பு³த்³தி⁴விஸயபூ⁴தானி மரண உபஸமஸஞ்ஞா வவத்தா²னானிபி மோஹசரிதஸ்ஸ ஸப்பாயானி ஸியுந்தி வுத்தம் ‘‘ஏவஞ்ஹிஸதீ’’திஆதி³ம். ‘‘பூ⁴தகஸிணானீ’’தி பத²வீகஸிணாதீ³னி மஹாபூ⁴தகஸிணானி. ‘‘தத்தா²பீ’’தி வா தேஸு சத்தாலீஸ கம்மட்டா²னேஸுபி. ஏவம்ஸதி வண்ணகஸிணானம் புது²லகு²த்³த³கதாபி ஏத்த² ஸங்க³ஹிதா ஹோதீதி. ‘‘மஹந்தம்’’தி வித³த்தி² சதுரங்கு³லதோ மஹந்தம். யதி³ ஏவஸத்³தோ³ யதா²ருதமேவ யுஜ்ஜேய்ய. ஏவம்ஸதி கு²த்³த³கம் விதக்கசரிதஸ்ஸேவ ஸப்பாயம், ந பு³த்³தி⁴சரிதாதீ³னந்தி ஏவமத்தோ²பி க³ண்ஹேய்ய. அத² பு³த்³தி⁴சரிதஸ்ஸ பன அஸப்பாயம் நாம நத்தீ²தி அட்ட²கதா²வசனேன விருஜ்ஜே²ய்யாதி இமினா அதி⁴ப்பாயேன ‘‘கு²த்³த³கந்தி பதே³யுஜ்ஜதீ’’தி வுத்தம். அத²வா, புது²லம் மோஹசரிதஸ்ஸ, கு²த்³த³கம் விதக்கசரிதஸ்ஸேவ, நமோஹசரிதஸ்ஸாதி அத்தே² ஸதி, பு³த்³தி⁴சரிதாதீ³னம் பன புது²லம்பி கு²த்³த³கம்பி அனுஞ்ஞாதம் ஹோதீதி த³ட்ட²ப்³ப³ம். ‘‘ஸப்³ப³ஞ்சேதம்’’தி ஸப்³ப³ஞ்ச ஏதம்சரிதவிபா⁴க³வசனம். உஜுவிபச்சனீகவஸேன தீஸு அகுஸல சரிதேஸு புக்³க³லேஸு. விதக்க சரிதே ச அதிஸப்பாயதாய ஸத்³தா⁴பு³த்³தி⁴ சரிதேஸூதி அதி⁴ப்பாயோ. தேனாஹ ‘‘ராகா³தீ³னம் பன அவிக்க²ம்பி⁴கா’’திஆதி³ம்.

‘‘பு³த்³த⁴த⁴ம்ம. ல. கு³ணானம்’’தி ஏத்த² கு³ணஸத்³தோ³ புப்³ப³பதே³ஸு யோஜேதப்³போ³ பு³த்³த⁴கு³ணானஞ்ச த⁴ம்மகு³ணானஞ்சாதிஆதி³னா. ‘‘தத்தா²’’தி தஸ்மிம் கு³ணபதே³. ந தப்பேதீதி அதப்பனீயோ. தப்பனம் ஸந்துட்டி²ம் ந ஜனேதீதி அத்தோ². ஸம்வேஜனம் ஸம்வேக³ம் ஜனேதீதி ஸம்வேஜனியோ. ‘‘த⁴ம்மோ’’தி ஸபா⁴வோ. ஸம்வேஜனியோ த⁴ம்மோ யஸ்ஸாதி ஸம்வேஜனிய த⁴ம்மம். மரணம். ‘‘பஞ்சமஜ்ஜா²னஸமாதி⁴ஸ்ஸா’’தி ரூபாவசர பஞ்சமஜ்ஜா²ன ஸமாதி⁴ஸ்ஸ. ‘‘உத³யமத்தானீ’’தி வட்³டி⁴தமத்தானி. ‘‘தத்தா²’’தி படிகூலாரம்மணேஸு. ‘‘புப்³ப³ச்ச²ட்டகஸ்ஸா’’தி புராணச்ச²ட்டகஸ்ஸ. கூ³த²முத்தவிஸ்ஸஜ்ஜன கஸ்ஸாதி வுத்தம் ஹோதி. தேனாஹ ‘‘கூ³த²ராஸி த³ஸ்ஸனே வியா’’தி. ந தே கதா³சி ஸோமனஸ்ஸேன வினா அப்பனம் பாபுணந்தி. ப்³யாபாத³விஹிம்ஸா அரதீனம் தூ³ரிபா⁴வேன ஸோமனஸ்ஸுப்பத்தியா அதிஸுகரத்தா பஞ்சமஜ்ஜா²னே விய ஸுக²ஸோமனஸ்ஸானஞ்ச அவிக்க²ம்ப⁴னதோ. ‘‘உதா³ஸினபக்கே²’’தி அஜ்ஜு²பேக்க²னபக்கே². ‘‘த³ள்ஹம்’’தி பு⁴ஸம். ‘‘விபூ⁴தம்’’தி பாகடம். நிமித்தம் த³ள்ஹவிபூ⁴தம் கத்வா க³ஹணம் த³ள்ஹ விபூ⁴தக்³க³ஹணம். ‘‘கஸ்ஸசி ஆரம்மணஸ்ஸா’’தி பு³த்³த⁴கு³ணாதி³ ஆரம்மணஸ்ஸ. ‘‘படிபா⁴க³னிமித்தம்’’தி ஏத்த² படிபா⁴க³ஸத்³தோ³ தஸ்ஸ தி³ஸே பவத்தோதி ஆஹ ‘‘தாதி³ஸே’’திஆதி³ம். ‘‘தம்ஸண்டா²னே’’தி ஏதேன பத²விமண்ட³லாதீ³ஸு விய ஸண்டா²னாகாரேன டி²தேஸு ஸபா⁴வ த⁴ம்ம புஞ்ஜேஸு ஏவ தஸ்ஸதி³ஸம் படிபா⁴க³னிமித்தம் நாம ஸிஜ்ஜ²தீதி த³ஸ்ஸேதி. ‘‘ஏவ’’ந்தி ஸமத²ஸங்க³ஹே தாவ த³ஸகஸிணானி, த³ஸஅஸுபா⁴திஆதி³னா வுத்தேன வசனக்கமேன. ‘‘உக்³க³ஹகோஸல்லம்’’தி பா⁴வனாகம்மம் ஆரபி⁴துகாமேன பி⁴க்கு²னா ஆசரியஸ்ஸ ஸந்திகே ஸப்³ப³ஸ்ஸ கம்மட்டா²ன விதா⁴னஸ்ஸ உக்³க³ஹணம் உக்³க³ஹோ. தஸ்மிம் கோஸல்லம் உக்³க³ஹகோஸல்லம். அபிசேத்த². ஸப்³ப³ம் உக்³க³ஹிதும் அஸக்கோந்தேன யம் அத்தனா ஆரபி⁴ஸ்ஸதி. தஸ்ஸ ஏகஸ்ஸ விதா⁴னம் பரிபுண்ணம் உக்³க³ஹேதப்³ப³ம். ‘‘உக்³க³ண்ஹந்தஸ்ஸா’’தி ஏத்த² உகாரோ உபரி அத்தோ². ‘‘க³ஹணம்’’தி ச யதா² சித்தே அவினஸ்ஸமானம் ஹுத்வா லப்³ப⁴தி, ததா² கத்வா சித்தேன க³ஹணந்தி த³ஸ்ஸேதும் ‘‘உபரூபரீ’’திஆதி³ வுத்தம். ‘‘ஸமனுபஸ்ஸந்தஸ்ஸா’’தி ஸம்மா புனப்புனம் சக்கு²னா த³ஸ்ஸனஸதி³ஸம் கரோந்தஸ்ஸ. பரிதோ ஸமந்ததோ கரணம் பரிகம்மம். தஸ்மிம் நிமித்தக்³க³ஹணகம்மே யம் யம் கத்தப்³ப³விதா⁴னம் அத்தி², தம் தம் பரிபுண்ணம் கத்வா க³ஹணந்தி வுத்தம் ஹோதி. பா⁴வனாதி வட்³ட⁴னாதி இமமத்த²ம் த³ஸ்ஸேந்தோ ‘‘புனப்புன’’ந்திஆதி³மாஹ. ‘‘நிரந்தரம் பத³ஹந்தஸ்ஸா’’தி ரத்திதி³வம் நிரந்தரம் ஆரப⁴ந்தஸ்ஸ. உக்³க³ஹ நிமித்தே ஸண்டா²னம் க³ண்ஹந்தோபி வண்ணரூபாதி³னா ஸபா⁴வ த⁴ம்மேன ஸஹேவ க³ண்ஹாதி. படிபா⁴க³னிமித்தே பன ஸபா⁴வத⁴ம்மம் முஞ்சித்வா தஸ்ஸ தி³ஸம் நிமித்த பஞ்ஞத்தி ஸங்கா²தம் ஸுத்³த⁴ஸண்டா²னமேவ க³ண்ஹாதி. ஏத்த² ஸியா, படிபா⁴க³னிமித்தேபி வண்ணோ நாம ஸந்தி³ஸ்ஸதி யேவாதி. ஸச்சம். ஸோ பன படிபா⁴க³மத்தம் ஹோதி. ந ஏகந்தவண்ணோ. தேனாஹ ‘‘தப்படிபா⁴க³ம் வத்து² த⁴ம்மவிமுச்சிதம்’’தி. ‘‘ஸன்னிஸின்னம்’’தி அசலம். ‘‘பவேஸிதம்’’தி பா⁴வனாசித்தஸ்ஸ அப்³ப⁴ந்தரே பக்கி²த்தம் விய ஹோதீதி அதி⁴ப்பாயோ. ஓபா⁴ஸதீதி ஓபா⁴ஸோ. ஓபா⁴ஸோ ஹுத்வா ஜாதந்தி ஓபா⁴ஸஜாதம். ஓபா⁴ஸனம் வா ஓபா⁴ஸோ. ஜாதோ ஓபா⁴ஸோ அஸ்ஸாதி ஓபா⁴ஸஜாதம். ‘‘பாதேந்தீ’’தி படிபாதேந்தி. புன உப்பஜ்ஜனவஸேன உட்டா²தும் ந தே³ந்தி. ‘‘ஏதாயா’’தி கத்து அத்தே² கரணவசனம். ‘‘நிமித்தரக்க²ணவிதா⁴னம்’’தி ஸமுப்பன்னஸ்ஸ நிமித்தஸ்ஸ அனஸ்ஸனத்தா²ய ஸத்தவிதே⁴ஹி பலிபோ³த⁴ த⁴ம்மேஹி ரக்க²ணத்த²ம். கதமே பன தேஸத்தவிதா⁴ பலிபோ³த⁴த⁴ம்மா நாமாதி. இத⁴ அம்ஹேஹி வத்தப்³ப³ம் நத்தி². விஸுத்³தி⁴ மக்³கே³ ஏவ தே வுத்தாதி த³ஸ்ஸேதும் கா³த²மாஹ. ‘‘ஆவாஸோ’’தி அஸப்பாயாவாஸோ. ‘‘கோ³சரோ’’தி அஸப்பாயகோ³சரகா³மோ. ‘‘ப⁴ஸ்ஸம்’’தி அஸப்பாயவசனம். ஏவம் புக்³க³லாதீ³ஸு. ‘‘ஸேவேதா²’’தி ஸேவேய்ய. ‘‘ஏவஞ்ஹிபடிபஜ்ஜதோ’’தி ஏவம்ஹிவஜ்ஜிதப்³பே³ வஜ்ஜனவஸேன ஸேவிதப்³பே³ ஸேவனவஸேன படிபஜ்ஜந்தஸ்ஸ. ‘‘காமதண்ஹாய விஸயபா⁴வம் அதிக்கமித்வா’’தி ஏதேன காமபூ⁴மி காமப⁴வஸமதிக்கமோ, ரூபபூ⁴மிரூபப⁴வ ஓக்கமோ ச வுத்தோ. வஸனம் வஸீ. ஸத்தி. ஸாமத்தி²யந்தி அத்தோ². வஸிம் பூ⁴தம் பத்தந்தி வஸிபூ⁴தம். வஸீ ஏவ வஸிதா. யதா² பாரமிதாதி. ‘‘ததோ விசாரந்தி’’ ஏத்த² இதிஸத்³தோ³ ஆதி³அத்தோ². தேன ததோ பீதிம்திஆதி³ம் ஸங்க³ண்ஹாதி. இச்ச²ந்தானம் தேஸம் ஸப்³ப³ஞ்ஞுபு³த்³தா⁴னம். ‘‘யத்தா²’’தி யேஸுத்³வீஸுப⁴வங்கே³ஸு. ‘‘ப⁴வங்க³சாரே’’தி ப⁴வங்க³ப்பவத்தியம். ‘‘த³ந்தா⁴யிதத்தம்’’தி த³ந்த⁴ம் ஹுத்வா அயதி பவத்ததீதி த³ந்தா⁴யிதம். தஸ்ஸ பா⁴வோ த³ந்தா⁴யிதத்தம். ‘‘ட²பேதும்’’தி அதி⁴ட்டா²னம் கத்வா ட²பேதும். ததோ அனதிக்கமிதும். ‘‘யத்தி²ச்ச²கம்’’திஆதீ³னி க்ரியாவிஸேஸனபதா³னி. ‘‘யத்தி²ச்ச²கம்’’தி யத்த² யத்த² டா²னே இச்சா²னு ரூபம். யதி³ச்ச²கந்தியஸ்மிம் யஸ்மிம் க²ணே இச்சா²னு ரூபம். ‘‘யாவதிச்ச²கம்’’தி யத்தகேன பமாணேன இச்சா²னு ரூபம். ‘‘விதக்காதி³கம் ஓளாரிகங்க³ம் பஹானாயா’’தி ஏத்த² கஸ்ஸ ப³லேன பஹானம் ஹோதி. தம் தம் விராக³ பா⁴வனா ப³லேன பஹானம் ஹோதி. காச தம் தம் விராக³பா⁴வனா நாம ஹோதி. அஜ்ஜா²ஸய விஸேஸ பரிக்³க³ஹிதா உபசாரபா⁴வனா ஏவாதி இமமத்த²ம் த³ஸ்ஸேதும் ‘‘பத²மஜ்ஜா²னம் தாவா’’திஆதி³ வுத்தம். ‘‘ஆதாபவீரியம்’’தி யேனவீரியேன யோகி³னோ அத்தானம் வா கிலேஸ த⁴ம்மே வா ஆதாபேந்தி பரிதாபேந்தி. தம் ஆதாபவீரியம் நாம. உக்³கா⁴டீயமானம்பி ஆகாஸமேவ ஹோதி. தம் ஆரப்³ப⁴ உபரிஜா²னந்தருப்பத்தியா பா⁴வனம் கரோந்தஸ்ஸபி புனப்புனம் தமேவ பஞ்சமஜ்ஜா²னம் உப்பஜ்ஜதி. ஆரம்மணே ச அனதிக்கந்தே ஜா²னம்பி அனதிக்கந்தமேவ ஹோதீதி. ‘‘தத்தா²’’தி தஸ்மிம் ஆகாஸகஸிணே. ‘‘தத³திக்கமனஸம்ப⁴வோ’’தி கஸிண நிமித்தாதிக்கமனஸம்ப⁴வோ. ‘‘யதா²தி³ட்டே²’’தி ஜா²னசக்கு²னா தி³ட்ட²ப்பகாரே. ‘‘ஸம்பா⁴வேத்வா’’தி தோ²மேத்வா. ஸம்மா அனுஸ்ஸரணம் ஸமனுஸ்ஸரணம். ‘‘இதரேஸம்பி வா’’தி புது²ஜ்ஜன பண்டி³தானம்பி வா. மரண ஸஞ்ஞா வவத்தா²னேஸு பரிகம்மஞ்ச ஸமாதி⁴யதி, உபசாரோ ச ஸம்பஜ்ஜதீதி யோஜனா திக்க²பஞ்ஞானம் பன புது²ஜ்ஜனானம்பி ஸதம் பு³த்³த⁴கு³ணாதீ³ஸுபி உபசார ஸம்ப⁴வோ அட்ட²கதா²யம் வுத்தோயேவ. ‘‘ஸமத²ஜ்ஜா²னேஸூ’’தி இத³ம் அதி⁴காரவஸேன வுத்தம். விபஸ்ஸனா கம்மம்பி க³ஹேதப்³ப³மேவாதி த³ட்ட²ப்³ப³ம். புப்³பே³தா³னம் த³த்வா இமினா புஞ்ஞேன ஆயதிம் ஜா²னாபி⁴ஞ்ஞாயோ வா மக்³க³ப²லானி வா படிலபி⁴ஸ்ஸாமீதி பத்த²னம் கத்வா ஆக³தோபி கதாதி⁴காரோ ஏவாதிபி வத³ந்தி. கதமோ பன கதாதி⁴காரோ நாமாதி ஆஹ ‘‘ஆஸன்னப⁴வே’’திஆதி³ம். அட்ட²விதே⁴ஸு சதுக்கனயவஸேன, நவவிதே⁴ஸு பஞ்சகனயவஸேன வுத்தோதி தேஸம் வாதீ³னம் ஸாத⁴கவசனம். விசாரேத்வா பன க³ஹேதப்³ப³ம். ஆகாஸ கஸிணேன வினா அரூபஜ்ஜா²னானி லபி⁴த்வா புன அபி⁴ஞ்ஞத்தா²ய பரிகம்மேகதே ஆகாஸகஸிணேபி கத்தப்³ப³த்தா தஸ்ஸ அபி⁴ஞ்ஞாபாத³கதா ஸம்ப⁴வோ வுத்தோதி அத்த²ஸ்ஸ ஸம்ப⁴வதோ. புப்³பே³ அபா⁴வித பா⁴வனோதி ச அகதாதி⁴காரோதி ச அத்த²தோ ஏகம். ‘‘ஆதி³கம்மிகோ’’தி அபி⁴ஞ்ஞாகம்மே ஆதி³கம்மிகோ. ‘‘தாதி³ஸானம்’’தி புப்³பே³ அகதாதி⁴காரானம் அபா⁴விதபா⁴வனானம் இதா³னி இத்³தி⁴விகுப்³ப³னம் கரிஸ்ஸாமீதி ஆரப⁴ந்தானம் அபி⁴ஞ்ஞாகம்மே ஆதி³கம்மிககுலபுத்தானந்தி ஸம்ப³ந்தோ⁴. ‘‘இத்³தி⁴விகுப்³ப³னம்’’தி ச உபலக்க²ணவசனம். தி³ப்³பா³ய ஸோததா⁴துயா ஸத்³த³ம் ஸவனம் கரிஸ்ஸாமீதிஆதி³கம்பி க³ஹேதப்³ப³ம். இத³ஞ்ச ஆதி³கம்மிகவிதா⁴னாதி⁴காரத்தா வுத்தம். அபி⁴ஞ்ஞாஸு வஸிபத்தானம்பி தம் பஞ்சமஜ்ஜா²னம் ச²ஸுஆரம்மணேஸு யதா²ரஹம் அப்பேதியேவ. ‘‘அதி⁴ட்டா²தப்³ப³ம்’’தி யதி²ச்சி²த நிப்ப²த்தத்தா²ய ஸதம் ஹோது ஸஹஸ்ஸம் ஹோதூதிஆதி³னா சித்தேன அபி⁴விதா⁴தப்³ப³ம். அபி⁴னீஹரிதப்³ப³ந்தி வுத்தம் ஹோதி. ‘‘ஸதம் ஹோமி, ஸஹஸ்ஸம் ஹோமீதி வா’’தி அத்தானம் ஸதம் வா ஸஹஸ்ஸம் வா நிம்மினனவஸேன வுத்தம். ஸேஸம் பன அஞ்ஞதா²னிம்மினனவஸேன. ஸோதும் வா ஸத்³த³ம், பஸ்ஸிதும் வா ரூபம், ஜானிதும் வா பரசித்தம். அனுஸ்ஸரிதும் வா புப்³பே³னிவுத்த²ம். அட்ட²கதா²பாடே². ‘‘அதி⁴ட்டா²தீ’’தி அபி⁴ஞ்ஞாய அதி⁴ட்டா²தி. அபி⁴விதா⁴தி நிப்³ப³த்தேதீதி வுத்தம் ஹோதி. து³வித⁴ம்ஹி அதி⁴ட்டா²னம் பரிகம்மேன அதி⁴ட்டா²னம் அபி⁴ஞ்ஞாய அதி⁴ட்டா²னந்தி. இத⁴ பன அபி⁴ஞ்ஞாய அதி⁴ட்டா²னம் வுத்தம். ‘‘அதி⁴ட்டா²ன சித்தேனா’’தி அபி⁴ஞ்ஞாசித்தேனாதி வுத்தம் ஹோதி. ‘‘பரிகம்மசித்தஸ்ஸா’’தி புப்³ப³பா⁴கே³ ஆவஜ்ஜன பரிகம்ம அதி⁴ட்டா²னபரிகம்மசித்தஸ்ஸ. பச்சி²மம் பன பாத³கஜ்ஜா²ன ஸமாபஜ்ஜனம். பரிகம்மசித்தஸ்ஸ ஸமாதா⁴னத்தா²யாதி வுத்தம். பரிகம்மசித்தே ஸமாஹிதே கிம் பயோஜனந்தி ஆஹ ‘‘ததா²ஹீ’’திஆதி³ம். ‘‘ஸேஸாபி⁴ஞ்ஞாஸுபி யதா²ரஹம் வத்தப்³போ³’’தி தி³ப்³ப³ஸோதபரிகம்மே தேனேவபரிகம்ம ஸமாதி⁴ஞ்ஞாணஸோதேன ஆஸன்னே தி³ப்³ப³விஸயம்பி ஸத்³த³ம் ஸுணாதீதிஆதி³னா வத்தப்³போ³. ‘‘இதி கத்வா’’தி இதி மனஸிகத்வா. ‘‘தம்’’தி பச்சி²மம் பாத³கஜ்ஜா²ன ஸமாபஜ்ஜனம். ‘‘இத⁴ நக³ஹிதந்தி த³ட்ட²ப்³ப³ம்’’தி தே²ரஸ்ஸ மதேன த³ட்ட²ப்³ப³ந்தி அதி⁴ப்பாயோ. இத⁴ பன ஆதி³கம்மிகவிதா⁴னப்பதா⁴னத்தா பச்சி²மம்பி பாத³கஜ்ஜா²ன ஸமாபஜ்ஜனம் வத்தப்³ப³மேவாதி. ‘‘காயக³திகம் அதி⁴ட்ட²ஹித்வா’’தி அயம் காயோ விய இத³ம் சித்தம்பி த³ந்த⁴க³மனம் ஹோதூதி ஏவம் சித்தம் காயக³திகம் கரணேன அதி⁴ட்ட²ஹித்வா. ‘‘தி³ஸ்ஸமானேன காயேனா’’தி த³ந்த⁴க³மனேன க³ச்ச²ந்தத்தா ப³ஹுஜனானம்பி தி³ஸ்ஸமானேன ரூபகாயேன. தப்³பி³ பரீதேன ஸீக⁴க³மனம் வேதி³தப்³ப³ம். ‘‘ஆரம்மணமத்தம் ஹோதீ’’தி அனிப்ப²ன்னரூபம் ஸந்தா⁴ய வுத்தம். ‘‘ஆரம்மண புரேஜாதம்’’தி நிப்ப²ன்னரூபம். இதரம் பன ஹத³ய வத்து²ரூபம் ஸந்தா⁴ய வுத்தந்தி த³ட்ட²ப்³ப³ம். பரசித்த விஜானனட்டா²னே அட்ட²கதா²டீகாசரியானம் விசாரணா அத்தீ²தி தம் த³ஸ்ஸேதும் ‘‘ஏத்த² ச அட்ட²கதா²யம் தாவா’’திஆதி³ வுத்தம். ‘‘அட்ட²கதா²யம்’’தி த⁴ம்மஸங்க³ணி அட்ட²கதா²யம்பி விஸுத்³தி⁴மக்³க³ அட்ட²கதா²யம்பி. ‘‘க²ணிகவஸேனா’’தி க²ணிகபச்சுப்பன்னவஸேன. ஆவஜ்ஜனே நிருத்³தே⁴தி ஸம்ப³ந்தோ⁴. ‘‘ஏகம் சித்தம்’’தி பரஸ்ஸ சித்தம். ததே³வ அதீதம் சித்தம் க³ண்ஹந்தி. ‘‘தானீ’’தி ஜவனானி. ‘‘தேஸம்’’தி ஜவனானம். ‘‘தேனா’’தி ஆவஜ்ஜனேன. ‘‘இதரதா²’’தி அஞ்ஞதா² ஸந்ததி அத்³தா⁴வஸேன வுத்தந்தி க³ஹிதே ஸதி. வுத்தோ ஸியா. கஸ்மா, ஸந்ததி அத்³தா⁴வஸேன பச்சுப்பன்னே க³ஹிதே ஸதி, ஸப்³பா³ய ஏகஜவனவீதி²யா ஏகபச்சுப்பன்னத்தா. ‘‘ஸப்³பா³னி சித்தானீ’’தி ஜவனசித்தானி. ‘‘ஸஹுப்பன்னானீ’’தி இத³ம் ஸஹுப்பன்னானம்பி அத்தி²தாய வுத்தம். ஆவஜ்ஜனாதீ³னி பன க²ணபே⁴த³ம் நக³ண்ஹந்தி. ஸப்³ப³ம் பரஸ்ஸ சித்தம் ஏகசித்தமிவ க³ண்ஹந்தி. தஸ்மா காலபே⁴தோ³பி நத்தீ²தி த³ட்ட²ப்³ப³ம். ‘‘நிப்³பா³னஞ்சா’’தி வுத்தம், கத²ம் நிப்³பா³னம் புப்³பே³னிவுத்த²ம் நாம ஸியாதி. அதீதே பரினிப்³பு³தானம் மக்³க³ப²லானி அனுஸ்ஸரணகாலே தேஸம் ஆரம்மணபூ⁴தம் நிப்³பா³னம்பி அனுஸ்ஸரதியேவ. தத்த² தேஸம் மக்³க³ப²லானம் அதீதத்தா நிப்³பா³னம்பி புப்³பே³னிவுத்த²ம் நாம ஹோதீதி.

‘‘யம் யம் அதி⁴ட்டா²தீ’’தி யம் யம் ஸதாதி³கம் ஸம்விதா⁴தி. ‘‘யதா² யதா² அதி⁴ட்டா²தீ’’தி யேன யேன ஆவிபா⁴வாதி³கேன பகாரேன ஸம்விதா⁴தி. ‘‘பகதிவண்ணம்’’தி பகதிஸண்டா²னம். ‘‘தஸ்ஸேவா’’தி பகதிவண்ணஸ்ஸேவ. தே³வானம் பஸாத³ஸோதந்தி ஸம்ப³ந்தோ⁴. ‘‘ஆரம்மண ஸம்படிச்ச²ன ஸமத்த²ம்’’தி ஆரம்மணஸ்ஸ உபட்டா²னம் ஸம்படிச்ச²ன ஸமத்த²ம். ததே³வ சேதோபரியஞாணந்திபி வுச்சதீதி ஸம்ப³ந்தோ⁴. ‘‘சேதோ’’தி சித்தம். ‘‘பரிச்சி²ஜ்ஜா’’தி இத³ம் ஸராக³சித்தம், இத³ம் விராக³சித்தந்திஆதி³னா பரிச்சி²ந்தி³த்வா. ‘‘கோ³சர நிவாஸவஸேனா’’தி கோ³சரம் கத்வா நிவஸனவஸேன. ஸப்³ப³ஞ்ஞுதஞ்ஞாணக³திகம் ஸப்³ப³ஞ்ஞுபு³த்³தா⁴னம் அனாக³தம் ஸஞ்ஞாணந்தி அதி⁴ப்பாயோ. அனாக³தே ஸத்ததி³வஸதோ ஓரிமா சித்தசேதஸிக த⁴ம்மா சேதோபரியஞ்ஞாணஸ்ஸ விஸயோதி கத்வா அனாக³தே ஸத்ததி³வஸதோதி வுத்தம். பட்டா²ய பவத்தமானாதி பாட²ஸேஸோ. இமஸ்மிம் தி³வஸே ச அனாக³தபக்கே² ஸப்³ப³ம்பி ஆரம்மணம் பகதிஞாணஸ்ஸ விஸயோதி கத்வா ‘‘து³தீயதி³வஸதோ பட்டா²யா’’தி வுத்தம். ‘‘ஏதம்’’தி ஏதம் அனாக³தம் ஸஞ்ஞாணம். ‘‘யதா² சேதம்’’தி யதா² ச ஏதம் இமஸ்மிம் ப⁴வே அனாக³த த⁴ம்மே ஜானாதி. ‘‘அஸாதா⁴ரணகாலவஸேனா’’தி அஞ்ஞேனஞாணேன அஸாதா⁴ரண காலவஸேன. பச்சுப்பன்னப⁴வோஹி அஞ்ஞஞ்ஞாணஸாதா⁴ரணோதி.

ஸமத²கம்மட்டா²னானுதீ³பனா நிட்டி²தா.

171. விபஸ்ஸனாகம்மட்டா²னே. ‘‘யதா²தி³ட்ட²ம்’’தி ஸக்காயதி³ட்டி²யா யதா²தி³ட்ட²ம். நிச்சனிமித்தம் நாம ஸத்தபுக்³க³லாதி³னிமித்தமேவ. ஸத்தனிமித்தஞ்ஹி பஞ்ஞத்தி த⁴ம்மத்தா க²ணேக²ணே க²யவயபே⁴தா³பா⁴வதோ ஸோ ஏவக³ச்ச²தி ஸோ ஏவ திட்ட²தீதிஆதி³னா நிச்சாகாரஸண்டி²தம் ஹோதீதி. ‘‘து⁴வனிமித்தம்’’தி தி²ரனிமித்தம். இத³ம்பி ஸோ க³ச்ச²ந்தோபி நனஸ்ஸதி, திட்ட²ந்தோபி நனஸ்ஸதீதிஆதி³னா தி²ராகாரஸண்டி²தம் ஸத்தனிமித்தமேவ. ‘‘ஸுக²னிமித்தம்’’தி க²ணேக²ணே க²யவயபே⁴த³ து³க்கா²னம் அபா⁴வதோ ஸுகி²தோ நித்³து³க்கோ² நிப்³ப⁴யோதிஆதி³னா ஸுகா²காரஸண்டி²தம் ஸத்தனிமித்தமேவ. ‘‘அத்தனிமித்தம்’’தி க³ந்தும் இச்ச²ந்தோ க³ச்ச²தி, டா²தும் இச்ச²ந்தோ திட்ட²தீதிஆதி³னா வஸவத்தனாகார ஸண்டி²தம் ஸத்தனிமித்தமேவ. ‘‘கிரியா’’தி பா⁴வனாகிரியா.

விஸுஜ்ஜ²தீதி விஸுத்³தி⁴. விஸோதே⁴தீதி வா விஸுத்³தி⁴. ஸீலமேவ விஸுத்³தி⁴ ஸீலவிஸுத்³தீ⁴தி இமமத்த²ம் த³ஸ்ஸேந்தோ ‘‘நிச்சஸீலமேவா’’திஆதி³மாஹ. தத்த² நிச்சஸீலமேவ உபரிஜா²னாதி³விஸேஸானம் அதி⁴ட்டா²ன கிச்சஸாத⁴கத்தா இத⁴ அதி⁴ப்பேதந்தி வுத்தம் ‘‘நிச்சஸீலமேவா’’தி. ஸமாதி⁴ அதி⁴ப்பேதோ. வக்க²திஹி ‘‘து³விதோ⁴பி ஸமாதி⁴ சித்தவிஸுத்³தி⁴ நாமா’’தி. ஏதேன விஸுஜ்ஜ²தி ஏதாயாதி விஸுத்³தி⁴. சித்தஸ்ஸ விஸுத்³தி⁴ சித்தவிஸுத்³தி⁴. ஸமாதி⁴ ஏவாதிபி தீ³பேதி. விஸுஜ்ஜ²னம் வா விஸுத்³தி⁴. சித்தஸ்ஸ விஸுத்³தி⁴ சித்தவிஸுத்³தி⁴. அத்த²தோபன விஸுத்³த⁴சித்தமேவ வுச்சதீதிபி யுஜ்ஜதி. விஸுத்³தி⁴ஸத்³த³ ஸம்பன்னே ஹி ஸதி, சித்தவிஸுத்³தி⁴ இச்சேவ வுச்சதி. ந ஸமாதி⁴விஸுத்³தீ⁴தி. ‘‘ஸோளஸவித⁴ம் கங்க²ம்’’தி அஹோஸிம் நு கோ² அஹ மதீதமத்³தா⁴னந்திஆதி³னா ஸுத்தந்தேஆக³தம் ஸோளஸவித⁴ம் விசிகிச்ச²ம். ‘‘அட்ட²வித⁴ம் வா கங்க²ம்’’தி ஸத்த²ரிகங்க²தீதிஆதி³னா அபி⁴த⁴ம்மே ஆக³தம் அட்ட²வித⁴ம் விசிகிச்ச²ம். விஸமஹேதுதி³ட்டி² நாம ஸத்தானம் உப்பத்தியா அகாரணமேவ காரணம் கத்வா க³ஹணதி³ட்டி². ‘‘மனஸிகாரவிதீ⁴’’தி அனிச்சலக்க²ணாதீ³ஸு மனஸிகாரவிதி⁴. அனுபாயபூ⁴தோ மனஸிகாரோ நாம நிச்சாதி³வஸேன மனஸிகாரோ. அதி⁴மானவத்து² நாம ஓபா⁴ஸாதீ³னி. ‘‘மக்³க³தோ’’தி மக்³க³பா⁴வேன. ‘‘அமக்³க³தோ’’தி அமக்³க³பா⁴வேன. ‘‘த³ஸ்ஸனஞ்சா’’தி தேஸம்அதி⁴மானவத்தூ²னம் அனிச்சதாதி³த³ஸ்ஸனஞ்ச. தமேவ விஸுத்³தி⁴னாமாதி ஸம்ப³ந்தோ⁴. ‘‘ஸம்மோஹமலதோ’’தி சதுஸச்சப்படிச்சா²த³க ஸம்மோஹமலதோ. நனு த³ஸ்ஸனந்தி ஞாணமேவ. ஏவம்ஸதி, ஞாணந்தி வுத்தே ஸித்³தே⁴ கத்வா த³ஸ்ஸனஸத்³தே³ன ஸஹ ஞாணத³ஸ்ஸனந்தி வுத்தந்தி ஆஹ ‘‘ஏத்த²சா’’திஆதி³ம். ‘‘ஸுதமயாதி³வஸேனா’’தி ஸுதமய சிந்தாமயவஸேன. தத்த² யதா²ஸுதஸ்ஸ பாளித⁴ம்மஸ்ஸ அத்த²மத்தஜானனம் ஸுதமயஞ்ஞாணம் நாம. அத்த²ம் ஞத்வா அத்தா²னுரூபஸ்ஸ ஸபா⁴வலக்க²ணஸ்ஸ சிந்தனாவஸேன உப்பன்னம் ஞாணம் சிந்தாமயஞ்ஞாணம் நாம. ‘‘அனுமானாதி³ஞாணம்பீ’’தி நாமரூப த⁴ம்மேஸு ஸபா⁴வானுமானஞ்ஞாண ஸபா⁴வஜானனஞ்ஞாணம்பி. ‘‘அத்தபச்சக்க²ஞ்ஞாணமேவா’’தி அத்தனா பச்சக்க²கரணஞ்ஞாணமேவ. ‘‘ஸப்³ப³த்தா²’’தி மக்³கா³மக்³க³ஞ்ஞாணத³ஸ்ஸனாதீ³ஸு ஸப்³பே³ஸு டா²னேஸு. ஏத்த² ச த³ஸஸு விபஸ்ஸனாஞாணேஸுபி விபஸ்ஸனா வசனேன பச்சக்க²த³ஸ்ஸனமேவ அதி⁴ப்பேதந்தி கத்வா ஸப்³ப³த்த²க்³க³ஹணம் கதந்தி த³ட்ட²ப்³ப³ம். ஸம்மஸனஞ்ஞாணதோ பட்டா²ய ஹி த³ஸ்ஸனமேவ அதி⁴ப்பேதம். ந ஸபா⁴வஜானனமத்தம். யதோ சக்கு²னா பஸ்ஸந்தஸ்ஸேவ ஸுட்டு² பச்சக்க²தோ த³ஸ்ஸனத்தா²ய புனப்புனம் பா⁴வனா கம்மம் நாம தத்த² இச்சி²தப்³ப³ம் ஹோதி.

‘‘த⁴ம்மா’’தி ஸங்க²த த⁴ம்மா. அனிச்சதா ஏவ லக்க²ணந்தி அனிச்சலக்க²ணம். அனிச்சானம் வா ஸங்க²த த⁴ம்மானம் லக்க²ணந்தி அனிச்சலக்க²ணந்திபி யுஜ்ஜதி. ‘‘அபி⁴ண்ஹஸம்படிப்பீளனாகாரோ’’தி யதா² ஸீக⁴ஸோதாயம் நதி³யம் நாவாய உத்³த⁴ம் க³ச்ச²ந்தம் ஸானாவா அபி⁴ஸங்க²ரணது³க்கே²ன அபி⁴ண்ஹம் ஸுட்டு² படிப்பீளேதி. கஸ்மா, அஸதி அபி⁴ஸங்கா²ரே தங்க²ணே ஏவ அதோ⁴வுய்ஹனதோ. அதோ⁴வுய்ஹனஞ்ஹி நாவாய பகதி கிச்சம். உத்³த⁴ம் ஆரூஹனம் அபி⁴ஸங்கா²ர ஸித்³த⁴ம். ஏவமேவம் ஸீக⁴ஸோதே ஸம்ஸாரே அத்தபா⁴வேன உத்³த⁴ம் க²ணதோ க²ணம் தி³வஸதோ தி³வஸம் க³ச்ச²ந்தம் புக்³க³லம் அயம் அத்தபா⁴வோ அபி⁴ஸங்க²ரண து³க்கே²ன அபி⁴ண்ஹம் ஸுட்டு² படிப்பீளேதி. கஸ்மா, அஸதி அபி⁴ஸங்கா²ரே, பச்சயவேகல்லே ச ஸதி, தங்க²ணே ஏவ விபரிணமனதோ. விபரிணமனஞ்ஹி அத்தபா⁴வஸ்ஸ பகதி கிச்சம். உத்³த⁴ம்க³மனம் அபி⁴ஸங்கா²ர ஸித்³த⁴ம். ஏவம் அபி⁴ண்ஹ ஸம்படிப்பீளனம் வேதி³தப்³ப³ம். ஏத்த² ச ஸம்ஸாரஸ்ஸ ஸீக⁴ஸோததா நாம அத்தபா⁴வபரியாபன்னானம் நாம ரூபத⁴ம்மானம் பவத்தினிவத்தி ஸீக⁴தா வுச்சதி. ஏத்த² ச மரணம் து³வித⁴ம் ஸம்முதி மரணஞ்ச பரமத்த² மரணஞ்ச. தத்த² ஸம்முதி மரணம் நாம ஸம்முதி ஸச்சபூ⁴தஸ்ஸ ஸத்தஸ்ஸ மரணம். தம் ஏகப⁴வபரியந்தே ஸந்தி³ஸ்ஸதி. பரமத்த² மரணம் நாம பரமத்த² ஸச்சபூ⁴தானம் நாமரூப த⁴ம்மானம் மரணம். இத³மேவ ஏகந்தமரணம், ஸச்சமரணம், ஸபா⁴வமரணம் ஹோதி. இமஸ்மிம் விபஸ்ஸனா கம்மே இத³ம் பரமத்த² மரணம் ஏவ அனிச்சதாதி ச வுச்சதி. த⁴ம்மானம் ஸுஸானக்கே²த்தந்தி ச ஸுஸானபூ⁴மீதி ச வுச்சதீதி. ஸா ச ஸுஸானபூ⁴மினாம ஸத்தானம் படிஸந்தி⁴தோ பட்டா²ய ஸந்தானம் அனுப³ந்த⁴தியேவ. அனுப³ந்த⁴த்தா ச ஸத்தானம் படிஸந்தி⁴தோ பட்டா²ய ஸோ நாம ஸமயோ நத்தி², யத்த² ஸத்தா ந மரந்தீதி. இத³ஞ்ச அனுப³ந்த⁴னம் ஸத்தானம் அபி⁴ண்ஹஸம்படிப்பீளனமேவ ஹோதி. தேஸம் ஸப்³பி³ரியாபதே²ஸு ஜீவிதஸ்ஸ ச அங்க³பச்சங்கா³னஞ்ச காயவசீமனோ கம்மானஞ்ச ஸம்பா³த⁴பத்திதோ. அவஸவத்தனாகாரோ பன அபி⁴ஸங்கா²ர து³க்க²ம் அபி⁴ண்ஹம் பச்சனுப⁴வந்தானம் பாகடோயேவ. வஸவத்தனேஹி ஸதி, அபி⁴ஸங்க²ரண கிச்சஸ்ஸ ஓகாஸோ நத்தி². வஸவத்தனேனேவ யதி²ச்சி² தஸ்ஸ கிச்சஸ்ஸ ஸம்பஜ்ஜனதோ. லோகஸ்மிஞ்ஹி ஸப்³ப³ம்பி அபி⁴ஸங்கா²ர கிச்சம் நாம அந்தமஸோ அஸ்ஸாஸனபஸ்ஸாஸன கிச்சம் உபாதா³ய த⁴ம்மானம் வஸவத்தனாபா⁴வதோ கரோந்தீதி.

அனிச்சஸ்ஸ த⁴ம்மஸ்ஸ அனுஅனுபஸ்ஸனாதி ஸம்ப³ந்தோ⁴. ‘‘அனுஅனுபஸ்ஸனா’’தி ச ஞாணசக்கு²னா புனப்புனம் நிஜ்ஜா²யனா ஓலோகனா. ‘‘த⁴ம்மானம்’’தி பஞ்சக்க²ந்த⁴ த⁴ம்மானம். ‘‘யத்த² யத்தா²’’தி யஸ்மிம் யஸ்மிம் ஸரீரங்கே³. ‘‘புராண த⁴ம்மானம்’’தி புராணானம் பாதுப்³பூ⁴தானம், வட்³டி⁴தானஞ்ச த⁴ம்மகோட்டா²ஸானம் அந்தரதா⁴னம் வயோ வுச்சதி. விபஸ்ஸனா கம்மம் பத்வா க²ணிகவஸேன ஏகேகத⁴ம்மவிபா⁴க³வஸேன ச அனுபஸ்ஸனா கிச்சம் நத்தீ²தி ஆஹ ‘‘ஸமூஹ ஸந்ததிவஸேன பனா’’தி. ஏகேகத⁴ம்மவிபா⁴க³வஸேன அனுபஸ்ஸனாபி பன பகதியா ஸுபாகடேஸு சித்தவேத³னாதீ³ஸு இச்சி²தப்³பா³யேவ. ‘‘அனிச்சதாய பரமாகோடீ’’தி ததோ உத்தரி அனிச்சதா நாம நத்தீ²தி அதி⁴ப்பாயோ. த⁴ம்மானம் ததா² ததா² பா⁴யிதப்³ப³ப்பகாரோ நாம பஞ்சக்க²ந்தே⁴ ‘அனிச்சதோ, து³க்க²தோ, ரோக³தோ, க³ண்ட³தோ, ஸல்லதோ, அக⁴தோ, ஆபா³த⁴தோ, திஆதி³னா வுத்தோ பா⁴யிதப்³ப³ப்பகாரோ. தஸ்ஸ ஸமனுபஸ்ஸனாஞாணம் ப⁴யஞாணம். ஏதேன அபாயது³க்க² ஸம்ஸார து³க்க²பீ⁴ருகேஹி ஜனேஹி பா⁴யிதப்³ப³ந்தி ப⁴யம். தே வா பா⁴யந்தி ஏதஸ்மாதி ப⁴யம். ப⁴யஸ்ஸ ஸமனு பஸ்ஸனாஞாணம் ப⁴யஞாணந்தி இமமத்த²ம் த³ஸ்ஸேதி. ‘‘கிஞ்சிப⁴யவத்து²ம்’’தி ஸீஹப்³யக்³கா⁴தி³கம் ப⁴யவத்து²ம். ‘‘படிஸ்ஸரணே’’தி கு³ஹாலேணாதி³கே படிஸ்ஸரணே. ‘‘தேஸம்’’தி பி⁴ஜ்ஜனஸபா⁴வானம் த⁴ம்மானம். ‘‘தேஹீ’’தி பி⁴ஜ்ஜனஸபா⁴வேஹி. உக்கண்ட²தா நாம சித்தஸ்ஸ விருத்³த⁴தா நிக்க²மாபி⁴முக²தா. ‘‘சத்தாலீஸாய ஆகாரேஹீ’’தி பஞ்சக்க²ந்தே⁴ ‘அனிச்சதோ, து³க்க²தோ, ரோக³தோ, க³ண்ட³தோ, ஸல்லதோ, அக⁴தோ, ஆபா³த⁴தோ, பரதோ, பலோகதோ, ஈதிதோ,. உபத்³த³வதோ, ப⁴யதோ, உபஸக்³க³தோ, சலதோ, பப⁴ங்கு³தோ, அத்³து⁴வதோ, அதாணதோ, அலேணதோ, அஸ்ஸரணதோ, ரித்ததோ,. துச்ச²தோ, ஸுஞ்ஞதோ, அனத்ததோ, ஆதீ³னவதோ, விபரிணாம த⁴ம்மதோ, அஸாரகதோ, அக⁴மூலதோ, வத⁴கதோ, விப⁴வதோ, ஸாஸவதோ,. ஸங்க²ததோ, மாராமிஸதோ, ஜாதித⁴ம்மதோ, ஜராத⁴ம்மதோ, ப்³யாதி⁴த⁴ம்மதோ, மரணத⁴ம்மதோ, ஸோகபரிதே³வத⁴ம்மதோ, து³க்க²தோ³மனஸ்ஸ த⁴ம்மதோ, உபாயாஸ த⁴ம்மதோ, ஸம்கிலேஸிக த⁴ம்மதோ, பஸ்ஸந்தோ ஸுஞ்ஞதோ லோகம் அவேக்க²தீதி ஏவம் மஹானித்³தே³ஸே மோக⁴பஞ்ஹனித்³தே³ஸே ஆக³தேஹி சத்தாலீஸாய ஆகாரேஹி. தத்த² பஞ்சக்க²ந்தே⁴ அனிச்சதோ பஸ்ஸந்தோதிஆதி³னா யோஜேதப்³ப³ம். ‘‘அனிச்சதோ’’தி ச அனிச்சபா⁴வேனாதி அத்தோ². ஸப்³பே³பி பஞ்சக்க²ந்தா⁴ அனிச்சா ஏவாதி பஸ்ஸந்தோதி வுத்தம் ஹோதி. கத²ம் பன அனிச்சதோ பஸ்ஸந்தோ ஸுஞ்ஞதோ லோகம் அவேக்க²தீதி. நிச்சகு³ண ஸுஞ்ஞதாய ஸுஞ்ஞதோ பஞ்சக்க²ந்த⁴பூ⁴தம் லோகம் அவேக்க²தி. ஸேஸபதே³ஸுபி ஏஸேவனயோ. தத்த² ‘‘அனிச்சா ஏவா’’தி படிஸந்தி⁴க்க²ணதோ பட்டா²ய யதா³கதா³சி மரண த⁴ம்மத்தா அனிச்சா ஏவ. ‘‘து³க்கா² ஏவா’’தி அனிச்ச த⁴ம்மத்தாயேவ து³க்கா² ஏவ. யத³னிச்சம், தம் து³க்க²ம்திஹி வுத்தம். து³க்க² ஸச்சத⁴ம்மத்தா வா. ‘‘ரோகா³ ஏவா’’தி ரோக³ஜாதிகத்தா ரோகா³ ஏவ. யேஹி கேசி லோகே சக்கு² ரோகா³தி³கா அனேகஸஹஸ்ஸா ரோகா³ நாம ஸந்தி³ஸ்ஸந்தி. ஸப்³பே³தே இமேபஞ்சக்க²ந்தா⁴ ஏவ. இதோ அஞ்ஞோகோசி ரோகோ³ நாம நத்தி². தஸ்மா தே ஏகந்தேன ரோக³ஜாதிகா ஏவாதி. அபி ச, து³க்க²ஸச்ச த⁴ம்மத்தாதீஹி து³க்க²தாஹி சதூஹி து³க்க²ட்டே²ஹி ச அபி⁴ண்ஹஸம்படிப்பீளனதோ ருஜ்ஜனட்டே²ன ரோகா³ ஏவ. தத்த² ‘‘தீஹி து³க்க²தாஹீ’’தி து³க்க²து³க்க²தா ஸங்கா²ர து³க்க²தா விபரிணாம து³க்க²தாதி இமாஹி தீஹிது³க்க²தாஹி. ‘‘சதூஹி து³க்க²ட்டே²ஹீ’’தி து³க்க²ஸ்ஸ பீளனட்டோ², ஸங்க²தட்டோ², ஸந்தாபட்டோ², விபரிணாமட்டோ²,தி இமேஹி சதூஹி து³க்க²ட்டே²ஹி. து³க்க² கிச்சேஹீதி அத்தோ². ஏஸனயோ க³ண்டா³தீ³ஸு. தத்த² க³ண்டோ³னாம பீளகாபா³தோ⁴. ஸல்லம் நாம விஜ்ஜ²னட்டே²ன கிலேஸ ஸல்லஞ்ச து³க்க²ஸல்லஞ்ச. அக⁴ந்தி நிரத்த²கம். இமே ச க²ந்தா⁴ விபத்திபரியோஸானத்தா நிரத்த²கா ஏவ ஹோந்தி. ஸப்³பா³ஸம்பத்தியோ விபத்திபரியோஸானாதி ஹி வுத்தம். அவிஸ்ஸாஸிகட்டே²ன பரே ஏவ. ந ஹி தே ஏதம் மம, ஏஸோ ஹமஸ்மி, ஏஸோ மே அத்தாதி ஏவம் விஸ்ஸாஸம் அரஹந்தி. ததா² விஸ்ஸாஸம் கரோந்தஸ்ஸ நானாது³க்கே²ஹி நிச்சம் விஹிம்ஸனதோ. படிஸந்தி⁴தோ பட்டா²ய யதா³கதா³சி பலுஜ்ஜனத⁴ம்மத்தா பலோகத⁴ம்மா ஏவ. ‘‘ஈதீ’’தி அந்தராயோ வுச்சதி. க²ந்தா⁴ அந்தராய ஜாதிகா ஏவாதி வுத்தம் ஹோதி. அஜ்ஜ²த்தபா⁴வம் உபக³ந்த்வா து³தத்தா விபா³த⁴கத்தா உபத்³த³வா ஏவ. பா⁴யிதப்³ப³த்தா ப⁴யா ஏவ. அனத்தா ஏவ ஸமானா அஜ்ஜ²த்தபா⁴வம் உபக³ந்த்வா ஸஜ்ஜனதோ லக்³க³னதோ து³ம்மோ சயதோ உபஸக்³கா³ ஏவ. நிச்சகாலம் லோகத⁴ம்மேஹி சலனத்தா விப்ப²ந்த³னத்தா சலாஏவ. நானப்பகாரேன ப⁴ஞ்ஜனத⁴ம்மத்தா பப⁴ங்கு³னோ ஏவ. க²ணமத்தம்பி அதி²ரத்தா அத்³து⁴வா ஏவ. ஜராமரணாதி³தோ அபாயவினிபதனாதி³தோ ப⁴யதோ தாயதி ரக்க²தீதி தாணம். தே ச க²ந்தா⁴ கஸ்ஸசிதாணா ந ஹோந்தி. தேஸஞ்ச கிஞ்சிதாணம் நாம நத்தி². தஸ்மா அதாணா ஏவ. ப⁴யதோ பீ⁴ருகா ஜனா லீயந்தி நிலீயந்தி ஏத்தா²தி லேணம். தே ச கஸ்ஸசிலேணா ந ஹோந்தி. தேஸஞ்ச கிஞ்சிலேணம் நாம நத்தி². தஸ்மா அலேணா ஏவ. ப⁴யம் ஸரதிஹிம்ஸதீதி ஸரணம். தே ச கஸ்ஸசிஸரணம் ந ஹோந்தி. தேஸஞ்ச கிஞ்சிஸரணம் நாம நத்தி². தஸ்மா அஸ்ஸரணா ஏவ. நிச்சதாதீ³ஹி ஸப்³பே³ஹி ஸோப⁴ணகு³ணேஹி ஸப்³ப³ஸோ ரஹிதத்தா துச்ச²த்தா ஸுஞ்ஞத்தாரித்தா ஏவ. துச்சா² ஏவ. ஸுஞ்ஞா ஏவ. அத்தா வுச்சதி யஸ்ஸகஸ்ஸசி கோசி ஸாரபூ⁴தோ படிஸ்ஸரணோ. தே ஸயஞ்ச கஸ்ஸசி அத்தான ஹோந்தி. அத்தனோ ச கோசி அத்தானாம நத்தி². தஸ்மா அனத்தா ஏவ. அனிச்சதாதீ³ஹி ஆதீ³னவேஹி தோ³ஸேஹி ஸம்புண்ணத்தா ஆதீ³னவா ஏவ. விபரிணாம ஸபா⁴வத்தா விபரிணாமா ஏவ. ஸாரபூ⁴தஸ்ஸ கஸ்ஸசி அதி⁴ட்டா²னஸ்ஸ அபா⁴வா அஸாராஏவ. அக⁴ஸ்ஸ ஸப்³ப³னிரத்த²கஸ்ஸ பதிட்டா²னத்தா அக⁴மூலா ஏவ. தே ஸயம் மரண த⁴ம்மஸமங்கீ³னோ ஹுத்வா தேன மரணஸத்தே²ன மரணாவுதே⁴ன ஸம்ஸாரே ஸத்தானம் நிச்சம் மாரகத்தா ஜீவிதிந்த்³ரியுபச்சே²த³கத்தா வத⁴கா ஏவ. நிச்சஸுக²ஹித வுட்³டி⁴விக³தத்தா விப⁴வா ஏவ. ஆஸவேஹி பரிக்³க³ஹிதத்தா ஸாஸவா ஏவ. நிச்சகாலம் பச்சயாயத்தவுத்திகத்தா ஸங்க²தா ஏவ. கிலேஸமாரமச்சுமாரானம் ஆமிஸாஹாரத்தா மாராமிஸா ஏவ. அனிச்ச²ந்தஸ்ஸேவ ஸதோ சக்கு²ரோகா³தி³பா⁴வேன அபாயப⁴வாதி³பா⁴வேன ஜாதஸபா⁴வத்தா ஜாதித⁴ம்மா ஏவ. அனிச்ச²ந்தஸ்ஸேவ ஸதோ ஹாயனமரணஸபா⁴வத்தா ஜராமரண த⁴ம்மா ஏவ. ஸோகாதீ³னம் வத்து²பா⁴வேன தா⁴ரணத்தா ஸோகாதி³ த⁴ம்மா ஏவ. தண்ஹா ஸம்கிலேஸ தி³ட்டி²ஸம்கிலேஸ து³ச்சரித ஸம்கிலேஸேஹி நியுத்தத்தா ஸம்கிலேஸிக த⁴ம்மா ஏவாதி. தேன வுத்தம் ‘‘சத்தாலீஸாய ஆகாரேஹீ’’தி. ‘‘படிஸங்கா²னவஸேனா’’தி பரிவீமம்ஸனவஸேன.‘‘நிகந்தியா’’தி நிகந்திதண்ஹாய. ‘‘பரியாதி³ன்னாயா’’தி ஸுக்க²பா⁴வபத்தாய. ‘‘ப⁴யஞ்சா’’தி ப⁴யஞாணவஸேன உப்பன்னம் ஓத்தப்பப⁴யஞ்ச.

லோகே அத்தஜீவா நாம ஸத்தானம் அஜ்ஜ²த்த த⁴ம்மேஸு ஸாரத⁴ம்மா ஹோந்தி. தேஸு விக³தேஸு ஸேஸத⁴ம்மா நிஸ்ஸத்த நிஜ்ஜீவபா⁴வம் பத்வா பே²க்³கு³பூ⁴தா கசவரபூ⁴தாதி லோகஸ்ஸ அபி⁴மானோ. தே ச அத்தஜீவா நாம ஸப்³ப³ஸோ நத்தீ²தி தி³ட்டே² க²ந்தே⁴ஸு கசவரபா⁴வத³ஸ்ஸனம் அத்தஜீவ ஸுஞ்ஞதா த³ஸ்ஸனம் நாம. ‘‘விமுச்சமானோ’’தி ஏதேன விமுச்சதீதி விமோக்கோ²தி அத்த²ம் த³ஸ்ஸேதி. விமுச்சந்தி ஏதேனாதி விமோக்கோ²திபி யுஜ்ஜதி. ‘‘நிமித்தானீ’’தி விபல்லாஸத⁴ம்மேஹி நிம்மிதானி நிச்சனிமித்த ஸுக²னிமித்த அத்தனிமித்த ஜீவனிமித்தானி. ஸத்த புக்³க³ல இத்தி² புரிஸ ஹத்த² பாத³ ஸீஸ கீ³வாதீ³னி நிமித்தானி ச. தத்த² ஸங்கா²ரானம் க²ணிக த⁴ம்மத்தா அனிச்சானம்யேவ ஸதம் ஸந்ததி க⁴னேன படிச்ச²ன்னத்தா ஹிய்யோபி ஸோ ஏவ, அஜ்ஜபி ஸோ ஏவாதிஆதி³னா நிச்சாகாரேன உபட்டா²னம் நிச்சனிமித்தம் நாம. கிலேஸமலேஹி பரிக்³க³ஹிதத்தா அஸுபா⁴னம்யேவ ஸதம் அவிஜ்ஜாய படிச்ச²ன்னத்தா இத³ம் இட்ட²ம், கந்தம், மனாபம், பியரூப, ந்திஆதி³னா ஸுபா⁴காரேன உபட்டா²னம் ஸுப⁴னிமித்தம் நாம. ப⁴யட்டே²ன அகே²மட்டே²ன து³க்கா²னம்பி ஸதம் தாயேவ படிச்ச²ன்னத்தா இத³ம் ஸுக²ம், நிப்³ப⁴யம், கே²மம், ஸாதரூப, ந்திஆதி³னா ஸுகா²காரேன உபட்டா²னம் ஸுக²னிமித்தம் நாம. பச்சயா யத்தவுத்திகத்தா பச்சயேன வினா கேவலம் அத்தனோ வஸாயத்தவுத்திதா பா⁴வதோ அனத்தானம்யேவ ஸதம் அத்தனோ இச்சா²வஸேன கரோதி, கதே²தி, சிந்தேதி, க³ந்தும் இச்ச²ந்தோ க³ச்ச²தி, டா²தும் இச்ச²ந்தோ திட்ட²தீ, திஆதி³னா வஸவத்தனாகாரேன உபட்டா²னம் அத்தனிமித்தம் நாம. ததா² ஸத்தோனாம ஸத்தாஹம்பி ஜீவதி, மாஸம்பி ஜீவதி, ஸம்வச்ச²ரம்பி ஜீவதீதிஆதி³னா ஜீவாகாரேன உபட்டா²னம் ஜீவனிமித்தம் நாம. நனு சேத்த² அத்தனோ இச்சா²வஸேன கரோதீதிஆதீ³ஸு இச்சா²னாம தண்ஹாவாச²ந்தோ³ வா. தது³ப⁴யம்பி சித்தஸம்பயுத்தம். கரணஞ்ச நாம காயிகக்ரியாபூ⁴தானம் சித்தஜரூபகலாபானம் பவத்திவிஸேஸோ. ஏவஞ்சஸதி தேஸம் சித்தவஸேன பவத்தத்தா அத்தனோ இச்சா²வஸேன கரோதீதி இத³ம் அபி⁴த⁴ம்மவிருத்³த⁴ம் ந ஹோதீதி. ந ந ஹோதி. அத்தனோதி ச கரோதீதி ச வுத்தத்தா. ந ஹி அத்தானாம அத்தி², யோ அத்தனோதி வுச்சேய்ய. ந ச கத்தானாம அத்தி², யோ கரோதீதி வுச்சேய்ய. இத⁴ பன தஸ்மிம் ஸமயே பவத்தம் க²ந்த⁴பஞ்சகமேவ அத்தாதி ச கத்தாதி ச க³ஹேத்வா அத்தனோதி ச கரோதீதி ச வுத்தம். ‘‘அவஸ்ஸயோ ஹோதீ’’தி பதிட்டா² ஹோதி. ‘‘வித⁴மித்வா’’தி ஞாணேன அந்தரதா⁴பேத்வா. ஸபா⁴வதோ விஜ்ஜமானானி ந ஹோந்தீதி த³ஸ்ஸனஞாணேன வினிச்ச²யம் பாபேத்வாதி வுத்தம் ஹோதி. பா⁴வத³ஸ்ஸனம் நாம ஸோகது³க்கா²தீ³னம் அபா⁴வத³ஸ்ஸனம்.

‘‘தம் தம் க⁴னவினிப்³பு⁴ஜ்ஜனவஸேனா’’தி ஸமூஹஸந்ததி க⁴னாதீ³னம் பி⁴ந்த³ன சி²ந்த³னவஸேன. தத்த² ஸமூஹக⁴னபி⁴ந்த³னம் ஆதி³தோ த⁴ம்மவவத்தா²னஞாணகிச்சம். ததா³ அத்ததி³ட்டி² விக்க²ம்பி⁴தா ஹோதி. ஜீவதி³ட்டி² ச நாம ஸுகு²மதரா அத்ததி³ட்டி² ஏவ வுச்சதி. மக்³க³க்க²ணம் பத்வா ஏவ தது³ப⁴யம்பி ஸப்³ப³ஸோ ஸமுச்சி²ந்த³தீதி த³ட்ட²ப்³ப³ம். ‘‘பணிஹிதகு³ணஸ்ஸா’’தி பத்தி²தகு³ணஸ்ஸ.

‘‘பாதிமோக்க²’’ந்தி ஏத்த² ‘‘பதீ’’தி ஜேட்ட²கோ வுச்சதி. ‘‘முக²ம்’’தி மூலகாரணம். பதி ச ஸோ முக²ஞ்சாதி பதிமுக²ம். பதிமுக²மேவ பாதிமோக்க²ந்தி இமமத்த²ம் த³ஸ்ஸேந்தோ ‘‘தம் ஹீ’’திஆதி³மாஹ. ஸப்³ப³லோகியஸீலானி நாம சதுபாரிஸுத்³தி⁴ஸீலானி. தேஸம் மஜ்ஜே². ‘‘ஜேட்ட²கத்தா’’தி ஜேட்ட²கஸீலத்தா. ‘‘தமேவா’’தி வினயபஞ்ஞத்திஸீலமேவ +. ‘‘யேஸம் த⁴ம்மானம்’’தி உத்³த⁴ச்ச முட்ட²ஸ்ஸச்சாதி³ த⁴ம்மானம். ‘‘விப்ப²ந்தி³தானி நாமா’’தி விப்பகிண்ணானி நாமாதி அதி⁴ப்பாயோ. தேனாஹ ‘‘லோலானி நாமா’’தி. ‘‘தத³னுப³ந்தா⁴’’தி தானிவிப்ப²ந்தி³தானி இந்த்³ரியானி அனுக³தா. ‘‘பு³த்³த⁴ப்படிகுட்டே²ஹீ’’தி பு³த்³தே⁴னப⁴க³வதா படிக்கோஸிதேஹி நீவாரிதேஹி. ‘‘மிச்சா²பயோகே³ஹீ’’தி அட்ட²குலதூ³ஸனகம்மேஹி சேவ ஏகவீஸதிஅனேஸனகம்மேஹி ச. ‘‘திவித⁴குஹனவத்தூ²ஹீ’’தி பச்சயப்படிஸேவனஞ்ச, ஸாமந்தஜப்பனஞ்ச, இரியா பத² ஸன்னிஸ்ஸிதஞ்சாதி இமேஹி திவிதே⁴ஹி குஹனவத்தூ²ஹி. திவிதே⁴ஹி அச்ச²ரிய கம்மவிதா⁴னேஹீதி வுத்தம் ஹோதி. பரிஸுஜ்ஜ²தீதி பரிஸுத்³தி⁴. பரிஸுத்³தி⁴ ஏவ பாரிஸுத்³தி⁴. ‘‘ஸம்மோஹஸ்ஸா’’தி தா⁴துமனஸிகாராதீ³ஸு ஸம்முய்ஹனஸ்ஸ. ‘‘கே³த⁴ஸ்ஸா’’தி ஸம்மோஹத்தாயேவ பச்சயேஸு ப⁴த்தனிக்கி²த்தகா கஸ்ஸவிய கே³த⁴ஸ்ஸ, அபி⁴கங்க²ஸ்ஸ. ‘‘மத³ஸ்ஸா’’தி லாப⁴ஸக்காரா தி³மூலகஸ்ஸ மானமத³ஸ்ஸ. ‘‘பமாத³ஸ்ஸா’’தி குஸலேஸு த⁴ம்மேஸு பமாத³ஸ்ஸ முட்ட²ஸ்ஸச்சஸ்ஸ. தம் தம் பயோஜன மரியாதோ³ நாம சீவரபச்சயே தாவ ஸீதப்படிகா⁴தாதி³கோ பயோஜனமரியாதோ³. ‘‘மரியாதோ³’’தி ச யாவதே³வாதி பதே³ன த³ஸ்ஸிதோ ஸீதப்படிகா⁴தாதி³கோ சீவரப்பயோஜன பரிச்சே²தோ³. ஸோ ச சீவரபச்சயே ஸம்மோஹாதி³கே ஸாவஜ்ஜபக்கே² அபதனத்தா²ய ட²பிதோ. தேன வுத்தம் ‘‘ஸம்மோஹஸ்ஸ கே³த⁴ஸ்ஸ மத³ஸ்ஸ பமாத³ஸ்ஸ பஹானத்த²ம்’’தி. ஏஸனயோ பிண்ட³பாதபச்சயாதீ³ஸுபி. ஏதேன பச்சவேக்க²னாபாடே²ஸு அயமத்தோ² த³ஸ்ஸிதோ. இத⁴ பி⁴க்கு² சீவரம் படிஸேவதி யாவதே³வ ஸீதஸ்ஸ படிகா⁴தாய உண்ஹஸ்ஸ படிகா⁴தாயாதிஆதீ³ஸு யாவதே³வ ஸீதஸ்ஸ படிகா⁴தாய படிஸேவதி. ந ததோ உத்தரி ஸம்மோஹத்தா²ய கே³த⁴த்தா²ய மத³த்தா²ய பமாத³த்தா²ய படிஸேவதீதிஆதி³. ஏவஞ்சஸதி, யம் சீவரம் படிஸேவந்தஸ்ஸ ஸம்மோஹகே³த⁴மத³ப்பமாதா³ உப்பஜ்ஜந்தி. தம் ந ஸேவிதப்³ப³ம். இதரம் ஸேவிதப்³ப³ந்தி த³ஸ்ஸிதம் ஹோதீதி.

‘‘பச்சத்தஸபா⁴வோ’’தி பச்சேகஸபா⁴வோ. ‘‘காரியஸங்கா²தம்’’தி காதப்³ப³ம் அபி⁴னிப்பா²தே³தப்³ப³ந்தி காரியம். ஆஸன்னப்ப²லம். தேனாஹ ‘‘அக்³கி³ஸ்ஸதூ⁴மோவியா’’தி. ஆஸன்னகாரணம் பத³ட்டா²னம் நாம அக்³கி³காரகோ விய. பஜ்ஜதி க³ச்ச²தி பவத்ததி ப²லம் ஏதேனாதி பத³ம். திட்ட²தி ப²லம் ஏத்தா²தி டா²னம். உப⁴யம்பி காரண பரியாயோ ஏவ. தேன அதிஸ்ஸயத்தோ²பி ஸிஜ்ஜ²தீதி ஆஹ ‘‘ஆஸன்னகாரணம்’’தி. ‘‘ஸத்³தி⁴ம் ஸஞ்ஞா சித்த விபல்லாஸேஹீ’’தி தி³ட்டி²ஸம்பயுத்தேஹீதி அதி⁴ப்பாயோ. தி³ட்டி²விப்பயுத்தா பன ஸஞ்ஞா சித்த விபல்லாஸா விக்க²ம்பி⁴தும் ஸக்கோதீதி ந வத்தப்³பா³. ‘‘ஸாஸன த⁴ம்மே’’தி அனத்தலக்க²ண ஸுத்தந்தாதி³கே ஸுஞ்ஞத த⁴ம்மப்படிஸம்யுத்தே தே³ஸனாத⁴ம்மே. ‘‘தி³ட்டி²விபல்லாஸோ விக்க²ம்பி⁴தோ’’தி தாதி³ஸம் த⁴ம்மதே³ஸனம் ஸுத்வா தே³ஸகே ஸத்த²ரி ச தே³ஸிதே த⁴ம்மே ச ஸத்³த⁴ம் படிலபி⁴த்வா ஸச்சமேவ ப⁴க³வா ஆஹ, அஹம் பன ஏதம் மம, ஏஸோஹமஸ்மி, ஏஸோ மே அத்தா,தி க³ண்ஹாமி, மிச்சா²வதாயம் மமகா³ஹோதி ஏவம் விக்க²ம்பி⁴தோ ஹோதி. ததோ பட்டா²ய ஏஸோ மே அத்தாதி வத³ந்தோபி தி³ட்டி²ஸம்பயுத்தசித்தேன ந வத³தி. தி³ட்டி²விப்பயுத்தசித்தேன ஏவ வத³தீதி அதி⁴ப்பாயோ. இத³ம்பன த³ள்ஹக்³கா³ஹ விக்க²ம்ப⁴னமத்தம் ஏவ. ந அத்தத³ஸ்ஸன விக்க²ம்ப⁴னம். தம் பன த⁴ம்மவவத்தா²னஞ்ஞாணே ஸித்³தே⁴ ஏவ ஸிஜ்ஜ²தீதிபி வத³ந்தி. சதுன்னம் ஆஹாரானம் வஸேன சதுதா⁴ நாமரூபம் பரிக்³க³ஹேதப்³ப³மேவ. கஸ்மா, சத்தாரோ ஆஹாரே பரிக்³க³ஹேத்வா தேஸ்வேவ லக்க²ணத்தயம் ஸமனுபஸ்ஸந்தஸ்ஸ அந்தே லோகுத்தரஞ்ஞாணத³ஸ்ஸனப்படிலாப⁴கிச்சஸ்ஸ ஸித்³த⁴த்தாதி அதி⁴ப்பாயோ. பஞ்சதா⁴திஆதீ³ஸு ஏஸனயோ. ஆதி³கம்மிகானம் அவிஸயோ, விஸும் விஸும் லக்க²ண ரஸாதீ³ஹி பரிக்³க³ஹேதும் அஸக்குணேய்யத்தா. பரிக்³க³ஹணே ஸக்கோந்தஸ்ஸபி விபஸ்ஸனா கம்மே விஸும் விஸும் பஸ்ஸிதும் அஸக்குணேய்யத்தா ச. ததா²ஹி வக்க²தி ‘‘கலாபவஸேன ஸம்கி²பித்வா’’தி. ‘‘அஞ்ஞஸ்ஸ கஸ்ஸசீ’’தி அத்தஜீவாதி³கஸ்ஸ. ஸோ கரோதி குஸலாகுஸலம் கம்மம். ஸோ படிஸம்வேதே³தி ப⁴வந்தரம் பத்வா தப்³பி³பாகம். ஸம்ஸரதி ப⁴வதோ ப⁴வம். ஸந்தா⁴வதி கம்மவேகே³ன கி²த்தோ. ஸுத்³தே⁴ நாமே ஏவ வா ரூபே ஏவ வா ஈஹாப்³யாபாரானம் அபா⁴வத³ஸ்ஸனதோதி யோஜனா. புக்³க³லஸத்தானம் க்ரியாயோதி ஸஞ்ஞிதாதி விக்³க³ஹோ. ‘‘அத்தாதி பவத்தா தி³ட்டீ²’’தி காரக தி³ட்டி². ‘‘தத³த்தா² பி⁴னிவேஸவஸேனா’’தி ஸத்தோ, புக்³க³லோ, திஆதி³ வோஹாரஸ்ஸ ஸப்³பா⁴வதோ தஸ்ஸ அத்த²பூ⁴தோ ஸத்தபுக்³க³லாதி³கோபி ஸபா⁴வதோ அத்தி²யேவ. நோ நத்தீ²தி ஏவம் த³ள்ஹம் ஹத³யே ஸன்னிதா⁴னகரண வஸேன. ‘‘அதிதா⁴வனஞ்சா’’தி வோஹார பஞ்ஞத்திமத்தே அட்ட²த்வா தம் அதிக்கமித்வா பஞ்சக்க²ந்தே⁴ ஸத்தாதி³பா⁴வேன க³ஹணஞ்சாதி அதி⁴ப்பாயோ.

‘‘கம்மசித்தோதுகாஹாரவஸேனா’’தி ஏத்த² ககாரோ ஸந்தி⁴ வஸேன ஆக³மோ. கம்மவஸேன சித்தவஸேன உதுவஸேன ஆஹாரவஸேனாதி அத்தோ². அனுரூபானம் பச்சயானம் ஸாமக்³கீ³தி விக்³க³ஹோ. ‘‘அஞ்ஞதா² பவத்தியா’’தி அஞ்ஞேன பகாரேன பவத்தனஸ்ஸ. ‘‘ஹேதுஸம்பா⁴ரபச்சயேஹீ’’தி ஹேதுபச்சய ஸம்பா⁴ரபச்சயேஹி. ஜனக பச்சயா ஹேதுபச்சயா நாம. பரிவாரபச்சயா ஸம்பா⁴ரபச்சயா நாம. ‘‘கம்மப்பவத்தியா’’தி கம்மப்பவத்திதோ. ‘‘விபாகப்பவத்தியா’’தி விபாகப்பவத்திதோ. ஏகஸ்ஸ ஸத்தஸ்ஸ அனமதக்³கே³ ஸம்ஸாரே ஸம்ஸரந்தஸ்ஸ ரூபகாயோபி அத்தி² நாமகாயோபி அத்தி². ததோ அஞ்ஞோ கோசிஸபா⁴வோ நாம நத்தி². த்³வே ச காயா பஞ்சவோகாரே ஸம்ஸரந்தஸ்ஸ ஏகதோ பவத்தந்தி. அஸஞ்ஞஸத்தே ஸம்ஸரந்தஸ்ஸ ரூபகாயோ ஏவ பவத்ததி. ஸோ ஏவ தத்த² ஏகோஸத்தோதி ஸங்க்²யம் க³ச்ச²தி. அரூபே ஸம்ஸரந்தஸ்ஸ நாம காயோ ஏவ பவத்ததி. ஸோ ஏவ தத்த² ஏகோ ஸத்தோதி ஸங்க்²யம் க³ச்ச²தி. ‘‘ஸங்க்²யம் க³ச்ச²தீ’’தி ச பஞ்ஞத்திமத்தம் க³ச்ச²தீதி அதி⁴ப்பாயோ. தேஸு ச காயேஸு ரூபகாயே சுதி படிஸந்தீ⁴னம் அஞ்ஞமஞ்ஞம் அனந்தர பச்சயதா நாம நத்தி². ஏகமேகஸ்மிம் ப⁴வே ஏகமேகோ ஹுத்வா சுதிகாலே பி⁴ஜ்ஜதி. ரூபஸந்ததி சி²ஜ்ஜதி. படிஸந்தி⁴ரூபேன ஸஹ பச்சய பச்சயுப்பன்னதா பப³ந்தோ⁴ நப்பவத்ததி. நாம காயே பன சுதி படிஸந்தீ⁴னம் அஞ்ஞமஞ்ஞம் அனந்தரபச்சயதா அத்தி². சுதிகாலேபி நாமஸந்ததி ந சி²ஜ்ஜதி. படிஸந்தி⁴ நாமேன ஸஹ பச்சய பச்சயுப்பன்னதா பப³ந்தோ⁴ பவத்ததியேவ. தத்த² படிச்சஸமுப்பாத³ குஸலோ பி⁴க்கு² படிச்சஸமுப்பாத³ஞ்ஞாணே ட²த்வா ஏகஸ்மிம்ப⁴வே ஏகஸ்ஸ ஸத்தஸ்ஸ பவத்திம் பஸ்ஸந்தோ ஸத்தம் நாம ந பஸ்ஸதி. புக்³க³லம் நாம ந பஸ்ஸதி. அஹந்திபி ந பஸ்ஸதி. பரோதிபி ந பஸ்ஸதி. அஹம் அதீதேஸு ப⁴வேஸு அஹோஸிந்திபி ந பஸ்ஸதி. இமஸ்மிம்ப⁴வே அஸ்மீதிபி ந பஸ்ஸதி. அனாக³தேஸு ப⁴விஸ்ஸாமீதிபி ந பஸ்ஸதி. அத² கோ² அவிஜ்ஜா பச்சயா ஸங்கா²ரா பவத்தந்தி. ஸங்கா²ர பச்சயா ப⁴வந்தரே விஞ்ஞாணம் பவத்ததீதிஆதி³னா நயேன நாமரூப த⁴ம்மானம் ஹேதுப²ல பரம்பராவஸேன அவிச்சே²த³ப்பவத்திமேவ பஸ்ஸதி. ஏகஸ்மிம்ப⁴வே பவத்திம் பஸ்ஸந்தே ஸதி, அனமதக்³கே³ஸம்ஸாரே அனந்தேஸு ப⁴வேஸு தஸ்ஸ ஸத்தஸ்ஸ பவத்தி தி³ட்டா² ஏவ ஹோதி தத்த²பி ஏவமேவ, தத்த²பி ஏவமேவாதி. ததா³ தஸ்ஸ ஸோளஸவிதா⁴ கங்கா² பஹீயதீதி இமமத்த²ம் ‘‘த³ஸ்ஸேந்தோ அனமதக்³கே³ ஸம்ஸாரே’’திஆதி³மாஹ. தத்த² கதமா ஸோளஸவிதா⁴ கங்கா²தி. அஹோஸிம் நு கோ² அஹம் அதீதமத்³தா⁴னம். ந நு கோ² அஹோஸிம். கிம் நு கோ² அஹோஸிம். கத²ம் நு கோ² அஹோஸிம். கிம் ஹுத்வா கிம் அஹோஸிம் நு கோ² அஹம் அதீதமத்³தா⁴னந்தி ஏவம் புப்³ப³ந்தே பஞ்சவிதா⁴ கங்கா²வுத்தா. ப⁴விஸ்ஸாமி நு கோ² அஹம் அனாக³தமத்³தா⁴னம். ந நு கோ² ப⁴விஸ்ஸாமி. கிம் நு கோ² ப⁴விஸ்ஸாமி. கத²ம் நு கோ² ப⁴விஸ்ஸாமி. கிம் ஹுத்வா கிம் ப⁴விஸ்ஸாமி நு கோ² அஹம் அனாக³தமத்³தா⁴னந்தி ஏவம் அபரந்தே பஞ்சவிதா⁴ கங்கா² வுத்தா. அஹம் நு கோ² ஸ்மி. நோ நு கோ² ஸ்மி. கின்னு கோ² ஸ்மி. கத²ம் நு கோ² ஸ்மி. அஹம் நு கோ² ஸத்தோ குதோ ஆக³தோ. ஸோ குஹிம் கா³மீ ப⁴விஸ்ஸாமீதி ஏவம் பச்சுப்பன்னே ச²ப்³பி³தா⁴ கங்கா² வுத்தா. இமா ஸோளஸவிதா⁴ கங்கா²தி. தத்த² அஹோஸிம் நு கோ², ந நு கோ² அஹோஸிந்தி இமினா பத³த்³வயேன அதீதகாலே அத்தனோ அத்தி² நத்தி²பா⁴வே கங்க²தி. ஸசே அத்தி², கிம் நு கோ² அஹோஸிந்தி கங்க²தி. கேனசி ஹேதுனா பச்சயேன வா அஹோஸிம். கேனசி இத்³தி⁴மந்தேன வா நிம்மிதோ அஹோஸிம். அஹேது அபச்சயா வா அனிம்மிதோ வா ஸயம்ஜாதோ அஹோஸிந்தி அத்தோ². யதி³ தேஸுபகாரேஸு அஞ்ஞதரேன அஹோஸிம். கத²ம் நு கோ² அஹோஸிம். அபாத³கோவா அஹோஸிம். த்³விபாத³கோ வா. சதுப்பாத³கோவா. ப³ஹுப்பாத³கோவா. ரூபீவா. அரூபீவா. ஸஞ்ஞீவா. அஸஞ்ஞீவா இச்சாதி³. அத² தேஸு அபாத³காதீ³ஸு அஞ்ஞதரோ அஹம் அஹோஸிம். கிம் ஹுத்வா கிம் அஹோஸிம். பத²மப⁴வே கிம் ஹுத்வா து³தீய ப⁴வாதீ³ஸு கிம் அஹோஸிந்தி இத³ம் ப⁴வபரம்பராவஸேன வுத்தம். ஏஸனயோ அபரந்தேபி. பச்சுப்பன்னே ‘‘அஹம் நு கோ² ஸ்மி, நோ நு கோ² ஸ்மீ’’தி யதா² கு²த்³த³கவத்து² விப⁴ங்கே³ அட்ட²ஸததண்ஹாவிசரிதேஸு. ஸதஸ்மீதி ஹோதி. ஸீதஸ்மீதி ஹோதீதி வுத்தம். தத்த² ‘‘ஸதஸ்மீ’’தி அஹம் ஸஸ்ஸதோ வா ப⁴வாமி. ‘‘ஸீதஸ்மீ’’தி அஹம் உச்சி²ன்னோவா ப⁴வாமீதி அத்தோ². யதா² ச. அத்தீ²தி கோ² ஏகோ அந்தோ. நத்தீ²தி கோ² து³தீயோ அந்தோதி வுத்தம். தத்த² ‘‘அத்தீ²’’தி அத்தானாம ப⁴வாப⁴வேஸு நிச்சகாலம் அத்தி². ‘‘நத்தீ²’’தி ததா² நத்தி², உச்சி²ஜ்ஜதி. ந ஹோதி பரம்மரணாதி அத்தோ². ததா² இதா⁴பி அஹம் நு கோ² ஸ்மி. நோ நு கோ² ஸ்மீதி கங்க²தி. தத்த² ‘‘அஹம் நு கோ²ஸ்மீ’’தி அயம் அஹம் நாம ப⁴வாப⁴வேஸு நிச்சகாலம் அஸ்மி நு கோ², மம அத்தானாம ஸஸ்ஸதோ ஹுத்வா ஸப்³ப³காலம் அத்தி² நு கோ²தி வுத்தம் ஹோதி. ‘‘நோ நு கோ² ஸ்மீ’’தி ததா² நோ அஸ்மி நு கோ². மம அத்தா ததா² நத்தி² நு கோ²தி அத்தோ². ஏத்த² ச ‘‘ப⁴வாப⁴வேஸூ’’தி பவத்தேபி பச்சுப்பன்னே வத்தமானம் அத்தானம் க³ஹேத்வா பவத்தா பச்சுப்பன்னே ஸங்க³ஹிதந்தி த³ட்ட²ப்³ப³ம். ‘‘கிம் நு கோ² ஸ்மீ’’தி அஹம் நாம ஸந்தோ ஜாதோ கிம் நு கோ² அஸ்மி. கேனசி ஹேதுனா பச்சயேன வா அஸ்மி நு கோ². கேனசி இத்³தி⁴மந்தேன வா நிம்மிதோ ப⁴வாமி நு கோ². உதா³ஹு அஹேது அபச்சயா வா கேனசி அனிம்மிதோ வா ஸயம் நு கோ² ப⁴வாமி நு கோ²தி அத்தோ². ‘‘கத²ம் நு கோ² ஸ்மீ’’தி ஏத்த² பன அபதா³தீ³ஹி அயோஜேத்வா அஹம் நு கோ² கிம் கோ³த்தோ ப⁴வாமி. கோ³தமகோ³த்தோ வா வாஸேட்ட² கோ³த்தோ வா திஆதி³னா யோஜேதப்³ப³ம். ஆதி³ கப்பகாலே தானி கோ³த்தானி ஏதரஹி ஸம்பே⁴த³ம் க³ச்ச²ந்தி. தஸ்மா தேஸு கங்க²ந்தோ கங்க²தியேவ. ‘‘அஹம் குதோ ஆக³தோ’’தி அஹம் அதீதே குதோப⁴வதோ ஆக³தோ அஸ்மி. ‘‘ஸோகுஹிம்கா³மீ ப⁴விஸ்ஸாமீ’’தி ஸோ அஹம் ஆயதிம் ப⁴வே குஹிம் கா³மிகோ ப⁴விஸ்ஸாமீதி கங்க²தி. ‘‘கங்கா²ய அதிக்கமோ’’தி ஸோ பி⁴க்கு² படிச்சஸமுப்பாதே³ அவிஜ்ஜாதி³கம் அதீதஹேது பஞ்சகம் பஸ்ஸந்தோ தஸ்மிம்ப⁴வே ஸப்³ப³ம்பி படிச்சஸமுப்பாத³ம் பஸ்ஸதியேவ. ஏவம் பஸ்ஸந்தோ ந தத்த² அஹம் நாம கோசி அத்தி², யம் படிச்ச அதீத விஸயா பஞ்சவிதா⁴ கங்கா² உப்பஜ்ஜதி. த⁴ம்ம மத்தமேவ தத்த² அத்தீ²தி ஏவம் அதீதே கங்கா² வத்து²ஸ்ஸ அபா⁴வத³ஸ்ஸனேன பஞ்சவிதா⁴ய கங்கா²ய அதிக்கமோ ஹோதி. நனு ததா² பஸ்ஸந்தஸ்ஸபி கத²ம் நு கோ² ஸ்மி, கிம் ஹுத்வா கிம் அஹோஸிம் நு கோ²தி அயம் கங்கா² அத்தி²யேவ. ததா² பஸ்ஸந்தோபி ஹி வினா புப்³பே³னிவாஸஞ்ஞாணேன அதீதே ப⁴வே அஹம் த்³விபாத³கோ அஹோஸிந்திவா சதுப்பாத³கோ அஹோஸிந்தி வா ததோ சுதோ அஸுகப⁴வே உப்பன்னோதி வா ந ஜானாதி ந பஸ்ஸதீதி. வுச்சதே. ஸா பன கங்கா² த⁴ம்ம மத்தப்பவத்தி த³ஸ்ஸனதோ பட்டா²ய அந்தராயிக கங்கா² ந ஹோதி. விசிகிச்சா² படிரூபிகா ஏவ. ஸா ஹி அரியானம்பி லப்³ப⁴தி யேவாதி. ததா² அனாக³தே ப²லபஞ்சகம் பஸ்ஸந்தோ அபரந்தே பஞ்சவித⁴ம் கங்க²ம் அதிக்கமதி. பச்சுப்பன்னே ப²லபஞ்சகஞ்ச ஹேதுபஞ்சகஞ்ச பஸ்ஸந்தோ பச்சுப்பன்னே கங்கா² ச²க்கம் அதிக்கமதி. ஸேஸம் ஸப்³ப³ம் புப்³ப³ந்தே வுத்தனயமேவாதி. அட்ட²விதா⁴ய கங்கா²ய அதிக்கமனே பன படிச்சஸமுப்பாத³ம் அனுலோமப்படிலோமம் பஸ்ஸந்தோ தே³ஸனா த⁴ம்மே ச லோகுத்தர த⁴ம்மேஸு ச கங்க²ம் அதிக்கமதி. த⁴ம்மே கங்கா²திக்கமனேன ஸஹேவ தே³ஸேந்தே ஸத்த²ரி ச, யதா²னுஸிட்ட²ம் படிபன்னே ஸங்கே⁴ ச, தீஸு ஸிக்கா²ஸு ச, யதா²வுத்தே புப்³ப³ந்தே ச, அபரந்தே ச, புப்³ப³ந்தா பரந்தேஸு ச, படிச்சஸமுப்பாதே³ன ஸஹ படிச்சஸமுப்பன்னேஸு த⁴ம்மேஸு ச ஸப்³ப³ம் கங்க²ம் அதிக்கமதியேவ. தேனாஹ ‘‘ஸபா⁴வ த⁴ம்மப்பவத்தியா’’திஆதி³ம். தத்த² ‘‘ஸபா⁴வத⁴ம்மப்பவத்தியா சா’’தி பச்சயபரம்பராவஸேன ஸபா⁴வத⁴ம்மானம் பரம்பரப்பவத்தியா ச. த⁴ம்மஸு த⁴ம்மதா நாம தே³ஸனா த⁴ம்மஸ்ஸ ஸ்வாக்கா²ததாதி³பா⁴வேன ஸுந்த³ர த⁴ம்மதா. அனவஜ்ஜத⁴ம்மதா. பு³த்³த⁴ஸுபு³த்³த⁴தா நாம தம் த⁴ம்மம் தே³ஸேந்தஸ்ஸ பு³த்³த⁴ஸ்ஸ ஸப்³ப³ஞ்ஞுபு³த்³த⁴தா.

பரியுட்டி²தானம் தி³ட்டி²விசிகிச்சா²னம் விக்க²ம்ப⁴னம் நாம ஹேட்டா² த⁴ம்மவவத்தா²ன வஸேன பச்சயபரிக்³க³ஹவஸேன ச ஸிஜ்ஜ²தி. விபஸ்ஸனா கம்மம் பன அனுஸயபூ⁴தானம் தி³ட்டி²விசிகிச்சா²னம் ஸல்லிக²னத்தா²ய கரீயதீதி வுத்தம் ‘‘அனுஸய ஸமூஹனனத்த²ஞ்சா’’திஆதி³. ‘‘தத்த² பனா’’தி தஸ்மிம் படிஸம்பி⁴தா³ மக்³கே³ பன. விப⁴த்தேஸூதி பாட²ஸேஸோ. ‘‘யஸ்ஸா’’தி யோகீ³ புக்³க³லஸ்ஸ. ‘‘யம் தூ³ரே ஸந்திகேவா’’தி யம் தூ³ரே பவத்தம் ரூபம் வா, ஸந்திகே பவத்தம் ரூபம்வாதி பாட²ஸேஸோ. ‘‘தத³த்த²ஸ்ஸ பனா’’தி ஸம்மஸிதத⁴ம்முத்³தா⁴ரத்த²ஸ்ஸ. ‘‘ஞாணேன த³ள்ஹம் க³ஹேத்வா’’தி த⁴ம்மவவத்தா²னஞ்ஞாணேன ஸுட்டு²விபூ⁴தம் கத்வாதி அதி⁴ப்பாயோ. இதா³னி யம் யம் த³ள்ஹம் க³ஹேதப்³ப³ம். தம் தம் ஸரூபதோ த³ஸ்ஸேதும் ‘‘தத்தா²’’திஆதி³மாஹ. புன த³ள்ஹம் க³ஹிதஸ்ஸ ரூபஸ்ஸ அனிச்சலக்க²ணம் த³ஸ்ஸேதும் ‘‘ஸா ச க்ரியா’’திஆதி³ வுத்தம். ‘‘நஸ்ஸந்தீ’’தி பி⁴ஜ்ஜந்தி. அனிச்சதம் க³ச்ச²ந்தி. ‘‘வித்த²ம்ப⁴ன க்ரியா’’தி ஏத்த² விவிதே⁴ன த²ம்ப⁴னம் வித்த²ம்ப⁴னம். நானாதி³ஸாபி⁴முக²வஸேன த²ம்ப⁴னம் வஹனந்தி அத்தோ². ‘‘இமாஸஞ்சா’’தி சதுன்னம் மஹாபூ⁴தானஞ்ச. விஸும் விஸுந்தி வுத்தத்தா தாஸம் அஞ்ஞமஞ்ஞஞ்ச ஸஹஜாதேஸு க³ஹணம் ஸம்ப⁴வதீதி வுத்தம் ‘‘ஆபாதீ³னம்’’தி. ஆபாதீ³னம் ஸேஸமஹாபூ⁴தானஞ்சாதி அத்தோ². ஸந்ததியா ஸரீரானி ஸந்ததி ஸரீரானி. ‘‘ததா² ததா² கப்பேத்வா’’தி ரூபத⁴ம்மானம் ஸந்ததி பரிவத்தி நாம அபி⁴க்கமந்தஸ்ஸ ஏவம் ப⁴வேய்ய, படிக்கமந்தஸ்ஸ ஏவம் ப⁴வேய்ய, ததா² ஸமிஞ்ஜந்தஸ்ஸ பஸாரேந்தஸ்ஸாதிஆதி³னா பரிகப்பேத்வா. ‘‘ஸேஸக²ந்தே⁴ஸுபி தம் தம் ஸந்ததி நானத்தம்’’தி வேத³னாக்க²ந்தே⁴ தாவ காயே காயிகஸுக²ஸந்ததி து³க்க²ஸந்ததீனம் நானத்தம். சித்தே ஸோமனஸ்ஸ தோ³மனஸ்ஸ ஸந்ததீனம். உபேக்கா² ஸந்ததி பன அவிபூ⁴தா ஹோதி. கப்பேத்வா க³ஹேதப்³பா³. யதா³ சித்தே ஸோமனஸ்ஸ தோ³மனஸ்ஸானி ந ஸந்தி³ஸ்ஸந்தி, ததா³ இதா³னி உபேக்கா² மே வேத³னா பவத்ததீதி வா, யதா³ தானி ஸந்தி³ஸ்ஸந்தி, ததா³ ஸா நிருஜ்ஜ²தீதி வா ஏவம் தக்கேத்வா ஸம்மஸிதப்³பா³தி வுத்தம் ஹோதி. ஸஞ்ஞாக்க²ந்தே⁴ ரூபஸஞ்ஞாஸத்³த³ஸஞ்ஞாதீ³னம் வஸேன. ஸங்கா²ரக்க²ந்தே⁴ ரூபஸஞ்சேதனா ஸத்³த³ஸஞ்சேதனாதீ³னம் வஸேன, நானாவிதக்க விசாராதீ³னம் வஸேன, லோபா⁴லோப⁴ தோ³ஸாதோ³ஸ மோஹாமோஹாதீ³னம் வஸேன ச. விஞ்ஞாணக்க²ந்தே⁴ சக்கு²விஞ்ஞாணாதீ³னம், குஸலா குஸலவிஞ்ஞாணாதீ³னஞ்ச வஸேன ஸந்ததி நானத்தம் வேதி³தப்³ப³ம். விஸ்ஸாஸம் கரோதீதி வத்வா தத³த்த²ம் விவரதி ‘‘ஏதம் மே’’திஆதி³னா. தத்த² தயோவிஸ்ஸாஸா தண்ஹாவிஸ்ஸாஸோ, மானவிஸ்ஸாஸோ, தி³ட்டி²விஸ்ஸாஸோ. தத்த² ஏதம் மமாதி தண்ஹாவிஸ்ஸாஸோ. ஏஸோஹமஸ்மீதி மானவிஸ்ஸாஸோ. ஏஸோ மே அத்தாதி தி³ட்டி²விஸ்ஸாஸோ. ‘‘பரிஹரதீ’’தி ப⁴வாப⁴வேஸு பரிக்³க³ஹேத்வா ஹரதி வஹதி. ‘‘பரமஜ்ஜ²த்தபா⁴வேனா’’தி பதா⁴னஅஜ்ஜ²த்தபா⁴வேன. அஜ்ஜ²த்தஸாரபா⁴வேனாதி வுத்தம் ஹோதி. ‘‘பரிக்³க³ஹிதோ’’தி ஏஸோ மே அத்தாதி தி³ட்டி²பரிக்³க³ஹேன பரிக்³க³ஹிதோ. தயோ ஹி பரிக்³க³ஹா தண்ஹா பரிக்³க³ஹோ, மானபரிக்³க³ஹோ, தி³ட்டி²பரிக்³க³ஹோதி. வஸே ஸப்³ப³ஸோ வத்தந்தோ நாம கேவலம் வஸாயத்தவுத்திகோ ஏவ ஸியா, ந பச்சயாயத்தவுத்திகோதி த³ஸ்ஸேந்தோ ‘‘யதா²வுத்தேஹீ’’திஆதி³மாஹ. தத்த² ‘‘யதா²வுத்தேஹீ’’தி ஸப்³ப³ஸங்க³ஹே வுத்தப்பகாரேஹி கம்மாபி⁴ஸங்க²ரணாதீ³ஹி. ‘‘ததா²பரிக்³க³ஹேதப்³போ³’’தி ஏஸோ மே அத்தாதி ஏவம் பரமஜ்ஜ²த்தபா⁴வேன பரிக்³க³ஹேதப்³போ³. ததா² ஹி யோ அத்தனோ வஸேன வத்ததி, தஸ்மிம் அத்தனோ ஸாமிபா⁴வோ நத்தி². யஸ்மிஞ்ச ஸாமிபா⁴வோ நத்தி², தஸ்மிம் ரூபாதி³கே த⁴ம்மே அத்தானம் ஸாமிகம் கத்வா ஏஸோ மம அத்தாதி பரிக்³க³ஹோ நாம மிச்சா² ஏவ. ததா² யோ ச க²ணிக த⁴ம்மோ ஹோதி, க²ணே க²ணே பி⁴ஜ்ஜதி, தம் ரூபாதி³கம் க²ந்த⁴பஞ்சகம் அத்தனோ ஸாரம் கத்வா ததா² பரிக்³க³ஹோபி மிச்சா² ஏவ. ஏத்த² ச ‘‘மிச்சா² ஏவா’’தி பரமத்த² ஸச்சம் பத்வா மிச்சா² ஏவ. விபல்லாஸோ ஏவாதி வுத்தம் ஹோதி. ‘‘ஸுக²ம் வித்³த⁴ம்ஸேதீ’’தி காயிகஸுக²ஞ்ச சேதஸிக ஸுக²ஞ்ச வித்³த⁴ம்ஸேதி. வினாஸேதி. ‘‘நானாது³க்க²ம் ஜனேதீ’’தி காயிகது³க்க²ஞ்ச சேதஸிக து³க்க²ஞ்ச ஜனேதி உப்பாதே³தி. ‘‘இத³ஞ்ச ரூபம் ஏதி³ஸமேவ ஹோதீ’’தி கத²ம் ஹோதி. மனுஸ்ஸத்தபா⁴வே டி²தானம் ஸத்தானம் யதா²பவத்தம் மனுஸ்ஸ ஸுக²ம் வித்³த⁴ம்ஸேதி, ஜிண்ணபி⁴ன்னபா⁴வம் பாபேதி, நானாது³க்க²ம் ஜனேதி. ஸயம் அபாயத்தபா⁴வம் க³ஹேத்வா தேஸம் நானாஅபாய து³க்க²ம் ஜனேதி. ததா² தே³வத்தபா⁴வே ஸக்கத்தபா⁴வே ப்³ரஹ்மத்தபா⁴வே டி²தானந்திஆதி³னா வத்தப்³ப³ம். ததா² மனுஸ்ஸத்தபா⁴வே டி²தானம் நானாவிபரிணாம கிச்சேஹி யதா²பவத்தம் ஸுக²ம் வித்³த⁴ம்ஸேதி, நானாபச்சயாபி⁴ஸங்க²ரணகிச்சேஹி நானாது³க்க²ம் ஜனேதி. தேன வுத்தம் ‘‘இத³ஞ்ச ரூபம் ஏதி³ஸமேவா’’தி. ‘‘ஸாரோனாம தா²மப³லவிஸேஸோ வுச்சதீ’’தி ஏதேன தா²மப³லவிஸேஸேன ஸம்பன்னம் வத்து²ம்பி ஸங்க³ண்ஹாதி. ‘‘அஸாரகட்டே²னா’’தி ஏத்த² ஸாரோ ஏவ ஸாரகம், ந ஸாரகம் அஸாரகந்தி இமமத்த²ம் ஸந்தா⁴ய ‘‘ரூபம் பன ஸயம்பி ஏவரூபோ ஸாரோ ந ஹோதீ’’தி வுத்தம். ஸத்தானம் அத்தஸாரோ ஜீவஸாரோ ந ஹோதீதி அத்தோ². நத்தி² ஸாரோ ஏதஸ்ஸாதி அஸாரகந்தி இமமத்த²ம் ஸந்தா⁴ய ‘‘ந ச ஏவரூபேன ஸாரேன யுத்தம்’’தி வுத்தம். அத்தஸாரேன ஜீவஸாரேன ஸம்யுத்தம் ஹோதீதி அத்தோ². தத்த² புரிமோ அத்தோ² ரூபம் அத்ததோ ஸமனுபஸ்ஸதீதி இத³ம் ஸந்தா⁴ய வுத்தோ. பச்சி²மோ ரூபவந்தம் வா அத்தானம், அத்தனி வா ரூபம், ரூபஸ்மிம் வா அத்தானம்தி இமானி ஸந்தா⁴ய வுத்தோ. ஏதேன அஸாரகட்டே²னாதி அஸாரபா⁴வேன, அஸாரயுத்தபா⁴வேன வாதி ச. அனத்தாதி ஏத்த²பி ந அத்தா அனத்தா, நத்தி² அத்தா ஏதஸ்ஸாதி வா அனத்தாதி ச த்³விதா⁴ அத்தோ² ஸிஜ்ஜ²தி. ‘‘யஞ்சா’’தி யஞ்ச ரூபம். ‘‘பீளேதீ’’தி தம் ஸமங்கீ³ புக்³க³லம் பீளேதி. ஏதேன அனத்தபா⁴வே ஸித்³தே⁴ து³க்க²பா⁴வோபி ஸித்³தோ⁴தி த³ஸ்ஸேதி. ‘‘திண்ணம் வயானம் வஸேன அத்³தா⁴பே⁴தோ³ யோஜேதப்³போ³’’தி பத²மவயே பவத்தம் ரூபம் து³தீயவயம் ந பாபுணாதி, பத²மவயே ஏவ நிருஜ்ஜ²தீதிஆதி³னா அத்³தா⁴பச்சுப்பன்னே அந்தோக³த⁴பே⁴தோ³ யோஜேதப்³போ³. ‘‘ஸபா⁴கே³கஸந்தானவஸேனா’’தி ஸபா⁴கா³னம் த⁴ம்மானம் ஸபா⁴க³ட்டே²ன ஏகீபூ⁴தா ஸந்ததி ஸபா⁴கே³கஸந்ததி. ‘‘ஸபா⁴கா³னம் த⁴ம்மானம்’’தி ச சித்தஜேஸுதாவ நிரந்தரப்பவத்தேன லோப⁴ஸம்பயுத்தசித்தேன ஸஹஜாதா ரூபத⁴ம்மா ஸபா⁴க³ரூபத⁴ம்மா நாம. ததா² நாம த⁴ம்மா ச. ஏவம் தோ³ஸஸம்பயுத்தாதீ³ஸுபி. உதுஜேஸு நிரந்தரப்பவத்தேன ஸீதஉதுனா ஸமுட்டி²தா ரூபத⁴ம்மா ஸபா⁴க³ரூப த⁴ம்மா நாம. ததா² உண்ஹஉதுனா ஸமுட்டி²தா. ஏஸனயோ ஆஹாரஜேஸுபீதி ஏவம் ஸபா⁴கே³கஸந்ததிவஸேன. ‘‘ஸம்பாபுணிதும்’’தி ஞாணேன ஸம்பாபுணிதும். ‘‘அத்³தா⁴ஸந்ததிவஸேனா’’தி ஏத்த² ஸந்ததிவஸேன ஸம்மஸனம் விஸேஸதோ அதி⁴ப்பேதம். ஏவஞ்ச கத்வா ஹேட்டா² அனிச்சம் க²யட்டே²னாதி பதே³ சதுன்னம் மஹாபூ⁴தானம் ஸந்ததி விபா⁴க³னயோ ஸுட்டு² த³ஸ்ஸிதோதி. ‘‘அனிச்சலக்க²ண த³ஸ்ஸனமேவ பதா⁴னம்’’தி இமஸ்மிம் ஞாணேபி உத³யப்³ப³யஞ்ஞாணேபி ப⁴ங்க³ஞ்ஞாணேபி அனிச்சலக்க²ண த³ஸ்ஸனமேவ பதா⁴னம். ப⁴யஞ்ஞாணே ச ஆதீ³னவஞ்ஞாணே ச நிப்³பி³தா³ஞாணே ச து³க்க²லக்க²ண த³ஸ்ஸனம் பதா⁴னம். உபரி சதூஸு ஞாணேஸு அனத்தலக்க²ண த³ஸ்ஸனம் பதா⁴னந்தி. ‘‘ஸமுதி³தேஸூ’’தி அஞ்ஞமஞ்ஞம் அவினாபா⁴வஸஹாயபா⁴வேன ஸமுப்பன்னேஸு. இத³ஞ்ச அவிஜ்ஜாஸமுத³யா ரூபஸமுத³யோ. தண்ஹாஸமுத³யா உபாதா³ன ஸமுத³யோ. ஆஹார ஸமுத³யா ரூபஸமுத³யோதி பாளிவஸேன வுத்தம். அப்பஹீன வஸேனாதி பாளிபதே³ பன அவிஜ்ஜா தண்ஹா தி³ட்டா²னுஸயானம் அப்பஹீனட்டே²ன ஸந்தானே விஜ்ஜமானதா ஏவ பமாணந்தி த³ட்ட²ப்³ப³ம். ‘‘ஸமுதே³ந்தீ’’தி படிஸந்தி⁴தோ பட்டா²ய ஏகதோ உதே³ந்தி. உபரூபரி ஏந்தி. ஆக³ச்ச²ந்தீதி அத்தோ². ஏகப⁴வபா⁴வேன பாதுப்³ப⁴வந்தீதி அதி⁴ப்பாயோ. தேனாஹ ‘‘யாவமரணகாலா’’திஆதி³ம். ‘‘பஸவந்தீ’’தி பவட்³ட⁴மானா ஸவந்தி, பவத்தந்தி, ஸந்த³ந்தி. ‘‘தேஸு பனா’’தி அவிஜ்ஜா தண்ஹுபாதா³ன கம்மேஸு. ‘‘நிருஜ்ஜ²ந்தீ’’தி தஸ்மிம்ப⁴வே ஏவ நிருஜ்ஜ²ந்தி. தஸ்மிம் ப⁴வே நிரோதோ⁴ நாம ப⁴வந்தரே புன அனுப்பாதோ³ யேவாதி வுத்தம் ‘‘ப⁴வந்தரே’’திஆதி³. ‘‘தம் ஸந்ததியம்’’தி தஸ்மிம் பச்சுப்பன்ன ப⁴வேதி வுத்தம் ஹோதி. ‘‘புன அனுப்பாத³ஸங்கா²தம் நிரோத⁴ம்’’தி ஸந்ததி நிரோதோ⁴ நாம வுத்தோ. ந நிப்³பா³ன நிரோதோ⁴. ஏதாஹி பச்சயே ஸதி, ப⁴வந்தரே உப்பஜ்ஜீஸ்ஸந்தி யேவாதி. இதா³னி யதா²பவத்த ஸந்ததீஸு பரியாபன்னானம் ஸப்³ப³பச்சி²மானம் நாமரூபானம் க²ணிகனிரோத⁴வஸேன அத்த²ம் வத³ந்தோ ‘‘யதா²பவத்த ஸந்ததியோ வா சி²ஜ்ஜந்தி பி⁴ஜ்ஜந்தீ’’தி வுத்தம். ‘‘உத³யப்³ப³யம் ஸமனுபஸ்ஸந்தஸ்ஸ சா’’தி ஏத்த² கதமோ உத³யோ நாம, கதமோ வயோ நாம, கத²ஞ்ச தது³ப⁴யம் ஸமனுபஸ்ஸதீதி ஆஹ ‘‘உத³யப்³ப³யம் பஸ்ஸந்தஸ்ஸாதி ஏத்த² யதா² நாமா’’திஆதி³ம். தத்த² ‘‘தமோ க²ந்தோ⁴’’தி தமோராஸி. ‘‘வேதீ’’தி விக³ச்ச²தி. அந்தர தா⁴யதி.‘‘உத³யோ’’தி உப்பாதோ³ சேவ வட்³டி⁴ ச. ‘‘வயோ’’தி விக³மனம், அந்தரதா⁴னம். ‘‘நானாபயோக³வஸேனவா’’தி ஸமிஞ்ஜனப்பஸாரணாதி³ நானாபயோக³வஸேன வா. உத³யபக்கா²னம் நானாஸந்ததீனம் உத³யஞ்ச உத³யதோ. வயபக்கா²னம் நானாஸந்ததீனம் வயஞ்ச வயதோதி யோஜனா.

போ³ஜ்ஜ²ங்க³ த⁴ம்மேஹி ஸம்பன்னத்தா ஆராதே⁴தி அத்தனோ சித்தம்தி ஆரத்³தோ⁴. துட்ட²சித்தோதி அத்தோ². விபஸ்ஸதீதி விபஸ்ஸகோ. ஆரத்³தோ⁴ ஹுத்வா விபஸ்ஸகோ ஆரத்³த⁴விபஸ்ஸகோ. து³விதோ⁴ஹி விபஸ்ஸகோ தருண விபஸ்ஸகோ ச ஆரத்³த⁴ விபஸ்ஸகோ ச. தத்த² க²ந்தா⁴னம் உத³யப்³ப³யம் ஸுட்டு² அபஸ்ஸந்தோ து³ப்³ப³லவிபஸ்ஸகோ தருண விபஸ்ஸகோ நாம. க²ந்தா⁴னம் உத³யப்³ப³யம் ஸுட்டு² பஸ்ஸந்தோ விபஸ்ஸனா கம்மே ஆராதி⁴த சித்தோ ப³லவவிபஸ்ஸகோ ஆரத்³த⁴விபஸ்ஸகோ நாம. யம் ஸந்தா⁴ய வுத்தம்.

[க]

‘ஸுஞ்ஞாகா³ரே பவிட்ட²ஸ்ஸ, ஸந்தசித்தஸ்ஸ பி⁴க்கு²னோ;

அமானுஸீ ரதீ ஹோதி, ஸம்ம த⁴ம்மம் விபஸ்ஸதோ,தி ச.

[க²]

‘யோ ச வஸ்ஸஸதம் ஜீவே, அபஸ்ஸம் உத³யப்³ப³யம்;

ஏகாஹம் ஜீவிதம் ஸேய்யோ, பஸ்ஸதோ உத³யப்³ப³யம்,தி ச.

அயமித⁴ அதி⁴ப்பேதோ. விபஸ்ஸனம் உபேச்ச கிலேஸேந்தி, மலீனபா⁴வம் க³மேந்தீதி விபஸ்ஸனுபக்கிலேஸா. பரிப³ந்த⁴ந்தி நீவாரேந்தீதி பரிப³ந்த⁴காதி ஹேட்டா² வுத்தமேவ அந்தராயிக த⁴ம்மானம் நாமம். ‘‘ஸரீரோபா⁴ஸோ’’தி ஸகலஸரீரதோ நிக்க²ந்தோ ஓபா⁴ஸோ. ‘‘பஞ்சவிதா⁴ பீதீ’’தி கு²த்³தி³கா பீதி, க²ணிகா பீதி, ஓக்கந்திகா பீதி, உப்³பே³கா³ பீதி, ப²ரணா பீதீதி. ‘‘து³விதா⁴ பஸ்ஸத்³தீ⁴’’தி அதிப³லவந்தீ காயபஸ்ஸத்³தி⁴சேவ சித்தபஸ்ஸத்³தி⁴ ச. விபஸ்ஸனா கம்மே ஓகப்பனாகாரப்பவத்தா ஸத்³தா⁴ஏவ அதி⁴முச்சனட்டே²ன அதி⁴மோக்கோ² ஸத்³தா⁴தி⁴மோக்கோ². ‘‘வீரியம்’’தி தஸ்மிம் கம்மே அனிக்கி²த்தது⁴ரம் பக்³க³ஹிதஸீஸம் வீரியம். ‘‘ஸுக²ம்’’தி சித்தஸுக²ம். தேனாஹ ‘‘ஸோமனஸ்ஸம்’’தி. ‘‘விபஸ்ஸனாஞாணம்’’தி இந்த³விஸ்ஸட்ட²வஜிரஸதி³ஸம் ப³லவவிபஸ்ஸனாஞாணம். ‘‘ஸதீ’’தி தஸ்மிம் கம்மே அப்பமுட்டா² ஸதி. ‘‘தத்ரமஜ்ஜ²த்துபேக்கா²’’தி சித்தஸ்ஸ லீனுத்³த⁴ச்சாதீ³ஹி விஸமந்தேஹி விமுத்தா தத்ரமஜ்ஜ²த்ததாஸங்கா²தா உபேக்கா². ‘‘ஆவஜ்ஜனுபேக்கா²’’தி வஸிபா⁴வபத்தா ஆவஜ்ஜனஸங்கா²தா உபேக்கா². ‘‘ஆலயம்’’தி தண்ஹாலயம். ‘‘குருமானா’’தி கரோந்தீ. ‘‘ஸுகு²மா தண்ஹா’’தி குஸலேஹி மிஸ்ஸகத்தா இத³ம் அகுஸலந்திபி ஜானிதும் அஸக்குணேய்யா ஸுகு²மதண்ஹா. ‘‘ந வதமே’’தி மம ந உப்பன்னபுப்³போ³வதாதி யோஜனா. ‘‘அஸ்ஸாத³ஸஹிதா’’தி ஓபா⁴ஸாதீ³ஸு அஸ்ஸாத³தண்ஹா ஸஹிதா. ‘‘அதி⁴மான வஸேனா’’தி அதி⁴கதரம் மஞ்ஞனாவஸேன. ‘‘தாவதே³வா’’தி நிகந்தியா உப்பத்திக்க²ணேயேவ. ‘‘நிகாமனாகாரோ’’தி இச்ச²னாகாரோ. அஸ்ஸாத³னாகாரோ. ‘‘நிகாமனஸ்ஸவத்தூ²’’தி நிகந்தியா வத்து². ‘‘அத்³தா⁴’’தி ஏகந்தேன. ‘‘ஹந்தா³’’தி சித்தவிஸ்ஸட்ட²கரணே நிபாதபத³ம். இதா³னேவ நம் விஸோதே⁴மி, ந சிரம் பவத்திதும் த³ஸ்ஸாமீதி இமமத்த²ம் தீ³பேதி. ‘‘தேஸ்வேவா’’தி தேஸுஓபா⁴ஸாதீ³ஸு ஏவ. அட்ட²கதா²ய ந ஸமேதி. அட்ட²கதா²யம் நிகந்தி விக்க²ம்ப⁴னஸ்ஸ விஸும் வுத்தத்தாதி அதி⁴ப்பாயோ. விபஸ்ஸனாபரிபாகோ நாம விஸேஸந்தரப்பவத்தேன பாகடோதி த³ஸ்ஸேதும் ‘‘ஸங்கா²ருபேக்கா²பா⁴வம் பத்தா’’திஆதி³மாஹ. வுட்டா²னகா³மினி விபஸ்ஸனாபா⁴வபத்தேனாதி வுத்தம் ஹோதி. ‘‘த்³வே விபஸ்ஸனா சித்தானீ’’தி உபசாரானுலோமசித்தானி. ஸோ ஹி வுட்டா²னந்தி வுச்சதீதி ஸம்ப³ந்தோ⁴. ஸங்கா²ர நிமித்ததோ வா வுட்டா²தி. நிப்³பா³னம் ஆரப்³ப⁴ பவத்திதோ. யதி³ ஏவம் கோ³த்ரபு⁴பி வுட்டா²னம் நாம ஸியாதி. ந ஸியா. மக்³க³ஸ்ஸ ஆவஜ்ஜனமத்தே டி²தத்தா. படிவேத⁴கிச்சஸ்ஸச ஸம்மோஹ ஸமுச்சே²த³கிச்சஸ்ஸ அபா⁴வதோ. ‘‘ஸயம்’’தி மக்³க³ஸங்கா²தோ ஸயம். ‘‘தம் ஸமங்கீ³புக்³க³லம் வா’’தி தேன மக்³கே³ன ஸமங்கீ³புக்³க³லம் வா. ‘‘வட்டப்பவத்ததோ சா’’தி ஆயதிம் ப⁴வேஸு அபாயவட்டப்பவத்ததோ வா, அட்ட²ம ப⁴வதோ பட்டா²ய காமஸுக³தி வட்டப்பவத்ததோ வா. அவஸ்ஸம் வுட்டா²னம் க³மேதி ஸம்பாபேதீதி வுட்டா²னகா³மினீதி வசனத்தோ². ‘‘அவஸ்ஸம் வுட்டா²னம் க³ச்ச²ந்தீ’’தி இத⁴ டி²தானம் வுட்டா²னதோ நிவத்தி நாம நத்தீ²தி அதி⁴ப்பாயோ. இத³ஞ்ச பச்சேகபு³த்³தா⁴னம் பு³த்³த⁴ஸாவகானஞ்ச வஸேன த³ட்ட²ப்³ப³ம். ஸப்³ப³ஞ்ஞு போ³தி⁴ஸத்தா பன புப்³ப³பு³த்³தா⁴னம் ஸாஸனே பப்³ப³ஜித்வா விபஸ்ஸனா கம்மம் ஆரப⁴ந்தா அனுலோமஞ்ஞாணம் ஆஹச்ச ட²பேந்தீதி அட்ட²க தா²ஸு வுத்தம். தத்த² ‘‘ஆஹச்சா’’தி இத³ம் ஸங்கா²ருபேக்கா²ஞாணஸ்ஸ மத்த²கபத்தித³ஸ்ஸனத்த²ம் வுத்தந்தி த³ட்ட²ப்³ப³ம். ‘‘ஆவஜ்ஜனட்டா²னியம்’’தி ததோ புப்³ப³பா⁴கே³ கேனசி சித்தேன அக்³க³ஹிதே நிப்³பா³னா ரம்மணே ஆவஜ்ஜனட்டா²னியம். ‘‘தம்’’தி கோ³த்ரபு⁴ஞ்ஞாணம். கோ³த்தம் ப⁴வதி அபி⁴ப⁴வதி சி²ந்த³தீதி கோ³த்ரபு⁴. கோ³த்தம் வா அபி⁴ஸம்பு⁴ணாதி பாபுணாதீதி கோ³த்ரபூ⁴தி வசனத்தோ². கத²ம் பன கோ³த்ரபு⁴ சித்தம் கோ³த்ரபு⁴ஞ்ஞாணம் புது²ஜ்ஜனகோ³த்தம் சி²ந்த³தி, அரியகோ³த்தம் பாபுணாதீதி யுஜ்ஜேய்ய, ஸோஹி புக்³க³லோ தஸ்மிம்க²ணே புது²ஜ்ஜனகோ³த்தபரியாபன்னோஏவாதி. ஸச்சம். அத்தனி பன சி²ன்னத்தா ஸயம் சி²ந்த³தி நாம. நிப்³பா³னஸ்ஸ ச அரியகோ³சரத்தா தம் ஆரம்மண கரணவஸேன அரியகோ³த்தம் பாபுணாதி நாமாதி த³ட்ட²ப்³ப³ம். பச்சயஸத்திவிஸேஸேன அத்தனோ அனந்தரே அரியகோ³த்தம் பா⁴வேதி, பாதுபா⁴வேதீதி கோ³த்ரபூ⁴திபி யுஜ்ஜதி. ‘‘பரிச்சி²ஜ்ஜா’’தி பரிச்சி²ந்தி³த்வா. தி³ட்டி²விசிகிச்சா²தீ³ஹி ஸப்³ப³விப்ப²ந்த³னேஹி முஞ்சித்வாதி வுத்தம் ஹோதி. ஸம்மோஹஸ்ஸ பஹானமேவ த³ட்ட²ப்³ப³ம். ந தே த⁴ம்மே ஆரம்மண கரண வஸேன ஜானனம். கத²ம் தே த⁴ம்மே ஆரம்மணம் அகரோந்தோ மக்³கோ³ தே த⁴ம்மே பரிஜானாதி நாமாதி. கிச்சஸித்³தி⁴ வஸேன. ஸோ ஹி ஸம்மோஹம் பஜஹந்தோ ஆரம்மணம் கரோந்தானிபி ஹி புப்³ப³பா⁴க³ஞ்ஞாணானி தப்பஹானகிச்சஸ்ஸ அஸாத⁴கத்தா து³க்க² ஸச்சம் பரிஜானந்தானீதி ந வுச்சந்தி. மக்³கோ³ பன ஆரம்மணம் அகரோந்தோபி தப்பஹானகிச்சஸ்ஸ ஸாத⁴கத்தாதம் ஸச்சம் பரிஜானாதீதி வுச்சதி. கஸ்மா. ததோ பட்டா²ய தஸ்ஸபுக்³க³லஸ்ஸ ஸப்³ப³காலம் தஸ்மிம்ஸச்சே பரிஜானன கிச்சஸ்ஸ ஸித்³த⁴த்தா. யதா²ஹி ஏகோ புரிஸோ சக்கு²ம்ஹி பித்தஸேம்ஹாதி³தோ³ஸேஹி பலிபு³த்³த⁴த்தா அந்தோ⁴ ஹோதி. ந கிஞ்சி பஸ்ஸதி. யதா³ பன ஸோ ஏகம் தேஜவந்தம் அஞ்ஜனம் லபி⁴த்வா சக்கு²ம் அஞ்ஜயந்தோ ஸப்³ப³ரத்திம் நித்³தா³யதி. தஸ்ஸ நித்³தா³யந்தஸ்ஸேவ சக்கு²ம்ஹி ஸப்³ப³தோ³ஸா நஸ்ஸந்தி. சக்கு² விப்பஸன்னம் ஹோதி. தங்க²ணதோ பட்டா²ய ஸோ நித்³தா³யந்தோபி ரூபானி பஸ்ஸதீதி வுச்சதி. கஸ்மா, அந்த⁴பா⁴வவிக³மேன த³ஸ்ஸனகிச்சஸ்ஸ ஸித்³த⁴த்தா. ஏவமேவமித³ம் த³ட்ட²ப்³ப³ந்தி. ஏகதே³ஸேன வா ஹேட்டி²மமக்³கே³ஸு, அனவஸேஸேன வா அரஹத்தமக்³கே³. ‘‘அபச்சா²வத்திகம்’’தி ஏத்த² பச்ச²தோ ஆவத்தனம் பச்சா²வத்தம். நத்தி² பச்சா²வத்தம் அஸ்ஸாதி அபச்சா²வத்திகந்தி விக்³க³ஹோ. ‘‘புன அனுப்பாத³த⁴ம்மதாபத்திவஸேன நிரோத⁴ஸங்கா²தம்’’தி மக்³க³க்க²ணே ஏவ தானிவட்டானி புன அனுப்பாத³ஸபா⁴வம் ஆபஜ்ஜந்தி, நிருஜ்ஜ²ந்தி. ததா² நிரோத⁴ஸங்கா²தம். ‘‘உப்பாத³னஸங்கா²தாய பா⁴வனாயா’’தி ஏதேன மக்³க³ஸ்ஸ ஏகசித்தக்க²ணிகத்தா வட்³ட⁴னஸங்கா²தாய பா⁴வனாய ஓகாஸோ நத்தீ²தி கத்வா வுத்தம். அரியமக்³க³ம் படிலாப⁴த்தா²ய பன பவத்திதா புப்³ப³பா⁴க³பா⁴வனாபி மக்³க³பா⁴வனா ஏவ. ஸா ச அரியமக்³க³ம் பத்வா மத்த²கபத்தா ஹோதி. தஸ்மா அரியமக்³கோ³ ஏவ மத்த²கபத்தோ பா⁴வனானுத்தரோ ஹோதீதி இமினாபரியாயேன வட்³ட⁴ன ஸங்கா²தாய பா⁴வனாயாதிபி யுஜ்ஜதியேவ. அத்தனோ அனந்தரே பவத்தம் ஆனந்தரிகம். ஆனந்தரிகம் ப²லம் ஏதஸ்ஸாதி விக்³க³ஹோ. தஸ்ஸ ச ததோபரம் த்³வே வா தீணி வா ப²லசித்தானி பவத்தந்தீதி இமினா ஸம்ப³ந்தோ⁴. அபனீதோ அக்³கி³ ஏதஸ்மாதி அபனீதக்³கி³கோ. ‘‘நிப்³பா³பேந்தோ வியா’’தி ஏதேன படிப்பஸ்ஸம்ப⁴னப்பஹானகிச்சேன மக்³கா³னுகுலப்பவத்திம் த³ஸ்ஸேதி. ‘‘தேஸம்’’தி தேஸம் சக்கூ²னம். தம் ரூபம் தஸ்ஸ பாகடம் ந தாவ ஹோதீதி ஸம்ப³ந்தோ⁴. ‘‘தஸ்ஸா’’தி தஸ்ஸ புக்³க³லஸ்ஸ. ‘‘பச்சவேக்க²னவாரேஸூ’’தி ஏத்த² பஸாத³சக்கு²னா தி³ட்டே² பவத்தா அனுப³ந்த⁴க வீதி²யோபி ஸங்க³ய்ஹந்தி.

உபரிமக்³கே³ஹி வதி⁴தப்³பா³ மாரேதப்³பா³தி உபரிமக்³க³வஜ்ஜா². ‘‘கிலேஸவிபா⁴கே³ஸூ’’தி அஸுகமக்³கே³ன அஸுகாகிலேஸா பஹீயந்தீதி ஏவம் கிலேஸவிபா⁴கே³ஸு. ‘‘பாளியம்’’தி படிஸம்பி⁴தா³ மக்³க³பாளியம். வுச்சமானே பன வத்தப்³ப³ந்தி ஸம்ப³ந்தோ⁴. மக்³க³ங்க³போ³ஜ்ஜ²ங்கா³தீ³னம் பச்சவேக்க²னம் நாம மக்³க³பச்சவேக்க²னமேவ. ததா² பச்சா² வா பவத்ததீதி ஸித்³த⁴ம். ‘‘அவிருத்³தா⁴ ஹோதீ’’தி விஸுத்³தி⁴மக்³கே³ன அஸமேந்தாபி பச்சவேக்க²ந்தானம் இச்சா²னுரூபஸம்ப⁴வதோதி அதி⁴ப்பாயோ. ‘‘அதி⁴மானனித்³தே³ஸ அட்ட²கதா²ஸூ’’தி வினயே சதுத்த²பாராஜிகே அதி⁴மானபத³னித்³தே³ஸ அட்ட²கதா²ஸு. ‘‘ஸோ’’தி அரியபூ⁴தோ பி⁴க்கு². ‘‘நோ லத்³து⁴ம் ந வட்டதீ’’தி அலத்³து⁴ம் ந வட்டதீதி அத்தோ². லத்³து⁴ம் நோ ந வட்டதீதி வா யோஜனா. சதுப்³பி³த⁴ம் மக்³க³ஞ்ஞாணம் க³ஹிதம். ஞாணத³ஸ்ஸனவிஸுத்³தி⁴ நாமாதி வுத்தத்தா.

‘‘அபி⁴னிவிஸனம்’’தி அஜ்ஜ²த்தம் த³ள்ஹதரம் பதிட்டா²னம். ‘‘நிகா²தஸினேருபா த³ஸ்ஸவியா’’தி தஸ்ஸ பவத்தனம் விய. ‘‘கேவலம் பச்சயாயத்த வுத்திதாய அதி³ட்ட²த்தா’’தி ஏதேன ஏஸோ மே அத்தா, ந பரஸ்ஸ அத்தாதி ஏவம் அத்தானம் அத்தஸ்ஸ ஸாமிகம் கத்வா க³ஹணகாரணம் வத³தி. தத்த² கேவலஸத்³தே³ன பரமத்த² ஸச்சம் பத்வா அத்தஸ்ஸேவ அபா⁴வதோ க²ந்த⁴பஞ்சகஸ்ஸ அத்தனோவஸாயத்த வுத்திதம் நிவத்தேதி. ஸம்முதி ஸச்சம் பன பத்வா அத்தஸ்ஸ விஜ்ஜமானத்தா மஹாஜனோ அத்தனோ க²ந்த⁴பஞ்சகம் அத்தனோ வஸாயத்த வுத்திம் மஞ்ஞமானோ ஏஸோ மே அத்தாதி க³ண்ஹாதி. ‘‘க²ணப⁴ங்க³ஸ்ஸ ச அதி³ட்ட²த்தா’’தி ஏதேன ஏஸோ மே ஸாரட்டே²ன அத்தா. ஏஸோ மம ஸாரோ. ஏதம் மம ஸரீரம். யாவ வஸ்ஸஸதம்பி வஸ்ஸஸஹஸ்ஸம்பி ஏதம் க²ந்த⁴பஞ்சகம் ந பி⁴ஜ்ஜதி, ந வினஸ்ஸதி. தாவ அஹம் ந மராமி. யதா³ ஏதம் பி⁴ஜ்ஜதி, வினஸ்ஸதி. ததா³ அஹம் மராமி. அஹஞ்ச மம க²ந்த⁴பஞ்சகஞ்ச அத்³வயம் அனானத்தந்தி ஏவம் க³ஹணகாரணம் வத³தி. தத்த² ‘‘க²ணப⁴ங்க³ஸ்ஸா’’தி நாமரூபத⁴ம்மானம் க²ணே க²ணே ப⁴ஞ்ஜனஸ்ஸ பி⁴ஜ்ஜனஸ்ஸ மரணஸ்ஸ. இத³ம்பனமரணம் ஸம்முதி ஸச்சே நத்தி². பரமத்த² ஸச்சே ஏவ அத்தி². தஸ்மா தம் அபஸ்ஸந்தோ மஹாஜனோ அத்தனோ க²ந்த⁴பஞ்சகம் அத்தனோஸாரம் மஞ்ஞமானோ ஏஸோ மே அத்தாதி க³ண்ஹாதீதி. ‘‘தம் த்³வயம் ஸுதி³ட்ட²ம் கத்வா’’தி க²ந்த⁴பஞ்சகஸ்ஸ கேவலம் பச்சயாயத்த வுத்திதஞ்ச க²ணப⁴ங்க³ஞ்ச ஞாண சக்கு²னா ஸுட்டு²தி³ட்ட²ம் கத்வா. தத்த² பஞ்சன்னம் க²ந்தா⁴னம் படிச்சஸமுப்பாத³ம் ஸுட்டு²பஸ்ஸந்தோ கேவலம் பச்சயாயத்த வுத்திதஞ்ச அவஸாயத்த வுத்திதஞ்ச ஸுட்டு² பஸ்ஸதி. யோ ச அத்தனோ வஸாயத்தவுத்தி ந ஹோதி. ஸோ பரமத்த²ஸச்சம் பத்வா ஏஸோ மம ஸந்தகந்திபி வத்தும் நாரஹதி. குதோ மம அத்தாதி. அபி ச, ஸத்தோ நாம ஸபா⁴வதோ நத்தி². பஞ்ஞத்திமத்தம் ஹோதி. யோ ‘அஹந்தி வா, மேதி வா, மமாதி வா, க³ய்ஹேய்ய. அஸந்தே ச அத்தஸ்மிம் கோ மம அத்தா நாம ப⁴வேய்யாதி. க²ணப⁴ங்கோ³ ஹோதி. க²ணே க²ணே பி⁴ஜ்ஜதி. ஸத்தோ ச நாம ஏகஸ்மிம்ப⁴வே ஆதி³ம்ஹி ஸகிம் ஏவ ஜாயதி. அந்தே ஸகிம் ஏவ மரதி. அந்தரா வஸ்ஸஸதம்பி வஸ்ஸஸஹஸ்ஸம்பி மரணம் நாம நத்தி². அஞ்ஞாஹி க²ணிகத⁴ம்மானம் க³தி. அஞ்ஞா ஸத்தஸ்ஸ. ஏவம்ஸந்தே கத²ம் க²ணிகத⁴ம்மா ஸத்தஸ்ஸ ஸாரட்டே²ன அத்தானாம ப⁴வேய்யுந்தி. தஸ்மா தே அவஸவத்தனட்டே²ன அஸாரகட்டே²ன ச அனத்தா ஏவ. அபிச ‘‘அவஸவத்தனட்டே²னா’’தி ஏத்த² வஸோ நாம ஸத்தஸந்தானே ஏகோ பதா⁴னத⁴ம்மோ. ஸசே அத்தானாம அத்தி². ஸோ ஏவ பதா⁴னபூ⁴தஸ்ஸ வஸஸ்ஸபி அத்தா ப⁴வேய்ய. ஏவம்ஸதி, யோ வஸோ, ஸோ அத்தா. யோ அத்தா, ஸோ வஸோதி ப⁴வேய்ய. ததா² ச ஸதி, ரூபம் அத்தாதி க³ண்ஹந்தோ ரூபஞ்ச வஸஞ்ச அத்தானஞ்ச ஏகத்தம் கத்வா க³ண்ஹாதி நாம. ததா² வேத³னம் அத்தாதி. ஸஞ்ஞம், ஸங்கா²ரே, விஞ்ஞாணம் அத்தாதி க³ண்ஹந்தேபி. ஏவஞ்சஸதி, ஸத்தோ ச க²ந்த⁴பஞ்சகஞ்ச வஸோ ச அத்தா ச ஸப்³ப³மேதம் ஏகத்தம் க³ச்ச²தி, ஏகோ ஸத்தோதி ஸங்க்²யம் க³ச்ச²தி. ந ஹி இமஸ்மிம் வஸவத்தனட்டே² ஏகஸ்ஸஸத்தஸ்ஸ த்³வே அத்தா தயோ அத்தா ப³ஹூஅத்தாதி ஸக்கா ப⁴விதும். அத² யதா² யதா² ஸத்தஸ்ஸ வஸோ வத்ததி, இச்சா² பவத்ததி. ததா² ததா² க²ந்த⁴பஞ்சகம்பி நிச்சகாலம் ஸத்தஸ்ஸவஸம் அனுக³ச்சே²ய்ய. கஸ்மா, ஸத்தஸ்ஸ ச க²ந்த⁴பஞ்சகஸ்ஸ ச வஸஸ்ஸ ச நானத்தாபா⁴வதோ. ஏவம் அனுக³ச்ச²ந்தே ஸதி. ரூபம் மே அத்தா, வேத³னா மே அத்தாதிஆதி³க்³க³ஹணம் வட்டேய்ய. ஸபா⁴வதோ அவிருத்³த⁴ம் ப⁴வேய்ய. ந பன ததா² அனுக³ச்ச²தி. ந ஹி து³ப்³ப³ண்ணோ து³ரூபோ புரிஸோ அத்தனோ ரூபகாயம் அத்தனோ வஸேனேவ ஸுவண்ணம் ஸுரூபம் காதும் ஸக்கோதி. ததா² து³ஸ்ஸத்³தோ³வா ஸுஸத்³த³ம், து³க்³க³ந்தோ⁴வா ஸுக³ந்த⁴ம். ந ச அந்தோ⁴வா அனந்த⁴ம். ப³தி⁴ரோவா அப³தி⁴ரம். ரோகீ³வா அரோக³ம். குட்டீ²வா அகுட்ட²ம். க³ண்டீ³வா அக³ண்ட³ம். ஜிண்ணோவா தருணம். அஜரம் வா அமரணம் வா காதும் ஸக்கோதி. நாபி அபாயேஸு ச அபதந்தம். பதித்வா வா ததோ விமுத்தம் காதும் ஸக்கோதி. ததா² தே³வோ வா தே³வத்தா அசாவேதும். ஸக்கோவா ஸக்கத்தா, மாரோ வா மாரத்தா, ப்³ரஹ்மா வா ப்³ரஹ்மத்தாதி. ஏஸனயோ ஸேஸக²ந்தே⁴ஸுபி. ததா² பன அவஸானுக³மனதோ பரமத்த² ஸச்சம் பத்வா க²ந்த⁴பஞ்சகே அத்தனோ ஸாமிகிச்சம் இஸ்ஸரகிச்சம் நாம நத்தி². அஸாமிகமேவ தம் ஹோதி, அனிஸ்ஸரம். ததா² ச ஸதி, அத்தானம் தஸ்ஸ ஸாமிம் இஸ்ஸரம் கத்வா ரூபம் மே அத்தாதி க³ஹணம் மிச்சா²க³ஹணம் நாம ஹோதீதி. லோகே பன மஹாஜனோ த⁴ம்மானம் படிச்சஸமுப்பாத³ம் ந ஜானந்தி, ந பஸ்ஸந்தி, ந படிவிஜ்ஜ²ந்தி. தேஸம் பரம்பர பச்சயவஸேன பவத்தமானே க²ந்த⁴ஸந்தானே ஸம்முதி ஸச்சவஸேன நானாவஸவத்தனாகாரா நாம ஸந்தி. நானாஸாமி இஸ்ஸராதி⁴பதிவோஹாரா ச லோகே ஸந்தி³ஸ்ஸந்தி. தே ஸம்முதி ஸச்சவஸேன உப்பன்னேஸு தேஸு ஸாமிஇஸ்ஸராதி⁴பதி வோஹாரேஸு வோஹாரமத்தே அட²த்வா ஸபா⁴வஸச்சம் மஞ்ஞந்தா மிச்சா²க³ஹணம் க³ண்ஹந்தி. ஏத்த² ஸியா. ந நு வஸோனாம இச்சா². ஸத்தோ ச க³ந்தும் இச்ச²ந்தோ க³ச்ச²தி. டா²தும் இச்ச²ந்தோ திட்ட²தி. ஏவம்ஸதி. தஸ்ஸ க²ந்த⁴பஞ்சகம் தஸ்ஸ வஸாயத்த வுத்தி ஏவ ஹோதீதி. ந ஹோதி. கஸ்மா, பச்சயாயத்த வுத்தித்தா ஏவ. ததா²ஹி க³ந்தும் இச்சா²னாம ப³ஹித்³தா⁴ த⁴னஹேதுவா உப்பஜ்ஜேய்ய. நானாபோ⁴க³ஹேது வா. அஞ்ஞேன வா நானாகாரணேன. தத்த² யேஸம் த⁴னே அஸதி, யம் யம் து³க்க²ம் ஆக³ச்சே²ய்ய காயிகம் வா சேதஸிகம் வா. தேஸம் தம் தம் து³க்க²பச்சயா த⁴னிச்சா² நாம உப்பஜ்ஜதி. த⁴னிச்சா² பச்சயா க³ந்திச்சா²த³யோ உப்பஜ்ஜந்தி. ததா² நானாபோ⁴கி³ச்சா² நானாகம்மிச்சா²ஸு சாதி. நானாது³க்க²ப⁴யுபத்³த³வமூலிகாஸு இச்சா²ஸு வத்தப்³ப³ மேவ நத்தி². ததா² நானாரம்மணானம் பலோப⁴ன து³க்க²மூலிகாஸு ச நானாவிதக்கானம் விப்ப²ந்த³னமூலிகாஸு ச இச்சா²ஸு. ஏவம் வஸோபி பச்சயாயத்த வுத்திகோ ஏவ ஹோதி. ‘‘க³மனம்’’தி க³மனாகாரேன பவத்தம் க²ந்த⁴பஞ்சகம். யேனயேனத⁴னாதி³ஹேதுனா ஸோ ஸோ வஸோ உப்பஜ்ஜதி. க³மனம்பி தேன தேனேவ உப்பஜ்ஜதி ஆஹாருபத்த²ம்ப⁴னாதி³பச்சயேன ச. வஸோ பன க³மனஸ்ஸ பச்சயேக தே³ஸமத்தம் ஹோதி. ஸோ ஹி தத³ஞ்ஞபச்சயேஹி வினா ஸயம் உப்பஜ்ஜிதும் ந ஸக்கோதி. குதோ க³மனம் உப்பாதே³தும். ஏவம் டா²னாதீ³ஸு. ஏவஞ்ச ஸதி, இத³ம் க²ந்த⁴பஞ்சகம் பச்சயாயத்த வுத்திகந்திச்சேவ வத்தும் அரஹதி. நோ வஸாயத்த வுத்திகந்தி. அபி ச க³ந்தும் இச்ச²ந்தோ க³ச்ச²தீதி பஞ்ஞத்தி மத்தபூ⁴தோ ஸத்தோ க³ச்ச²தி. க²ந்த⁴பஞ்சகம் பன க²ணிக த⁴ம்மத்தா ந க³ச்ச²தி. உப்பன்னுப்பன்னம் தத்த² தத்தே²வ பி⁴ஜ்ஜதி. ஸந்ததி வஸேன க³மனாகார நிமித்தம் பஞ்ஞாயதி. ஏவம் அவஸவத்தனம் ஹோதீதி. ஹோது தத்த² தத்தே²வ பி⁴ஜ்ஜனம். அவிச்சே²த³ப்பவத்தியா ஸதி, க³மனம் ஸம்பஜ்ஜதியேவ. க³மனே ச ஸம்பஜ்ஜமானே க²ணிகபி⁴ஜ்ஜனேன தோ³ஸோ நத்தீ²தி சே. அத்தி². க²ணிகமரணஞ்ஹி ஸத்தஸ்ஸ ஸுஸானபூ⁴மி நாம ஹோதி. அந்தராயேவா ஆக³தே பக்க²லந்தே வா ஸதி, க³ச்ச²ந்தோ ஸத்தோ யதா³ கதா³சி மரணம் வா நிக³ச்ச²தி மரண மத்தம் வா து³க்க²ந்தி. கிலேஸே நிமினாதி பவத்தேதீதி நிமித்தந்தி வசனத்தோ². ‘‘விபல்லாஸனிமித்தம்’’தி ச விபல்லாஸ த⁴ம்மானம் வஸேன உபட்டி²தம் கிச்ச நிமித்தம். தண்ஹா ஏவ பணிதீ⁴தி ஸம்ப³ந்தோ⁴. மஹந்தானம் ஆதீ³னவானம் ராஸி மஹாஆதீ³னவராஸி. க²ந்தே⁴ஸு ஸுஞ்ஞதலக்க²ணம் நாம அதி க³ம்பீ⁴ரம் ஹோதி. ஞாணஸ்ஸேவ விஸயபூ⁴தம். ஸுஞ்ஞத த³ஸ்ஸனஞ்ச தி³ட்டி²யா உஜுப்படிபக்க²ந்தி ஆஹ ‘‘ஸங்கா²ரேஸு ஸுஞ்ஞதத³ஸ்ஸனவஸேனா’’திஆதி³ம். தத்த² ‘‘அத்த² ஸித்³தி⁴ நாமா’’தி மக்³க³ப²லப்படிலாப⁴ஸங்கா²தஸ்ஸ அத்த²ஸ்ஸ ஸித்³தி⁴ நாம. அத்தாதி அபி⁴னிவேஸோ அத்தாபி⁴னிவேஸோ. க³ண்ஹாதீதி கா³ஹோ. உபாதீ³யதீதி அத்தோ². தி³ட்டி²ஸங்கா²தோ கா³ஹோ தி³ட்டி²க்³கா³ஹோ. அத்தா²பி⁴னிவேஸோ ச ஸோ தி³ட்டி²க்³கா³ஹோ சாதி விக்³க³ஹோ. தஸ்ஸ படிபக்க²ம் அனத்தானுபஸ்ஸனாஞாணம். அனு அனு ப⁴வனம் ஆனுபா⁴வோ. பரம்பரதோ வட்³ட⁴னந்தி அத்தோ². ‘‘ததா² ஸமனுபஸ்ஸித்வா’’தி ஸுஞ்ஞதா காரேன ஸமனுபஸ்ஸித்வா. விமுஞ்சந்தஸ்ஸ அரியபுக்³க³லஸ்ஸ. ‘‘அனிச்சலக்க²ணம் நாம நாதி க³ம்பீ⁴ரம் ஹோதி. ஸத்³தா⁴யபி விஸயபூ⁴தம். உன்னதிலக்க²ணோ ச அஹம் மானோ க²ந்தே⁴ஸு நிச்சது⁴வவிபல்லாஸமூலகோ ஸத்³தா⁴ய ச படிபக்கோ²தி ஆஹ ‘‘அனிச்சத³ஸ்ஸனவஸேனா’’திஆதி³ம். ‘‘நிமித்தாபி⁴னிவேஸபூ⁴தஸ்ஸா’’தி நிச்சது⁴வனிமித்தாபி⁴னிவேஸபூ⁴தஸ்ஸ. ‘‘மானக்³கா³ஹஸ்ஸா’’தி மானஸங்கா²தஸ்ஸ கா³ஹஸ்ஸ. ‘‘ஸத்³தா⁴ய பீ’’திபிஸத்³தே³ன ஞாணம் ஸம்பிண்டே³தி. து³க்க²லக்க²ணம் நாம ப⁴யஸம்வேக³ ஜனகம் ஹோதி. ஆரம்மணேஸு தண்ஹாலோலஸ்ஸ தண்ஹாவிப்ப²ந்த³னஸ்ஸ படிபக்க²ம். விஸேஸதோ ஸமாதி⁴ஸ்ஸ அனுரூபந்தி ஆஹ ‘‘து³க்க²த³ஸ்ஸன வஸேனா’’திஆதி³ம். ‘‘திண்ணம் த⁴ம்மானம்’’தி பஞ்ஞிந்த்³ரிய ஸத்³தி⁴ந்த்³ரிய ஸமாதி⁴ந்த்³ரிய ஸங்கா²தானம் திண்ணம் இந்த்³ரிய த⁴ம்மானம். ‘‘விபஸ்ஸனா க³மனவஸேனே வா’’தி வுட்டா²னகா³மினி விபஸ்ஸனா ஸங்கா²தஸ்ஸ ஆக³மன காரணஸ்ஸ வஸேனேவ.

இதா³னி புப்³பே³ யம் வுத்தம் ‘ஸத்தஅரிய புக்³க³லவிபா⁴க³ஸ்ஸ பச்சயபா⁴வபத்தியா சா’தி. தத்த² ஸத்த அரியபுக்³க³லவிபா⁴க³ம் த³ஸ்ஸேதும் ‘‘தத்தா²’’திஆதி³ வுத்தம். த⁴ம்மானுஸாரீ நாமாதி ஏத்த² ‘‘த⁴ம்மோ’’தி பஞ்ஞா வுச்சதி ‘ஸச்சம், த⁴ம்மோ, தீ⁴தி, சாகோ³,தி ஏத்த² விய. திக்க²தரம் த⁴ம்மம் அனுஸ்ஸரதீதி த⁴ம்மானுஸாரீ. பஞ்ஞாப³லானுஸாரேன ஆதி³ம்ஹி மக்³க³ம் லப⁴தீதி வுத்தம் ஹோதி. அத²வா. ‘‘த⁴ம்மோ’’தி நிஸ்ஸத்தனிஜ்ஜீவட்டே²ன ஸங்கா²ர த⁴ம்மோ வுச்சதி. ஸுஞ்ஞதத³ஸ்ஸனஞ்ச நாம விஸேஸதோ ஸுத்³த⁴த⁴ம்ம த³ஸ்ஸனம் நாம. இதி ஸுத்³த⁴த⁴ம்மம் அனுஸ்ஸரதி, ஞாணக³தியா அனுக³ச்ச²தீதி த⁴ம்மானுஸாரீ. தி³ட்டி²பத்தோதி ஏத்த² தி³ட்டி²னாம த³ஸ்ஸனஞ்ஞாணம் வுச்சதி. ஆதி³தோ பட்டா²ய பரிஸுத்³த⁴ த³ஸ்ஸனஸம்பன்னத்தா தி³ட்டி²ப³லேனேவ ஸுகே²ன தம் தம் மக்³க³ப²லம் பத்தோதி தி³ட்டி²பத்தோ. தேனேவ த³ஸ்ஸன பஞ்ஞாப³லேன கிலேஸப³ந்த⁴னதோ விமுத்தோதி பஞ்ஞாவிமுத்தோ. ஸங்கா²ர த⁴ம்மானம் க²ணிக த⁴ம்மபா⁴வே ஸுட்டு² ஸத்³த³ஹனம் அவேச்சப்பஸாதோ³ ஸத்³தா⁴ நாம. தத்த² ‘‘அவேச்சப்பஸாதோ³’’தி ஞாணஸம்பயுத்தப்பஸாதோ³. ‘‘ஞாணம்’’தி ச ஸங்கா²ர த⁴ம்மானம் க²ணிகபா⁴வனிமித்தானம் த³ஸ்ஸனஞ்ஞாணம். தாதி³ஸே ஹி ஞாணே ஸதி, தத்த² அவேச்சப்பஸாதோ³ நாம ஜாயதி, நோ அஞ்ஞதா²தி. ஸத்³த⁴ம் அனுஸ்ஸரதீதி ஸத்³தா⁴னுஸாரீ. ஸத்³தா⁴ப³லேனேவ ஆதி³ம்ஹி அரியமக்³க³ம் பாபுணாதீதி வுத்தம் ஹோதி. ஸத்³தா⁴ப³லேன விமுத்தோதி ஸத்³தா⁴விமுத்தோ. ‘‘காயஸக்கி² நாமா’’தி ஏத்த² ஸக்க²ம்தி ஸந்தி³ட்ட²ம். யம் ஸாத⁴கந்திபி வுச்சதி. அத்தனோ காயே ஏவ லத்³த⁴ம் ஸக்க²ம் யஸ்ஸாதி காயஸக்கீ². து³க்கா²னு பஸ்ஸீ புக்³க³லோ ஹி ஸம்வேக³ ப³ஹுலோ ஹோதி. ஸம்வேகோ³ ச பதா⁴ன வீரியஸ்ஸ பத³ட்டா²னம். ஸம்விக்³கோ³ யோனிஸோ பத³ஹதீதி ஹி வுத்தம். தஸ்மா ஸோ ஸம்வேக³வஸேன பா⁴வனம் அனுயுஞ்ஜந்தோ யம் யம் புரிஸதா²மேன பத்தப்³ப³ம் ஹோதி. தம் தம் பாபுணாதி. பாபுணந்தோ ச அத்தனோ காயே ஏவ ஸக்க²ம் லப⁴தி. ஸந்தி³ட்ட²ம் ஜா²னஸுக²ம் வா மக்³க³ப²லஸுக²ம் வா லப⁴தீதி வுத்தம் ஹோதி. ‘‘உப⁴தோபா⁴க³ விமுத்தோ’’தி அரூபஜ்ஜா²னேஹி ரூபகாயதோ அரஹத்தமக்³க³ப²லேஹி நாமகாயதோதி ஏவம் உபோ⁴ஹி காயபா⁴கே³ஹி விமுத்தோ. ஏத்த² ச தயோ அரியபுக்³க³லா பஞ்ஞாதி⁴கோ ச ஸத்³தா⁴தி⁴கோ ச வீரியாதி⁴கோ ச. தத்த² த⁴ம்மானுஸாரீ ச தி³ட்டி²பத்தோ ச பஞ்ஞாவிமுத்தோ ச பஞ்ஞாதி⁴கோ நாம. ஸத்³தா⁴னுஸாரீ ச ஸத்³தா⁴விமுத்தோ ச ஸத்³தா⁴தி⁴கோ நாம. காயஸக்கீ² ச உப⁴தோபா⁴க³விமுத்தோ ச வீரியாதி⁴கோ நாமாதி த³ட்ட²ப்³ப³ம். அயஞ்ச புக்³க³லவிபா⁴க³னயோ படிஸம்பி⁴தா³மக்³க³னயேன வுத்தோ. அபி⁴த⁴ம்மே பன புக்³க³ல பஞ்ஞத்தியம் ஸத்³தா⁴விமுத்தோ ச காயஸக்கீ² ச த்³வேபுக்³க³லா ஸேக்கே²ஸு ஏவ வுத்தா. அரஹத்தம் பத்தா பன ஏதே த்³வேபி பஞ்ஞாவிமுத்தா ஏவாதி த³ட்ட²ப்³பா³. ஏத்த² ஸியா, ஸங்கா²ர த⁴ம்மானம் க²ணிக த⁴ம்மபா⁴வே ஸுட்டு² ஸத்³த³ஹனம் அவேச்சப்பஸாதோ³ ஸத்³தா⁴ நாமாதி வுத்தம். கிம் பன தாதி³ஸேன ஸத்³தா⁴மத்தேன ஸோதாபத்தி மக்³க³ம் பாபுணாதீதி. ஏத்த² அம்ஹேஹி வத்தப்³ப³ம் நத்தி². ப⁴க³வதா ஏவ வுத்தம். யதா²ஹ மஹாவக்³கே³ ஓக்கந்த ஸம்யுத்தே சக்கு² பி⁴க்க²வே அனிச்சம் விபரிணாமீ அஞ்ஞதா²பா⁴வீ, யோ ஏவம் ஸத்³த³ஹதி, ஏவம் அதி⁴முச்சதி. அயம் வுச்சதி ஸத்³தா⁴னுஸாரீ. ஓக்கந்தோ அரியபூ⁴மிம். அதிக்கந்தோ புது²ஜ்ஜனபூ⁴மிம். ஸோ யேனகம்மேன அபாயம் து³க்³க³திம் வினிபாதம் உப்பஜ்ஜேய்ய. ந தம் கம்மம் கரோதீதி. ஸோதம் பி⁴க்க²வே அனிச்சம். விபரிணாமீ அஞ்ஞதா²பா⁴வீதிஆதி³னா த்³வாத³ஸாயதனானி வித்தா²ரே தப்³பா³னி. தத்த² ‘‘விபரிணாமீ’’தி விபரிணாமோ யஸ்ஸ அத்தீ²தி விபரிணாமீ. விபரிணாமோதி ச க²ணே க²ணே ஜீரணதா பி⁴ஜ்ஜனதா வுச்சதி. ‘‘அஞ்ஞதா²பா⁴வீ’’தி தஸ்ஸேவ வேவசனம். ‘‘ஏவம் அதி⁴முச்சதீ’’தி ஏதேன ஞாணஸம்பயுத்தஸத்³த⁴ம் தீ³பேதி. ஸா ஏவ ஸோதாபத்தியங்கே³ஸு பு³த்³தே⁴ அவேச்சப்பஸாதே³ன ஸமன்னாக³தோ, த⁴ம்மே, ஸங்கே⁴ அவேச்சப்பஸாதே³ன ஸமன்னாக³தோதி வுத்தா. தத்த² ஞாணஸம்பயுத்தஸத்³தா⁴ நாம சக்கா²தீ³னம் அனிச்சனிமித்த த³ஸ்ஸனஞ்ஞாணேன ஸம்பயுத்தா ஓகப்பனஸத்³தா⁴. அனிச்சனிமித்தஞ்ச நாம ரூபம் அனிச்சம் க²யட்டே²னாதிபதே³ வுத்தனயேன சக்கா²தி³னிஸ்ஸயானம் மஹாபூ⁴தானம் ஸந்ததி பரிவத்தனாதி³கம் வுச்சதி. தஞ்ஹி பஸ்ஸந்தோ சக்கா²தீ³னம் அனிச்சபா⁴வே ஸத்³த³ஹதி, அதி⁴முச்சதி. தானிபி க²ணே க²ணே ஏகந்தேன பி⁴ஜ்ஜதி யேவாதி ஸத்³தா⁴தி⁴மோக்க²ம் ஸத்³தா⁴வினிச்ச²யம் படிலப⁴தீதி அத்தோ². ‘‘பு³த்³தே⁴ அவேச்சப்பஸாதே³னா’’தி ஏத்த² பன அரஹதா ஸம்மாஸம்பு³த்³த⁴தாதீ³னம் பு³த்³த⁴கு³ணாதீ³னம் த³ஸ்ஸனஞ்ஞாணேன ஸம்பயுத்தோ பஸாதோ³ அவேச்சப்பஸாதோ³ நாம. அரியபூ⁴மி நாம தி³ட்டா²னுஸய விசிகிச்சா²னுஸயேஹி பரிஸுத்³தா⁴ அவத்தா²பூ⁴மி வுச்சதி. தேஹி ஸஹிதா அவத்தா²பூ⁴மி புது²ஜ்ஜனபூ⁴மி நாம. கத²ம் பன தஸ்ஸ புக்³க³லஸ்ஸ புது²ஜ்ஜனபூ⁴மிம் அதிக்கந்ததா அரியபூ⁴மிம் ஓக்கந்ததா ச விஞ்ஞாயதீதி ஆஹ ‘‘ஸோ யேனா’’திஆதி³ம். யோ அத்தனோ ஜீவிதஹேதுபி கிஞ்சி கம்மபத²பத்தம் அபாயகா³மி கம்மம் ந கரோதி. ஸோ ஏகந்தேன புது²ஜ்ஜனபூ⁴மிம் அதிக்கந்தோ, அரியபூ⁴மிம் ஓக்கந்தோதி விஞ்ஞாயதீதி வுத்தம் ஹோதி. இத³ம் ஸத்³தா⁴னுஸாரிஸுத்தம். அபரம்பி வுத்தம் சக்கு² பி⁴க்க²வே விபரிணாமீ அஞ்ஞதா²பா⁴வீ. யஸ்ஸ ஏவம் மத்தஸோ நிஜ்ஜா²னம் க²மதி. அயம் வுச்சதி த⁴ம்மானுஸாரீ திஆதி³. தத்த² ‘‘மத்தஸோ நிஜ்ஜா²னம் க²மதீ’’தி ஸத்³தா⁴னுஸாரீவிய ஸத்³த³ஹனமத்தே அட்ட²த்வா சக்கா²தீ³னம் தாதி³ஸம் அனிச்சதம் ஸமனுபஸ்ஸந்தோ தோ²கம் தோ²கம் த³ஸ்ஸனம் லப⁴தியேவ. ஏவம்ஸதி, சக்கா²தீ³னி தஸ்ஸ புக்³க³லஸ்ஸ நிஜ்ஜா²னம் ஓலோகனம் மத்தஸோ க²மந்தி நாம. இத³ம் த⁴ம்மானுஸாரிஸுத்தம். அபரம்பி வுத்தம் சக்கு² பி⁴க்க²வே அனிச்சம் விபரிணாமீ அஞ்ஞதா²பா⁴வீ. யோ ஏவம் பஜானாதி பஸ்ஸதி. அயம் வுச்சதி ஸோதாபன்னோ திஆதி³. தத்த² ‘‘பஜானாதி பஸ்ஸதீ’’தி த⁴ம்மானுஸாரீவிய மத்தஸோ நிஜ்ஜா²னக்க²மமத்தே அட்ட²த்வா பஞ்ஞாய பஜானாதி, ஞாணசக்கு²னோ பச்சக்க²தோ பஸ்ஸதீதி அத்தோ². இத³ம் தி³ட்டி²பத்தாதீ³னம் ஸுத்தம்.

‘‘யதா² ஸகம் ப²லம்’’தி ஏத்த² ஸஸ்ஸ அத்தனோ இத³ம் ஸகம். யம் யம் ஸகம் யதா²ஸகந்தி அத்த²ம் த³ஸ்ஸேதி ஸோதாபன்னஸ்ஸாதிஆதி³னா. ப²லஸமாபத்தி வீதி²யம் பன அனுலோமஜவனானி ஏவ ப²லானம் ஆஸன்னகாரணானி, ந மக்³க³ஜவனானீதி ஆஹ ‘‘ந மக்³கா³க³மனவஸேனா’’தி. ‘‘ஸோ’’தி மக்³கோ³. ஸந்தோ ஸம்விஜ்ஜமானோ ஸப்³பா⁴வோ. ‘‘அஸ்ஸா’’தி மக்³க³ஸ்ஸ.

அனிச்சானுபஸ்ஸனா கிச்சதோ அனிமித்தா ஹோதி. ஸபா⁴வதோ ஸனிமித்தாஏவ. நிச்சனிமித்தஸஹிதாஏவ. யதோ ஸா ஏஸோஹமஸ்மீதிக்³க³ஹணம் லப⁴தி. இத³ம்பி விபஸ்ஸனாஞாணம் அனிச்சம் க²யட்டே²னாதி ஸமனுபஸ்ஸிதப்³பா³ ச ஹோதீதி. தத்த² ச அபி⁴த⁴ம்மம் பத்வா ஸபா⁴வப்பதா⁴னம் ஹோதி, ந கிச்சப்பதா⁴னம். தஸ்மா அபி⁴த⁴ம்ம நயேன விபஸ்ஸனா அத்தனோ நிமித்த நாமம் மக்³க³ஸ்ஸ தா³தும் ந ஸக்கோதி. அயம் அட்ட²கதா²ய அதி⁴ப்பாயோ. கிலேஸ த⁴ம்மா நாம யஸ்ஸ உப்பஜ்ஜந்தி, தம் புக்³க³லம் பலிபு³ந்த⁴ந்தி. ஸம்பா³த⁴ம் கரோந்தி. தஸ்மா பலிபோ³த⁴கரானாம. தம் புக்³க³லம் நிச்சனிமித்த ஸுப⁴னிமித்த ஸுக²னிமித்த அத்தனிமித்தானி கா³ஹேந்தி. தஸ்மா நிமித்தகரானாம. தம் புக்³க³லம் ஆரம்மணேஸு பு⁴ஸம் நிஹிதம் நிவிட்ட²ம் கரோந்தி. தஸ்மா பணிதி⁴கரானாம. தே ச மக்³க³ப²லானி ஆரம்மணம் ந கரோந்தி. மக்³க³ப²லேஹி ச ஸம்பயோக³ம் ந க³ச்ச²ந்தி. ஏவம் ஆரம்மணகரணா தி³வஸேன மக்³க³ப²லேஸு தேஸம் அபா⁴வோ. அபா⁴வத்தாஏவ ச தானி மக்³க³ப²லானி அத்தனோ த⁴ம்மதாய தீணினாமானி லப⁴ந்தீதி த³ஸ்ஸேதும் ‘‘ஆரம்மண கரணவஸேனவா’’திஆதி³ வுத்தம். ‘‘அத்தனோ ஸபா⁴வேனா’’தி அத்தனோ த⁴ம்மதாய.

‘‘அத்ததி³ட்டி²யா உப்பன்னாய உப்பஜ்ஜந்தீ’’தி இத³ம் தாஸம் தி³ட்டி²விசிகிச்சா²னம் அத்ததி³ட்டி²யா அவினாபா⁴வம் தீ³பேதி. ந பன அத்ததி³ட்டி²யா தாஹி அவினாபா⁴வந்தி த³ட்ட²ப்³ப³ம். விபச்சந்தீதி அபாயேஸு விபச்சந்தி. அபாயபடிஸந்தி⁴ம் ஜனேந்தி. தி³ட்ட²ஸச்சானஞ்ச அரியபுக்³க³லானம். தி³ட்டி²விசிகிச்சா²ஸம்பயுத்தா அகுஸலத⁴ம்மா தி³ட்டி²விசிகிச்சா²க்³க³ஹணேன க³ஹிதாதி ஆஹ ‘‘தி³ட்டி²விசிகிச்சா² விப்பயுத்தா’’தி. ‘‘அகுஸலத⁴ம்மாசே வா’’தி பச்சுப்பன்னபூ⁴தா த³ஸாகுஸலகம்மபத² த⁴ம்மா சேவ. ‘‘ஸத்தஹி ப⁴வேஹீ’’தி க்ரியாபவக்³கே³ கரணவசனம். யதா² ஸத்தஹி மாஸேஹி விஹாரம் நிட்டா²பேதீதி. க்ரியாபவக்³கோ³திச க்ரியாயஸீக⁴தரம் நிட்டா²பனம் வுச்சதி. ‘‘ஸத்தக்க²த்தும்’’தி ஸத்தவாரா. தீணி ஸம்யோஜனானினாம ‘ஸக்காயதி³ட்டி², விசிகிச்சா², ஸீலப்³ப³தபராமாஸஸம்யோஜனானி,. ‘‘அவினிபாத த⁴ம்மோ’’தி விரூபம் ஹுத்வா பதனம் வினிபாதோ. அபாயனிபாதோதி வுத்தம் ஹோதி. ‘‘த⁴ம்மோ’’தி ஸபா⁴வோ. நத்தி² வினிபாதோ த⁴ம்மோ யஸ்ஸாதி விக்³க³ஹோ. ‘‘நியதோ’’தி ஸுக³திப⁴வேஸு நியத க³திகோ. ஸம்மா பு³ஜ்ஜ²தீதி ஸம்போ³தி⁴. மக்³க³ஞ்ஞாணம். ‘‘பராயனம்’’தி பரபா⁴கே³ க³ந்தப்³ப³ட்டா²னம் வுச்சதி. ஸம்போ³தி⁴ஸங்கா²தம் பராயனம் அஸ்ஸாதி ஸம்போ³தி⁴பராயனோ. ‘‘அனியமத்தோ²’’தி வாஸத்³த³த்தோ²தி வுத்தம் ஹோதி. வா ஸத்³த³த்தே²ஸு ச அனியமத்தோ². ந விகப்பத்தோ². விகப்பத்தே²ஹி ஸதி த்³வே ஏவ ஸத்தக்க²த்துபரமா லப்³ப⁴ந்தி. மிஸ்ஸகப⁴வோன லப்³ப⁴தி. அனியமத்தே² தயோபி லப்³ப⁴ந்தி. அட்ட²கதா²யம் பன ஸமுச்சயத்த²ஸ்ஸ க³ஹிதத்தா ஏகோ மிஸ்ஸகப⁴வோ ஏவ லப்³ப⁴தி. நனு ச ஸத்³தோ³ நாம ஸமுச்சயத்தே² பாகடோ, ந அனியமத்தே². தஸ்மா ஸமுச்சயத்தோ²வ இத⁴ யுத்தோதி சே. ந யுத்தோ. கஸ்மா. த்³வின்னம் அஸங்க³ஹிதத்தா. அட்ட²கதா²யம் பன ஸமுச்சயத்த²ம் க³ஹேத்வா தே த்³வே புக்³க³லா இமஸ்மிம் பாடே² அஸங்க³ஹிதாதி வுத்தம். யதி³ தே இமஸ்மிம் பாடே² அஸங்க³ஹிதா. கத்த²தே ஸங்க³ஹிதா ப⁴வேய்யும். ந ஹி கோசி ஸத்தக்க²த்து பரமோ நாம இத⁴ அஸங்க³ஹிதோதி யுத்தோதி. ‘‘அஸ்ஸா’’தி தஸ்ஸபாளிபாட²ஸ்ஸ. ‘‘ஏத்த² ச யஸ்மா. ல. பரமோ நாம வுத்தோ’’தி இத³ம் உபரி ‘யே காமப⁴வே யேவா’திஆதி³னா ‘யேதி³ட்ட² த⁴ம்மே வா’திஆதி³னா ச யோஜேதப்³ப³ம். ஸோ ச ஸுக்க²விபஸ்ஸகோ வா பரிஹீனஜ்ஜா²னோ வா த³ட்ட²ப்³போ³தி ஸம்ப³ந்தோ⁴. ‘‘பாளியம்’’தி புக்³க³லபஞ்ஞத்தி பாளியம். ‘‘இத⁴ நிட்டா²’’தி இமஸ்மிம் காமலோகே ஆஸவக்க²யம் பத்வா க²ந்த⁴பரினிப்³பா³னபத்தி வஸேன நிட்டா². நிட்டா²னம் பரியோஸானந்தி அத்தோ². குலதோ குலம் க³ச்ச²தீதி கோலம்கோலோ. ப⁴வதோ ப⁴வம் க³ச்ச²தீதி அத்தோ². ஏகமேவ படிஸந்தி⁴ஸங்கா²தம் ப⁴வபீ³ஜம் அஸ்ஸ அத்தீ²தி ஏகபீ³ஜீ. யோ ச தி³ட்டே²வ த⁴ம்மே அரஹா. தஸ்ஸ ச இத⁴ நிட்டா²தி யோஜனா. கேன பன திண்ணம் ஸோதாபன்னானம் விஸேஸோ கதோதி. ஸத்தக்க²த்து பரமோ தாவ கேவலம் பத²மமக்³க³ ஸம்பயுத்தேஹி இந்த்³ரியேஹி கதோ. இதரே த்³வே உபரிமக்³க³த்தா²ய பவத்திதேஹி விபஸ்ஸனிந்த்³ரியேஹி கதோதி. தத்த² ஸத்தக்க²த்து பரமோ ஸப்³ப³முது³கோ ஹோதி. ததோ கோலம்கோலோ திக்கோ². ஸோ பன ச² ப⁴விகோ, பஞ்சப⁴விகோ, சதுப⁴விகோ, திப⁴விகோ, த்³விப⁴விகோதி பஞ்சவிதோ⁴. தத்த² பஞ்சப⁴விகோ திக்கோ². ஸேஸா அனுக்கமேன திக்க²தராதி த³ட்ட²ப்³பா³. ஏகபீ³ஜீ பன ஏகப⁴விகோ ஸப்³ப³திக்கோ². தத்த² ஸத்தக்க²த்து பரமோ கேவலேன பத²மமக்³கா³னுபா⁴வேன ஸித்³த⁴த்தா ஸப்³ப³முது³கோ ஹோதி. இதரே த்³வேபகதியா ஸத்தக்க²த்து பரமபா⁴வே ட²த்வா உபரிமக்³க³த்தா²ய விபஸ்ஸனா கம்மம் பட்ட²பேந்தி. ததா³ தேஸம் இந்த்³ரியானி புன விஸேஸ பத்தானி ஹோந்தி, திக்கா²னி. தஸ்மா தே ஸத்தக்க²த்து பரமதோ திக்கா²னாம ஹோந்தீதி. ‘‘ஸத்தவாரதோ ஓரம் வா’’தி இத³ம் கோலம்கோல ஏகபீ³ஜினோ ஸந்தா⁴ய வுத்தம். ‘‘உபரி திண்ணம் மக்³கா³னம் விபஸ்ஸனா நியாமேதீ’’தி இத³ம் உபரிமே த்³வேஸோதாபன்னே ஸந்தா⁴ய வுத்தம். ஸத்தக்க²த்து பரமோபன பத²மமக்³கே³னேவ நியமிதோதி த³ட்ட²ப்³ப³ம். ததா²ஹி ஸோயேவ ஸங்க³ஹபாடே² ஸரூபதோ ஆக³தோ ஸோதாபத்தி மக்³க³ம் பா⁴வேத்வா தி³ட்டி²விசிகிச்சா²பஹானேன பஹீனாபாயக³மனோ ஸத்தக்க²த்து பரமோ ஸோதாபன்னோ நாம ஹோதீதி. இதரே பன த்³வே பாளியம் ஸோதாபன்ன புக்³க³லவிபா⁴க³ட்டா²னேஸ்வேவ ஆக³தாதி. ‘‘யே பனா’’தி யே ஸோதாபன்ன புக்³க³லாபன. கா³தா²யம் ‘‘இதோஸத்தா’’தி இமஸ்மிம் மனுஸ்ஸலோகே ஸத்த ஸம்ஸரானி. ‘‘ததோஸத்தா’’தி தஸ்மிம் தே³வலோகே ஸத்தாதி அத்தோ². அங்கு³த்தரபாடே² ‘‘தேனசித்தப்பஸாதே³னா’’தி மஹாஸஹஸ்ஸிலோகதா⁴தும் ஸரேன விஞ்ஞாபேதும் ஸமத்த²ஸ்ஸ ஸத்து²கு³ணே சித்தப்பஸாதோ³ ஜாயதி. தேன சித்தப்பஸாதே³ன. ‘‘தேன பரியாயேனா’’தி ஸசே ஸோ தே³வேஸு ஏவ ஸம்ஸரதி. ஸத்தக்க²த்தும் ஓபபாதிக படிஸந்தி⁴யோ க³ண்ஹித்வா தத்தே²வ பரினிப்³பா³யிஸ்ஸதி. யதி³ மனுஸ்ஸேஸு ஏவ ஸம்ஸரதி. ஸத்தக³ப்³ப⁴ஸேய்யக படிஸந்தி⁴யோ க³ண்ஹித்வா ஏத்தே²வ பரினிப்³பா³யிஸ்ஸதி. ஏவம் தே³ஸனா வாரேன சுத்³த³ஸ கத்வா தே³ஸிதேன பரியாயேனாதி அத்தோ². ‘‘தம் வீமம்ஸிதப்³ப³ம்’’தி வத³ந்தேன டீகாசரியேன ஸயம் சுத்³த³ஸபடிஸந்தி⁴யோவ இச்ச²தீதி தீ³பேதி. இதா³னி தம் சுத்³த³ஸபடிஸந்தி⁴வாத³ம் படிக்கி²பந்தோ ‘‘விப⁴ங்கே³ பனா’’திஆதி³மாஹ. ‘‘விப⁴ங்கே³’’தி அபி⁴த⁴ம்மே ஞாணவிப⁴ங்கே³. நத்தி² டா²னமஸ்ஸாதி அட்டா²னம். ‘‘டா²னம்’’தி மூலகாரணம். நத்தி² அவகாஸோ அஸ்ஸாதி அனவகாஸோ. ‘‘அவகாஸோ’’தி பச்சயகாரணம். ‘‘யம்’’தி க்ரியாபராமஸனம். யம் நிப்³ப³த்தேய்ய, தம் நிப்³ப³த்தனம் அட்டா²னம். ஸோ நிப்³ப³த்தன த⁴ம்மோ அனவகாஸோதி யோஜனா. ‘‘அபி⁴ஸங்கா²ர விஞ்ஞாணஸ்ஸா’’தி ஸத்தப⁴வதோ உத்³த⁴ம் காமப⁴வே படிஸந்தி⁴ஜனகஸ்ஸ குஸலா குஸலகம்ம விஞ்ஞாணஸ்ஸ. ‘‘நிரோதே⁴னா’’தி ஸோதாபத்தி மக்³க³க்க²ணே ஏவ நிரோத⁴னேன. நிருஜ்ஜ²ந்தீதி ஸம்ப³ந்தோ⁴. ‘‘நாமஞ்ச ரூபஞ்சா’’தி யே நாம ரூபத⁴ம்மா உப்பஜ்ஜேய்யும். ஏதே நாம ரூபத⁴ம்மா ஏத்த² ஏதஸ்மிம் அபி⁴ஸங்கா²ர விஞ்ஞாண நிரோத⁴க்க²ணே நிருஜ்ஜ²ந்தீதி யோஜனா. ‘‘யதா²வுத்தனயேனேவா’’தி தேன பரியாயேனாதி வுத்தப்பகாரனயேனேவ. ‘‘ததே³கட்ட²மோஹஸ்ஸா’’தி தேன ராகே³ன தேன தோ³ஸேன ஏகஸ்மிம் சித்தே ஏகதோ டி²தஸ்ஸ மோஹஸ்ஸ. ந தி³ட்டி²விசிகிச்சா² ஸம்பயுத்தஸ்ஸ மோஹஸ்ஸ. தஸ்ஸ பத²மமக்³கே³ ஏவ பஹீனத்தா. நாபி உத்³த⁴ச்சசித்தஸம்பயுத்தஸ்ஸ மோஹஸ்ஸ. தஸ்ஸ சதுத்த²மக்³கே³ ஏவ பஹாதப்³ப³த்தா. உப்பஜ்ஜந்தா ராக³தோ³ஸமோஹா. ‘‘த⁴ம்மிகேஸூ’’தி த⁴ம்மேன ஸமேன உப்பன்னேஸு. ‘‘யதோ’’தி யம்காரணா. ப³லவந்தகாரணாதி அத்தோ². ‘‘தேஸம்’’தி ஸோதாபன்னானம். ‘‘ஸல்லிக²ன வஸேனா’’தி ப³ஹலபக்க²ம் தூ²லபா⁴க³ம் ஸுட்டு²லிக²னவஸேன. அதி⁴ச்சுப்பத்தி நாம புப்³பே³ யதா²பவத்தம் காலம் அதி⁴ச்ச அதிக்கம்ம உப்பத்தி. உப்பஜ்ஜந்தானம்பி ராக³தோ³ஸமோஹானம். ‘‘தேஸம் பீ’’தி ஸகதா³கா³மீனம்பி. ‘‘மேது²னவத்து² ஸமாயோகோ³ இச்சி²தோ’’தி ஜாயம்பதீனம் மேது²னகம்மஸமாயோகோ³ நாம ஸகதா³கா³மீனம் அத்தீ²தி இச்சி²தோ. தே²ரோஹி அதி⁴ச்சுப்பத்திமத்தம் இச்ச²தி. பரியுட்டா²னமந்த³தம் ந இச்ச²தி. ஸகதா³கா³மீனம் புத்ததீ⁴தரோபி ஸந்தி³ஸ்ஸந்தீதி வத³தி. ‘‘மஹாஅட்ட²கதா²யம் படிக்கி²த்தோ’’தி தே²ரஸ்ஸ மனோரத²மத்தம்தி வத்வா படிக்கி²த்தோ. இத³ம் ஸப்³ப³ம் அட்ட²ஸாலினியம் வுத்தம். ‘‘ச²க்கனிபாதே’’தி அங்கு³த்தரே ச²க்கனிபாதே. ‘‘மிகா³ஸாளவத்து²ம்ஹீ’’தி மிகா³ஸாளனாமிகாய உபாஸிகாய வத்து²ம்ஹி. கேசி இமம் வத்து²ம் தி³ஸ்வா மஹாஅட்ட²கதா²வாத³ம் ந ரோசேந்தி. மஹாஸிவத்தே²ரவாத³ம் ரோசேந்தி. ‘‘அப்³ரஹ்மசாரினோ’’தி மேது²ன த⁴ம்மா அப்படிவிரதஸ்ஸ. ‘‘ஸகதா³கா³மித்தம் ப்³யாகதம்’’தி தஸ்மிம் காலங்கதே ஸோ ப்³ராஹ்மணோ இத⁴ ஸகதா³கா³மிபா⁴வம் பத்வா துஸிதாகாயம் உபபன்னோதி ஏவம் தஸ்ஸ யம் ஸகதா³கா³மித்தம் ப⁴க³வதா ப்³யாகதம். ‘‘அதி⁴க³மவஸேனா’’தி ஸகதா³கா³மிபா⁴வம் படிலாப⁴வஸேன. ந பன அப்³ரஹ்மசாரினோ ஸதோ அதி⁴க³மவஸேனாதி அதி⁴ப்பாயோ. மரணாஸன்னகாலேபி ஹி ஸிக்கா²பதா³தி⁴ட்டா²னேன ஸஹ உபரிமக்³க³ப²லாதி⁴க³மனம் நாம திக்க²பஞ்ஞஸ்ஸ அரியஸாவகஸ்ஸ ந து³க்கரந்தி. ஏதேன கேஸஞ்சி தே²ரவாத³ரோசனம் படிக்கி²த்தம் ஹோதி. ‘‘ஸகிம்தே³வ இமம்லோகம் ஆக³ந்த்வா’’தி ஏதேன இதோ பரலோகம் க³மனஸ்ஸ ச ததோ புன இதா⁴க³மனஸ்ஸ ச ஸித்³த⁴த்தா அயம் புக்³க³லோ ஸுத்³தே⁴ன மக்³க³னியாமேன காமப⁴வே த்³விக்க²த்து பரமோனாம ஹோதீதி ஸித்³தோ⁴. கத²ம். இத⁴ பத்வா தத்த² நிப்³ப³த்தித்வா இத⁴ பரினிப்³பா³யீ, தத்த² பத்வா இத⁴ நிப்³ப³த்தித்வா தத்த² பரினிப்³பா³யீதி. ஸேஸாபன சத்தாரோ விபஸ்ஸனானியாமேன ஸித்³தா⁴ ஹோந்தீதி விஞ்ஞாயதி. கதமே சத்தாரோ. இத⁴ பத்வா இத⁴ பரினிப்³பா³யீ. தத்த² பத்வா தத்த² பரினிப்³பா³யீ. இத⁴ பத்வா தத்த² பரினிப்³பா³யீ. தத்த² பத்வா இத⁴ பரினிப்³பா³யீதி. ஏத்த² ச தீஸு ஸோதாபன்னேஸு ஏகோஸத்தக்க²த்து பரமோ ஏவ மக்³க³னியாமேன ஸித்³தோ⁴. ஸேஸா பன த்³வே ஸோதாபன்னா விபஸ்ஸனானியாமேன ஸித்³தா⁴. ச² ஸகதா³கா³மீஸு த்³வே ஏவ மக்³க³னியாமேன ஸித்³தா⁴. ஸேஸா பன சத்தாரோ விபஸ்ஸனானியாமேன ஸித்³தா⁴. தத்த² மக்³க³ஸித்³தே⁴ஸு ஸோதாபன்ன ஸகதா³கா³மீஸு ஸங்கரோ நத்தி². விபஸ்ஸனாஸித்³தே⁴ஸு பன ஸங்கரோ அத்தி². அத்த²தோ அவிருத்³தே⁴ ஸதி, வோஹாரமத்தேன ஸங்கரே தோ³ஸோ நத்தீ²தி த³ட்ட²ப்³ப³ம். ஆக³ந்த்வாதி பாட²வஸேன ஆக³மனதோதி வுத்தம். ஆக³ந்தாதி பன பாடோ² யுத்தோ. ஆக³மனஸீலோ ஆக³மன த⁴ம்மோ ஹுத்வா ஸகதா³கா³மீ நாமாதி அத்தோ². அனாக³ந்த்வா இத்த²த்தந்தி ஏத்த²பி ஏஸேவனயோ. அரஹதோ பா⁴வோ அரஹத்தம். அரஹத்த மக்³க³ம். த³க்கி²ணாய விபத்திகரானாம அப்பப்ப²ல அப்பானிஸம்ஸகரா. ஸம்பத்திகரா நாம மஹப்ப²ல மஹானிஸம்ஸகரா. ஸீலக்க²ந்தா⁴தி³கு³ணா நாம ஸீலக்க²ந்த⁴ ஸமாதி⁴க்க²ந்த⁴ பஞ்ஞாக்க²ந்த⁴ விமுத்திக்க²ந்த⁴ விமுத்திஞ்ஞாண த³ஸ்ஸனக்க²ந்த⁴கு³ணா. ‘‘த³க்கி²ணேய்யேஸூ’’தி த³க்கி²ணாரஹ புக்³க³லேஸு. ‘‘து⁴ரம்’’தி பதா⁴னஸீஸட்டா²னியம் வுச்சதி. ஸத்³தா⁴ ஏவ து⁴ரம் அஸ்ஸாதி ஸத்³தா⁴து⁴ரோ. ஏவம் பஞ்ஞாது⁴ரோ. கஸ்மா பனேத்த² வீரியது⁴ரோ ந க³ஹிதோதி. பாளியம் ஸத்³தா⁴வாஹீ மக்³க³ம் பா⁴வேதி, பஞ்ஞாவாஹீ மக்³க³ம் பா⁴வேதீதி வுத்தம். ந பன வுத்தம் வீரியவாஹீ மக்³க³ம் பா⁴வேதீதி. தஸ்மா ந க³ஹிதோதி. கஸ்மா பன வீரியவாஹீ மக்³க³ம் பா⁴வேதீதி ந வுத்தந்தி. வுச்சதே. மக்³க³ம் பா⁴வேந்தஸ்ஸ நாம ஆதி³ம்ஹி தி³ட்டி²விசிகிச்சா²னம் பஹானாய கம்மம் மஹந்தம் ஹோதி. கஸ்மா, அபாயமூலகத்தா. தத்த² ஸத்³தா⁴ ச விசிகிச்சா² ச த்³வே உஜுப்படிபக்கா² ஹோந்தி. யஸ்மிம் ஆரம்மணே ஸத்³தா⁴ நிவிஸதி, தஸ்மிம் விசிகிச்சா² நத்தி². யஸ்மிம் விசிகிச்சா² நிவிஸதி, தஸ்மிம் ஸத்³தா⁴ நத்தி². ததா² பஞ்ஞாதி³ட்டி²யோ ச உஜுப்படிபக்கா². யத்த² பஞ்ஞா, ந தத்த² தி³ட்டி². யத்த² தி³ட்டி², ந தத்த² பஞ்ஞாதி. அபி ச ஸத்³தா⁴ அத்தனோ விஸயே தி³ட்டி²ம் வித⁴மதியேவ. பஞ்ஞாய விசிகிச்சா²வித⁴மனே வத்தப்³ப³மேவ நத்தி². தஸ்மா ஆரத்³த⁴ விபஸ்ஸகோ அனிச்சாதீ³ஸு அவேச்சப்பஸாத³மத்தேனபி தி³ட்டி²விசிகிச்சா²யோ பஜஹித்வா ஸத்³தா⁴னுஸாரிபா⁴வஞ்ச ஸுட்டு²தரம் பஸீதி³த்வா ஸத்³தா⁴விமுத்தபா⁴வஞ்ச பாபுணாதி. பஞ்ஞாய அனிச்சாதீ³னி நிஜ்ஜா²னக்க²மம் கத்வா த⁴ம்மானுஸாரிபா⁴வஞ்ச ஸுட்டு²தரம் பஸ்ஸித்வா தி³ட்டி²பத்தபஞ்ஞா விமுத்தபா⁴வஞ்ச பாபுணாதி. வீரியம் பன தி³ட்டி²விசிகிச்சா²னம் படிபக்க²மத்தம்பி ந ஹோதி. அத² கோ² தாஸம் ஸஹாயோபி ஹோதி, து⁴ரபூ⁴தஞ்ச. பக்³க³ஹலக்க²ணஞ்ஹி வீரியம். தம் ஸத்³த⁴ம்பி பக்³க³ண்ஹாதி, பஞ்ஞம்பி பக்³க³ண்ஹாதி, தி³ட்டி²ம்பி பக்³க³ண்ஹாதி, விசிகிச்ச²ம்பி பக்³க³ண்ஹாதியேவ. குதோபன அத்தனோ ஸபா⁴வேன தி³ட்டி²விசிகிச்சா²யோ பஜஹிதும் ஸக்கி²ஸ்ஸதி. தஸ்மா இமஸ்மிம் டா²னே வீரியவாஹீதி ச வீரியது⁴ரோதி ச ந வுத்தோதி. காயஸக்கி²ம்ஹி பன ஸத்³தா⁴ ச பஞ்ஞா ச ஸமப³லா ஹோந்தி. வீரியஞ்ச ஸயம் ஸம்மப்பதா⁴னட்டா²னே ட²த்வா தது³ப⁴யம் உபப்³ரூஹேதி. ஸோ ச புக்³க³லோ தது³ப⁴யப³லேன தி³ட்டி²விசிகிச்சா²த³யோ பஜஹித்வா காயஸக்கி²பா⁴வம் பாபுணாதி. அட்ட²விமோக்கே² வா உப்பாதே³த்வா உப⁴தோபா⁴க³ விமுத்தபா⁴வம் பாபுணாதி. இமேஸு பன த்³வீஸு புக்³க³லேஸு வீரியஸ்ஸ தா²மோ ஸுட்டு² பாகடோ. தஸ்மா இமே த்³வே வீரியாதி⁴காத்வேவ வத்தப்³பா³. ந வீரியது⁴ரோதி. சதுப்படிபதா³ நாம து³க்கா²படிபதா³ த³ந்தா⁴பி⁴ஞ்ஞா. து³க்கா²படிபதா³ கி²ப்பாபி⁴ஞ்ஞா. ஸுகா²படிபதா³ த³ந்தா⁴பி⁴ஞ்ஞா. ஸுகா²படிபதா³ கி²ப்பாபி⁴ஞ்ஞா. திவித⁴விமோக்கோ² நாம ஸுஞ்ஞதோ விமோக்கோ². அனிமித்தோ விமோக்கோ². அப்பணிஹிதோ விமோக்கோ². ‘‘தயோ அந்தரா பரினிப்³பா³யினோ’’தி ஏத்த² ஆயுகப்பஸ்ஸ பரியந்தம் அபத்வா அந்தரா ஏவ கிலேஸபரினிப்³பா³னபத்தா அந்தராபரினிப்³பா³யீ நாம. ஸோ திவிதோ⁴. ஆயுகப்பஸ்ஸ பத²மபா⁴கே³ பரினிப்³பா³யீ, து³தீயபா⁴கே³, ததீயபா⁴கே³தி. இமே தயோ அந்தரா பரினிப்³பா³யினோ நாம. உபஹச்சபரினிப்³பா³யீ நாம ஆயுகப்ப பரியந்தே பரினிப்³பா³யீ. உத்³த⁴ம் முகோ² வட்டஸோதோ ஏதஸ்ஸாதி உத்³த⁴ம்ஸோதோ. அகனிட்ட²ம் அவஸ்ஸம் க³மிஸ்ஸதீதி அகனிட்ட²கா³மீ. விபஸ்ஸனா கம்மம் ஸஸங்கா²ரம் ஸப்பயோக³ம் கத்வா பரினிப்³பா³யீ ஸஸங்கா²ர பரினிப்³பா³யீ. ஸங்கா²ரரஹிதேன ஸுகே²ன விபஸ்ஸனா கம்மேன பரினிப்³பா³யீ அஸங்கா²ர பரினிப்³பா³யீ. ‘‘த்³வாத³ஸ ஸோதாபன்னா’’தி ஏகபீ³ஜிகா தயோ. தே ஏவ சதூஹி படிபதா³ஹி கு³ணிதா த்³வாத³ஸ. த்³வாத³ஸ ஸகதா³கா³மினோ புப்³பே³ வுத்தனயா ஏவ.

ஏகச்சானம் ஏவ அனாகா³மி அரஹந்தானம் ஏவ. ‘‘அஜ்ஜோ²ஸிதஸ்ஸா’’தி அதி⁴ஓஸிதஸ்ஸ. மமேவித³ந்தி நிட்டா²னம் கத்வா ட²பிதஸ்ஸ. கி³லித்வா ட²பிதஸ்ஸாதி வுத்தம் ஹோதி. ப³ஹலேன தூ²லேன காமராகே³ன விமுத்தா ப³ஹலராக³விமுத்தா. ஆருப்பேஸு ச தஸ்ஸோ அரூபஸமாபத்தியோ ஏவ அத்தி². ந சதஸ்ஸோ ரூபஸமாபத்தியோ. தஸ்மா தத்த² அனுபுப்³ப³னிரோதோ⁴ ந லப்³ப⁴தி. ‘‘ஆதி³தோ பட்டா²யா’’தி அட்ட²ஸு ஸமாபத்தீஸு பத²மஜ்ஜா²ன ஸமாபத்திஆதி³. ததோ பட்டா²ய. அனுபுப்³ப³னிரோதோ⁴ நாம பத²மஜ்ஜா²னே படிக⁴ஸஞ்ஞானானத்தஸஞ்ஞானம் நிரோதோ⁴. படிக⁴ஸஞ்ஞா நாம பஞ்சவிஞ்ஞாணஸஞ்ஞா. நானத்தஸஞ்ஞா நாம கஸிண நிமித்ததோ அஞ்ஞேஸு நானாரம்மணேஸு பவத்தமனோவிஞ்ஞாண ஸஞ்ஞா. து³தீயஜ்ஜா²னே விதக்க விசாரானம் நிரோதோ⁴திஆதி³னா அனுபுப்³ப³ நிரோதோ⁴. ‘‘ததோ பஞ்சமஜ்ஜா²னம்’’தி பஞ்சகனயேன வுத்தம். அட்ட²ஸமாபத்தி வசனம் பன சதுக்கனயேன வுத்தம். தது³ப⁴யம்பி புக்³க³லானுரூபம் லப்³ப⁴தியேவ. யுக³னந்த⁴ம் நாம த்³வந்த³ப³ந்த⁴னம், ஸமத²விபஸ்ஸனானம் யுக³னந்த⁴ந்தி விக்³க³ஹோ. ‘‘ஸமாபஜ்ஜன வுட்டா²ன விபஸ்ஸனாவஸேனா’’தி ஏத்த² வஸிபா⁴வபத்தம் ஸமாபஜ்ஜனஞ்ச வுட்டா²னஞ்ச க³ஹேதப்³ப³ம். அத்தனோ ஸரீரா ப³த்³தே⁴ஸு பரிக்கா²ரேஸு ஸமாபத்திப³லேனேவ அந்தராயாபா⁴வதோ விஸும் அதி⁴ட்டா²தப்³ப³ கிச்சம் நத்தீ²தி வுத்தம் ‘‘அத்தனோ ஸரீராப³த்³தே⁴ பரிக்கா²ரே ட²பேத்வா’’தி. ‘‘நானாப³த்³தா⁴னீ’’தி நானாடா²னேஹி ஆப³த்³தா⁴னி. நானாடா²னேஸு ட²பிதானீதி வுத்தம் ஹோதி. ‘‘பரிஸ்ஸயேனா’’தி அந்தராயேன. மாவினஸ்ஸந்தூதி வா நானாப³த்³த⁴ அவிகோபனம் அதி⁴ட்டா²தப்³ப³ம். ததா³ வுட்ட²ஹாமீதிவா ஸங்க⁴ப்பதிமானனம் அதி⁴ட்டா²தப்³ப³ம். ஏவம் ஸத்து²பக்கோஸனம்பி. ‘‘அத்³தா⁴னபரிச்சே²தோ³’’தி அத்தனோ ஜீவிதகாலஸ்ஸ உபபரிக்க²ணம். மரணஞ்ஹி நாம ஸமாபத்திப³லேனபி படிபா³ஹிதும் ந ஸக்காஹோதி. அந்தோ ஸமாபத்தியஞ்ச மரணே ஸதி ஸப்³ரஹ்மசாரீஸு கத்தப்³ப³வத்தம் ந கரேய்ய. ஏதஞ்ஹி வத்தம் யம் அரியஸாவகானம் மரணாஸன்னே ஸப்³ரஹ்மசாரீனம் வா உபட்டா²கானம் வா அப்பமாத³கதா²னு ஸாஸனிகம்மம். ஸமாபத்தியம் வா அஞ்ஞதித்தி²யானம் க³ரஹா விவஜ்ஜனத்த²ம். ஏவஞ்ஹி தே க³ரஹேய்யும். கோ³தமஸாவகானம் நிரோத⁴ஸமாபத்தி நாம ஏகம் மரணமுக²ம். யம் ஸமாபஜ்ஜந்தோ அஸுகோ பி⁴க்கு² மரணம் க³ச்ச²தி. அனரிய கம்மம் ஹேதந்தி.

‘‘யத³த்த²ம்’’தி படிபத்தி ரஸஸ்ஸாத³த்த²ம். ‘‘தத³த்தே²’’தி தஸ்மிம் அத்தே². நிராமிஸ ஸுக²ம் நாம ஆமிஸரஹித ஸுக²ம். து³வித⁴ஞ்ஹி ஸுக²ம் ஸாமிஸஸுக²ஞ்ச நிராமிஸஸுக²ஞ்ச. தத்த² யே லோகே இட்ட² கந்த மனாபியா பஞ்சகாமகு³ணா நாம அத்தி². தே கிலேஸேஹி ஆமஸிதப்³ப³த்தா ஆமிஸா நாம. யஞ்சஸுக²ம் தே ஆமிஸே படிச்ச உப்பஜ்ஜதி, தம் ஸாமிஸஸுக²ம் நாம. யம் லோகே தி³ப்³ப³ம் ஸுக²ம் மானுஸகம் ஸுக²ந்தி மமாயந்தி. யஞ்ச அனுப⁴வந்தம் மஹாஜனம் ஸப்³பா³னி அபாயப⁴ய வட்டப⁴யானி ஸம்பரிவாரேந்தி. ஜா²னஸுக² மக்³க³ஸுக² ப²லஸுக² நிப்³பா³னஸுக²ம் பன நிராமிஸஸுக²ம் நாம. யம் நேக்க²ம்மஸுக²ந்தி ச பவிவேகஸுக²ந்தி ச உபஸமஸுக²ந்தி ச ஸம்போ³தி⁴ஸுக²ந்தி ச விமுத்திஸுக²ந்தி ச அரியஸுக²ந்தி ச அனவஜ்ஜஸுக²ந்தி ச வுச்சதி. யஞ்ச அனுப⁴வந்தம் அரியஜனம் ஸப்³பா³னி அபாயப⁴ய வட்டப⁴யானி ஸம்பரிவஜ்ஜந்தி. ‘‘அஸ்ஸாதி³தப்³ப³ட்டே²னா’’தி கிலேஸபலிபோ³தே⁴ஹி விமுத்தத்தா விபுல க³ம்பீ⁴ர ஸந்த பணீதரஸத்தா ச அஹோஸுக²ம் அஹோஸுக²ந்தி உதா³ஹரந்தேனபி அஸ்ஸாதி³தப்³ப³ட்டே²னாதி.

கம்மட்டா²னஸங்க³ஹானுதீ³பனா நிட்டி²தா.

நிக³மகா³தா²ஸு.

262. சரிதப்³ப³ந்தி சாரித்தம். த³ஸகுஸலகம்மபத²த⁴ம்மஜாதம். ‘‘குலாசாரேனா’’தி குலபரம்பரதோ ஆக³தேன ஆசாரேன. ‘‘ஞாதி மித்த த⁴ன போ⁴க³ஸம்பத்தியா’’தி ஹேதுஅத்தே² கரணவசனம். ‘‘விஸாலே’’தி விபுலே. ‘‘தேனா’’தி தஸ்ஸபத³ஸ்ஸ விப⁴த்யந்த த³ஸ்ஸனம். ‘‘ஸத்³தா⁴யா’’தி ரதனத்தயே அவேச்சப்பஸாத³ஸத்³தா⁴வஸேன. ‘‘அபி⁴வுட்³டா⁴னம்’’தி ஹானபா⁴கி³ய டி²திபா⁴கி³யபா⁴வம் அதிக்கம்மவிஸேஸபா⁴கி³ய நிப்³பே³த⁴பா⁴கி³ய பா⁴வபத்திவஸேன அதிஸ்ஸய வுட்³டா⁴னம். ‘‘பரிஸுத்³தா⁴னஞ்சா’’தி அத்துக்கம்ஸன பரவம்ப⁴னாதி³ தோ³ஸேஹி பரிஸுத்³தா⁴னஞ்ச. நம் நம் ஜனம் பாதிரக்க²தீதி நம்போ. தி³ட்ட²தி³ட்டே²ஸு மேத்தாவிஹாரீதி வுத்தம் ஹோதி. ஆவ்ஹாதப்³போ³தி அவ்ஹயோ. நாமம். நம்போ இதி அவ்ஹயோ அஸ்ஸாதி நம்பவ்ஹயோதி வசனத்தோ². ‘‘பணிதா⁴யா’’தி பத்தே²த்வாதி அத்த²ம் நிவத்தேதி ‘‘பு⁴ஸம் நிதா⁴யா’’திஆதி³னா. ‘‘உபாதா³ய படிச்சா’’தி தஸ்ஸ பத³ஸ்ஸ பரியாயத³ஸ்ஸனமேதம். ‘‘அத்தனோ மந்த³பு³த்³தீ⁴னம்’’தி பச்சக்கே² த⁴ரமானானந்தி அதி⁴ப்பாயோ. தேனாஹ ‘‘பச்சி²ம ஜனானம் வா’’தி. அனுகம்பனம் அனுகம்போ. கத²ம் நு கோ² இமே ஜனா அபி⁴த⁴ம்மத்தே²ஸு ஸுகே²ன ஆஜானேய்யுந்தி ஏவம் பவத்தோ சித்தப்³யாபாரோ. அத்த²தோ அனுத³யஸங்கா²தா கருணாயேவ. தேனாஹ ‘‘அனுத³யம் காருஞ்ஞம்’’தி. ‘‘பத்தி²தம்’’தி வா ஸாது⁴வதஸ்ஸ யம் தே²ரோ ஏவரூபம் பகரணம் கரேய்யாதி ஏவம் சிரகாலம் பத்தி²தம் ஆஸிம்ஸிதந்தி அத்தோ². ‘‘கு²த்³த³ஸிக்கா²டீகாயம்’’தி போராணடீகம் ஸந்தா⁴ய வுத்தம். ஸோமவிஹாரோத்வேவ பஞ்ஞாயித்த² தஸ்மிம் தீ³பேதி அதி⁴ப்பாயோ. கா³தா²யம் ‘‘அதா²’’தி தஸ்மிம்காலே. ‘‘ஏத்தா²’’தி ஏதஸ்மிம் நக³ரே. ‘‘ஸத்³தோ³’’தி கஸ்மா ராஜா ஏவரூபம் மங்க³லஹத்தி²ம் ப்³ராஹ்மணானம் அதா³ஸி. நேதம் பதிரூபம் யம் ரஞ்ஞா கதந்தி ஏவம் பவத்தோ அமனாபஸத்³தோ³. ‘‘பே⁴ரவோ’’தி பீ⁴ருதாஜனகோ ப⁴யானகோ. ‘‘ஸிவீனம்’’தி ஸிவிரட்ட²வாஸீனம். ‘‘ரட்ட²வட்³ட⁴னே’’தி ரட்ட²ம் வட்³டே⁴தீதி ரட்ட²வட்³ட⁴னோ. ஹத்தி²னாகோ³. ஸோ ஹி லக்க²ணஸம்பன்னோ ஆஜானியோ ஹோதி. யஸ்மிம் ரட்டே² தம் அபி⁴மங்க³லம் கரோந்தி, தஸ்மிம் ரட்டே² தே³வோ ஸம்மா வஸ்ஸதி, நானாப⁴யுபத்³த³வா தஸ்மிம் நுப்பஜ்ஜந்தீதி லோகஸம்மதோ மங்க³லஹத்தீ² ஹோதி. தேன வுத்தம் ‘‘ஸிவீனம் ரட்ட²வட்³ட⁴னே’’தி. ‘‘வித்தி²ண்ணோ’’தி வித்தா²ரிதோ. அதிவித்தா²ரோதி வுத்தம் ஹோதி. த⁴னீயந்தி மஹாஜனேஹி த³ட்டு²ம் பத்தீ²யந்தீதி த⁴ஞ்ஞா. மஹித்³தி⁴கா. அதி⁴வஸந்தி ஏத்தா²தி அதி⁴வாஸோ. த⁴ஞ்ஞானம் அதி⁴வாஸோதி ஸமாஸோ. அஜ்ஜா²வஸிம்ஸு ஏத்தா²தி அஜ்ஜா²வுத்த²ம். கித்திகு³ணவஸேன உதே³ந்தி உக்³க³ச்ச²ந்தீதி உதி³தா. உதி³தானம்பி உதி³தோதி விக்³க³ஹோ. தேனாஹ ‘‘நப⁴மஜ்ஜே²’’திஆதி³ம். ஸாரஜ்ஜனம் ஸாரதோ³. விக³தோ ஸாரதோ³ யஸ்ஸாதி விஸாரதோ³. விஸாரத³ஸ்ஸ பா⁴வோ வேஸாரஜ்ஜம். பரியத்தியம் வேஸாரஜ்ஜம் பரியத்திவேஸாரஜ்ஜம். தேபிடகபரியத்தியம் வேய்யத்தியஞ்ஞாணம். தம் ஆதி³ ஏதிஸ்ஸா பஞ்ஞாயாதி பரியத்திவேஸாரஜ்ஜாதி³ பஞ்ஞா. பாபதோ லஜ்ஜனஸீலாதி லஜ்ஜினோதி ஆஹ ‘‘பாபக³ரஹினோ’’தி. பாபம் த⁴ம்மம் க³ரஹந்திஆதீ³னவம் கத²யந்தி ஸீலேனாதி பாபக³ரஹினோ. ‘‘அனுஸ்ஸரந்தூ’’தி புனப்புனம் ஸரந்து. விஸேஸேன ப⁴வந்தி வேபுல்லம் க³ச்ச²ந்தீதி விப⁴வா. புஞ்ஞானி ச தானி விப⁴வாசாதி புஞ்ஞவிப⁴வா. விபுலபுஞ்ஞானீதி த³ஸ்ஸேதும் ‘‘விபுலானம்’’திஆதி³மாஹ. அனுத்தரிய த⁴ம்மா நாம த³ஸ்ஸனானுத்தரிய ஸவனானுத்தரியாத³யோ. லோகே ப³ஹூஸு த³ஸ்ஸனேஸு இதோ உத்தரம் அஞ்ஞம் த³ஸ்ஸனம் நாம நத்தீ²தி த³ஸ்ஸனானுத்தரியம். ரதனத்தயத³ஸ்ஸனம். சதுஸச்சத³ஸ்ஸனஞ்ச. ரதனத்தயகு³ணகதா²ஸவனம், க²ந்தா⁴யதன தா⁴து ஸச்சபடிச்சஸமுப்பாத³கதா²ஸவனஞ்ச ஸவனானுத்தரியம் நாம. தேஸு ரதனத்தயாதீ³ஸு ஸத்³தா⁴ படிலாபோ⁴ லாபா⁴னுத்தரியம் நாம. தேஸமேவ புனப்புனம் ஸரணம் அனுஸ்ஸதானுத்தரியம் நாம. ரதனத்தயே சதூஹி பச்சயேஹி வா வத்தப்படிவத்தகரணேன வா பரிசரணம் பாரிசரியானுத்தரியம் நாம. பு³த்³த⁴பஞ்ஞத்தாஸு தீஸு ஸிக்கா²ஸு ஸமாதா³ய ஸிக்க²னம் ஸிக்கா²னுத்தரியம் நாம. தாதி³ஸே பஞ்ஞாவதா³தகு³ணஸோபா⁴தி³கே கு³ணே அவஸ்ஸம் ப⁴ஜந்தி பாபுணந்தீதி தாதி³ஸகு³ணபா⁴கி³னோ. ‘‘ப⁴விஸ்ஸாமா’’தி ப⁴விதும் உஸ்ஸாஹம் கரிஸ்ஸாமாதி வுத்தம் ஹோதி.

தீ³பனியா நிக³மகா³தா²ஸு.

‘‘ப³ஸ்ஹ்யுஸுஞ்ஞசம்மேகம்ஹீ’’தி ஏத்த² ‘‘ப³ஸ்ஹ்யூ’’தி அட்ட²ஸங்க்²யாய ஸங்கேத வசனம். ‘‘சம்மம்’’தி த்³விஸங்க்²யாய. ஏகஞ்ச து³கஞ்ச ஸுஞ்ஞஞ்ச அட்ட²சாதி க³ணனக்கமோ. ஸஹஸ்ஸ த்³விஸத அட்ட²ஸங்கா²தே ஸாகேதி அத்தோ². ஏஸனயோ பரதோ ‘‘நவபஞ்ச சம்மேகம்ஹீ’’தி பதே³பி. கா³தா²வண்ணனாஸு. நக³ரதி ந சவதீதி நக³ரம். தா²வரியந்தி வுத்தம் ஹோதி. ‘‘ரஞ்ஜேதீ’’தி ரமேதி. கே²மஸுபி⁴க்க²தாதி³கு³ணேஹி அனாக³தே ஜனே க³மாபேதி, ஆக³தே அஞ்ஞத்த² க³ந்தும் ந தே³தீதி வுத்தம் ஹோதி. ரோஹிதமிகா³ நாம ஸுவண்ணவண்ணமிகா³. ‘‘ஸாகே’’தி ஸாகனாமேன ரஞ்ஞா புன ஸங்க²தத்தா இமம் கலியுக³ம் ஸாகந்தி வுச்சதி. யம் ஏதரஹி ஸாக்ரராஜந்திபி வோஹரந்தி. ஸாகராஜா ச நாம உத்தராபதே²ஸு ஏகோ க³ந்தா⁴ரராஜா. யம் ஜேட்ட²கம் கத்வா பி⁴ன்னலத்³தி⁴கா வஜ்ஜீபி⁴க்கூ² இமம் த⁴ம்ம வினயம் மஹாஸங்கீ⁴கம் நாம ஸங்க³ஹம் ஆரோபேந்தி. ஸோ ச த⁴ம்மவினயஸங்க³ஹோ உத்தராபதே²ஸு வத்ததி. வேஸாலியம் யஸத்தே²ர ஸங்க³ஹோ பன த³க்கி²ணாபதே²ஸூதி. சத்தாரியுகா³னி நாம லோகே பஞ்ஞபேந்தி ஸத்யயுக³ம், த்³வாபரயுக³ம், தேத்ரயுக³ம், கலியுக³,ந்தி. யுக³ந்தி ச ஆயுபரிமாணம் வுச்சதி. இதா³னிபன கலியுக³ம் வத்ததி. தேன வுத்தம் ‘‘ஸாகேதி கலியுகே³’’தி. பாபயுகே³தி அத்தோ². ‘‘ல தீ’’தி ஸாலிக்கே²த்தானம் ஸோத⁴னட்டா²னத்தா ஏவம் ம்ரம்மதே³ஸவோஹாரேன லத்³த⁴னாமம் அரஞ்ஞம். தம் பன மும்ர்வானக³ரஸ்ஸ ஏஸன்னே பஞ்சத⁴னுஸதிகே பதே³ஸே ஜாதம். ‘‘விஸ்ஸுதே’’தி விஸேஸேன கித்திதே. ஸாரஞ்ச அஸாரஞ்ச விவேசேந்தி விசாரேத்வா ஜானந்திஸீலேனாதி ஸாராஸார விவேகினோதி வசனத்தோ²தி.

இதி பரமத்த²தீ³பனியா அனுதீ³பனா நிட்டி²தா.

1. பரமத்த²தீ³பனீ நாம, யேன தே²ரேன ஸா கதா.

தேனேவே ஸா கதா ஹோதி, அயம் தஸ்ஸானு தீ³பனீ.

2. அட்ட²ஸத்தத்³வயேகம்ஹி, ஸாகே ஸா ஜேட்ட²மாஸகே.

காளே நவமியம் தி³வா, மஜ்ஜ²ன்ஹிகே நிட்ட²ம் க³தா.

அனுதீ³பனீ நிட்டி²தா.