4. வீதி²ஸங்க³ஹஅனுதீ³பனா

136. வீதி²ஸங்க³ஹே. ‘‘தேஸஞ்ஞே வா’’தி சித்த சேதஸிகானம் ஏவ. ‘‘வுத்தப்பகாரேனா’’தி ‘தத்த² சித்தம் தாவ சதுப்³பி³த⁴ம் ஹோதி காமாவசரம் ரூபாவசரம், திஆதி³னா இச்சேவம் வுத்தப்பகாரேன. ‘‘புப்³பா³ பரனியாமிதம்’’தி வா த்³வத்திம்ஸ ஸுக² புஞ்ஞம்ஹாதிஆதி³னா நயேன புப்³பா³ பரனியாமிதம். ‘‘ஆரப்³ப⁴கா³தா²யா’’தி.

வீதி² சித்தவஸேனேவம், பவத்திய முதீ³ரிதோ;

பவத்தி ஸங்க³ஹோ நாம, ஸந்தி⁴யம் தா³னி வுச்சதீ.தி

ஏவம் பவத்திகாலே பவத்தி ஸங்க³ஹோ, படிஸந்தி⁴காலே பவத்தி ஸங்க³ஹோதி ஸித்³தோ⁴ ஹோதி. கேசி வாதே³ ‘‘படிஸந்தி⁴ பவத்தியம்’’தி நித்³தா⁴ரணே க³ஹிதே த்³வீஸு படிஸந்தி⁴ ஸங்க³ஹ பவத்தி ஸங்க³ஹேஸு இதா³னி பவத்தி ஸங்க³ஹம் பவக்கா²மி, பச்சா² படிஸந்தி⁴ ஸங்க³ஹம் பவக்கா²மீதி அத்தோ² ஹோதி. தத்த² ‘‘படிஸந்தி⁴ ஸங்க³ஹோ’’தி படிஸந்தி⁴காலே ஸங்க³ஹோ. ‘‘பவத்தி ஸங்க³ஹோ’’தி பவத்திகாலே ஸங்க³ஹோ. ஸோ ச உபரிகா³தா²ய ந ஸமேதீதி த³ஸ்ஸேதும் ‘‘ஏவம் ஸதீ’’திஆதி³மாஹ. ‘‘தானி தீணி ச²க்கானி நிக்கி²த்தானீ’’தி ச²க்கமத்தானி நிக்கி²த்தானி, ந ஸகலம். வத்து² த்³வாரா லம்ப³ண ஸங்க³ஹோதி அதி⁴ப்பாயோ. ‘‘ஸா பனா’’தி ஸாவிஸயப்பவத்தி பன. ‘‘காசி ஸீக⁴தமா’’தி காசி அதிரேகதரம் ஸீகா⁴. ‘‘த³ந்தா⁴’’தி ஸணிகா, சிராயிகா. ‘‘அனுபபன்னா’’தி அஸம்பன்னா. அஸம்பன்ன தோ³ஸோ ஆக³ச்ச²தீதி வுத்தம் ஹோதி. ‘‘தா⁴துபே⁴த³ம்’’தி ஸத்த விஞ்ஞாண தா⁴தூனம் விபா⁴க³ம். ‘‘தா⁴துனானத்தம்’’தி தா⁴ரண கிச்சனானத்தம். இதி தஸ்மா மனோதா⁴து விஸும் வுத்தாதி ஸம்ப³ந்தோ⁴. ‘‘மனனம்’’தி விஜானனபா⁴வம் அபத்தம். ஆவஜ்ஜனமத்த ஸம்படிச்ச²னமத்த ஸங்கா²தம் ஜானனமத்தம். ‘‘யம் கிஞ்சி மனனம்’’தி அந்தமஸோ ஆவஜ்ஜனமத்த ஸம்படிச்ச²னமத்தம் பீதி அதி⁴ப்பாயோ. ‘‘ஸுத்³தோ⁴ பன மனோவிஞ்ஞாணப்பப³ந்தோ⁴’’தி மனோத்³வார விகாரம் படிச்ச பவத்தோ மனோவிஞ்ஞாணப்பப³ந்தோ⁴. ந ப⁴வங்க³ மனோவிஞ்ஞாணப்பப³ந்தோ⁴. ஸோ ஹி வீதி²முத்தத்தா இத⁴ அப்பஸங்கோ³தி. மனோத்³வாரே பன த்³விதா⁴தி ஸம்ப³ந்தோ⁴. பு³த்³த⁴ஸ்ஸ ப⁴க³வதோ பத²மாபி⁴னீஹாரகாலோ நாம ஸுமேத⁴தாபஸகாலே பு³த்³த⁴ பா⁴வாய காய சித்தானம் அபி⁴னீஹாரகாலோ. ஆதி³ஸத்³தே³ன பச்சி²ம ப⁴வே படிஸந்தி⁴க்³க³ஹணாதி³ம் ஸங்க³ண்ஹாதி. ‘‘ஜாதி ப²லிகக்க²ந்தா⁴ விய ஸம்பஜ்ஜந்தீ’’தி தேன ஓபா⁴ஸேன அஜ்ஜோ²த்த²டத்தா ஜாதிப²லிகக்க²ந்த⁴ ஸதி³ஸா ஹோந்தீதி அதி⁴ப்பாயோ. ‘‘உபபத்தி தே³வ ப்³ரஹ்மானம் பனா’’தி உபபத்திப்படிஸந்தி⁴கானம் ஓபபாதிக தே³வ ப்³ரஹ்மானம் பன. ‘‘பஸாத³ நிஸ்ஸய பூ⁴தானம்’’தி சக்கா²தீ³னம் பஸாத³ வத்தூ²னம் நிஸ்ஸய மஹாபூ⁴தானம்.

‘‘யானி பனா’’திஆதீ³ஸு. த்³வத்தி சித்தக்க²ணானி அதிக்கம்ம ஆபாதம் ஆக³ச்ச²ந்தீதி யோஜனா. ஏவம் பரத்த²பி. விபூ⁴தஸ்ஸாதி ச அவிபூ⁴தஸ்ஸாதி ச இத³ம் ஆதி³ம்ஹி மனோத்³வாரே பன விபூ⁴தஸ்ஸாதி ச அவிபூ⁴தஸ்ஸாதி ச பதா³னம் உத்³த⁴ரணம். ‘‘ரூபா ரூபானம்’’தி ரூப த⁴ம்மானஞ்ச அரூப த⁴ம்மானஞ்ச. ‘‘தாவா’’தி வீதி² சித்தப்பவத்தி த³ஸ்ஸனதோ பத²மதரம் ஏவாதி அத்தோ². ‘‘அத்³தா⁴ன பரிச்சே²த³ம்’’தி க²ணகால பரிச்சே²த³ம். விபா⁴வனிபாடே² ‘‘அதிமஹந்தா தி³வஸேன விஸய வவத்தா²னம் ஹோதீ’’தி வசனேன ஆதி³ம்ஹி ‘ச²வத்தூ²னி, ச² த்³வாரானி, ச² ஆரம்மணானி, ச² விஞ்ஞாணானி, ச² வீதி²யோ, ச² தா⁴விஸயப்பவத்தீ,தி ஏவம் வுத்தேஸு ச²ஸு ச²க்கேஸு ச²தா⁴விஸயப்பவத்தீதி பத³மத்தம் ஸங்க³ண்ஹாதி. தம் அனுபபன்னம் ஹோதி. தேனாஹ ‘‘ஏவஞ்ஹி ஸதீ’’திஆதி³ம். ‘‘விஸய வவத்தா²னத்த² மேவா’’தி அதிமஹந்தாதி³ விஸய வவத்தா²னத்த²மேவ வுத்தந்தி ந ச ஸக்கா வத்தும். ரூபா ரூப த⁴ம்மானம் அத்³தா⁴ன பரிச்சே²தோ³ நாம அபி⁴த⁴ம்மே ஸப்³ப³த்த² இச்சி²தப்³போ³. தஸ்மா தஸ்ஸ த³ஸ்ஸனத்த²ம்பி தம் வுத்தந்தி த³ட்ட²ப்³ப³ம். ‘‘ஸபா⁴வப்படிலாபோ⁴’’தி சிந்தன பு²ஸனாதீ³னம் பாதுபா⁴வோ வுச்சதி. ‘‘அனிவத்தீ’’தி அனந்தரதா⁴னம் வுச்சதி. ‘‘பரிஹாயித்வா’’தி ஜரா கிச்சம் ஆஹ. ‘‘அச்ச²ராஸங்கா⁴டக்க²ணஸ்ஸா’’தி அங்கு³லீனம் ஸங்க⁴ட்டனக்க²ணஸ்ஸ. ஆசரியானந்த³த்தே²ரோ நாம அபி⁴த⁴ம்ம டீகாகாரோ வுச்சதி. ‘‘அஸ்ஸா விஜ்ஜுயாடி²தி நாம விஸும் ந பஞ்ஞாயதீ’’தி விஜ்ஜுப்பாத³ம் பஸ்ஸந்தானம் ந பஞ்ஞாயதி. ததா² சித்தம்பி வட்³ட⁴னானந்தரமேவ பி⁴ஜ்ஜதீதி யோஜனா. தேனாஹ ‘‘தம் பீ’’திஆதி³ம். உத³யபா⁴கோ³ நாம வட்³ட⁴னபா⁴கோ³, வயபா⁴கோ³ நாம அந்தரதா⁴னபா⁴கோ³. ‘‘ஏவஞ்ச கத்வா’’தி லத்³த⁴கு³ண வசனம். ‘‘ஏகம்சித்தம் தி³வஸம் திட்ட²தீ’’தி புச்சா² வசனம். ‘‘ஆமந்தா’’தி படிஞ்ஞா வசனம். ‘‘வயக்க²ணோ’’தி புச்சா². ‘‘ந ஹேவம் வத்தப்³பே³’’தி படிக்கே²போ. பச்சத்த வசனஸ்ஸ ஏகாரத்தம். ஏவம் நவத்தப்³ப³ந்தி அத்தோ². ‘‘மஹாதே²ரேனா’’தி மோக்³க³லி புத்ததிஸ்ஸ மஹாதே²ரேன. நனு ஸுத்தந்தேஸு வுத்தந்தி ஸம்ப³ந்தோ⁴. ‘‘நா’’தி ந உபலப்³ப⁴தி. ‘‘இமஸ்ஸ வுத்தத்தா’’தி இமஸ்ஸ வசனஸ்ஸ வுத்தத்தா. ஸங்க²த லக்க²ணம் விஸயோ யேஸம் தானி ஸங்க²த விஸய லக்க²ணானி. ஸங்க²த த⁴ம்மமேவ ஆஹச்ச திட்ட²தி. அயம் அபி⁴த⁴ம்மே த⁴ம்மதாதி அதி⁴ப்பாயோ. ‘‘ஸங்க³ஹ காரேனா’’தி ஆசரிய பு³த்³த⁴கோ⁴ஸத்தே²ரம் வத³தி. ‘‘அத்தி²க்க²ணம்’’தி க²ணத்³வயமேவ வுச்சதி. இதி வத்வா தமத்த²ம் ஸாதே⁴ந்தீதி ஸம்ப³ந்தோ⁴. கா³தா²யம். ‘‘தஸ்ஸேவா’’தி தஸ்ஸா டி²தியா ஏவ பே⁴தோ³. ஸப்³ப³தா³ ஸப்³ப³பாணினம் மரணம் நாம வுச்சதீதி யோஜனா. ‘‘தமத்த²ம்’’தி தானி அத்தி²க்க²ணம் உபாதா³ய லப்³ப⁴ந்தீதி அத்த²ம். ‘‘அத²வா’’தி ஏகோ தே²ரவாதோ³. ‘‘ஸந்ததி வஸேன டா²னம்’’தி டி²தாய அஞ்ஞத²த்தம் பஞ்ஞாயதீதி ஏத்த² டி²தபா⁴வஸங்கா²தம் டா²னம் ஸந்ததி டி²திவஸேன வேதி³தப்³ப³ந்தி வத³ந்தி. ‘‘இமஸ்மிம் பன ஸுத்தே’’தி வேத³னாய உப்பாதோ³ பஞ்ஞாயதி, வயோ பஞ்ஞாயதி, டி²தாய அஞ்ஞத²த்தம் பஞ்ஞாயதீதி இத³ம் ஸுத்தம் வத³தி. ‘‘அப்படிபா³ஹேத்வா’’தி அனீவாரேத்வா. யாவட்³ட⁴னஸ்ஸ நிவத்தி நாம அத்தி². உத³ய பரியந்த மத்தபூ⁴தா ஸா ஏவ நிவத்தி. ‘‘த்³வீஹி க²ந்தே⁴ஹீ’’தி ரூப ஜரா ரூபக்க²ந்தே⁴ன ஸங்க³ஹிதா. அரூப ஜரா ஸங்கா²ரக்க²ந்தே⁴னாதி ஏவம் த்³வீஹி க²ந்தே⁴ஹி. யஞ்ச தத்த² வுத்தந்தி ஸம்ப³ந்தோ⁴. ரூபஸ்ஸ உப்பாதோ³ த்³விதா⁴பி⁴ந்தி³த்வா தே³ஸிதோ. கத²ம், உபசயோ ஸந்ததீ தியோஜனா. ‘‘விபா⁴கா³ ரஹஸ்ஸா’’தி உப்பாதோ³ உப்பஜ்ஜ நட்டே²ன ஏகோ ஸமானோ ரூபானம் வட்³ட⁴ன ஸமயே உப்பாதோ³. உபரி வட்³ட⁴னட்டே²ன உபசயோதி வுத்தோ. அவட்³டி⁴த்வா டி²த ஸமயே உப்பாதோ³ யதா² டி²த நீஹாரேன சிரகாலம் பவத்தி அத்தே²ன ஸந்ததீதி வுத்தோ. ஏவம் விபா⁴கா³ ரஹஸ்ஸ. ‘‘யதா²னுலோம ஸாஸனம்’’தி வினேதப்³ப³ புக்³க³லானம் அஜ்ஜா²ஸயானுலோம ஸாஸனம்.

‘‘அரூப’’ந்திஆதீ³ஸு. ‘‘அரூபம்’’தி ஸப்³ப³ஸோ ரூபஸண்டா²ன ரஹிதத்தா சித்த சேதஸிகம் நாமம் வுச்சதி. ‘‘அரூபி ஸபா⁴வத்தா’’தி அரூப த⁴ம்ம ஸபா⁴வத்தா இச்சேவத்தோ². தத்த² அரூப த⁴ம்ம ஸபா⁴வோ நாம ரூப த⁴ம்மதோ ஸதகு³ணேனவாஸஹஸ்ஸகு³ணேனவாஸண்ஹஸுகு²மஸபா⁴வோ. விபா⁴வ நிபாடே². ‘‘கா³ஹக க³ஹேதப்³ப³ பா⁴வஸ்ஸ தம் தம் க²ணவஸேன நிப்ப²ஜ்ஜனதோ’’தி ஏத்த² பஞ்சத்³வார வீதீ²ஸு வீதி² சித்தானஞ்ச ஆரம்மணானஞ்ச விஸயீ விஸயபா⁴வோ கா³ஹக க³ஹேதப்³ப³ பா⁴வோ நாம. ‘‘தம் தம் க²ணவஸேன நிப்ப²ஜ்ஜனதோ’’தி வீதி² சித்தானி ச ஏகஸ்மிம் ஆரம்மணேபி ஆவஜ்ஜனாதீ³ஹி நானா கிச்சேஹி க³ண்ஹந்தா ஏவ க³ஹண கிச்சம் ஸம்பாதே³ந்தி. நானா கிச்சானி ச நானா சித்தானம் வஸேன ஸம்பஜ்ஜந்தி. ஆரம்மணானி ச புரேஜாதானி ஹுத்வா யாவ தானி கிச்சானி ஸம்பஜ்ஜந்தி, தாவ பச்சுப்பன்னபா⁴வேன த⁴ரமானானி ஏவ க³ஹணம் ஸம்பாதே³ந்தி. ஏவம் ஸதி, கா³ஹகானம் வீதி² சித்தானஞ்ச க²ணத்தயாயுகத்தா ஏவ கா³ஹக கிச்சம் நிப்ப²ஜ்ஜதி, ஸிஜ்ஜ²தி. க³ஹேதப்³பா³னம் ஆரம்மணானஞ்ச ஸத்தரஸ சித்தக்க²ணாயுகத்தா ஏவ க³ஹேதப்³ப³ கிச்சம் நிப்ப²ஜ்ஜதி, ஸிஜ்ஜ²தி. ஏவம் தம் தம் க²ண வஸேன நிப்ப²ஜ்ஜனதோ. விஞ்ஞத்தி த்³வயம் ஏக சித்தக்க²ணிகம். கஸ்மா, சித்தானு பரிவத்தி த⁴ம்மத்தா. ‘‘உப்பாத³மத்தா’’தி நிப்ப²ன்ன ரூபானம் உப்பாத³மத்தா. ‘‘ப⁴ங்க³மத்தா’’தி தேஸமேவ ப⁴ங்க³மத்தா. ‘‘ரூப த⁴ம்மானம்’’தி நிப்ப²ன்ன ரூப த⁴ம்மானம். ‘‘உப்பாத³னிரோத⁴ விதா⁴னஸ்ஸா’’தி உப்பாத³ நிரோத⁴ விதா⁴னபூ⁴தஸ்ஸ மஹாஅட்ட²கதா²வாத³ஸ்ஸ படிஸித்³த⁴த்தாதி ஸம்ப³ந்தோ⁴. ‘‘தம்’’தி தம் மஹாஅட்ட²கதா² வசனம். ‘‘தஸ்மிம் வாதே³’’தி தஸ்மிம் மஹாஅட்ட²கதா²வாதே³. ‘‘தத்த² ஆக³தா’’தி தஸ்மிம் வாதே³ ஆக³தா. யம் பன விபா⁴வனியம் காரணம் வுத்தந்தி ஸம்ப³ந்தோ⁴. ‘‘தம் டீகானயம்’’தி தம் ஸோளஸ சித்தக்க²ணாயுக தீ³பகம் மூலடீகானயம். தத³த்த²ம் ஸாதே⁴ந்தேன விபா⁴வனி டீகாசரியேன வுத்தந்தி ஸம்ப³ந்தோ⁴. ஸங்க³ஹகாரஸ்ஸ அட்ட²கதா² சரியஸ்ஸ. ‘‘உபசரீயதீ’’தி உபசார வஸேன வோஹரீயதி. விபா⁴வனிபாடே². ‘‘ஏதானீ’’தி ஆரம்மணானி. ‘‘தம்’’தி தம் ஏக சித்தக்க²ணம். ‘‘தே சா’’தி ரூப த⁴ம்மா ச. ‘‘பரிபுண்ண பச்சயூபலத்³தா⁴’’தி பரிபுண்ணம் பச்சயம் உபலத்³தா⁴. ‘‘ஸோ’’தி டீகாகாரோ. ‘‘இதரானீ’’தி க³ந்த⁴ரஸ போ²ட்ட²ப்³பா³னி. ‘‘கோ³சரபா⁴வம்’’தி பஞ்சத்³வாரிக சித்தானம் கோ³சரபா⁴வம். ‘‘புரிமானி த்³வே’’தி ரூபஸத்³தா³ ரம்மணானி. ‘‘நிமித்த வஸேன க⁴ட்டேந்தீ’’தி ஆதா³ஸம் பஸ்ஸந்தஸ்ஸ முக²ஸதி³ஸம் முக²னிமித்தம் முக²ப்படிபி³ம்ப³ம் ஆதா³ஸே உபட்டா²தி. ஏவம் ரூபாரம்மணம் சக்கு²பஸாதே³ ஸத்³தா³ரம்மணஞ்ச ஸோதபஸாதே³ தம் ஸதி³ஸ நிமித்த வஸேன க⁴ட்டேந்தி. நவத்து² வஸேன க⁴ட்டேந்தி. ஸயம் க³ந்த்வா ந க⁴ட்டேந்தீதி அதி⁴ப்பாயோ. அஸம்பத்தானஞ்ஞேவ ஆரம்மணானம். ‘‘நிமித்து பட்டா²ன வஸேனா’’தி நிமித்தஸ்ஸ உபட்டா²னவஸேன. ‘‘நிமித்த அப்பனாவஸேனா’’தி நிமித்தஸ்ஸ பவேஸன வஸேன. மனோத்³வாரே பன அஸம்பத்தானியேவ ஹுத்வாதி பாட²ஸேஸோ. ‘‘ஆபாதா க³மனஞ்சேத்தா²’’திஆதீ³ஸு. ‘‘லஞ்ச²கானம்’’தி லஞ்ச²னகாரானம். ‘‘லஞ்ச²னக்க²ந்த⁴ம்’’தி அயோமயம் லஞ்ச²னக்க²ந்த⁴ம். ஸோ ச லஞ்ச²னக்க²ந்தோ⁴ தாலபண்ணே ஆபாதேத்வா அக்க²ரம் உபட்டா²பேதி. தத்த² ‘‘ஆபாதேத்வா’’தி அஜ்ஜோ²த்த²ரித்வா. ‘‘சக்கா²தி³ப்பதே²’’தி சக்கா²தீ³னம் விஸயக்கே²த்தே. ந கேவலம் அத்தனோ த்³வாரேஸு ஏவ ஆபாத மாக³ச்ச²ந்தி. அத² கோ² மனோத்³வாரேபி ஆபாத மாக³ச்ச²ந்தி. ந கேவலம் ப⁴வங்க³ மனோத்³வாரே ஏவ ஆபாத மாக³ச்ச²ந்தீதி யோஜனா. ‘‘தேஸு பனா’’தி தேஸு ஆரம்மணேஸு பன. தானி ஆரம்மணானி யேஸம் தானி ததா³ ரம்மணானி. ந ஏகக்க²ணே பஞ்சஸு ஆரம்மணேஸு வீதி² சித்தானி பவத்தந்தி, ஏகேகஸ்மிம் ஆரம்மணே ஏவாதி வுத்தத்தா ந த்³வீஸு, ந தீஸு, ந சதூஸூதிபி வத்தப்³ப³ம். ப³ஹுசித்தக்க²ணாதீதானி பஞ்சாரம்மணானி ப³ஹுசித்தக்க²ணாதீதே பஞ்சத்³வாரேதி யோஜனா. பஞ்சத்³வாரேதி ச பஞ்சத்³வாரேஸூதி அத்தோ². ‘‘ஏவம் ஸதீ’’தி தேஸம் பஸாதா³னம் ஆவஜ்ஜனேன ஸத்³தி⁴ம் உப்பத்தியா ஸதி. ‘‘ஆதி³லக்க²ணம்’’தி பஞ்சாரம்மணானம் பஞ்சத்³வாரேஸு ஆபாதா க³மன ஸங்கா²தம் விஸயப்பவத்தியா ஆதி³லக்க²ணம். சலனஞ்ச த³ட்ட²ப்³ப³ந்தி ஸம்ப³ந்தோ⁴. ‘‘யதா² க³ஹிதம்’’தி படிஸந்தி⁴தோ பட்டா²ய க³ஹிதப்பகாரம். விபா⁴வனிபாடே² ‘‘யோக்³ய தே³ஸாவட்டா²ன வஸேனா’’தி ஆபாதம் ஆக³ந்தும் யுத்தட்டா²னே அவேச்சட்டா²ன வஸேன. யுஜ்ஜனஞ்ச, மந்த²னஞ்ச, கோ²ப⁴கரணஞ்ச, க⁴ட்டனந்தி ச ஆபாதா க³மனந்தி ச வுச்சதீதி யோஜனா. ஹேட்டா² வுத்தோயேவ ஆபாதா க³மனஞ்சேத்தா²திஆதி³னா. ‘‘நானா டா²னியேஸூ’’தி நானா டா²னேஸு டி²தேஸு. ‘‘ஏகோ த⁴ம்மனியாமோ நாமா’’தி யதா² போ³தி⁴ஸத்தே மாதுகுச்சி²ம்ஹி படிஸந்தி⁴ம் க³ண்ஹந்தே த⁴ம்மனியாம வஸேன ஸகலே ஜாதிக்கே²த்தே பத²விகம்பனம் அஹோஸி. ததா² இத⁴பி பஞ்சத்³வாரேஸு ஏகேகஸ்மிம் த்³வாரே ஆரம்மணே க⁴ட்டேந்தே த⁴ம்மனியாம வஸேன ப⁴வங்க³ சலனம் ஹோதி. அயம் த⁴ம்மனியாமோ நாம. ‘‘ஸஹேவா’’தி ஏகதோயேவ. கத²ம் ஹத³ய வத்து² நிஸ்ஸிதஸ்ஸ ப⁴வங்க³ஸ்ஸ சலனம் ஸியாதி யோஜனா. ஏத்த² ச பஞ்சவிஞ்ஞாணஸ்ஸ சலனம் ஸியாதி இத³ம் ந வத்தப்³ப³ம். கஸ்மா, ததா³ பஞ்சவிஞ்ஞாணஸ்ஸ அவிஜ்ஜமானத்தா. யதா³ ச தம் விஜ்ஜதி, ததா³ தம் ந சலதீதி ந வத்தப்³ப³ம். ஸப்³ப³ம்பி ஹி வீதி²சித்தம் நாம சலதி யேவாதி. ஸந்ததி நாம புப்³பா³ பரப்பப³ந்தோ⁴. ஸண்டா²னம் நாம ஸஹப்பவத்தானம் ஏகதோ டி²தி. இத⁴ ஸண்டா²னம் அதி⁴ப்பேதம். பஞ்சனிஸ்ஸய மஹாபூ⁴தேஹி ஸத்³தி⁴ம் ஹத³ய வத்து² நிஸ்ஸயபூ⁴தானம் ஏக ஸண்டா²ன பா⁴வேன ஏகாப³த்³த⁴த்தாதி வுத்தம் ஹோதி. தேனாஹ ‘‘ஸண்டா²ன வஸேனாதி பன வத்தப்³ப³ம்’’தி. ‘‘தாதி³ஸஸ்ஸ அனுக்கம சலனஸ்ஸா’’தி விபா⁴வனியம் பே⁴ரிஸக்க²ரோபமாய ஸத்³தி⁴ம் ரூபாதி³னா பஸாதே³ க⁴ட்டிதே தன்னிஸ்ஸ யேஸு மஹாபூ⁴தேஸு சலிதேஸு அனுக்கமேன தம் ஸம்ப³ந்தா⁴னம் ஸேஸரூபானம்பி சலனேன ஹத³ய வத்து²ம்ஹி சலிதே தன்னிஸ்ஸிதஸ்ஸ ப⁴வங்க³ஸ்ஸ சலனா காரேன பவத்திதோதீதி ஏவம் வுத்தஸ்ஸ அனுக்கம சலனஸ்ஸ. ‘‘ப⁴வங்க³ப்பவாஹம்’’தி ப⁴வங்க³ ஸந்ததிம். ‘‘குருமானம்’’தி கரோந்தம். ஸல்லக்கே²ந்தம்’’தி இத³மேவாதி ஸன்னிட்டா²பேந்தம். ‘‘யோனி ஸோமனஸிகாராதி³வஸேனா’’தி யோனி ஸோமனஸிகாரோ குஸல ஜவனுப்பத்தியா பச்சயோ. அயோனி ஸோமனஸிகாரோ அகுஸல ஜவனுப்பத்தியா பச்சயோ. நிரனுஸய ஸந்தானதா க்ரியஜவனுப்பத்தியா பச்சயோ. தேஸு ச ஸோமனஸ்ஸ ஜவனாதீ³னம் உப்பத்தி பச்சயோபி ஹேட்டா² சித்த ஸங்க³ஹே வுத்தனயேன வேதி³தப்³போ³.

‘‘ப⁴வங்க³பாதோ’’திஆதீ³ஸு. ‘‘ஆவஜ்ஜனதோ பட்டா²ய உட்டி²தம்’’தி கம்ம விபாகஸந்தானதோ ச ததா³ரம்மணதோ ச முஞ்சித்வா விஸும் க்ரியாமய ப்³யாபாரேன ஆரம்மணந்தரம் க³ஹேத்வா உட்டி²தம் ஸமுட்டி²தம். ப⁴வங்க³ சலனம்பி உட்டா²னஸ்ஸ ஆதி³ ஹோதி. தஸ்மா தம்பி உட்டி²தே சித்த ஸந்தானே ஸங்க³ண்ஹந்தோ பத²ம ப⁴வங்க³ சலனதோயேவ வாதி வுத்தம். ‘‘இமஸ்மிம் டா²னே’’தி வீதி² சித்தானம் அனுக்கமேன அத்தனோ கிச்சேஹி ஆரம்மணப்பவத்திட்டா²னே. ‘‘தோ³வாரிகோபமா’’தி ப³தி⁴ரதோ³வாரிகோபமா. ‘‘கா³மில்லோபமா’’தி கா³மதா³ரகோபமா. ‘‘அம்போ³பமா’’தி அம்ப³ப்ப²லோபமா. அஞ்ஞாபி உபமா அத்தி². மக்கடஸுத்தோபமா, உச்சு²யந்தோபமா, ஜச்சந்தோ⁴பமா. தாஸப்³பா³பி அட்ட²ஸாலினியம் விபாகுத்³தா⁴ர கதா²தோ க³ஹேதப்³பா³. ‘‘யத்த²ஹீ’’திஆதீ³ஸு. ‘‘கத²ம் ச² ச²க்க யோஜனா ஹோதீ’’தி. சக்கு² வத்து² வசனஞ்ச, சக்கு²த்³வார வசனஞ்ச, ரூபா ரம்மண வசனஞ்ச, சக்கு² விஞ்ஞாண வசனஞ்ச, சக்கு²த்³வார வீதி² சக்கு² விஞ்ஞாண வீதி² வசனஞ்ச, அதிமஹந்தா ரம்மண வசனஞ்சா,தி ஏதானி ச²வசனானி. தேஹி ச²ச²க்கேஹி ஆஹரித்வா இமிஸ்ஸம் வீதி²யம் த³ஸ்ஸிதானி. ஸேஸவீதீ²ஸுபி யதா²லாப⁴ம் த³ஸ்ஸிதப்³பா³னி. ஏவம் ச²ச²க்கயோஜனா ஹோதி. ‘‘ஏத்த² ச யத்தகானீ’’திஆதீ³ஸு. ‘‘ஏகூன பஞ்ஞாஸ பரிமாணேஸூ’’தி ஏகஸ்ஸனிப்ப²ன்ன ரூபத⁴ம்மஸ்ஸ ஏகபஞ்ஞாஸ மத்தேஸு கு²த்³த³கக்க²ணேஸு உப்பாத³க்க²ணஞ்ச ப⁴ங்க³க்க²ணஞ்ச ட²பேத்வா மஜ்ஜே² ஏகூன பஞ்ஞாஸ மத்தானி டி²திக்க²ணானி ஸந்தி. தேஸு க²ணேஸு அனுக்கமேன உப்பன்னா ஏகூன பஞ்ஞாஸ சக்கு² பஸாதா³ ச ஸந்தி. ‘‘கிஸ்மிஞ்சீ’’தி தேஸு கதரஸ்மிம் நாம சக்கு² பஸாதே³ ந க⁴ட்டேந்தீதி ந வத்தப்³பா³னி. ‘‘தேஸு பனா’’தி நித்³தா⁴ரணே பு⁴ம்மவசனம். ‘‘யதே³வ ஏகம் சக்கூ²’’தி நித்³தா⁴ரணீயம். தம் பன கதமந்தி. அதீத ப⁴வங்கே³ன ஸத்³தி⁴ம் உப்பஜ்ஜித்வா தம் அதிக்கம்ம ப⁴வங்க³ சலனக்க²ணே லத்³த⁴க⁴டனம் ஏகம் சக்கு². தம் பன சக்கு² விஞ்ஞாணஸ்ஸ வத்து² பா⁴வஞ்ச த்³வாரபா⁴வஞ்ச ஸாதே⁴தி. ஸேஸவிஞ்ஞாணானம் த்³வாரபா⁴வம் ஸாதே⁴தீதி. தேனாஹ ‘‘யதா²ரஹம்’’தி. ஏததே³வ ஏதம் ஏவ சக்கு² கிச்ச ஸாத⁴னம் நாம ஹோதி வீதி² சித்துப்பத்தியா வத்து² கிச்சத்³வார கிச்சானம் ஸாத⁴னதோ. ‘‘யம் மஜ்ஜி²மாயுகம்’’தி மந்தா³யுக அமந்தா³யுகானம் மஜ்ஜே² பவத்தத்தா யம் மஜ்ஜி²மாயுகந்தி வத³ந்தி. தம் கிச்ச ஸாத⁴னம் நாமாதி யோஜனா. ‘‘இதரானி பனா’’தி ஏகூன பஞ்ஞாஸ பரிமாணேஸு சக்கு² பஸாதே³ஸூதி வுத்தானி, தேஸு ஏகம் கிச்ச ஸாத⁴னம் ட²பேத்வா ஸேஸானி இதரானி அட்ட² சத்தாலீஸ சக்கூ²னி மோக⁴வத்தூ²னி நாம ஹோந்தி. ரூபா ரம்மணேஹி ஸத்³தி⁴ம் லத்³த⁴ க⁴ட்டனானம்பி ஸதம் வீதி² சித்துப்பத்தியா வத்து² கிச்சத்³வார கிச்சரஹிதத்தா. தேஸு கதமானி மந்தா³யுகானி நாமாதி ஆஹ ‘‘தானி பனா’’திஆதி³ம். கிச்ச ஸாத⁴னதோ புரிமானி நாம அதீத ப⁴வங்க³தோ புரே தேரஸஸு ப⁴வங்கே³ஸு ஆதி³ ப⁴வங்க³ஸ்ஸ ப⁴ங்க³க்க²ணதோ பட்டா²ய க²ணே க²ணே உப்பன்னா ஸத்ததிம்ஸ சக்கு² பஸாதா³. தானி மந்தா³யுகானீதி வத³ந்தி. கஸ்மா, கிச்ச ஸாத⁴னதோ அப்பதராயுகத்தா. கிச்ச ஸாத⁴னதோ பச்சி²மானி நாம அதீத ப⁴வங்க³ஸ்ஸ டி²திக்க²ணதோ பட்டா²ய க²ணே க²ணே உப்பன்னா ஏகாத³ஸ சக்கு² பஸாதா³, தானி அமந்தா³யுகானீதி வத³ந்தி. கஸ்மா, கிச்ச ஸாத⁴னதோ ப³ஹுதராயுகத்தா. தது³ப⁴யானிபி அட்ட² சத்தாலீஸ மத்தானி வேதி³தப்³பா³னீதி ஸம்ப³ந்தோ⁴. ‘‘ததோ’’தி தேஹி அட்ட²சத்தாலீஸ மத்தேஹி. ‘‘புரிமதரானீ’’தி ஸத்ததிம்ஸ மந்தா³யுகேஹி புரிமதரானி. தானி ஹி சக்கு² விஞ்ஞாணஸ்ஸ உப்பாத³க்க²ணே டி²தி பா⁴வேன அனுபலத்³த⁴த்தா இத⁴ ந க³ஹிதானி. ‘‘பச்சி²மதரானீ’’தி ஏகாத³ஸ அமந்தா³யுகேஹி பச்சி²மதரானி. தானி ச சக்கு² விஞ்ஞாணஸ்ஸ உப்பாத³க்க²ணே உப்பன்னானிபி தஸ்மிம் க²ணே டி²தி பா⁴வேன அனுபலத்³த⁴த்தா இத⁴ ந க³ஹிதானி. கஸ்மா பன சக்கு²விஞ்ஞாணஸ்ஸ உப்பாத³க்க²ணே டி²தி பா⁴வேன அனுபலத்³தா⁴னி தது³ப⁴யானி இத⁴ ந க³ஹிதானீதி. சக்கு² விஞ்ஞாணஸ்ஸ உப்பாத³க்க²ணே டி²தி பா⁴வேன த⁴ரமானானம் அட்ட²சத்தாலீஸ மத்தானம் சக்கூ²னம் மஜ்ஜே² ஏவ கதமம் சக்கு² சக்கு² விஞ்ஞாணஸ்ஸ வத்து² கிச்ச த்³வார கிச்சம் ஸாதே⁴தீதி ஆஸங்கிதப்³ப³ம் ஹோதி. ஏத்த² ச பஞ்ச வத்தூ²னி நாம அத்தனோ டி²திக்க²ணே ஏவ பஞ்சவிஞ்ஞாணானம் வத்து²த்³வார கிச்ச ஸாத⁴கத்தா சக்கு² விஞ்ஞாணஸ்ஸ உப்பாத³க்க²ணே டி²தி பா⁴வேன அனுபலத்³த⁴த்தா இத⁴ ந க³ஹிதானீதி ச, சக்கு² விஞ்ஞாணஸ்ஸ உப்பாத³க்க²ணே டி²தி பா⁴வேன த⁴ரமானானந்தி ச, வுத்தந்தி த³ட்ட²ப்³ப³ம்.

‘‘ஏத்த² ஸியா’’திஆதீ³ஸு. ‘‘இமாய வீதி²யா’’தி இமாய அதிமஹந்தா ரம்மண வீதி²யா. ‘‘ஸமுதா³யக்³கா³ஹிகா’’தி ரூபா ரம்மணானம் ஸமூஹக்³கா³ஹிகா. ‘‘வண்ணஸல்லக்க²ணா’’தி வண்ணவவத்தா²னிகா. ‘‘வத்து²க்³கா³ஹிகா’’தி த³ப்³ப³ ஸண்டா²னக்³கா³ஹிகா. ‘‘நாமக்³கா³ஹிகா’’தி நாம பஞ்ஞத்திக்³கா³ஹிகா. ‘‘அலாதசக்கஸ்ஸ கா³ஹிகா வியா’’தி ரத்தந்த⁴காரே ஏகோ அலாதம் க³ஹேத்வா பரிப்³ப⁴மதி. அஞ்ஞோ தம் பஸ்ஸந்தோ சக்கம் விய மஞ்ஞதி. தத்த² அலாதஸ்ஸ க³தக³தட்டா²னே பச்சுப்பன்னம் ரூபம் ஆரப்³ப⁴ சக்கு²த்³வார வீதி²யோ உப்பஜ்ஜந்தி. மனோத்³வார வீதி²யோ பன புரிம புரிமாஹி சக்கு²த்³வார வீதீ²ஹி க³ஹிதானி அதீத ரூபானி அமுஞ்சித்வா ஏகதோ ஸண்டா²னஞ்ச ஸந்ததிஞ்ச கத்வா க³ண்ஹந்தி. ததா³ பஸ்ஸந்தஸ்ஸ சக்கம் விய உபட்டா²தி. ஏவம் அயம் ஸமுதா³யக்³கா³ஹிகா த³ட்ட²ப்³பா³. ‘‘நத்தி² ததா³ரம்மணுப்பாதோ³’’திஆதீ³ஸு. ‘‘யஸ்ஸா’’தி யஸ்ஸ ஆரம்மணஸ்ஸ. சித்தானீதி ச நானாரம்மணானீதி ச கம்மபதா³னி. அவஸேஸே தஸ்மிம் ஆரம்மணே. ‘‘ஸங்க³ஹ காரேனா’’தி போராண அட்ட²கதா²யோ ஏகதோ ஸங்க³ஹேத்வா கதத்தா பு³த்³த⁴கோ⁴ஸத்தே²ரேன கதா ஸப்³பா³ அட்ட²கதா²யோ ஸங்க³ஹட்ட²கதா² நாம. ஸோ ச ஸங்க³ஹ காரோதி வுச்சதி. ‘‘இத⁴ பீ’’தி இமஸ்மிம் அபி⁴த⁴ம்மத்த² ஸங்க³ஹேபி. ‘‘தே²ரேனா’’தி அனுருத்³த⁴த்தே²ரேன. ‘‘ஏகம்பி இச்ச²தி யேவா’’தி. ‘‘யஸ்ஸ ஹி சத்தாரீ’’திஆதீ³ஸு யஸ்ஸ ஆரம்மணஸ்ஸ சத்தாரி வா பஞ்சவா ச²வாதிஆதி³னா யோஜேதப்³ப³ம். ‘‘ஜவனம்பி அனுப்பஜ்ஜித்வா’’திஆதீ³ஸு. ‘‘அத்தனோ பதா⁴ன க்ரியாயா’’தி அனுப்பஜ்ஜித்வாதி பத³ஸ்ஸ பரதோ ‘யம் பவத்ததீ’தி அத்தனோ பதா⁴ன க்ரியாபத³ம் அத்தி². தேன அத்தனோ க்ரியாபதே³ன ஸத்³தி⁴ந்தி அத்தோ². ‘‘கத்த²சி வுத்தா’’தி கத்த²சி ஸத்³த³க³ந்தே²ஸு வுத்தா. அபி ச, ஹேதும்ஹி த்வாபச்சயோ லக்க²ணே ஹேதும்ஹி ச மானந்த பச்சயா ஜோதனீயட்டே²ன வுத்தா, ந வசனீயட்டே²னாதி த³ட்ட²ப்³பா³. ‘‘பகதி நியாமேனா’’தி ஏதேன பச்சய விஸேஸேஸதி, சத்தாரி வா பஞ்சவா ச²வா ஜவனானி உப்பஜ்ஜந்தீதி தீ³பேதி. தேனாஹ ‘‘ஏத்த²பனா’’திஆதி³ம். ‘‘த்³வத்திக்க²த்தும்’’தி வாஸத்³த³த்தே² அஞ்ஞபத³த்த² ஸமாஸபத³ந்தி வுத்தம் ‘‘த்³விக்க²த்தும் வா திக்க²த்தும் வா’’தி. ‘‘வோட்ட²ப்³ப³னஸ்ஸ ஆஸேவனதா’’தி ஆஸேவன பச்சயதாவா பச்சயுப்பன்னதாவா. ‘‘ஆவஜ்ஜனாயா’’தி ஏத்த² வோட்ட²ப்³ப³ன கிச்சம் ஆவஜ்ஜனம்பி ஸங்க³ண்ஹாதி. இத⁴பி ஆரம்மண து³ப்³ப³லதாய சதுப்பஞ்ச ஜவனுப்பத்தி இச்சி² தப்³பா³தி யோஜனா. தத்த² ‘‘இத⁴ பீ’’தி இமஸ்மிம் பரித்தா ரம்மண வாரேபி. திவோட்ட²ப்³ப³னிகா பஞ்ச பரித்தா ரம்மண வீதி²யோதி யோஜனா. ‘‘இதரானீ’’தி பரித்த மஹந்தாதி மஹந்தா ரம்மணானி. ‘‘உப⁴யதா²பீ’’தி ஆபாதா க³மன வஸேனபி ஆரம்மண கரண வஸேனபி. இமஸ்ஸ பத³ஸ்ஸ.

137. ‘‘மனோத்³வாரே பனா’’திஆதீ³ஸு. ‘‘பரித்தக்க²ணா பீ’’தி சித்த ப²ஸ்ஸாத³யோ அப்பதரக்க²ணாபி. ‘‘அதீதானாக³தா பீ’’தி அதீதானாக³த த⁴ம்மாபி. ‘‘க⁴ட்டனேனா’’தி ரூபாதீ³னம் க⁴ட்டனேன. ‘‘யத்தா²’’தி யஸ்மிம் ப⁴வங்கே³. ‘‘பஞ்சத்³வாரானு ப³ந்த⁴கம்’’தி பஞ்சத்³வார வீதி² அனுக³தம். அதீதம் ஆலம்ப³ணம் பவத்தேதி யேவாதி ஸம்ப³ந்தோ⁴. ‘‘யதா²பாதா க³தமேவா’’தி பகதியா ஆபாதா க³தப்பகாரமேவ. ‘‘ததா² ததா²’’தி தி³ட்ட² ஸம்ப³ந்தா⁴தி³னா தேன தேன பகாரேன. ‘‘கிஞ்சீ’’தி கிஞ்சி ஆரம்மணம். ‘‘தி³ஸ்வா’’தி பச்சக்க²ம் கத்வா. பஞ்சத்³வாரக்³க³ஹிதஞ்ஹி ஆரம்மணம் பச்சக்க²கதட்டே²ன தி³ட்ட²ந்தி வுச்சதி. யம் கிஞ்சி ஆரம்மணம். ‘‘அனுமானேந்தஸ்ஸா’’தி ஏவமேவ ப⁴வித்த², ப⁴விஸ்ஸதி, ப⁴வதீதி அனுமானஞ்ஞாணேன சிந்தேந்தஸ்ஸ. தம் ஸதி³ஸம் ஆரம்மணம். ‘‘பரஸ்ஸ ஸத்³த³ஹனா’’தி பரவசனம் ஸுத்வா யதா² அயம் வத³தி, ததே² வேதந்தி ஸத்³த³ஹனா. ‘‘தி³ட்டி²’’ வுச்சதி ஞாணம் வா லத்³தி⁴ வா. ‘‘நிஜ்ஜா²னம்’’தி ஸுட்டு² ஓலோகனம். ‘‘க²ந்தீ’’தி க²மனம் ஸஹனம். அஞ்ஞத²த்தம் அக³மனம். தி³ட்டி²யா நிஜ்ஜா²னம் தி³ட்டி²னிஜ்ஜா²னம். தி³ட்டி²னிஜ்ஜா²னஸ்ஸ க²ந்தி தி³ட்டி²னிஜ்ஜா²னக்க²ந்தி. ‘‘ஸேஸம்’’தி நானாகம்ம ப³லேனாதிஆதி³கம். ‘‘தே³வதோ பஸம்ஹாரவஸேனா’’தி தே³வதா கதா³சி கேஸஞ்சி ஸுபினந்தே நானாரம்மணானி உபஸம்ஹரித்வா த³ஸ்ஸேந்தி. ஏவம் தே³வதோ பஸம்ஹார வஸேனாபி. அனுபோ³தோ⁴ நாம லோகியஞ்ஞாண வஸேன சதுஸ்ஸச்ச த⁴ம்மானம் அனுபு³ஜ்ஜ²னம். படிவேதோ⁴ நாம லோகுத்தரஞ்ஞாண கிச்சம். அனந்த ரூப நிஸ்ஸய பச்சயக்³க³ஹணேன பகதூ பனிஸ்ஸய பச்சயம்பி உபலக்கே²தி. சித்த ஸந்தானஸ்ஸ அனந்தரூபனிஸ்ஸய பச்சயபா⁴வோ நாமாதி ஸம்ப³ந்தோ⁴. அனந்த ரூப நிஸ்ஸய பச்சயஸத்தி நாம அனந்தர பரம்பர விப்ப²ரணவஸேன மஹாக³திகா ஹோதீதி வுத்தம் ஹோதி. அனந்த ரூப நிஸ்ஸய பச்சயானு பா⁴வோதிபி யுஜ்ஜதி. கத²ம் மஹாவிப்பா²ரோதி ஆஹ ‘‘ஸகிம் பீ’’திஆதி³ம். ‘‘ஸுட்டு² ஆஸேவித்வா’’தி ஏத்த² பச்சா² அப்பமுஸ்ஸமானம் கத்வா புனப்புனம் ஸேவனம் ஸுட்டு² ஆஸேவனம் நாம. ந கேவலம் புரிம சித்த ஸந்தானஸ்ஸ ஸோ உபனிஸ்ஸய பச்சயானுபா⁴வோ ஏவ மஹாவிப்பா²ரோ ஹோதி. பகதியா சித்தஸ்ஸ விசித்த பா⁴வ ஸங்கா²தம் சிந்தனா கிச்சம்பி மஹாவிப்பா²ரம் ஹோதீதி த³ஸ்ஸேதும் ‘‘சித்தஞ்ச நாமா’’திஆதி³வுத்தம். கத²ம் மஹாவிப்பா²ரம் ஹோதீதி ஆஹ ‘‘கிஞ்சி நிமித்தம்’’திஆதி³ம். ‘‘கிஞ்சி நிமித்தம்’’தி தி³ட்டா²தீ³ஸு நானா ரம்மணேஸு கிஞ்சி அப்பமத்தகம் தி³ட்டா²தி³கம் ஆரம்மண நிமித்தம். ‘‘தேஹி சகாரணேஹீ’’தி தேஹி கத்துபூ⁴தேஹி தி³ட்டா²தீ³ஹி காரணேஹி. ‘‘சோதீ³யமானம்’’தி பயோஜீயமானம். ‘‘அஜ்ஜா²ஸய யுத்தம்’’தி அஜ்ஜா²ஸயேன ஸம்யுத்தம். ப⁴வங்க³ சித்தஸ்ஸ ஆரம்மணம் நாம அவிபூ⁴தம் ஹோதி. ப⁴வங்க³ம் சாலேத்வா ஆவஜ்ஜனம் நியோஜேதீதி ஸம்ப³ந்தோ⁴. ‘‘லத்³த⁴ பச்சயேஸூ’’தி ஆலோகாதி³வஸேன வா தி³ட்டா²தி³வஸேன வா லத்³த⁴ பச்சயவந்தேஸு. தத³பி⁴னின்னாகாரோ நாம நிச்சகாலம்பி தேஸு ஆரம்மணேஸு அபி⁴முக²ம் நின்னாகாரோ. தேன ஆகாரேன பவத்தோ மனஸிகாரோ. தேன ஸம்பயுத்தஸ்ஸ. ஏதேஹி வசனேஹி ஸுத்³த⁴மனோத்³வாரே ஆரம்மணானம் அபாதாக³மனஞ்ச ப⁴வங்க³ சலனஞ்ச ந கேவலம் லத்³த⁴ பச்சயானம் ஆரம்மணானம் வஸேனேவ ஹோதி. தாதி³ஸேன பன மனஸிகாரேன யுத்தஸ்ஸ ஸயஞ்ச வீதி² சித்த சிந்தனா கிச்சஸ்ஸ சித்தஸ்ஸ வஸேனாபி ஹோதீதி ஸித்³த⁴ம் ஹோதி. ந ஹி ஆரம்மணந்தரே அபி⁴னின்னாகாரோ நாம நத்தீ²தி ஸக்கா வத்தும். கஸ்மா, அபா⁴வித சித்தானம் பமாத³ ப³ஹுலானம் ஜனானம் கதா³சி கரஹசி பா⁴வனா மனஸிகாரே கரீயமானேபி வீதி² சித்த ஸந்தானஸ்ஸ ப³ஹித்³தா⁴ நானாரம்மணேஸு அபி⁴னின்னாகாரஸ்ஸ ஸந்தி³ஸ்ஸனதோதி. ‘‘யதா² சேத்தா²’’தி யதா² ஏத்த² மனோத்³வாரே ரூபாரூப ஸத்தானம் விபூ⁴தா ரம்மணேபி ததா³ ரம்மணுப்பாதோ³ நத்தி², ஏவந்தி யோஜனா. ஞாணவிப⁴ங்க³ட்ட²கதா²யம் பன வோட்ட²ப்³ப³னவாரோபி ஆக³தோ. யதா²ஹ ஸுபினேனேவ தி³ட்ட²ம் விய மே, ஸுதம் விய மேதி கத²னகாலேபி அப்³யாகதோ யேவாதி. தத்த² ஹி ‘‘அப்³யாகதோ யேவா’’தி ஸுபினந்தே மனோத்³வாரே த்³வத்திக்க²த்தும் உப்பன்னஸ்ஸ ஆவஜ்ஜனஸ்ஸ வஸேன அப்³யாகதோயேவ. ததோ பரம் ப⁴வங்க³பாதோ. அட்ட²ஸாலினியம்பி வுத்தம் அயம் பன வாரோ தி³ட்ட²ம் விய மே, ஸுதம் விய மே திஆதீ³னி வத³னகாலே லப்³ப⁴தீதி. தம் பன பஞ்ச த்³வாரே பரித்தாரம்மணே த்³வத்திக்க²த்தும் உப்பன்னஸ்ஸ வோட்ட²ப்³ப³னஸ்ஸ வஸேன வுத்தம். ‘‘ஸோபி இத⁴ லத்³து⁴ம் வட்டதி யேவா’’தி ஸோபி வாரோ இமஸ்மிம் மனோத்³வாரே லத்³து⁴ம் வட்டதியேவ. ‘‘ப⁴வங்கே³ சலிதே நிவத்தனகவாரானம்’’தி த்³விக்க²த்தும் ப⁴வங்க³ சலனமத்தே ட²த்வா வீதி² சித்தானி அனுப்பஜ்ஜித்வா ப⁴வங்க³பாதவஸேன நிவத்தனகானம் மோக⁴வாரானம் மனோத்³வாரேபி பமாணம் ந ப⁴விஸ்ஸதியேவ. அத² இமஸ்மிம்வாரே வீதி² சித்தப்பவத்தி நத்தி². ஏவம் ஸதி, இமஸ்மிம் வீதி² ஸங்க³ஹே ஸோ வாரோ ந வத்தப்³போ³தி சே. வத்தப்³போ³யேவ. கஸ்மா, ச²தா⁴ விஸயப்பவத்தீதி இமஸ்மிம் ச²க்கே ஸங்க³ஹிதத்தாதி த³ஸ்ஸேதும் ‘‘விஸயே ச ஆபாதாக³தே’’திஆதி³ வுத்தம். ஆரம்மணபூ⁴தா விஸயப்பவத்தி. ஏகேகஸ்மிம் அனுப³ந்த⁴கவாரே. ‘‘ததா³ரம்மண வாராத³யோ’’தி ததா³ரம்மண வாரோ ஜவனவாரோ வோட்ட²ப்³ப³ன வாரோ மோக⁴வாரோ. தேஸு பன ததா³ ரம்மணவாரோ வத்து²க்³க³ஹணே ச நாமக்³க³ஹணே ச ந லப்³ப⁴தி. ‘‘வத்தூ²’’தி ஹி ஸண்டா²ன பஞ்ஞத்தி. ‘‘நாமம்’’தி நாம பஞ்ஞத்தி. ந ச ததா³ ரம்மணம் பஞ்ஞத்தா ரம்மணம் ஹோதீதி. தேன வுத்தம் ‘‘யதா²ரஹம்’’தி. ‘‘தத்தா²’’தி தேஸு தி³ட்ட²வாராதீ³ஸு ச²ஸு வாரேஸு. ஏதரஹி பன கேசி ஆசரியாதி பாட²ஸேஸோ. ‘‘அதீத ப⁴வங்க³ வஸேனா’’தி ஏகம் ப⁴வங்க³ம் அதிக்கம்ம ஆபாதா க³தே ஆரம்மணே ஏகோ வாரோ, த்³வே ப⁴வங்கா³னி அதிக்கம்ம ஆபாதா க³தே ஏகோதிஆதி³னா அதீத ப⁴வங்க³ பே⁴த³வஸேன. ‘‘ததா³ ரம்மண வஸேனா’’தி ததா³ ரம்மணஸ்ஸ உப்பன்னவாரோ அனுப்பன்ன வாரோதி ஏவம் ததா³ ரம்மண வஸேன. கப்பேந்தி சிந்தேந்தி, வித³ஹந்தி வா. ‘‘க²ண வஸேன ப³லவது³ப்³ப³லதா ஸம்ப⁴வோ’’தி யதா² பஞ்சத்³வாரே அதிமஹந்தா ரம்மணேஸுபி ஆரம்மண த⁴ம்மா உப்பாத³ம் பத்வா ஆதி³தோ ஏகசித்தக்க²ணமத்தே து³ப்³ப³லா ஹோந்தி. அத்தனோ த்³வாரேஸு ஆபாதம் ஆக³ந்தும் ந ஸக்கோந்தி. ஏக சித்தக்க²ணம் பன அதிக்கம்ம ப³லவந்தா ஹோந்தி. அத்தனோ த்³வாரேஸு ஆபாதம் க³ந்தும் ஸக்கோந்தி. மஹந்தா ரம்மணாதீ³ஸு பன த்³வி சித்தக்க²ணிகமத்தே து³ப்³ப³லா ஹோந்தீதிஆதி³னா வத்தப்³பா³. ந ததா² மனோத்³வாரே ஆரம்மணானம் க²ண வஸேன ப³லவது³ப்³ப³லதா ஸம்ப⁴வோ அத்தி². கஸ்மா நத்தீ²தி ஆஹ ‘‘ததா³’’திஆதி³ம். தத்த² ‘‘ததா³’’தி தஸ்மிம் வீதி² சித்தப்பவத்திகாலே. ‘‘தத்தா²’’தி மனோத்³வாரே.

‘‘ஏத்த² ஸியா’’திஆதீ³ஸு. ‘‘ஸியா’’தி கேஸஞ்சி விசாரணா ஸியா. ஏகம் ஆவஜ்ஜனம் அஸ்ஸாதி ஏகாவஜ்ஜனா. ‘‘வீதீ²’’தி வீதி²சித்தப்பப³ந்தோ⁴. ஏகாவஜ்ஜனா ச ஸா வீதி² சாதி விக்³க³ஹோ. ‘‘ஆவஜ்ஜனம்’’தி ஆவஜ்ஜன சித்தம். தம் வா ஆவஜ்ஜதீதி ஸம்ப³ந்தோ⁴. ‘‘தம் தம் ஜவனேனா’’தி தேன தேன ஜவனேன ஸஹுப்பன்னம் வா பரஸ்ஸ சித்தம் ஆவஜ்ஜதி கிந்தி யோஜனா. ‘‘கிஞ்சேத்தா²’’தி ஏத்த² வசனே கிஞ்சி வத்தப்³ப³ம் அத்தீ²தி அத்தோ². யதி³ தாவ ஆவஜ்ஜனஞ்ச ஜவனானி சாதி அதி⁴காரோ. ‘‘தஞ்ஹி சித்தம்’’தி பரஸ்ஸ சித்தம். ‘‘ஏவம்பி பி⁴ன்னமேவா’’தி ஜவனானம் த⁴ம்மதோ பி⁴ன்னமேவ. ஏத்த² அட்ட²கதா²யம் வினிச்சி²தந்தி ஸம்ப³ந்தோ⁴. தம் சித்தம் நிருத்³த⁴ம்பி ஜவனானம்பி பச்சுப்பன்னமேவ ஹோதீதி யோஜனா. ‘‘அத்³தா⁴வஸேன க³ஹிதம்’’தி அத்³தா⁴ பச்சுப்பன்ன வஸேன க³ஹிதம். ‘‘ஸந்ததிவஸேன க³ஹிதம்’’தி ஸந்ததி பச்சுப்பன்னவஸேன க³ஹிதம். ஆசரியானந்த³மதே. ஸப்³பே³ஸம்பி ஆவஜ்ஜன ஜவனானம். சித்தமேவ ஹோதி, தஸ்மா த⁴ம்மதோ அபி⁴ன்னம். பச்சுப்பன்னஞ்ச ஹோதி, தஸ்மா காலதோ அபி⁴ன்னந்தி வுத்தம் ஹோதி. அனந்தரபச்சயே அதீதோ ச பச்சுப்பன்னோ ச க²ண வஸேன யுஜ்ஜதி. யதி³ அத்³தா⁴ஸந்ததி வஸேன யுஜ்ஜேய்ய, பச்சுப்பன்னோ த⁴ம்மோ பச்சுப்பன்னஸ்ஸ த⁴ம்மஸ்ஸ அனந்தர பச்சயேன பச்சயோதி வுத்தோ ப⁴வேய்ய. கஸ்மா, ஏகாவஜ்ஜன வீதி²யஞ்ஹி ஸப்³பா³னி சித்தானி அத்³தா⁴ஸந்ததி வஸேன பச்சுப்பன்னானி ஏவ ஹோந்தீதி.

138. அப்பனாவாரே. ‘‘அப்பனா ஜவனம்’’தி கம்மபத³ம். ‘‘ததா³ ரம்மணம்’’தி கத்துபத³ம். ‘‘இந்த்³ரிய ஸமதாதீ³ஹீ’’தி ஸத்³தா⁴தீ³னம் பஞ்சன்னம் இந்த்³ரியானம் அஞ்ஞமஞ்ஞம் அனதி வத்தனவஸேன ஸமதாதீ³ஹி. ‘‘பரிதோ’’தி ஸமந்ததோ. ‘‘உபேச்சா’’தி உபக³ந்த்வா. அப்பனம் வஹிதும் ஜனேதும் ஸமத்த² பா⁴வோ அப்பனாவஹஸமத்த²பா⁴வோ. ‘‘யஸ்ஸ பவத்தியா’’தி யஸ்ஸ உபசார ஜவனஸ்ஸ பவத்திதோ. ‘‘அசிரம் காலம்’’தி அசிரேகாலே. பரித்த ஜாதிகா நாம காமாவசரஜாதி. ‘‘கோ³த்தம்’’தி கம்மகத்து பத³ம். ‘‘அபி⁴பு⁴ய்யதீ’’தி பா⁴வனா ப³லேன அபி⁴பு⁴ய்யமானம் ஹோதி. அபி⁴மத்³தீ³யமானம் ஹோதீதி அத்தோ². ‘‘சி²ஜ்ஜதீ’’தி இத³ம் பன அபி⁴ப⁴வனஸ்ஸ ஸிகா²பத்த த³ஸ்ஸனம். யாவ தம் கோ³த்தம் சே²த³ம் பாபுணாதி, தாவ அபி⁴பு⁴ய்யதி, மத்³தீ³யதீதி வுத்தம் ஹோதி. கோ³த்தம் அபி⁴ப⁴வதீதி கோ³த்ரபூ⁴திபி யுஜ்ஜதி. ‘‘பஞ்சமம்’’தி பஞ்சமே சித்தவாரே. ‘‘ததா³ஹி ஜவனம் பதிதம் நாம ஹோதீ’’தி பகதியா ஜவனப்பவத்தினாம ஸத்தக்க²த்து பரமோ ஹோதி. சதுத்த²ஞ்ச முத்³த⁴பத்தம். பஞ்சமதோ பட்டா²ய பதிதம். தஸ்மா தஸ்மிம் பஞ்சமவாரே ஜவனம் பதிதம் நாம ஹோதி. ‘‘து³தீயேனா’’தி து³தீயேன ஏவ ஸத்³தே³ன. ‘‘து³தீயம்’’தி து³தீயே சித்தவாரே. ததா³ அனுலோமம் பத²மஜவனம் ஹோதீதி வுத்தம் ‘‘அலத்³தா⁴ ஸேவனம் அனுலோம’’ந்தி. ‘‘ஏதேனேவா’’தி ஏதேன ஏவ ஸத்³த³ த்³வயே நேவ. அட்ட²ஸாலினியம் பன அனுஞ்ஞாதா விய தி³ஸ்ஸதி. வுத்தஞ்ஹி தத்த². மந்த³பஞ்ஞஸ்ஸ சத்தாரி அனுலோமானி ஹோந்தி, பஞ்சமம் கோ³த்ரபு⁴, ச²ட்ட²ம் மக்³க³சித்தம், ஸத்தமம் ப²லந்தி. ‘‘இதரட்ட²கதா²ஸூ’’தி வினயட்ட² கதா²தீ³ஸு. ‘‘படிஸித்³த⁴த்தா’’தி பஞ்சமம் கோ³த்ர பு⁴ப்பவத்தியா படிஸித்³த⁴த்தா ஆதி³ம்ஹி அட்ட²ன்னம் அஞ்ஞத்ரஸ்மிம்தி வுத்தத்தா இத⁴ நிருத்³தே⁴தி பத³ம் அவஸ்ஸம் இச்சி²தப்³ப³மேவாதி வுத்தம் ‘‘நிருத்³தே⁴ அனந்தரமேவாதி பத³ச்சே²தோ³’’தி. அனந்தர ஸத்³த³ஸ்ஸ ச நிச்சம் ஸம்ப³ந்தா⁴பேக்க²த்தா தமேவபத³ம் விப⁴த்தி பரிணாமேன அதி⁴கதந்தி ஆஹ ‘‘நிருத்³த⁴ஸ்ஸாதி அத்த²தோ லத்³த⁴மேவா’’தி. ‘‘வஸிபூ⁴தாபீ’’தி வஸிபூ⁴தாபி ஸமானா. ‘‘ஏகவாரம் ஜவித்வா’’தி இத³ம் லோகியப்பனாவஸேன வுத்தம். லோகுத்தர அப்பனாபன ஸத்தமம்பி உப்பஜ்ஜதியேவ. மூலடீகா பாடே² ‘‘பூ⁴மந்தரபத்தியா’’தி கோ³த்ரபு⁴ சித்தம் காமபூ⁴மி ஹோதி. அப்பனாபன மஹக்³க³தபூ⁴மி வா லோகுத்தரபூ⁴மி வா ஹோதி. ஏவம் பூ⁴மந்தரபத்தியா. ‘‘ஆரம்மணந்தர லத்³தி⁴யா’’தி ப²லஸமாபத்தி வீதி²யம் ப²லஜவனம் ஸந்தா⁴ய வுத்தம். தத்த²ஹி புரிமானி அனுலோம ஜவனானி ஸங்கா²ரா ரம்மணானி ஹோந்தி. ப²லஜவனம் நிப்³பா³னாரம்மணம். இத³ஞ்ச காரணமத்தமேவ. யதா²வுத்த லேட்³டு³பமா ஏவ இத⁴ யுத்தரூபாதி த³ட்ட²ப்³ப³ம். ‘‘ந கோ² பனேதம் ஏவம் த³ட்ட²ப்³ப³’’ந்தி ஏதம் அத்த²ஜாதம் ந கோ² ஏவம் த³ட்ட²ப்³ப³ம். ‘‘அனத்³த⁴னீயா’’தி அத்³தா⁴னம் தீ³க⁴காலம் நக² மந்தீதி அனத்³த⁴னீயா. அஸாரா. அஸாரத்தா ஏவ ஸீக⁴தரம் ருஹந்தி. ஸீக⁴தரம் வுத்³தி⁴ம் விருள்ஹிம் ஆபஜ்ஜந்தி. ஸாரவந்தா பன ஸாரேன ஸஹ வட்³ட⁴மானத்தா ஸீக⁴தரம் நருஹந்தி. ஸீக⁴தரம் வுத்³தி⁴ம் விருள்ஹிம் நா பஜ்ஜந்தி. தேனாஹ ‘‘ஏகவஸ்ஸஜீவினோ’’திஆதி³ம். ‘‘ஏவமேவா’’திஆதீ³ஸு ‘‘பதிதஜவனேஸூ’’தி பஞ்சம ச²ட்ட² ஸத்தம ஜவனேஸு. ‘‘ஏத்த² சா’’திஆதீ³ஸு. ‘‘ஸுபக்கஸாலிப⁴த்த ஸதி³ஸானீ’’தி யதா² ஸாலிப⁴த்தானி ஸுபக்கத்தா ஏவ முது³தரானி ஹுத்வா து³ப்³ப³லானி அசிரட்டி²திகானி. தஸ்மிம் தி³வஸேபி பூதிபா⁴வம் க³ச்ச²ந்தி. ஏவம் அப்பனா ஜவனானி. ‘‘யஸ்மா சா’’திஆதீ³ஸு. ‘‘து³வித⁴ஸ்ஸ நியமஸ்ஸா’’தி ஜவனனியமஸ்ஸ ச காலனியமஸ்ஸ ச. ‘‘படிஸந்தி⁴யா அனந்தர பச்சய பா⁴வினோ’’தி ஸத்தம ஜவன சேதனா அனந்தர பச்சயோ, தத³னந்தரே பவத்தம் விபாக ஸந்தானம் பச்சயுப்பன்னோ, தமேவ ச அவஸானே சுதி சித்தம் ஹுத்வா ப⁴வந்தரே படிஸந்தி⁴ சித்தஸ்ஸ அனந்தர பச்சயோ. ஏவம் படிஸந்தி⁴ சித்தஸ்ஸ அனந்தர பச்சய பா⁴வேன அவஸ்ஸம் ப⁴விஸ்ஸமானஸ்ஸாதி அத்தோ². இத³ஞ்ச காரண மத்தமேவ. மஹாடீகாவசனம் பன கிஞ்சி வத்தப்³ப³ ரூபந்தி ந படிக்கி²த்தம். ‘‘நிரந்தரப்பவத்தானம்’’தி ஆதீ³ஸு. பி⁴ன்னா அஸதி³ஸா வேத³னா யேஸம் தானி பி⁴ன்னவேத³னானி. ‘‘ஆஸேவன பச்சனீகானம்’’தி ஆஸேவன பச்சயப்படி பக்கா²னம். அபி⁴ன்னா வேத³னா யேஸந்தி விக்³க³ஹோ. க்ரியஜவனானந்தரம் அரஹத்தப²லம் ப²லஸமாபத்தி வீதி²யம் த³ட்ட²ப்³ப³ம். ஸேஸமேத்த²ஸுவிஞ்ஞேய்யம்.

139. ‘‘ஸப்³ப³தா² பீ’’திஆதீ³ஸு. லோகே மஜ்ஜி²மகே ஹி மஹாஜனேஹி இச்சி²தம்பி கிஞ்சி ஆரம்மணம் அதிஉக்கட்டே²ஹி மந்தா⁴து ராஜாதீ³ஹி இச்சி²தம் ந ஹோதி. ததா² தேஹி மஹாஜனேஹி அனிச்சி²தம்பி கிஞ்சி ஆரம்மணம் அதிது³க்³க³தேஹி பச்சந்த வாஸீஹி இச்சி²தம் ஹோதி. தஸ்மா ஆரம்மணானம் இட்டா²னிட்ட² வவத்தா²னம் பத்வா அதிஉக்கட்டே²ஹி ச அதிது³க்³க³தேஹி ச வவத்தா²னம் ந க³ச்ச²தி, மஜ்ஜி²மகேஹி ஏவ வவத்தா²னம் க³ச்ச²தி. தேனாஹ ‘‘தத்த² சா’’திஆதி³ம். ‘‘ஆரம்மணம்’’தி கத்துபத³ம். ‘‘விபாகசித்தம்’’தி கம்மபத³ம். ‘‘கிஞ்சீ’’தி கிஞ்சி ரூபம். ‘‘கிஸ்மிஞ்சீ’’தி கஸ்மிம்சி ஏகஸ்மிம் புப்பே². ‘‘தேன வா’’தி தேன வா ஸுக²ஸம்ப²ஸ்ஸேன வத்தே²ன. ஸேஸமேத்த² ஸுவிஞ்ஞேய்யம்.

‘‘வேத³னானியமோபனா’’திஆதீ³ஸு. ‘‘ஆதா³ஸே முக²னிமித்தஸ்ஸ வியா’’தி யதா² ஆதா³ஸே முக² நிமித்தஸ்ஸ சலன சவனாதி³யோகோ³ நானாவண்ணயோகோ³ ச யதா²முக²மேவ ஸித்³தோ⁴. ததா² விபாகானம். வேத³னா யோகோ³ பன யதா²ரம்மணமேவ ஸித்³தோ⁴தி யோஜனா. தத்த² ‘‘வேத³னாயோகோ³’’தி நானாவேத³னாயோகோ³. ‘‘கப்பேத்வா’’தி சிந்தேத்வா. ‘‘பகப்பேத்வா’’தி நானப்பகாரதோ சிந்தேத்வா. ந கேவலஞ்ச விபாகானம் ஏவ யதா²ரம்மணம் வேத³னா யோகோ³ ஹோதீதி யோஜனா.

‘‘அயஞ்சா’’திஆதீ³ஸு. ‘‘அட்ட²கதா²யம் பீ’’தி பட்டா²ன அட்ட²கதா²யம்பி. ‘‘ததா³ரம்மண வஸேனா’’தி ததா³ரம்மணவஸேன பவத்தானந்தி பாட²ஸேஸோ. ‘‘பஞ்சன்னம்’’தி ஸோமனஸ்ஸ ஸந்தீரணேன ஸத்³தி⁴ம் சத்தாரி மஹாவிபாக ஸோமனஸ்ஸானி ஸந்தா⁴ய வுத்தம். ‘‘பகதி நீஹாரேனா’’தி பகதியா நிச்சகாலம் பவத்தப்பகாரேன. பாளிபாடே². பா⁴விதானி இந்த்³ரியானி யேனாதி பா⁴விதிந்த்³ரியோ. ‘‘மனாபம்’’தி மனோரம்மம். ‘‘அமனாபம்’’தி அமனோரம்மம். விஹரேய்யந்தி ஸசே கங்க²தீதி ஸம்ப³ந்தோ⁴. ‘‘படிகூலே’’தி அமனாபே. ‘‘அப்படிகூல ஸஞ்ஞீ’’தி மனாபஸஞ்ஞீ. ஏவம் ஸேஸேஸு. ‘‘தேஸம்’’தி கீ²ணாஸவானம். பாளிபாடே². ‘‘ஸுமனோ’’தி ஸோமனஸ்ஸிதோ. ‘‘து³ம்மனோ’’தி தோ³மனஸ்ஸிதோ. பாளிபாடே². ‘‘மேத்தாயவா ப²ரதீ’’தி அயம் ஸத்தோ அவேரோஹோதூதிஆதி³னா மேத்தாசித்தேன வா ப²ரதி. ‘‘தா⁴துஸோ உபஸம்ஹரதீ’’தி யதா² ம ம காயோபி சதுதா⁴து ஸமுஸ்ஸயோ ஹோதி. தத்த² ஏகாபி தா⁴து நாம படிகூலா வா அப்படிகூலா வா ந ஹோதி. கேவலம் துச்ச² ஸுஞ்ஞ ஸபா⁴வமத்தா ஹோதி. ஏவமேவ இமஸ்ஸ ஸத்தஸ்ஸ காயோபீதிஆதி³னா தா⁴து ஸோ உபஸம்ஹரதி. ‘‘அஸுபா⁴ய வா’’தி அஸுப⁴ பா⁴வனாய வா. அஸுப⁴ பா⁴வனா சித்தேன வாதி வுத்தம் ஹோதி. ‘‘அஸுபா⁴யா’’தி வா தஸ்ஸ அஸுப⁴பா⁴வத்தா²ய. தே³வனாடகா தே³வச்ச²ரா நாம. குதி²தானி குட்டா²னி யேஸம் தானி குதி²த குட்டா²னி. ‘‘ஸரீரானீ’’தி காயங்கா³னி. குதி²த குட்டா²னி ஸரீரானி யஸ்ஸ ஸோ குதி²தகுட்ட²ஸரீரோ. ‘‘குதி²தானீ’’தி அப்³பு⁴க்கிரணானி. வேத³னா யுத்தானி ஹோந்தி இதி அபரே வத³ந்தீதி யோஜனா. தஸ்மா பச்சயோ ஹோதீதி ஸம்ப³ந்தோ⁴. கத²ம் பச்சயோ ஹோதீதி ஆஹ ‘‘யதா² ஆனிஸம்ஸ த³ஸ்ஸனேனா’’திஆதி³ம். தத்த² ‘‘அட்ட²கதா²யம்’’தி விஸுத்³தி⁴ மக்³க³ட்ட²கதா²யம். ‘‘பு³த்³த⁴ஸுபு³த்³த⁴தா த³ஸ்ஸனேனா’’தி அத்தனோ ஸத்து²பூ⁴தஸ்ஸ பு³த்³த⁴ஸ்ஸ ஸுபு³த்³த⁴தா த³ஸ்ஸனேன. ‘‘அத்தஸம்பத்தி த³ஸ்ஸனேனா’’தி மயம் பன ஏவரூபா து³க்கா² முத்தாம்ஹாதி ஏவம் அத்தனோ ஸம்பத்தி த³ஸ்ஸனேன. ‘‘அட்டி²கங்கலிகபேதரூபே’’தி நிம்மம் ஸலோஹிதே அட்டி²புஞ்ஜபேதஸரீரே. ‘‘குட்டி²னோ’’தி குட்ட²ஸரீரஸ்ஸ. ‘‘அட்ட²கதா²யம்’’தி த⁴ம்மபத³ அட்ட²கதா²யம். அதி இட்டே² தே³வச்ச²ர வண்ணாதி³கே. அதி அனிட்டே² குதி²தகுட்ட²ஸரீராதி³கே. ‘‘வத்து² பூ⁴தோ’’தி உப்பத்திட்டா²ன பூ⁴தோ. ‘‘தேஸம் தேஸம் ஸத்தானம்’’தி கத்து அத்தே²ஸாமிவசனம். ‘‘தது³ப⁴யம் பீ’’தி உப⁴யம் தம் க³ஹணம்பி. ‘‘தேஸம்’’தி தேஸம் லோகிய மஹாஜனானம். ‘‘விபல்லாஸவஸேனேவ ஹோதீ’’தி தே³வச்ச²ரவண்ணாதீ³ஸு அதிஇட்டே²ஸு அதிஇட்டா²காரதோ க³ஹணம்பி விபல்லாஸ வஸேனேவ ஹோதி. கஸ்மா, தே³வச்ச²ர வண்ணாதீ³ஸு அதி இட்ட² ஸஞ்ஞாய விபல்லாஸ ஸஞ்ஞாபா⁴வதோ.

விபா⁴வனிபாடே². ‘‘பவத்தியா’’தி பவத்தனதோ. அட்ட²கதா²தி⁴ப்பாயே ட²த்வா வுத்தத்தா அட்ட²கதா²கா³ரவேன’’தம் விசாரேதப்³ப³ மேவா’’தி வுத்தம். அத்த²தோ பன அயுத்தமேவாதி வுத்தம் ஹோதி. ஏஸனயோ அஞ்ஞத்த²பி. ‘‘த⁴ம்ம சக்கு²ரஹிதா’’தி த⁴ம்ம வவத்தா²னஞ்ஞாண சக்கு² ரஹிதா. ‘‘குஸலாகுஸலானி யேவா’’தி தேஸம் த⁴ம்ம சக்கு² ரஹிதானம் உப்பன்னானி குஸலாகுஸலானியேவ. கா³தா²யம். ‘‘ரூபா’’தி ரூபதோ நப்பவேத⁴ந்தீதி ஸம்ப³ந்தோ⁴. ‘‘ஸத்³தா³’’திஆதீ³ஸுபி ஏஸேவனயோ. நப்பவேத⁴ந்தீதி ச ந சலந்தி, ந கம்பந்தி, சித்தஞ்ஞத²த்தம் ந க³ச்ச²ந்தி. ததா² உபேக்கா² க்ரியஜவனானந்தரம்பி ததா³ரம்மணானி ஸோமனஸ்ஸு பேக்கா²வேத³னா யுத்தானி ஏவ ஸியுந்தி யோஜனா. மூலடீகாபாடே². ‘‘ததா³ரம்மணதா’’தி ததா³ரம்மணதாய ததா³ரம்மணபா⁴வேன. ‘‘கத்த²சீ’’தி கத்த²சி அபி⁴த⁴ம்ம பாளியம். ‘‘விஜ்ஜமானே ச தஸ்மிம்’’தி தஸ்மிம் க்ரியஜவனானு ப³ந்த⁴கே ததா³ ரம்மணே விஜ்ஜமானே ஸதி. ஏதம் ப⁴வங்க³ஞ்ச நாம அனுப³ந்த⁴தீதி ஸம்ப³ந்தோ⁴. நதீ³ஸோதோ படிஸோதகா³மினாவம் அனுப³ந்த⁴தி வியாதி யோஜனா. ‘‘ஸவிப்பா²ரிகம் ஏவஜவனம்’’தி கிலேஸ த⁴ம்மானம் விபல்லாஸ த⁴ம்மானஞ்ச வஸேன க²ணமத்தேபி அனேகஸதேஸு ஆரம்மணேஸு விவிதா⁴காரேன ப²ரணவேக³ஸஹிதம் குஸலாகுஸல ஜவனமேவ அனுப³ந்த⁴தீதி யுத்தம். ந பன க்ரியஜவனம் அனுப³ந்த⁴தீதி யுத்தந்தி யோஜனா. ‘‘ச²ளங்கு³ பேக்கா²வதோ’’தி சக்கு²னா ரூபம் தி³ஸ்வா நேவ ஸுமனோ ஹோதி, ந து³ம்மனோ, உபேக்க²கோ விஹரதீ-திஆதி³னா வுத்தாய ச² த்³வாரிகவஸேன ச²ளங்க³ ஸமன்னாக³தாய உபேக்கா²ய ஸம்பன்னஸ்ஸ. வத்தனம் வுத்தி. ஸந்தா வுத்தி அஸ்ஸாதி ஸந்த வுத்தி. தம் விசாரேந்தோ ‘‘பட்டா²னே பனா’’திஆதி³மாஹ. ‘‘யதி³ சேதம் வுச்சேய்யா’’தி ஏத்த² ‘‘ஏதம்’’தி க்ரியா ப்³யாகதேதிஆதி³கம் ஏதம் வசனம். ‘‘தஸ்மிம்’’தி தஸ்மிம் வசனே. ‘‘ஏவமாதி³னா’’தி ஏவமாதி³னா நயேன. விபா⁴வனிபாடே². ‘‘உத்தரம்’’தி பரிஹாரம். ‘‘விபஸ்ஸனாசார வஸேனா’’தி விபஸ்ஸனா பவத்தி வஸேன. ‘‘தேஸம்’’தி ஸோமனஸ்ஸ தோ³மனஸ்ஸானம். ‘‘இதரீதரானந்தர பச்சயதா’’தி அஞ்ஞமஞ்ஞானந்தர பச்சயதாதி அத்தோ². ‘‘தே²ரேனா’’தி அனுருத்³த⁴த்தே²ரேன. ஸப்³பா³னி ததா³ ரம்மணானி, ஸப்³பா³னி ப⁴வங்கா³னி ச. ‘‘ஸமுதா³ சரந்தீ’’தி சிரகாலம் ஸஞ்சரந்தி. ‘‘ஏதானிஹீ’’திஆதி³னா தேஸம் அட்டா²ரஸன்னம் ஜவனானம் அனந்தரம் ததா³ரம்மணானம் அனியமதோ பவத்தியா காரணயுத்திம் த³ஸ்ஸேதி. ஸம்ப⁴வதி உப்பஜ்ஜதி ஏதேனாதி ஸம்ப⁴வோ. ததா³ ரம்மணஸ்ஸ ஸம்ப⁴வோ ததா³ ரம்மண ஸம்ப⁴வோ. அத²வா, ஸம்ப⁴வனம் உப்பஜ்ஜனம் ஸம்ப⁴வோதி இமே த்³வே அத்தே² த³ஸ்ஸேதும் ‘‘ததா³ ரம்மண ஸம்ப⁴வோ’’திஆதி³ வுத்தம். ‘‘யேஸம் பனா’’திஆதீ³ஸு. ‘‘யேஸம்’’தி யேஸம் புக்³க³லானம். ‘‘இதரானீ’’தி உபேக்கா² ஸந்தீரண த்³வயதோ அஞ்ஞானி. ‘‘ந ஹோந்தீதி ந வத்தப்³பா³னீ’’தி வுத்தம். ஏவம்ஸதி, கஸ்மா தே²ரேன இத⁴ ந வுத்தானீதி. அட்ட²ஸாலினியம் அவுத்தத்தா இத⁴ ந வுத்தானீதி. அட்ட²ஸாலினியம் பன கஸ்மா ந வுத்தானி. யேபூ⁴ய்ய நியமஸோதே பதிதத்தா ந வுத்தானி. ந பன அலப்³ப⁴மானத்தா ந வுத்தானீதி இமமத்த²ம் த³ஸ்ஸேந்தோ ‘‘அட்ட²கதா²யம் பனா’’திஆதி³மாஹ. ‘‘உபேக்கா²ஸஹக³த ஸந்தீரண த்³வயமேவ வுத்தம்’’தி ஆக³ந்துக ப⁴வங்க³பா⁴வேன வுத்தம். யதா²ஹ அத²ஸ்ஸ யதா³ ஸோமனஸ்ஸ ஸஹக³தப்படிஸந்தி⁴கஸ்ஸ பவத்தே ஜா²னம் நிப்³ப³த்தேத்வா பமாதே³ன பரிஹீனஜ்ஜா²னஸ்ஸ பணீத த⁴ம்மோ மே நட்டோ²தி பச்சவேக்க²தோ விப்படிஸாரி வஸேன தோ³மனஸ்ஸம் உப்பஜ்ஜதி, ததா³ கிம் உப்பஜ்ஜதி. ஸோமனஸ்ஸானந்தரஞ்ஹி தோ³மனஸ்ஸம், தோ³மனஸ்ஸானந்தரஞ்ச ஸோமனஸ்ஸம் பட்டா²னே படிஸித்³த⁴ம். மஹக்³க³த த⁴ம்மம் ஆரப்³ப⁴ ஜவனே ஜவிதே ததா³ ரம்மணம்பி தத்தே²வ படிஸித்³த⁴ந்தி. குஸல விபாகாவா அகுஸலவிபாகாவா உபேக்கா² ஸஹக³தா ஹேதுகமனோவிஞ்ஞாண தா⁴து உப்பஜ்ஜதி. கிமஸ்ஸா ரம்மணந்தி. ரூபாதீ³ஸு பரித்த த⁴ம்மேஸு அஞ்ஞதரம். ஏதேஸு ஹி யதே³வ தஸ்மிம் ஸமயே ஆபாதமாக³தம் ஹோதி. தம் ஆரப்³ப⁴ ஏதம் சித்தம் உப்பஜ்ஜதீதி வேதி³தப்³ப³ம்-தி. ஏவம் தோ³மனஸ்ஸஸஹக³த ஜவனானுரூபம் உபேக்கா²ஸஹக³த ஸந்தீரண த்³வயமேவ ஆக³ந்துக ப⁴வங்க³பா⁴வேன அட்ட²கதா²யம் வுத்தந்தி. ‘‘ஏதம்பி யுஜ்ஜதி யேவா’’தி அகுஸல ஜவனாவஸானே ஏதம் ஸஹேதுகம் ஆக³ந்துக ப⁴வங்க³ம்பி யுஜ்ஜதியேவ. ‘‘தோ³மனஸ்ஸ ஜவனானந்தரம் ப⁴வங்க³ பாதோவ ஹோதீ’’தி உபேக்கா² ஸஹக³த மூலப⁴வங்க³ பாதோவ ஹோதி. ஆக³ந்துக ப⁴வங்கே³ன கிச்சம் நத்தி². கஸ்மா, உபேக்கா² படிஸந்தி⁴கத்தா. நேவததா³ரம்மண ஸம்ப⁴வோ அத்தி². கஸ்மா, தேஸு ஆரம்மணேஸு ததா³ரம்மணவாரஸ்ஸ அஸம்ப⁴வதோ. ந ஹி மஹந்தாரம்மணேஸு ச அவிபூ⁴தாரம்மணேஸு ச ததா³ரம்மணவாரோ ஸம்ப⁴வதி. ந ச மூலப⁴வங்க³ ஸம்ப⁴வோ அத்தி². கஸ்மா, மூலப⁴வங்க³பூ⁴ தஸ்ஸ ஸோமனஸ்ஸ ப⁴வங்க³ஸ்ஸ தோ³மனஸ்ஸ ஜவனேன ஸஹ விருத்³த⁴த்தா. ‘‘இதி கத்வா’’தி இமினா காரணேன. ‘‘ஏகம்’’தி ஏகம் உபேக்கா²ஸஹக³த விபாகம். ததா² தஸ்ஸேவ தோ³மனஸ்ஸம் உப்பாதே³ந்தஸ்ஸ நேவ ததா³ரம்மண ஸம்ப⁴வோ அத்தி². ந ச மூலப⁴வங்க³ ஸம்ப⁴வோதி கத்வா தோ³மனஸ்ஸானந்தரம் ச²ஸு…பே… பவத்ததீதி யோஜனா. தத்த² ‘‘தஸ்ஸேவா’’தி ஸோமனஸ்ஸப்படிஸந்தி⁴கஸ்ஸேவ. நேவததா³ரம்மண ஸம்ப⁴வோ அத்தி². கஸ்மா, ஆரம்மணானம் அதிமஹந்தத்தேபி அதிவிபூ⁴தத்தேபி ஸதி ஸோமனஸ்ஸ ததா³ரம்மணஸ்ஸ ஜவனேன ஸஹ விருத்³த⁴த்தா. உபேக்கா² ததா³ ரம்மணஸ்ஸ ச ஆரம்மணேன ஸஹ விருத்³த⁴த்தா. ந ஹி அதி இட்டா²ரம்மணே உபேக்கா² ததா³ரம்மணம் பவத்ததி. மஹக்³க³த பஞ்ஞத்தா ரம்மணேஸு பன உப⁴யம்பி ததா³ரம்மணம் நுப்பஜ்ஜதியேவ. ந ச மூலப⁴வங்க³ ஸம்ப⁴வோ அத்தி². கஸ்மா, ஜவனேன ஸஹ விருத்³த⁴த்தாதி.

‘‘ஏத்த² சா’’திஆதீ³ஸு. ‘‘ஸப்³ப³ த⁴ம்மேஸூ’’தி ஸப்³பே³ஸு ஆரம்மண த⁴ம்மேஸு. ‘‘பத²ம ஸமன்னாஹாரோ’’தி ஆவஜ்ஜன கிச்சம் ஆஹ. ஸுத்தந்த பாடே². ‘‘தஜ்ஜோ’’தி தேன ஆரம்மணானம் ஆபாதா க³மனேன ஜாதோ. ‘‘தஜ்ஜோ’’தி வா தத³னுரூபோதிபி வத³ந்தி. ‘‘விஞ்ஞாணபா⁴க³ஸ்ஸா’’தி சக்கு² த்³வாரிக விஞ்ஞாண கோட்டா²ஸஸ்ஸ. ‘‘யதோ’’தி யஸ்மிம் காலே. கத²ம் ஆவஜ்ஜனேன வினா நுப்பஜ்ஜதீதி ஆஹ ‘‘ஸசே ஆவஜ்ஜனேனா’’திஆதி³ம். ‘‘ஏத்த² ஸியா’’திஆதீ³ஸு. யதா² பன நிராவஜ்ஜனம் ஹோதி பி⁴ன்னா ரம்மணஞ்ச, ஏவம் ததா²தி யோஜனா. ‘‘ஏகஸ்ஸபீ’’தி ஏகஸ்ஸ ஆக³ந்துக ப⁴வங்க³ஸ்ஸபி நத்தி² தோ³ஸோ. மஹாஅட்ட²கதா²யஞ்ச நத்தி². அட்ட²ஸாலினியம் பன அத்தி²யேவ. ‘‘ஸவிப்ப²ந்த³னத்தா’’தி ஏத்த² அத்தோ² ஸவிப்பா²ரிகந்தி பதே³ வுத்தனயேன வேதி³தப்³போ³. ‘‘இதரே ஸஞ்சா’’தி மஹக்³க³தலோகுத்தர ஜவனானஞ்ச. கானி சி பரித்தாரம்மணானிபி ஸமானானி. யதி³ ததா³ரம்மணூ பனிஸ்ஸ யஸ்ஸ காமப⁴வங்க³ஸ்ஸ அபா⁴வதோ ததா³ரம்மணானி ரூபாரூப ப்³ரஹ்மானம் நுப்பஜ்ஜந்தி. ஏவம் ஸதி, சக்கு²ஸோத த்³வாரிக சித்தானிபி ரூப ப்³ரஹ்மானம் நுப்பஜ்ஜேய்யுந்தி ஆஹ ‘‘சக்கு² ஸோதவிஞ்ஞாணானி பனா’’திஆதி³ம். ‘‘இந்த்³ரியப்பவத்தி ஆனுபா⁴வதோ’’தி சக்கு² வத்து² ஸோதவத்து² ஸங்கா²தானம் இந்த்³ரிய வத்தூ²னம் ரூப ப்³ரஹ்ம ஸந்தானே பவத்தத்தா தேஸம் பவத்தி ஆனுபா⁴வதோ சக்கு² ஸோதவிஞ்ஞாணானி ரூபப்³ரஹ்மானம் பவத்தந்தியே வாதி த³ஸ்ஸேதும் ‘‘ஸம்படிச்ச²ன ஸந்தீரணானீ’’திஆதி³ வுத்தம். ‘‘விகப்பப³லேவா’’தி காமகுஸலா குஸலானம் விய விவிதே⁴ன ஆகாரேன கப்பேத்வா பகப்பேத்வா ஆரம்மணக்³க³ஹஸாமத்தி²யேவாஸதி. ‘‘அப்பனாபத்த பா⁴வனா கம்மவிஸேஸே வா’’தி ஏத்த² அபி⁴ஞ்ஞா ஜவனானி விய மஹக்³க³த விபாக லோகுத்தர விபாகானி விய சாதி வத்தப்³ப³ம். ‘‘அட்ட²கதா²யம்’’தி படிச்ச ஸமுப்பாத³ விப⁴ங்க³ட்ட²கதா²யம். ‘‘விபா⁴வனியம் வுத்த காரணானீ’’தி அட்ட²கதா²தோ ஆஹரித்வா விபா⁴வனியம் வுத்தானி ‘அஜனகத்தா ஜனக ஸமானத்தா பா⁴வதோ’திஆதீ³னி காரணானி.

140. ஜவன நியமே. அட்ட²கதா²யம்பி ச²க்க²த்தும் பவத்தி வுத்தா. யதா²ஹ ஸசே பன ப³லவா ரம்மணம் ஆபாதாக³தம் ஹோதி. க்ரியமனோதா⁴துயா ப⁴வங்கே³ ஆவட்டிதே சக்கு²விஞ்ஞாணாதீ³னி உப்பஜ்ஜந்தி. ஜவனட்டா²னே பன பத²மகாமாவசர குஸல சித்தம் ஜவனம் ஹுத்வா ச²ஸத்தவாரே ஜவித்வா ததா³ரம்மணஸ்ஸ வாரம் தே³தீதி. ‘‘முது³தர பா⁴வேனா’’தி மாதுகுச்சி²ம்ஹி டி²தகாலேவா ஸம்பதி ஜாதகாலே வா வத்து²ஸ்ஸ அதிமுது³பா⁴வேன. ‘‘கேனசிஉபத்³து³த பா⁴வேனா’’தி பா³ள்ஹகே³லஞ்ஞஜாதகாலே கேனசி வாதபித்தஸேம்ஹாதி³னா உபத்³து³த பா⁴வேன. ‘‘அஜ்ஜோ²த்த²ட பா⁴வேனா’’தி தஸ்ஸ வேவசனமத்தம். மந்தீ³பூ⁴தோ வேகோ³ யேஸம் தானி மந்தீ³பூ⁴த வேகா³னி. ‘‘அஸய்ஹ ரூபேஹீ’’தி து³க்க²மஸபா⁴வேஹி. அபி⁴பூ⁴தானம் ஸத்தானம். தஞ்ச கோ² வசனம் பாகதிக ஸத்தானம் வஸேனேவ வுத்தம். ந ஸத்தவிஸேஸானம் வஸேன. ஏவம் ஸதி, ஸத்தவிஸேஸானம் வஸேன கத²ம் த³ட்ட²ப்³ப³ந்தி ஆஹ ‘‘யே பனா’’திஆதி³ம். ‘‘உபரீ’’தி மரணுப்பத்திட்டா²னே. ‘‘வுத்தஞ்ஹீ’’தி விஸுத்³தி⁴ மக்³கே³ வுத்தமேவ. ‘‘யமகப்பாடிஹாரியம்’’தி யுக³ளவத்தூ²னம் ஏகதோ பவத்த அச்ச²ரிய கம்மம். ‘‘த்³வே ஜா²னங்கா³னீ’’தி உபேக்கே²கக்³க³தா ஜா²னங்கா³னி.

‘‘யோக³கம்மஸித்³தி⁴யா’’தி பா⁴வனானு யோக³கம்மஸித்³த⁴ஸ்ஸ. இத்³தி⁴ விகுப்³ப³னம் நாம இத்³தி⁴யா நானாகம்மகரணம். ‘‘ஸித்³தி⁴யா ஏவா’’தி ஸிஜ்ஜ² நத்தா²ய ஏவ. அத்தனோ அனந்தரே ஏவ உப்பன்னம் ப²லம் ஏதிஸ்ஸாதி ஆனந்தரிகப்ப²லா. மக்³க³சேதனா. ‘‘இதீ’’தி தஸ்மா. ‘‘மந்த³ஸ்ஸா’’தி மந்த³ புக்³க³லஸ்ஸ. ‘‘திக்க²ஸ்ஸா’’தி திக்க² புக்³க³லஸ்ஸ. தீணி ப²லசித்தானி. ‘‘பயோகா³பி⁴ஸங்கா²ரஸ்ஸா’’தி பத²மஜ்ஜா²னதோ பட்டா²ய ஸமத² விபஸ்ஸனாயுக³னந்த⁴ப்பவத்தி ஸங்கா²தஸ்ஸ புப்³ப³ப்பயோகா³பி⁴ஸங்கா²ரஸ்ஸ. ‘‘அகதாதி⁴காரஸ்ஸா’’தி ஆஸன்னே புரிமப⁴வே அகத ஜா²னபரிகம்மஸ்ஸ புக்³க³லஸ்ஸ. ஸப்³பே³ஸம்பி ப²லட்டா²னம் சிண்ணவஸிபா⁴வானேவ ஹோந்தீதி யோஜனா.

ஜவனனியமோனிட்டி²தோ.

141. து³ஹேதுகாதீ³ஸு. ஜாதி த்³விஹேதுகாத³யோ ஏவ அதி⁴ப்பேதாதி வுத்தம் ‘‘படிஸந்தி⁴விஞ்ஞாண ஸஹக³தா’’திஆதி³ம். ‘‘தேஸம் த்³வின்னம் பீ’’தி த்³விஹேதுகானம்பி அஹேதுகானம்பி. பு⁴ஸோஜா²ன மக்³க³ப²லானி வாரேந்தி நீவாரேந்தீதி ஆவரணானி. விபாகானி ச தானி ஆவரணானி சாதி விக்³க³ஹோ. ‘‘விபாகானீ’’தி அஹேதுக த்³விஹேதுக விபாகானி. தேஹி க³ஹிதப்படிஸந்தி⁴கானம் இமஸ்மிம் ப⁴வேஜா²ன மக்³க³ப²லப்படிலாபோ⁴ நாம நத்தி². தேனாஹ ‘‘விபாகாவரண ஸப்³பா⁴வதோ’’திஆதி³ம். ‘‘தேஸம்’’தி து³க்³க³தி அஹேதுக புக்³க³லானம். புக்³க³லானந்தி வுத்தம் ஹோதி. ந லப்³ப⁴ந்தீதி ஸம்ப³ந்தோ⁴. ‘‘இதரேஸம்’’தி ததோ அஞ்ஞேஸம் ஸுக³தி அஹேதுக புக்³க³லானம்.

‘‘ஏத்த² ஸியா’’திஆதீ³ஸு. து³க்³க³தி பரியாபன்னானஞ்ச அஹேதுகானம். ‘‘மூலப⁴வங்கே³’’திஆதி³ம்ஹி படிஸந்தி⁴ சித்தம் ஹுத்வா ஆக³தே மூலப⁴வங்கே³. ‘‘யம் கிஞ்சீ’’தி யம் கிஞ்சி ப⁴வங்க³ம். ‘‘வுச்சதே’’தி விஸஜ்ஜனா வுச்சதே. ‘‘ஸப்³ப³ அட்ட²கதா²ஸு படிக்கி²த்தோ’’தி அட்ட²ஸாலினியம் தாவ விபாகுத்³தா⁴ரகதா²யம் ஸோளஸஸு காமாவசர குஸல விபாகேஸு அட்ட²ன்னம் அஹேதுக விபாகானம் ஏவ ஆபாயிகேஸு ஸத்தேஸு உப்பத்திம் த³ஸ்ஸேதி. ந அட்ட²ன்னம் ஸஹேதுக விபாகானம். ததா² படிச்ச ஸமுப்பாத³ட்ட² கதா²ஸு ச விஞ்ஞாண பத³வண்ணனாஸு அஞ்ஞாஸு ச அபி⁴த⁴ம்மாவதாராதீ³ஸூதி ஏவம் ஸப்³ப³ட்ட²கதா²ஸு படிக்கி²த்தா நாம ஹோதி. ‘‘யோக³ஸா த⁴னீயத்தா’’தி பயோகே³ன ஸாதே⁴தப்³ப³த்தா. குஸலாகுஸலானி ஹி வட்³டே⁴தும் வா ஹாபேதும் வா பயோகே³ கதே வட்³ட⁴ந்தி சேவ ஹாயந்தி ச. ஞாணவிப்பயுத்தபூ⁴தம் க³ஹேதும் யுத்தம். கஸ்மா, அஹேதுகஸ்ஸ ப⁴வங்க³ஸ்ஸாதி வுத்தஸ்ஸ மூலப⁴வங்க³ஸ்ஸ அஹேதுகத்தா. ‘‘த்³வின்னம்பி அஹேதுகானம்’’தி து³க்³க³தி அஹேதுகானஞ்ச ஸுக³தி அஹேதுகானஞ்ச. ‘‘அபரேபனா’’திஆதி³ விபா⁴வனியம் ஆக³தோ அபரே வாதோ³. வுத்தஞ்ஹி தத்த² ‘அபரேபன யதா² அஹேதுகானம் ஸஹேதுக ததா³ரம்மணம் ஹோதி, ஏவம் த்³விஹேதுகானம் திஹேதுக ததா³ரம்மணம்பீ’தி வண்ணேந்தி. தேஸம்மதானுரோதே⁴ன ச இத⁴பி ஞாணஸம்பயுத்த விபாகப்படிக்கே²போ அஹேதுகேயேவ ஸந்தா⁴யாதி வத³ந்தீதி. தம் பன விபாகுத்³தா⁴ரகதா²யம் ‘ஏத்தே²வ த்³வாத³ஸ கமக்³கோ³பீ’தி ச, ஏத்தே²வ த³ஸகமக்³கோ³பீ’தி ச ஆக³தேஹி ந ஸமேதி. தத்த² ஹி ஸோளஸஸுகுஸலவிபாகேஸு த்³விஹேதுக கம்மனிப்³ப³த்தானம் த்³வின்னம் த்³விஹேதுகாஹேதுக புக்³க³லானம் சத்தாரி ஞாணஸம்பயுத்த விபாகானி வஜ்ஜேத்வா த்³வாத³ஸ கமக்³கோ³ நாம ஹோதி. புன ஸேஸேஸு த்³வாத³ஸ விபாகேஸுபி அஸங்கா²ரிக கம்மனிப்³ப³த்தானம் த்³வே ஞாணவிப்பயுத்த ஸஸங்கா²ரிக விபாகானி, ஸஸங்கா²ரிக கம்மனிப்³ப³த்தானஞ்ச த்³வே ஞாணவிப்பயுத்த அஸங்கா²ரிக விபாகானி வஜ்ஜேத்வா து³தியத்தே²ர வாதே³ த³ஸகமக்³கோ³ நாம ஹோதீதி. ஏத்த² பன த்³வி ஹேதுகோபி புக்³க³லோ அதி⁴கேன ச²ந்தே³ன வா வீரியேன வா சித்தேன வா யுத்தோ பரியத்தி த⁴ம்மம் வா நானாவிஜ்ஜாஸிப்பானி வா ப³ஹும் க³ண்ஹேய்ய, ஸுணேய்ய, தா⁴ரேய்ய, வாசேய்ய, சிந்தேய்ய. அத²ஸ்ஸ ஞாணஸம்பயுத்த ஜவனம் ப³ஹுலம் ஸமுதா³ சரேய்ய. ததா³ தஸ்ஸ நானாகம்மேன ஜவனானு ரூபம் ஞாணஸம்பயுத்த ததா³ரம்மணம் ந ந ஸம்ப⁴வதீதி வுத்தம். தம் யுத்தம் விய தி³ஸ்ஸதீதி. ‘‘அட்ட²கதா²யம் பிஹி. ல. வுத்தா’’தி கத²ம் வுத்தா. ஏதானி ஹி மனுஸ்ஸேஸு ச காமாவசர தே³வேஸு ச புஞ்ஞவந்தானம் த்³விஹேதுகதி ஹேதுகானம் படிஸந்தி⁴காலே படிஸந்தி⁴ ஹுத்வா விபச்சந்தீதிஆதி³னா வுத்தாதி. தே பன திவிதா⁴, நவவிதா⁴தி ஸம்ப³ந்தோ⁴. ‘‘தேஸம் தப்³பா⁴வோ’’தி குஸலானம் குஸலபா⁴வோ, அகுஸலானம் அகுஸலபா⁴வோ. ‘‘ஸிக்க²ன த⁴ம்மயுத்தா’’தி தீஹி ஸிக்கா²ஹி பஹாதப்³பா³னம் கிலேஸானம் அத்தி²தாய ஸிக்கி²தப்³ப³தா பகதியம் டி²தாதி அதி⁴ப்பாயோ.‘‘ஹேட்டி²மானஞ்சா’’தி ஹேட்டி²ம ப²லானஞ்ச. யானியானிஸகானி யதா²ஸகம். ‘‘உபரிமானம்’’தி உபரிமானம் புக்³க³லானம். ‘‘பரினிட்டி²த ஸிக்கா² கிச்சத்தா’’தி ஸிக்கா² கிச்சம் நாம கிலேஸ த⁴ம்மானம் பஹானத்தா²ய ஏவ ஹோதீதி தேஸு ஸப்³ப³ஸோ பஹீனேஸு ஸிக்கா² கிச்சம் பரினிட்டி²தம் ஹோதி. ஏவம் பரினிட்டி²த ஸிக்கா² கிச்சத்தா. ஸுட்டு² ப⁴ப்³போ³தி ஸம்ப⁴வோ. ஸம்ப⁴வோதி விஸேஸன பத³மேதந்தி ஆஹ ‘‘யதா² ஸம்ப⁴வம்’’தி.

142. ‘‘ஏத்தே²வா’’தி ஏதஸ்மிம் காமலோகே ஏவ. ‘‘தம் தம் பஸாத³ரஹிதானம்’’தி தேனதேன பஸாதே³ன ரஹிதானம். தஸ்மிம் தஸ்மிம் த்³வாரே உப்பன்னானி தம் தம் த்³வாரிகானி. சதுஸட்டி²வீதி² சித்தானி. த்³வே சத்தாலீஸ வீதி² சித்தானி. ‘‘ப்³ரஹ்மலோகே வா’’திஆதீ³ஸு. இத³ம் அட்ட²கதா² வசனம். யதா²ஹ ரூபப⁴வே சதுன்னம் விஞ்ஞாணானம், ததே²வ பச்சயோ. பவத்தே, நோபடிஸந்தி⁴யம். ஸோச கோ² காமாவசரே அனிட்ட² ரூபத³ஸ்ஸன ஸத்³த³ஸவனவஸேன, ப்³ரஹ்மலோகே பன அனிட்டா² ரூபாத³யோ நாம நத்தி². ததா² காமாவசர தே³வலோகே பீதி. தானி சத்தாரி சித்தானி. ‘‘தத்தா²’’தி தஸ்மிம் ரூபலோகே. விபா⁴வனிபாடே². ‘‘இதா⁴’’தி இமஸ்மிம் வசனே. ‘‘தம் தம் பூ⁴மி பரியாபன்னே’’தி திஸ்ஸம் திஸ்ஸம் பூ⁴மியம் பரியாபன்னே. ஸேஸமேத்த² ஸுவிஞ்ஞேய்யம்.

வீதி²ஸங்க³ஹதீ³பனியாஅனுதீ³பனா நிட்டி²தா.