9. சேதோகி²லஸுத்தம்

71. [அ. நி. 5.205; தீ³. நி. 3.319; ம. நி. 1.185] ‘‘பஞ்சிமே, பி⁴க்க²வே, சேதோகி²லா [சேதோகீ²லா (க.)]. கதமே பஞ்ச? இத⁴ பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பட²மோ சேதோகி²லோ.

‘‘புன சபரம், பி⁴க்க²வே, பி⁴க்கு² த⁴ம்மே கங்க²தி…பே… ஸங்கே⁴ கங்க²தி… ஸிக்கா²ய கங்க²தி… ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பஞ்சமோ சேதோகி²லோ.

‘‘இமேஸம், கோ², பி⁴க்க²வே, பஞ்சன்னம் சேதோகி²லானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. நவமம்.