2. து³தியபண்ணாஸகம்

(6) 1. கே²மவக்³கோ³

1. கே²மஸுத்தம்

52. ‘‘‘கே²மம் கே²ம’ந்தி, ஆவுஸோ, வுச்சதி. கித்தாவதா நு கோ², ஆவுஸோ, கே²மம் வுத்தம் ப⁴க³வதா’’தி?

‘‘இதா⁴வுஸோ, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. ஏத்தாவதாபி கோ², ஆவுஸோ, கே²மம் வுத்தம் ப⁴க³வதா பரியாயேன…பே….

‘‘புன சபரம், ஆவுஸோ, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. ஏத்தாவதாபி கோ², ஆவுஸோ, கே²மம் வுத்தம் ப⁴க³வதா நிப்பரியாயேனா’’தி. பட²மம்.

2. கே²மப்பத்தஸுத்தம்

53. கே²மப்பத்தோ கே²மப்பத்தோதி, ஆவுஸோ, வுச்சதி…பே…. து³தியம்.

3. அமதஸுத்தம்

54. அமதம் அமதந்தி, ஆவுஸோ, வுச்சதி…பே…. ததியம்.

4. அமதப்பத்தஸுத்தம்

55. அமதப்பத்தோ அமதப்பத்தோதி, ஆவுஸோ, வுச்சதி…பே…. சதுத்த²ம்.

5. அப⁴யஸுத்தம்

56. அப⁴யம் அப⁴யந்தி, ஆவுஸோ, வுச்சதி…பே…. பஞ்சமம்.

6. அப⁴யப்பத்தஸுத்தம்

57. அப⁴யப்பத்தோ அப⁴யப்பத்தோதி, ஆவுஸோ, வுச்சதி…பே…. ச²ட்ட²ம்.

7. பஸ்ஸத்³தி⁴ஸுத்தம்

58. பஸ்ஸத்³தி⁴ பஸ்ஸத்³தீ⁴தி, ஆவுஸோ, வுச்சதி…பே…. ஸத்தமம்.

8. அனுபுப்³ப³பஸ்ஸத்³தி⁴ஸுத்தம்

59. அனுபுப்³ப³பஸ்ஸத்³தி⁴ அனுபுப்³ப³பஸ்ஸத்³தீ⁴தி, ஆவுஸோ, வுச்சதி…பே…. அட்ட²மம்.

9. நிரோத⁴ஸுத்தம்

60. நிரோதோ⁴ நிரோதோ⁴தி, ஆவுஸோ, வுச்சதி…பே…. நவமம்.

10. அனுபுப்³ப³னிரோத⁴ஸுத்தம்

61. ‘‘‘அனுபுப்³ப³னிரோதோ⁴ அனுபுப்³ப³னிரோதோ⁴’தி, ஆவுஸோ, வுச்சதி. கித்தாவதா நு கோ², ஆவுஸோ, அனுபுப்³ப³னிரோதோ⁴ வுத்தோ ப⁴க³வதா’’தி?

‘‘இதா⁴வுஸோ, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. ஏத்தாவதாபி கோ², ஆவுஸோ, அனுபுப்³ப³னிரோதோ⁴ வுத்தோ ப⁴க³வதா பரியாயேன…பே….

‘‘புன சபரம், ஆவுஸோ, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. ஏத்தாவதாபி கோ², ஆவுஸோ, அனுபுப்³ப³னிரோதோ⁴ வுத்தோ ப⁴க³வதா நிப்பரியாயேனா’’தி. த³ஸமம்.

11. அப⁴ப்³ப³ஸுத்தம்

62. ‘‘நவ, பி⁴க்க²வே, த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும். கதமே நவ? ராக³ம், தோ³ஸம், மோஹம், கோத⁴ம், உபனாஹம், மக்க²ம், பளாஸம், இஸ்ஸம், மச்ச²ரியம் – இமே கோ², பி⁴க்க²வே, நவ த⁴ம்மே அப்பஹாய அப⁴ப்³போ³ அரஹத்தம் ஸச்சி²காதும்.

‘‘நவ, பி⁴க்க²வே, த⁴ம்மே பஹாய ப⁴ப்³போ³ அரஹத்தம் ஸச்சி²காதும். கதமே நவ? ராக³ம், தோ³ஸம், மோஹம், கோத⁴ம், உபனாஹம், மக்க²ம், பளாஸம், இஸ்ஸம், மச்ச²ரியம் – இமே கோ², பி⁴க்க²வே, நவ த⁴ம்மே பஹாய ப⁴ப்³போ³ அரஹத்தம் ஸச்சி²காது’’ந்தி. ஏகாத³ஸமம்.

கே²மவக்³கோ³ பட²மோ.

தஸ்ஸுத்³தா³னம் –

கே²மோ ச அமதஞ்சேவ, அப⁴யம் பஸ்ஸத்³தி⁴யேன ச;

நிரோதோ⁴ அனுபுப்³போ³ ச, த⁴ம்மம் பஹாய ப⁴ப்³பே³ன சாதி.

(7) 2. ஸதிபட்டா²னவக்³கோ³

1. ஸிக்கா²து³ப்³ப³ல்யஸுத்தம்

63. ‘‘பஞ்சிமானி, பி⁴க்க²வே, ஸிக்கா²து³ப்³ப³ல்யானி. கதமானி பஞ்ச? பாணாதிபாதோ, அதி³ன்னாதா³னம், காமேஸுமிச்சா²சாரோ, முஸாவாதோ³, ஸுராமேரயமஜ்ஜபமாத³ட்டா²னம் – இமானி கோ², பி⁴க்க²வே, பஞ்ச ஸிக்கா²து³ப்³ப³ல்யானி.

‘‘இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய சத்தாரோ ஸதிபட்டா²னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய இமே சத்தாரோ ஸதிபட்டா²னா பா⁴வேதப்³பா³’’தி. பட²மம்.

2. நீவரணஸுத்தம்

64. ‘‘பஞ்சிமானி, பி⁴க்க²வே, நீவரணானி. கதமானி பஞ்ச? காமச்ச²ந்த³னீவரணம், ப்³யாபாத³னீவரணம், தி²னமித்³த⁴னீவரணம், உத்³த⁴ச்சகுக்குச்சனீவரணம், விசிகிச்சா²னீவரணம் – இமானி கோ², பி⁴க்க²வே, பஞ்ச நீவரணானி.

‘‘இமேஸம் கோ², பி⁴க்க²வே, பஞ்சன்னம் நீவரணானம் பஹானாய சத்தாரோ ஸதிபட்டா²னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். இமேஸம் கோ², பி⁴க்க²வே, பஞ்சன்னம் நீவரணானம் பஹானாய இமே சத்தாரோ ஸதிபட்டா²னா பா⁴வேதப்³பா³’’தி. து³தியம்.

3. காமகு³ணஸுத்தம்

65. ‘‘பஞ்சிமே, பி⁴க்க²வே, காமகு³ணா. கதமே பஞ்ச? சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா, ஸோதவிஞ்ஞேய்யா ஸத்³தா³…பே… கா⁴னவிஞ்ஞேய்யா க³ந்தா⁴… ஜிவ்ஹாவிஞ்ஞேய்யா ரஸா… காயவிஞ்ஞேய்யா போ²ட்ட²ப்³பா³ இட்டா² கந்தா மனாபா பியரூபா காமூபஸம்ஹிதா ரஜனீயா. இமே கோ², பி⁴க்க²வே, பஞ்ச காமகு³ணா.

‘‘இமேஸம் கோ², பி⁴க்க²வே, பஞ்சன்னம் காமகு³ணானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. ததியம்.

4. உபாதா³னக்க²ந்த⁴ஸுத்தம்

66. ‘‘பஞ்சிமே, பி⁴க்க²வே, உபாதா³னக்க²ந்தா⁴. கதமே பஞ்ச? ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴ – இமே கோ², பி⁴க்க²வே, பஞ்சுபாதா³னக்க²ந்தா⁴.

‘‘இமேஸம் கோ², பி⁴க்க²வே, பஞ்சன்னம் உபாதா³னக்க²ந்தா⁴னம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. சதுத்த²ம்.

5. ஓரம்பா⁴கி³யஸுத்தம்

67. ‘‘பஞ்சிமானி, பி⁴க்க²வே, ஓரம்பா⁴கி³யானி ஸம்யோஜனானி. கதமானி பஞ்ச? ஸக்காயதி³ட்டி², விசிகிச்சா², ஸீலப்³ப³தபராமாஸோ, காமச்ச²ந்தோ³, ப்³யாபாதோ³ – இமானி கோ², பி⁴க்க²வே, பஞ்சோரம்பா⁴கி³யானி ஸம்யோஜனானி.

‘‘இமேஸம் கோ², பி⁴க்க²வே, பஞ்சன்னம் ஓரம்பா⁴கி³யானம் ஸம்யோஜனானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. பஞ்சமம்.

6. க³திஸுத்தம்

68. ‘‘பஞ்சிமா, பி⁴க்க²வே, க³தியோ. கதமா பஞ்ச? நிரயோ, திரச்சா²னயோனி, பேத்திவிஸயோ, மனுஸ்ஸா, தே³வா – இமா கோ², பி⁴க்க²வே, பஞ்ச க³தியோ.

‘‘இமாஸம் கோ², பி⁴க்க²வே, பஞ்சன்னம் க³தீனம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. ச²ட்ட²ம்.

7. மச்ச²ரியஸுத்தம்

69. ‘‘பஞ்சிமானி, பி⁴க்க²வே, மச்ச²ரியானி. கதமானி பஞ்ச? ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம் – இமானி கோ², பி⁴க்க²வே, பஞ்ச மச்ச²ரியானி.

‘‘இமேஸம் கோ², பி⁴க்க²வே, பஞ்சன்னம் மச்ச²ரியானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. ஸத்தமம்.

8. உத்³த⁴ம்பா⁴கி³யஸுத்தம்

70. ‘‘பஞ்சிமானி, பி⁴க்க²வே, உத்³த⁴ம்பா⁴கி³யானி ஸம்யோஜனானி. கதமானி பஞ்ச? ரூபராகோ³, அரூபராகோ³, மானோ, உத்³த⁴ச்சம், அவிஜ்ஜா – இமானி கோ², பி⁴க்க²வே, பஞ்சுத்³த⁴ம்பா⁴கி³யானி ஸம்யோஜனானி.

‘‘இமேஸம் கோ², பி⁴க்க²வே, பஞ்சன்னம் உத்³த⁴ம்பா⁴கி³யானம் ஸம்யோஜனானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. அட்ட²மம்.

9. சேதோகி²லஸுத்தம்

71. [அ. நி. 5.205; தீ³. நி. 3.319; ம. நி. 1.185] ‘‘பஞ்சிமே, பி⁴க்க²வே, சேதோகி²லா [சேதோகீ²லா (க.)]. கதமே பஞ்ச? இத⁴ பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி. யோ ஸோ, பி⁴க்க²வே, பி⁴க்கு² ஸத்த²ரி கங்க²தி விசிகிச்ச²தி நாதி⁴முச்சதி ந ஸம்பஸீத³தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பட²மோ சேதோகி²லோ.

‘‘புன சபரம், பி⁴க்க²வே, பி⁴க்கு² த⁴ம்மே கங்க²தி…பே… ஸங்கே⁴ கங்க²தி… ஸிக்கா²ய கங்க²தி… ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ. யோ ஸோ, பி⁴க்க²வே, பி⁴க்கு² ஸப்³ரஹ்மசாரீஸு குபிதோ ஹோதி அனத்தமனோ ஆஹதசித்தோ கி²லஜாதோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பஞ்சமோ சேதோகி²லோ.

‘‘இமேஸம், கோ², பி⁴க்க²வே, பஞ்சன்னம் சேதோகி²லானம் பஹானாய…பே… இமே சத்தாரோ ஸதிபட்டா²னா பா⁴வேதப்³பா³’’தி. நவமம்.

10. சேதஸோவினிப³ந்த⁴ஸுத்தம்

72. ‘‘பஞ்சிமே, பி⁴க்க²வே, சேதஸோவினிப³ந்தா⁴ [சேதோவினிப³த்³தா⁴ (ஸாரத்த²தீ³பனீடீகா) அ. நி. 5.206; தீ³. நி. 3.320]. கதமே பஞ்ச? இத⁴, பி⁴க்க²வே, பி⁴க்கு² காமேஸு அவீதராகோ³ ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ. யோ ஸோ, பி⁴க்க²வே, பி⁴க்கு² காமேஸு அவீதராகோ³ ஹோதி அவிக³தச்ச²ந்தோ³ அவிக³தபேமோ அவிக³தபிபாஸோ அவிக³தபரிளாஹோ அவிக³ததண்ஹோ, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பட²மோ சேதஸோவினிப³ந்தோ⁴.

‘‘புன சபரம், பி⁴க்க²வே, பி⁴க்கு² காயே அவீதராகோ³ ஹோதி…பே… ரூபே அவீதராகோ³ ஹோதி… யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி … அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி. யோ ஸோ, பி⁴க்க²வே, பி⁴க்கு² அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதி – ‘இமினாஹம் ஸீலேன வா வதேன வா தபேன வா ப்³ரஹ்மசரியேன வா தே³வோ வா ப⁴விஸ்ஸாமி தே³வஞ்ஞதரோ வா’தி, தஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய. யஸ்ஸ சித்தம் ந நமதி ஆதப்பாய அனுயோகா³ய ஸாதச்சாய பதா⁴னாய, அயம் பஞ்சமோ சேதஸோவினிப³ந்தோ⁴. இமே கோ², பி⁴க்க²வே, பஞ்ச சேதஸோவினிப³ந்தா⁴.

‘‘இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய சத்தாரோ ஸதிபட்டா²னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம்; வேத³னாஸு…பே… சித்தே…பே… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா வினேய்ய லோகே அபி⁴ஜ்ஜா²தோ³மனஸ்ஸம். இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய இமே சத்தாரோ ஸதிபட்டா²னா பா⁴வேதப்³பா³’’தி. த³ஸமம்.

ஸதிபட்டா²னவக்³கோ³ து³தியோ.

தஸ்ஸுத்³தா³னம் –

ஸிக்கா² நீவரணாகாமா, க²ந்தா⁴ ச ஓரம்பா⁴கி³யா க³தி;

மச்சே²ரம் உத்³த⁴ம்பா⁴கி³யா அட்ட²மம், சேதோகி²லா வினிப³ந்தா⁴தி.

(8) 3. ஸம்மப்பதா⁴னவக்³கோ³

1. ஸிக்க²ஸுத்தம்

73. ‘‘பஞ்சிமானி, பி⁴க்க²வே, ஸிக்கா²து³ப்³ப³ல்யானி. கதமானி பஞ்ச? பாணாதிபாதோ …பே… ஸுராமேரயமஜ்ஜபமாத³ட்டா²னம் – இமானி கோ², பி⁴க்க²வே, பஞ்ச ஸிக்கா²து³ப்³ப³ல்யானி.

‘‘இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய சத்தாரோ ஸம்மப்பதா⁴னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; அனுப்பன்னானம் குஸலானம் த⁴ம்மானம் உப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய இமே சத்தாரோ ஸம்மப்பதா⁴னா பா⁴வேதப்³பா³’’தி. பட²மம்.

74-81. (யதா² ஸதிபட்டா²னவக்³கே³ ததா² ஸம்மப்பதா⁴னவஸேன வித்தா²ரேதப்³பா³.)

10. சேதஸோவினிப³ந்த⁴ஸுத்தம்

82. ‘‘பஞ்சிமே, பி⁴க்க²வே, சேதஸோவினிப³ந்தா⁴. கதமே பஞ்ச? இத⁴, பி⁴க்க²வே, பி⁴க்கு² காமேஸு அவீதராகோ³ ஹோதி…பே… இமே கோ², பி⁴க்க²வே, பஞ்ச சேதஸோவினிப³ந்தா⁴.

‘‘இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய சத்தாரோ ஸம்மப்பதா⁴னா பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி; உப்பன்னானம் பாபகானம் அகுஸலானம் த⁴ம்மானம் பஹானாய… அனுப்பன்னானம் குஸலானம் த⁴ம்மானம் உப்பாதா³ய… உப்பன்னானம் குஸலானம் த⁴ம்மானம் டி²தியா அஸம்மோஸாய பி⁴ய்யோபா⁴வாய வேபுல்லாய பா⁴வனாய பாரிபூரியா ச²ந்த³ம் ஜனேதி வாயமதி வீரியம் ஆரப⁴தி சித்தம் பக்³க³ண்ஹாதி பத³ஹதி. இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய இமே சத்தாரோ ஸம்மப்பதா⁴னா பா⁴வேதப்³பா³’’தி. த³ஸமம்.

ஸம்மப்பதா⁴னவக்³கோ³ ததியோ.

(9) 4. இத்³தி⁴பாத³வக்³கோ³

1. ஸிக்க²ஸுத்தம்

83. ‘‘பஞ்சிமானி, பி⁴க்க²வே, ஸிக்கா²து³ப்³ப³ல்யானி. கதமானி பஞ்ச? பாணாதிபாதோ…பே… ஸுராமேரயமஜ்ஜபமாத³ட்டா²னம் – இமானி கோ², பி⁴க்க²வே, பஞ்ச ஸிக்கா²து³ப்³ப³ல்யானி.

‘‘இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய சத்தாரோ இத்³தி⁴பாதா³ பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீரியஸமாதி⁴… சித்தஸமாதி⁴… வீமம்ஸாஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. இமேஸம் கோ², பி⁴க்க²வே, பஞ்சன்னம் ஸிக்கா²து³ப்³ப³ல்யானம் பஹானாய இமே சத்தாரோ இத்³தி⁴பாதா³ பா⁴வேதப்³பா³’’தி. பட²மம்.

84-91. (யதா² ஸதிபட்டா²னவக்³கே³ ததா² இத்³தி⁴பாத³வஸேன வித்தா²ரேதப்³பா³.)

10. சேதஸோவினிப³ந்த⁴ஸுத்தம்

92. ‘‘பஞ்சிமே, பி⁴க்க²வே, சேதஸோவினிப³ந்தா⁴. கதமே பஞ்ச? இத⁴, பி⁴க்க²வே, பி⁴க்கு² காமேஸு அவீதராகோ³ ஹோதி…பே… இமே கோ², பி⁴க்க²வே, பஞ்ச சேதஸோவினிப³ந்தா⁴.

‘‘இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய இமே சத்தாரோ இத்³தி⁴பாதா³ பா⁴வேதப்³பா³. கதமே சத்தாரோ? இத⁴, பி⁴க்க²வே, பி⁴க்கு² ச²ந்த³ஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி, வீரியஸமாதி⁴… சித்தஸமாதி⁴… வீமம்ஸாஸமாதி⁴பதா⁴னஸங்கா²ரஸமன்னாக³தம் இத்³தி⁴பாத³ம் பா⁴வேதி. இமேஸம் கோ², பி⁴க்க²வே, பஞ்சன்னம் சேதஸோவினிப³ந்தா⁴னம் பஹானாய இமே சத்தாரோ இத்³தி⁴பாதா³ பா⁴வேதப்³பா³’’தி. த³ஸமம்.

இத்³தி⁴பாத³வக்³கோ³ சதுத்தோ².

யதே²வ ஸதிபட்டா²னா, பதா⁴னா சதுரோபி ச;

சத்தாரோ இத்³தி⁴பாதா³ ச, ததே²வ ஸம்பயோஜயேதி.

(10) 5. ராக³பேய்யாலம்

93. ‘‘ராக³ஸ்ஸ, பி⁴க்க²வே, அபி⁴ஞ்ஞாய நவ த⁴ம்மா பா⁴வேதப்³பா³. கதமே நவ? அஸுப⁴ஸஞ்ஞா, மரணஸஞ்ஞா, ஆஹாரே படிகூலஸஞ்ஞா, ஸப்³ப³லோகே அனபி⁴ரதஸஞ்ஞா, அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞா – ராக³ஸ்ஸ, பி⁴க்க²வே அபி⁴ஞ்ஞாய இமே நவ த⁴ம்மா பா⁴வேதப்³பா³’’தி.

94. ‘‘ராக³ஸ்ஸ, பி⁴க்க²வே, அபி⁴ஞ்ஞாய நவ த⁴ம்மா பா⁴வேதப்³பா³. கதமே நவ? பட²மம் ஜா²னம், து³தியம் ஜா²னம், ததியம் ஜா²னம், சதுத்த²ம் ஜா²னம், ஆகாஸானஞ்சாயதனம், விஞ்ஞாணஞ்சாயதனம், ஆகிஞ்சஞ்ஞாயதனம், நேவஸஞ்ஞானாஸஞ்ஞாயதனம், ஸஞ்ஞாவேத³யிதனிரோதோ⁴ – ராக³ஸ்ஸ, பி⁴க்க²வே, அபி⁴ஞ்ஞாய இமே நவ த⁴ம்மா பா⁴வேதப்³பா³’’தி.

95-112. ‘‘ராக³ஸ்ஸ, பி⁴க்க²வே, பரிஞ்ஞாய…பே… பரிக்க²யாய…பே… பஹானாய…பே… க²யாய…பே… வயாய…பே… விராகா³ய…பே… நிரோதா⁴ய…பே… சாகா³ய…பே… படினிஸ்ஸக்³கா³ய…பே… இமே நவ த⁴ம்மா பா⁴வேதப்³பா³’’.

113-432. ‘‘தோ³ஸஸ்ஸ…பே… மோஹஸ்ஸ… கோத⁴ஸ்ஸ… உபனாஹஸ்ஸ… மக்க²ஸ்ஸ… பளாஸஸ்ஸ… இஸ்ஸாய… மச்ச²ரியஸ்ஸ… மாயாய… ஸாடே²ய்யஸ்ஸ… த²ம்ப⁴ஸ்ஸ… ஸாரம்ப⁴ஸ்ஸ… மானஸ்ஸ… அதிமானஸ்ஸ… மத³ஸ்ஸ… பமாத³ஸ்ஸ அபி⁴ஞ்ஞாய…பே… பரிஞ்ஞாய… பரிக்க²யாய… பஹானாய… க²யாய… வயாய… விராகா³ய… நிரோதா⁴ய … சாகா³ய… படினிஸ்ஸக்³கா³ய…பே… இமே நவ த⁴ம்மா பா⁴வேதப்³பா³’’தி.

ராக³பேய்யாலம் நிட்டி²தம்.