2. காயஸக்கீ²ஸுத்தம்

43. ‘‘‘காயஸக்கீ² காயஸக்கீ²’தி, ஆவுஸோ, வுச்சதி. கித்தாவதா நு கோ², ஆவுஸோ, காயஸக்கீ² வுத்தோ ப⁴க³வதா’’தி? ‘‘இதா⁴வுஸோ, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி. யதா² யதா² ச ததா³யதனம் ததா² ததா² நம் காயேன பு²ஸித்வா விஹரதி. ஏத்தாவதாபி கோ², ஆவுஸோ, காயஸக்கீ² வுத்தோ ப⁴க³வதா பரியாயேன.

‘‘புன சபரம், ஆவுஸோ, பி⁴க்கு² விதக்கவிசாரானம் வூபஸமா…பே… து³தியம் ஜா²னம்… ததியம் ஜா²னம்… சதுத்த²ம் ஜா²னம் உபஸம்பஜ்ஜ விஹரதி. யதா² யதா² ச ததா³யதனம் ததா² ததா² நம் காயேன பு²ஸித்வா விஹரதி. ஏத்தாவதாபி கோ², ஆவுஸோ, காயஸக்கீ² வுத்தோ ப⁴க³வதா பரியாயேன.

‘‘புன சபரம், ஆவுஸோ, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. யதா² யதா² ச ததா³யதனம் ததா² ததா² நம் காயேன பு²ஸித்வா விஹரதி. ஏத்தாவதாபி கோ², ஆவுஸோ, காயஸக்கீ² வுத்தோ ப⁴க³வதா பரியாயேன…பே….

‘‘புன சபரம், ஆவுஸோ, பி⁴க்கு² ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. யதா² யதா² ச ததா³யதனம் ததா² ததா² நம் காயேன பு²ஸித்வா விஹரதி. ஏத்தாவதாபி கோ², ஆவுஸோ, காயஸக்கீ² வுத்தோ ப⁴க³வதா நிப்பரியாயேனா’’தி. து³தியம்.