8. நவங்கு³போஸத²ஸுத்தம்

18. ‘‘நவஹி, பி⁴க்க²வே, அங்கே³ஹி ஸமன்னாக³தோ உபோஸதோ² உபவுத்தோ² மஹப்ப²லோ ஹோதி மஹானிஸம்ஸோ மஹாஜுதிகோ மஹாவிப்பா²ரோ. கத²ம் உபவுத்தோ² ச, பி⁴க்க²வே, நவஹங்கே³ஹி ஸமன்னாக³தோ உபோஸதோ² மஹப்ப²லோ ஹோதி மஹானிஸம்ஸோ மஹாஜுதிகோ மஹாவிப்பா²ரோ? இத⁴, பி⁴க்க²வே, அரியஸாவகோ இதி படிஸஞ்சிக்க²தி – ‘யாவஜீவம் அரஹந்தோ பாணாதிபாதம் பஹாய பாணாதிபாதா படிவிரதா நிஹிதத³ண்டா³ நிஹிதஸத்தா² லஜ்ஜீ த³யாபன்னா ஸப்³ப³பாணபூ⁴தஹிதானுகம்பினோ விஹரந்தி; அஹம்பஜ்ஜ இமஞ்ச ரத்திம் இமஞ்ச தி³வஸம் பாணாதிபாதம் பஹாய பாணாதிபாதா படிவிரதோ நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ ஸப்³ப³பாணபூ⁴தஹிதானுகம்பீ விஹராமி. இமினாபங்கே³ன [இமினாபி அங்கே³ன (க. ஸீ.)] அரஹதம் அனுகரோமி; உபோஸதோ² ச மே உபவுத்தோ² ப⁴விஸ்ஸதீ’தி. இமினா பட²மேன அங்கே³ன ஸமன்னாக³தோ ஹோதி…பே. ….

‘‘‘யாவஜீவம் அரஹந்தோ உச்சாஸயனமஹாஸயனம் பஹாய உச்சாஸயனமஹாஸயனா படிவிரதா நீசஸேய்யம் கப்பேந்தி – மஞ்சகே வா திணஸந்தா²ரகே வா; அஹம்பஜ்ஜ இமஞ்ச ரத்திம் இமஞ்ச தி³வஸம் உச்சாஸயனமஹாஸயனம் பஹாய உச்சாஸயனமஹாஸயனா படிவிரதோ நீசஸேய்யம் கப்பேமி – மஞ்சகே வா திணஸந்தா²ரகே வா. இமினாபங்கே³ன அரஹதம் அனுகரோமி; உபோஸதோ² ச மே உபவுத்தோ² ப⁴விஸ்ஸதீ’தி. இமினா அட்ட²மேன அங்கே³ன ஸமன்னாக³தோ ஹோதி.

‘‘மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம் ததா² ததியம் ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன [அப்³யாபஜ்ஜே²ன (க.), அப்³யாப³ஜ்ஜே²ன (?)] ப²ரித்வா விஹரதி. இமினா நவமேன அங்கே³ன ஸமன்னாக³தோ ஹோதி. ஏவம் உபவுத்தோ² கோ², பி⁴க்க²வே, நவஹங்கே³ஹி ஸமன்னாக³தோ உபோஸதோ² மஹப்ப²லோ ஹோதி மஹானிஸம்ஸோ மஹாஜுதிகோ மஹாவிப்பா²ரோ’’தி. அட்ட²மம்.