1. ஸீஹனாத³ஸுத்தம்

11. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘வுத்தோ² மே, ப⁴ந்தே, ஸாவத்தி²யம் வஸ்ஸாவாஸோ. இச்சா²மஹம், ப⁴ந்தே, ஜனபத³சாரிகம் பக்கமிது’’ந்தி. ‘‘யஸ்ஸதா³னி த்வம், ஸாரிபுத்த, காலம் மஞ்ஞஸீ’’தி. அத² கோ² ஆயஸ்மா ஸாரிபுத்தோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² அஞ்ஞதரோ பி⁴க்கு² அசிரபக்கந்தே ஆயஸ்மந்தே ஸாரிபுத்தே ப⁴க³வந்தம் ஏதத³வோச – ‘‘ஆயஸ்மா மம், ப⁴ந்தே, ஸாரிபுத்தோ ஆஸஜ்ஜ அப்படினிஸ்ஸஜ்ஜ சாரிகம் பக்கந்தோ’’தி. அத² கோ² ப⁴க³வா அஞ்ஞதரம் பி⁴க்கு²ம் ஆமந்தேஸி – ‘‘ஏஹி த்வம், பி⁴க்கு², மம வசனேன ஸாரிபுத்தம் ஆமந்தேஹி – ‘ஸத்தா² தம், ஆவுஸோ ஸாரிபுத்த, ஆமந்தேதீ’’’தி. ‘‘ஏவம், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மந்தம் ஸாரிபுத்தம் ஏதத³வோச – ‘‘ஸத்தா² தம், ஆவுஸோ ஸாரிபுத்த, ஆமந்தேதீ’’தி. ‘‘ஏவமாவுஸோ’’தி கோ² ஆயஸ்மா ஸாரிபுத்தோ தஸ்ஸ பி⁴க்கு²னோ பச்சஸ்ஸோஸி.

தேன கோ² பன ஸமயேன ஆயஸ்மா ச மஹாமோக்³க³ல்லானோ [மஹாமோக்³க³லானோ (க.)] ஆயஸ்மா ச ஆனந்தோ³ அவாபுரணம் [அபாபுரணம் (ஸ்யா. க.)] ஆதா³ய விஹாரே ஆஹிண்ட³ந்தி [விஹாரேன விஹாரம் அன்வாஹிண்ட³ந்தி (ஸீ. பீ.), விஹாரம் ஆஹிண்ட³ந்தி (ஸ்யா.)] – ‘‘அபி⁴க்கமதா²யஸ்மந்தோ, அபி⁴க்கமதா²யஸ்மந்தோ! இதா³னாயஸ்மா ஸாரிபுத்தோ ப⁴க³வதோ ஸம்முகா² ஸீஹனாத³ம் நதி³ஸ்ஸதீ’’தி. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஸாரிபுத்தம் ப⁴க³வா ஏதத³வோச – ‘‘இத⁴ தே, ஸாரிபுத்த, அஞ்ஞதரோ ஸப்³ரஹ்மசாரீ கீ²யனத⁴ம்மம் ஆபன்னோ – ‘ஆயஸ்மா மம், ப⁴ந்தே, ஸாரிபுத்தோ ஆஸஜ்ஜ அப்படினிஸ்ஸஜ்ஜசாரிகம் பக்கந்தோ’’’தி.

‘‘யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, பத²வியம் ஸுசிம்பி நிக்கி²பந்தி அஸுசிம்பி நிக்கி²பந்தி கூ³த²க³தம்பி நிக்கி²பந்தி முத்தக³தம்பி நிக்கி²பந்தி கே²ளக³தம்பி நிக்கி²பந்தி புப்³ப³க³தம்பி நிக்கி²பந்தி லோஹிதக³தம்பி நிக்கி²பந்தி, ந ச தேன பத²வீ அட்டீயதி வா ஹராயதி வா ஜிகு³ச்ச²தி வா; ஏவமேவம் கோ² அஹம், ப⁴ந்தே, பத²வீஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, ஆபஸ்மிம் ஸுசிம்பி தோ⁴வந்தி அஸுசிம்பி தோ⁴வந்தி கூ³த²க³தம்பி… முத்தக³தம்பி… கே²ளக³தம்பி… புப்³ப³க³தம்பி… லோஹிதக³தம்பி தோ⁴வந்தி, ந ச தேன ஆபோ அட்டீயதி வா ஹராயதி வா ஜிகு³ச்ச²தி வா; ஏவமேவம் கோ² அஹம், ப⁴ந்தே, ஆபோஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, தேஜோ ஸுசிம்பி ட³ஹதி அஸுசிம்பி ட³ஹதி கூ³த²க³தம்பி… முத்தக³தம்பி… கே²ளக³தம்பி… புப்³ப³க³தம்பி… லோஹிதக³தம்பி ட³ஹதி, ந ச தேன தேஜோ அட்டீயதி வா ஹராயதி வா ஜிகு³ச்ச²தி வா; ஏவமேவம் கோ² அஹம், ப⁴ந்தே, தேஜோஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, வாயோ ஸுசிம்பி உபவாயதி அஸுசிம்பி உபவாயதி கூ³த²க³தம்பி… முத்தக³தம்பி… கே²ளக³தம்பி… புப்³ப³க³தம்பி… லோஹிதக³தம்பி உபவாயதி, ந ச தேன வாயோ அட்டீயதி வா ஹராயதி வா ஜிகு³ச்ச²தி வா; ஏவமேவம் கோ² அஹம், ப⁴ந்தே, வாயோஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, ரஜோஹரணம் ஸுசிம்பி புஞ்ச²தி அஸுசிம்பி புஞ்ச²தி கூ³த²க³தம்பி… முத்தக³தம்பி… கே²ளக³தம்பி… புப்³ப³க³தம்பி… லோஹிதக³தம்பி புஞ்ச²தி, ந ச தேன ரஜோஹரணம் அட்டீயதி வா ஹராயதி வா ஜிகு³ச்ச²தி வா; ஏவமேவம் கோ² அஹம், ப⁴ந்தே, ரஜோஹரணஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, சண்டா³லகுமாரகோ வா சண்டா³லகுமாரிகா வா களோபிஹத்தோ² நந்தகவாஸீ கா³மம் வா நிக³மம் வா பவிஸந்தோ நீசசித்தம்யேவ உபட்ட²பேத்வா பவிஸதி; ஏவமேவம் கோ² அஹம், ப⁴ந்தே, சண்டா³லகுமாரகசண்டா³லகுமாரிகாஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, உஸபோ⁴ சி²ன்னவிஸாணோ ஸூரதோ ஸுத³ந்தோ ஸுவினீதோ ரதி²யாய ரதி²யம் ஸிங்கா⁴டகேன ஸிங்கா⁴டகம் அன்வாஹிண்ட³ந்தோ ந கிஞ்சி ஹிம்ஸதி பாதே³ன வா விஸாணேன வா; ஏவமேவம் கோ² அஹம், ப⁴ந்தே, உஸப⁴சி²ன்னவிஸாணஸமேன சேதஸா விஹராமி விபுலேன மஹக்³க³தேன அப்பமாணேன அவேரேன அப்³யாபஜ்ஜேன. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, இத்தீ² வா புரிஸோ வா த³ஹரோ யுவா மண்ட³னகஜாதிகோ ஸீஸம்ன்ஹாதோ அஹிகுணபேன வா குக்குரகுணபேன வா மனுஸ்ஸகுணபேன வா கண்டே² ஆஸத்தேன அட்டீயேய்ய ஹராயேய்ய ஜிகு³ச்சே²ய்ய; ஏவமேவம் கோ² அஹம், ப⁴ந்தே, இமினா பூதிகாயேன அட்டீயாமி ஹராயாமி ஜிகு³ச்சா²மி. யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்ய.

‘‘ஸேய்யதா²பி, ப⁴ந்தே, புரிஸோ மேத³கதா²லிகம் பரிஹரேய்ய சி²த்³தா³வசி²த்³த³ம் உக்³க⁴ரந்தம் பக்³க⁴ரந்தம்; ஏவமேவம் கோ² அஹம், ப⁴ந்தே, இமம் காயம் பரிஹராமி சி²த்³தா³வசி²த்³த³ம் உக்³க⁴ரந்தம் பக்³க⁴ரந்தம். யஸ்ஸ நூன, ப⁴ந்தே, காயே காயக³தாஸதி அனுபட்டி²தா அஸ்ஸ, ஸோ இத⁴ அஞ்ஞதரம் ஸப்³ரஹ்மசாரிம் ஆஸஜ்ஜ அப்படினிஸ்ஸஜ்ஜ சாரிகம் பக்கமேய்யா’’தி.

அத² கோ² ஸோ பி⁴க்கு² உட்டா²யாஸனா ஏகம்ஸம் உத்தராஸங்க³ம் கரித்வா ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோச – ‘‘அச்சயோ மம், ப⁴ந்தே, அச்சக³மா யதா²பா³லம் யதா²மூள்ஹம் யதா²அகுஸலம், யோ அஹம் ஆயஸ்மந்தம் ஸாரிபுத்தம் அஸதா துச்சா² முஸா அபூ⁴தேன அப்³பா⁴சிக்கி²ம். தஸ்ஸ மே, ப⁴ந்தே, ப⁴க³வா அச்சயம் அச்சயதோ படிக்³க³ண்ஹது ஆயதிம் ஸம்வராயா’’தி. ‘‘தக்³க⁴ தம் [த்வம் (ஸீ. பீ.)], பி⁴க்கு², அச்சயோ அச்சக³மா யதா²பா³லம் யதா²மூள்ஹம் யதா²அகுஸலம், யோ த்வம் ஸாரிபுத்தம் அஸதா துச்சா² முஸா அபூ⁴தேன அப்³பா⁴சிக்கி². யதோ ச கோ² த்வம், பி⁴க்கு², அச்சயம் அச்சயதோ தி³ஸ்வா யதா²த⁴ம்மம் படிகரோஸி, தம் தே மயம் படிக்³க³ண்ஹாம. வுட்³டி⁴ஹேஸா, பி⁴க்கு², அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி ஆயதிம் ஸம்வரம் ஆபஜ்ஜதீ’’தி.

அத² கோ² ப⁴க³வா ஆயஸ்மந்தம் ஸாரிபுத்தம் ஆமந்தேஸி – ‘‘க²ம, ஸாரிபுத்த, இமஸ்ஸ மோக⁴புரிஸஸ்ஸ, புரா தஸ்ஸ தத்தே²வ ஸத்ததா⁴ முத்³தா⁴ ப²லதீ’’தி [ப²லிஸ்ஸதீதி (க. ஸீ. ஸ்யா. பீ. க.) அட்ட²கதா²ஸு பன ‘‘ப²லதீதி’’ இத்வேவ தி³ஸ்ஸதி]. ‘‘க²மாமஹம், ப⁴ந்தே, தஸ்ஸ ஆயஸ்மதோ ஸசே மம் ஸோ ஆயஸ்மா ஏவமாஹ – ‘க²மது ச மே ஸோ ஆயஸ்மா’’’தி. பட²மம்.