8. அலம்ஸுத்தம்

78. [அ. நி. 8.62] தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி…பே… ச²ஹாவுஸோ, த⁴ம்மேஹி ஸமன்னாக³தோ பி⁴க்கு² அலம் அத்தனோ, அலம் பரேஸம். கதமேஹி ச²ஹி? இதா⁴வுஸோ, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; கல்யாணவாசோ ச ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², ஆவுஸோ, ச²ஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, அலம் பரேஸம்.

‘‘பஞ்சஹாவுஸோ, த⁴ம்மேஹி ஸமன்னாக³தோ பி⁴க்கு² அலம் அத்தனோ, அலம் பரேஸம். கதமேஹி பஞ்சஹி? இதா⁴வுஸோ, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; கல்யாணவாசோ ச ஹோதி…பே… ஸந்த³ஸ்ஸகோ ச ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, பஞ்சஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, அலம் பரேஸம்.

‘‘சதூஹாவுஸோ, த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம். கதமேஹி சதூஹி? இதா⁴வுஸோ, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி…பே… நோ ச ஸந்த³ஸ்ஸகோ ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, சதூஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம்.

‘‘சதூஹாவுஸோ, த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ. கதமேஹி சதூஹி? இதா⁴வுஸோ, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி…பே… ஸந்த³ஸ்ஸகோ ச ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, சதூஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ.

‘‘தீஹாவுஸோ, த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம். கதமேஹி தீஹி? இதா⁴வுஸோ, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி…பே… நோ ச ஸந்த³ஸ்ஸகோ ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, தீஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம்.

‘‘தீஹாவுஸோ, த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ. கதமேஹி தீஹி? இதா⁴வுஸோ, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; ஸுதானஞ்ச த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி…பே… அத்த²ஸ்ஸ விஞ்ஞாபனியா, ஸந்த³ஸ்ஸகோ ச ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, தீஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ.

‘‘த்³வீஹாவுஸோ, த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம். கதமேஹி த்³வீஹி? இதா⁴வுஸோ, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; நோ ச ஸுதானம் த⁴ம்மானம் தா⁴ரணஜாதிகோ ஹோதி; தா⁴தானஞ்ச த⁴ம்மானம் அத்தூ²பபரிக்கி²தா ஹோதி; அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ச ஹோதி; நோ ச கல்யாணவாசோ ஹோதி…பே… நோ ச ஸந்த³ஸ்ஸகோ ஹோதி…பே… ஸப்³ரஹ்மசாரீனம். இமேஹி கோ², ஆவுஸோ, த்³வீஹி த⁴ம்மேஹி ஸமன்னாக³தோ பி⁴க்கு² அலம் அத்தனோ, நாலம் பரேஸம்.

‘‘த்³வீஹாவுஸோ, த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ. கதமேஹி த்³வீஹி? இதா⁴வுஸோ, பி⁴க்கு² ந ஹேவ கோ² கி²ப்பனிஸந்தி ச ஹோதி குஸலேஸு த⁴ம்மேஸு; நோ ச ஸுதானம் த⁴ம்மானம் தா⁴ரணஜாதிகோ ஹோதி; நோ ச தா⁴தானம் த⁴ம்மானம் அத்தூ²பபரிக்கி²தா ஹோதி; நோ ச அத்த²மஞ்ஞாய த⁴ம்மமஞ்ஞாய த⁴ம்மானுத⁴ம்மப்படிபன்னோ ஹோதி; கல்யாணவாசோ ச ஹோதி கல்யாணவாக்கரணோ, போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா; ஸந்த³ஸ்ஸகோ ச ஹோதி ஸமாத³பகோ ஸமுத்தேஜகோ ஸம்பஹம்ஸகோ ஸப்³ரஹ்மசாரீனம். இமேஹி கோ², ஆவுஸோ, த்³வீஹி த⁴ம்மேஹி ஸமன்னாக³தோ பி⁴க்கு² அலம் பரேஸம், நாலம் அத்தனோ’’தி. அட்ட²மம்.