4. து³தியமரணஸ்ஸதிஸுத்தம்

74. ஏகம் ஸமயம் ப⁴க³வா நாதிகே விஹரதி கி³ஞ்ஜகாவஸதே². தத்ர கோ² ப⁴க³வா பி⁴க்கூ² ஆமந்தேஸி …பே… மரணஸ்ஸதி, பி⁴க்க²வே, பா⁴விதா ப³ஹுலீகதா மஹப்ப²லா ஹோதி மஹானிஸம்ஸா அமதோக³தா⁴ அமதபரியோஸானா.

‘‘கத²ம் பா⁴விதா ச, பி⁴க்க²வே, மரணஸ்ஸதி கத²ம் ப³ஹுலீகதா மஹப்ப²லா ஹோதி மஹானிஸம்ஸா அமதோக³தா⁴ அமதபரியோஸானா? இத⁴, பி⁴க்க²வே, பி⁴க்கு² தி³வஸே நிக்க²ந்தே ரத்தியா பதிஹிதாய [படிஹிதாய (பீ.), (அ. நி. 6.20 பஸ்ஸிதப்³ப³ம்)] இதி படிஸஞ்சிக்க²தி – ‘ப³ஹுகா கோ² மே பச்சயா மரணஸ்ஸ – அஹி வா மம் ட³ம்ஸேய்ய, விச்சி²கோ வா மம் ட³ம்ஸேய்ய, ஸதபதீ³ வா மம் ட³ம்ஸேய்ய; தேன மே அஸ்ஸ காலகிரியா. ஸோ மம அஸ்ஸ [மமஸ்ஸ (அ. நி. 6.20)] அந்தராயோ. உபக்க²லித்வா வா பபதேய்யம், ப⁴த்தம் வா மே பு⁴த்தம் ப்³யாபஜ்ஜேய்ய, பித்தம் வா மே குப்பேய்ய, ஸேம்ஹம் வா மே குப்பேய்ய, ஸத்த²கா வா மே வாதா குப்பேய்யும், மனுஸ்ஸா வா மம் உபக்கமேய்யும், அமனுஸ்ஸா வா மம் உபக்கமேய்யும்; தேன மே அஸ்ஸ காலகிரியா. ஸோ மம அஸ்ஸ அந்தராயோ’தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ம் – ‘அத்தி² நு கோ² மே பாபகா அகுஸலா த⁴ம்மா அப்பஹீனா யே மே அஸ்ஸு ரத்திம் காலம் கரோந்தஸ்ஸ அந்தராயாயா’’’தி.

‘‘ஸசே, பி⁴க்க²வே, பி⁴க்கு² பச்சவேக்க²மானோ ஏவம் ஜானாதி – ‘அத்தி² மே பாபகா அகுஸலா த⁴ம்மா அப்பஹீனா யே மே அஸ்ஸு ரத்திம் காலம் கரோந்தஸ்ஸ அந்தராயாயா’தி, தேன, பி⁴க்க²வே, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸோள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயம்.

‘‘ஸேய்யதா²பி, பி⁴க்க²வே, ஆதி³த்தசேலோ வா ஆதி³த்தஸீஸோ வா தஸ்ஸேவ சேலஸ்ஸ வா ஸீஸஸ்ஸ வா நிப்³பா³பனாய அதி⁴மத்தம் ச²ந்த³ஞ்ச வாயாமஞ்ச உஸ்ஸாஹஞ்ச உஸ்ஸோள்ஹிஞ்ச அப்படிவானிஞ்ச ஸதிஞ்ச ஸம்பஜஞ்ஞஞ்ச கரேய்ய; ஏவமேவம் கோ², பி⁴க்க²வே, தேன பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸோள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயம்.

‘‘ஸசே பன, பி⁴க்க²வே, பி⁴க்கு² பச்சவேக்க²மானோ ஏவம் ஜானாதி – ‘நத்தி² மே பாபகா அகுஸலா த⁴ம்மா அப்பஹீனா யே மே அஸ்ஸு ரத்திம் காலம் கரோந்தஸ்ஸ அந்தராயாயா’தி, தேன, பி⁴க்க²வே, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு.

‘‘இத⁴ பன, பி⁴க்க²வே, பி⁴க்கு² ரத்தியா நிக்க²ந்தாய தி³வஸே பதிஹிதே இதி படிஸஞ்சிக்க²தி – ‘ப³ஹுகா கோ² மே பச்சயா மரணஸ்ஸ – அஹி வா மம் ட³ம்ஸேய்ய, விச்சி²கோ வா மம் ட³ம்ஸேய்ய, ஸதபதீ³ வா மம் ட³ம்ஸேய்ய; தேன மே அஸ்ஸ காலகிரியா. ஸோ மம அஸ்ஸ அந்தராயோ. உபக்க²லித்வா வா பபதேய்யம், ப⁴த்தம் வா மே பு⁴த்தம் ப்³யாபஜ்ஜேய்ய, பித்தம் வா மே குப்பேய்ய, ஸேம்ஹம் வா மே குப்பேய்ய, ஸத்த²கா வா மே வாதா குப்பேய்யும், மனுஸ்ஸா வா மம் உபக்கமேய்யும், அமனுஸ்ஸா வா மம் உபக்கமேய்யும்; தேன மே அஸ்ஸ காலகிரியா. ஸோ மம அஸ்ஸ அந்தராயோ’தி. தேன, பி⁴க்க²வே, பி⁴க்கு²னா இதி படிஸஞ்சிக்கி²தப்³ப³ம் – ‘அத்தி² நு கோ² மே பாபகா அகுஸலா த⁴ம்மா அப்பஹீனா யே மே அஸ்ஸு தி³வா காலம் கரோந்தஸ்ஸ அந்தராயாயா’’’தி.

‘‘ஸசே, பி⁴க்க²வே, பி⁴க்கு² பச்சவேக்க²மானோ ஏவம் ஜானாதி – ‘அத்தி² மே பாபகா அகுஸலா த⁴ம்மா அப்பஹீனா யே மே அஸ்ஸு தி³வா காலம் கரோந்தஸ்ஸ அந்தராயாயா’தி, தேன, பி⁴க்க²வே, பி⁴க்கு²னா தேஸம்யேவ பாபகானம் அகுஸலானம் த⁴ம்மானம் பஹானாய அதி⁴மத்தோ ச²ந்தோ³ ச வாயாமோ ச உஸ்ஸாஹோ ச உஸ்ஸோள்ஹீ ச அப்படிவானீ ச ஸதி ச ஸம்பஜஞ்ஞஞ்ச கரணீயம்.

‘‘ஸசே பன, பி⁴க்க²வே, பி⁴க்கு² பச்சவேக்க²மானோ ஏவம் ஜானாதி – ‘நத்தி² மே பாபகா அகுஸலா த⁴ம்மா அப்பஹீனா யே மே அஸ்ஸு தி³வா காலம் கரோந்தஸ்ஸ அந்தராயாயா’தி, தேன, பி⁴க்க²வே, பி⁴க்கு²னா தேனேவ பீதிபாமோஜ்ஜேன விஹாதப்³ப³ம் அஹோரத்தானுஸிக்கி²னா குஸலேஸு த⁴ம்மேஸு. ஏவம் பா⁴விதா கோ², பி⁴க்க²வே, மரணஸ்ஸதி ஏவம் ப³ஹுலீகதா மஹப்ப²லா ஹோதி மஹானிஸம்ஸா அமதோக³தா⁴ அமதபரியோஸானா’’தி. சதுத்த²ம்.