9. ஸமணவக்³கோ³

1. பி⁴க்கு²ஸுத்தம்

85. [மஹானி. 18; சூளனி. அஜிதமாணவபுச்சா²னித்³தே³ஸ 8] ‘‘ஸத்தன்னம், பி⁴க்க²வே, த⁴ம்மானம் பி⁴ன்னத்தா பி⁴க்கு² ஹோதி. கதமேஸம் ஸத்தன்னம்? ஸக்காயதி³ட்டி² பி⁴ன்னா ஹோதி, விசிகிச்சா² பி⁴ன்னா ஹோதி, ஸீலப்³ப³தபராமாஸோ பி⁴ன்னோ ஹோதி, ராகோ³ பி⁴ன்னோ ஹோதி, தோ³ஸோ பி⁴ன்னோ ஹோதி, மோஹோ பி⁴ன்னோ ஹோதி, மானோ பி⁴ன்னோ ஹோதி. இமேஸம் கோ², பி⁴க்க²வே, ஸத்தன்னம் த⁴ம்மானம் பி⁴ன்னத்தா பி⁴க்கு² ஹோதீ’’தி. பட²மம்.

2. ஸமணஸுத்தம்

86. ஸத்தன்னம், பி⁴க்க²வே, த⁴ம்மானம் ஸமிதத்தா ஸமணோ ஹோதி…பே…. து³தியம்.

3. ப்³ராஹ்மணஸுத்தம்

87. பா³ஹிதத்தா ப்³ராஹ்மணோ ஹோதி…பே…. ததியம்.

4. ஸோத்தியஸுத்தம்

88. நிஸ்ஸுதத்தா [நிஸ்ஸுத்தத்தா (ஸ்யா.) ம. நி. 1.434 பஸ்ஸிதப்³ப³ம்] ஸோத்தியோ [ஸோத்தி²கோ (ஸீ.), ஸோத்திகோ (ஸ்யா.)] ஹோதி…பே…. சதுத்த²ம்.

5. ந்ஹாதகஸுத்தம்

89. ந்ஹாதத்தா ந்ஹாதகோ [நஹாதத்தோ நஹாதகோ (ஸீ. ஸ்யா.)] ஹோதி…பே…. பஞ்சமம்.

6. வேத³கூ³ஸுத்தம்

90. விதி³தத்தா வேத³கூ³ ஹோதி…பே…. ச²ட்ட²ம்.

7. அரியஸுத்தம்

91. ஆரகத்தா [அரஹத்தா (ஸீ.), அரீ ஹதத்தா (க.) ம. நி. 1.434 பாளி அட்ட²கதா²டீகா பஸ்ஸிதப்³பா³. ஸ்யாமபோத்த²கே பன ஸகலம்பி இத³ம் ஸத்தமஸுத்தம் நத்தி²] அரியோ ஹோதி…பே…. ஸத்தமம்.

8. அரஹாஸுத்தம்

92. ‘‘ஆரகத்தா அரஹா ஹோதி. கதமேஸம் ஸத்தன்னம்? ஸக்காயதி³ட்டி² ஆரகா ஹோதி, விசிகிச்சா² ஆரகா ஹோதி, ஸீலப்³ப³தபராமாஸோ ஆரகோ ஹோதி, ராகோ³ ஆரகோ ஹோதி, தோ³ஸோ ஆரகோ ஹோதி, மோஹோ ஆரகோ ஹோதி, மானோ ஆரகோ ஹோதி. இமேஸம் கோ², பி⁴க்க²வே, ஸத்தன்னம் த⁴ம்மானம் ஆரகத்தா அரஹா ஹோதீ’’தி. அட்ட²மம்.

9. அஸத்³த⁴ம்மஸுத்தம்

93. ‘‘ஸத்திமே, பி⁴க்க²வே, அஸத்³த⁴ம்மா. கதமே ஸத்த? அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, அப்பஸ்ஸுதோ ஹோதி, குஸீதோ ஹோதி, முட்ட²ஸ்ஸதி ஹோதி, து³ப்பஞ்ஞோ ஹோதி. இமே கோ², பி⁴க்க²வே, ஸத்த அஸத்³த⁴ம்மா’’தி. நவமம்.

10. ஸத்³த⁴ம்மஸுத்தம்

94. ‘‘ஸத்திமே, பி⁴க்க²வே, ஸத்³த⁴ம்மா. கதமே ஸத்த? ஸத்³தோ⁴ ஹோதி, ஹிரீமா ஹோதி, ஓத்தப்பீ ஹோதி, ப³ஹுஸ்ஸுதோ ஹோதி, ஆரத்³த⁴வீரியோ ஹோதி, ஸதிமா ஹோதி, பஞ்ஞவா ஹோதி. இமே கோ², பி⁴க்க²வே, ஸத்த ஸத்³த⁴ம்மா’’தி. த³ஸமம்.

ஸமணவக்³கோ³ நவமோ.