1. ஹிரீஓத்தப்பஸுத்தம்

65. [அ. நி. 5.24, 168; 2.6.50] ‘‘ஹிரோத்தப்பே, பி⁴க்க²வே, அஸதி ஹிரோத்தப்பவிபன்னஸ்ஸ ஹதூபனிஸோ ஹோதி இந்த்³ரியஸம்வரோ; இந்த்³ரியஸம்வரே அஸதி இந்த்³ரியஸம்வரவிபன்னஸ்ஸ ஹதூபனிஸம் ஹோதி ஸீலம்; ஸீலே அஸதி ஸீலவிபன்னஸ்ஸ ஹதூபனிஸோ ஹோதி ஸம்மாஸமாதி⁴; ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸம் ஹோதி யதா²பூ⁴தஞாணத³ஸ்ஸனம்; யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸோ ஹோதி நிப்³பி³தா³விராகோ³; நிப்³பி³தா³விராகே³ அஸதி நிப்³பி³தா³விராக³விபன்னஸ்ஸ ஹதூபனிஸம் ஹோதி விமுத்திஞாணத³ஸ்ஸனம். ஸேய்யதா²பி, பி⁴க்க²வே, ருக்கோ² ஸாகா²பலாஸவிபன்னோ. தஸ்ஸ பபடிகாபி ந பாரிபூரிம் க³ச்ச²தி, தசோபி பே²க்³கு³பி ஸாரோபி ந பாரிபூரிம் க³ச்ச²தி. ஏவமேவம் கோ², பி⁴க்க²வே, ஹிரோத்தப்பே அஸதி ஹிரோத்தப்பவிபன்னஸ்ஸ ஹதூபனிஸோ ஹோதி இந்த்³ரியஸம்வரோ; இந்த்³ரியஸம்வரே அஸதி இந்த்³ரியஸம்வரவிபன்னஸ்ஸ ஹதூபனிஸம் ஹோதி ஸீலம்; ஸீலே அஸதி ஸீலவிபன்னஸ்ஸ ஹதூபனிஸோ ஹோதி ஸம்மாஸமாதி⁴; ஸம்மாஸமாதி⁴ம்ஹி அஸதி ஸம்மாஸமாதி⁴விபன்னஸ்ஸ ஹதூபனிஸம் ஹோதி யதா²பூ⁴தஞாணத³ஸ்ஸனம்; யதா²பூ⁴தஞாணத³ஸ்ஸனே அஸதி யதா²பூ⁴தஞாணத³ஸ்ஸனவிபன்னஸ்ஸ ஹதூபனிஸோ ஹோதி நிப்³பி³தா³விராகோ³; நிப்³பி³தா³விராகே³ அஸதி நிப்³பி³தா³விராக³விபன்னஸ்ஸ ஹதூபனிஸம் ஹோதி விமுத்திஞாணத³ஸ்ஸனம்.

‘‘ஹிரோத்தப்பே, பி⁴க்க²வே, ஸதி ஹிரோத்தப்பஸம்பன்னஸ்ஸ உபனிஸஸம்பன்னோ ஹோதி இந்த்³ரியஸம்வரோ; இந்த்³ரியஸம்வரே ஸதி இந்த்³ரியஸம்வரஸம்பன்னஸ்ஸ உபனிஸஸம்பன்னம் ஹோதி ஸீலம்; ஸீலே ஸதி ஸீலஸம்பன்னஸ்ஸ உபனிஸஸம்பன்னோ ஹோதி ஸம்மாஸமாதி⁴; ஸம்மாஸமாதி⁴ம்ஹி ஸதி ஸம்மாஸமாதி⁴ஸம்பன்னஸ்ஸ உபனிஸஸம்பன்னம் ஹோதி யதா²பூ⁴தஞாணத³ஸ்ஸனம்; யதா²பூ⁴தஞாணத³ஸ்ஸனே ஸதி யதா²பூ⁴தஞாணத³ஸ்ஸனஸம்பன்னஸ்ஸ உபனிஸஸம்பன்னோ ஹோதி நிப்³பி³தா³விராகோ³; நிப்³பி³தா³விராகே³ ஸதி நிப்³பி³தா³விராக³ஸம்பன்னஸ்ஸ உபனிஸஸம்பன்னம் ஹோதி விமுத்திஞாணத³ஸ்ஸனம். ஸேய்யதா²பி, பி⁴க்க²வே, ருக்கோ² ஸாகா²பலாஸஸம்பன்னோ. தஸ்ஸ பபடிகாபி பாரிபூரிம் க³ச்ச²தி, தசோபி பே²க்³கு³பி ஸாரோபி பாரிபூரிம் க³ச்ச²தி. ஏவமேவம் கோ², பி⁴க்க²வே, ஹிரோத்தப்பே ஸதி ஹிரோத்தப்பஸம்பன்னஸ்ஸ உபனிஸஸம்பன்னோ ஹோதி…பே… விமுத்திஞாணத³ஸ்ஸன’’ந்தி. பட²மம்.