9. மேத்தஸுத்தம்

62. [இதிவு. 22 இதிவுத்தகேபி] ‘‘மா, பி⁴க்க²வே, புஞ்ஞானம் பா⁴யித்த². ஸுக²ஸ்ஸேதம், பி⁴க்க²வே, அதி⁴வசனம் யதி³த³ம் புஞ்ஞானி [யதி³த³ம் புஞ்ஞந்தி (ஸீ.), யதி³த³ம் புஞ்ஞானி (க.)]. அபி⁴ஜானாமி கோ² பனாஹம் [பி⁴க்க²வே தீ³க⁴ரத்தம் இட்ட²ம் (ஸ்யா.), பி⁴க்க²வே தீ³க⁴ரத்தம் புஞ்ஞானம் இட்ட²ம் (?)], பி⁴க்க²வே, தீ³க⁴ரத்தம் கதானம் புஞ்ஞானம் தீ³க⁴ரத்தம் இட்ட²ம் [பி⁴க்க²வே தீ³க⁴ரத்தம் இட்ட²ம் (ஸ்யா.), பி⁴க்க²வே தீ³க⁴ரத்தம் புஞ்ஞானம் இட்ட²ம் (?)] கந்தம் மனாபம் விபாகம் பச்சனுபூ⁴தம். ஸத்த வஸ்ஸானி மேத்தம் சித்தம் பா⁴வேஸிம். ஸத்த வஸ்ஸானி மேத்தம் சித்தம் பா⁴வேத்வா ஸத்த ஸம்வட்டவிவட்டகப்பே நயிமம் லோகம் புனாக³மாஸிம். ஸம்வட்டமானே ஸுதா³ஹம் [ஸம்வட்டமானஸ்ஸுதா³ஹம் (க.)], பி⁴க்க²வே, லோகே ஆப⁴ஸ்ஸரூபகோ³ ஹோமி, விவட்டமானே லோகே ஸுஞ்ஞம் ப்³ரஹ்மவிமானம் உபபஜ்ஜாமி.

‘‘தத்ர ஸுத³ம், பி⁴க்க²வே, ப்³ரஹ்மா ஹோமி மஹாப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ. ச²த்திம்ஸக்க²த்தும் கோ² பனாஹம், பி⁴க்க²வே, ஸக்கோ அஹோஸிம் தே³வானமிந்தோ³; அனேகஸதக்க²த்தும் ராஜா அஹோஸிம் சக்கவத்தீ த⁴ம்மிகோ த⁴ம்மராஜா சாதுரந்தோ விஜிதாவீ ஜனபத³த்தா²வரியப்பத்தோ ஸத்தரதனஸமன்னாக³தோ. தஸ்ஸ மய்ஹம், பி⁴க்க²வே, இமானி ஸத்த ரதனானி அஹேஸும், ஸேய்யதி²த³ம் – சக்கரதனம், ஹத்தி²ரதனம், அஸ்ஸரதனம், மணிரதனம், இத்தி²ரதனம், க³ஹபதிரதனம், பரிணாயகரதனமேவ ஸத்தமம். பரோஸஹஸ்ஸம் கோ² பன மே, பி⁴க்க²வே, புத்தா அஹேஸும் ஸூரா வீரங்க³ரூபா பரஸேனப்பமத்³த³னா. ஸோ இமம் பத²விம் ஸாக³ரபரியந்தம் அத³ண்டே³ன அஸத்தே²ன த⁴ம்மேன அபி⁴விஜிய அஜ்ஜா²வஸி’’ந்தி [அஜ்ஜா²வஸந்தி (ஸ்யா.) அஜ்ஜா²வஸதி (ஸீ. க.)].

‘‘பஸ்ஸ புஞ்ஞானம் விபாகம், குஸலானம் ஸுகே²ஸினோ [ஸுகே²ஸினம் (ஸீ.)];

மேத்தம் சித்தம் விபா⁴வேத்வா, ஸத்த வஸ்ஸானி பி⁴க்க²வோ [பி⁴க்க²வே (க.)];

ஸத்தஸம்வட்டவிவட்டகப்பே, நயிமம் லோகம் புனாக³மிம் [புனாக³மம் (ஸ்யா.)].

‘‘ஸம்வட்டமானே லோகம்ஹி, ஹோமி ஆப⁴ஸ்ஸரூபகோ³;

விவட்டமானே லோகஸ்மிம், ஸுஞ்ஞப்³ரஹ்மூபகோ³ அஹும்.

‘‘ஸத்தக்க²த்தும் மஹாப்³ரஹ்மா, வஸவத்தீ ததா³ அஹும்;

ச²த்திம்ஸக்க²த்தும் தே³விந்தோ³, தே³வரஜ்ஜமகாரயிம்.

‘‘சக்கவத்தீ அஹும் ராஜா, ஜம்பு³மண்ட³ஸ்ஸ [ஜம்பு³தீ³பஸ்ஸ (ஸீ.), ஜம்பு³ஸண்ட³ஸ்ஸ (ஸ்யா.)] இஸ்ஸரோ;

முத்³தா⁴வஸித்தோ [முத்³தா⁴பி⁴ஸித்தோ (க.)] க²த்தியோ, மனுஸ்ஸாதி⁴பதீ அஹும்.

‘‘அத³ண்டே³ன அஸத்தே²ன, விஜேய்ய பத²விம் இமம்;

அஸாஹஸேன கம்மேன [த⁴ம்மேன (ஸீ. ஸ்யா.)], ஸமேன அனுஸாஸி தம்.

‘‘த⁴ம்மேன ரஜ்ஜம் காரேத்வா, அஸ்மிம் பத²விமண்ட³லே;

மஹத்³த⁴னே மஹாபோ⁴கே³, அட்³டே⁴ அஜாயிஹம் குலே.

‘‘ஸப்³ப³காமேஹி ஸம்பன்னே [ஸம்புண்ணே (க.)], ரதனேஹி ச ஸத்தஹி;

பு³த்³தா⁴ ஸங்கா³ஹகா லோகே, தேஹி ஏதம் ஸுதே³ஸிதம்.

‘‘ஏஸோ ஹேது மஹந்தஸ்ஸ, பத²ப்³யோ மே ந விபஜ்ஜதி [ஏஸ ஹேது மஹந்தஸ்ஸ, புத²ப்³யோ யேன வுச்சதி (ஸீ. ஸ்யா.)];

பஹூதவித்தூபகரணோ, ராஜா ஹோதி [ஹோமி (ஸீ. ஸ்யா.)] பதாபவா.

‘‘இத்³தி⁴மா யஸவா ஹோதி [ஹோமி (ஸீ. ஸ்யா.)], ஜம்பு³மண்ட³ஸ்ஸ [ஜம்பு³ஸண்ட³ஸ்ஸ (ஸீ. ஸ்யா.)] இஸ்ஸரோ;

கோ ஸுத்வா நப்பஸீதே³ய்ய, அபி கண்ஹாபி⁴ஜாதியோ.

‘‘தஸ்மா ஹி அத்தகாமேன [அத்த²காமேன (ஸ்யா. க.)], மஹத்தமபி⁴கங்க²தா;

ஸத்³த⁴ம்மோ க³ருகாதப்³போ³, ஸரம் பு³த்³தா⁴னஸாஸன’’ந்தி. நவமம்;