6. கிமிலஸுத்தம்

59. ஏவம் மே ஸுதம் – ஏகம் ஸமயம் ப⁴க³வா கிமிலாயம் விஹரதி நிசுலவனே [வேளுவனே (ஸீ. ஸ்யா. கம். பீ.) அ. நி. 5.202; 7.40]. அத² கோ² ஆயஸ்மா கிமிலோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா கிமிலோ ப⁴க³வந்தம் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ யேன ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதீ’’தி?

‘‘இத⁴, கிமில, ததா²க³தே பரினிப்³பு³தே பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி அகா³ரவா விஹரந்தி அப்பதிஸ்ஸா, த⁴ம்மே அகா³ரவா விஹரந்தி அப்பதிஸ்ஸா, ஸங்கே⁴ அகா³ரவா விஹரந்தி அப்பதிஸ்ஸா, ஸிக்கா²ய அகா³ரவா விஹரந்தி அப்பதிஸ்ஸா, ஸமாதி⁴ஸ்மிம் அகா³ரவா விஹரந்தி அப்பதிஸ்ஸா, அப்பமாதே³ அகா³ரவா விஹரந்தி அப்பதிஸ்ஸா, படிஸந்தா²ரே அகா³ரவா விஹரந்தி அப்பதிஸ்ஸா. அயம் கோ², கிமில, ஹேது அயம் பச்சயோ யேன ததா²க³தே பரினிப்³பு³தே ஸத்³த⁴ம்மோ ந சிரட்டி²திகோ ஹோதீ’’தி.

‘‘கோ பன, ப⁴ந்தே, ஹேது கோ பச்சயோ யேன ததா²க³தே பரினிப்³பு³தே ஸத்³த⁴ம்மோ சிரட்டி²திகோ ஹோதீ’’தி? ‘‘இத⁴, கிமில, ததா²க³தே பரினிப்³பு³தே பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி ஸகா³ரவா விஹரந்தி ஸப்பதிஸ்ஸா, த⁴ம்மே ஸகா³ரவா விஹரந்தி ஸப்பதிஸ்ஸா, ஸங்கே⁴ ஸகா³ரவா விஹரந்தி ஸப்பதிஸ்ஸா, ஸிக்கா²ய ஸகா³ரவா விஹரந்தி ஸப்பதிஸ்ஸா, ஸமாதி⁴ஸ்மிம் ஸகா³ரவா விஹரந்தி ஸப்பதிஸ்ஸா, அப்பமாதே³ ஸகா³ரவா விஹரந்தி ஸப்பதிஸ்ஸா, படிஸந்தா²ரே ஸகா³ரவா விஹரந்தி ஸப்பதிஸ்ஸா. அயம் கோ², கிமில, ஹேது அயம் பச்சயோ யேன ததா²க³தே பரினிப்³பு³தே ஸத்³த⁴ம்மோ சிரட்டி²திகோ ஹோதீ’’தி. ச²ட்ட²ம்.