4. வித்த²தப³லஸுத்தம்

4. ‘‘ஸத்திமானி, பி⁴க்க²வே, ப³லானி. கதமானி ஸத்த? ஸத்³தா⁴ப³ல, வீரியப³லம், ஹிரீப³லம், ஓத்தப்பப³லம், ஸதிப³லம், ஸமாதி⁴ப³லம், பஞ்ஞாப³லம்.

‘‘கதமஞ்ச, பி⁴க்க²வே, ஸத்³தா⁴ப³லம்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ம் – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴…பே… ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. இத³ம் வுச்சதி, பி⁴க்க²வே, ஸத்³தா⁴ப³லம்.

‘‘கதமஞ்ச, பி⁴க்க²வே, வீரியப³லம்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. இத³ம் வுச்சதி, பி⁴க்க²வே, வீரியப³லம்.

‘‘கதமஞ்ச, பி⁴க்க²வே, ஹிரீப³லம்? இத⁴, பி⁴க்க²வே, அரியஸாவகோ ஹிரிமா ஹோதி, ஹிரீயதி காயது³ச்சரிதேன வசீது³ச்சரிதேன மனோது³ச்சரிதேன, ஹிரீயதி பாபகானம் அகுஸலானம் த⁴ம்மானம் ஸமாபத்தியா. இத³ம் வுச்சதி, பி⁴க்க²வே, ஹிரீப³லம்.

‘‘கதமஞ்ச, பி⁴க்க²வே, ஓத்தப்பப³லம்? இத⁴, பி⁴க்க²வே, அரியஸாவகோ ஓத்தப்பீ ஹோதி, ஓத்தப்பதி காயது³ச்சரிதேன வசீது³ச்சரிதேன மனோது³ச்சரிதேன, ஓத்தப்பதி பாபகானம் அகுஸலானம் த⁴ம்மானம் ஸமாபத்தியா. இத³ம் வுச்சதி, பி⁴க்க²வே, ஓத்தப்பப³லம்.

‘‘கதமஞ்ச, பி⁴க்க²வே, ஸதிப³லம்? இத⁴, பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ சிரகதம்பி சிரபா⁴ஸிதம்பி ஸரிதா அனுஸ்ஸரிதா. இத³ம், வுச்சதி, பி⁴க்க²வே, ஸதிப³லம்.

‘‘கதமஞ்ச, பி⁴க்க²வே, ஸமாதி⁴ப³லம்? இத⁴, பி⁴க்க²வே, அரியஸாவகோ விவிச்சேவ காமேஹி…பே… சதுத்த²ம் ஜா²னம் உபஸம்பஜ்ஜ விஹரதி. இத³ம் வுச்சதி, பி⁴க்க²வே, ஸமாதி⁴ப³லம்.

‘‘கதமஞ்ச, பி⁴க்க²வே, பஞ்ஞாப³லம்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய ஸம்மா து³க்க²க்க²யகா³மினியா. இத³ம் வுச்சதி, பி⁴க்க²வே, பஞ்ஞாப³லம். இமானி கோ², பி⁴க்க²வே, ஸத்த ப³லானீதி.

‘‘ஸத்³தா⁴ப³லம் வீரியஞ்ச, ஹிரீ ஓத்தப்பியம் ப³லம்;

ஸதிப³லம் ஸமாதி⁴ ச, பஞ்ஞா வே ஸத்தமம் ப³லம்;

ஏதேஹி ப³லவா பி⁴க்கு², ஸுக²ம் ஜீவதி பண்டி³தோ.

‘‘யோனிஸோ விசினே த⁴ம்மம், பஞ்ஞாயத்த²ம் விபஸ்ஸதி;

பஜ்ஜோதஸ்ஸேவ நிப்³பா³னம், விமோக்கோ² ஹோதி சேதஸோ’’தி. சதுத்த²ம்;