2. ஸிக்கா²பத³பேய்யாலம்

1. பி⁴க்கு²ஸுத்தம்

286. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? பாணாதிபாதீ ஹோதி, அதி³ன்னாதா³யீ ஹோதி, அப்³ரஹ்மசாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³. கதமேஹி பஞ்சஹி? பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, அப்³ரஹ்மசரியா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ பி⁴க்கு² யதா²ப⁴தம் நிக்கி²த்தோ ஏவம் ஸக்³கே³’’தி. பட²மம்.

2-7. பி⁴க்கு²னீஸுத்தாதி³ச²க்கம்

287-292. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தா பி⁴க்கு²னீ…பே… ஸிக்க²மானா… ஸாமணேரோ… ஸாமணேரீ… உபாஸகோ… உபாஸிகா யதா²ப⁴தம் நிக்கி²த்தா ஏவம் நிரயே. கதமேஹி பஞ்சஹி? பாணாதிபாதினீ ஹோதி, அதி³ன்னாதா³யினீ ஹோதி, காமேஸுமிச்சா²சாரினீ ஹோதி, முஸாவாதி³னீ ஹோதி, ஸுராமேரயமஜ்ஜபமாத³ட்டா²யினீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தா உபாஸிகா யதா²ப⁴தம் நிக்கி²த்தா ஏவம் நிரயே.

‘‘பஞ்சஹி, பி⁴க்க²வே, த⁴ம்மேஹி ஸமன்னாக³தா உபாஸிகா யதா²ப⁴தம் நிக்கி²த்தா ஏவம் ஸக்³கே³. கதமேஹி பஞ்சஹி? பாணாதிபாதா படிவிரதா ஹோதி, அதி³ன்னாதா³னா படிவிரதா ஹோதி, காமேஸுமிச்சா²சாரா படிவிரதா ஹோதி, முஸாவாதா³ படிவிரதா ஹோதி, ஸுராமேரயமஜ்ஜபமாத³ட்டா²னா படிவிரதா ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தா உபாஸிகா யதா²ப⁴தம் நிக்கி²த்தா ஏவம் ஸக்³கே³’’தி. ஸத்தமம்.

8. ஆஜீவகஸுத்தம்

293. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ ஆஜீவகோ யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? பாணாதிபாதீ ஹோதி, அதி³ன்னாதா³யீ ஹோதி, அப்³ரஹ்மசாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ ஆஜீவகோ யதா²ப⁴தம் நிக்கி²த்தோ ஏவம் நிரயே’’தி. அட்ட²மம்.

9-17. நிக³ண்ட²ஸுத்தாதி³னவகம்

294-302. ‘‘பஞ்சஹி, பி⁴க்க²வே, த⁴ம்மேஹி ஸமன்னாக³தோ நிக³ண்டோ²…பே… முண்ட³ஸாவகோ… ஜடிலகோ… பரிப்³பா³ஜகோ… மாக³ண்டி³கோ… தேத³ண்டி³கோ… ஆருத்³த⁴கோ… கோ³தமகோ… தே³வத⁴ம்மிகோ யதா²ப⁴தம் நிக்கி²த்தோ ஏவம் நிரயே. கதமேஹி பஞ்சஹி? பாணாதிபாதீ ஹோதி, அதி³ன்னாதா³யீ ஹோதி…பே… ஸுராமேரயமஜ்ஜபமாத³ட்டா²யீ ஹோதி. இமேஹி கோ², பி⁴க்க²வே, பஞ்சஹி த⁴ம்மேஹி ஸமன்னாக³தோ தே³வத⁴ம்மிகோ யதா²ப⁴தம் நிக்கி²த்தோ ஏவம் நிரயே’’தி. ஸத்தரஸமம்.

ஸிக்கா²பத³பேய்யாலம் நிட்டி²தம்.