5. பிங்கி³யானீஸுத்தம்

195. ஏகம் ஸமயம் ப⁴க³வா வேஸாலியம் விஹரதி மஹாவனே கூடாகா³ரஸாலாயம். தேன கோ² பன ஸமயேன பஞ்சமத்தானி லிச்ச²விஸதானி ப⁴க³வந்தம் பயிருபாஸந்தி. அப்பேகச்சே லிச்ச²வீ நீலா ஹோந்தி நீலவண்ணா நீலவத்தா² நீலாலங்காரா, அப்பேகச்சே லிச்ச²வீ பீதா ஹோந்தி பீதவண்ணா பீதவத்தா² பீதாலங்காரா, அப்பேகச்சே லிச்ச²வீ லோஹிதகா ஹோந்தி லோஹிதகவண்ணா லோஹிதகவத்தா² லோஹிதகாலங்காரா, அப்பேகச்சே லிச்ச²வீ ஓதா³தா ஹோந்தி ஓதா³தவண்ணா ஓதா³தவத்தா² ஓதா³தாலங்காரா. த்யஸ்ஸுத³ம் ப⁴க³வா அதிரோசதி வண்ணேன சேவ யஸஸா ச.

அத² கோ² பிங்கி³யானீ ப்³ராஹ்மணோ உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘படிபா⁴தி மம், ப⁴க³வா, படிபா⁴தி மம், ஸுக³தா’’தி. ‘‘படிபா⁴து தம் பிங்கி³யானீ’’தி ப⁴க³வா அவோச. அத² கோ² பிங்கி³யானீ ப்³ராஹ்மணோ ப⁴க³வதோ ஸம்முகா² ஸாருப்பாய கா³தா²ய அபி⁴த்த²வி –

‘‘பத்³மம் [பது³மம் (க.) ஸம். நி. 1.132] யதா² கோகனத³ம் [கோகனுத³ம் (ஸ்யா. கம்.)] ஸுக³ந்த⁴ம்,

பாதோ ஸியா பு²ல்லமவீதக³ந்த⁴ம்;

அங்கீ³ரஸம் பஸ்ஸ விரோசமானம்,

தபந்தமாதி³ச்சமிவந்தலிக்கே²’’தி.

அத² கோ² தே லிச்ச²வீ பஞ்சஹி உத்தராஸங்க³ஸதேஹி பிங்கி³யானிம் ப்³ராஹ்மணம் அச்சா²தே³ஸும். அத² கோ² பிங்கி³யானீ ப்³ராஹ்மணோ தேஹி பஞ்சஹி உத்தராஸங்க³ஸதேஹி ப⁴க³வந்தம் அச்சா²தே³ஸி.

அத² கோ² ப⁴க³வா தே லிச்ச²வீ ஏதத³வோச – ‘‘பஞ்சன்னம், லிச்ச²வீ, ரதனானம் பாதுபா⁴வோ து³ல்லபோ⁴ லோகஸ்மிம். கதமேஸம் பஞ்சன்னம்? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ பாதுபா⁴வோ து³ல்லபோ⁴ லோகஸ்மிம். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸேதா புக்³க³லோ து³ல்லபோ⁴ லோகஸ்மிம். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸிதஸ்ஸ விஞ்ஞாதா புக்³க³லோ து³ல்லபோ⁴ லோகஸ்மிம். ததா²க³தப்பவேதி³தஸ்ஸ த⁴ம்மவினயஸ்ஸ தே³ஸிதஸ்ஸ விஞ்ஞாதா த⁴ம்மானுத⁴ம்மப்படிபன்னோ புக்³க³லோ து³ல்லபோ⁴ லோகஸ்மிம். கதஞ்ஞூ கதவேதீ³ புக்³க³லோ து³ல்லபோ⁴ லோகஸ்மிம். இமேஸம் கோ², லிச்ச²வீ, பஞ்சன்னம் ரதனானம் பாதுபா⁴வோ து³ல்லபோ⁴ லோகஸ்மி’’ந்தி [அ. நி. 5.143]. பஞ்சமம்.