9. கி²ப்பனிஸந்திஸுத்தம்

169. அத² கோ² ஆயஸ்மா ஆனந்தோ³ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் [ஸாராணீயம் (ஸீ. ஸ்யா. கம். பீ.)] வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஆனந்தோ³ ஆயஸ்மந்தம் ஸாரிபுத்தம் ஏதத³வோச –

‘‘கித்தாவதா நு கோ², ஆவுஸோ ஸாரிபுத்த, பி⁴க்கு² கி²ப்பனிஸந்தி ச ஹோதி, குஸலேஸு த⁴ம்மேஸு ஸுக்³க³ஹிதக்³கா³ஹீ ச, ப³ஹுஞ்ச க³ண்ஹாதி, க³ஹிதஞ்சஸ்ஸ நப்பமுஸ்ஸதீ’’தி? ‘‘ஆயஸ்மா கோ² ஆனந்தோ³ ப³ஹுஸ்ஸுதோ. படிபா⁴து ஆயஸ்மந்தம்யேவ ஆனந்த³’’ந்தி. ‘‘தேனஹாவுஸோ ஸாரிபுத்த, ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவமாவுஸோ’’தி கோ² ஆயஸ்மா ஸாரிபுத்தோ ஆயஸ்மதோ ஆனந்த³ஸ்ஸ பச்சஸ்ஸோஸி. ஆயஸ்மா ஆனந்தோ³ ஏதத³வோச –

‘‘இதா⁴வுஸோ ஸாரிபுத்த, பி⁴க்கு² அத்த²குஸலோ ச ஹோதி, த⁴ம்மகுஸலோ ச, ப்³யஞ்ஜனகுஸலோ ச, நிருத்திகுஸலோ ச, புப்³பா³பரகுஸலோ ச. ஏத்தாவதா கோ², ஆவுஸோ ஸாரிபுத்த, பி⁴க்கு² கி²ப்பனிஸந்தி ச ஹோதி குஸலேஸு த⁴ம்மேஸு, ஸுக்³க³ஹிதக்³கா³ஹீ ச, ப³ஹுஞ்ச க³ண்ஹாதி, க³ஹிதஞ்சஸ்ஸ நப்பமுஸ்ஸதீ’’தி. ‘‘அச்ச²ரியம், ஆவுஸோ! அப்³பு⁴தம், ஆவுஸோ!! யாவ ஸுபா⁴ஸிதம் சித³ம் ஆயஸ்மதா ஆனந்தே³ன. இமேஹி ச மயம் பஞ்சஹி த⁴ம்மேஹி ஸமன்னாக³தம் ஆயஸ்மந்தம் ஆனந்த³ம் தா⁴ரேம – ‘ஆயஸ்மா ஆனந்தோ³ அத்த²குஸலோ த⁴ம்மகுஸலோ ப்³யஞ்ஜனகுஸலோ நிருத்திகுஸலோ புப்³பா³பரகுஸலோ’’’தி. நவமம்.