7. சோத³னாஸுத்தம்

167. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி – ‘‘சோத³கேன, ஆவுஸோ, பி⁴க்கு²னா பரம் சோதே³துகாமேன பஞ்ச த⁴ம்மே அஜ்ஜ²த்தம் உபட்டா²பேத்வா பரோ சோதே³தப்³போ³’’.

‘‘கதமே பஞ்ச? காலேன வக்கா²மி, நோ அகாலேன; பூ⁴தேன வக்கா²மி, நோ அபூ⁴தேன; ஸண்ஹேன வக்கா²மி, நோ ப²ருஸேன; அத்த²ஸம்ஹிதேன வக்கா²மி, நோ அனத்த²ஸம்ஹிதேன; மேத்தசித்தோ [மேத்தசித்தேன (ஸீ. பீ. க.) சூளவ. 400 பஸ்ஸிதப்³ப³ம்] வக்கா²மி, நோ தோ³ஸந்தரோ [தோ³ஸந்தரேன (ஸீ. பீ. க.)]. சோத³கேன, ஆவுஸோ, பி⁴க்கு²னா பரம் சோதே³துகாமேன இமே பஞ்ச த⁴ம்மே அஜ்ஜ²த்தம் உபட்டா²பேத்வா பரோ சோதே³தப்³போ³.

‘‘இதா⁴ஹம், ஆவுஸோ, ஏகச்சம் புக்³க³லம் பஸ்ஸாமி அகாலேன சோதி³யமானம் நோ காலேன குபிதம், அபூ⁴தேன சோதி³யமானம் நோ பூ⁴தேன குபிதம், ப²ருஸேன சோதி³யமானம் நோ ஸண்ஹேன குபிதம், அனத்த²ஸம்ஹிதேன சோதி³யமானம் நோ அத்த²ஸம்ஹிதேன குபிதம், தோ³ஸந்தரேன சோதி³யமானம் நோ மேத்தசித்தேன குபிதம்.

‘‘அத⁴ம்மசுதி³தஸ்ஸ, ஆவுஸோ, பி⁴க்கு²னோ பஞ்சஹாகாரேஹி அவிப்படிஸாரோ உபத³ஹாதப்³போ³ [உபத³ஹிதப்³போ³ (ஸீ. ஸ்யா. பீ.)] – ‘அகாலேனாயஸ்மா சுதி³தோ நோ காலேன, அலம் தே அவிப்படிஸாராய; அபூ⁴தேனாயஸ்மா சுதி³தோ நோ பூ⁴தேன, அலம் தே அவிப்படிஸாராய; ப²ருஸேனாயஸ்மா சுதி³தோ நோ ஸண்ஹேன, அலம் தே அவிப்படிஸாராய; அனத்த²ஸம்ஹிதேனாயஸ்மா சுதி³தோ நோ அத்த²ஸம்ஹிதேன, அலம் தே அவிப்படிஸாராய; தோ³ஸந்தரேனாயஸ்மா சுதி³தோ நோ மேத்தசித்தேன, அலம் தே அவிப்படிஸாராயா’தி. அத⁴ம்மசுதி³தஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி அவிப்படிஸாரோ உபத³ஹாதப்³போ³.

‘‘அத⁴ம்மசோத³கஸ்ஸ, ஆவுஸோ, பி⁴க்கு²னோ பஞ்சஹாகாரேஹி விப்படிஸாரோ உபத³ஹாதப்³போ³ – ‘அகாலேன தே, ஆவுஸோ, சோதி³தோ [சுதி³தோ (ஸீ. ஸ்யா. பீ.)] நோ காலேன, அலம் தே விப்படிஸாராய; அபூ⁴தேன தே, ஆவுஸோ, சோதி³தோ நோ பூ⁴தேன, அலம் தே விப்படிஸாராய; ப²ருஸேன தே, ஆவுஸோ, சோதி³தோ நோ ஸண்ஹேன, அலம் தே விப்படிஸாராய; அனத்த²ஸம்ஹிதேன தே, ஆவுஸோ, சோதி³தோ நோ அத்த²ஸம்ஹிதேன, அலம் தே விப்படிஸாராய; தோ³ஸந்தரேன தே, ஆவுஸோ, சோதி³தோ நோ மேத்தசித்தேன, அலம் தே விப்படிஸாராயா’தி. அத⁴ம்மசோத³கஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி விப்படிஸாரோ உபத³ஹாதப்³போ³. தம் கிஸ்ஸ ஹேது? யதா² ந அஞ்ஞோபி பி⁴க்கு² அபூ⁴தேன சோதே³தப்³ப³ம் மஞ்ஞேய்யாதி.

‘‘இத⁴ பனாஹம், ஆவுஸோ, ஏகச்சம் புக்³க³லம் பஸ்ஸாமி காலேன சோதி³யமானம் நோ அகாலேன குபிதம், பூ⁴தேன சோதி³யமானம் நோ அபூ⁴தேன குபிதம், ஸண்ஹேன சோதி³யமானம் நோ ப²ருஸேன குபிதம், அத்த²ஸம்ஹிதேன சோதி³யமானம் நோ அனத்த²ஸம்ஹிதேன குபிதம், மேத்தசித்தேன சோதி³யமானம் நோ தோ³ஸந்தரேன குபிதம்.

‘‘த⁴ம்மசுதி³தஸ்ஸ, ஆவுஸோ, பி⁴க்கு²னோ பஞ்சஹாகாரேஹி விப்படிஸாரோ உபத³ஹாதப்³போ³ – ‘காலேனாயஸ்மா சுதி³தோ நோ அகாலேன, அலம் தே விப்படிஸாராய; பூ⁴தேனாயஸ்மா சுதி³தோ நோ அபூ⁴தேன, அலம் தே விப்படிஸாராய; ஸண்ஹேனாயஸ்மா சுதி³தோ நோ ப²ருஸேன, அலம் தே விப்படிஸாராய; அத்த²ஸம்ஹிதேனாயஸ்மா சுதி³தோ நோ அனத்த²ஸம்ஹிதேன, அலம் தே விப்படிஸாராய; மேத்தசித்தேனாயஸ்மா சுதி³தோ நோ தோ³ஸந்தரேன, அலம் தே விப்படிஸாராயா’தி. த⁴ம்மசுதி³தஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி விப்படிஸாரோ உபத³ஹாதப்³போ³.

‘‘த⁴ம்மசோத³கஸ்ஸ, ஆவுஸோ, பி⁴க்கு²னோ பஞ்சஹாகாரேஹி அவிப்படிஸாரோ உபத³ஹாதப்³போ³ – ‘காலேன தே, ஆவுஸோ, சோதி³தோ நோ அகாலேன, அலம் தே அவிப்படிஸாராய; பூ⁴தேன தே, ஆவுஸோ, சோதி³தோ நோ அபூ⁴தேன, அலம் தே அவிப்படிஸாராய; ஸண்ஹேன தே, ஆவுஸோ, சோதி³தோ நோ ப²ருஸேன, அலம் தே அவிப்படிஸாராய; அத்த²ஸம்ஹிதேன தே, ஆவுஸோ, சோதி³தோ நோ அனத்த²ஸம்ஹிதேன, அலம் தே அவிப்படிஸாராய; மேத்தசித்தேன தே, ஆவுஸோ, சோதி³தோ நோ தோ³ஸந்தரேன, அலம் தே அவிப்படிஸாராயா’தி. த⁴ம்மசோத³கஸ்ஸ, ஆவுஸோ, பி⁴க்கு²னோ இமேஹி பஞ்சஹாகாரேஹி அவிப்படிஸாரோ உபத³ஹாதப்³போ³. தம் கிஸ்ஸ ஹேது? யதா² அஞ்ஞோபி பி⁴க்கு² பூ⁴தேன சோதி³தப்³ப³ம் மஞ்ஞேய்யாதி.

‘‘சுதி³தேன, ஆவுஸோ, புக்³க³லேன த்³வீஸு த⁴ம்மேஸு பதிட்டா²தப்³ப³ம் – ஸச்சே ச, அகுப்பே ச. மம் சேபி [பஞ்சஹி (ஸ்யா. க.)], ஆவுஸோ, பரே சோதே³ய்யும் காலேன வா அகாலேன வா பூ⁴தேன வா அபூ⁴தேன வா ஸண்ஹேன வா ப²ருஸேன வா அத்த²ஸம்ஹிதேன வா அனத்த²ஸம்ஹிதேன வா மேத்தசித்தா [மேத்தசித்தேன (ஸீ. பீ. க.) ம. நி. 1.227 பஸ்ஸிதப்³ப³ம்] வா தோ³ஸந்தரா [தோ³ஸந்தரேன (ஸீ. பீ. க.)] வா, அஹம்பி த்³வீஸுயேவ த⁴ம்மேஸு பதிட்ட²ஹேய்யம் – ஸச்சே ச, அகுப்பே ச. ஸசே ஜானேய்யம் – ‘அத்தே²ஸோ மயி த⁴ம்மோ’தி, ‘அத்தீ²’தி நம் வதே³ய்யம் – ‘ஸம்விஜ்ஜதேஸோ மயி த⁴ம்மோ’தி. ஸசே ஜானேய்யம் – ‘நத்தே²ஸோ மயி த⁴ம்மோ’தி, ‘நத்தீ²’தி நம் வதே³ய்யம் – ‘நேஸோ த⁴ம்மோ மயி ஸம்விஜ்ஜதீ’தி.

‘‘ஏவம்பி கோ² தே [ஏவம்பி கோ² (க.)], ஸாரிபுத்த, வுச்சமானா அத² ச பனிதே⁴கச்சே மோக⁴புரிஸா ந பத³க்கி²ணம் க³ண்ஹந்தீ’’தி.

‘‘யே தே, ப⁴ந்தே, புக்³க³லா அஸ்ஸத்³தா⁴ ஜீவிகத்தா² ந ஸத்³தா⁴ அகா³ரஸ்மா அனகா³ரியம் பப்³ப³ஜிதா ஸடா² மாயாவினோ கேதபி³னோ [கேடுபி⁴னோ (ஸீ. ஸ்யா. கம். பீ.)] உத்³த⁴தா உன்னளா சபலா முக²ரா விகிண்ணவாசா இந்த்³ரியேஸு அகு³த்தத்³வாரா போ⁴ஜனே அமத்தஞ்ஞுனோ ஜாக³ரியம் அனனுயுத்தா ஸாமஞ்ஞே அனபேக்க²வந்தோ ஸிக்கா²ய ந திப்³ப³கா³ரவா பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா குஸீதா ஹீனவீரியா முட்ட²ஸ்ஸதினோ அஸம்பஜானா அஸமாஹிதா விப்³ப⁴ந்தசித்தா து³ப்பஞ்ஞா ஏளமூகா³, தே மயா ஏவம் வுச்சமானா ந பத³க்கி²ணம் க³ண்ஹந்தி.

‘‘யே பன தே, ப⁴ந்தே, குலபுத்தா ஸத்³தா⁴ அகா³ரஸ்மா அனகா³ரியம் பப்³ப³ஜிதா அஸடா² அமாயாவினோ அகேதபி³னோ அனுத்³த⁴தா அனுன்னளா அசபலா அமுக²ரா அவிகிண்ணவாசா இந்த்³ரியேஸு கு³த்தத்³வாரா போ⁴ஜனே மத்தஞ்ஞுனோ ஜாக³ரியம் அனுயுத்தா ஸாமஞ்ஞே அபேக்க²வந்தோ ஸிக்கா²ய திப்³ப³கா³ரவா ந பா³ஹுலிகா ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா ஆரத்³த⁴வீரியா பஹிதத்தா உபட்டி²தஸ்ஸதினோ ஸம்பஜானா ஸமாஹிதா ஏகக்³க³சித்தா பஞ்ஞவந்தோ அனேளமூகா³, தே மயா ஏவம் வுச்சமானா பத³க்கி²ணம் க³ண்ஹந்தீதி.

‘‘யே தே, ஸாரிபுத்த, புக்³க³லா அஸ்ஸத்³தா⁴ ஜீவிகத்தா² ந ஸத்³தா⁴ அகா³ரஸ்மா அனகா³ரியம் பப்³ப³ஜிதா ஸடா² மாயாவினோ கேதபி³னோ உத்³த⁴தா உன்னளா சபலா முக²ரா விகிண்ணவாசா இந்த்³ரியேஸு அகு³த்தத்³வாரா போ⁴ஜனே அமத்தஞ்ஞுனோ ஜாக³ரியம் அனனுயுத்தா ஸாமஞ்ஞே அனபேக்க²வந்தோ ஸிக்கா²ய ந திப்³ப³கா³ரவா பா³ஹுலிகா ஸாத²லிகா ஓக்கமனே புப்³ப³ங்க³மா பவிவேகே நிக்கி²த்தது⁴ரா குஸீதா ஹீனவீரியா முட்ட²ஸ்ஸதினோ அஸம்பஜானா அஸமாஹிதா விப்³ப⁴ந்தசித்தா து³ப்பஞ்ஞா ஏளமூகா³, திட்ட²ந்து தே.

‘‘யே பன, தே ஸாரிபுத்த, குலபுத்தா ஸத்³தா⁴ அகா³ரஸ்மா அனகா³ரியம் பப்³ப³ஜிதா அஸடா² அமாயாவினோ அகேதபி³னோ அனுத்³த⁴தா அனுன்னளா அசபலா அமுக²ரா அவிகிண்ணவாசா இந்த்³ரியேஸு கு³த்தத்³வாரா போ⁴ஜனே மத்தஞ்ஞுனோ ஜாக³ரியம் அனுயுத்தா ஸாமஞ்ஞே அபேக்க²வந்தோ ஸிக்கா²ய திப்³ப³கா³ரவா ந பா³ஹுலிகா ந ஸாத²லிகா ஓக்கமனே நிக்கி²த்தது⁴ரா பவிவேகே புப்³ப³ங்க³மா ஆரத்³த⁴வீரியா பஹிதத்தா உபட்டி²தஸ்ஸதினோ ஸம்பஜானா ஸமாஹிதா ஏகக்³க³சித்தா பஞ்ஞவந்தோ அனேளமூகா³, தே த்வம், ஸாரிபுத்த, வதே³ய்யாஸி. ஓவத³, ஸாரிபுத்த, ஸப்³ரஹ்மசாரீ; அனுஸாஸ, ஸாரிபுத்த, ஸப்³ரஹ்மசாரீ – ‘அஸத்³த⁴ம்மா வுட்டா²பேத்வா ஸத்³த⁴ம்மே பதிட்டா²பேஸ்ஸாமி ஸப்³ரஹ்மசாரீ’தி. ஏவஞ்ஹி தே, ஸாரிபுத்த, ஸிக்கி²தப்³ப³’’ந்தி. ஸத்தமம்.