5. பஞ்ஹபுச்சா²ஸுத்தம்

165. தத்ர கோ² ஆயஸ்மா ஸாரிபுத்தோ பி⁴க்கூ² ஆமந்தேஸி…பே… ‘‘யோ ஹி கோசி, ஆவுஸோ, பரம் பஞ்ஹம் புச்ச²தி, ஸப்³போ³ ஸோ பஞ்சஹி டா²னேஹி, ஏதேஸம் வா அஞ்ஞதரேன. கதமேஹி பஞ்சஹி? மந்த³த்தா மோமூஹத்தா [மோமுஹத்தா (ஸீ.)] பரம் பஞ்ஹம் புச்ச²தி, பாபிச்சோ² இச்சா²பகதோ பரம் பஞ்ஹம் புச்ச²தி, பரிப⁴வம் பரம் பஞ்ஹம் புச்ச²தி, அஞ்ஞாதுகாமோ பரம் பஞ்ஹம் புச்ச²தி, அத² வா பனேவம்சித்தோ [அத² வா பகுப்பந்தோ (ஸீ. பீ.)] பரம் பஞ்ஹம் புச்ச²தி – ‘ஸசே மே பஞ்ஹம் புட்டோ² ஸம்மதே³வ ப்³யாகரிஸ்ஸதி இச்சேதம் குஸலம், நோ சே [நோ ச (ஸ்யா.)] மே பஞ்ஹம் புட்டோ² ஸம்மதே³வ ப்³யாகரிஸ்ஸதி அஹமஸ்ஸ ஸம்மதே³வ ப்³யாகரிஸ்ஸாமீ’தி. யோ ஹி கோசி, ஆவுஸோ, பரம் பஞ்ஹம் புச்ச²தி, ஸப்³போ³ ஸோ இமேஹி பஞ்சஹி டா²னேஹி, ஏதேஸம் வா அஞ்ஞதரேன. அஹம் கோ² பனாவுஸோ, ஏவம்சித்தோ பரம் பஞ்ஹம் புச்சா²மி – ‘ஸசே மே பஞ்ஹம் புட்டோ² ஸம்மதே³வ ப்³யாகரிஸ்ஸதி இச்சேதம் குஸலம், நோ சே மே பஞ்ஹம் புட்டோ² ஸம்மதே³வ ப்³யாகரிஸ்ஸதி, அஹமஸ்ஸ ஸம்மதே³வ ப்³யாகரிஸ்ஸாமீ’’தி. பஞ்சமம்.