(26) 6. அபி⁴ஞ்ஞாவக்³கோ³

1. அபி⁴ஞ்ஞாஸுத்தம்

254. ‘‘சத்தாரோமே, பி⁴க்க²வே, த⁴ம்மா. கதமே சத்தாரோ? அத்தி², பி⁴க்க²வே, த⁴ம்மா அபி⁴ஞ்ஞா பரிஞ்ஞேய்யா; அத்தி², பி⁴க்க²வே, த⁴ம்மா அபி⁴ஞ்ஞா பஹாதப்³பா³; அத்தி², பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³; அத்தி², பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³.

‘‘கதமே ச, பி⁴க்க²வே, த⁴ம்மா அபி⁴ஞ்ஞா பரிஞ்ஞேய்யா? பஞ்சுபாதா³னக்க²ந்தா⁴ [பஞ்சுபாதா³னக்க²ந்தா⁴திஸ்ஸ வசனீயம் (க.)] – இமே வுச்சந்தி, பி⁴க்க²வே, த⁴ம்மா அபி⁴ஞ்ஞா பரிஞ்ஞேய்யா.

‘‘கதமே ச, பி⁴க்க²வே, த⁴ம்மா அபி⁴ஞ்ஞா பஹாதப்³பா³? அவிஜ்ஜா ச ப⁴வதண்ஹா ச – இமே வுச்சந்தி, பி⁴க்க²வே, த⁴ம்மா அபி⁴ஞ்ஞா பஹாதப்³பா³.

‘‘கதமே ச, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³? ஸமதோ² ச விபஸ்ஸனா ச – இமே வுச்சந்தி, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³.

‘‘கதமே ச, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³? விஜ்ஜா ச விமுத்தி ச – இமே வுச்சந்தி, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³. இமே கோ², பி⁴க்க²வே, சத்தாரோ த⁴ம்மா’’தி. பட²மம்.

2. பரியேஸனாஸுத்தம்

255. ‘‘சதஸ்ஸோ இமா, பி⁴க்க²வே, அனரியபரியேஸனா. கதமா சதஸ்ஸோ? இத⁴, பி⁴க்க²வே, ஏகச்சோ அத்தனா ஜராத⁴ம்மோ ஸமானோ ஜராத⁴ம்மம்யேவ பரியேஸதி; அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மம்யேவ பரியேஸதி; அத்தனா மரணத⁴ம்மோ ஸமானோ மரணத⁴ம்மம்யேவ பரியேஸதி; அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மம்யேவ பரியேஸதி. இமா கோ², பி⁴க்க²வே, சதஸ்ஸோ அனரியபரியேஸனா.

‘‘சதஸ்ஸோ இமா, பி⁴க்க²வே, அரியபரியேஸனா. கதமா சதஸ்ஸோ? இத⁴, பி⁴க்க²வே, ஏகச்சோ அத்தனா ஜராத⁴ம்மோ ஸமானோ ஜராத⁴ம்மே ஆதீ³னவம் விதி³த்வா அஜரம் அனுத்தரம் யோக³க்கே²மம் நிப்³பா³னம் பரியேஸதி; அத்தனா ப்³யாதி⁴த⁴ம்மோ ஸமானோ ப்³யாதி⁴த⁴ம்மே ஆதீ³னவம் விதி³த்வா அப்³யாதி⁴ம் அனுத்தரம் யோக³க்கே²மம் நிப்³பா³னம் பரியேஸதி; அத்தனா மரணத⁴ம்மோ ஸமானோ மரணத⁴ம்மே ஆதீ³னவம் விதி³த்வா அமதம் அனுத்தரம் யோக³க்கே²மம் நிப்³பா³னம் பரியேஸதி; அத்தனா ஸம்கிலேஸத⁴ம்மோ ஸமானோ ஸம்கிலேஸத⁴ம்மே ஆதீ³னவம் விதி³த்வா அஸம்கிலிட்ட²ம் அனுத்தரம் யோக³க்கே²மம் நிப்³பா³னம் பரியேஸதி. இமா கோ², பி⁴க்க²வே, சதஸ்ஸோ அரியபரியேஸனா’’தி. து³தியம்.

3. ஸங்க³ஹவத்து²ஸுத்தம்

256. ‘‘சத்தாரிமானி, பி⁴க்க²வே, ஸங்க³ஹவத்தூ²னி. கதமானி சத்தாரி? தா³னம், பேய்யவஜ்ஜம் [பியவாசா (க.) அ. நி. 4.32 பஸ்ஸிதப்³ப³ம்], அத்த²சரியா, ஸமானத்ததா – இமானி கோ², பி⁴க்க²வே, சத்தாரி ஸங்க³ஹவத்தூ²னீ’’தி.

4. மாலுக்யபுத்தஸுத்தம்

257. அத² கோ² ஆயஸ்மா மாலுக்யபுத்தோ [மாலுங்க்யபுத்தோ (ஸீ. ஸ்யா. கம். பீ.)] யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மாலுக்யபுத்தோ ப⁴க³வந்தம் ஏதத³வோச –

‘‘ஸாது⁴ மே, ப⁴ந்தே, ப⁴க³வா ஸம்கி²த்தேன த⁴ம்மம் தே³ஸேது, யமஹம் ப⁴க³வதோ த⁴ம்மம் ஸுத்வா ஏகோ வூபகட்டோ² அப்பமத்தோ ஆதாபீ பஹிதத்தோ விஹரேய்ய’’ந்தி. ‘‘ஏத்த² இதா³னி, மாலுக்யபுத்த, கிம் த³ஹரே பி⁴க்கூ² வக்கா²ம; யத்ர ஹி நாம த்வம் ஜிண்ணோ வுத்³தோ⁴ மஹல்லகோ ததா²க³தஸ்ஸ ஸம்கி²த்தேன ஓவாத³ம் யாசஸீ’’தி! ‘‘தே³ஸேது மே, ப⁴ந்தே, ப⁴க³வா ஸம்கி²த்தேன த⁴ம்மம்; தே³ஸேது ஸுக³தோ ஸம்கி²த்தேன த⁴ம்மம். அப்பேவ நாமாஹம் ப⁴க³வதோ பா⁴ஸிதஸ்ஸ அத்த²ம் ஆஜானேய்யம்; அப்பேவ நாமாஹம் ப⁴க³வதோ பா⁴ஸிதஸ்ஸ தா³யாதோ³ [ப⁴க³வதோ ஸாவகோ (க.)] அஸ்ஸ’’ந்தி.

‘‘சத்தாரோமே, மாலுக்யபுத்த, தண்ஹுப்பாதா³ யத்த² பி⁴க்கு²னோ தண்ஹா உப்பஜ்ஜமானா உப்பஜ்ஜதி. கதமே சத்தாரோ? சீவரஹேது வா, மாலுக்யபுத்த, பி⁴க்கு²னோ தண்ஹா உப்பஜ்ஜமானா உப்பஜ்ஜதி. பிண்ட³பாதஹேது வா, மாலுக்யபுத்த, பி⁴க்கு²னோ தண்ஹா உப்பஜ்ஜமானா உப்பஜ்ஜதி. ஸேனாஸனஹேது வா, மாலுக்யபுத்த, பி⁴க்கு²னோ தண்ஹா உப்பஜ்ஜமானா உப்பஜ்ஜதி. இதிப⁴வாப⁴வஹேது வா, மாலுக்யபுத்த, பி⁴க்கு²னோ தண்ஹா உப்பஜ்ஜமானா உப்பஜ்ஜதி. இமே கோ², மாலுக்யபுத்த, சத்தாரோ தண்ஹுப்பாதா³ யத்த² பி⁴க்கு²னோ தண்ஹா உப்பஜ்ஜமானா உப்பஜ்ஜதி. யதோ கோ², மாலுக்யபுத்த, பி⁴க்கு²னோ தண்ஹா பஹீனா ஹோதி உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா, அயம் வுச்சதி, மாலுக்யபுத்த, ‘பி⁴க்கு² அச்சே²ச்சி² தண்ஹம், விவத்தயி ஸம்யோஜனம், ஸம்மா மானாபி⁴ஸமயா அந்தமகாஸி து³க்க²ஸ்ஸா’’’தி.

அத² கோ² ஆயஸ்மா மாலுக்யபுத்தோ ப⁴க³வதா இமினா ஓவாதே³ன ஓவதி³தோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ஆயஸ்மா மாலுக்யபுத்தோ ஏகோ வூபகட்டோ² அப்பமத்தோ ஆதாபீ பஹிதத்தோ விஹரந்தோ நசிரஸ்ஸேவ – யஸ்ஸத்தா²ய குலபுத்தா ஸம்மதே³வ அகா³ரஸ்மா அனகா³ரியம் பப்³ப³ஜந்தி, தத³னுத்தரம் – ப்³ரஹ்மசரியபரியோஸானம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸி. ‘‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’’தி அப்³ப⁴ஞ்ஞாஸி. அஞ்ஞதரோ ச பனாயஸ்மா மாலுக்யபுத்தோ அரஹதம் அஹோஸீதி. சதுத்த²ம்.

5. குலஸுத்தம்

258. ‘‘யானி கானிசி, பி⁴க்க²வே, குலானி போ⁴கே³ஸு மஹத்தம் பத்தானி ந சிரட்டி²திகானி ப⁴வந்தி, ஸப்³பா³னி தானி சதூஹி டா²னேஹி, ஏதேஸம் வா அஞ்ஞதரேன. கதமேஹி சதூஹி? நட்ட²ம் ந க³வேஸந்தி, ஜிண்ணம் ந படிஸங்க²ரோந்தி, அபரிமிதபானபோ⁴ஜனா ஹோந்தி, து³ஸ்ஸீலம் இத்தி²ம் வா புரிஸம் வா ஆதி⁴பச்சே ட²பேந்தி. யானி கானிசி, பி⁴க்க²வே, குலானி போ⁴கே³ஸு மஹத்தம் பத்தானி ந சிரட்டி²திகானி ப⁴வந்தி, ஸப்³பா³னி தானி இமேஹி சதூஹி டா²னேஹி, ஏதேஸம் வா அஞ்ஞதரேன.

‘‘யானி கானிசி, பி⁴க்க²வே, குலானி போ⁴கே³ஸு மஹத்தம் பத்தானி சிரட்டி²திகானி ப⁴வந்தி, ஸப்³பா³னி தானி சதூஹி டா²னேஹி, ஏதேஸம் வா அஞ்ஞதரேன. கதமேஹி சதூஹி? நட்ட²ம் க³வேஸந்தி, ஜிண்ணம் படிஸங்க²ரோந்தி, பரிமிதபானபோ⁴ஜனா ஹோந்தி, ஸீலவந்தம் இத்தி²ம் வா புரிஸம் வா ஆதி⁴பச்சே ட²பேந்தி. யானி கானிசி, பி⁴க்க²வே, குலானி போ⁴கே³ஸு மஹத்தம் பத்தானி சிரட்டி²திகானி ப⁴வந்தி, ஸப்³பா³னி தானி இமேஹி சதூஹி டா²னேஹி, ஏதேஸம் வா அஞ்ஞதரேனா’’தி. பஞ்சமம்.

6. பட²மஆஜானீயஸுத்தம்

259. ‘‘சதூஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ ப⁴த்³ரோ அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி. கதமேஹி சதூஹி? இத⁴, பி⁴க்க²வே, ரஞ்ஞோ ப⁴த்³ரோ அஸ்ஸாஜானீயோ வண்ணஸம்பன்னோ ச ஹோதி ப³லஸம்பன்னோ ச ஜவஸம்பன்னோ ச ஆரோஹபரிணாஹஸம்பன்னோ ச. இமேஹி கோ², பி⁴க்க²வே, சதூஹி அங்கே³ஹி ஸமன்னாக³தோ ரஞ்ஞோ ப⁴த்³ரோ அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி.

‘‘ஏவமேவம் கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸ. கதமேஹி சதூஹி? இத⁴, பி⁴க்க²வே, பி⁴க்கு² வண்ணஸம்பன்னோ ச ஹோதி ப³லஸம்பன்னோ ச ஜவஸம்பன்னோ ச ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, பி⁴க்கு² வண்ணஸம்பன்னோ ஹோதி? இத⁴, பி⁴க்க²வே, பி⁴க்கு² ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு. ஏவம் கோ², பி⁴க்க²வே, பி⁴க்கு² வண்ணஸம்பன்னோ ஹோதி.

‘‘கத²ஞ்ச, பி⁴க்க²வே, பி⁴க்கு² ப³லஸம்பன்னோ ஹோதி? இத⁴, பி⁴க்க²வே, பி⁴க்கு² ஆரத்³த⁴வீரியோ விஹரதி அகுஸலானம் த⁴ம்மானம் பஹானாய, குஸலானம் த⁴ம்மானம் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு. ஏவம் கோ², பி⁴க்க²வே, பி⁴க்கு² ப³லஸம்பன்னோ ஹோதி.

‘‘கத²ஞ்ச, பி⁴க்க²வே, பி⁴க்கு² ஜவஸம்பன்னோ ஹோதி? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, பி⁴க்கு² ஜவஸம்பன்னோ ஹோதி.

‘‘கத²ஞ்ச, பி⁴க்க²வே, பி⁴க்கு² ஆரோஹபரிணாஹஸம்பன்னோ ஹோதி? இத⁴, பி⁴க்க²வே, பி⁴க்கு² லாபீ⁴ ஹோதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரானம். ஏவம் கோ², பி⁴க்க²வே, பி⁴க்கு² ஆரோஹபரிணாஹஸம்பன்னோ ஹோதி.

‘‘இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸா’’தி. ச²ட்ட²ம்.

7. து³தியஆஜானீயஸுத்தம்

260. ‘‘சதூஹி, பி⁴க்க²வே, அங்கே³ஹி ஸமன்னாக³தோ ரஞ்ஞோ ப⁴த்³ரோ அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி. கதமேஹி சதூஹி? இத⁴, பி⁴க்க²வே, ரஞ்ஞோ ப⁴த்³ரோ அஸ்ஸாஜானீயோ வண்ணஸம்பன்னோ ச ஹோதி, ப³லஸம்பன்னோ ச, ஜவஸம்பன்னோ ச, ஆரோஹபரிணாஹஸம்பன்னோ ச. இமேஹி கோ², பி⁴க்க²வே, சதூஹி அங்கே³ஹி ஸமன்னாக³தோ ரஞ்ஞோ ப⁴த்³ரோ அஸ்ஸாஜானீயோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி.

‘‘ஏவமேவம் கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸ. கதமேஹி சதூஹி? இத⁴, பி⁴க்க²வே, பி⁴க்கு² வண்ணஸம்பன்னோ ச ஹோதி, ப³லஸம்பன்னோ ச, ஜவஸம்பன்னோ ச, ஆரோஹபரிணாஹஸம்பன்னோ ச.

‘‘கத²ஞ்ச, பி⁴க்க²வே, பி⁴க்கு² ஜவஸம்பன்னோ ஹோதி? இத⁴, பி⁴க்க²வே, பி⁴க்கு² ஆஸவானம் க²யா…பே… ஸச்சி²கத்வா உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² ஜவஸம்பன்னோ ஹோதி.

‘‘இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸா’’தி. ஸத்தமம்.

8. ப³லஸுத்தம்

261. ‘‘சத்தாரிமானி, பி⁴க்க²வே, ப³லானி. கதமானி சத்தாரி? வீரியப³லம், ஸதிப³லம், ஸமாதி⁴ப³லம், பஞ்ஞாப³லம் – இமானி கோ², பி⁴க்க²வே, சத்தாரி ப³லானீ’’தி. அட்ட²மம்.

9. அரஞ்ஞஸுத்தம்

262. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² நாலம் அரஞ்ஞவனப்பத்தா²னி பந்தானி ஸேனாஸனானி படிஸேவிதும். கதமேஹி சதூஹி? காமவிதக்கேன, ப்³யாபாத³விதக்கேன, விஹிம்ஸாவிதக்கேன, து³ப்பஞ்ஞோ ஹோதி ஜளோ ஏலமூகோ³ – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² நாலம் அரஞ்ஞவனப்பத்தா²னி பந்தானி ஸேனாஸனானி படிஸேவிதும்.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ பி⁴க்கு² அலம் அரஞ்ஞவனப்பத்தா²னி பந்தானி ஸேனாஸனானி படிஸேவிதும். கதமேஹி சதூஹி? நேக்க²ம்மவிதக்கேன, அப்³யாபாத³விதக்கேன, அவிஹிம்ஸாவிதக்கேன, பஞ்ஞவா ஹோதி அஜளோ அனேலமூகோ³ – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² அலம் அரஞ்ஞவனப்பத்தா²னி பந்தானி ஸேனாஸனானி படிஸேவிது’’ந்தி. நவமம்.

10. கம்மஸுத்தம்

263. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி சதூஹி? ஸாவஜ்ஜேன காயகம்மேன, ஸாவஜ்ஜேன வசீகம்மேன, ஸாவஜ்ஜேன மனோகம்மேன, ஸாவஜ்ஜாய தி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ விஞ்ஞூனம், ப³ஹுஞ்ச அபுஞ்ஞம் பஸவதி.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ விஞ்ஞூனம், ப³ஹுஞ்ச புஞ்ஞம் பஸவதி. கதமேஹி சதூஹி? அனவஜ்ஜேன காயகம்மேன, அனவஜ்ஜேன வசீகம்மேன, அனவஜ்ஜேன மனோகம்மேன, அனவஜ்ஜாய தி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ விஞ்ஞூனம், ப³ஹுஞ்ச புஞ்ஞம் பஸவதீ’’தி. த³ஸமம்.

அபி⁴ஞ்ஞாவக்³கோ³ ச²ட்டோ².