(27) 7. கம்மபத²வக்³கோ³

1. பாணாதிபாதீஸுத்தம்

264. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி, பாணாதிபாதே ச ஸமனுஞ்ஞோ ஹோதி, பாணாதிபாதஸ்ஸ ச வண்ணம் பா⁴ஸதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி, பாணாதிபாதா வேரமணியா ச ஸமனுஞ்ஞோ ஹோதி, பாணாதிபாதா வேரமணியா ச வண்ணம் பா⁴ஸதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. பட²மம்.

2. அதி³ன்னாதா³யீஸுத்தம்

265. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? அத்தனா ச அதி³ன்னாதா³யீ ஹோதி, பரஞ்ச அதி³ன்னாதா³னே ஸமாத³பேதி, அதி³ன்னாதா³னே ச ஸமனுஞ்ஞோ ஹோதி, அதி³ன்னாதா³னஸ்ஸ ச வண்ணம் பா⁴ஸதி – இமேஹி கோ²…பே….

‘‘அத்தனா ச அதி³ன்னாதா³னா படிவிரதோ ஹோதி, பரஞ்ச அதி³ன்னாதா³னா வேரமணியா ஸமாத³பேதி, அதி³ன்னாதா³னா வேரமணியா ச ஸமனுஞ்ஞோ ஹோதி, அதி³ன்னாதா³னா வேரமணியா ச வண்ணம் பா⁴ஸதி – இமேஹி கோ², பி⁴க்க²வே…பே…. து³தியம்.

3. மிச்சா²சாரீஸுத்தம்

266. … அத்தனா ச காமேஸுமிச்சா²சாரீ ஹோதி, பரஞ்ச காமேஸுமிச்சா²சாரே ஸமாத³பேதி, காமேஸுமிச்சா²சாரே ச ஸமனுஞ்ஞோ ஹோதி, காமேஸுமிச்சா²சாரஸ்ஸ ச வண்ணம் பா⁴ஸதி – இமேஹி கோ²…பே….

அத்தனா ச காமேஸுமிச்சா²சாரா படிவிரதோ ஹோதி, பரஞ்ச காமேஸுமிச்சா²சாரா வேரமணியா ஸமாத³பேதி, காமேஸுமிச்சா²சாரா வேரமணியா ச ஸமனுஞ்ஞோ ஹோதி, காமேஸுமிச்சா²சாரா வேரமணியா ச வண்ணம் பா⁴ஸதி – இமேஹி கோ²…பே…. ததியம்.

4. முஸாவாதீ³ஸுத்தம்

267. … அத்தனா ச முஸாவாதீ³ ஹோதி, பரஞ்ச முஸாவாதே³ ஸமாத³பேதி, முஸாவாதே³ ச ஸமனுஞ்ஞோ ஹோதி, முஸாவாத³ஸ்ஸ ச வண்ணம் பா⁴ஸதி – இமேஹி கோ²…பே….

அத்தனா ச முஸாவாதா³ படிவிரதோ ஹோதி, பரஞ்ச முஸாவாதா³ வேரமணியா ஸமாத³பேதி, முஸாவாதா³ வேரமணியா ச ஸமனுஞ்ஞோ ஹோதி, முஸாவாதா³ வேரமணியா ச வண்ணம் பா⁴ஸதி – இமேஹி…பே…. சதுத்த²ம்.

5. பிஸுணவாசாஸுத்தம்

268. … அத்தனா ச பிஸுணவாசோ ஹோதி, பரஞ்ச பிஸுணாய வாசாய ஸமாத³பேதி, பிஸுணாய வாசாய ச ஸமனுஞ்ஞோ ஹோதி, பிஸுணாய வாசாய ச வண்ணம் பா⁴ஸதி – இமேஹி…பே….

அத்தனா ச பிஸுணாய வாசாய படிவிரதோ ஹோதி, பரஞ்ச பிஸுணாய வாசாய வேரமணியா ஸமாத³பேதி, பிஸுணாய வாசாய வேரமணியா ச ஸமனுஞ்ஞோ ஹோதி, பிஸுணாய வாசாய வேரமணியா ச வண்ணம் பா⁴ஸதி – இமேஹி…பே…. பஞ்சமம்.

6. ப²ருஸவாசாஸுத்தம்

269. … அத்தனா ச ப²ருஸவாசோ ஹோதி, பரஞ்ச ப²ருஸாய வாசாய ஸமாத³பேதி, ப²ருஸாய வாசாய ச ஸமனுஞ்ஞோ ஹோதி, ப²ருஸாய வாசாய ச வண்ணம் பா⁴ஸதி…பே….

அத்தனா ச ப²ருஸாய வாசாய படிவிரதோ ஹோதி, பரஞ்ச ப²ருஸாய வாசாய வேரமணியா ஸமாத³பேதி, ப²ருஸாய வாசாய வேரமணியா ச ஸமனுஞ்ஞோ ஹோதி, ப²ருஸாய வாசாய வேரமணியா ச வண்ணம் பா⁴ஸதி – இமேஹி கோ²…பே…. ச²ட்ட²ம்.

7. ஸம்ப²ப்பலாபஸுத்தம்

270. … அத்தனா ச ஸம்ப²ப்பலாபீ ஹோதி, பரஞ்ச ஸம்ப²ப்பலாபே ஸமாத³பேதி, ஸம்ப²ப்பலாபே ச ஸமனுஞ்ஞோ ஹோதி, ஸம்ப²ப்பலாபஸ்ஸ ச வண்ணம் பா⁴ஸதி – இமேஹி…பே….

அத்தனா ச ஸம்ப²ப்பலாபா படிவிரதோ ஹோதி, பரஞ்ச ஸம்ப²ப்பலாபா வேரமணியா ஸமாத³பேதி, ஸம்ப²ப்பலாபா வேரமணியா ச ஸமனுஞ்ஞோ ஹோதி, ஸம்ப²ப்பலாபா வேரமணியா ச வண்ணம் பா⁴ஸதி – இமேஹி கோ², பி⁴க்க²வே…பே…. ஸத்தமம்.

8. அபி⁴ஜ்ஜா²லுஸுத்தம்

271. … அத்தனா ச அபி⁴ஜ்ஜா²லு ஹோதி, பரஞ்ச அபி⁴ஜ்ஜா²ய ஸமாத³பேதி, அபி⁴ஜ்ஜா²ய ச ஸமனுஞ்ஞோ ஹோதி, அபி⁴ஜ்ஜா²ய ச வண்ணம் பா⁴ஸதி…பே….

‘‘அத்தனா ச அனபி⁴ஜ்ஜா²லு ஹோதி, பரஞ்ச அனபி⁴ஜ்ஜா²ய ஸமாத³பேதி, அனபி⁴ஜ்ஜா²ய ச ஸமனுஞ்ஞோ ஹோதி, அனபி⁴ஜ்ஜா²ய ச வண்ணம் பா⁴ஸதி – இமேஹி கோ²…பே…. அட்ட²மம்.

9. ப்³யாபன்னசித்தஸுத்தம்

272. … அத்தனா ச ப்³யாபன்னசித்தோ ஹோதி, பரஞ்ச ப்³யாபாதே³ ஸமாத³பேதி, ப்³யாபாதே³ ச ஸமனுஞ்ஞோ ஹோதி, ப்³யாபாத³ஸ்ஸ ச வண்ணம் பா⁴ஸதி – இமேஹி…பே….

அத்தனா ச அப்³யாபன்னசித்தோ ஹோதி, பரஞ்ச அப்³யாபாதே³ ஸமாத³பேதி, அப்³யாபாதே³ ச ஸமனுஞ்ஞோ ஹோதி, அப்³யாபாத³ஸ்ஸ ச வண்ணம் பா⁴ஸதி – இமேஹி கோ²…பே…. நவமம்.

10. மிச்சா²தி³ட்டி²ஸுத்தம்

273. … அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி, மிச்சா²தி³ட்டி²யா ச ஸமனுஞ்ஞோ ஹோதி, மிச்சா²தி³ட்டி²யா ச வண்ணம் பா⁴ஸதி – இமேஹி…பே….

அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி, ஸம்மாதி³ட்டி²யா ச ஸமனுஞ்ஞோ ஹோதி, ஸம்மாதி³ட்டி²யா ச வண்ணம் பா⁴ஸதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³தி. த³ஸமம்.

கம்மபத²வக்³கோ³ ஸத்தமோ.