4. ஸேய்யாஸுத்தம்

246. ‘‘சதஸ்ஸோ இமா, பி⁴க்க²வே, ஸேய்யா. கதமா சதஸ்ஸோ? பேதஸேய்யா, காமபோ⁴கி³ஸேய்யா, ஸீஹஸேய்யா, ததா²க³தஸேய்யா. கதமா ச, பி⁴க்க²வே, பேதஸேய்யா? யேபு⁴ய்யேன, பி⁴க்க²வே, பேதா உத்தானா ஸேந்தி; அயம் வுச்சதி, பி⁴க்க²வே, பேதஸேய்யா.

‘‘கதமா ச, பி⁴க்க²வே, காமபோ⁴கி³ஸேய்யா? யேபு⁴ய்யேன, பி⁴க்க²வே, காமபோ⁴கீ³ வாமேன பஸ்ஸேன ஸேந்தி; அயம் வுச்சதி, பி⁴க்க²வே, காமபோ⁴கி³ஸேய்யா.

‘‘கதமா ச, பி⁴க்க²வே, ஸீஹஸேய்யா? ஸீஹோ, பி⁴க்க²வே, மிக³ராஜா த³க்கி²ணேன பஸ்ஸேன ஸேய்யம் கப்பேதி, பாதே³ பாத³ம் அச்சாதா⁴ய, அந்தரஸத்தி²ம்ஹி நங்கு³ட்ட²ம் அனுபக்கி²பித்வா. ஸோ படிபு³ஜ்ஜி²த்வா புரிமம் காயம் அப்³பு⁴ன்னாமேத்வா பச்சி²மம் காயம் அனுவிலோகேதி. ஸசே, பி⁴க்க²வே, ஸீஹோ மிக³ராஜா கிஞ்சி பஸ்ஸதி காயஸ்ஸ விக்கி²த்தம் வா விஸடம் வா, தேன, பி⁴க்க²வே, ஸீஹோ மிக³ராஜா அனத்தமனோ ஹோதி. ஸசே பன, பி⁴க்க²வே, ஸீஹோ மிக³ராஜா ந கிஞ்சி பஸ்ஸதி காயஸ்ஸ விக்கி²த்தம் வா விஸடம் வா, தேன, பி⁴க்க²வே, ஸீஹோ மிக³ராஜா அத்தமனோ ஹோதி. அயம் வுச்சதி, பி⁴க்க²வே, ஸீஹஸேய்யா.

‘‘கதமா ச, பி⁴க்க²வே, ததா²க³தஸேய்யா? இத⁴, பி⁴க்க²வே, ததா²க³தோ விவிச்சேவ காமேஹி…பே… சதுத்த²ம் ஜா²னம் உபஸம்பஜ்ஜ விஹரதி. அயம் வுச்சதி, பி⁴க்க²வே, ததா²க³தஸேய்யா. இமா கோ², பி⁴க்க²வே, சதஸ்ஸோ ஸேய்யா’’தி. சதுத்த²ம்.