5. பஞ்சமபண்ணாஸகம்

(21) 1. ஸப்புரிஸவக்³கோ³

1. ஸிக்கா²பத³ஸுத்தம்

201. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி; அத்தனா ச அதி³ன்னாதா³யீ ஹோதி, பரஞ்ச அதி³ன்னாதா³னே ஸமாத³பேதி; அத்தனா ச காமேஸுமிச்சா²சாரீ ஹோதி, பரஞ்ச காமேஸுமிச்சா²சாரே ஸமாத³பேதி; அத்தனா ச முஸாவாதீ³ ஹோதி, பரஞ்ச முஸாவாதே³ ஸமாத³பேதி; அத்தனா ச ஸுராமேரயமஜ்ஜபமாத³ட்டா²யீ ஹோதி, பரஞ்ச ஸுராமேரயமஜ்ஜபமாத³ட்டா²னே ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி; அத்தனா ச அதி³ன்னாதா³னா படிவிரதோ ஹோதி, பரஞ்ச அதி³ன்னாதா³னா வேரமணியா ஸமாத³பேதி; அத்தனா ச காமேஸுமிச்சா²சாரா படிவிரதோ ஹோதி, பரஞ்ச காமேஸுமிச்சா²சாரா வேரமணியா ஸமாத³பேதி; அத்தனா ச முஸாவாதா³ படிவிரதோ ஹோதி, பரஞ்ச முஸாவாதா³ வேரமணியா ஸமாத³பேதி; அத்தனா ச ஸுராமேரயமஜ்ஜபமாத³ட்டா²னா படிவிரதோ ஹோதி, பரஞ்ச ஸுராமேரயமஜ்ஜபமாத³ட்டா²னா வேரமணியா ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி [பு. ப. 135]. பட²மம்.

2. அஸ்ஸத்³த⁴ஸுத்தம்

202. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத²…பே….

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, அப்பஸ்ஸுதோ ஹோதி, குஸீதோ ஹோதி, முட்ட²ஸ்ஸதி ஹோதி, து³ப்பஞ்ஞோ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச அஸ்ஸத்³தோ⁴ ஹோதி, பரஞ்ச அஸ்ஸத்³தி⁴யே [அஸத்³தா⁴ய (க.)] ஸமாத³பேதி; அத்தனா ச அஹிரிகோ ஹோதி, பரஞ்ச அஹிரிகதாய ஸமாத³பேதி; அத்தனா ச அனோத்தப்பீ ஹோதி, பரஞ்ச அனோத்தப்பே ஸமாத³பேதி; அத்தனா ச அப்பஸ்ஸுதோ ஹோதி, பரஞ்ச அப்பஸ்ஸுதே ஸமாத³பேதி; அத்தனா ச குஸீதோ ஹோதி, பரஞ்ச கோஸஜ்ஜே ஸமாத³பேதி; அத்தனா ச முட்ட²ஸ்ஸதி ஹோதி, பரஞ்ச முட்ட²ஸ்ஸச்சே [முட்ட²ஸச்சே (ஸீ. ஸ்யா. கம். பீ.)] ஸமாத³பேதி; அத்தனா ச து³ப்பஞ்ஞோ ஹோதி, பரஞ்ச து³ப்பஞ்ஞதாய ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ப³ஹுஸ்ஸுதோ ஹோதி, ஆரத்³த⁴வீரியோ ஹோதி, ஸதிமா ஹோதி, பஞ்ஞவா ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச ஸத்³தா⁴ஸம்பன்னோ ஹோதி, பரஞ்ச ஸத்³தா⁴ஸம்பதா³ய ஸமாத³பேதி; அத்தனா ச ஹிரிமா ஹோதி, பரஞ்ச ஹிரிமதாய [ஹிரிஸம்பதா³ய (க.)] ஸமாத³பேதி; அத்தனா ச ஓத்தப்பீ ஹோதி, பரஞ்ச ஓத்தப்பே ஸமாத³பேதி; அத்தனா ச ப³ஹுஸ்ஸுதோ ஹோதி, பரஞ்ச பா³ஹுஸச்சே ஸமாத³பேதி; அத்தனா ச ஆரத்³த⁴வீரியோ ஹோதி, பரஞ்ச வீரியாரம்பே⁴ ஸமாத³பேதி; அத்தனா ச உபட்டி²தஸ்ஸதி ஹோதி, பரஞ்ச ஸதிஉபட்டா²னே [ஸதிபட்டா²னே (ஸீ. ஸ்யா. கம். பீ.)] ஸமாத³பேதி; அத்தனா ச பஞ்ஞாஸம்பன்னோ ஹோதி, பரஞ்ச பஞ்ஞாஸம்பதா³ய ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. து³தியம்.

3. ஸத்தகம்மஸுத்தம்

203. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத²…பே….

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி; அத்தனா ச அதி³ன்னாதா³யீ ஹோதி, பரஞ்ச அதி³ன்னாதா³னே ஸமாத³பேதி; அத்தனா ச காமேஸுமிச்சா²சாரீ ஹோதி, பரஞ்ச காமேஸுமிச்சா²சாரே ஸமாத³பேதி; அத்தனா ச முஸாவாதீ³ ஹோதி, பரஞ்ச முஸாவாதே³ ஸமாத³பேதி; அத்தனா ச பிஸுணவாசோ ஹோதி, பரஞ்ச பிஸுணாய வாசாய ஸமாத³பேதி; அத்தனா ச ப²ருஸவாசோ ஹோதி, பரஞ்ச ப²ருஸாய வாசாய ஸமாத³பேதி; அத்தனா ச ஸம்ப²ப்பலாபீ ஹோதி, பரஞ்ச ஸம்ப²ப்பலாபே ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ, ஹோதி, ஸம்ப²ப்பலாபா படிவிரதோ ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴ பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி; அத்தனா ச அதி³ன்னாதா³னா படிவிரதோ ஹோதி, பரஞ்ச அதி³ன்னாதா³னா வேரமணியா ஸமாத³பேதி; அத்தனா ச காமேஸுமிச்சா²சாரா படிவிரதோ ஹோதி, பரஞ்ச காமேஸுமிச்சா²சாரா வேரமணியா ஸமாத³பேதி; அத்தனா ச முஸாவாதா³ படிவிரதோ ஹோதி, பரஞ்ச முஸாவாதா³ வேரமணியா ஸமாத³பேதி; அத்தனா ச பிஸுணாய வாசாய படிவிரதோ ஹோதி, பரஞ்ச பிஸுணாய வாசாய வேரமணியா ஸமாத³பேதி; அத்தனா ச ப²ருஸாய வாசாய படிவிரதோ ஹோதி, பரஞ்ச ப²ருஸாய வாசாய வேரமணியா ஸமாத³பேதி; அத்தனா ச ஸம்ப²ப்பலாபா படிவிரதோ ஹோதி, பரஞ்ச ஸம்ப²ப்பலாபா வேரமணியா ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. ததியம்.

4. த³ஸகம்மஸுத்தம்

204. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத²…பே….

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, பிஸுணவாசோ ஹோதி, ப²ருஸவாசோ ஹோதி, ஸம்ப²ப்பலாபீ ஹோதி, அபி⁴ஜ்ஜா²லு ஹோதி, ப்³யாபன்னசித்தோ ஹோதி, மிச்சா²தி³ட்டி²கோ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி…பே… அத்தனா ச அபி⁴ஜ்ஜா²லு ஹோதி, பரஞ்ச அபி⁴ஜ்ஜா²ய ஸமாத³பேதி; அத்தனா ச ப்³யாபன்னசித்தோ ஹோதி, பரஞ்ச ப்³யாபாதே³ ஸமாத³பேதி, அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி…பே… அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி²கோ ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி…பே… அத்தனா ச அனபி⁴ஜ்ஜா²லு ஹோதி, பரஞ்ச அனபி⁴ஜ்ஜா²ய ஸமாத³பேதி; அத்தனா ச அப்³யாபன்னசித்தோ ஹோதி, பரஞ்ச அப்³யாபாதே³ ஸமாத³பேதி; அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. சதுத்த²ம்.

5. அட்ட²ங்கி³கஸுத்தம்

205. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத²…பே….

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி, மிச்சா²ஸங்கப்போ ஹோதி, மிச்சா²வாசோ ஹோதி, மிச்சா²கம்மந்தோ ஹோதி, மிச்சா²ஆஜீவோ ஹோதி, மிச்சா²வாயாமோ ஹோதி, மிச்சா²ஸதி ஹோதி, மிச்சா²ஸமாதி⁴ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴ பி⁴க்க²வே, ஏகச்சோ அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி; அத்தனா ச மிச்சா²ஸங்கப்போ ஹோதி, பரஞ்ச மிச்சா²ஸங்கப்பே ஸமாத³பேதி; அத்தனா ச மிச்சா²வாசோ ஹோதி, பரஞ்ச மிச்சா²வாசாய ஸமாத³பேதி; அத்தனா ச மிச்சா²கம்மந்தோ ஹோதி, பரஞ்ச மிச்சா²கம்மந்தே ஸமாத³பேதி; அத்தனா ச மிச்சா²ஆஜீவோ ஹோதி, பரஞ்ச மிச்சா²ஆஜீவே ஸமாத³பேதி; அத்தனா ச மிச்சா²வாயாமோ ஹோதி, பரஞ்ச மிச்சா²வாயாமே ஸமாத³பேதி; அத்தனா ச மிச்சா²ஸதி ஹோதி, பரஞ்ச மிச்சா²ஸதியா ஸமாத³பேதி; அத்தனா ச மிச்சா²ஸமாதி⁴ ஹோதி, பரஞ்ச மிச்சா²ஸமாதி⁴ம்ஹி ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி, ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி; அத்தனா ச ஸம்மாஸங்கப்போ ஹோதி, பரஞ்ச ஸம்மாஸங்கப்பே ஸமாத³பேதி; அத்தனா ச ஸம்மாவாசோ ஹோதி, பரஞ்ச ஸம்மாவாசாய ஸமாத³பேதி; அத்தனா ச ஸம்மாகம்மந்தோ ஹோதி, பரஞ்ச ஸம்மாகம்மந்தே ஸமாத³பேதி; அத்தனா ச ஸம்மாஆஜீவோ ஹோதி, பரஞ்ச ஸம்மாஆஜீவே ஸமாத³பேதி; அத்தனா ச ஸம்மாவாயாமோ ஹோதி, பரஞ்ச ஸம்மாவாயாமே ஸமாத³பேதி; அத்தனா ச ஸம்மாஸதி ஹோதி, பரஞ்ச ஸம்மாஸதியா ஸமாத³பேதி; அத்தனா ச ஸம்மாஸமாதி⁴ ஹோதி, பரஞ்ச ஸம்மாஸமாதி⁴ம்ஹி ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. பஞ்சமம்.

6. த³ஸமக்³க³ஸுத்தம்

206. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத²…பே….

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி …பே… மிச்சா²ஞாணீ ஹோதி, மிச்சா²விமுத்தி ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி…பே… அத்தனா ச மிச்சா²ஞாணீ ஹோதி, பரஞ்ச மிச்சா²ஞாணே ஸமாத³பேதி; அத்தனா ச மிச்சா²விமுத்தி ஹோதி, பரஞ்ச மிச்சா²விமுத்தியா ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி…பே… ஸம்மாஞாணீ ஹோதி, ஸம்மாவிமுத்தி ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி…பே… அத்தனா ச ஸம்மாஞாணீ ஹோதி, பரஞ்ச ஸம்மாஞாணே ஸமாத³பேதி; அத்தனா ச ஸம்மாவிமுத்தி ஹோதி, பரஞ்ச ஸம்மாவிமுத்தியா ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி. ச²ட்ட²ம்.

7. பட²மபாபத⁴ம்மஸுத்தம்

207. ‘‘பாபஞ்ச வோ, பி⁴க்க²வே, தே³ஸேஸ்ஸாமி, பாபேன பாபதரஞ்ச; கல்யாணஞ்ச, கல்யாணேன கல்யாணதரஞ்ச. தம் ஸுணாத²…பே….

‘‘கதமோ ச, பி⁴க்க²வே, பாபோ? இத⁴, பி⁴க்க²வே, ஏகச்சோ பாணாதிபாதீ ஹோதி…பே… மிச்சா²தி³ட்டி²கோ ஹோதி. அயம் வுச்சதி, பி⁴க்க²வே, பாபோ.

‘‘கதமோ ச, பி⁴க்க²வே, பாபேன பாபதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி…பே… அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி. அயம் வுச்சதி, பி⁴க்க²வே, பாபேன பாபதரோ.

‘‘கதமோ ச, பி⁴க்க²வே, கல்யாணோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி…பே… ஸம்மாதி³ட்டி²கோ ஹோதி. அயம் வுச்சதி, பி⁴க்க²வே, கல்யாணோ.

‘‘கதமோ ச, பி⁴க்க²வே, கல்யாணேன கல்யாணதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி…பே… அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி. அயம் வுச்சதி, பி⁴க்க²வே, கல்யாணேன கல்யாணதரோ’’தி. ஸத்தமம்.

8. து³தியபாபத⁴ம்மஸுத்தம்

208. ‘‘பாபஞ்ச வோ, பி⁴க்க²வே, தே³ஸேஸ்ஸாமி, பாபேன பாபதரஞ்ச; கல்யாணஞ்ச, கல்யாணேன கல்யாணதரஞ்ச. தம் ஸுணாத², ஸாது⁴கம் மனஸிகரோத²; பா⁴ஸிஸ்ஸாமீ’’தி. ஏவம்…பே… ஏதத³வோச –

‘‘கதமோ ச, பி⁴க்க²வே, பாபோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி…பே… மிச்சா²ஞாணீ ஹோதி, மிச்சா²விமுத்தி ஹோதி. அயம் வுச்சதி, பி⁴க்க²வே, பாபோ.

‘‘கதமோ ச, பி⁴க்க²வே, பாபேன பாபதரோ? இத⁴, பி⁴க்க²வே, ஏகச்சோ அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி…பே… அத்தனா ச மிச்சா²ஞாணீ ஹோதி, பரஞ்ச மிச்சா²ஞாணே ஸமாத³பேதி; அத்தனா ச மிச்சா²விமுத்தி ஹோதி, பரஞ்ச மிச்சா²விமுத்தியா ஸமாத³பேதி. அயம் வுச்சதி, பி⁴க்க²வே, பாபேன பாபதரோ.

‘‘கதமோ ச, பி⁴க்க²வே, கல்யாணோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி …பே… ஸம்மாஞாணீ ஹோதி, ஸம்மாவிமுத்தி ஹோதி. அயம் வுச்சதி, பி⁴க்க²வே, கல்யாணோ.

‘‘கதமோ ச, பி⁴க்க²வே, கல்யாணேன கல்யாணதரோ? இத⁴, பி⁴க்க²வே, ஏகச்சோ அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி…பே… அத்தனா ச ஸம்மாஞாணீ ஹோதி, பரஞ்ச ஸம்மாஞாணே ஸமாத³பேதி; அத்தனா ச ஸம்மாவிமுத்தி ஹோதி, பரஞ்ச ஸம்மாவிமுத்தியா ஸமாத³பேதி. அயம் வுச்சதி, பி⁴க்க²வே, கல்யாணேன கல்யாணதரோ’’தி. அட்ட²மம்.

9. ததியபாபத⁴ம்மஸுத்தம்

209. ‘‘பாபத⁴ம்மஞ்ச வோ, பி⁴க்க²வே, தே³ஸேஸ்ஸாமி, பாபத⁴ம்மேன பாபத⁴ம்மதரஞ்ச; கல்யாணத⁴ம்மஞ்ச, கல்யாணத⁴ம்மேன கல்யாணத⁴ம்மதரஞ்ச. தம் ஸுணாத²…பே….

‘‘கதமோ ச, பி⁴க்க²வே, பாபத⁴ம்மோ? இத⁴, பி⁴க்க²வே, ஏகச்சோ பாணாதிபாதீ ஹோதி…பே… மிச்சா²தி³ட்டி²கோ ஹோதி. அயம் வுச்சதி, பி⁴க்க²வே, பாபத⁴ம்மோ.

‘‘கதமோ ச, பி⁴க்க²வே, பாபத⁴ம்மேன பாபத⁴ம்மதரோ? இத⁴ பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி…பே… அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி. அயம் வுச்சதி, பி⁴க்க²வே, பாபத⁴ம்மேன பாபத⁴ம்மதரோ.

‘‘கதமோ ச, பி⁴க்க²வே, கல்யாணத⁴ம்மோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி…பே… ஸம்மாதி³ட்டி²கோ ஹோதி. அயம் வுச்சதி, பி⁴க்க²வே, கல்யாணத⁴ம்மோ.

‘‘கதமோ ச, பி⁴க்க²வே, கல்யாணத⁴ம்மேன கல்யாணத⁴ம்மதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி…பே… அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி. அயம் வுச்சதி, பி⁴க்க²வே, கல்யாணத⁴ம்மேன கல்யாணத⁴ம்மதரோ’’தி. நவமம்.

10. சதுத்த²பாபத⁴ம்மஸுத்தம்

210. ‘‘பாபத⁴ம்மஞ்ச வோ, பி⁴க்க²வே, தே³ஸேஸ்ஸாமி, பாபத⁴ம்மேன பாபத⁴ம்மதரஞ்ச; கல்யாணத⁴ம்மஞ்ச, கல்யாணத⁴ம்மேன கல்யாணத⁴ம்மதரஞ்ச. தம் ஸுணாத²…பே….

‘‘கதமோ ச, பி⁴க்க²வே, பாபத⁴ம்மோ? இத⁴, பி⁴க்க²வே, ஏகச்சோ மிச்சா²தி³ட்டி²கோ ஹோதி…பே… மிச்சா²ஞாணீ ஹோதி, மிச்சா²விமுத்தி ஹோதி. அயம் வுச்சதி, பி⁴க்க²வே, பாபத⁴ம்மோ.

‘‘கதமோ ச, பி⁴க்க²வே, பாபத⁴ம்மேன பாபத⁴ம்மதரோ? இத⁴, பி⁴க்க²வே, ஏகச்சோ அத்தனா ச மிச்சா²தி³ட்டி²கோ ஹோதி, பரஞ்ச மிச்சா²தி³ட்டி²யா ஸமாத³பேதி…பே… அத்தனா ச மிச்சா²ஞாணீ ஹோதி, பரஞ்ச மிச்சா²ஞாணே ஸமாத³பேதி; அத்தனா ச மிச்சா²விமுத்தி ஹோதி, பரஞ்ச மிச்சா²விமுத்தியா ஸமாத³பேதி. அயம் வுச்சதி, பி⁴க்க²வே, பாபத⁴ம்மேன பாபத⁴ம்மதரோ.

‘‘கதமோ ச, பி⁴க்க²வே, கல்யாணத⁴ம்மோ? இத⁴, பி⁴க்க²வே, ஏகச்சோ ஸம்மாதி³ட்டி²கோ ஹோதி…பே… ஸம்மாஞாணீ ஹோதி, ஸம்மாவிமுத்தி ஹோதி. அயம் வுச்சதி, பி⁴க்க²வே, கல்யாணத⁴ம்மோ.

‘‘கதமோ ச, பி⁴க்க²வே, கல்யாணத⁴ம்மேன கல்யாணத⁴ம்மதரோ? இத⁴, பி⁴க்க²வே, ஏகச்சோ அத்தனா ச ஸம்மாதி³ட்டி²கோ ஹோதி, பரஞ்ச ஸம்மாதி³ட்டி²யா ஸமாத³பேதி…பே… அத்தனா ச ஸம்மாஞாணீ ஹோதி, பரஞ்ச ஸம்மாஞாணே ஸமாத³பேதி; அத்தனா ச ஸம்மாவிமுத்தி ஹோதி, பரஞ்ச ஸம்மாவிமுத்தியா ஸமாத³பேதி. அயம் வுச்சதி, பி⁴க்க²வே, கல்யாணத⁴ம்மேன கல்யாணத⁴ம்மதரோ’’தி. த³ஸமம்.

ஸப்புரிஸவக்³கோ³ பட²மோ.

தஸ்ஸுத்³தா³னம் –

ஸிக்கா²பத³ஞ்ச அஸ்ஸத்³த⁴ம், ஸத்தகம்மம் அதோ² ச த³ஸகம்மம்;

அட்ட²ங்கி³கஞ்ச த³ஸமக்³க³ம், த்³வே பாபத⁴ம்மா அபரே த்³வேதி.

(22) 2. பரிஸாவக்³கோ³

1. பரிஸாஸுத்தம்

211. ‘‘சத்தாரோமே, பி⁴க்க²வே, பரிஸதூ³ஸனா. கதமே சத்தாரோ? பி⁴க்கு², பி⁴க்க²வே [இத⁴ பி⁴க்க²வே பி⁴க்கு² (பீ. க.)], து³ஸ்ஸீலோ பாபத⁴ம்மோ பரிஸதூ³ஸனோ; பி⁴க்கு²னீ, பி⁴க்க²வே, து³ஸ்ஸீலா பாபத⁴ம்மா பரிஸதூ³ஸனா; உபாஸகோ, பி⁴க்க²வே, து³ஸ்ஸீலோ பாபத⁴ம்மோ பரிஸதூ³ஸனோ; உபாஸிகா, பி⁴க்க²வே, து³ஸ்ஸீலா பாபத⁴ம்மா பரிஸதூ³ஸனா. இமே கோ², பி⁴க்க²வே, சத்தாரோ பரிஸதூ³ஸனா.

‘‘சத்தாரோமே, பி⁴க்க²வே, பரிஸஸோப⁴னா. கதமே சத்தாரோ? பி⁴க்கு², பி⁴க்க²வே, ஸீலவா கல்யாணத⁴ம்மோ பரிஸஸோப⁴னோ; பி⁴க்கு²னீ, பி⁴க்க²வே, ஸீலவதீ கல்யாணத⁴ம்மா பரிஸஸோப⁴னா; உபாஸகோ, பி⁴க்க²வே, ஸீலவா கல்யாணத⁴ம்மோ பரிஸஸோப⁴னோ; உபாஸிகா, பி⁴க்க²வே, ஸீலவதீ கல்யாணத⁴ம்மா பரிஸஸோப⁴னா. இமே கோ², பி⁴க்க²வே, சத்தாரோ பரிஸஸோப⁴னா’’தி. பட²மம்.

2. தி³ட்டி²ஸுத்தம்

212. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? காயது³ச்சரிதேன, வசீது³ச்சரிதேன, மனோது³ச்சரிதேன, மிச்சா²தி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? காயஸுசரிதேன, வசீஸுசரிதேன, மனோஸுசரிதேன, ஸம்மாதி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. து³தியம்.

3. அகதஞ்ஞுதாஸுத்தம்

213. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? காயது³ச்சரிதேன, வசீது³ச்சரிதேன, மனோது³ச்சரிதேன, அகதஞ்ஞுதா அகதவேதி³தா [அகதஞ்ஞுதாஅகதவேதி³தாய (ஸீ.)] – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? காயஸுசரிதேன, வசீஸுசரிதேன, மனோஸுசரிதேன, கதஞ்ஞுதாகதவேதி³தா [கதஞ்ஞுதாகதவேதி³தாய (ஸீ.)] – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. ததியம்.

4. பாணாதிபாதீஸுத்தம்

214. …பே… பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி…பே… பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி. சதுத்த²ம்.

5. பட²மமக்³க³ஸுத்தம்

215. …பே… மிச்சா²தி³ட்டி²கோ ஹோதி, மிச்சா²ஸங்கப்போ ஹோதி, மிச்சா²வாசோ ஹோதி, மிச்சா²கம்மந்தோ ஹோதி…பே… ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி. பஞ்சமம்.

6. து³தியமக்³க³ஸுத்தம்

216. …பே… மிச்சா²ஆஜீவோ ஹோதி, மிச்சா²வாயாமோ ஹோதி, மிச்சா²ஸதி ஹோதி, மிச்சா²ஸமாதி⁴ ஹோதி…பே… ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி. ச²ட்ட²ம்.

7. பட²மவோஹாரபத²ஸுத்தம்

217. …பே… அதி³ட்டே² தி³ட்ட²வாதீ³ ஹோதி, அஸுதே ஸுதவாதீ³ ஹோதி, அமுதே முதவாதீ³ ஹோதி, அவிஞ்ஞாதே விஞ்ஞாதவாதீ³ ஹோதி…பே… அதி³ட்டே² அதி³ட்ட²வாதீ³ ஹோதி, அஸுதே அஸுதவாதீ³ ஹோதி, அமுதே அமுதவாதீ³ ஹோதி, அவிஞ்ஞாதே அவிஞ்ஞாதவாதீ³ ஹோதி. ஸத்தமம்.

8. து³தியவோஹாரபத²ஸுத்தம்

218. …பே… தி³ட்டே² அதி³ட்ட²வாதீ³ ஹோதி, ஸுதே அஸுதவாதீ³ ஹோதி, முதே அமுதவாதீ³ ஹோதி, விஞ்ஞாதே அவிஞ்ஞாதவாதீ³ ஹோதி…பே… தி³ட்டே² தி³ட்ட²வாதீ³ ஹோதி, ஸுதே ஸுதவாதீ³ ஹோதி, முதே முதவாதீ³ ஹோதி, விஞ்ஞாதே விஞ்ஞாதவாதீ³ ஹோதி. அட்ட²மம்.

9. அஹிரிகஸுத்தம்

219. …பே… அஸ்ஸத்³தோ⁴ ஹோதி, து³ஸ்ஸீலோ ஹோதி, அஹிரிகோ ஹோதி, அனோத்தப்பீ ஹோதி…பே… ஸத்³தோ⁴ ஹோதி, ஸீலவா ஹோதி, ஹிரிமா ஹோதி, ஓத்தப்பீ ஹோதி. நவமம்.

10. து³ஸ்ஸீலஸுத்தம்

220. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே. கதமேஹி சதூஹி? அஸ்ஸத்³தோ⁴ ஹோதி, து³ஸ்ஸீலோ ஹோதி, குஸீதோ ஹோதி, து³ப்பஞ்ஞோ ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் நிரயே.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³. கதமேஹி சதூஹி? ஸத்³தோ⁴ ஹோதி, ஸீலவா ஹோதி, ஆரத்³த⁴வீரியோ ஹோதி, பஞ்ஞவா ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ யதா²ப⁴தம் நிக்கி²த்தோ ஏவம் ஸக்³கே³’’தி. த³ஸமம்.

பரிஸாவக்³கோ³ [ஸோப⁴னவக்³கோ³ (ஸீ. ஸ்யா. கம். பீ.)] து³தியோ.

தஸ்ஸுத்³தா³னம் –

பரிஸா தி³ட்டி² அகதஞ்ஞுதா, பாணாதிபாதாபி த்³வே மக்³கா³;

த்³வே வோஹாரபதா² வுத்தா, அஹிரிகம் து³ப்பஞ்ஞேன சாதி.

(23) 3. து³ச்சரிதவக்³கோ³

1. து³ச்சரிதஸுத்தம்

221. ‘‘சத்தாரிமானி, பி⁴க்க²வே, வசீது³ச்சரிதானி. கதமானி சத்தாரி? முஸாவாதோ³, பிஸுணா வாசா, ப²ருஸா வாசா, ஸம்ப²ப்பலாபோ – இமானி கோ², பி⁴க்க²வே, சத்தாரி வசீது³ச்சரிதானி. சத்தாரிமானி, பி⁴க்க²வே, வசீஸுசரிதானி. கதமானி சத்தாரி? ஸச்சவாசா, அபிஸுணா வாசா, ஸண்ஹா வாசா, மந்தவாசா [மந்தா வாசா (ஸீ. ஸ்யா. கம். பீ.)] – இமானி கோ², பி⁴க்க²வே, சத்தாரி வசீஸுசரிதானீ’’தி. பட²மம்.

2. தி³ட்டி²ஸுத்தம்

222. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம்; ப³ஹுஞ்ச அபுஞ்ஞம் பஸவதி. கதமேஹி சதூஹி? காயது³ச்சரிதேன, வசீது³ச்சரிதேன, மனோது³ச்சரிதேன, மிச்சா²தி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ விஞ்ஞூனம், ப³ஹுஞ்ச புஞ்ஞம் பஸவதி. கதமேஹி சதூஹி? காயஸுசரிதேன, வசீஸுசரிதேன, மனோஸுசரிதேன, ஸம்மாதி³ட்டி²யா – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ விஞ்ஞூனம்; ப³ஹுஞ்ச புஞ்ஞம் பஸவதீ’’தி. து³தியம்.

3. அகதஞ்ஞுதாஸுத்தம்

223. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ விஞ்ஞூனம், ப³ஹுஞ்ச அபுஞ்ஞம் பஸவதி. கதமேஹி சதூஹி? காயது³ச்சரிதேன, வசீது³ச்சரிதேன, மனோது³ச்சரிதேன, அகதஞ்ஞுதா அகதவேதி³தா – இமேஹி…பே… பண்டி³தோ… காயஸுசரிதேன, வசீஸுசரிதேன, மனோஸுசரிதேன கதஞ்ஞுதாகதவேதி³தா…பே…. ததியம்.

4. பாணாதிபாதீஸுத்தம்

224. … பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி…பே… பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி…பே…. சதுத்த²ம்.

5. பட²மமக்³க³ஸுத்தம்

225. … மிச்சா²தி³ட்டி²கோ ஹோதி, மிச்சா²ஸங்கப்போ ஹோதி, மிச்சா²வாசோ ஹோதி, மிச்சா²கம்மந்தோ ஹோதி…பே… ஸம்மாதி³ட்டி²கோ ஹோதி, ஸம்மாஸங்கப்போ ஹோதி, ஸம்மாவாசோ ஹோதி, ஸம்மாகம்மந்தோ ஹோதி…பே…. பஞ்சமம்.

6. து³தியமக்³க³ஸுத்தம்

226. … மிச்சா²ஆஜீவோ ஹோதி, மிச்சா²வாயாமோ ஹோதி, மிச்சா²ஸதி ஹோதி, மிச்சா²ஸமாதி⁴ ஹோதி…பே… ஸம்மாஆஜீவோ ஹோதி, ஸம்மாவாயாமோ ஹோதி, ஸம்மாஸதி ஹோதி, ஸம்மாஸமாதி⁴ ஹோதி…பே…. ச²ட்ட²ம்.

7. பட²மவோஹாரபத²ஸுத்தம்

227. … அதி³ட்டே² தி³ட்ட²வாதீ³ ஹோதி, அஸுதே ஸுதவாதீ³ ஹோதி, அமுதே முதவாதீ³ ஹோதி, அவிஞ்ஞாதே விஞ்ஞாதவாதீ³ ஹோதி…பே… அதி³ட்டே² அதி³ட்ட²வாதீ³ ஹோதி, அஸுதே அஸுதவாதீ³ ஹோதி, அமுதே அமுதவாதீ³ ஹோதி, அவிஞ்ஞாதே அவிஞ்ஞாதவாதீ³ ஹோதி…பே…. ஸத்தமம்.

8. து³தியவோஹாரபத²ஸுத்தம்

228. … தி³ட்டே² அதி³ட்ட²வாதீ³ ஹோதி, ஸுதே அஸுதவாதீ³ ஹோதி, முதே அமுதவாதீ³ ஹோதி, விஞ்ஞாதே அவிஞ்ஞாதவாதீ³ ஹோதி…பே… தி³ட்டே² தி³ட்ட²வாதீ³ ஹோதி, ஸுதே ஸுதவாதீ³ ஹோதி, முதே முதவாதீ³ ஹோதி, விஞ்ஞாதே விஞ்ஞாதவாதீ³ ஹோதி…பே…. அட்ட²மம்.

9. அஹிரிகஸுத்தம்

229. … அஸ்ஸத்³தோ⁴ ஹோதி, து³ஸ்ஸீலோ ஹோதி, அஹிரிகோ ஹோதி, அனோத்தப்பீ ஹோதி…பே… ஸத்³தோ⁴ ஹோதி, ஸீலவா ஹோதி, ஹிரிமா ஹோதி, ஓத்தப்பீ ஹோதி…பே…. நவமம்.

10. து³ப்பஞ்ஞஸுத்தம்

230. … அஸ்ஸத்³தோ⁴ ஹோதி, து³ஸ்ஸீலோ ஹோதி, குஸீதோ ஹோதி, து³ப்பஞ்ஞோ ஹோதி…பே… ஸத்³தோ⁴ ஹோதி, ஸீலவா ஹோதி, ஆரத்³த⁴வீரியோ ஹோதி, பஞ்ஞவா ஹோதி – இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ விஞ்ஞூனம், ப³ஹுஞ்ச புஞ்ஞம் பஸவதீ’’தி. த³ஸமம்.

11. கவிஸுத்தம்

231. ‘‘சத்தாரோமே, பி⁴க்க²வே, கவீ. கதமே சத்தாரோ? சிந்தாகவி, ஸுதகவி, அத்த²கவி, படிபா⁴னகவி – இமே கோ², பி⁴க்க²வே, சத்தாரோ கவீ’’தி. ஏகாத³ஸமம்.

து³ச்சரிதவக்³கோ³ ததியோ.

தஸ்ஸுத்³தா³னம் –

து³ச்சரிதம் தி³ட்டி² அகதஞ்ஞூ ச, பாணாதிபாதாபி த்³வே மக்³கா³;

த்³வே வோஹாரபதா² வுத்தா, அஹிரிகம் து³ப்பஞ்ஞகவினா சாதி.

(24) 4. கம்மவக்³கோ³

1. ஸம்கி²த்தஸுத்தம்

232. ‘‘சத்தாரிமானி, பி⁴க்க²வே, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², பி⁴க்க²வே, கம்மம் கண்ஹம் கண்ஹவிபாகம்; அத்தி², பி⁴க்க²வே, கம்மம் ஸுக்கம் ஸுக்கவிபாகம்; அத்தி², பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்; அத்தி², பி⁴க்க²வே, கம்மம் அகண்ஹஅஸுக்கம் [அகண்ஹம் அஸுக்கம் (ஸீ. ஸ்யா. பீ.) (தீ³. நி. 3.312; ம. நி. 2.81)] அகண்ஹஅஸுக்கவிபாகம் கம்மக்க²யாய ஸம்வத்ததி. இமானி கோ², பி⁴க்க²வே, சத்தாரி கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானீ’’தி. பட²மம்.

2. வித்தா²ரஸுத்தம்

233. ‘‘சத்தாரிமானி, பி⁴க்க²வே, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², பி⁴க்க²வே, கம்மம் கண்ஹம் கண்ஹவிபாகம்; அத்தி², பி⁴க்க²வே, கம்மம் ஸுக்கம் ஸுக்கவிபாகம்; அத்தி², பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்; அத்தி², பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி.

‘‘கதமஞ்ச, பி⁴க்க²வே, கம்மம் கண்ஹம் கண்ஹவிபாகம்? இத⁴, பி⁴க்க²வே, ஏகச்சோ ஸப்³யாப³ஜ்ஜ²ம் [ஸப்³யாபஜ்ஜ²ம் (ஸப்³ப³த்த²)] காயஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம் வசீஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம் மனோஸங்கா²ரம் அபி⁴ஸங்க²ரோதி. ஸோ ஸப்³யாப³ஜ்ஜ²ம் காயஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம் வசீஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம் மனோஸங்கா²ரம் அபி⁴ஸங்க²ரித்வா ஸப்³யாப³ஜ்ஜ²ம் லோகம் உபபஜ்ஜதி. தமேனம் ஸப்³யாப³ஜ்ஜ²ம் லோகம் உபபன்னம் ஸமானம் ஸப்³யாப³ஜ்ஜா² ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம் வேத³னம் வேதி³யதி [வேத³யதி (க.) அ. நி. 6.63] ஏகந்தது³க்க²ம், ஸேய்யதா²பி ஸத்தா நேரயிகா. இத³ம் வுச்சதி, பி⁴க்க²வே, கம்மம் கண்ஹம் கண்ஹவிபாகம்.

‘‘கதமஞ்ச, பி⁴க்க²வே, கம்மம் ஸுக்கம் ஸுக்கவிபாகம்? இத⁴, பி⁴க்க²வே, ஏகச்சோ அப்³யாப³ஜ்ஜ²ம் காயஸங்கா²ரம் அபி⁴ஸங்க²ரோதி, அப்³யாப³ஜ்ஜ²ம் வசீஸங்கா²ரம் அபி⁴ஸங்க²ரோதி, அப்³யாப³ஜ்ஜ²ம் மனோஸங்கா²ரம் அபி⁴ஸங்க²ரோதி. ஸோ அப்³யாப³ஜ்ஜ²ம் காயஸங்கா²ரம் அபி⁴ஸங்க²ரித்வா, அப்³யாப³ஜ்ஜ²ம் வசீஸங்கா²ரம் அபி⁴ஸங்க²ரித்வா, அப்³யாப³ஜ்ஜ²ம் மனோஸங்கா²ரம் அபி⁴ஸங்க²ரித்வா அப்³யாப³ஜ்ஜ²ம் லோகம் உபபஜ்ஜதி. தமேனம் அப்³யாப³ஜ்ஜ²ம் லோகம் உபபன்னம் ஸமானம் அப்³யாப³ஜ்ஜா² ப²ஸ்ஸா பு²ஸந்தி. ஸோ அப்³யாப³ஜ்ஜே²ஹி ப²ஸ்ஸேஹி பு²ட்டோ² ஸமானோ அப்³யாப³ஜ்ஜ²ம் வேத³னம் வேதி³யதி ஏகந்தஸுக²ம், ஸேய்யதா²பி தே³வா ஸுப⁴கிண்ஹா. இத³ம் வுச்சதி, பி⁴க்க²வே, கம்மம் ஸுக்கம் ஸுக்கவிபாகம்.

‘‘கதமஞ்ச, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்? இத⁴, பி⁴க்க²வே, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி மனோஸங்கா²ரம் அபி⁴ஸங்க²ரோதி. ஸோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி மனோஸங்கா²ரம் அபி⁴ஸங்க²ரித்வா ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபஜ்ஜதி. தமேனம் ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபன்னம் ஸமானம் ஸப்³யாப³ஜ்ஜா²பி அப்³யாப³ஜ்ஜா²பி ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹிபி அப்³யாப³ஜ்ஜே²ஹிபி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி வேத³னம் வேதி³யதி வோகிண்ணஸுக²து³க்க²ம், ஸேய்யதா²பி மனுஸ்ஸா ஏகச்சே ச தே³வா ஏகச்சே ச வினிபாதிகா. இத³ம் வுச்சதி, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்.

‘‘கதமஞ்ச, பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி? தத்ர, பி⁴க்க²வே, யமித³ம் கம்மம் கண்ஹம் கண்ஹவிபாகம் தஸ்ஸ பஹானாய யா சேதனா, யமித³ம் [யம்பித³ம் (ஸீ. ஸ்யா. கம். பீ.)] கம்மம் ஸுக்கம் ஸுக்கவிபாகம் தஸ்ஸ பஹானாய யா சேதனா, யமித³ம் [யம்பித³ம் (ஸீ. ஸ்யா. கம். பீ.)] கம்மம் கண்ஹஸுக்கம் கண்ஹஸுக்கவிபாகம் தஸ்ஸ பஹானாய யா சேதனா – இத³ம் வுச்சதி, பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி. இமானி கோ², பி⁴க்க²வே, சத்தாரி கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானீ’’தி. து³தியம்.

3. ஸோணகாயனஸுத்தம்

234. அத² கோ² ஸிகா²மோக்³க³ல்லானோ ப்³ராஹ்மணோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஸிகா²மோக்³க³ல்லானோ ப்³ராஹ்மணோ ப⁴க³வந்தம் ஏதத³வோச –

‘‘புரிமானி, போ⁴ கோ³தம, தி³வஸானி புரிமதரானி ஸோணகாயனோ மாணவோ யேனாஹம் தேனுபஸங்கமி; உபஸங்கமித்வா மம் ஏதத³வோச – ‘ஸமணோ கோ³தமோ ஸப்³ப³கம்மானம் அகிரியம் பஞ்ஞபேதி, ஸப்³ப³கம்மானம் கோ² பன அகிரியம் பஞ்ஞபேந்தோ உச்சே²த³ம் ஆஹ லோகஸ்ஸ – கம்மஸச்சாயம் [கம்மஸச்சாயீ (க.)], போ⁴, லோகோ கம்மஸமாரம்ப⁴ட்டா²யீ’’’தி.

‘‘த³ஸ்ஸனம்பி கோ² அஹம், ப்³ராஹ்மண, ஸோணகாயனஸ்ஸ மாணவஸ்ஸ நாபி⁴ஜானாமி; குதோ பனேவரூபோ கதா²ஸல்லாபோ! சத்தாரிமானி, ப்³ராஹ்மண, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², ப்³ராஹ்மண, கம்மம் கண்ஹம் கண்ஹவிபாகம்; அத்தி², ப்³ராஹ்மண, கம்மம் ஸுக்கம் ஸுக்கவிபாகம்; அத்தி², ப்³ராஹ்மண, கம்மம் கண்ஹஸுக்கம் கண்ஹஸுக்கவிபாகம்; அத்தி², ப்³ராஹ்மண, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி.

‘‘கதமஞ்ச, ப்³ராஹ்மண, கம்மம் கண்ஹம் கண்ஹவிபாகம்? இத⁴, ப்³ராஹ்மண, ஏகச்சோ ஸப்³யாப³ஜ்ஜ²ம் காயஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம் வசீஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம் மனோஸங்கா²ரம் அபி⁴ஸங்க²ரோதி. ஸோ ஸப்³யாப³ஜ்ஜ²ம் காயஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம் வசீஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம் மனோஸங்கா²ரம் அபி⁴ஸங்க²ரித்வா ஸப்³யாப³ஜ்ஜ²ம் லோகம் உபபஜ்ஜதி. தமேனம் ஸப்³யாப³ஜ்ஜ²ம் லோகம் உபபன்னம் ஸமானம் ஸப்³யாப³ஜ்ஜா² ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம் வேத³னம் வேதி³யதி ஏகந்தது³க்க²ம், ஸேய்யதா²பி ஸத்தா நேரயிகா. இத³ம் வுச்சதி, ப்³ராஹ்மண, கம்மம் கண்ஹம் கண்ஹவிபாகம்.

‘‘கதமஞ்ச, ப்³ராஹ்மண, கம்மம் ஸுக்கம் ஸுக்கவிபாகம்? இத⁴, ப்³ராஹ்மண, ஏகச்சோ அப்³யாப³ஜ்ஜ²ம் காயஸங்கா²ரம் அபி⁴ஸங்க²ரோதி, அப்³யாப³ஜ்ஜ²ம் வசீஸங்கா²ரம் அபி⁴ஸங்க²ரோதி, அப்³யாப³ஜ்ஜ²ம் மனோஸங்கா²ரம் அபி⁴ஸங்க²ரோதி. ஸோ அப்³யாப³ஜ்ஜ²ம் காயஸங்கா²ரம் அபி⁴ஸங்க²ரித்வா, அப்³யாப³ஜ்ஜ²ம் வசீஸங்கா²ரம் அபி⁴ஸங்க²ரித்வா, அப்³யாப³ஜ்ஜ²ம் மனோஸங்கா²ரம் அபி⁴ஸங்க²ரித்வா அப்³யாப³ஜ்ஜ²ம் லோகம் உபபஜ்ஜதி. தமேனம் அப்³யாப³ஜ்ஜ²ம் லோகம் உபபன்னம் ஸமானம் அப்³யாப³ஜ்ஜா² ப²ஸ்ஸா பு²ஸந்தி. ஸோ அப்³யாப³ஜ்ஜே²ஹி ப²ஸ்ஸேஹி பு²ட்டோ² ஸமானோ அப்³யாப³ஜ்ஜ²ம் வேத³னம் வேதி³யதி ஏகந்தஸுக²ம், ஸேய்யதா²பி தே³வா ஸுப⁴கிண்ஹா. இத³ம் வுச்சதி, ப்³ராஹ்மண, கம்மம் ஸுக்கம் ஸுக்கவிபாகம்.

‘‘கதமஞ்ச, ப்³ராஹ்மண, கம்மம் கண்ஹஸுக்கம் கண்ஹஸுக்கவிபாகம்? இத⁴, ப்³ராஹ்மண, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம் அபி⁴ஸங்க²ரோதி, ஸப்³யாப³ஜ்ஜ²ம்பி அப்³யாப³ஜ்ஜ²ம்பி மனோஸங்கா²ரம் அபி⁴ஸங்க²ரோதி. ஸோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி வசீஸங்கா²ரம் அபி⁴ஸங்க²ரித்வா, ஸப்³யாப³ஜ்ஜ²ம்பி அப்³யாப³ஜ்ஜ²ம்பி மனோஸங்கா²ரம் அபி⁴ஸங்க²ரித்வா ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபஜ்ஜதி. தமேனம் ஸப்³யாப³ஜ்ஜ²ம்பி அப்³யாப³ஜ்ஜ²ம்பி லோகம் உபபன்னம் ஸமானம் ஸப்³யாப³ஜ்ஜா²பி அப்³யாப³ஜ்ஜா²பி ப²ஸ்ஸா பு²ஸந்தி. ஸோ ஸப்³யாப³ஜ்ஜே²ஹிபி அப்³யாப³ஜ்ஜே²ஹிபி ப²ஸ்ஸேஹி பு²ட்டோ² ஸமானோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி வேத³னம் வேதி³யதி வோகிண்ணஸுக²து³க்க²ம், ஸேய்யதா²பி மனுஸ்ஸா ஏகச்சே ச தே³வா ஏகச்சே ச வினிபாதிகா. இத³ம் வுச்சதி, ப்³ராஹ்மண, கம்மம் கண்ஹஸுக்கம் கண்ஹஸுக்கவிபாகம்.

‘‘கதமஞ்ச, ப்³ராஹ்மண, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி? தத்ர, ப்³ராஹ்மண, யமித³ம் கம்மம் கண்ஹம் கண்ஹவிபாகம் தஸ்ஸ பஹானாய யா சேதனா, யமித³ம் கம்மம் ஸுக்கம் ஸுக்கவிபாகம் தஸ்ஸ பஹானாய யா சேதனா, யமித³ம் கம்மம் கண்ஹஸுக்கம் கண்ஹஸுக்கவிபாகம் தஸ்ஸ பஹானாய யா சேதனா – இத³ம் வுச்சதி, ப்³ராஹ்மண, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி. இமானி கோ², ப்³ராஹ்மண, சத்தாரி கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானீ’’தி. ததியம்.

4. பட²மஸிக்கா²பத³ஸுத்தம்

235. ‘‘சத்தாரிமானி, பி⁴க்க²வே, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², பி⁴க்க²வே, கம்மம் கண்ஹம் கண்ஹவிபாகம்; அத்தி², பி⁴க்க²வே, கம்மம் ஸுக்கம் ஸுக்கவிபாகம்; அத்தி², பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்; அத்தி², பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி. கதமஞ்ச, பி⁴க்க²வே, கம்மம் கண்ஹம் கண்ஹவிபாகம்? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. இத³ம் வுச்சதி, பி⁴க்க²வே, கம்மம் கண்ஹம் கண்ஹவிபாகம்.

‘‘கதமஞ்ச, பி⁴க்க²வே, கம்மம் ஸுக்கம் ஸுக்கவிபாகம்? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. இத³ம் வுச்சதி, பி⁴க்க²வே, கம்மம் ஸுக்கம் ஸுக்கவிபாகம்.

‘‘கதமஞ்ச, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்? இத⁴, பி⁴க்க²வே, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரோதி…பே… இத³ம் வுச்சதி, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்.

‘‘கதமஞ்ச, பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி? தத்ர, பி⁴க்க²வே, யமித³ம் கம்மம் கண்ஹம் கண்ஹவிபாகம்…பே… இத³ம் வுச்சதி, பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி. இமானி கோ², பி⁴க்க²வே, சத்தாரி கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானீ’’தி. சதுத்த²ம்.

5. து³தியஸிக்கா²பத³ஸுத்தம்

236. ‘‘சத்தாரிமானி, பி⁴க்க²வே, கம்மானி மயா ஸயம் அபி⁴ஞ்ஞா ஸச்சி²கத்வா பவேதி³தானி. கதமானி சத்தாரி? அத்தி², பி⁴க்க²வே, கம்மம் கண்ஹம் கண்ஹவிபாகம்; அத்தி², பி⁴க்க²வே, கம்மம் ஸுக்கம் ஸுக்கவிபாகம்; அத்தி², பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்; அத்தி², பி⁴க்க²வே, கம்மம் அகண்ஹஅஸுக்கம் அகண்ஹஅஸுக்கவிபாகம் கம்மக்க²யாய ஸம்வத்ததி.

‘‘கதமஞ்ச, பி⁴க்க²வே, கம்மம் கண்ஹம் கண்ஹவிபாகம்? இத⁴, பி⁴க்க²வே, ஏகச்சேன மாதா [ஏகச்சோ மாதரம் (க.)] ஜீவிதா வோரோபிதா ஹோதி, பிதா [பிதரம் (க.)] ஜீவிதா வோரோபிதோ [வோரோபிதா (க.)] ஹோதி, அரஹம் [அரஹந்தம் (க.)] ஜீவிதா வோரோபிதோ [வோரோபிதா (க.)] ஹோதி, ததா²க³தஸ்ஸ து³ட்டே²ன சித்தேன லோஹிதம் உப்பாதி³தம் [உப்பாதி³தா (க.)] ஹோதி, ஸங்கோ⁴ பி⁴ன்னோ ஹோதி. இத³ம் வுச்சதி, பி⁴க்க²வே, கம்மம் கண்ஹம் கண்ஹவிபாகம்.

‘‘கதமஞ்ச, பி⁴க்க²வே, கம்மம் ஸுக்கம் ஸுக்கவிபாகம்? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, பிஸுணாய வாசாய படிவிரதோ ஹோதி, ப²ருஸாய வாசாய படிவிரதோ ஹோதி, ஸம்ப²ப்பலாபா படிவிரதோ ஹோதி, அனபி⁴ஜ்ஜா²லு ஹோதி, அப்³யாபன்னசித்தோ ஹோதி, ஸம்மாதி³ட்டி² [ஸம்மாதி³ட்டி²கோ (ஸீ. ஸ்யா. கம்.)] ஹோதி. இத³ம் வுச்சதி, பி⁴க்க²வே, கம்மம் ஸுக்கம் ஸுக்கவிபாகம்.

‘‘கதமஞ்ச, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்? இத⁴, பி⁴க்க²வே, ஏகச்சோ ஸப்³யாப³ஜ்ஜ²ம்பி அப்³யாப³ஜ்ஜ²ம்பி காயஸங்கா²ரம் அபி⁴ஸங்க²ரோதி…பே… இத³ம் வுச்சதி, பி⁴க்க²வே, கம்மம் கண்ஹஸுக்கம் கண்ஹஸுக்கவிபாகம்.