1. ஸிக்கா²பத³ஸுத்தம்

201. ‘‘அஸப்புரிஸஞ்ச வோ, பி⁴க்க²வே, தே³ஸேஸ்ஸாமி, அஸப்புரிஸேன அஸப்புரிஸதரஞ்ச; ஸப்புரிஸஞ்ச, ஸப்புரிஸேன ஸப்புரிஸதரஞ்ச. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘கதமோ ச, பி⁴க்க²வே, அஸப்புரிஸோ? இத⁴, பி⁴க்க²வே, ஏகச்சோ பாணாதிபாதீ ஹோதி, அதி³ன்னாதா³யீ ஹோதி, காமேஸுமிச்சா²சாரீ ஹோதி, முஸாவாதீ³ ஹோதி, ஸுராமேரயமஜ்ஜபமாத³ட்டா²யீ ஹோதி. அயம் வுச்சதி, பி⁴க்க²வே, அஸப்புரிஸோ.

‘‘கதமோ ச, பி⁴க்க²வே, அஸப்புரிஸேன அஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதீ ஹோதி, பரஞ்ச பாணாதிபாதே ஸமாத³பேதி; அத்தனா ச அதி³ன்னாதா³யீ ஹோதி, பரஞ்ச அதி³ன்னாதா³னே ஸமாத³பேதி; அத்தனா ச காமேஸுமிச்சா²சாரீ ஹோதி, பரஞ்ச காமேஸுமிச்சா²சாரே ஸமாத³பேதி; அத்தனா ச முஸாவாதீ³ ஹோதி, பரஞ்ச முஸாவாதே³ ஸமாத³பேதி; அத்தனா ச ஸுராமேரயமஜ்ஜபமாத³ட்டா²யீ ஹோதி, பரஞ்ச ஸுராமேரயமஜ்ஜபமாத³ட்டா²னே ஸமாத³பேதி. அயம் வுச்சதி, பி⁴க்க²வே, அஸப்புரிஸேன அஸப்புரிஸதரோ.

‘‘கதமோ ச, பி⁴க்க²வே, ஸப்புரிஸோ? இத⁴, பி⁴க்க²வே, ஏகச்சோ பாணாதிபாதா படிவிரதோ ஹோதி, அதி³ன்னாதா³னா படிவிரதோ ஹோதி, காமேஸுமிச்சா²சாரா படிவிரதோ ஹோதி, முஸாவாதா³ படிவிரதோ ஹோதி, ஸுராமேரயமஜ்ஜபமாத³ட்டா²னா படிவிரதோ ஹோதி. அயம் வுச்சதி, பி⁴க்க²வே, ஸப்புரிஸோ.

‘‘கதமோ ச, பி⁴க்க²வே, ஸப்புரிஸேன ஸப்புரிஸதரோ? இத⁴, பி⁴க்க²வே, ஏகச்சோ அத்தனா ச பாணாதிபாதா படிவிரதோ ஹோதி, பரஞ்ச பாணாதிபாதா வேரமணியா ஸமாத³பேதி; அத்தனா ச அதி³ன்னாதா³னா படிவிரதோ ஹோதி, பரஞ்ச அதி³ன்னாதா³னா வேரமணியா ஸமாத³பேதி; அத்தனா ச காமேஸுமிச்சா²சாரா படிவிரதோ ஹோதி, பரஞ்ச காமேஸுமிச்சா²சாரா வேரமணியா ஸமாத³பேதி; அத்தனா ச முஸாவாதா³ படிவிரதோ ஹோதி, பரஞ்ச முஸாவாதா³ வேரமணியா ஸமாத³பேதி; அத்தனா ச ஸுராமேரயமஜ்ஜபமாத³ட்டா²னா படிவிரதோ ஹோதி, பரஞ்ச ஸுராமேரயமஜ்ஜபமாத³ட்டா²னா வேரமணியா ஸமாத³பேதி. அயம் வுச்சதி, பி⁴க்க²வே, ஸப்புரிஸேன ஸப்புரிஸதரோ’’தி [பு. ப. 135]. பட²மம்.