8. அத்தந்தபஸுத்தம்

198. ‘‘சத்தாரோமே, பி⁴க்க²வே, புக்³க³லா ஸந்தோ ஸம்விஜ்ஜமானா லோகஸ்மிம். கதமே சத்தாரோ? இத⁴, பி⁴க்க²வே, ஏகச்சோ [பு. ப. 174; ம. நி. 2.7; தீ³. நி. 3.314; அ. நி. 3.157-163] புக்³க³லோ அத்தந்தபோ ஹோதி அத்தபரிதாபனானுயோக³மனுயுத்தோ. இத⁴ பன, பி⁴க்க²வே, ஏகச்சோ புக்³க³லோ பரந்தபோ ஹோதி பரபரிதாபனானுயோக³மனுயுத்தோ. இத⁴ பன, பி⁴க்க²வே, ஏகச்சோ புக்³க³லோ அத்தந்தபோ ச ஹோதி அத்தபரிதாபனானுயோக³மனுயுத்தோ, பரந்தபோ ச பரபரிதாபனானுயோக³மனுயுத்தோ. இத⁴ பன, பி⁴க்க²வே, ஏகச்சோ புக்³க³லோ நேவத்தந்தபோ ஹோதி நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ. ஸோ நேவ அத்தந்தபோ ந பரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸம்வேதீ³ ப்³ரஹ்மபூ⁴தேன அத்தனா விஹரதி.

‘‘கத²ஞ்ச, பி⁴க்க²வே, புக்³க³லோ அத்தந்தபோ ஹோதி அத்தபரிதாபனானுயோக³மனுயுத்தோ? இத⁴, பி⁴க்க²வே, ஏகச்சோ அசேலகோ ஹோதி முத்தாசாரோ ஹத்தா²பலேக²னோ நஏஹிப⁴த்³த³ந்திகோ நதிட்ட²ப⁴த்³த³ந்திகோ நாபி⁴ஹடம் ந உத்³தி³ஸ்ஸகதம் ந நிமந்தனம் ஸாதி³யதி. ஸோ ந கும்பி⁴முகா² படிக்³க³ண்ஹாதி, ந களோபிமுகா² படிக்³க³ண்ஹாதி, ந ஏளகமந்தரம் ந த³ண்ட³மந்தரம் ந முஸலமந்தரம் ந த்³வின்னம் பு⁴ஞ்ஜமானானம் ந க³ப்³பி⁴னியா ந பாயமானாய ந புரிஸந்தரக³தாய ந ஸங்கித்தீஸு ந யத்த² ஸா உபட்டி²தோ ஹோதி ந யத்த² மக்கி²கா ஸண்ட³ஸண்ட³சாரினீ ந மச்ச²ம் ந மம்ஸம் ந ஸுரம் ந மேரயம் ந து²ஸோத³கம் பிவதி. ஸோ ஏகாகா³ரிகோ வா ஹோதி ஏகாலோபிகோ த்³வாகா³ரிகோ வா ஹோதி த்³வாலோபிகோ…பே… ஸத்தாகா³ரிகோ வா ஹோதி ஸத்தாலோபிகோ; ஏகிஸ்ஸாபி த³த்தியா யாபேதி த்³வீஹிபி த³த்தீஹி யாபேதி…பே… ஸத்தஹிபி த³த்தீஹி யாபேதி; ஏகாஹிகம்பி ஆஹாரம் ஆஹாரேதி த்³வாஹிகம்பி ஆஹாரம் ஆஹாரேதி…பே… ஸத்தாஹிகம்பி ஆஹாரம் ஆஹாரேதி. இதி ஏவரூபம் அட்³ட⁴மாஸிகம்பி பரியாயப⁴த்தபோ⁴ஜனானுயோக³மனுயுத்தோ விஹரதி.

‘‘ஸோ ஸாகப⁴க்கோ²பி ஹோதி ஸாமாகப⁴க்கோ²பி ஹோதி நீவாரப⁴க்கோ²பி ஹோதி த³த்³து³லப⁴க்கோ²பி ஹோதி ஹடப⁴க்கோ²பி ஹோதி கணப⁴க்கோ²பி ஹோதி ஆசாமப⁴க்கோ²பி ஹோதி பிஞ்ஞாகப⁴க்கோ²பி ஹோதி திணப⁴க்கோ²பி ஹோதி கோ³மயப⁴க்கோ²பி ஹோதி; வனமூலப²லாஹாரோபி யாபேதி பவத்தப²லபோ⁴ஜீ.

‘‘ஸோ ஸாணானிபி தா⁴ரேதி மஸாணானிபி தா⁴ரேதி ச²வது³ஸ்ஸானிபி தா⁴ரேதி பம்ஸுகூலானிபி தா⁴ரேதி திரீடானிபி தா⁴ரேதி அஜினம்பி தா⁴ரேதி அஜினக்கி²பம்பி தா⁴ரேதி குஸசீரம்பி தா⁴ரேதி வாகசீரம்பி தா⁴ரேதி ப²லகசீரம்பி தா⁴ரேதி கேஸகம்ப³லம்பி தா⁴ரேதி வாளகம்ப³லம்பி தா⁴ரேதி உலூகபக்க²ம்பி தா⁴ரேதி; கேஸமஸ்ஸுலோசகோபி ஹோதி கேஸமஸ்ஸுலோசனானுயோக³மனுயுத்தோ; உப்³ப⁴ட்ட²கோபி ஹோதி ஆஸனப்படிக்கி²த்தோ; உக்குடிகோபி ஹோதி உக்குடிகப்பதா⁴னமனுயுத்தோ; கண்டகாபஸ்ஸயிகோபி ஹோதி கண்டகாபஸ்ஸயே ஸேய்யம் கப்பேதி; ஸாயததியகம்பி உத³கோரோஹனானுயோக³மனுயுத்தோ விஹரதி. இதி ஏவரூபம் அனேகவிஹிதம் காயஸ்ஸ ஆதாபனபரிதாபனானுயோக³மனுயுத்தோ விஹரதி. ஏவம் கோ², பி⁴க்க²வே, புக்³க³லோ அத்தந்தபோ ஹோதி அத்தபரிதாபனானுயோக³மனுயுத்தோ.

‘‘கத²ஞ்ச, பி⁴க்க²வே, புக்³க³லோ பரந்தபோ ஹோதி பரபரிதாபனானுயோக³மனுயுத்தோ? இத⁴, பி⁴க்க²வே, ஏகச்சோ புக்³க³லோ ஓரப்³பி⁴கோ ஹோதி ஸூகரிகோ ஸாகுணிகோ மாக³விகோ லுத்³தோ³ மச்ச²கா⁴தகோ சோரோ சோரகா⁴தகோ கோ³கா⁴தகோ ப³ந்த⁴னாகா³ரிகோ, யே வா பனஞ்ஞேபி கேசி குரூரகம்மந்தா. ஏவம் கோ², பி⁴க்க²வே, புக்³க³லோ பரந்தபோ ஹோதி பரபரிதாபனானுயோக³மனுயுத்தோ.

‘‘கத²ஞ்ச, பி⁴க்க²வே, புக்³க³லோ அத்தந்தபோ ச ஹோதி அத்தபரிதாபனானுயோக³மனுயுத்தோ பரந்தபோ ச பரபரிதாபனானுயோக³மனுயுத்தோ? இத⁴, பி⁴க்க²வே, ஏகச்சோ புக்³க³லோ ராஜா வா ஹோதி க²த்தியோ முத்³தா⁴வஸித்தோ, ப்³ராஹ்மணோ வா ஹோதி மஹாஸாலோ. ஸோ புரத்தி²மேன நக³ரஸ்ஸ நவம் ஸந்தா²கா³ரம் காராபேத்வா கேஸமஸ்ஸும் ஓஹாரேத்வா க²ராஜினம் நிவாஸேத்வா ஸப்பிதேலேன காயம் அப்³ப⁴ஞ்ஜித்வா மக³விஸாணேன பிட்டி²ம் கண்டு³வமானோ நவம் ஸந்தா²கா³ரம் பவிஸதி, ஸத்³தி⁴ம் மஹேஸியா ப்³ராஹ்மணேன ச புரோஹிதேன. ஸோ தத்த² அனந்தரஹிதாய பூ⁴மியா ஹரிதுபலித்தாய ஸேய்யம் கப்பேதி. ஏகிஸ்ஸாய கா³வியா ஸரூபவச்சா²ய யம் ஏகஸ்மிம் த²னே கீ²ரம் ஹோதி தேன ராஜா யாபேதி; யம் து³தியஸ்மிம் த²னே கீ²ரம் ஹோதி தேன மஹேஸீ யாபேதி; யம் ததியஸ்மிம் த²னே கீ²ரம் ஹோதி தேன ப்³ராஹ்மணோ புரோஹிதோ யாபேதி; யம் சதுத்த²ஸ்மிம் த²னே கீ²ரம் ஹோதி தேன அக்³கி³ம் ஜுஹதி [ஜுஹந்தி (ஸீ. பீ.)]; அவஸேஸேன வச்ச²கோ யாபேதி. ஸோ ஏவமாஹ – ‘ஏத்தகா உஸபா⁴ ஹஞ்ஞந்து யஞ்ஞத்தா²ய, ஏத்தகா வச்ச²தரா ஹஞ்ஞந்து யஞ்ஞத்தா²ய, ஏத்தகா வச்ச²தரியோ ஹஞ்ஞந்து யஞ்ஞத்தா²ய, ஏத்தகா அஜா ஹஞ்ஞந்து யஞ்ஞத்தா²ய, ஏத்தகா உரப்³பா⁴ ஹஞ்ஞந்து யஞ்ஞத்தா²ய, (ஏத்தகா அஸ்ஸா ஹஞ்ஞந்து யஞ்ஞத்தா²ய,) [( ) நத்தி² ஸீ. ஸ்யா. கம். பீ. போத்த²கேஸு] ஏத்தகா ருக்கா² சி²ஜ்ஜந்து யூபத்தா²ய, ஏத்தகா த³ப்³பா⁴ லூயந்து ப³ரிஹிஸத்தா²யா’தி [பரிகம்மத்தா²யாதி (க.)]. யேபிஸ்ஸ தே ஹோந்தி தா³ஸாதி வா பேஸ்ஸாதி வா கம்மகராதி வா தேபி த³ண்ட³தஜ்ஜிதா ப⁴யதஜ்ஜிதா அஸ்ஸுமுகா² ருத³மானா பரிகம்மானி கரோந்தி. ஏவம் கோ², பி⁴க்க²வே, புக்³க³லோ அத்தந்தபோ ச ஹோதி அத்தபரிதாபனானுயோக³மனுயுத்தோ பரந்தபோ ச பரபரிதாபனானுயோக³மனுயுத்தோ.

‘‘கத²ஞ்ச, பி⁴க்க²வே, புக்³க³லோ நேவத்தந்தபோ ஹோதி நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ? ஸோ அனத்தந்தபோ அபரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸம்வேதீ³ ப்³ரஹ்மபூ⁴தேன அத்தனா விஹரதி. இத⁴, பி⁴க்க²வே, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. ஸோ இமம் லோகம் ஸதே³வகம் ஸமாரகம் ஸப்³ரஹ்மகம் ஸஸ்ஸமணப்³ராஹ்மணிம் பஜம் ஸதே³வமனுஸ்ஸம் ஸயம் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மம் தே³ஸேதி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேதி. தம் த⁴ம்மம் ஸுணாதி க³ஹபதி வா க³ஹபதிபுத்தோ வா அஞ்ஞதரஸ்மிம் வா குலே பச்சாஜாதோ. ஸோ தம் த⁴ம்மம் ஸுத்வா ததா²க³தே ஸத்³த⁴ம் படிலப⁴தி. ஸோ தேன ஸத்³தா⁴படிலாபே⁴ன ஸமன்னாக³தோ இதி படிஸஞ்சிக்க²தி – ‘ஸம்பா³தோ⁴ க⁴ராவாஸோ ரஜாபதோ², அப்³போ⁴காஸோ பப்³ப³ஜ்ஜா; நயித³ம் ஸுகரம் அகா³ரம் அஜ்ஜா²வஸதா ஏகந்தபரிபுண்ணம் ஏகந்தபரிஸுத்³த⁴ம் ஸங்க²லிகி²தம் ப்³ரஹ்மசரியம் சரிதும்; யம்னூனாஹம் கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜேய்ய’ந்தி. ஸோ அபரேன ஸமயேன அப்பம் வா போ⁴க³க்க²ந்த⁴ம் பஹாய, மஹந்தம் வா போ⁴க³க்க²ந்த⁴ம் பஹாய, அப்பம் வா ஞாதிபரிவட்டம் பஹாய, மஹந்தம் வா ஞாதிபரிவட்டம் பஹாய, கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜதி.

‘‘ஸோ ஏவம் பப்³ப³ஜிதோ ஸமானோ பி⁴க்கூ²னம் ஸிக்கா²ஸாஜீவஸமாபன்னோ பாணாதிபாதம் பஹாய பாணாதிபாதா படிவிரதோ ஹோதி நிஹிதத³ண்டோ³ நிஹிதஸத்தோ² லஜ்ஜீ த³யாபன்னோ, ஸப்³ப³பாணபூ⁴தஹிதானுகம்பீ விஹரதி. அதி³ன்னாதா³னம் பஹாய அதி³ன்னாதா³னா படிவிரதோ ஹோதி தி³ன்னாதா³யீ தி³ன்னபாடிகங்கீ², அதே²னேன ஸுசிபூ⁴தேன அத்தனா விஹரதி. அப்³ரஹ்மசரியம் பஹாய ப்³ரஹ்மசாரீ ஹோதி ஆராசாரீ விரதோ அஸத்³த⁴ம்மா கா³மத⁴ம்மா. முஸாவாத³ம் பஹாய முஸாவாதா³ படிவிரதோ ஹோதி ஸச்சவாதீ³ ஸச்சஸந்தோ⁴ தே²தோ பச்சயிகோ அவிஸம்வாத³கோ லோகஸ்ஸ. பிஸுணம் வாசம் பஹாய பிஸுணாய வாசாய படிவிரதோ ஹோதி, ந இதோ ஸுத்வா அமுத்ர அக்கா²தா இமேஸம் பே⁴தா³ய, ந அமுத்ர வா ஸுத்வா இமேஸம் அக்கா²தா அமூஸம் பே⁴தா³ய; இதி பி⁴ன்னானம் வா ஸந்தா⁴தா, ஸஹிதானம் வா அனுப்பதா³தா, ஸமக்³கா³ராமோ ஸமக்³க³ரதோ ஸமக்³க³னந்தீ³ ஸமக்³க³கரணிம் வாசம் பா⁴ஸிதா ஹோதி. ப²ருஸம் வாசம் பஹாய ப²ருஸாய வாசாய படிவிரதோ ஹோதி; யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா ததா²ரூபிம் வாசம் பா⁴ஸிதா ஹோதி. ஸம்ப²ப்பலாபம் பஹாய ஸம்ப²ப்பலாபா படிவிரதோ ஹோதி காலவாதீ³ பூ⁴தவாதீ³ அத்தவாதீ³ த⁴ம்மவாதீ³ வினயவாதீ³; நிதா⁴னவதிம் வாசம் பா⁴ஸிதா ஹோதி காலேன ஸாபதே³ஸம் பரியந்தவதிம் அத்த²ஸம்ஹிதம்.

‘‘ஸோ பீ³ஜகா³மபூ⁴தகா³மஸமாரம்பா⁴ படிவிரதோ ஹோதி. ஏகப⁴த்திகோ ஹோதி ரத்தூபரதோ விரதோ விகாலபோ⁴ஜனா. நச்சகீ³தவாதி³தவிஸூகத³ஸ்ஸனா படிவிரதோ ஹோதி. மாலாக³ந்த⁴விலேபனதா⁴ரணமண்ட³னவிபூ⁴ஸனட்டா²னா படிவிரதோ ஹோதி. உச்சாஸயனமஹாஸயனா படிவிரதோ ஹோதி. ஜாதரூபரஜதபடிக்³க³ஹணா படிவிரதோ ஹோதி. ஆமகத⁴ஞ்ஞபடிக்³க³ஹணா படிவிரதோ ஹோதி. ஆமகமம்ஸபடிக்³க³ஹணா படிவிரதோ ஹோதி. இத்தி²குமாரிகபடிக்³க³ஹணா படிவிரதோ ஹோதி. தா³ஸிதா³ஸபடிக்³க³ஹணா படிவிரதோ ஹோதி. அஜேளகபடிக்³க³ஹணா படிவிரதோ ஹோதி. குக்குடஸூகரபடிக்³க³ஹணா படிவிரதோ ஹோதி. ஹத்தி²க³வாஸ்ஸவளவபடிக்³க³ஹணா படிவிரதோ ஹோதி. கே²த்தவத்து²படிக்³க³ஹணா படிவிரதோ ஹோதி. தூ³தேய்யபஹிணக³மனானுயோகா³ படிவிரதோ ஹோதி. கயவிக்கயா படிவிரதோ ஹோதி. துலாகூடகம்ஸகூடமானகூடா படிவிரதோ ஹோதி. உக்கோடனவஞ்சனனிகதிஸாசியோகா³ படிவிரதோ ஹோதி. சே²த³னவத⁴ப³ந்த⁴னவிபராமோஸஆலோபஸஹஸாகாரா படிவிரதோ ஹோதி.

‘‘ஸோ ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி ஸமாதா³யேவ பக்கமதி. ஸேய்யதா²பி நாம பக்கீ² ஸகுணோ யேன யேனேவ டே³தி, ஸபத்தபா⁴ரோவ டே³தி; ஏவமேவம் பி⁴க்கு² ஸந்துட்டோ² ஹோதி காயபரிஹாரிகேன சீவரேன குச்சி²பரிஹாரிகேன பிண்ட³பாதேன. ஸோ யேன யேனேவ பக்கமதி, ஸமாதா³யேவ பக்கமதி. ஸோ இமினா அரியேன ஸீலக்க²ந்தே⁴ன ஸமன்னாக³தோ அஜ்ஜ²த்தம் அனவஜ்ஜஸுக²ம் படிஸம்வேதே³தி.

‘‘ஸோ சக்கு²னா ரூபம் தி³ஸ்வா ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி சக்கு²ந்த்³ரியம்; சக்கு²ந்த்³ரியே ஸம்வரம் ஆபஜ்ஜதி. ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய ந நிமித்தக்³கா³ஹீ ஹோதி நானுப்³யஞ்ஜனக்³கா³ஹீ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜதி; ரக்க²தி மனிந்த்³ரியம்; மனிந்த்³ரியே ஸம்வரம் ஆபஜ்ஜதி. ஸோ இமினா அரியேன இந்த்³ரியஸம்வரேன ஸமன்னாக³தோ அஜ்ஜ²த்தம் அப்³யாஸேகஸுக²ம் படிஸம்வேதே³தி.

‘‘ஸோ அபி⁴க்கந்தே படிக்கந்தே ஸம்பஜானகாரீ ஹோதி, ஆலோகிதே விலோகிதே ஸம்பஜானகாரீ ஹோதி, ஸமிஞ்ஜிதே பஸாரிதே ஸம்பஜானகாரீ ஹோதி, ஸங்கா⁴டிபத்தசீவரதா⁴ரணே ஸம்பஜானகாரீ ஹோதி, அஸிதே பீதே கா²யிதே ஸாயிதே ஸம்பஜானகாரீ ஹோதி, உச்சாரபஸ்ஸாவகம்மே ஸம்பஜானகாரீ ஹோதி, க³தே டி²தே நிஸின்னே ஸுத்தே ஜாக³ரிதே பா⁴ஸிதே துண்ஹீபா⁴வே ஸம்பஜானகாரீ ஹோதி.

‘‘ஸோ இமினா ச அரியேன ஸீலக்க²ந்தே⁴ன ஸமன்னாக³தோ, (இமாய ச அரியாய ஸந்துட்டி²யா ஸமன்னாக³தோ,) [( ) நத்தி² ஸீ. ஸ்யா. போத்த²கேஸு. ம. நி. 1.296; ம. நி. 2.13 பஸ்ஸிதப்³ப³ம்] இமினா ச அரியேன இந்த்³ரியஸம்வரேன ஸமன்னாக³தோ, இமினா ச அரியேன ஸதிஸம்பஜஞ்ஞேன ஸமன்னாக³தோ [ஸமன்னாக³தோ. ஸோ (க.)] விவித்தம் ஸேனாஸனம் ப⁴ஜதி அரஞ்ஞம் ருக்க²மூலம் பப்³ப³தம் கந்த³ரம் கி³ரிகு³ஹம் ஸுஸானம் வனப்பத்த²ம் அப்³போ⁴காஸம் பலாலபுஞ்ஜம். ஸோ பச்சா²ப⁴த்தம் பிண்ட³பாதபடிக்கந்தோ நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴ய பரிமுக²ம் ஸதிம் உபட்ட²பேத்வா. ஸோ அபி⁴ஜ்ஜ²ம் லோகே பஹாய விக³தாபி⁴ஜ்ஜே²ன சேதஸா விஹரதி, அபி⁴ஜ்ஜா²ய சித்தம் பரிஸோதே⁴தி. ப்³யாபாத³பதோ³ஸம் பஹாய அப்³யாபன்னசித்தோ விஹரதி ஸப்³ப³பாணபூ⁴தஹிதானுகம்பீ, ப்³யாபாத³பதோ³ஸா சித்தம் பரிஸோதே⁴தி. தி²னமித்³த⁴ம் பஹாய விக³ததி²னமித்³தோ⁴ விஹரதி ஆலோகஸஞ்ஞீ ஸதோ ஸம்பஜானோ, தி²னமித்³தா⁴ சித்தம் பரிஸோதே⁴தி. உத்³த⁴ச்சகுக்குச்சம் பஹாய அனுத்³த⁴தோ விஹரதி அஜ்ஜ²த்தம் வூபஸந்தசித்தோ, உத்³த⁴ச்சகுக்குச்சா சித்தம் பரிஸோதே⁴தி. விசிகிச்ச²ம் பஹாய திண்ணவிசிகிச்சோ² விஹரதி அகத²ம்கதீ² குஸலேஸு த⁴ம்மேஸு, விசிகிச்சா²ய சித்தம் பரிஸோதே⁴தி. ஸோ இமே பஞ்ச நீவரணே பஹாய சேதஸோ உபக்கிலேஸே பஞ்ஞாய து³ப்³ப³லீகரணே விவிச்சேவ காமேஹி…பே… சதுத்த²ம் ஜா²னம் உபஸம்பஜ்ஜ விஹரதி.

‘‘ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே புப்³பே³னிவாஸானுஸ்ஸதிஞாணாய…பே… ஸத்தானம் சுதூபபாதஞாணாய…பே… (ஸோ ஏவம் ஸமாஹிதே சித்தே பரிஸுத்³தே⁴ பரியோதா³தே அனங்க³ணே விக³தூபக்கிலேஸே முது³பூ⁴தே கம்மனியே டி²தே ஆனேஞ்ஜப்பத்தே) ஆஸவானம் க²யஞாணாய சித்தம் அபி⁴னின்னாமேதி. ஸோ ‘இத³ம் து³க்க²’ந்தி யதா²பூ⁴தம் பஜானாதி, ‘அயம் து³க்க²ஸமுத³யோ’தி யதா²பூ⁴தம் பஜானாதி, ‘அயம் து³க்க²னிரோதோ⁴’தி யதா²பூ⁴தம் பஜானாதி, ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ‘இமே ஆஸவா’தி யதா²பூ⁴தம் பஜானாதி, ‘அயம் ஆஸவஸமுத³யோ’தி யதா²பூ⁴தம் பஜானாதி, ‘அயம் ஆஸவனிரோதோ⁴’தி யதா²பூ⁴தம் பஜானாதி, ‘அயம் ஆஸவனிரோத⁴கா³மினீ படிபதா³’தி யதா²பூ⁴தம் பஜானாதி.

‘‘தஸ்ஸ ஏவம் ஜானதோ ஏவம் பஸ்ஸதோ காமாஸவாபி சித்தம் விமுச்சதி, ப⁴வாஸவாபி சித்தம் விமுச்சதி, அவிஜ்ஜாஸவாபி சித்தம் விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. ஏவம் கோ², பி⁴க்க²வே, புக்³க³லோ நேவத்தந்தபோ ஹோதி நாத்தபரிதாபனானுயோக³மனுயுத்தோ ந பரந்தபோ ந பரபரிதாபனானுயோக³மனுயுத்தோ. ஸோ ந அத்தந்தபோ ந பரந்தபோ தி³ட்டே²வ த⁴ம்மே நிச்சா²தோ நிப்³பு³தோ ஸீதீபூ⁴தோ ஸுக²ப்படிஸம்வேதீ³ ப்³ரஹ்மபூ⁴தேன அத்தனா விஹரதி. இமே கோ², பி⁴க்க²வே, சத்தாரோ புக்³க³லா ஸந்தோ ஸம்விஜ்ஜமானா லோகஸ்மி’’ந்தி. அட்ட²மம்.