10. உபோஸத²ஸுத்தம்

190. ஏகம் ஸமயம் ப⁴க³வா ஸாவத்தி²யம் விஹரதி புப்³பா³ராமே மிகா³ரமாதுபாஸாதே³. தேன கோ² பன ஸமயேன ப⁴க³வா தத³ஹுபோஸதே² பி⁴க்கு²ஸங்க⁴பரிவுதோ நிஸின்னோ ஹோதி. அத² கோ² ப⁴க³வா துண்ஹீபூ⁴தம் துண்ஹீபூ⁴தம் பி⁴க்கு²ஸங்க⁴ம் அனுவிலோகேத்வா பி⁴க்கூ² ஆமந்தேஸி –

‘‘அபலாபாயம், பி⁴க்க²வே, பரிஸா நிப்பலாபாயம், பி⁴க்க²வே, பரிஸா ஸுத்³தா⁴ ஸாரே பதிட்டி²தா. ததா²ரூபோ அயம், பி⁴க்க²வே, பி⁴க்கு²ஸங்கோ⁴, ததா²ரூபாயம், பி⁴க்க²வே, பரிஸா. யதா²ரூபா பரிஸா து³ல்லபா⁴ த³ஸ்ஸனாயபி லோகஸ்மிம், ததா²ரூபோ அயம், பி⁴க்க²வே, பி⁴க்கு²ஸங்கோ⁴, ததா²ரூபாயம், பி⁴க்க²வே, பரிஸா. யதா²ரூபா பரிஸா ஆஹுனேய்யா பாஹுனேய்யா த³க்கி²ணேய்யா அஞ்ஜலிகரணீயா அனுத்தரம் புஞ்ஞக்கே²த்தம் லோகஸ்ஸ, ததா²ரூபோ அயம், பி⁴க்க²வே, பி⁴க்கு²ஸங்கோ⁴, ததா²ரூபாயம், பி⁴க்க²வே, பரிஸா. யதா²ரூபாய பரிஸாய அப்பம் தி³ன்னம் ப³ஹு ஹோதி ப³ஹு தி³ன்னம் ப³ஹுதரம், ததா²ரூபோ அயம், பி⁴க்க²வே, பி⁴க்கு²ஸங்கோ⁴, ததா²ரூபாயம், பி⁴க்க²வே, பரிஸா. யதா²ரூபம் பரிஸம் அலம் யோஜனக³ணனானிபி த³ஸ்ஸனாய க³ந்தும் அபி புடோஸேனாபி, ததா²ரூபோ அயம், பி⁴க்க²வே, பி⁴க்கு²ஸங்கோ⁴, (ததா²ரூபாயம், பி⁴க்க²வே, பரிஸா) [( ) ஸீ. ஸ்யா. கம். பீ. போத்த²கேஸு நத்தி²].

‘‘ஸந்தி, பி⁴க்க²வே, பி⁴க்கூ² இமஸ்மிம் பி⁴க்கு²ஸங்கே⁴ தே³வப்பத்தா விஹரந்தி; ஸந்தி, பி⁴க்க²வே, பி⁴க்கூ² இமஸ்மிம் பி⁴க்கு²ஸங்கே⁴ ப்³ரஹ்மப்பத்தா விஹரந்தி; ஸந்தி, பி⁴க்க²வே, பி⁴க்கூ² இமஸ்மிம் பி⁴க்கு²ஸங்கே⁴ ஆனேஞ்ஜப்பத்தா விஹரந்தி; ஸந்தி, பி⁴க்க²வே, பி⁴க்கூ² இமஸ்மிம் பி⁴க்கு²ஸங்கே⁴ அரியப்பத்தா விஹரந்தி.

‘‘கத²ஞ்ச, பி⁴க்க²வே, பி⁴க்கு² தே³வப்பத்தோ ஹோதி? இத⁴, பி⁴க்க²வே, பி⁴க்கு² விவிச்சேவ காமேஹி…பே… பட²மம் ஜா²னம் உபஸம்பஜ்ஜ விஹரதி; விதக்கவிசாரானம் வூபஸமா…பே… து³தியம் ஜா²னம்…பே… ததியம் ஜா²னம்…பே… சதுத்த²ம் ஜா²னம் உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² தே³வப்பத்தோ ஹோதி.

‘‘கத²ஞ்ச, பி⁴க்க²வே, பி⁴க்கு² ப்³ரஹ்மப்பத்தோ ஹோதி? இத⁴, பி⁴க்க²வே, பி⁴க்கு² மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம் ததா² ததியம் ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. கருணா… முதி³தா… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம் ததா² ததியம் ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஏவம் கோ², பி⁴க்க²வே, பி⁴க்கு² ப்³ரஹ்மப்பத்தோ ஹோதி.

‘‘கத²ஞ்ச, பி⁴க்க²வே, பி⁴க்கு² ஆனேஞ்ஜப்பத்தோ ஹோதி? இத⁴, பி⁴க்க²வே, பி⁴க்கு² ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ‘அனந்தோ ஆகாஸோ’தி ஆகாஸானஞ்சாயதனம் உபஸம்பஜ்ஜ விஹரதி. ஸப்³ப³ஸோ ஆகாஸானஞ்சாயதனம் ஸமதிக்கம்ம ‘அனந்தம் விஞ்ஞாண’ந்தி விஞ்ஞாணஞ்சாயதனம் உபஸம்பஜ்ஜ விஹரதி. ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² ஆனேஞ்ஜப்பத்தோ ஹோதி.

‘‘கத²ஞ்ச, பி⁴க்க²வே, பி⁴க்கு² அரியப்பத்தோ ஹோதி? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, பி⁴க்கு² அரியப்பத்தோ ஹோதீ’’தி. த³ஸமம்.

ப்³ராஹ்மணவக்³கோ³ [யோதா⁴ஜீவவக்³கோ³ (ஸீ. ஸ்யா. கம். பீ.)] சதுத்தோ².