1. யோதா⁴ஜீவஸுத்தம்

181. ‘‘சதூஹி, பி⁴க்க²வே, அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி. கதமேஹி சதூஹி? இத⁴, பி⁴க்க²வே, யோதா⁴ஜீவோ டா²னகுஸலோ ச ஹோதி, தூ³ரேபாதீ ச, அக்க²ணவேதீ⁴ ச, மஹதோ ச காயஸ்ஸ பதா³லேதா. இமேஹி கோ², பி⁴க்க²வே, சதூஹி அங்கே³ஹி ஸமன்னாக³தோ யோதா⁴ஜீவோ ராஜாரஹோ ஹோதி ராஜபோ⁴க்³கோ³, ரஞ்ஞோ அங்க³ந்தேவ ஸங்க²ம் க³ச்ச²தி. ஏவமேவம் கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸ. கதமேஹி சதூஹி? இத⁴, பி⁴க்க²வே, பி⁴க்கு² டா²னகுஸலோ ச ஹோதி, தூ³ரேபாதீ ச, அக்க²ணவேதீ⁴ ச, மஹதோ ச காயஸ்ஸ பதா³லேதா.

‘‘கத²ஞ்ச, பி⁴க்க²வே, பி⁴க்கு² டா²னகுஸலோ ஹோதி? இத⁴, பி⁴க்க²வே, பி⁴க்கு² ஸீலவா ஹோதி…பே… ஸமாதா³ய ஸிக்க²தி ஸிக்கா²பதே³ஸு. ஏவம் கோ², பி⁴க்க²வே, பி⁴க்கு² டா²னகுஸலோ ஹோதி.

‘‘கத²ஞ்ச, பி⁴க்க²வே, பி⁴க்கு² தூ³ரேபாதீ ஹோதி? இத⁴, பி⁴க்க²வே, பி⁴க்கு² யம் கிஞ்சி ரூபம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் ரூபம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. யா காசி வேத³னா…பே… யா காசி ஸஞ்ஞா… யே கேசி ஸங்கா²ரா… யம் கிஞ்சி விஞ்ஞாணம் அதீதானாக³தபச்சுப்பன்னம் அஜ்ஜ²த்தம் வா ப³ஹித்³தா⁴ வா ஓளாரிகம் வா ஸுகு²மம் வா ஹீனம் வா பணீதம் வா யம் தூ³ரே ஸந்திகே வா, ஸப்³ப³ம் விஞ்ஞாணம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய பஸ்ஸதி. ஏவம் கோ², பி⁴க்க²வே, பி⁴க்கு² தூ³ரேபாதீ ஹோதி.

‘‘கத²ஞ்ச, பி⁴க்க²வே, பி⁴க்கு² அக்க²ணவேதீ⁴ ஹோதி? இத⁴, பி⁴க்க²வே, பி⁴க்கு² ‘இத³ம் து³க்க²’ந்தி யதா²பூ⁴தம் பஜானாதி…பே… ‘அயம் து³க்க²னிரோத⁴கா³மினீ படிபதா³’தி யதா²பூ⁴தம் பஜானாதி. ஏவம் கோ², பி⁴க்க²வே, பி⁴க்கு² அக்க²ணவேதீ⁴ ஹோதி.

‘‘கத²ஞ்ச, பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி? இத⁴, பி⁴க்க²வே, பி⁴க்கு² மஹந்தம் அவிஜ்ஜாக்க²ந்த⁴ம் பதா³லேதா. ஏவம் கோ², பி⁴க்க²வே, பி⁴க்கு² மஹதோ காயஸ்ஸ பதா³லேதா ஹோதி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ பி⁴க்கு² ஆஹுனேய்யோ ஹோதி…பே… அனுத்தரம் புஞ்ஞக்கே²த்தம் லோகஸ்ஸா’’தி. பட²மம்.