7. பட²மததா²க³தஅச்ச²ரியஸுத்தம்

127. ‘‘ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா சத்தாரோ அச்ச²ரியா அப்³பு⁴தா த⁴ம்மா [அப்³பு⁴தத⁴ம்மா (ஸ்யா. கம். க.)] பாதுப⁴வந்தி. கதமே சத்தாரோ? யதா³, பி⁴க்க²வே, போ³தி⁴ஸத்தோ துஸிதா காயா சவித்வா ஸதோ ஸம்பஜானோ மாதுகுச்சி²ம் ஓக்கமதி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யாபி தா லோகந்தரிகா அகா⁴ அஸம்வுதா அந்த⁴காரா அந்த⁴காரதிமிஸா யத்த²பிமேஸம் [யத்தி²மேஸம் (ஸீ. ஸ்யா. கம்.)] சந்தி³மஸூரியானம் ஏவம்மஹித்³தி⁴கானம் ஏவம்மஹானுபா⁴வானம் ஆபா⁴ நானுபோ⁴ந்தி, தத்த²பி அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞம் ஸஞ்ஜானந்தி – ‘அஞ்ஞேபி கிர, போ⁴, ஸந்தி ஸத்தா இதூ⁴பபன்னா’தி. ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா அயம் பட²மோ அச்ச²ரியோ அப்³பு⁴தோ த⁴ம்மோ [அப்³பு⁴தத⁴ம்மோ (ஸ்யா. கம். க.)] பாதுப⁴வதி.

‘‘புன சபரம், பி⁴க்க²வே, யதா³ போ³தி⁴ஸத்தோ ஸதோ ஸம்பஜானோ மாதுகுச்சி²ம்ஹா நிக்க²மதி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யாபி தா லோகந்தரிகா அகா⁴ அஸம்வுதா அந்த⁴காரா அந்த⁴காரதிமிஸா யத்த²பிமேஸம் சந்தி³மஸூரியானம் ஏவம்மஹித்³தி⁴கானம் ஏவம்மஹானுபா⁴வானம் ஆபா⁴ நானுபோ⁴ந்தி, தத்த²பி அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞம் ஸஞ்ஜானந்தி – ‘அஞ்ஞேபி கிர, போ⁴, ஸந்தி ஸத்தா இதூ⁴பபன்னா’தி. ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா அயம் து³தியோ அச்ச²ரியோ அப்³பு⁴தோ த⁴ம்மோ பாதுப⁴வதி.

‘‘புன சபரம், பி⁴க்க²வே, யதா³ ததா²க³தோ அனுத்தரம் ஸம்மாஸம்போ³தி⁴ம் அபி⁴ஸம்பு³ஜ்ஜ²தி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யாபி தா லோகந்தரிகா அகா⁴ அஸம்வுதா அந்த⁴காரா அந்த⁴காரதிமிஸா யத்த²பிமேஸம் சந்தி³மஸூரியானம் ஏவம்மஹித்³தி⁴கானம் ஏவம்மஹானுபா⁴வானம் ஆபா⁴ நானுபோ⁴ந்தி, தத்த²பி அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞம் ஸஞ்ஜானந்தி – ‘அஞ்ஞேபி கிர, போ⁴, ஸந்தி ஸத்தா இதூ⁴பபன்னா’தி. ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா அயம் ததியோ அச்ச²ரியோ அப்³பு⁴தோ த⁴ம்மோ பாதுப⁴வதி.

‘‘புன சபரம், பி⁴க்க²வே, யதா³ ததா²க³தோ அனுத்தரம் த⁴ம்மசக்கம் பவத்தேதி, அத² ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யாபி தா லோகந்தரிகா அகா⁴ அஸம்வுதா அந்த⁴காரா அந்த⁴காரதிமிஸா யத்த²பிமேஸம் சந்தி³மஸூரியானம் ஏவம்மஹித்³தி⁴கானம் ஏவம்மஹானுபா⁴வானம் ஆபா⁴ நானுபோ⁴ந்தி, தத்த²பி அப்பமாணோ உளாரோ ஓபா⁴ஸோ பாதுப⁴வதி அதிக்கம்மேவ தே³வானம் தே³வானுபா⁴வம். யேபி தத்த² ஸத்தா உபபன்னா தேபி தேனோபா⁴ஸேன அஞ்ஞமஞ்ஞம் ஸஞ்ஜானந்தி – ‘அஞ்ஞேபி கிர, போ⁴, ஸந்தி ஸத்தா இதூ⁴பபன்னா’தி. ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா அயம் சதுத்தோ² அச்ச²ரியோ அப்³பு⁴தோ த⁴ம்மோ பாதுப⁴வதி. ததா²க³தஸ்ஸ, பி⁴க்க²வே, அரஹதோ ஸம்மாஸம்பு³த்³த⁴ஸ்ஸ பாதுபா⁴வா இமே சத்தாரோ அச்ச²ரியா அப்³பு⁴தா த⁴ம்மா பாதுப⁴வந்தீ’’தி. ஸத்தமம்.