2. ஊமிப⁴யஸுத்தம்

122. ‘‘சத்தாரிமானி, பி⁴க்க²வே, ப⁴யானி உத³கோரோஹந்தஸ்ஸ [உத³கோரோஹந்தே (ம. நி. 2.161)] பாடிகங்கி²தப்³பா³னி. கதமானி சத்தாரி? ஊமிப⁴யம், கும்பீ⁴லப⁴யம், ஆவட்டப⁴யம், ஸுஸுகாப⁴யம் – இமானி கோ², பி⁴க்க²வே, சத்தாரி ப⁴யானி உத³கோரோஹந்தஸ்ஸ பாடிகங்கி²தப்³பா³னி. ஏவமேவம் கோ², பி⁴க்க²வே, சத்தாரி ப⁴யானி இதே⁴கச்சஸ்ஸ குலபுத்தஸ்ஸ இமஸ்மிம் த⁴ம்மவினயே அகா³ரஸ்மா [ஸத்³தா⁴ அகா³ரஸ்மா (ஸீ. ஸ்யா. கம்.)] அனகா³ரியம் பப்³ப³ஜிதஸ்ஸ [பப்³ப³ஜதோ (ஸீ.)] பாடிகங்கி²தப்³பா³னி. கதமானி சத்தாரி? ஊமிப⁴யம், கும்பீ⁴லப⁴யம், ஆவட்டப⁴யம், ஸுஸுகாப⁴யம்.

‘‘கதமஞ்ச, பி⁴க்க²வே, ஊமிப⁴யம்? இத⁴, பி⁴க்க²வே, ஏகச்சோ குலபுத்தோ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘ஓதிண்ணோம்ஹி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி! தமேனம் ததா² பப்³ப³ஜிதம் ஸமானம் ஸப்³ரஹ்மசாரினோ ஓவத³ந்தி அனுஸாஸந்தி – ‘ஏவம் தே அபி⁴க்கமிதப்³ப³ம், ஏவம் தே படிக்கமிதப்³ப³ம், ஏவம் தே ஆலோகேதப்³ப³ம், ஏவம் தே விலோகேதப்³ப³ம், ஏவம் தே ஸமிஞ்ஜிதப்³ப³ம், ஏவம் தே பஸாரிதப்³ப³ம், ஏவம் தே ஸங்கா⁴டிபத்தசீவரம் தா⁴ரேதப்³ப³’ந்தி. தஸ்ஸ ஏவம் ஹோதி – ‘மயம் கோ² புப்³பே³ அகா³ரியபூ⁴தா ஸமானா அஞ்ஞே ஓவதா³மபி அனுஸாஸாமபி. இமே பனம்ஹாகம் புத்தமத்தா மஞ்ஞே நத்தமத்தா மஞ்ஞே ஓவதி³தப்³ப³ம் அனுஸாஸிதப்³ப³ம் மஞ்ஞந்தீ’தி. ஸோ குபிதோ அனத்தமனோ ஸிக்க²ம் பச்சக்கா²ய ஹீனாயாவத்ததி. அயம் வுச்சதி, பி⁴க்க²வே, பி⁴க்கு² ஊமிப⁴யஸ்ஸ பீ⁴தோ ஸிக்க²ம் பச்சக்கா²ய ஹீனாயாவத்தோ. ஊமிப⁴யந்தி கோ², பி⁴க்க²வே, கோதூ⁴பாயாஸஸ்ஸேதம் அதி⁴வசனம். இத³ம் வுச்சதி, பி⁴க்க²வே, ஊமிப⁴யம்.

‘‘கதமஞ்ச, பி⁴க்க²வே, கும்பீ⁴லப⁴யம்? இத⁴, பி⁴க்க²வே, ஏகச்சோ குலபுத்தோ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘ஓதிண்ணோம்ஹி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி! தமேனம் ததா² பப்³ப³ஜிதம் ஸமானம் ஸப்³ரஹ்மசாரினோ ஓவத³ந்தி அனுஸாஸந்தி – ‘இத³ம் தே கா²தி³தப்³ப³ம், இத³ம் தே ந கா²தி³தப்³ப³ம், இத³ம் தே பு⁴ஞ்ஜிதப்³ப³ம், இத³ம் தே ந பு⁴ஞ்ஜிதப்³ப³ம், இத³ம் தே ஸாயிதப்³ப³ம், இத³ம் தே ந ஸாயிதப்³ப³ம், இத³ம் தே பாதப்³ப³ம், இத³ம் தே ந பாதப்³ப³ம், கப்பியம் தே கா²தி³தப்³ப³ம், அகப்பியம் தே ந கா²தி³தப்³ப³ம், கப்பியம் தே பு⁴ஞ்ஜிதப்³ப³ம், அகப்பியம் தே ந பு⁴ஞ்ஜிதப்³ப³ம், கப்பியம் தே ஸாயிதப்³ப³ம், அகப்பியம் தே ந ஸாயிதப்³ப³ம், கப்பியம் தே பாதப்³ப³ம், அகப்பியம் தே ந பாதப்³ப³ம், காலே தே கா²தி³தப்³ப³ம், விகாலே தே ந கா²தி³தப்³ப³ம், காலே தே பு⁴ஞ்ஜிதப்³ப³ம், விகாலே தே ந பு⁴ஞ்ஜிதப்³ப³ம், காலே தே ஸாயிதப்³ப³ம், விகாலே தே ந ஸாயிதப்³ப³ம், காலே தே பாதப்³ப³ம், விகாலே தே ந பாதப்³ப³’ந்தி. தஸ்ஸ ஏவம் ஹோதி – ‘மயம் கோ² புப்³பே³ அகா³ரியபூ⁴தா ஸமானா யம் இச்சா²ம தம் கா²தா³ம, யம் ந இச்சா²ம ந தம் கா²தா³ம; யம் இச்சா²ம தம் பு⁴ஞ்ஜாம, யம் ந இச்சா²ம ந தம் பு⁴ஞ்ஜாம; யம் இச்சா²ம தம் ஸாயாம, யம் ந இச்சா²ம ந தம் ஸாயாம; யம் இச்சா²ம தம் பிவாம, யம் ந இச்சா²ம ந தம் பிவாம; கப்பியம்பி கா²தா³ம அகப்பியம்பி கா²தா³ம கப்பியம்பி பு⁴ஞ்ஜாம அகப்பியம்பி பு⁴ஞ்ஜாம கப்பியம்பி ஸாயாம அகப்பியம்பி ஸாயாம கப்பியம்பி பிவாம அகப்பியம்பி பிவாம, காலேபி கா²தா³ம விகாலேபி கா²தா³ம காலேபி பு⁴ஞ்ஜாம விகாலேபி பு⁴ஞ்ஜாம காலேபி ஸாயாம விகாலேபி ஸாயாம காலேபி பிவாம விகாலேபி பிவாம; யம்பி நோ ஸத்³தா⁴ க³ஹபதிகா தி³வா விகாலே பணீதம் கா²த³னீயம் வா போ⁴ஜனீயம் வா தே³ந்தி, தத்ரபிமே [தத்த²பிமே (ம. நி. 2.163)] முகா²வரணம் மஞ்ஞே கரோந்தீ’தி. ஸோ குபிதோ அனத்தமனோ ஸிக்க²ம் பச்சக்கா²ய ஹீனாயாவத்ததி. அயம் வுச்சதி, பி⁴க்க²வே, பி⁴க்கு² கும்பீ⁴லப⁴யஸ்ஸ பீ⁴தோ ஸிக்க²ம் பச்சக்கா²ய ஹீனாயாவத்தோ. கும்பீ⁴லப⁴யந்தி கோ², பி⁴க்க²வே, ஓத³ரிகத்தஸ்ஸேதம் அதி⁴வசனம். இத³ம் வுச்சதி, பி⁴க்க²வே, கும்பீ⁴லப⁴யம்.

‘‘கதமஞ்ச, பி⁴க்க²வே, ஆவட்டப⁴யம்? இத⁴, பி⁴க்க²வே, ஏகச்சோ குலபுத்தோ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘ஓதிண்ணோம்ஹி ஜாதியா ஜராய மரணேன ஸோகேஹி பரிதே³வேஹி, து³க்கே²ஹி தோ³மனஸ்ஸேஹி உபாயாஸேஹி து³க்கோ²திண்ணோ து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி! ஸோ ஏவம் பப்³ப³ஜிதோ ஸமானோ புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி க³ஹபதிம் வா க³ஹபதிபுத்தம் வா பஞ்சஹி காமகு³ணேஹி ஸமப்பிதம் ஸமங்கீ³பூ⁴தம் பரிசாரயமானம். தஸ்ஸ ஏவம் ஹோதி – ‘மயம் கோ² புப்³பே³ அகா³ரியபூ⁴தா ஸமானா பஞ்சஹி காமகு³ணேஹி ஸமப்பிதா ஸமங்கீ³பூ⁴தா பரிசாரிம்ஹா; ஸம்விஜ்ஜந்தி கோ² பன மே குலே போ⁴கா³. ஸக்கா போ⁴கே³ ச பு⁴ஞ்ஜிதும் புஞ்ஞானி ச காதும். யம்னூனாஹம் ஸிக்க²ம் பச்சக்கா²ய ஹீனாயாவத்தித்வா போ⁴கே³ ச பு⁴ஞ்ஜேய்யம் புஞ்ஞானி ச கரேய்ய’ந்தி! ஸோ ஸிக்க²ம் பச்சக்கா²ய ஹீனாயாவத்ததி. அயம் வுச்சதி, பி⁴க்க²வே, பி⁴க்கு² ஆவட்டப⁴யஸ்ஸ பீ⁴தோ ஸிக்க²ம் பச்சக்கா²ய ஹீனாயாவத்தோ. ஆவட்டப⁴யந்தி கோ², பி⁴க்க²வே, பஞ்சன்னேதம் காமகு³ணானம் அதி⁴வசனம். இத³ம் வுச்சதி, பி⁴க்க²வே, ஆவட்டப⁴யம்.

‘‘கதமஞ்ச, பி⁴க்க²வே, ஸுஸுகாப⁴யம்? இத⁴, பி⁴க்க²வே, ஏகச்சோ குலபுத்தோ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘ஓதிண்ணோம்ஹி ஜாதியா ஜராய மரணேன ஸோகேஹி பரிதே³வேஹி து³க்கே²ஹி தோ³மனஸ்ஸேஹி உபாயாஸேஹி, து³க்கோ²திண்ணோ து³க்க²பரேதோ; அப்பேவ நாம இமஸ்ஸ கேவலஸ்ஸ து³க்க²க்க²ந்த⁴ஸ்ஸ அந்தகிரியா பஞ்ஞாயேதா²’தி! ஸோ ஏவம் பப்³ப³ஜிதோ ஸமானோ புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன அனுபட்டி²தாய ஸதியா அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன ஸிக்க²ம் பச்சக்கா²ய ஹீனாயாவத்ததி. அயம் வுச்சதி, பி⁴க்க²வே, பி⁴க்கு² ஸுஸுகாப⁴யஸ்ஸ பீ⁴தோ ஸிக்க²ம் பச்சக்கா²ய ஹீனாயாவத்தோ. ஸுஸுகாப⁴யந்தி கோ², பி⁴க்க²வே, மாதுகா³மஸ்ஸேதம் அதி⁴வசனம். இத³ம் வுச்சதி, பி⁴க்க²வே, ஸுஸுகாப⁴யம். இமானி கோ², பி⁴க்க²வே, சத்தாரி ப⁴யானி இதே⁴கச்சஸ்ஸ குலபுத்தஸ்ஸ இமஸ்மிம் த⁴ம்மவினயே அகா³ரஸ்மா அனகா³ரியம் பப்³ப³ஜிதஸ்ஸ பாடிகங்கி²தப்³பா³னீ’’தி. து³தியம்.