8. த³க்கி²ணஸுத்தம்

78. ‘‘சதஸ்ஸோ இமா, பி⁴க்க²வே, த³க்கி²ணா விஸுத்³தி⁴யோ. கதமா சதஸ்ஸோ? அத்தி², பி⁴க்க²வே, த³க்கி²ணா தா³யகதோ விஸுஜ்ஜ²தி, நோ படிக்³கா³ஹகதோ; அத்தி², பி⁴க்க²வே, த³க்கி²ணா படிக்³கா³ஹகதோ விஸுஜ்ஜ²தி, நோ தா³யகதோ; அத்தி², பி⁴க்க²வே, த³க்கி²ணா நேவ தா³யகதோ விஸுஜ்ஜ²தி, நோ படிக்³கா³ஹகதோ; அத்தி², பி⁴க்க²வே, த³க்கி²ணா தா³யகதோ சேவ விஸுஜ்ஜ²தி படிக்³கா³ஹகதோ ச.

‘‘கத²ஞ்ச, பி⁴க்க²வே, த³க்கி²ணா தா³யகதோ விஸுஜ்ஜ²தி, நோ படிக்³கா³ஹகதோ? இத⁴, பி⁴க்க²வே, தா³யகோ ஹோதி ஸீலவா கல்யாணத⁴ம்மோ; படிக்³கா³ஹகா ஹோந்தி து³ஸ்ஸீலா பாபத⁴ம்மா [படிக்³கா³ஹகோ ஹோதி து³ஸ்ஸீலோ பாபத⁴ம்மோ (ஸ்யா. கம். க.) ம. நி. 3.381 ஓலோகேதப்³ப³ம்]. ஏவம் கோ², பி⁴க்க²வே, த³க்கி²ணா தா³யகதோ விஸுஜ்ஜ²தி, நோ படிக்³கா³ஹகதோ.

‘‘கத²ஞ்ச, பி⁴க்க²வே, த³க்கி²ணா படிக்³கா³ஹகதோ விஸுஜ்ஜ²தி, நோ தா³யகதோ? இத⁴, பி⁴க்க²வே, தா³யகோ ஹோதி து³ஸ்ஸீலோ பாபத⁴ம்மோ; படிக்³கா³ஹகா ஹோந்தி ஸீலவந்தோ கல்யாணத⁴ம்மா. ஏவம் கோ², பி⁴க்க²வே, த³க்கி²ணா படிக்³கா³ஹகதோ விஸுஜ்ஜ²தி, நோ தா³யகதோ.

‘‘கத²ஞ்ச, பி⁴க்க²வே, த³க்கி²ணா நேவ தா³யகதோ விஸுஜ்ஜ²தி, நோ படிக்³கா³ஹகதோ? இத⁴, பி⁴க்க²வே, தா³யகோ ஹோதி து³ஸ்ஸீலோ பாபத⁴ம்மோ; படிக்³கா³ஹகாபி ஹோந்தி து³ஸ்ஸீலா பாபத⁴ம்மா. ஏவம் கோ², பி⁴க்க²வே, த³க்கி²ணா நேவ தா³யகதோ விஸுஜ்ஜ²தி, நோ படிக்³கா³ஹகதோ.

‘‘கத²ஞ்ச, பி⁴க்க²வே, த³க்கி²ணா தா³யகதோ சேவ விஸுஜ்ஜ²தி படிக்³கா³ஹகதோ ச? இத⁴, பி⁴க்க²வே, தா³யகோ ஹோதி ஸீலவா கல்யாணத⁴ம்மோ; படிக்³கா³ஹகாபி ஹோந்தி ஸீலவந்தோ கல்யாணத⁴ம்மா. ஏவம் கோ², பி⁴க்க²வே, த³க்கி²ணா தா³யகதோ சேவ விஸுஜ்ஜ²தி படிக்³கா³ஹகதோ ச. இமா கோ², பி⁴க்க²வே, சதஸ்ஸோ த³க்கி²ணா விஸுத்³தி⁴யோ’’தி. அட்ட²மம்.