3. ஸப்புரிஸஸுத்தம்

73. ‘‘சதூஹி, பி⁴க்க²வே, த⁴ம்மேஹி ஸமன்னாக³தோ அஸப்புரிஸோ வேதி³தப்³போ³. கதமேஹி சதூஹி? இத⁴, பி⁴க்க²வே, அஸப்புரிஸோ யோ ஹோதி பரஸ்ஸ அவண்ணோ தம் அபுட்டோ²பி பாது கரோதி, கோ பன வாதோ³ புட்ட²ஸ்ஸ! புட்டோ² கோ² பன பஞ்ஹாபி⁴னீதோ அஹாபேத்வா அலம்பி³த்வா பரிபூரம் வித்தா²ரேன பரஸ்ஸ அவண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, அஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, அஸப்புரிஸோ யோ ஹோதி பரஸ்ஸ வண்ணோ தம் புட்டோ²பி ந பாது கரோதி, கோ பன வாதோ³ அபுட்ட²ஸ்ஸ! புட்டோ² கோ² பன பஞ்ஹாபி⁴னீதோ ஹாபேத்வா லம்பி³த்வா அபரிபூரம் அவித்தா²ரேன பரஸ்ஸ வண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, அஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, அஸப்புரிஸோ யோ ஹோதி அத்தனோ அவண்ணோ தம் புட்டோ²பி ந பாது கரோதி, கோ பன வாதோ³ அபுட்ட²ஸ்ஸ! புட்டோ² கோ² பன பஞ்ஹாபி⁴னீதோ ஹாபேத்வா லம்பி³த்வா அபரிபூரம் அவித்தா²ரேன அத்தனோ அவண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, அஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, அஸப்புரிஸோ யோ ஹோதி அத்தனோ வண்ணோ தம் அபுட்டோ²பி பாது கரோதி, கோ பன வாதோ³ புட்ட²ஸ்ஸ! புட்டோ² கோ² பன பஞ்ஹாபி⁴னீதோ அஹாபேத்வா அலம்பி³த்வா பரிபூரம் வித்தா²ரேன அத்தனோ வண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, அஸப்புரிஸோ அயம் ப⁴வந்தி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ அஸப்புரிஸோ வேதி³தப்³போ³.

‘‘சதூஹி, பி⁴க்க²வே, த⁴ம்மேஹி ஸமன்னாக³தோ ஸப்புரிஸோ வேதி³தப்³போ³. கதமேஹி சதூஹி? இத⁴, பி⁴க்க²வே, ஸப்புரிஸோ யோ ஹோதி பரஸ்ஸ அவண்ணோ தம் புட்டோ²பி ந பாது கரோதி, கோ பன வாதோ³ அபுட்ட²ஸ்ஸ! புட்டோ² கோ² பன பஞ்ஹாபி⁴னீதோ ஹாபேத்வா லம்பி³த்வா அபரிபூரம் அவித்தா²ரேன பரஸ்ஸ அவண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, ஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, ஸப்புரிஸோ யோ ஹோதி பரஸ்ஸ வண்ணோ தம் அபுட்டோ²பி பாது கரோதி, கோ பன வாதோ³ புட்ட²ஸ்ஸ! புட்டோ² கோ² பன பஞ்ஹாபி⁴னீதோ அஹாபேத்வா அலம்பி³த்வா பரிபூரம் வித்தா²ரேன பரஸ்ஸ வண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, ஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, ஸப்புரிஸோ யோ ஹோதி அத்தனோ அவண்ணோ தம் அபுட்டோ²பி பாது கரோதி, கோ பன வாதோ³ புட்ட²ஸ்ஸ! புட்டோ² கோ² பன பஞ்ஹாபி⁴னீதோ அஹாபேத்வா அலம்பி³த்வா பரிபூரம் வித்தா²ரேன அத்தனோ அவண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, ஸப்புரிஸோ அயம் ப⁴வந்தி.

‘‘புன சபரம், பி⁴க்க²வே, ஸப்புரிஸோ யோ ஹோதி அத்தனோ வண்ணோ தம் புட்டோ²பி ந பாது கரோதி, கோ பன வாதோ³ அபுட்ட²ஸ்ஸ! புட்டோ² கோ² பன பஞ்ஹாபி⁴னீதோ ஹாபேத்வா லம்பி³த்வா அபரிபூரம் அவித்தா²ரேன அத்தனோ வண்ணம் பா⁴ஸிதா ஹோதி. வேதி³தப்³ப³மேதம், பி⁴க்க²வே, ஸப்புரிஸோ அயம் ப⁴வந்தி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தோ ஸப்புரிஸோ வேதி³தப்³போ³.

‘‘ஸேய்யதா²பி, பி⁴க்க²வே, வது⁴கா யஞ்ஞதே³வ ரத்திம் வா தி³வம் வா ஆனீதா ஹோதி, தாவதே³வஸ்ஸா திப்³ப³ம் ஹிரோத்தப்பம் பச்சுபட்டி²தம் ஹோதி ஸஸ்ஸுயாபி ஸஸுரேபி ஸாமிகேபி அந்தமஸோ தா³ஸகம்மகரபோரிஸேஸு. ஸா அபரேன ஸமயேன ஸம்வாஸமன்வாய விஸ்ஸாஸமன்வாய ஸஸ்ஸும்பி ஸஸுரம்பி ஸாமிகம்பி ஏவமாஹ – ‘அபேத², கிம் பன தும்ஹே ஜானாதா²’தி! ஏவமேவம் கோ², பி⁴க்க²வே, இதே⁴கச்சோ பி⁴க்கு² யஞ்ஞதே³வ ரத்திம் வா தி³வம் வா அகா³ரஸ்மா அனகா³ரியம் பப்³ப³ஜிதோ ஹோதி, தாவதே³வஸ்ஸ திப்³ப³ம் ஹிரோத்தப்பம் பச்சுபட்டி²தம் ஹோதி பி⁴க்கூ²ஸு பி⁴க்கு²னீஸு உபாஸகேஸு உபாஸிகாஸு அந்தமஸோ ஆராமிகஸமணுத்³தே³ஸேஸு. ஸோ அபரேன ஸமயேன ஸம்வாஸமன்வாய விஸ்ஸாஸமன்வாய ஆசரியம்பி உபஜ்ஜா²யம்பி ஏவமாஹ – ‘அபேத², கிம் பன தும்ஹே ஜானாதா²’தி! தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘அது⁴னாக³தவது⁴காஸமேன சேதஸா விஹரிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியம்.