2. ஆனண்யஸுத்தம்

62. அத² கோ² அனாத²பிண்டி³கோ க³ஹபதி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அனாத²பிண்டி³கம் க³ஹபதிம் ப⁴க³வா ஏதத³வோச –

‘‘சத்தாரிமானி, க³ஹபதி, ஸுகா²னி அதி⁴க³மனீயானி கி³ஹினா காமபோ⁴கி³னா காலேன காலம் ஸமயேன ஸமயம் உபாதா³ய. கதமானி சத்தாரி? அத்தி²ஸுக²ம், போ⁴க³ஸுக²ம், ஆனண்யஸுக²ம் [அணணஸுக²ம் (ஸீ. ஸ்யா. கம். பீ.)], அனவஜ்ஜஸுக²ம்.

‘‘கதமஞ்ச, க³ஹபதி, அத்தி²ஸுக²ம்? இத⁴, க³ஹபதி, குலபுத்தஸ்ஸ போ⁴கா³ ஹோந்தி உட்டா²னவீரியாதி⁴க³தா பா³ஹாப³லபரிசிதா ஸேதா³வக்கி²த்தா த⁴ம்மிகா த⁴ம்மலத்³தா⁴. ஸோ ‘போ⁴கா³ மே அத்தி² உட்டா²னவீரியாதி⁴க³தா பா³ஹாப³லபரிசிதா ஸேதா³வக்கி²த்தா த⁴ம்மிகா த⁴ம்மலத்³தா⁴’தி அதி⁴க³ச்ச²தி ஸுக²ம், அதி⁴க³ச்ச²தி ஸோமனஸ்ஸம். இத³ம் வுச்சதி, க³ஹபதி, அத்தி²ஸுக²ம்.

‘‘கதமஞ்ச, க³ஹபதி, போ⁴க³ஸுக²ம்? இத⁴, க³ஹபதி, குலபுத்தோ உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி பரிபு⁴ஞ்ஜதி புஞ்ஞானி ச கரோதி. ஸோ ‘உட்டா²னவீரியாதி⁴க³தேஹி போ⁴கே³ஹி பா³ஹாப³லபரிசிதேஹி ஸேதா³வக்கி²த்தேஹி த⁴ம்மிகேஹி த⁴ம்மலத்³தே⁴ஹி பரிபு⁴ஞ்ஜாமி புஞ்ஞானி ச கரோமீ’தி அதி⁴க³ச்ச²தி ஸுக²ம், அதி⁴க³ச்ச²தி ஸோமனஸ்ஸம். இத³ம் வுச்சதி, க³ஹபதி, போ⁴க³ஸுக²ம்.

‘‘கதமஞ்ச, க³ஹபதி, ஆனண்யஸுக²ம்? இத⁴, க³ஹபதி, குலபுத்தோ ந கஸ்ஸசி கிஞ்சி தா⁴ரேதி அப்பம் வா ப³ஹும் வா. ஸோ ‘ந கஸ்ஸசி கிஞ்சி தா⁴ரேமி [கிஞ்சி வா தே³தி (க.)] அப்பம் வா ப³ஹும் வா’தி அதி⁴க³ச்ச²தி ஸுக²ம், அதி⁴க³ச்ச²தி ஸோமனஸ்ஸம். இத³ம் வுச்சதி, க³ஹபதி, ஆனண்யஸுக²ம்.

‘‘கதமஞ்ச, க³ஹபதி, அனவஜ்ஜஸுக²ம்? இத⁴, க³ஹபதி, அரியஸாவகோ அனவஜ்ஜேன காயகம்மேன ஸமன்னாக³தோ ஹோதி, அனவஜ்ஜேன வசீகம்மேன ஸமன்னாக³தோ ஹோதி, அனவஜ்ஜேன மனோகம்மேன ஸமன்னாக³தோ ஹோதி. ஸோ ‘அனவஜ்ஜேனம்ஹி காயகம்மேன ஸமன்னாக³தோ, அனவஜ்ஜேன வசீகம்மேன ஸமன்னாக³தோ, அனவஜ்ஜேன மனோகம்மேன ஸமன்னாக³தோ’தி அதி⁴க³ச்ச²தி ஸுக²ம், அதி⁴க³ச்ச²தி ஸோமனஸ்ஸம். இத³ம் வுச்சதி, க³ஹபதி, அனவஜ்ஜஸுக²ம். இமானி கோ², க³ஹபதி, சத்தாரி ஸுகா²னி அதி⁴க³மனீயானி கி³ஹினா காமபோ⁴கி³னா காலேன காலம் ஸமயேன ஸமயம் உபாதா³யா’’தி.

‘‘ஆனண்யஸுக²ம் ஞத்வான, அதோ² அத்தி²ஸுக²ம் பரம்;

பு⁴ஞ்ஜம் போ⁴க³ஸுக²ம் மச்சோ, ததோ பஞ்ஞா விபஸ்ஸதி.

‘‘விபஸ்ஸமானோ ஜானாதி, உபோ⁴ போ⁴கே³ ஸுமேத⁴ஸோ;

அனவஜ்ஜஸுக²ஸ்ஸேதம், கலம் நாக்³க⁴தி ஸோளஸி’’ந்தி. து³தியம்;