8. விஸாக²ஸுத்தம்

48. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா விஸாகோ² பஞ்சாலபுத்தோ [பஞ்சாலிபுத்தோ (ஸீ. ஸ்யா. கம். பீ.)] உபட்டா²னஸாலாயம் பி⁴க்கூ² த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹம்ஸேதி, போரியா வாசாய விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா பரியாபன்னாய அனிஸ்ஸிதாய. அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேன உபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி –

‘‘கோ நு கோ², பி⁴க்க²வே, உபட்டா²னஸாலாயம் பி⁴க்கூ² த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹம்ஸேதி போரியா வாசாய விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா பரியாபன்னாய அனிஸ்ஸிதாயா’’தி? ‘‘ஆயஸ்மா, ப⁴ந்தே, விஸாகோ² பஞ்சாலபுத்தோ உபட்டா²னஸாலாயம் பி⁴க்கூ² த⁴ம்மியா கதா²ய ஸந்த³ஸ்ஸேதி ஸமாத³பேதி ஸமுத்தேஜேதி ஸம்பஹம்ஸேதி போரியா வாசாய விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா பரியாபன்னாய அனிஸ்ஸிதாயா’’தி.

அத² கோ² ப⁴க³வா ஆயஸ்மந்தம் விஸாக²ம் பஞ்சாலபுத்தம் ஏதத³வோச – ‘‘ஸாது⁴ ஸாது⁴, விஸாக²! ஸாது⁴ கோ² த்வம், விஸாக², பி⁴க்கூ² த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி போரியா வாசாய விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா பரியாபன்னாய அனிஸ்ஸிதாயாதி.

‘‘நாபா⁴ஸமானம் ஜானந்தி, மிஸ்ஸம் பா³லேஹி பண்டி³தம்;

பா⁴ஸமானஞ்ச ஜானந்தி, தே³ஸேந்தம் அமதம் பத³ம்.

‘‘பா⁴ஸயே ஜோதயே த⁴ம்மம், பக்³க³ண்ஹே இஸினம் த⁴ஜம்;

ஸுபா⁴ஸிதத⁴ஜா இஸயோ, த⁴ம்மோ ஹி இஸினம் த⁴ஜோ’’தி. அட்ட²மம்;