8. பதிலீனஸுத்தம்

38. ‘‘பனுண்ணபச்சேகஸச்சோ [பணுன்னபச்சேகஸச்சோ (?)], பி⁴க்க²வே, பி⁴க்கு² ‘ஸமவயஸட்டே²ஸனோ பஸ்ஸத்³த⁴காயஸங்கா²ரோ பதிலீனோ’தி வுச்சதி. கத²ஞ்ச, பி⁴க்க²வே, பி⁴க்கு² பனுண்ணபச்சேகஸச்சோ ஹோதி? இத⁴, பி⁴க்க²வே, பி⁴க்கு²னோ யானி தானி புது²ஸமணப்³ராஹ்மணானம் புது²பச்சேகஸச்சானி, ஸேய்யதி²த³ம் – ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா, ஹோதி ததா²க³தோ பரம் மரணாதி வா, ந ஹோதி ததா²க³தோ பரம் மரணாதி வா, ஹோதி ச ந ச ஹோதி ததா²க³தோ பரம் மரணாதி வா, நேவ ஹோதி ந ந ஹோதி ததா²க³தோ பரம் மரணாதி வா; ஸப்³பா³னி தானி நுண்ணானி ஹோந்தி பனுண்ணானி சத்தானி வந்தானி முத்தானி பஹீனானி படினிஸ்ஸட்டா²னி. ஏவம் கோ², பி⁴க்க²வே, பி⁴க்கு² பனுண்ணபச்சேகஸச்சோ ஹோதி.

‘‘கத²ஞ்ச, பி⁴க்க²வே, பி⁴க்கு² ஸமவயஸட்டே²ஸனோ ஹோதி? இத⁴, பி⁴க்க²வே, பி⁴க்கு²னோ காமேஸனா பஹீனா ஹோதி, ப⁴வேஸனா பஹீனா ஹோதி, ப்³ரஹ்மசரியேஸனா படிப்பஸ்ஸத்³தா⁴. ஏவம் கோ², பி⁴க்க²வே, பி⁴க்கு² ஸமவயஸட்டே²ஸனோ ஹோதி.

‘‘கத²ஞ்ச, பி⁴க்க²வே, பி⁴க்கு² பஸ்ஸத்³த⁴காயஸங்கா²ரோ ஹோதி? இத⁴, பி⁴க்க²வே, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹரதி. ஏவம் கோ², பி⁴க்க²வே, பி⁴க்கு² பஸ்ஸத்³த⁴காயஸங்கா²ரோ ஹோதி.

‘‘கத²ஞ்ச, பி⁴க்க²வே, பி⁴க்கு² பதிலீனோ ஹோதி? இத⁴, பி⁴க்க²வே, பி⁴க்கு²னோ அஸ்மிமானோ பஹீனோ ஹோதி உச்சி²ன்னமூலோ தாலாவத்து²கதோ அனபா⁴வம்கதோ ஆயதிம் அனுப்பாத³த⁴ம்மோ. ஏவம் கோ², பி⁴க்க²வே, பி⁴க்கு² பதிலீனோ ஹோதி. பனுண்ணபச்சேகஸச்சோ, பி⁴க்க²வே, பி⁴க்கு² ‘ஸமவயஸட்டே²ஸனோ பஸ்ஸத்³த⁴காயஸங்கா²ரோ பதிலீனோ’தி வுச்சதீ’’தி.

[இதிவு. 55 இதிவுத்தகேபி] ‘‘காமேஸனா ப⁴வேஸனா, ப்³ரஹ்மசரியேஸனா ஸஹ;

இதி ஸச்சபராமாஸோ, தி³ட்டி²ட்டா²னா ஸமுஸ்ஸயா.

[இதிவு. 55 இதிவுத்தகேபி] ‘‘ஸப்³ப³ராக³விரத்தஸ்ஸ, தண்ஹக்க²யவிமுத்தினோ;

ஏஸனா படினிஸ்ஸட்டா², தி³ட்டி²ட்டா²னா ஸமூஹதா.

‘‘ஸ வே ஸந்தோ ஸதோ பி⁴க்கு², பஸ்ஸத்³தோ⁴ அபராஜிதோ;

மானாபி⁴ஸமயா பு³த்³தோ⁴, பதிலீனோதி வுச்சதீ’’தி. அட்ட²மம்;