5. வஸ்ஸகாரஸுத்தம்

35. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² வஸ்ஸகாரோ ப்³ராஹ்மணோ மக³த⁴மஹாமத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² வஸ்ஸகாரோ ப்³ராஹ்மணோ மக³த⁴மஹாமத்தோ ப⁴க³வந்தம் ஏதத³வோச –

‘‘சதூஹி கோ² மயம், போ⁴ கோ³தம, த⁴ம்மேஹி ஸமன்னாக³தம் மஹாபஞ்ஞம் மஹாபுரிஸம் பஞ்ஞாபேம. கதமேஹி சதூஹி? இத⁴, போ⁴ கோ³தம, ப³ஹுஸ்ஸுதோ ஹோதி தஸ்ஸ தஸ்ஸேவ ஸுதஜாதஸ்ஸ தஸ்ஸ தஸ்ஸேவ கோ² பன பா⁴ஸிதஸ்ஸ அத்த²ம் ஜானாதி – ‘அயம் இமஸ்ஸ பா⁴ஸிதஸ்ஸ அத்தோ², அயம் இமஸ்ஸ பா⁴ஸிதஸ்ஸ அத்தோ²’தி. ஸதிமா கோ² பன ஹோதி சிரகதம்பி சிரபா⁴ஸிதம்பி ஸரிதா அனுஸ்ஸரிதா யானி கோ² பன தானி க³ஹட்ட²கானி கிம்கரணீயானி, தத்த² த³க்கோ² ஹோதி அனலஸோ, தத்ருபாயாய வீமம்ஸாய ஸமன்னாக³தோ அலம் காதும் அலம் ஸம்விதா⁴தும். இமேஹி கோ² மயம், போ⁴ கோ³தம, சதூஹி த⁴ம்மேஹி ஸமன்னாக³தம் மஹாபஞ்ஞம் மஹாபுரிஸம் பஞ்ஞாபேம. ஸசே மே [ஸசே பன மே (ஸீ. க.), ஸசே மே பன (பீ.)], போ⁴ கோ³தம, அனுமோதி³தப்³ப³ம் அனுமோத³து மே ப⁴வம் கோ³தமோ; ஸசே பன மே, போ⁴ கோ³தம, படிக்கோஸிதப்³ப³ம் படிக்கோஸது மே ப⁴வம் கோ³தமோ’’தி.

‘‘நேவ கோ² த்யாஹம், ப்³ராஹ்மண, அனுமோதா³மி ந படிக்கோஸாமி. சதூஹி கோ² அஹம், ப்³ராஹ்மண, த⁴ம்மேஹி ஸமன்னாக³தம் மஹாபஞ்ஞம் மஹாபுரிஸம் பஞ்ஞாபேமி. கதமேஹி சதூஹி? இத⁴, ப்³ராஹ்மண, ப³ஹுஜனஹிதாய படிபன்னோ ஹோதி ப³ஹுஜனஸுகா²ய; ப³ஹுஸ்ஸ ஜனதா அரியே ஞாயே பதிட்டா²பிதா, யதி³த³ம் கல்யாணத⁴ம்மதா குஸலத⁴ம்மதா. ஸோ யம் விதக்கம் ஆகங்க²தி விதக்கேதும் தம் விதக்கம் விதக்கேதி, யம் விதக்கம் நாகங்க²தி விதக்கேதும் ந தம் விதக்கம் விதக்கேதி; யம் ஸங்கப்பம் ஆகங்க²தி ஸங்கப்பேதும் தம் ஸங்கப்பம் ஸங்கப்பேதி, யம் ஸங்கப்பம் நாகங்க²தி ஸங்கப்பேதும் ந தம் ஸங்கப்பம் ஸங்கப்பேதி. இதி சேதோவஸிப்பத்தோ ஹோதி விதக்கபதே². சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ ஹோதி அகிச்ச²லாபீ⁴ அகஸிரலாபீ⁴. ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. நேவ கோ² த்யாஹம், ப்³ராஹ்மண, அனுமோதா³மி ந பன படிக்கோஸாமி. இமேஹி கோ² அஹம், ப்³ராஹ்மண, சதூஹி த⁴ம்மேஹி ஸமன்னாக³தம் மஹாபஞ்ஞம் மஹாபுரிஸம் பஞ்ஞாபேமீ’’தி.

‘‘அச்ச²ரியம், போ⁴ கோ³தம, அப்³பு⁴தம், போ⁴ கோ³தம! யாவ ஸுபா⁴ஸிதம் சித³ம் போ⁴தா கோ³தமேன. இமேஹி ச மயம், போ⁴ கோ³தம, சதூஹி த⁴ம்மேஹி ஸமன்னாக³தம் ப⁴வந்தம் கோ³தமம் தா⁴ரேம; ப⁴வஞ்ஹி கோ³தமோ ப³ஹுஜனஹிதாய படிபன்னோ ப³ஹுஜனஸுகா²ய; ப³ஹு தே [ப³ஹுஸ்ஸ (ஸ்யா. கம். க.)] ஜனதா அரியே ஞாயே பதிட்டா²பிதா, யதி³த³ம் கல்யாணத⁴ம்மதா குஸலத⁴ம்மதா. ப⁴வஞ்ஹி கோ³தமோ யம் விதக்கம் ஆகங்க²தி விதக்கேதும் தம் விதக்கம் விதக்கேதி, யம் விதக்கம் நாகங்க²தி விதக்கேதும் ந தம் விதக்கம் விதக்கேதி, யம் ஸங்கப்பம் ஆகங்க²தி ஸங்கப்பேதும் தம் ஸங்கப்பம் ஸங்கப்பேதி, யம் ஸங்கப்பம் நாகங்க²தி ஸங்கப்பேதும் ந தம் ஸங்கப்பம் ஸங்கப்பேதி. ப⁴வஞ்ஹி கோ³தமோ சேதோவஸிப்பத்தோ விதக்கபதே². ப⁴வஞ்ஹி கோ³தமோ சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ அகிச்ச²லாபீ⁴ அகஸிரலாபீ⁴. ப⁴வஞ்ஹி கோ³தமோ ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி.

‘‘அத்³தா⁴ கோ² த்யாஹம், ப்³ராஹ்மண, ஆஸஜ்ஜ உபனீய வாசா பா⁴ஸிதா. அபி ச, த்யாஹம் ப்³யாகரிஸ்ஸாமி – ‘அஹஞ்ஹி, ப்³ராஹ்மண, ப³ஹுஜனஹிதாய படிபன்னோ ப³ஹுஜனஸுகா²ய; ப³ஹு மே [ப³ஹுஸ்ஸ (ஸ்யா. கம். க.)] ஜனதா அரியே ஞாயே பதிட்டா²பிதா, யதி³த³ம் கல்யாணத⁴ம்மதா குஸலத⁴ம்மதா. அஹஞ்ஹி, ப்³ராஹ்மண, யம் விதக்கம் ஆகங்கா²மி விதக்கேதும் தம் விதக்கம் விதக்கேமி, யம் விதக்கம் நாகங்கா²மி விதக்கேதும் ந தம் விதக்கம் விதக்கேமி, யம் ஸங்கப்பம் ஆகங்கா²மி ஸங்கப்பேதும் தம் ஸங்கப்பம் ஸங்கப்பேமி, யம் ஸங்கப்பம் நாகங்கா²மி ஸங்கப்பேதும் ந தம் ஸங்கப்பம் ஸங்கப்பேமி. அஹஞ்ஹி, ப்³ராஹ்மண, சேதோவஸிப்பத்தோ விதக்கபதே². அஹஞ்ஹி, ப்³ராஹ்மண, சதுன்னம் ஜா²னானம் ஆபி⁴சேதஸிகானம் தி³ட்ட²த⁴ம்மஸுக²விஹாரானம் நிகாமலாபீ⁴ அகிச்ச²லாபீ⁴ அகஸிரலாபீ⁴. அஹஞ்ஹி, ப்³ராஹ்மண, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமீ’’’தி.

‘‘யோ வேதி³ ஸப்³ப³ஸத்தானம், மச்சுபாஸப்பமோசனம்;

ஹிதம் தே³வமனுஸ்ஸானம், ஞாயம் த⁴ம்மம் பகாஸயி;

யம் வே தி³ஸ்வா ச ஸுத்வா ச, பஸீத³ந்தி ப³ஹூ ஜனா [பஸீத³தி ப³ஹுஜ்ஜனோ (ஸீ. ஸ்யா. கம். பீ.)].

‘‘மக்³கா³மக்³க³ஸ்ஸ குஸலோ, கதகிச்சோ அனாஸவோ;

பு³த்³தோ⁴ அந்திமஸாரீரோ [அந்திமதா⁴ரிதோ (க.)], ‘‘(மஹாபஞ்ஞோ) [( ) ஸ்யா. போத்த²கே நத்தி²] மஹாபுரிஸோதி வுச்சதீ’’தி. பஞ்சமம்;