4. து³தியக²தஸுத்தம்

4. ‘‘சதூஸு, பி⁴க்க²வே, மிச்சா² படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. கதமேஸு சதூஸு? மாதரி, பி⁴க்க²வே, மிச்சா² படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. பிதரி, பி⁴க்க²வே, மிச்சா² படிபஜ்ஜமானோ…பே… ததா²க³தே, பி⁴க்க²வே, மிச்சா² படிபஜ்ஜமானோ…பே… ததா²க³தஸாவகே, பி⁴க்க²வே, மிச்சா² படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி. இமேஸு கோ², பி⁴க்க²வே, சதூஸு மிச்சா² படிபஜ்ஜமானோ பா³லோ அப்³யத்தோ அஸப்புரிஸோ க²தம் உபஹதம் அத்தானம் பரிஹரதி, ஸாவஜ்ஜோ ச ஹோதி ஸானுவஜ்ஜோ ச விஞ்ஞூனம், ப³ஹுஞ்ச அபுஞ்ஞம் பஸவதி.

‘‘சதூஸு, பி⁴க்க²வே, ஸம்மா படிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. கதமேஸு சதூஸு? மாதரி, பி⁴க்க²வே, ஸம்மா படிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. பிதரி, பி⁴க்க²வே, ஸம்மா படிபஜ்ஜமானோ…பே… ததா²க³தே, பி⁴க்க²வே, ஸம்மா படிபஜ்ஜமானோ…பே… ததா²க³தஸாவகே, பி⁴க்க²வே, ஸம்மா படிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதி. இமேஸு கோ², பி⁴க்க²வே, சதூஸு ஸம்மா படிபஜ்ஜமானோ பண்டி³தோ வியத்தோ ஸப்புரிஸோ அக்க²தம் அனுபஹதம் அத்தானம் பரிஹரதி, அனவஜ்ஜோ ச ஹோதி அனனுவஜ்ஜோ ச விஞ்ஞூனம், ப³ஹுஞ்ச புஞ்ஞம் பஸவதீ’’தி.

‘‘மாதரி பிதரி சாபி, யோ மிச்சா² படிபஜ்ஜதி;

ததா²க³தே வா ஸம்பு³த்³தே⁴, அத² வா தஸ்ஸ ஸாவகே;

ப³ஹுஞ்ச ஸோ பஸவதி, அபுஞ்ஞம் தாதி³ஸோ நரோ.

‘‘தாய நம் அத⁴ம்மசரியாய [தாய அத⁴ம்மசரியாய (ஸீ. ஸ்யா. கம். பீ.)], மாதாபிதூஸு பண்டி³தா;

இதே⁴வ நம் க³ரஹந்தி, பேச்சாபாயஞ்ச க³ச்ச²தி.

‘‘மாதரி பிதரி சாபி, யோ ஸம்மா படிபஜ்ஜதி;

ததா²க³தே வா ஸம்பு³த்³தே⁴, அத² வா தஸ்ஸ ஸாவகே;

ப³ஹுஞ்ச ஸோ பஸவதி, புஞ்ஞம் ஏதாதி³ஸோ [புஞ்ஞம்பி தாதி³ஸோ (ஸீ. ஸ்யா. கம்.)] நரோ.

‘‘தாய நம் த⁴ம்மசரியாய, மாதாபிதூஸு பண்டி³தா;

இதே⁴வ [இத⁴ சேவ (ஸீ.)] நம் பஸம்ஸந்தி, பேச்ச ஸக்³கே³ பமோத³தீ’’தி [ஸக்³கே³ ச மோத³தீதி (ஸீ.)]. சதுத்த²ம்;